1, 2. Dahaka dainai baita henanadai na namo?

NATU edia henanadai karana mani aita laloa: Idia momo na hereva e dibamu neganai, e henanadai momomu, ina laulau ai o itaiamu heḡereḡerena. Henanadai ini bamodia e henimu: Ina be dahaka dainai? eiava, Una be dahaka? Reana bo hekwarahimu edia henanadai bo haerelaimu. To, emu haere dainai henanadai ma ta be henimu: Dahaka dainai?

² Dia natu mo e henanadaimu. Ita ta bada ta laomu neganai, ta henanadai momomu. Unu ta kara tomamu badina ta uramu dala maorona baita dibaia, dika ihahanaidia daladia baita diba, eiava ta daradaralaimu ḡaudia baita hamaoromaorodia. To, taunimanima momo ese mai anina bada ḡaudia na se henanadailaimu. Bona haeredia danu se uramu bae tahu.

3. Dahaka dainai momo na asie uramu henanadai badadia haeredia bae tahu?

³ Ina buka ena rau 3 bona 6 ai, eiava ina karoa matamanai henanadai miadia mani a lalodia.  Ini na henanadai badadia haida. To, taunimanima momo na asie uramu haeredia bae tahu. Dahaka dainai? Baibul ai haeredia mimia, a? Haida na e laloamu haeredia ilalopararalaidia na auka. Ma haida na e hemaraimu dainai asie uramu bae henanadailai. Bona ma haida na e laloamu unu henanadai haeredia na tomadiho igunalaina taudia bona e hahedibalaimu taudia sibodia ese bae tahu. To, emu lalohadai be dahaka?

4, 5. Baita heni henanadai badadia haida be dahaka, bona dahaka dainai haeredia baita tahu na mai ena namo?

⁴ Reana oi danu o uramu henanadai badadia haeredia ba diba. Una dainai nega haida na bo henanadaimu: ‘Mauri anina be dahaka? Mauri be ina mo, eiava? Dirava be Dirava ede bamona?’ Henanadai unu bamodia ba heni na asi ena kerere, bona ḡau badana na basio hesiku ela bona haere maorodia ba davari. Hahediba tauna hereadaena Iesu Keriso na e gwa: “Ba noinoi, do baine henimui; ba tahua [“ba tahua noho,” Nega Matamata Baibel], do ba davaria; ba pidipidi, iduara baine hekeho emui.”​—Mataio 7:7.

⁵ Henanadai badadia haeredia ‘ba tahudia noho’ na mai ena namo. (Hereva Lada-isidia 2:1-5) Ena be haida na dahaka bae gwa, to haere na Baibul ai mimia, bona bo davaridia dibamu. Unu haere ilalopararalaidia na dia auka. Bona idia ese helaro bona moale be henimumu. To, namona na taunimanima momo ese e daradaralaiamu henanadaina aita laloa.

6. Taunimanima e hisihisimu neganai, dahaka dainai momo na e laloamu Dirava ese ita na se lalodamu?

⁶ Momo na e laloamu una henanadai haerena na lasi. E gwaumu, ‘Bema Dirava ese e lalodamu, tanobada maurina na bema idau, ani?’ Ta itaiamu tanobada na tuari, inai heheni karana, bona lalohisihisi amo e honu. Danu  ta goreremu, ta hisihisimu, bona eda lalokau taudia e masemu. Una dainai, momo na e gwaumu, ‘Bema Dirava ese ita bona eda hekwakwanai na e lalodiamu, ia ese unu na bema koudia, ani?’

7. (a) Edena dalai tomadiho ese momo e hakaudia kereremu? (b) Baibul ena hahediba maorona be dahaka?

⁷ Danu, nega haida tomadiho e hahedibalaimu taudia ese taunimanima e hakaudia kereremu dainai, e laloamu Dirava na asi ena hebogahisi. Edena dalai? Dika badadia e varamu neganai, idia na e gwaumu una na Dirava ena ura. Una dainai, gwau na Dirava e heniamu. To, Dirava be unu e kara tomamu, eiava? Baibul ena hahediba be dahaka? Iakobo 1:13 na e gwaumu: “Hedibaḡani ai ta basineto ‘Dirava ese e dibaḡanigumu’; badina be dika na Dirava idibaḡanina asi dibana, bona Dirava ese danu tau ta se dibaḡaniamu.” Una dainai, Dirava ese tanobadai dika na se havaraiamu. (Iobu 34:10-12 ba duahi.) Momokani, ia ese ḡau dikadia e varamu na se koudiamu. To ḡau ta basine koua bona baine havaraia na mai edia idau.

8, 9. (a) Kara dika se kouamu bona e havaraiamu edia idau be ede bo haheitalaia tomamu? (b) Dahaka dainai Dirava ese taunimanima se koudiamu dala kereredia bae badina?

⁸ Mani tama lalokauna ta natuna merona ida aita lalodia. Natuna na e gwau-edeede bena ruma e rakatania neganai, tamana ese na se koua. Natu na dala kererena e badinaia dainai hekwakwanai e davari. Iena hekwakwanai be tamana ese e havaraia, eiava? Lasi. (Luka 15:11-13) Una heḡereḡerena, taunimanima e uramu kara dikadia bae kara neganai Dirava ese na se koudiamu, to e davarimu hekwakwanaidia na dia Dirava ese e havaramu. Una dainai, taunimanima edia hekwakwanai gwaudia Dirava baita henia na dia maoro.

⁹ Badi namodia haida dainai Dirava ese taunimanima na se koudiamu dala kererena bae badinaia. Ia na aonega  bona siahu idoinai Diravana dainai, ia na mai ena maoro dika se koumu badidia baine gwaurai eiava lasi. To lalokau dainai, Dirava ese ita na e hadibadamu. Karoa 11 ai badidia bo dibamu. To namona na baita diba ta davarimu hekwakwanaidia na dia Dirava ena kerere. Bona ia sibona ese hekwakwanai baine hanamodia dalana e hadibadamu!​—Isaia 33:2.

10. Dahaka dainai baita abia dae diba Dirava ese kara dika iboudiai baine haoredia vaitani?

¹⁰ Danu, Dirava na helaḡa. (Isaia 6:3) Anina na ia na asi bebekabebekana. Ienai kara dika ta na lasi. Una dainai baita abidadama henia diba. Taunimanima na basita abidadama henidia dibamu, badina nega haida e kara gagevamu. E kara momokanimu lohia taudia haida danu asi siahudia taunimanima dikadia e karamu ḡaudia bae hamaoromaorodia. To Dirava ena siahu na heḡereḡere. Ia ese taunimanima ediai e varamu dika ḡaudia na baine hamaoromaorodia diba. Dirava ese kara dika iboudiai na baine haoredia vaitani!​—Salamo 37:9-11 ba duahi.

11. (a) Dirava ese kara gageva be ede e laloa tomamu? (b) Dirava ese emu hisihisi be ede e laloa tomamu?

¹¹ Dirava ese tanobadai bona emu mauri lalonai e varamu ḡaudia be ede e lalodia tomamu? Baibul na e gwaumu, Dirava ese “kara maoromaoro e ura heniamu.” (Salamo 37:28) Una dainai, ia ese dahaka be maoro bona dahaka be kerere na e lalodia badamu. Ia ese kara gageva iboudiai na e inai henidiamu. Baibul ese e hahedinaraiamu guna tanobadai kara havara e bada herea neganai, Dirava ‘lalona na e hisihisi.’ (Genese 6:5, 6) Dirava na se idaumu. (Malaki 3:6) Ia na dounu se uramu tanobadai dika bae vara, bona taunimanima bae hisihisi. Badina Baibul na e gwaumu: “Ia ese e lalomuimu.”​—1 Petro 5:7 ba duahia.

12, 13. (a) Dahaka dainai ita ese lalokau ta hahedinaraiamu, bona lalokau dainai ta uramu tanobada maurina be ede baine heto? (b) Dahaka dainai o abia daemu Dirava ese tanobadai hekwakwanai baine haoredia?

 ¹² Ede ta diba tomamu Dirava na se uramu hisihisi bae vara? Baibul ese e hadibadamu, Dirava ese taunimanima na ia heida-idana e karadia. (Genese 1:26) Una dainai ita na mai eda kara namodia badina Dirava na mai ena kara namodia. Heḡereḡere, asi edia kerere taudia edia hisihisi o itamu neganai o lalohisihisimu, eiava? Bema edia hisihisi o lalodia badamu, anina na Dirava ese danu e lalodia badamu.

¹³ Ita taunimanima eda kara namona ta na, lalokau. Una na Dirava ena kara. Baibul na e gwaumu: “Dirava na lalokau.” (1 Ioane 4:8) Lalokau ta hahedinaraiamu badina Dirava na lalokau. Lalokau dainai, tanobadai o itamu hisihisidia bona kara gagevadia bo haoredia dibamu, eiava? Bema emu siahu na heḡereḡere, unu bo kara toma dibamu, eiava? Oibe! Namona na ba diba Dirava ese hisihisi bona kara gageva na baine haoredia diba. Ina buka ena rau 4 bona 5 ai e hetore gwauhamatadia na dia nihi eiava helaro koikoidia. Dirava ena gwauhamata na bae vara momokani! To, unu bavabidia dae totona, namona na unu gwauhamata e gwaurai Diravana ba dibaia namonamo.

14. Dirava ladana be daika, bona dahaka dainai baita ḡaukaralaia na namo?

¹⁴ Ta ba hetura henia totona, oi be dahaka bo karamu? Ladamu bo  gwauraiamu, ani? Dirava mai ladana, eiava? Tomadiho momo na e gwaumu, ia ladana na “Dirava” eiava “Lohiabada,” to unu na dagi ladadia. “Pavapava” bona “praim minista” heḡereḡeredia. Baibul ese e hadibadamu Dirava ena dagi ladadia na momo. Rua be “Dirava” bona “Lohiabada.” To danu, Baibul ese e hadibadamu Dirava ladana korikorina na Iehova. Salamo 83:18 na e gwaumu: “Ba hadibadia, bena bae diba, oi ladamu na Iehova; oi mo sibomu Herea Mikamika, tanobada idoinai daenai.” Bema emu Baibul ai una lada na lasi, e kokia badina na Apendiks ai atikol ladana “Dirava Ladana—Anina Bona Iḡaukaralaina Dalana” ai ba itaia. To momokani,  Baibul e torea taudia ese Dirava ladana na nega tausen momo toretore gunadiai e toredia. Una dainai Iehova na e uramu ia ladana ba dibaia bona ba ḡaukaralaia. Baita gwau dibamu, ia ese Baibul amo ladana na e hadibadamu.

15. Ina lada, Iehova, anina be dahaka?

¹⁵ Dirava ladana anina na momo. Ia ladana, Iehova, anina na Dirava ese ena gwauhamata iboudiai bona ura iboudiai na baine haḡuḡuru diba. * Dirava ladana na idau herea. Una lada na ia sibona ena. Dala momo ai, Iehova na idau herea. Dahaka dainai?

16, 17. Ini dagi ladadia ese Iehova be ede e herevalaia tomamu: (a) “Siahu idoinai Diravana”? (b) “Uru iboudiai edia Pavapava”? (c) ‘Ḡau iboudiai ihavaradia’ Diravana?

 ¹⁶ Salamo 83:18 ai Iehova na ini e herevalaia toma: “Oi mo sibomu Herea Mikamika.” Una heḡereḡerena, Iehova sibona mo e gwauraiamu “siahu idoinai Diravana.” Apokalupo 15:3 na e gwaumu: “Lohiabada Dirava e, siahu idoinai Diravana, emu ḡaukara daka bada, hoa karadia. Uru iboudiai edia Pavapava e, emu kara na mamaoro-mamaoro bona momomo-kakani.” Ina dagi ladana “siahu idoinai Diravana” ese e hadibadamu Iehova sibona ena siahu na bada herea. Iena siahu na asi ihaheḡereḡerena. Bona ina dagi ladana “uru iboudiai edia Pavapava” ese e hadibadamu dala ma ta ai Iehova na idau herea. Ia na e noho hanaihanaimu. Salamo 90:2 na e gwaumu: “Ema bona hari ela bona hanaihanai oi mo Dirava.” Una hereva ese ita na e hagoadadamu, ani?

¹⁷ Danu, Iehova na idau herea badina ia sibona ese ḡau iboudiai e havaradia. Apokalupo 4:11 na e gwaumu: “Emai Lohiabada, emai Dirava e, Namona binai: Hairai bona hemataurai bona siahu bavabi. Badina be oi ese ḡau iboudiai o havara, emu ura dainai o karadia bona e miamu.” Ḡau iboudiai​—aneru, guba hisiudia, au huahua, davara bona sinavai gwarumedia​—na e maurimu, badina Iehova na ihavaradia Diravana.

18. Dahaka dainai haida na e laloamu Dirava na basie raka henia kahi dibamu, to Baibul be dahaka e gwaumu?

¹⁸ Haida na Iehova ena hoa karadia sivaraidia e duahimu neganai e garimu. Badina e laloamu Dirava na atai herea ai, bona basie raka henia kahi diba, eiava ia vairanai idia na asi anidia. To una lalohadai be maoro eiava? Baibul ese Iehova na ini e gwauraia tomamu: “Ia bona ita ta ta padada na dia daudau.” (Kara 17:27) Danu e gwaumu: “Dirava  ba raka henia kahi, bena ia ese danu baine raka henimui kahi.”​—Iakobo 4:8.

19. (a) Edena dalai Dirava baita raka henia kahi diba, bona ena namo be dahaka? (b) Dirava ena kara namodia amo oi be edena o moalelaiamu?

¹⁹ Edena dalai Dirava ba raka henia kahi diba? Ḡau ginigunana na, hari o karamu heḡereḡerena dounu ba kara​—Dirava ba dibaia. Iesu na e gwa: “Mauri hanaihanai binai: idia ese oi Dirava Korikori tamona bae dibamu, bona Iesu Keriso danu, oi ese o siaia tauna.” (Ioane 17:3) Oibe, Baibul na e gwaumu Iehova bona Iesu idibadia karana amo “mauri hanaihanai” baita abia! Matamanai e herevalaia bamona, “Dirava na lalokau.” (1 Ioane 4:16) Danu, Iehova na mai ena kara hereadaedia ma haida. Heḡereḡere, Ia na ‘hebogahisi bona harihari-bada Diravana. Badu ai e halahemu; hebogahisi ai bona uraheni ai e haraḡamu.’ (Esodo 34:6) Dika e gwautaomu. (Salamo 86:5) Dirava na e haheaukamu. (2 Petro 3:9) Dirava ese ia e badinaiamu taudia na basine rakatanidia. (Salamo 94:14) Baibul bo stadilaiamu neganai, bo dibamu Iehova ese unu kara namodia bona ma haida na e hahedinaraidiamu.

20-22. (a) Dirava na asita itaiamu dainai, baita raka henia kahi dibamu, eiava? (b) Haida ese oi be dahaka be hamaoromumu, to dahaka ba kara na namo?

²⁰ Momokani, Dirava na asita itaiamu badina ia na Lauma. (Ioane 1:18; 4:24; 1 Timoteo 1:17) To Baibul bo stadilaiamu neganai, Ia bo dibaiamu. Salamo itorena tauna ena hereva heḡereḡerena, ‘Iehova hairaina bo itaiamu.’ (Salamo 27:4; Roma 1:20) Iehova bo dibaiamu neganai, bo abia daemu ia na e noho momokanimu bona una ese oi be hagoadamumu ia ba lalokau henia bona ba hetura henia.

²¹ Bena bo lalopararamu dahaka dainai Baibul ese Iehova na e gwauraiamu ita Tamada. (Mataio 6:9) Ia ese dia mauri mo e henida to e uramu mauri baita moalelaia danu​—tama lalokauna ta ese natuna e kara henidiamu  heḡereḡerena. (Salamo 36:9) Baibul ese e hadibadamu taunimanima na Iehova turana ai baela diba. (Iakobo 2:23) Mani a laloa, ḡau iboudiai ihavaradia Diravana turana ai bo lao dibamu!

²² Baibul bo stadilaiamu neganai, haida ese be hamaoromumu emu stadi na ba hadokoa. Reana be lalomu o abi daemu ḡaudia bo haidaumu. To, namona na emu hetura karana Dirava ida na ta ese basine hadikaia.

23, 24. (a) Dahaka dainai ba henanadai na namo? (b) Karoa gabena ese dahaka be herevalaiamu?

²³ Vaia, matamanai ḡau haida na do basio lalopararalaimu. Basio hemarai to mai manaumu ida heduru ba noi. Iesu na e gwa, namona na baita manau, natu maraḡina ta na heto. (Mataio 18:2-4) Bona mai dibada natu na e henanadai momomu. Dirava na e uramu emu henanadai haeredia ba diba. E urava Dirava bae dibaia taudia haida na Baibul ese e herevalaidia. Idia na Buka Helaḡa lalodiai e hetahuva, unu amo bae hamomokania, e dibava ḡaudia be momokani eiava lasi.​—Kara 17:11 ba duahia.

²⁴ Iehova ba dibaia dalana hereadaena na Baibul ba stadilaia. Ia na dia buka haida heḡereḡeredia. Edena dalai? Karoa gabena ese una be herevalaiamu.