1, 2. Akin et maong so mantepet?

NAPAPANSIN mo no panon ya mantetepet iray ugugaw? No makapansalita la ra, amayamay so tepet da. Nanengneng mon agda ka alisay mata no itepet dad sika iray singa onia: Akin et asul so tawen? Nanlapuan na saray bitewen? Siopay angibangat ed saray siwit a mangansion? Nayarin naebatan mo iray tepet na ugugaw, balet no maminsan et mairap. Anggan ginawam lay anggaay nayarian mon ebatan iratan, wala nin siansiay ontumbok ya itepet da: Akin?

² Aliwan saray ugugaw labat so mantetepet. Diad itatatken tayo, dakel ni so tepet tayo. Mantetepet tayo pian agtayo nabalang, naiwasan so peligro, odino pian naebatan so tepet tayod bilay. Balet, dakel la natan so agmantetepet. Nayarin tinmunda la ran mananap na ebat, lalo lad saray sankaimportantian a bengatla.

3. Akin et tinmunda lay dakel a totoo ya amtaey ebat ed saray importantin tepet?

³ Isip mo pa labat imay tepet ya walad apis na sayan libro, saray  tepet ed introduksion, odino saray walad gapo na sayan kapitulo. Pigara labat iratan ed saray sankaimportantian ya nitepet mo. Balet, dakel lay tinmunda ya mananap na ebat. Akin ey? Wala kasi ebat na Biblia ed saratan? Iisipen na arum ya mairap a talosan iray ebat na Biblia. Say arum et agla mantetepet ta ompan nabaingan ira labat. Tan iisipen na arum ya saray papari odino mamaestro labat so makaebat ed saratan. Sika balet ey, antoy nibagam?

4, 5. Antoy arum ed saray sankaimportantian ya nitepet tayo ed bilay, tan akin ya amtaen tayo ray ebat?

⁴ Seguradon labay mon naebatan iray importantin tepet ed bilay. Ompan iisipen mo no maminsan: ‘Akin et walay bilay? Onia labat kasi bilay? Anto kasi personalidad na Dios?’ Balibali iratan ya itepet, tan marakep no agka ontutunda ya anggad naamtaan mo ray susto tan makapaliket ya ebat. Inkuan na kabkabat a managbangat ya si Jesu-Kristo: “Mantultuloy kayon onkerew, tan naikdan kayo; mantultuloy kayon mananap, tan makaromog kayo; mantultuloy kayon ontoktok, tan nalukasan kayo.”​—Mateo 7:7.

⁵ No ‘mantultuloy kan mananap’ ed saray ebat ed importante iran tepet, nanengneng mo ya talagan nagunggonaan ka. (Proverbio 2:1-5) Anggan antoy imbaga na arum ed sika, seguradon wala ray ebat, tan nayarin naalmom iratan diad Biblia. Mainomay a natalosan iray ebat. Sakey ni, no naamtaan moy ebat, nawalaan kay ilalo tan magmaliw kan maliket. Tan natan ni labat et makatulong iratan ed sika ya manbilay a kontento. Pantongtongan tayo sirin natan so kaslakan ya itetepet na totoo.

6. Akin et iisipen na dakel a totoo ya anggapoy malasakit na Dios ed paniirap tayo?

⁶ Iisipen na dakel a totoo a say ebat ed satan a tepet et on. Ibabaga dan, ‘No talagan maaroy Dios, di aliwan onia komon so nagagawad mundo natan.’ Anggan iner a pasen ed  mundo et walay guerra, pambubusolan, tan graben problema. Mansasakit itayo, maniirap, tan ompapatey iray inad-aro tayo. Kanian dakel so mangibagan, ‘No walay malasakit na Dios ed sikatayo tan ed saray problema tayo, di agto komon abuloyan ya nagawa iraya.’

7. (a) Antoy ibabangat na saray lider na relihyon kanian iisipen na totoo ya anggapoy panangasi na Dios? (b) Anton talagay ibabangat na Biblia nipaakar ed saray subok ed bilay tayo?

⁷ Balet makapaermen, no maminsan et saray lider na relihyon so rason no akin ya iisipen na totoo ya anggapoy panangasi na Dios. Singa bilang no walay trahedya, ibabaga ran atan so labay na Dios ya nagawa. Kanian singa da itetetel ed Dios iray mauges ya nagagawa. Balet talaga kasin ontan so Dios? Anton talagay ibabangat na Biblia nipaakar ed Dios? Oniay ebat na Santiago 1:13: “Sano nasusubok so sakey, agto komon ibabagan: ‘Susuboken ak na Dios.’ Ta agnayarin suboken so Dios tan agto suboken so siopaman ed panamegley na mauges iran bengatla.” Kanian agbalot nanlapud Dios so mauges ya nagagawa ed nanduruman pasen. (Basaen so Job 34:10-12.) Tua, iyaabuloy ton nagawa iray mauges, balet aliwan sikato so panlalapuan na saratan. Baleg so pandumaan to ’tan.

8, 9. (a) Antoy pandumaan na pangiyabuloy tan panlapuan na kaugsan? Mangiter na ilustrasyon. (b) Akin et aliwan duga ya tetelen tayoy Dios ed impangiyabuloy tod totoo ya manbilay a mauges?

⁸ Niay sakey ya ilustrasyon, walay sakey a marunong tan maaron ama ya baleg lay anak to balet wala nid pudir to. No manrebelde itan ya anak tan mandesisyon ya ontaynan la, agpigilan na ama to. Lapud mas labay na anak so mauges a kabibilay, aliwa laingey nansumpalan to. Kasin say ama so nanlapuan na saray problema na anak to? Andi. (Lucas 15:11-13) Mipadpara, agpipigilan na Dios so totoo no pilien day manggawa na mauges, balet aliwan sikato so lapuan na saray probleman resulta na ginawa ra. Aliwa sirin ya duga no tetelen so Dios ed amin ya problema na totoo.

⁹ Walay maabig ya rason na Dios no akin ya inabuloyan  to ray totoo ya manbilay a mauges. Say Dios tayo et marunong tan makapanyarin-amin ya Manamalsa, kanian agto la komon kaukolan ya ipaliwawa ni ray rason to. Balet lapud maar-aroy Dios, impaliwawa to ni iratan. Diad Kapitulo 11, naamtaan mo ni ray arum a rason. Pero say segurado, aliwan say Dios so natetel ed saray problema tayo. Diad tua, iiter to ni ingen so alenleneg ya ilalo pian nasolusyonan iratan!​—Isaias 33:2.

10. Akin ya segurado tayon ekalen na Dios so amin ya epekto na kaugsan?

¹⁰ Sakey ni, masanto so Dios. (Isaias 6:3) Labay ton ibaga, sikatoy malinis tan anggapon balot so mauges ya gagawaen to. Kanian sikatoy talagan napantiwalaan tayo. No saray totoo, ngalngali agmo ra napantiwalaan ta no maminsan et manggagawa ray mauges. Anggan say sankamaongan lan too ya walay autoridad to et mairap ton solusyonan so makapuy ya gagawaen na mauges ya totoo. Balet say Dios et makapanyarin-amin. Sarasarag to tan labalabay ton ekalen so amin ya epekto na kaugsan na totoo. No onkiwas lay Dios, permanente lan naekal so kaugsan!​—Basaen so Salmo 37:9-11.

11. (a) Antoy nalilikna na Dios no napapairap so totoo? (b) Antoy nalilikna na Dios ed paniirap mo?

¹¹ Legan ya anggapo ni itan, anto kasi nalilikna na Dios ed saray nagagawa ed mundo tan ed bilay mo? Ibabangat na Biblia ya say Dios et ‘aaroen toy hustisya.’ (Salmo 37:28) Kanian importantin maong ed sikato no anto so duga tan aliwa. Agton balot labay ya napairap so totoo. Ibabaga na Biblia ya “naermenan so puso” na Dios nen nagmaliw ya mauge-uges so totoo nensaman. (Genesis 6:5, 6) Ag-anguman so Dios. (Malaquias 3:6) Siansia nin agto labay ya nanengneng so paniirap a nagagawad interon mundo. “Iyaansakit to kayo,” so kuan na Biblia.​—Basaen so 1 Pedro 5:7.

12, 13. (a) Akin et wala ray balibalin kualidad tayo a singa say aro, tan antoy epekto na satan ya panangaro no nanenengneng tayoy paniirap na totoo? (b) Akin et segurado ka ya talagan panampoten na Dios iray problema ed mundo?

 ¹² Akin et segurado tayon aglabay na Dios ya manirap tayo? Niay sakey nin rason. Ibabangat na Biblia ya say too et ginawa “unong ed indengan” na Dios. (Genesis 1:26) Kanian, say maong ya ugali tayo et pakanengnengan ya balibali iray kualidad na Dios. Singa bilang, kasin nakakasian mo ray maniirap ya totoo? No naeermenan ka ed saratan ya nagagawa, seguradon mas naeermenan so Dios.

¹³ Sakey ed saray sankaabigan ya kualidad na totoo et say abilidad ya mangaro. Ipapanengneng met na satan so personalidad na Dios. Ibabangat na Biblia ya “say Dios et aro.” (1 Juan 4:8) Mangaaro itayo lapud mangaaro so Dios. Agta lapud aro et manggawa kay paraan pian ekalen so paniirap tan saray nagagawan anggapoy hustisya? No walay pakayarim, agta gawaen mo itan? Siempre! No ontan sirin, makaseguro kan panampoten na Dios so paniirap tan ag-inkahustisya. Saray promisa ya abitlad gapo na sayan libro et aliwan kugkugip labat. Seguradon nagawa iratan ya impromisa na Dios! Balet pian napanisiaan mo iratan, kaukolan mon kabaten ya maong so Dios ya angipromisad saratan.

14. Antoy ngaran na Dios, tan akin et nepeg tayon bitlaen itan?

¹⁴ No labay moy mikabat ed sakey a too, antoy gawaen mo? Agta ibagam so  ngaran mo? Say Dios ey, wala kasi ngaran to? Ibabaga na dakel a relihyon ya say ngaran to et “Dios” odino “Katawan,” balet aliwa iratan a ngaran. Titulo labat iratan, ya singa say “ari” tan “presidente.” Ibabangat na Biblia ya amayamay so titulo na Dios, kaibad saratan so “Dios” tan “Katawan.” Balet, ibabangat met na Biblia ya walay ngaran na Dios​—Jehova. Oniay nabasa ed Salmo 83:18: “Say ngaran mo et Jehova, a sika labat so Sankatagyan ed interon dalin.” No say Biblia ya uusaren mo et anggapoy ngaran a Jehova, ompan labay mon nengnengen so Apendise ed artikulon “Ngaran na Dios​—Say Usar tan Labay ya Ibaga na Satan” na sayan libro pian naamtaan mo no akin. Diad tua, say ngaran na Dios et piganlibon nabasa ed  saray orihinal ya sulsulat na Biblia nensaman. Kanian labay nen Jehova ya naamtaan moy ngaran to tan bitlaen itan. Nibaga sirin ya uusaren toy Biblia pian mikabat ed sika.

15. Antoy labay ya ibaga na ngaran nen Jehova?

¹⁵ Say ngaran na Dios et napnoy kabaliksan. Say labay ya ibaga na ngaran to, ya Jehova, et sarag ton tooren so amin ya impromisa to tan sarag ton sumpalen so amin ya panlabayan to. * Nikadkaduma so ngaran na Dios. Sikato labat so akan-ngaran ed satan. Dakel so rason no akin ya nikadkaduma si Jehova. Anto iratan?

16, 17. Antoy naaralan tayo ed si Jehova diad sarayan titulo to: (a) “Makapanyarin-amin”? (b) “Andi-anggaan ya Ari”? (c) “Manamalsa”?

¹⁶ Naamtaan tayo la imay imbaga na Salmo 83:18 nipaakar  ed si Jehova: “Sika labat so Sankatagyan.” Ontan met, si Jehova labat so tinawag ya “Makapanyarin-amin.” Oniay inkuan na Apocalipsis 15:3: “Alay abig tan makapakelkelaw iray gawam, Jehova a Dios, say Makapanyarin-amin. Matunong tan napanmatalkan iray dalan mo, O andi-anggaan ya Ari.” Ibabangat ed sikatayo na titulon “Makapanyarin-amin” ya si Jehova et sankamakapanyarian a persona. Agnaparaan so pakapanyari to; supremo itan. Tan say titulon “andi-anggaan ya Ari” et mangipapanonot ed sikatayo ya nikadkaduma si Jehova diad arum nin paraan. Sikato labat so anggapoy gapoan tan anggaan. Ibabaga na Salmo 90:2: “Manlapud andi-anggaan ya anggad andi-anggaan, sika so Dios.” Agta makapadinayew itan?

¹⁷ Nikadkaduma met si Jehova ta sikato labat so Manamalsa. Oniay nabasa ed Apocalipsis 4:11: “Sika so makanepegan, Jehova a Dios mi, a mangawat na gloria tan galang tan pakayari, lapud pinalsam so amin a bengatla, tan lapud linawam et niwala tan apalsa iratan.” Amin a bengatlan naisip mo​—manlapud saray agnanengneng ya espiritu ed tawen anggad saray nanengneng ya bitewen no labi, bunga na kakiewan, anggad saray sira ed dayat tan ilog​—amin iratan et ginawa nen Jehova!

18. Akin et iisipen na arum ya agdan balot naasinggeran so Dios, balet antoy ibabangat na Biblia?

¹⁸ Nayarin natatakot so arum no nabasa da iray makapadinayew ya kualidad nen Jehova. Iisipen dan atagtagey a maong so Dios kanian agdan balot naasinggeran odino say pakalikna ra et anggapoy kana rad Dios. Balet, duga kasi itan? Aliwan ontan so ibabangat na Biblia. Oniay nabasad satan nipaakar ed si Jehova: “Diad tua et sikatoy ag-arawi ed balang sakey ed sikatayo.” (Gawa 17:27) Bibilinen itayo ni ingen na Biblia: “Onapit kayo ed Dios, tan sikatoy onapit ed sikayo.”​—Santiago 4:8.

19. (a) Panon tayon nakaaroy Dios, tan antoy nagunggona tayo? (b) Anto ran kualidad na Dios so labalabay mo?

 ¹⁹ Panon mon nakaaroy Dios? Unona, itultuloy mo yay gagawaen mo​—say panaaral mo nipaakar ed Dios. Inkuan nen Jesus: “Saya so mankabaliksay bilay ya andi-anggaan, a kabaten da ka, say saksakey a tuan Dios, tan samay imbakim, si Jesu-Kristo.” (Juan 17:3) On, ibabangat na Biblia ya say panaral nipaakar ed si Jehova tan si Jesus et manresultad “bilay ya andi-anggaan”! Singa nibaga la, “say Dios et aro.” (1 Juan 4:16) Dakel ni ray balibalin kualidad nen Jehova. Singa bilang, ibabaga na Biblia ya si Jehova et “Dios a mapangasi tan maabagey, matantan a manpasnok tan abalbaleg ed matoor a panangaro tan katuaan.” (Exodo 34:6) Sikatoy ‘maomaong tan akaparaan a mamerdona.’ (Salmo 86:5) Say Dios et maanos. (2 Pedro 3:9) Sikatoy matoor. (Apocalipsis 15:4) No itultuloy mon basaen so Biblia, naamtaan mo no panon ya impanengneng nen Jehova a walad sikato iratan tan arum nin balibalin kualidad.

20-22. (a) Kasin imposible ya nakaaro tayoy Dios ta agnanengneng? Ipaliwawa. (b) Antoy nayarin ipagawad sika na arum, balet antoy nepeg mon gawaen?

²⁰ Tua, agmo nanengneng so Dios ta sikatoy sakey ya Espiritu. (Juan 1:18; 4:24; 1 Timoteo 1:17) Balet, no aralen moy nipaakar ed sikato diad Biblia, sikatoy nakabat mo bilang sakey a Persona. Imbaga na sakey ya nansulat ed Salmo ya nanengneng mo so “kamaongan nen Jehova.” (Salmo 27:4; Roma 1:20) No mas nakakabat moy Jehova, sikatoy mas tudtuad sika, mas naarom, tan onelet so pankakaaro yo.

²¹ Kalkalnam ya natalosan no akin ya ibabangat na Biblia ya ipasen tayoy Jehova ya Ama tayo. (Mateo 6:9) Aglabat nanlapud sikato so bilay tayo noagta labay ton nawalaan tayo met na sankaabigan a bilay​—a singa labalabay na maaron ama parad ananak to. (Salmo 36:9) Ibabangat met na Biblia ya nayarin magmaliw ya kakaaro nen Jehova so  totoo. (Santiago 2:23) Isip mo pa labat​—sarag moy magmaliw ya kaaro na Manamalsa na uniberso!

²² Legan ya ondadakel so nanaaralan mod Biblia, ompan wala ray mamatundad sika ya maong met so intension da. Nayarin aburido ra ta ompan salatan mo lay papanisiaan o relihyon mo. Balet agmo aabuloyan ya patundaen ka na arum ya makapikaaro ed Dios, say sankaabigan ya kaaro.

23, 24. (a) Akin et nepeg ya itultuloy moy mantepet nipaakar ed saray nanaaralan mo? (b) Antoy aralen ed ontumbok a kapitulo?

²³ Siempre, diad gapo et wala ray agmo ni natalosan. Balet agka komon nababaingan ya mantepet odino onkerew na tulong. Kaukolay manpaabeba. Imbaga nen Jesus ya maong so manpaabeba, ya singa saray ugugaw. (Mateo 18:2-4) Tan singa amta tayo la, matepet iray ugugaw. Labay na Dios a naamtaan mo ray ebat. Sikatoy naliliketan ed saramay labalabay day manaral nipaakar ed sikato, ya maalwar dan nenengnengen so ibabagay Kasulatan pian naseguro ran tua so aaralen da.​—Basaen so Gawa 17:11.

²⁴ Say sankaabigan ya paraan pian nakabat si Jehova et say panaral ed Biblia. Duma itan ed anggan anton libro. Antoy pidumaan to ey? Atan so aralen tayo diad ontumbok a kapitulo.