1, 2. ¿Tleka techpaleuiya matitetlajtoltikan?

¿YOTIKITAK kenon kokonej san tlemach tetlajtoltiaj? Miyekej kinekij kimatiskej miyek tlemach ijkuak peuaj tlajtouaj. Ijkon ken nikan nesi yejuin siuakonetl, mitstlajtoltiskej: “¿Akinon okinchijchiuj sitlalimej?”, “¿Akinon okinmachti totomej manokuikatikan?” noso “¿Tleka nejkuania moxtli?”. Maski tikyejyekouaj tikinnankiliskej, kemantika xok tikmatij tlenon tikimijliskej. Niman maski kuajli tikinnankilis, ok mitstlajtoltiskej: “¿Niman tleka?”.

² Xsan kokonej tetlajtoltiaj. Ijkuak toskaltijtiuej, tlemach titetlajtoltiaj, kemantika pampa tiknekij tikmatiskej kenon tajsiskej kanaj, niman kemantika pampa xtiknekij itlaj tlen xkuajli topan manochiua noso san pampa tiknekij tikmatiskej. San ika, miyekej tlaltikpakchanejkej xok tetlajtoltiaj nion xok kinekij kimatiskej tlen melak noneki makimatikan.

3. ¿Tleka miyekej tlaltikpakchanejkej xok kitejtemouaj itech tlen melak noneki matikmatikan?

³ Xnemili itech tlen techtlajtoltia  kampa ika peua yejuin amoxtli, itech tlajtoltilistin tlen uajlauej ipan páginas 3 iuan 6 niman tlajtoltilistin tlen ika peua yejuin capítulo. Yejuin san seki tlajtoltilistin tlen melak noneki matikmatikan. San ika, miyekej tlaltikpakchanejkej xok tetlajtoltiaj. ¿Tleka? ¿Uelis technankilis Biblia? Sekimej tlaltikpakchanejkej kinemiliaj ika ken Biblia tlanankilia xnimantsin uelis tikasikamatis. Oksekimej xkinekij tetlajtoltiskej pampa kinemiliaj ika kinpinaujtiskej. Niman nemij akin kinemiliaj ika yejuin san kimatstokej tlayekankej niman tlamachtijkej ipan tlaneltokiltin. ¿Tlenon tiknemilia tejua?

4, 5. ¿Tlenon melak noneki matotlajtoltikan, niman tleka noneki matikmatikan kenon nonankiliaj?

⁴ Tejua kanaj tikneki tikmatis itech tlen melak noneki matikmatikan. Kemantika kanaj timotlajtoltia: “¿Tleka otinemikoj ipan yejuin tlaltikpaktli? ¿San otinemikoj, tiueuentsintiaskej niman timikiskej? ¿Kenon toTajtsin?”. Kuajli tla titlanemiliaj ipan yejuin niman xtiksiaujkauaj tiktejtemouaj kenon nonankiliaj. Jesucristo, akin okixmatkej kentla ueyi tlamachtijketl, okijto: “Xtlajtlanilikan Dios on tlen mechpoloua, niman yejua mechmakas. Xtejtemokan on tlen mechpoloua, niman nenkinextiskej. Xtetepinikan on tlatsakuilyotl, niman Dios mechtlapouilis” (Mateo 7:7).

⁵ Tla tejua timochikaua ‘tiktejtemoua’ kenon nonankiliaj tlajtoltilistin tlen melak noneki matikmatikan, tikitas ika melak mitspaleuis (Proverbios 2:1-5). Maski oksekimej tlaltikpakchanejkej yomitsijlikej miyek tlemach, tejua uelis tikinnextis ipan Biblia kenon nonankiliaj yejuin tlajtoltilistin, niman kema uelis tikasikamatis. Melak kuajli, pampa yejuin kichiuas matinemikan ika tlamachialistli niman ika paktli, noijki kichiuas matinemikan ika toyojlo ipan yejuin tonaltin. Matipeuakan ika se tlajtoltilistli tlen miyekej tlaltikpakchanejkej kinekij kimatiskej.

6. ¿Tleka kinemiliaj miyekej tlaltikpakchanejkej ika toTajtsin xkajmana tla titlajyouiyaj?

⁶ Miyekej tlaltikpakchanejkej kinemiliaj ika ka. Kinemiliaj ika tla yejua najmanaskia topampa, xijkon tinemiskiaj ken aman. Tinemij ipan yejuin tlaltikpaktli kampa melak notlauelitalo, nokokolo niman onka guerras. Tinochimej tikualoj, titlajyouiyaj niman mikij akin tikintlasojtlaj. Ika yejon, nemij akin kijtouaj: “Tla toTajtsin najmanaskia topampa, ¿xtechpaleuiskia maka matitlajyouikan?”.

7. a) ¿Tleka uelis tikijtoskej ika miyekej tlamachtijkej ipan tlaneltokiltin kichiuaj ika tlaltikpakchanejkej makinemilikan ika toTajtsin xnajmana topampa? b) ¿Temachtia Biblia ika toTajtsin kipiya tlajtlakojli ijkuak titlajyouiyaj?

⁷ Niman xsan yejuin, miyekej tlamachtijkej ipan tlaneltokiltin kichiuaj ika tlaltikpakchanejkej makinemilikan ika toTajtsin xnajmana topampa. ¿Kenon kichiuaj yejuin? Ijkuak topan nochiua itlaj tlen xkuajli, teijliaj ika toTajtsin kichiua ijkon mapano. Yejuin yeskia kentla kijtoskiaj ika toTajtsin kipiya tlajtlakojli. San ika ¿yejon yemelak? ¿Tlenon melauak temachtia Biblia? Santiago 1:13 kijtoua: “Ijkuak yakaj kiselia tetlatlatalistli para ma tlajtlako, xkuajli para kijtos ika Dios kitlatlata. Yejua in melauak pampa Dios xkeman kiselia tetlatlatalistli para ma tlajtlako, nion yejua kitlatlata yakaj para ma tlajtlako”. Ika yejuin, tikasikamatij ika toTajtsin xkeman kichiua mapano tlen xkuajli ipan tlaltikpaktli (xpoua Job 34:10-12). Maski yejua tekauilia mapano tlen xkuajli, xnoijki kijtosneki titekauilis itlaj mapano niman tikchiuas itlaj mapano.

8, 9. a) ¿Ika tlen neskayotl uelis tikijtos tlen kijtosneki titekauilis mapano tlen xkuajli niman tikchiuas mapano? b) Pampa toTajtsin kinkauilia tlaltikpakchanejkej matlajyouikan, ¿kinamiki matiktlajtlakoltikan?

⁸ Xnemili itech se tajtli tlamachilise niman tetlasojtlani akin kipiya ipan ichan se ikoneuj akin yokiskalti. Yejua peua teixnamiki niman kinemilia noxelos, niman itaj kikauilia mauiya. Yejuin tekoneuj peua kichiua tlen xkuajli niman nokalaktia ipan tlauejli. ¿Tikijtoskia ika tajtli okichiuj manokalakti  ipan tlauejli ikoneuj? Ka (Lucas 15:11-13). Noijki ijkon, toTajtsin kinkauilia tlaltikpakchanejkej makichiuakan tlen yejuamej kinekij, san ika, yejuin xkijtosneki tla yejua kichiua matlajyouikan ijkuak tlaltikpakchanejkej nokalaktiaj ipan tlaueltin tlen kinotejtemouiliaj. Kuakon, xkuajli yeskia tla tiktlajtlakoltiskej toTajtsin itech nochi tlen xkuajli inpan nochiua tlaltikpakchanejkej.

⁹ ToTajtsin kuajli kimatstika tleka kinkauilia tlaltikpakchanejkej matlajyouikan. Pampa yejua tlamachilise niman okichijchiuj nochi tlen onka, xnoneki matechijli tleka ijkon topan nochiua. San ika, kema techijlia pampa techtlasojtla. Ipan capítulo 11 kuajli tikitaskej tleka tekauilia ijkon topan nochiua. Kuajli xmatsto ika toTajtsin xkipiya tlajtlakojli itech tlaueltin tlen tikpiyaj. Tlen yejua kema techijlia, ika matikchiakan tonajli ijkuak nochi tlen xkuajli popoliuis (Isaías 33:2).

10. ¿Tleka uelis tikneltokaskej ika toTajtsin kipopolos nochi tlajyouilistli tlen onka?

¹⁰ Niman, toTajtsin yejua chipauak (1 Pedro 1:15, 16). Yejuin kijtosneki ika toTajtsin xtlajtlakole nion xkichiua tlen xkuajli. Ika yejon, toTajtsin kema uelis tikneltokaskej pampa yejua xijkon ken tlaltikpakchanejkej akin kichiuaj tlen xkuajli. Nion tekiuaj akin nesi kuajli iyojlo xuelis kiyektlalis nochi tlen tlaltikpakchanejkej xkuakualtin kichiuaj. San ika, toTajtsin nochi ueli kichiua. Yejua uelis kipopolos nochi tlajyouilistli tlen onka, niman kema yemelak kichiuas. Ijkuak toTajtsin peuas tlayektlalis, kichiuas maka sa keman manochiua tlen xkuajli (xpoua Salmo 37:9-11).

11. a) ¿Kenon kita toTajtsin tlen xkuajli nochiua? b) ¿Kenon nomachilia toTajtsin ijkuak mitsita titlajyouiya?

¹¹ ¿Kenon nomachilia toTajtsin ipampa tlemach tlen xkuajli topan nochiua niman itech tlen panoua ipan tlaltikpaktli? Biblia temachtia ika “kitlasojtla melajkayotl” (Salmo  37:28). Yejua kitstika tlen kuajli niman tlen xkuajli, niman kitlauelita nochi tlen xkuajli nochiua. Biblia kijtoua ika “onoyolkoko” ijkuak ne yeuejkaui tlaltikpaktli otenka ika tlen xkuajli (Génesis 6:5, 6). Niman toTajtsin xnopatla (Malaquías 3:6). Noijki ipan yejuin tonaltin kitlauelita tlen xkuajli niman kimiknelia akin tlajyouiyaj. “Yejua kineki mechpaleuis”, techijlia ipan Biblia (xpoua 1 Pedro 5:7).

12, 13. a) ¿Tleka tikpiyaj kualneskayomej ken tlasojtlalistli, niman tlenon tikmachiliaj ijkuak tikimitaj tlaltikpakchanejkej tlajyouiyaj? b) ¿Tleka kuajli tikmatstokej ika toTajtsin kipopolos nochi tlen panotok ipan tlaltikpaktli?

¹² ¿Tleka tikmatstokej ika toTajtsin kiyolkokoua ijkuak techita titlajyouiyaj? Matikitakan tleka. Biblia temachtia ika toTajtsin okichijchiuj tlaltikpakchane ijkon ken yejua (Génesis 1:26). Ika yejon, tejuamej noijki tikpiyaj kualneskayomej ken yejua. Xnemili, ¿tlen tikmachilia ijkuak tikimita tlajyouiyaj tlaltikpakchanejkej? Tla tejua mitsyolkokoua tlen xkuajli inpan nochiua, noijki kuajli xmatsto ika toTajtsin melak kiyolkokoua.

¹³ Tlaltikpakchanejkej tetlasojtlaj, yejuin itlaj tlen melak kualtsin uelis tikijtoskej itech tlaltikpakchanejkej. Ika yejon tikijtoua ika titlachiaj ijkon ken akin otexchijchiuj. Biblia techmachtia ika “Dios yejua tetlajsojtlalistli” (1 Juan 4:8). Tejuamej titetlasojtlaj pampa toTajtsin tetlasojtla. Tla tejua tiueliskia tikpopolos nochi ajmantli niman tlemach tlen xkuajli nochiua ipan tlaltikpaktli, ¿xmelak ika tikchiuaskia pampa titetlasojtla? ¡Tikmatstokej ika kema! Kuakon, noijki kuajli xmatsto ika toTajtsin kipopolos nochi tlaueltin  ipan yejuin tlaltikpaktli. Tlen toTajtsin kijtoua kichiuas, itech tlen otikpouj ipan páginas 4 iuan 5 melauak nochiuas, niman yejuin xsan temiktli: toTajtsin yokijto niman yejua kichiuas. Tla kuajli tikixmati toTajtsin akin okijto yejuin, tikneltokas ika kema kichiuas.

14. ¿Kenon itoka toTajtsin, niman tleka noneki matiktekitiltikan itoka?

¹⁴ ¿Tlenon kachtopa tikchiua ijkuak tikneki yakaj mamitsixmati? ¿Xmelak ika tikijlia motoka? Aman xnemili, ¿toTajtsin kipiya itoka? Miyek tlaneltokiltin noso religiones temachtiaj ika yejua itoka “toTajtsin” noso “toTeko”, san  ika, yejuin xtokayomej. Yejuin san ika kimixmatij oksekimej, ken “tekiuaj” noso “tlamachtijketl”. Biblia techijlia ika toTajtsin kixmatij kentla, “toTajtsin” niman “toTeko”, noijki onka okseki tlen ika kixmatij. Niman noijki temachtia ika kipiya itoka: Jehová. Salmo 83:18 kijtoua: “Tejua akin motoka Jehová, san tejua tiUeyixtika ipan nochi tlaltikpaktli”. Tla ipan moBiblia xnesi yejuin tokayotl, timitstlajtlaniliaj xkita ipan apéndice “ToTajtsin itoka: kenon notekitiltia niman tlen kijtosneki”. Itokayo toTajtsin uajnestiaya kanaj chikome mil ijkuak Biblia onoijkuilo. Ika yejon, Jehová kineki xkixmati kenon itoka niman xtekitilti. Kuakon uelis tikijtoskej ika toTajtsin kitekitiltia Biblia niman ijkon xkixmati kenon yejua.

15. ¿Tlenon kijtosneki itoka Jehová?

¹⁵ Itoka toTajtsin Jehová, tlen yejua okinotlalili, miyek kijtosneki. Kijtosneki ika yejua ueli kichiua nochi tlen kijtoua  niman tlen kinemilia. * Xok onka okse tokayotl ijkon ken yejua, pampa san yejua kinamiki ijkon manotokayoti. Miyek onka tlen uelis tikijtoskej ika san yejua kinamiki yejuin tokayotl. Matikitakan seki.

16, 17. ¿Tlenon techmachtia itech Jehová ijkuak kijtoua ika yejua: a) “Nochi ueli”? b) “Tekiuaj akin nochipa nemi”? c) “Tlachijchiujketl”?

¹⁶ Yotikitakej ipan Salmo 83:18 tlen kijtoua itech Jehová: “San tejua tiUeyixtika”. Noijki, san yejua kixmatij kentla akin ‘Nochi ueliʼ. Apocalipsis (noso Revelación) 15:3 kijtoua: “Ueyi niman tetlatlachaltij nochi on tlen yotikchiu toTeko Dios yejuan nochi tiueli”. Ijkuak nikan kijtoua ‘Nochi tiueliʼ kijtosneki ika xakaj ijkon kipiya kojtilistli ken Jehová. Niman ijkuak kijtoua ika yejua ‘Tekiuaj akin nochipa nemi’ techilnamiktia ika: inemilis xkeman tlami. Ipan Apocalipsis 1:8 kijtoua: “Yejua aman yoltika, niman nochipa nemiya, niman nochipa nemis”. ¿Xmelak ika tikmojkaitaj nochi yejuin?

¹⁷ Noijki xakaj ijkon ken Jehová: pampa san yejua Tlachijchiujketl. Apocalipsis 4:11 kijtoua: “ToTeko Dios, tejua mitsmelaua para tikselis ueyilistli, tetlakaitalistli, niman poder [kojtilistli], pampa tejua nochi tlajtlamach otiktlalij niman ken tejua otiknek otikintlalij niman onokej”. Jehová yejua akin okichijchiuj nochi tlen onka: akin nemij ne iluikak niman xuelij tikimitaj, sitlalimej tlen tikimitaj tlakpak, nochi tlen tlaki, nochi tlen nemi ijtik atl niman atentin, niman okseki tlemach.

18. ¿Tleka kinemiliaj sekimej tlaltikpakchanejkej ika xkeman uelis nonisiuiskej itech toTajtsin, san ika, tlenon temachtia Biblia?

¹⁸ Nemij akin melak kimojkaitaj Jehová ijkuak kixmatij ikualneskayouan. Kinemiliaj ika toTajtsin melak ueyixtika niman ika xkeman uelis kinisiuiskej noso nion xnajmana inpampa. ¿Yemelak ijkon panoua? Biblia xijkon temachtia,  pampa kijtoua itech Jehová “yejua xuejka nemi [itech] cada se de tejuamej” (Hechos 17:27). Noijki techijlia: “Xnisiuikan Dios niman yejua mechnisiuis” (Santiago 4:8).

19. a) ¿Kenon uelis tiknisiuiskej toTajtsin, niman tlenon tikseliskej? b) ¿Katlejua ikualneskayouan toTajtsin melak tikinuelita?

¹⁹ ¿Kenon uelis timonisiuis itech toTajtsin? Noneki maka xkaua tlen amantsin tikchiujtika: xmomachti nochi tlen tiuelis itech toTajtsin. Jesús okijto: “Niman ijkuak se mitsixmati tejua yejuan san moselti melauak tiDios, niman nejua niJesucristo yejuan otinechajtitlan, yejua kipia on nemilistli yejuan para nochipa” (Juan 17:3). Kema, Biblia temachtia ika tla tikixmatij Jehová niman Jesús, tikseliskej “nemilistli yejuan para nochipa”. Yotikitakej ika “Dios yejua tetlajsojtlalistli” (1 Juan 4:16). Jehová noijki kipiya miyek okseki kualneskayomej, nochi kualtsitsintin niman techyoltilanaj. Se neskayotl, Biblia kijtoua ika yejua “teikneliani, tepaleuiya, xnimantsin kualani niman kipiya ueyi tlasojtlalistli tlen xtekaua niman tlen melauak” (Éxodo 34:6). San toTajtsin “yolkuajli niman nimantsin tetlapopoluia” (Salmo 86:5). Teijyouiya (2 Pedro 3:9). Yolmelauak (Apocalipsis 15:4). Tla xtijkaua timomachtia Biblia, tikitas ika Jehová yokiteititi yejuin kualneskayomej niman miyek okseki.

20-22. a) Pampa xueli tikitaj toTajtsin, ¿xuelis tiknisiuiskej? Xkijto tleka ijkon tikijtoua. b) ¿Tlenon uelis mitsijliskej sekimej akin kinemiliaj mitspaleuijtokej, niman tlenon noneki xchiua?

²⁰ Kema, toTajtsin xueli tikitaj pampa yejua se Espíritu (Juan 1:18; 4:24; 1 Timoteo 1:17). San ika, Biblia techtomilia kenon yejua. Ijkon ken okijto salmista, tejua uelis tikitas “tlen kikualnextia Jehová” (Salmo 27:4; Romanos 1:20). Tla tejua timomachtia itech Jehová, kuajli tikmatis ika yemelak nemi, tiktlasojtlas niman tiknisiuis.

²¹ Ika yolik tikasikamatstias tleka Biblia techijlia ika matikitakan Jehová ken toTajtsin (Mateo 6:9). ToTajtsin xsan okichiuj matinemikan, noijki kineki ika melak kualtsin matinemikan, ijkon ken se tajtli kineki tlen kuajli itech ikoneuan  (Salmo 36:9). Biblia noijki temachtia ika tlaltikpakchanejkej uelis nouikaskej iuan Jehová (Santiago 2:23). ¡San xnemili: tejua uelis timouikas iuan akin okichijchiuj nochi tlen onka!

²² Ijkuak miyek tikixmatis itech Biblia, uelis nemiskej akin kinemiliskej ika mitspaleuijtokej tla mitsijliaj maka sa xmomachti. Kanaj ijkon mitsijliskej pampa xkinekij tejua xpatla tlen tikneltoka. San ika, melak kualtsin tla iuan timouika toTajtsin niman maka yakaj xkauili mamitstelti.

23, 24. a) ¿Tleka noneki maka xmomojti titetlajtoltis itech tlen timomachtijtika? b) ¿Tlenon tikitaskej ipan okse capítulo?

²³ Tikmatstokej ika onias tlen xtikasikamatis ijkuak peuas timomachtis. San ika, xtlajtlani mamitspaleuikan niman maka xmomojti. Jesús okijto ika kuajli tla se kichiua ken se konetl akin yolyemanki (Mateo 18:2-4). Niman tikmatstokej ika kokonej nochipa tetlajtoltiaj. ToTajtsin kineki ika tejua xnexti kenon nonankilia tlen timotlajtoltia. Ipan Biblia tlajtoua itech tlaltikpakchanejkej akin onenkej yeuejkaui niman melak kinekiyaj kixmatiskej toTajtsin. Ika yejon, kuajli onomachtijkej tlen yonoijkuilojka ipan Biblia niman kuajli okimatkej ika tlen nomachtiayaj yejua tlen melauak (xpoua Hechos 17:11).

²⁴ Tla tikneki kuajli tikixmatis Jehová noneki kuajli xmomachti ipan Biblia, se amoxtli tlen xijki ken oksekimej amoxtin. ¿Tlenon kipiya Biblia tlen xkipiyaj okseki amoxtin? Tikitaskej ipan okse capítulo.