1, 2. ¿Keyej kemansa semi kuali maj tikchiuakan netajtanilmej?

¿TIKONMATI kanachi netajtanilmej kichiuaj konemej? Miakej peuaj keman yekin uelij tajtouaj. Kemej nochi kinekij kimatiskej, ika ininixtololo uejueyi teixitaj uan kijtouaj: “¿Kani tami iluikak?”, “¿Keyej sitalimej petanij youak?” oso “¿Akoni kinmachtij totomej maj mokuikatikan?”. Maski tiktemouaj keniuj tikinankiliskej, kemansa amo tikmatij toni tikijtoskej. Uan maski tiktemakaj se kuali tanankilil, kisa okse netajtanil: “¿Uan keyej?”.

² Amo sayoj konemej kichiuaj netajtanilmej. Ijkon kemej timoskaltijtiyouij, tiksentokaj tikchiuaj netajtanilmej, xa keman tiknekij tikmatiskej keniuj tiajsiskej kampa tiknekij tiyaskej, amo tiknekij maj techpano tein amo kuali, oso ipa sayoj tiknekij tikmatiskej teisa. Sayoj ke miakej nesi amo kisentokaj  kichiuaj netajtanilmej, uan nion no tein okachi motelneki. Oso sekin amo kisentokaj kitemouaj tanankililmej.

3. ¿Keyej miakej amo kisentokaj kitemouaj itanankililuan netajtanilmej tein okachi motelneki?

³ Xiontanemili itech netajtanil tein kipia ipanko nejin amaix, ijkon kemej tein ixnesi itech prólogo uan ipeujyan nejin capítulo. Yejua nejin seki netajtanilmej tein okachi motelneki tein uelis se mochiuilis. Sayoj ke miakej amo kisentokaj kitemouaj tanankililmej. ¿Keyej? ¿Xe uelis tikajsiskej itech Biblia? Sekin kinemiliaj ke tanankililmej tein kitemaka Biblia tel ouij. Oksekin kimouiliaj mopinaujtiskej, yejua ika amo moixeuiaj tajtaniskej. Uan miakej kinemiliaj ke nejon netajtanilmej, sayoj uelis kinankiliskej tayekananij uan tamachtianij itech taneltokalis. ¿Toni tikonnemilia tejuatsin?

4, 5. ¿Katiyejuan seki netajtanilmej tein okachi motelneki uelis timochiuiliskej, uan keyej moneki tiktemoskej tanankililmej?

⁴ Amo tiomeyolouaj ke tejuatsin, tikonneki tikonmatis itanankililuan netajtanilmej tel ouijkej tein timochiuiliaj. Kemansa xa tionmotajtaniani: “¿Keyej tiualajkej nikan taltikpak? ¿Sayoj yejua nejin nemilis tein onkak? ¿Keniuj tamati Dios?”. Semi kuali komo tionmochiuilia nejin netajtanilmej, uan moneki amo xionmosenkaua, ta xikonsentoka xikontemo tanankililmej tein uelis itech tiontakuaujtamatis uan tein mitsonyolseuis. Jesucristo, tein moixmati kemej se kuali tamachtijkej, kijtoj: “Xitajtanilikan Dios uan namechmaktis ne ten moneki. [...] Uan no ijkon kuak se takakalatsa ma tatapoukan, no ijkon xiksentokakan xikilikan Dios ten moneki uan Dios namechmakas” (Mateo 7:7).

 ⁵ Komo ‘tikonsentoka tikontemoua’ itanankililuan netajtanilmej tein motelneki, uelis tikonitas ke amo nenkaj yeski (Proverbios 2:1-5). Nejin tanankililmej kemaj yetokej uan uelis tikonajsis, maski oksekin mitsoniluiskej ke amo onkakej. Ixnesij itech Biblia uan amo ouijkej. Uan tein okachi kuali, kitemakaj se nechialis uan techpaleuia axkan maj tikpiakan yekmelauj yolpakilis. Maj tipeuakan ika se netajtanil tein miakej kinyolkuejmoloua.

6. ¿Keyej miakej kinemiliaj ke Dios amo kitekipachoua totajyouilis?

⁶ Miakej kinemiliaj ke amo. Kinemiliaj ke komo toka motekipachoskia, amo ijkon tikpanotoskiaj. Tinemij kampa onkak miak neteuilis, netauelitalis uan tekokojkayot. Tinochin tikokoliskuij, titajyouiaj uan tikinpolouaj tochankauan uan totasojikniuan itech mikilis. Yejua ika miakej kijtouaj: “Komo Dios toka motekipachoskia, ¿amo kijkuaniskiaya nochi nejin kuejmolmej?”.

7. 1) ¿Keyej uelis tikijtoskej ke miakej tamachtianij itech taneltokalis, kichiuaj maj taltikpakneminij kinemilikan ke Dios amo techiknelia? 2) ¿Toni yekmelauj tamachtia Biblia ika tajyouilis tein tikpanouaj?

⁷ Uan tein okachi amo kuali, miakej tamachtianij itech taneltokalis kichiuaj maj taltikpakneminij kinemilikan ke Dios amo techiknelia. Se neskayot, keman mochiua se teisa tein tel amo kuali, kijtouaj ke Dios ijkon kinekik. Tein melauj, kemej yeskia Dios kitajtakoltiaj nochi tachiualismej tein tel amo kuali tein mochiua. Sayoj ke, ¿melauj tein kijtouaj? ¿Toni yekmelauj tamachtia Biblia? Santiago 1:13 tanankilia: “Keman aksa moajsis itech tayejyekolis, maj amo kijto:  ‘Dios nechtalilia tayejyekolis’. Porin Dios amo uelis kipias se tayejyekolis ika tein amo kuali, nion no kitalilia tayejyekolis aksa” (Traducción del Nuevo Mundo [TNM]). Kemej tikitaj, Dios amo keman kiixualtia nochi tein amo kuali tein tikitaj nikan taltikpak (xikonixtajtolti Job 34:10-12). Maski kemaj kikaua maj mochiua tein amo kuali, sayoj ke tel taman kijtosneki maj kikaua maj mochiua teisa, uan no tel taman maj yejuatsin kiixualti.

8, 9. 1) ¿Ika toni neskayot uelis tikonmelauas, ke kijtosneki taman maj se kikaua maj mochiua tein amo kuali uan maj se kiixualti? 2) Tikmatiskej ke Dios kinkaua taltikpakneminij maj kitojtokakan se ojti tein amo kuali, ¿keyej amo taixejekol maj tikijijtokan?

⁸ Se neskayot, xiontanemili itech se tepopaj tetasojtakej uan tamatkej, tein kipia se ikonetsin tein ueyiya uan nemiok iuan. Keman tekoneuj taixnamiki uan kinemilia kisas ikalijtik, tepopaj amo kitsakuilia. Tekoneuj kiixpejpena se ojti tein amo kuali uan moouijkankalakia. ¿Tikonijtoskia tejuatsin ke tepopaj kiixualtij kuejmolmej tein kipia tekoneuj? ¿Melauj ke amo? (Lucas 15:11-13.) No ijkon iuan Dios, yejuatsin kinkaua maj taltikpakneminij kiixpejpenakan se ojti tein amo kuali, sayoj ke amo kijtosneki ke Dios kiixualtia tein amo kuali tein yejuan motemoliaj. Yejua ika amo taixejekol maj tikpantikan Dios keman tikijyouiaj tein amo kuali.

⁹ Dios kimati keyej kinkaua maj kitojtokakan se ojti tein amo kuali. Kemej yejuatsin toDios tamatkej uan Tachijchiujkej tein kipia chikaujkauelilis, amo onkak keyej techmelauilis. Sayoj ke kemej techtasojta, yejua ika techmatiltia. Itech capítulo 11 okachi tikitaskej keyej kikaujtok tajyouilis. Sayoj ke tejuatsin tionuelis tiontakuaujtamatis ke Dios amo kipia tajtakol maj  tikpiakan kuejmolmej. Uan amo melauak tein kijtouiliaj Dios, ta sayoj yejuatsin techiluia ke uelis tikchiaskej maj kijkuani tajyouilis (Isaías 33:2).

10. ¿Keyej uelis titakuaujtamatiskej ke Dios kiajchiuas tajyouilis tein kiixualtiaj akin kichiuaj tein amo kuali?

¹⁰ Uan no, Dios yektik (Isaías 6:3). Nejin kijtosneki ke chipauak, tein amo kipia nion tepitsin tein amo kuali. Yejua ika uelis senkis titakuaujtamatiskej iuan, uan amo kemej taltikpakneminij, tein kemansa kiseliaj tomin uan ika nejon kichiuaj tein amo kuali. Nion no tekiuaj tein okachi chipaujkanemi, amo uelis kijkuanis tajyouilis tein kiixualtiaj akin amo yolkualmej. Sayoj ke Dios kipia nochi uelilis. Yejuatsin uelis kitamis nejon tajyouilis uan ijkon kichiuas. Keman kijkuanis, kichiuas maj senkis tami tein amo kuali (xikonixtajtolti Salmo 37:9-11).

11. 1) ¿Keniuj kiita Dios tein amo kuali? 2) ¿Keniuj momachilia Dios keman techita ke titajyouiaj?

¹¹ ¿Keniuj momachilia Dios ika tein mochiujtok nikan taltikpak uan tein tikpanouaj itech tonemilis? Biblia tamachtia ke Dios ‘kitasojta melaujkayot’ (Salmo 37:28). Dios kiteltekipachoua komo teisa kuali yetok oso amo, uan kitauelita keman tikijyouiaj tein amo kuali. Biblia kijtoua ke ne uejkauj “kiyolkokoj” keman momoyauak tein amo kuali nikan taltikpak (Génesis 6:5, 6). Uan Dios amo mopata (Santiago 1:17). Kisentoka kitauelita tein amo kuali uan kiniknelia Akin tajyouiaj. Biblia techyekiluia: “Yejuatsin semi namechyolnejneki de namechyekpixtinemis” (xikonixtajtolti 1 Pedro 5:7).

12, 13. 1) ¿Keyej tikpiaj kualneskayomej kemej netasojtalis, uan keniuj kichiua nejon maj tikitakan tajyouilis tein onkak nikan taltikpak? 2) ¿Keyej uelis titakuaujtamatiskej ke Dios kiajchiuas kuejmolmej tein onkak semanauak taltikpak?

 ¹² ¿Keyej uelis senkis tikneltokaskej ke Dios kiyolkokoua keman techita ke titajyouiaj? Maj tikitakan okse neskayot. Biblia tamachtia ke Dios kichijchiuak takat kemej yejuatsin tamati (Génesis 1:26). Tikpiaj kualtsitsin kualneskayomej porin Dios kinpia. Se neskayot, ¿tikoniknelia tejuatsin keman tikonita oksekin tajyouiaj maski amo kichiujtokej tein amo kuali? Komo mitsonyolkokoua tikonitas maj aksa tajyoui, xikonyekmati ke Dios okachiok kiyolkokoua.

¹³ Se taman tein okachi ueli kinextia se taltikpaknenkej yejua netasojtalis. Ika nejin no titamatij kemej Dios, ta kemej tamachtia Biblia, “Yejuatsin tetasojtatinemi” (1 Juan 4:8, 16). Titetasojtaj porin Dios tetasojta. Komo tikonpiaskia chikaualis tikonijkuanis tajyouilis uan nochi tein amo kuali tein tikitaj nikan taltikpak, ¿melauj ke tikonchiuaskia? ¿Xe amo mitsonoliniskia netasojtalis xikonchiua? ¿Melauj ke kemaj? Yejua ika, uelis tiontakuaujtamatis ke Dios kiajchiuas kuejmolmej nikan taltikpak. Netenkaualis tein tikonixtajtoltij itech iprólogo nejin amaix, amo sayoj se takochitalis nion no se nechialis tein amo melauak: Dios motenkaujtok uan amo tapolos, ta ijkon kichiuas. Sayoj ke moneki tikixmatiskej Dios, uan ijkon techpaleuis maj tikneltokakan tein yejuatsin motenkaujtok.

14. ¿Katiyejua itokay Dios, uan keyej moneki tikuiskej?

¹⁴ ¿Toni yekinika tikonchiua keman tikonneki maj  aksa mitsonixmati? ¿Melauj ke tikoniluia motokay? Axkan, ¿kipia itokay Dios? Miak taneltokalismej tamachtiaj ke itokay yejua “Dios” oso “toTajtsin”, sayoj ke nejon amo yekmelauj itokayuan. Nejon sayoj kemej ijkuak aksa kiluiaj “tekiuaj” oso “tamachtijkej”. Biblia kinextia ke Dios kipia miak taman keniuj kiixmatij, kemej “Dios” oso “toTajtsin”. Sayoj ke no tamachtia ke kipia se yekmelauj itokay: Jiova. Salmo 83:18 kijtoua ijkon: “Motokay Jiova, sayoj tejua okachi tiUeyichiujkej itech nochi taltikpak”. Komo itech moBiblia amo ixnesi nejin tokayit, timitsonyoleuaj xikonita keyej, itech nejin amaix itech páginas 225-227. Tein melauj, itokay Dios tel miakpa ixnesi itech Biblia tein yekinika moijkuiloj ne uejkauj. Yejua ika, Jiova kineki xikonmati katiyejua itokay uan xikontekitilti. Uelis tikijtoskej ke Dios kikui Biblia uan ika xikonixmati.

15. ¿Toni kijtosneki tokayit Jiova?

¹⁵ Tokayit Jiova, tein Dios motalilij, se kitelmoujkakaki tein kijtosneki. Kiteajsikamatiltia ke yejuatsin ueli kichiua nochi tein motenkaua, ijkon kemej tein kiixtalia. * Itokay Dios sayoj se, ta sayoj yejuatsin iaxka. Tein melauj,  amo akin kemej Jiova itech miak taman. Maj tikitakan seki.

16, 17. ¿Toni technextilia nejin tajtolmej kemej tamati Jiova: 1) “tikompia nochi uelilis”? 2) “Dios ten amo keman ixpoliuis”? 3) “Tachijchiujkej”?

¹⁶ Tikitakejya Salmo 83:18 kampa ika tajtoua Jiova: “Sayoj tejua okachi tiUeyichiujkej”. No ijkon, sayoj yejuatsin motokaytia ‘tein kipia nochi uelilis’. Apocalipsis 15:3 kijtoua: “Totekotsin Dios tikompia nochi uelilis”. Nejin tajtolmej, “tikompia nochi uelilis” kinextia ke amo akin kipia chikaujkauelilis ijkon kemej  Jiova. Amo akin kitanilia ichikaualis, ta tel tapanauia. Uan Romanos 16:26 kijtoua ke yejua “Dios ten amo keman ixpoliuis”. Nejin techelnamiktia okse taman keyej amo akin ijkon kemej yejuatsin: sayoj yejuatsin akin nochipa yoltok. Itech Apocalipsis 1:8 tikixtajtoltiaj: “Yejuatsin axkan yoltinemi; uan Yejuatsin ipa yoltinemiaya; uan Yejuatsin ipa yoltinemis sen nachipa”. ¿Melauj ke se kimoujkakaki keman itech se tanemilia?

¹⁷ Moajsi okse taman keyej Jiova amo akin kemej yejuatsin: sayoj yejua Tachijchiujkej. Apocalipsis 4:11 kijtoua: “Tejuatsin mitsonamiki xikselijto nochi ne mouistililis uan ne ueyipanchiualis uan ne chikaukakualtsiyo. Porin sayo Tejuatsin tikonchijchiuak nochi  ten onkak. Uan Tejuatsin tikonmonekiltij ma taonka nochi ten tikitaj”. Jiova kichijchiuak nochi tein onkak: kemej ángeles, sitalimej tein petanij youak ne iluikak, koujtakilomej, amichimej, uan oksekiok.

18. ¿Keyej miakej kinemiliaj ke amo keman uelis motokiskej iuan Dios, sayoj ke toni tamachtia Biblia?

¹⁸ Miakej kimouiliaj motokiskej iuan Jiova porin kipia kualneskayomej tein se kimoujkakaki. Kimouiliaj maj Dios tel uejka yeto uan maj amo keman uelikan motokikan iuan, oso maj amo kinpoujkaita. ¿Melauak nejon tanemilil? Biblia amo yejua tamachtia, ta kijtoua ke Jiova “amo uejka yetika de kada senme de tejuan” (Hechos 17:27). Uan no techchiuilia nejin tayoleualis: “Ximotokikan iuan Dios uan Yejuatsin no motokis namouan” (Santiago 4:8).

19. 1) ¿Keniuj uelis timotokiskej iuan Dios, uan toni uelis tikseliskej? 2) ¿Katiyejuan kualneskayomej okachi tikonuelita tein kichiuaj xionmotoki iuan Dios?

¹⁹ ¿Keniuj uelis tionmotokis iuan Dios? Yekinika, xikonsentoka xikonchiujto tein axkan tikonchiujtok: xionmomachti tein kijtoua Dios nochi tein tionuelis. Jesús kijtoj: “Nachipa nemilis kijtosneki yejua nijin: [...] Ma mitsonixmatikan Tejuatsin ke tion Dios tion Yolmelauaktsin, uan sayo Tejuatsin tion Dios. Uan [...] ma nechixmatikan Nejuatsin ke ni Jesucristo ten Tejuatsin tinechonualtitanik” (Juan 17:3). Kemaj, kemej Biblia tamachtia, tikixmatiskej Jiova uan Jesús techojtokaltia itech ‘nemilis nochipa’. Tikitakejya ke “Dios tetasojta” (1 Juan 4:8, 16). Sayoj ke Jiova kipia miak okseki kualneskayomej, nochin kualtsitsin uan kichiuaj maj se motoki iuan.  ¿Kemej katiyejuan? Biblia kijtoua ke Dios “teiknelijkej uan kineki tapaleuis, amo niman kualani uan kitelpia ueyi netasojtalis tein amo tami uan nochipa kijtoua tein melauak” (Éxodo 34:6). Se Dios ‘yolkuali uan niman tetapojpoluia’ (Salmo 86:5). Amo yolijsiui (2 Pedro 3:9). Amo tekaua (Apocalipsis 15:4). Ijkon kemej tikonixtajtoltijtias Biblia, tikonitas ke Jiova kinextia nejin kualneskayomej tein kichiuaj maj se motoki iuan, uan oksekiok.

20-22. 1) Kemej Dios amo ueli tikitaj, ¿techtsakuilia maj timotokikan iuan? Xikonmelaua motanankilil. 2) ¿Toni uelis mitsoniluiskej akin mitsonnejnekiliaj tein kuali, sayoj ke toni moneki tikonchiuas?

²⁰ Tein melauj, Dios amo ueli tikitaj, ta yejuatsin se espíritu (Juan 1:18; 4:24; 1 Timoteo 1:17). Sayoj ke Biblia kimelaua keniuj tamati Dios. Ijkon kemej kijtoj akin kijkuiloj Salmo, tejuatsin uelis ‘tikyekitas nochi tein kualtsin tein kichiua Jiova’ (Salmo 27:4; Romanos 1:20). Keman okachi tikonixmatis, tikonitas ke yekmelauj nemi, uan okachi tikontasojtas ika nochi tein kichiua uan tikonmachilis ke amo uejka tionmoajsi iuan.

²¹ Yolik tikonajsikamatiyas keyej Biblia techiluia maj tikitakan kemej toTajtsin (Mateo 6:9). Amo sayoj techmakatok tonemilis, ta no kineki maj tiyolpakikan nochi tein uelis, ijkon kemej se kuali tepopaj kinnejnekilia ikoneuan (Salmo 36:9). Biblia no tamachtia ke titaltikpakneminij uelis kuali timouikaskej iuan Jiova (Santiago 2:23, TNM). ¡Xionmonemili: tejuatsin uelis tionmochiuas tionitasojikniuj Dios akin kichijchiuak nochi tein onkak!

²² Keman okachi tionmomachtis tein kijtoua Biblia, xa sekin akin mitsonnejnekiliaj tein kuali, mitsoniluiskej  xikonkaua monemachtil. Xa kichiuaskej porin kinyolkuejmoloua xikonpata motaneltokalis. Sayoj ke amo xikonkaua maj nion teyi mitsontsakuili tikoniskaltis monetasojtalis iuan Dios, se netasojtalis tein okachi kuali uelis tikonpias.

23, 24. 1) Ika tein tionmomachtijtos, ¿keyej moneki amo tionmopinaujmatis tikonchiuas netajtanilmej? 2) ¿Toni tikitaskej itech okse capítulo?

²³ Tein melauj, onkas teisa tein yekinika amo tikonajsikamatis. Sayoj ke amo xionmopinaujmati tiontajtanis nepaleuil. Jesús kijtoj ke semi kuali maj tiyolyemankej kemej se konet (Mateo 18:2-4). Uan kemej tikmatij, konemej nochipa kichiuaj netajtanilmej. Dios mitsonnejnekilia xikonajsi tanankililmej. Biblia tel kuali ininka tajtoua akin nenkej ne uejkauj uan kitelnekiaj kiixmatiskej Dios. Yejua ika, kitemouayaj itech Biblia tein kikakiaj, ijkon kiyekmatiaj ox katka melauak tein momachtiayaj (xikonixtajtolti Hechos 17:11).

²⁴ Tein okachi uelis techpaleuis maj tikixmatikan Jiova, yejua nemachtil ika Biblia, se amaix tein amo kemej oksekin. ¿Toni tein kipia Biblia kichiua maj tel taman? Tikitaskej itech okse capítulo.