1, 2. Dikon hopi bes ta bon pa hasi pregunta?

BO A yega di ripará kon mucha ta hasi pregunta? Hopi di nan ta kuminsá puntra asina ku nan siña papia. Ku wowo hanchu habrí i ansioso pa sa, nan ta hisa kara wak bo i puntra kosnan manera: Dikon shelu ta blou? Dikon strea ta bria? Ken a siña para kanta? Podisé bo ta hasi bo bèst pa duna un kontesta, pero esei no ta semper fásil. Asta bo mihó kontesta por hiba na un otro pregunta: Dikon?

² Mucha no ta e únikonan ku ta hasi pregunta. Segun ku nos ta krese, nos ta sigui puntra. Nos ta puntra pa nos por sa kon pa yega na un adrès, pa haña sa di peligernan ku nos tin ku evitá òf pa satisfasé nos kuriosidat. Pero ta parse ku hopi hende ku tempu ta stòp di hasi pregunta, spesialmente e preguntanan di mas importante. Òf a lo ménos, nan ta stòp di buska kontesta.

3. Dikon hopi hende ta stòp di purba haña kontesta riba e preguntanan di mas importante?

³ Pensa riba e pregunta ku tin riba e kaft di e buki aki, tambe e preguntanan hasí den e  introdukshon òf esnan na komienso di e kapítulo aki. Nan ta algun di e preguntanan di mas importante ku bo por hasi. Sin embargo, hopi hende a stòp di purba haña kontesta riba nan. Dikon? Beibel tin kontesta pa nan? Tin hende ta haña ku Beibel su kontestanan ta muchu difísil pa komprondé. Algun hende ta preokupá ku hasimentu di pregunta lo por laga nan pasa bèrgwensa. I tin hende ta disidí ku mihó laga e tipo di preguntanan ei pa lider- i guianan religioso. Kiko abo ta pensa?

4, 5. Kua ta algun di e preguntanan di mas importante ku nos por hasi den bida, i dikon nos tin ku buska nan kontesta?

⁴ Muy probablemente abo ta interesá den haña kontesta riba e preguntanan importante di bida. Kasi sigur bo a yega di puntra bo mes: ‘Kiko ta e propósito di bida? Akaso su úniko propósito ta pa nase, bira bieu anto kaba muri? Kon Dios ta realmente?’ Ta bon pa hasi e tipo di preguntanan ei. I ta importante pa bo no stòp di sigui buska sino te ora bo haña kontestanan konfiabel ku ta laga bo keda satisfecho. E famoso maestro Hesukristu a bisa: “Pidi, i lo wòrdu duná na boso; buska, i boso lo haña; bati, i lo wòrdu habrí pa boso.”—Mateo 7:7.

⁵ Si bo sigui “buska” kontesta riba e preguntanan importante, lo bo ripará ku e búskeda ei por ta masha rekompensador. (Proverbionan 2:​1-5) Maske kiko otro hende lo por a bisa bo, tin kontesta pa nan, i abo por haña nan: den Beibel. E kontestanan no ta difísil pa komprondé. Es mas, nan ta duna speransa i goso. I nan por yuda bo hiba un bida ku for di awor ta duna bo satisfakshon. Pa kuminsá, laga nos konsiderá un pregunta ku a molestiá hopi hende.

6. Dikon hopi hende ta pensa ku Dios no tin kunes ku sufrimentu humano?

⁶ Hopi hende ta pensa ku e kontesta riba e pregunta ei ta  sí. Nan ta rasoná: ‘Si Dios tabata interesá den nos, mundu lo mester tabata un lugá hopi distinto, tòg?’ Nos ta wak rònt i ta mira un mundu yen di guera, odio i miseria. I komo persona, nos ta bira malu, nos ta sufri i nos sernan kerí ta muri. P’esei hopi hende ta bisa: ‘Si Dios tabata interesá den nos i den nos problemanan, lo e mester a prevení e tipo di kosnan ei, tòg?’

7. (a) Kon guianan religioso a pone hopi hende pensa ku Dios no tin sintimentu? (b) Kiko Beibel ta siña realmente tokante e difikultatnan ku nos ta sufri?

⁷ Pió ainda, guianan religioso tin biaha ta pone hende pensa ku Dios su kurason ta duru, sin sintimentu. Kon asina? Wèl, ora un tragedia sosodé, nan ta bisa “es ku Dios ke,” esta, ku ta Dios su boluntat. Bon mirá, e guianan religioso ei ta kulpa Dios pa e mal kosnan ku ta pasa. Esei ta e bèrdat tokante Dios? Kiko Beibel ta siña realmente? Santiago 1:13 ta kontestá: “No laga ningun hende bisa ora ku e wòrdu tentá: ‘Mi ta wòrdu tentá dor di Dios’; pasobra Dios no por wòrdu tentá dor di maldat, i e mes no ta tenta ningun hende.” Pues, Dios nunka no ta esun ku ta kousa e maldat ku bo ta mira den mundu rònt di bo. (Jòb 34:10-12) Ta bèrdat ku e ta permití kos malu sosodé. Pero tin un diferensia grandi entre permití algu sosodé i kous’é.

8, 9. (a) Ki ehèmpel bo por usa pa mustra e diferensia entre permití maldat eksistí i kous’é? (b) Dikon no ta hustu pa nos kritiká Dios su desishon di permití humanidat sigui e kaminda di rebeldia?

⁸ Por ehèmpel, pensa riba un tata sabí i amoroso ku tin un yu hòmber grandi ku ainda ta biba na kas serka su mayornan. Si e yu bira rebelde i disidí di bai for di kas, su tata no ta strob’é di bai. E yu ta hiba un mal bida i ta haña su mes den problema. Ta e tata ta e kousa di e problemanan di su yu? Nò. (Lukas 15:11-13) Asina tambe, Dios no a stroba hende ora ku nan a skohe pa sigui un mal kaminda, pero tampoko e no ta e kousa di e problemanan ku a  resultá. Pues anto, sigur no ta hustu pa kulpa Dios pa tur e problemanan di humanidat.

⁹ Dios tin bon motibu pakiko el a permití humanidat sigui un mal kaminda. Komo nos Kreadó sabí i poderoso, e no tin ku duna nos splikashon di su motibunan. Sin embargo, amor ta motivá Dios pa hasié tòg. Lo bo siña mas tokante e motibunan aki den Kapítulo 11. Pero keda trankil, Dios no ta responsabel pa e problemanan ku nos ta konfrontá. Al kontrario, e ta duna nos e úniko speransa pa un solushon!—Isaias 33:2.

10. Dikon nos por tin konfiansa ku Dios lo drecha tur e efektonan di maldat?

¹⁰ Ademas, Dios ta santu. (Isaias 6:3) Esaki ta nifiká ku e ta puru i limpi. No tin ningun rastro di maldat den dje. Pues nos por konfi’é plenamente. Nos no por tin e pleno konfiansa ei den hende, pasobra tin biaha nan ta bira korupto. Asta e persona di mas onesto den puesto di outoridat hopi bes no tin e poder pa drecha e daño ku mal hende ta hasi. Pero Dios ta todopoderoso. E por i lo drecha tur e efektonan ku maldat tabatin riba humanidat. Ora Dios bai aktua, lo e hasi esei den un manera ku lo pone fin pa semper na maldat!—Salmo 37:9-11.

11. (a) Kiko Dios ta pensa di inhustisia? (b) Kiko Dios ta pensa di bo sufrimentu?

¹¹ Miéntras tantu, kiko Dios ta pensa di loke ta pasa den mundu i den bo bida? Wèl, Beibel ta siña ku Dios “ta stima hustisia.” (Salmo 37:28) Pues, e ta masha interesá den loke ta korekto i loke ta inkorekto. E ta odia tur klase di inhustisia. Beibel ta bisa ku Dios “tabata tristu den su kurason” ora ku den pasado mundu a yena ku maldat. (Génesis 6:5, 6) Dios no a kambia. (Malakias 3:6) Ainda Dios tin rabia  di mira e sufrimentu ku ta tumando lugá rònt mundu. I Dios tin rabia di mira hende sufri. Beibel ta animá nos pa ‘tira tur nos preokupashon riba dje, pasobra e ta perkurá pa nos.’—1 Pedro 5:7.

12, 13. (a) Kon bin nos tin bon kualidat manera por ehèmpel amor, i amor ta laga nos sinti kiko pa ku e inhustisia den mundu? (b) Dikon bo por ta sigur ku Dios realmente lo hasi algu ku e problemanan di mundu?

¹² Kon nos por ta sigur ku Dios tin rabia di mira sufrimentu? Ata mas prueba. Beibel ta siña ku hende a ser trahá den Dios su imágen. (Génesis 1:26) Pues nos tin bon kualidat pasobra Dios tin bon kualidat. Por ehèmpel, ora bo mira hende inosente sufri, esei ta molestiá bo? Si abo ta preokupá pa tal inhustisia, bo por ta sigur ku Dios ta preokupá mas tantu ainda ku esei.

¹³ Un di e mihó kosnan ku nos komo hende tin ta e kapasidat di stima. Esei tambe ta reflehá un kualidat di Dios. Beibel ta siña ku “Dios ta amor.” (1 Juan 4:8) Nos ta stima pasobra Dios ta stima. Amor lo a motivá bo pa pone un fin na e sufrimentu i inhustisia ku bo ta mira den mundu? Si bo tabatin e poder pa hasi esei, lo bo a hasié? Klaru ku sí! Wèl, bo por ta sigur ku Dios tambe lo pone fin na sufrimentu i inhustisia. E promesanan menshoná den e introdukshon di e buki aki no ta djis un ilushon òf speransa bano. Dios su promesanan lo kumpli sigur! Pero pa bo por pone fe den e promesanan ei bo tin ku sa mas tokante e Dios ku a primintí nan.

14. Kiko ta Dios su nòmber, i dikon nos tin ku us’é?

¹⁴ Si bo ke pa un hende siña konosé bo, kiko bo ta hasi? Bo ta bisa e persona bo nòmber, no ta asina? Dios tin un nòmber? Hopi religion ta kontestá ku su nòmber ta “Dios” òf “Señor,” pero eseinan no ta nòmber personal. Nan ta simplemente título, meskos ku “rei” i “presidente” ta título. Beibel ta siña ku Dios tin hopi título, entre nan, “Dios” i “Señor.” Sin embargo, Beibel ta siña tambe ku Dios tin un nòmber personal: Yehova. Salmo 83:18 (NW) ta bisa: “Abo, kende su nòmber ta Yehova, abo so ta  e Haltísimo riba henter tera.” (Wak tambe e nota na pia di página di Eksodo 3:⁠14, BPK) Si bo tradukshon di Beibel no tin e nòmber ei, lo bo por konsultá e artíkulo di Apèndiks “E Nòmber di Dios—Su Uso i Nifikashon”. E bèrdat ta ku Dios su nòmber ta aparesé míles di biaha den manuskritonan antiguo di Beibel. Pues Yehova ke pa bo konosé su nòmber i us’é. Den un sentido, e ta usa Beibel pa introdusí su mes na bo.

15. Kiko e nòmber Yehova ta nifiká?

¹⁵ Dios a duna su mes un nòmber ku ta yen di nifikashon. Su nòmber, Yehova, ta nifiká ku Dios por kumpli ku kualke promesa ku e hasi i ku kualke propósito ku e tin na mente. *  Dios su nòmber ta úniko. E ta pertenesé na e so. Yehova ta úniko den vários manera. Kon asina?

16, 17. Kiko nos por siña tokante Yehova for di e siguiente títulonan: (a) “Todopoderoso”? (b) “Rei eterno”? (c) “Kreadó”?

¹⁶ Nos a mira ku Salmo 83:18 a bisa di Yehova: “Abo so ta e Haltísimo.” Asina tambe, ta Yehova so Beibel ta yama “Todopoderoso.” Revelashon 15:3 ta bisa: “Grandi i maravioso bo obranan ta, o SEÑOR Dios Todopoderoso; hustu i berdadero bo kamindanan ta, abo, Rei di e nashonnan.” E título “Todopoderoso” ta siña nos ku Yehova ta e ser mas poderoso ku tin. Su poder ta sin igual; e ta supremo. Na 1 Timoteo 1:17, Beibel ta yama Yehova e “Rei eterno.” E título “Rei eterno” ta rekordá nos ku Yehova ta úniko den un otro sentido. E ta e úniko persona ku semper a eksistí. Salmo 90:2 ta bisa: “Sí, for di eternidat te na eternidat, abo ta Dios.” Esei ta yena bo ku rèspèt profundo p’e, no ta asina?

¹⁷ Yehova ta úniko tambe pa e echo ku ta e so ta e Kreadó. Revelashon 4:11 ta bisa: “Digno bo ta, nos Señor i nos Dios, pa risibí gloria i onor i poder; pasobra abo a krea tur kos, i pa motibu di bo boluntat nan tabata eksistí, i a wòrdu kreá.” Tur kos ku bo por imaginá—sea ta kriaturanan spiritual invisibel den shelu òf e streanan ku ta yena shelu anochi òf e frutanan ku ta krese na palu òf e piskánan ku ta landa den laman i riu—tur ta eksistí pasobra Yehova ta e Kreadó.

18. Dikon algun hende ta sinti ku nunka nan lo por tin un amistat será ku Dios, pero kiko Beibel ta siña?

¹⁸ Tin hende ta sinti nan mes un poko inkómodo ora nan lesa tokante Yehova su kualidatnan impreshonante. Nan tin miedu ku Dios ta muchu haltu pa nan, ku nunka nan lo no por tin un amistat será ku Dios òf asta konta den bista di un Dios asina sublime. Pero e idea ei ta korekto?  Beibel ta siña nèt lo kontrario. E ta bisa di Yehova: “E no ta leu di kada un di nos.” (Echonan 17:27) Beibel ta asta urgi nos: “Hala serka Dios i e lo hala serka boso.”—Santiago 4:8.

19. (a) Kon nos por kuminsá hala serka Dios, i ku ki benefisio? (b) Kua ta e kualidatnan di Dios ku mas bo ta gusta?

¹⁹ Kon bo por hala serka Dios? Pa kuminsá, bo mester sigui hasi loke bo ta hasiendo awor, esta, siña tokante Dios. Hesus a bisa: “Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.” (Juan 17:3) Sí, Beibel ta siña ku gana konosementu tokante Yehova i Hesus ta hiba na “bida eterno”! Manera a keda menshoná kaba, “Dios ta amor.” (1 Juan 4:16) Yehova tin tambe hopi otro kualidat mas ku ta bunita i atraktivo. Por ehèmpel, Beibel ta bisa ku Yehova ta un Dios “yen di kompashon i grasia, kende no ta rabia lihé i kende ta abundá den miserikòrdia i bèrdat.” (Eksodo 34:6) E ta “bon, i kla pa pordoná.” (Salmo 86:5) Dios tin pasenshi. (2 Pedro 3:9) Dios ta fiel. (1 Korintionan 1:⁠9) Segun ku bo ta lesa mas den Beibel, lo bo mira kon Yehova a demostrá ku e tin e kualidatnan atraktivo aki i hopi otro mas.

20-22. (a) E echo ku nos no por mira Dios ta stroba nos di tin un amistat será kuné? Splika. (b) Kiko algun hende ku bon intenshon kisas ta konsehá bo pa hasi, pero kiko lo bo mester hasi?

²⁰ Ta bèrdat ku bo no por mira Dios, pasobra e ta un spiritu invisibel. (Juan 1:⁠18; 4:24; 1 Timoteo 1:17) Sin embargo, dor di siña loke Beibel ta bisa tokante dje, bo por bin konos’é komo persona. Manera e salmista a bisa, bo por “kontemplá e bunitesa di SEÑOR.” (Salmo 27:4; Romanonan 1:20) Mas bo siña tokante Yehova, mas real lo e bira pa bo i mas motibu lo bo tin pa stim’é i sinti ku bo tin un amistat será kuné.

²¹ Lo bo bin komprondé dikon Beibel ta siña nos pa pensa di Yehova komo nos Tata. (Mateo 6:9) No solamente pasobra nos bida ta bin for di dje, sino tambe pasobra e  ke pa nos tin e mihó bida posibel, meskos ku kualke tata amoroso lo ke esei pa su yunan. (Salmo 36:9) Beibel ta siña tambe ku hende por bira Yehova su amigu. (Santiago 2:23) Figurá bo, bo por bira un amigu di e Kreadó di universo!

²² Segun ku bo ta siña mas kos for di Beibel, lo bo ripará ku algun hende ku bon intenshon lo konsehá bo pa stòp ku e estudio di Beibel ei. Kisas nan ta preokupá ku lo bo kambia bo kreensianan. Pero no laga ningun hende stòp bo di sera e mihó amistat ku ta posibel, esta, amistat ku Dios.

23, 24. (a) Dikon bo tin ku sigui hasi pregunta tokante loke bo ta siñando? (b) Kiko e siguiente kapítulo lo trata?

²³ Klaru ku lo tin kosnan ku bo no ta komprondé na prinsipio. Bo mester ta humilde pa pidi yudansa, pero no laga bèrgwensa stroba bo. Hesus a bisa ku ta bon pa ta humilde, meskos ku un mucha. (Mateo 18:2-4) I manera nos sa, mucha ta hasi masha hopi pregunta. Dios ke pa bo haña e kontestanan. Beibel a elogiá algun hende ku tabata ansioso pa siña tokante Dios. Nan a chèk kuidadosamente den e Skritura pa hasi sigur ku loke nan tabata siña ta e bèrdat.—Echonan 17:11.

²⁴ E mihó manera pa siña tokante Yehova ta dor di investigá Beibel. E ta distinto for di tur otro buki. Den ki manera? E siguiente kapítulo lo trata esei.