1, 2. Ke ku manda i bon ba ta fasi purguntas?

BU ciga ja di oja kuma ki mininus ta fasi purguntas? Manga delis ta kumsa fasi purguntas logu ke kumsa sibi papia, suma es ku bu pudi oja li. E ta fasi manga di purguntas suma: Ke ku manda i sedu sin? Kila i ke? Bu pudi tenta ruspundi, ma i ka sempri fasil. Mesmu bu minjor resposta, pudi lantanda mas utru purgunta: Pabia di ke?

² I ka so mininus ku ta fasi purguntas. Nkuantu no na kirsi no ta kontinua fasi purguntas. No ta fasi kila, pa buska orientason, pa sibi di pirigus ku no dibi di ivita, o satisfasi no kuriosidadi. Ma, i sta suma manga di jintis ta disisti di fasi purguntas, spesialmenti purguntas mas importantis. Pelu menus, e ta para buska respostas.

3. Ke ku manda alguns ta para buska respostas di purguntas mas importanti?

³ Pensa na purgunta ku sta na kapa des livru, purguntas ku sta na ntruduson, o kilis ku sta na kumsada des kapitulu.  Es i alguns purguntas mas importanti ku bu pudi fasi. Ma, manga di jintis disisti buska respostas. Pabia di ke? Sera ki Biblia tene respostas? I ten kilis ku ta pensa kuma, respostas i difisil di ntindi. Utrus ta medi fasi purguntas pa ka bin burguñu. Alguns ta fala ki, i minjor disa pa lideris riliẑiozu ruspundi ki purguntas. I abo gora?

4, 5. Kal ki alguns purguntas mas importanti di vida, i ke ku manda no dibi di buska respostas?

⁴ Talves bu na sta nteresadu na oja respostas pa purguntas mas importanti di vida. Ku serteza, utru ora bu ta punta: ‘Kal ki objetivu di vida? Sera ki uniku objetivu di vida i di padidu, beju i dipus muri? Na bardadi kuma ki Deus sedu?’ I bon fasi es tipu di purguntas, i importanti pa bu ka disisti, te ora ku bu oja bon respostas i di konfiansa. Instutor famozu Jesus Kristu fala ki, no dibi di kontinua pidi i no ta dadu, no dibi di buska i no na oca, no dibi di bati porta i no na yabridu el. — Mateus 7:7.

⁵ Si bu kontinua na buska respostas pa purguntas importanti, bu na diskubri ki, es buska pudi tene bon rusultadu. (Ditus 2:1-5) I ka mporta ke ki utrus pudi falau, respostas ten, i bu pudi ojal — na Biblia. Respostas ka difisil ntindi. Minjor inda, e ta da speransa ku alegria. I e pudi judau tene un bon vida desdi gosi. Pa kumsa, no konsidera un purgunta ku ta preokupa manga di jintis.

6. Ke ku manda manga di jintis ta pensa kuma, Deus ka ta preokupa ku no sufrimentu?

⁶ Alguns ta duvida di kila. E ta fala, ‘si Deus ta preokupaba ku nos, mundu ka na seduba sin!’ Pa tudu ladu ku no jubi, no ta oja mundu ŝeiu di gera, odiu ku sufrimentu. I kada un di nos ta duensi, ta sufri i pirdi algin ku no  ama na morti. E ku manda, manga delis ta fala: ‘Si Deus ta preokupaba ku nos i ku no purblemas, i ka na disaba pa kil kusas akontisi!’

7. (a) Kuma ki lideris riliẑiozu leba manga di jintis pensa kuma, Deus ka ta sinti pa nos? (b) Ke ki Biblia na bardadi ta sina aserka di purblemas ku no ta pasa?

⁷ Pior inda, utru ora lideris riliẑiozus ta leba jintis na pensa kuma, Deus ka ta sinti pa nos. Di kal manera? Ora ki ten un kasabi, e ta fala i vontadi di Deus? Na bardadi, es lideris ta kulpa Deus pa mau kusas ku ta akontisi. Sera ki kila i bardadi aserka di Deus? Ke ki Biblia na bardadi ta sina? Abakuk 1:13 fala asin aserka di Deus: “Manera ku bu uju puru dimas, bu ka pudi seta mal; bu ka pudi kontinua jubi pa jinti ku na fasi mal.” Asin, Deus nunka i ka responsavel pa maldadi ku bu ta oja na mundu. (Lei Jo 34:10-12.) I bardadi ki, i ta disa pa mau kusas akontisi. Ma i ten un diferensa garandi entri disa un kusa akontisi ku kausa ki kusa.

8, 9. (a) Da zemplu ku ta mostra diferensa entri disa pa maldadi ten o kausa maldadi. (b) Ke ku manda i na sedu injustu kulpa disison di Deus di disa pekaduris sigi mau kamiñu?

⁸ Pur izemplu, pensa aserka di un bon pape ku tene un fiju garandi ki sta inda na kasa. Ora ki fiju torna rebeldi i disidi sai di kasa, si pape ka ta tujil. Fiju sigi mau kamiñu na vida i yentra na purblema. Sera ki pape i kausa di purblemas di si fiju? Nau. (Lukas 15:11-13) Di mesmu manera, Deus ka tuji pekaduris sigi mau kamiñu ke kuji, ma i ka el ki kausa purblemas ku akontisi. Na bardadi, i na sedu injustu kulpa Deus pa tudu purblemas di mundu.

⁹ Deus tene bon motivus pa disa pekaduris sigi mau kamiñu. Suma no Kriadur jiru i puderosu, i ka tene obrigason di splikanu kil motivus. Bu na aprindi mas aserka des motivus na Kapitulu 11. Ma bu pudi tene serteza di  kuma Deus i ka responsavel pa purblemas ku no ta nfrenta. Pa kontrariu, i danu uniku speransa pa un soluson! — Isaias 33:2.

10. Ke ku manda no pudi fia di kuma, Deus na bin kaba ku tudu efeitu di maldadi?

¹⁰ Alen di kila, Deus i santu. (Isaias 6:3) Es signifika ki, el i puru i limpu. Nada di mal ka sta nel. Pa kila, no pudi pui tudu no konfiansa nel. Ma, no ka pudi pui tudu konfiansa na pekaduris, ki utru ora ta sedu kuruptu. Te mesmu algin di otridadi mas onestu, ka tene puder di kaba ku stragu ku jintis mau ta fasi. Ma Deus tene tudu puder. I pudi kaba ku tudu efeitu di maldadi na pekaduris, i na bin fasi kila. Ora ku Deus aẑi, i na bin fasil di un manera ku na kaba ku maldadi pa sempri! — Lei Salmu 37:9-11.

11. (a) Kuma ku Deus ta nkara injustisa? (b) Kuma ku Deus ta nkara sufrimentu ku bu ta pasa?

¹¹ Na mesmu tempu, kuma ki Deus ta nkara ke ki sta na pasa na mundu i na bu vida? Biblia ta sina ki Deus i “justu.” (Ripitison di Lei 32:4) Asin, i ta preokupa ciu ku ke ki sertu i ke ki eradu? I ta odia tudu tipu di injustisa. Biblia fala ki, ‘korson di Deus staba tristi’ kontra maldadi tomaba konta di mundu na pasadu. (Kumsada 6:5, 6) Deus ka muda. (Malakias 3:6) I kontinua odia sufrimentu ku sta na pasa na mundu ntidu. I Deus ka gosta nin un bokadu di oja jintis na sufri. Biblia fala i ta ‘toma konta di nos.’ — Lei 1 Pedru 5:7.

12, 13. (a) Ke ku manda no tene bon kualidadis suma amor, i kuma ki amor ta afeta no manera di nkara injustisas na mundu? (b) Ke ku manda bu pudi tene serteza di kuma, na bardadi Deus na bin rosolvi purblemas di mundu?

¹² Kal serteza ku no tene di kuma Deus ka gosta nin  un bokadu di oja jintis na sufri? Ali mas utrus provas. Biblia fala ki pekadur kumpudu na imaẑen di Deus. (Kumsada 1:26) Asin, no tene bon kualidadis pabia Deus tene bon kualidadis. Pur izemplu, sera ki bu ka ta sinti mal di oja jintis inosenti na sufri? Si bu ta preokupa kes injustisa, bu pudi sta sertu di kuma, Deus mas ta preokupa kel.

¹³ Un di minjor kusa na pekaduris i no kapasidadi di ama. Es tambi ta mostra kuma ki Deus sedu. Biblia ta sina ki “Deus i amor.” (1 Jon 4:8, 16) Aos, no ta oja manga di sufrimentu ku injustisa na mundu. Si bu teneba puder di fasi mudansa, sera ki bu na fasil? Ku serteza, amor ku bu tene pa jintis na lebau fasil! Si no misti rosolvi es purblemas, Deus mas misti fasil. Ku serteza i na bin kaba ku sufrimentu i ku injustisa. Promesas ku faladu del na ntruduson des livru i ka simplis imaẑinason o speransas sin basi. Ku serteza promesas di Deus na bin kumpri! Pa pudi fia na ki promesas, bu pirsisa di kunsi mas Deus ku fasi ki promesas.

14. Kal ki nomi di Deus, i pabia ku no dibi di usal?

¹⁴ Si bu misti pa algin kunsiu, ke ki bu na fasi? Sera ki bu ka na kontal bu nomi? Sera ki Deus tene nomi? Manga di riliẑions ta fala kuma nomi di Deus i “Deus” o “Siñor,” ma esis i ka nomi pesual.  I titulus, suma “rei” ku “prisidenti.” Biblia ta sina ki Deus tene manga di titulus. “Deus” ku “Siñor” fasi parti delis. Ma, Biblia ta sina tambi kuma, Deus tene un nomi pesual: Jeova. Salmu 83:18 fala: ‘Pa jintis sibi kuma abo son ku tene nomi di Jeova, bu sedu Deus ku ta rena riba di tudu mundu.’ Si bu traduson di Biblia ka tene es nomi, talves bu na misti konsulta Apendisi Nomi di Deus — si usu ku si signifikadu pa sibi pabia di ke. Bardadi i ki, nomi di Deus sitadu kuas 7 mil bias na skrituras oriẑinal. Asin, Jeova misti pa bu kunsi si nomi i pa bu usal. E ku manda i ta usa Biblia pa bu pudi kunsil.

15. Kal ki signifikadu di nomi Jeova?

 ¹⁵ Deus da si kabesa un nomi ku tene signifikadu garandi. Si nomi, Jeova, signifika ki Deus pudi kumpri kualker promesa ki fasi, i kumpri kualker intenson ki tene. * Nomi di Deus i sin igual. I so pa rel. Di manga di maneras, Jeova i sin igual. Kuma ki kila pudi sedu?

16, 17. Ke ki es titulus ta sinanu aserka di Jeova: (a) “Ku ten tudu puder”? (b) “Rei iternu”? (c) “Kriadur”?

¹⁶ No ojaba kuma, Salmu 83:18 fala sin aserka di Jeova: ‘Abo son ku ta rena riba di tudu mundu.’ Apokalipsi 15:3 fala: “O Siñor Deus ku ten tudu puder, kusas ku bu fasi i garandi, i di dimira! O Rei di nasons.” Titulu  “ku ten tudu puder” ta sinanu ki, Jeova i algin mas puderosu ki ten. Si puder ka ten igual; i sta riba di tudu. Na 1 Timótiu 1:17, Jeova comadu tambi di “Rei iternu.” Titulu “Rei iternu” ta lembrantanu ki Jeova i sin igual na utru sintidu. El i uniku ku sempri izisti. Salmu 90:2 fala: “Bu sedu Deus, antis di kumsada te dipus di kabantada [o pa sempri].” Es ideia ta punu fika adimiradu, i ka bardadi?

¹⁷ Jeova tambi i sin igual pabia el son ki Kriadur. Apokalipsi 4:11 fala: “O Siñor no Deus! Bu mersi risibi gloria ku rispitu ku puder, pabia i abo ku kumpu tudu kusa. Konformi bu vontadi e kumpudu, e sta inda te gosi.” Tudu kusa ku bu pudi pensa nel — desdi kriaturas spiritual na seu ku ka ta ojadu, te na strelas ku sta na seu, frutas di arvuris ku pis ku ta nada na osianus ku mar — tudu izisti pabia Jeova i Kriadur!

18. Ke ku manda manga di jintis ta pensa kuma nunka e ka pudi pertusi di Deus, ma ke ki Biblia ta sina?

¹⁸ Lei aserka di kualidadis adimiradu di Jeova ta leba manga di jintis na sinti un bokadu di medu. E tene sintimentu di kuma Deus i garandi dimas pa relis, i nunka e ka na pudi pertusi del o te mesmu e ka tene balur dianti di un Deus puderosu dimas. Ma sera ki es ideia sta sertu? Biblia ta sina utru kusa. I fala di Jeova: “Kontudu i ka sta lunju di kada un di nos.” (Atus 17:27) Te mesmu Biblia nsentivanu: “Bo ciga pertu di Deus; i ta ciga pa bos.” — Tiagu 4:8.

19. (a) Kuma ku bu pudi kumsa pertusi di Deus, i kal ki benefisiu? (b) Kal kualidadis di Deus ku bu mas gosta del?

¹⁹ Kuma ku bu pudi pertusi di Deus? Purmeru, kontinua fasi ke ku bu sta na fasi gosi — aprindi aserka di  Deus. Jesus fala: “Vida ku ka ta kaba i es: Pa tudu jinti kunsiu, abo son, uniku Deus di bardadi, ku Jesus Kristu, kil ku bu manda.” (Jon 17:3) Na bardadi, Biblia ta sina ki aprindi aserka di Jeova ku Jesus ta da “vida ku ka ta kaba”! Suma ki faladuba, “Deus i amor.” (1 Jon 4:8, 16) Jeova tene tambi manga di utrus kualidadis bunitu i ku ta atrai. Pur izemplu, Biblia fala ki Jeova i “Deus ku ta ten miserikordia, ku ta sinti pena, ku ta tarda pa paña raiba, ku ta mostra garandi amor, ku ta sedu bardadi.” (Saida 34:6) El i ‘bon i sta prontu pa purda.’ (Salmu 86:5) Deus i pasenseru. (2 Pedru 3:9) I fiel. (1 Koríntius 1:9) Nkuantu bu na lei Biblia, bu na bin oja kuma ki Jeova mostra ki, i tene es kualidadis ku manga di utrus kualidadis ku ta atrai.

20-22. (a) Sera ki manera ku no ka pudi oja Deus na tujinu pertusi del? Splika. (b) Ke ki sertus jintis ku gosta di bo, pudi falau pa bu fasi, ma ke ki bu dibi di fasi?

²⁰ I bardadi kuma, bu ka pudi oja Deus, pabia el i un Spiritu ku ka ta ojadu. (Jon 1:18; 4:24; 1 Timótiu 1:17) Aprindi aserka del atraves di paẑinas di Biblia, na pui pa Deus torna mas real pa bo. Suma ku salmista fala, bu na pudi kunsi “bondadi” di Jeova. (Salmu 31:19; Romanus 1:20) Mas ku bu na aprindi aserka di Jeova, mas real i na sedu pa bo, i bu na tene mas motivu di amal i pertusi del.

²¹ Bu na bin ntindi ke ku manda Biblia ta sinanu nkara Jeova suma no Pape. (Mateus 6:9) I ka danu so vida, ma i misti tambi pa no vivi di minjor manera suma ku kualker bon pape na mistiba pa si fijus. (Salmu 36:9) Biblia ta sina tambi kuma, pekaduris pudi sedu amigus di Jeova. (Tiagu 2:23) Imaẑina — bu pudi sedu amigu di Kriadur di universu!

 ²² Nkuantu bu na aprindi di Biblia, i pudi ten sertus jintis ku gosta di bo, ki na falau pa bu para es studu. E pudi pensa kuma, bu na bin muda di bu krensas. Ma, ka bu disa ningin tujiu disenvolvi minjor amizadi ku bu pudi tene, ku sedu amizadi ku Deus.

23, 24. (a) Ke ku manda bu dibi di kontinua fasi purguntas aserka di ke ki bu sta na aprindi? (b) Kal ki asuntu di prosimu kapitulu?

²³ Sin duvida, i na ten kusas ku bu ka na ntindi na kumsada. I pirsis umildadi pa pidi ajuda, ma ka bu disisti pabia di vergoña. Jesus fala ki, i bon sedu umildi, suma un mininu. (Mateus 18:2-4) I suma ku no sibi, mininus ta fasi manga di purguntas. Deus misti pa bu oja respostas. Biblia ngaba sertus jintis ku teneba vontadi di aprindi aserka di Deus. E ta jubi Skrituras ku kuidadu pa tene serteza di kuma, ke ki e sta na aprindi i bardadi. — Lei Atus 17:11.

²⁴ Minjor manera di aprindi aserka di Jeova i pa studa Biblia. I diferenti di kualker utru livru. Di kal manera? Prosimu kapitulu na bin fala des asuntu.