1, 2. Ov, mulong wak chiwapidila kwipul yipul chisu ni chisu?

OV, WASHINSHIKINAP kal mutapu ukatau an kwipul yipul? An avud akat kusambish kamu kwipul chisu chisambishinau kulond. Akukutal, nich kuzazimun mes, ni kukwipul yom mud: Ov, mulong wak diur dikwet ulombu wa mem ma kanyik? Atutumb ayisala nich ik? Nany wayifundisha atujil kuwang? Ukutwish kwikasikesh kwakul, pakwez chidingap chiswapela bwat. Chakul chey chiwamp chikutwish kand kulangwish chipul chikwau: Ov, mulong wak?

² Kadiap kwau ching kusu an akata kwipul yipul. Chituyila mu kupam, tukat kudandamen kwipul. Mwamu tukata kusal mulong wa kuman njil mutuyila, kwijik ubaj utuswiridina kwiyep, ap mulong wa kusot kusu kwijik. Pakwez chimeken anch antu avud alikining kwipul, nakash kamu piur pa yipul ya usey ujim. Kupwa, awiy akat kulik kukimbijol yakul.

3. Ov, mulong wak antu avud alikining kukimbijol yakul ku yipul ya usey nakash?

³ Tongin bil pa chipul chidia pa chibur cha buku winou, yipul yipwilau mu mazu ma kusambish nich, ap yidia kwinsambishil kwa shapitre winou.  Yidi yipul yimwing ya usey ujim yiukutwisha kwipul. Ap mwamu, antu avud alikin kal kukimbijol yakul ku yipul yiney. Ov, mulong wak? Ov, Bibil ukwet yakul? Antu amwing atongining anch yakul yikasikening nakash kuyitesh. Akwau akamining anch kwipul yipul kukutwish kuyovish usany. Ni akwau niyawiy alondining anch yipul yiney yiyitadil antakel a marelijon ni alej. Ov, chidi mutapu ik ku mutambu wey?

4, 5. Yipul ik yimwing ya usey nakash tukutwisha kwipul mu mwom, ni mulong wak tufanyidina kukimb yakul?

⁴ Chakin anch usangaredin kutan yakul ku yipul ya usey nakash ya mwom. Yisu yimwing ukat kwiyipul pakad kwidjidjek anch: ‘Ov, risu rutong ra mwom? Ov, mwom usudiedil kusu pinap? Nzamb ufaniken nich ik?’ Chidi cha manangu kwipul yipul mud yiney, ni chidi cha usey nakash anch kangal walik kukimbijol djat ni piukeza kutan yakul ya kashinsh. Mulej wijikena nakash Yesu Kristu walonda anch: “Itany, akez kaninkishany; surubany, ukutanany; kokalany, akunanzurilany kwen.”—Mateu 7:7.

⁵ Anch ‘wasurab’ yakul ku yipul ya usey nakash, ukez kuman anch kukimbijol kukwet chakin kamu difut. (Jinswir 2:1-5) Yikalap nchik yikutwishau antu akwau kukulej, yakul yidiaku, ni ukutwish kuyitan—mu Bibil. Yakul yikasikenap nakash kutesh. Cha ukwash, yiletining ruchingej ni musangar. Ni yikutwish kukukwash kwikal nich mwom usangareshina kudiosh kamu katat. Cha kusambish, tushinshikina bil chipul chimwing chikata kuyinenganesh antu avud.

6. Ov, mulong wak antu avud atongining anch Nzamb kakatap kuyibangin antu mar pimakata kuyishiken?

⁶ Antu avud atongining anch chakul ku chipul chinech chidi anch inge. Akat kutong anch: ‘Ang Nzamb ukat kubangin, ov, mangand melangap kwikal ndond yishalijadina nakash?’ Pitutadina oku ni oku tumen mangand mizwila too nich njit, rukis, ni mar. Ni pitudia muntu ni muntu ipend,  tukat kuyel, kuman mar, tukat kufish akatish netu. Chawiy, antu avud akat kulond anch, ‘Ang Nzamb ukat kutubangaku ni kubangin milong yetu, ov, kelangap kukangesh yom yiney chakwel anch kangal yashiken?’

7. (a) Ov, alej a marelijon ayishikijin nchik antu avud ku kutong anch Nzamb kakwetap riy? (b) Ov, chom ik chakin kamu chifundishinay Bibil piur pa yoziu yikutwisha kutushiken?

⁷ Chipandikena kand kuyip, yisu yimwing alej a marelijon akat kuyishikij antu ku kutong anch Nzamb kakwetap riy. Mutapu ik? Anch kwashiken yinship ya mar, awiy alondining anch ridi rusot ra Nzamb. Chakin kamu, alej inay akat kumufish nich Nzamb mulong wa yom yiyimp yikata kushiken. Ov, wawiy uyakin piur pa Nzamb? Ov, chom ik chakin kamu chifundishinay Bibil? Jakobu 1:13 wakwil anch: “Muntu anch amwoz, kangal wakalond anch angozil kudi Nzamb; mulong Nzamb kakwozanangip nich kuyip, ni mwinend kakumwozangip muntu.” Chawiy Nzamb kadiap musul wa uyimp umena mu mangand. (Job 34:10-12) Pakwez, Nzamb ulikidil kwend yom yiyimp yisadika. Pakwez kuding kushalijan kujim pakach pa kulikidil chom chisadika ni kuchisal.

8, 9. (a) Chilikej ik ukutwisha kulet chimekeshina kushalijan kudia pakach pa kulikidil kwa uyimp ni kwikal musul wa uyimp? (b) Mulong wak chidiap chitentamina kumununganijan Nzamb mulong wa kulikidil kwend antu alondul njil yiyimp?

⁸ Chilikej, tongin bil tatuku umwing mwin manangu ni rukat ukweta mwanend ikundj wapamina kal pakwez uchishicha ku chikumbu cha anvajend. Anch mwan wikal ntombwij ni wakwat mupak wa kudiokal ku chikumbu, tatukwend kakumukangeshap bwat. Mwan ulondwil njil yiyimp ya mwom ni kuwil mu mar. Ov, tatukwend ndiy musul wa yikokujol ya mwan? Bwat. (Luka 15:11-13) Chawiy chimwing, Nzamb kakatap kuyilikish antu pakatau kutond kulondul njil yiyimp, pakwez kadiap musul wa yikokujol yikata kubudikinaku. Chakin kamu, chikwikal chakad kutentam kumufish nich Nzamb mulong wa mar mawonsu makata kuyishiken antu.

⁹ Nzamb ukwet mayingishin mawamp payilikidinay antu  alondul njil yiyimp. Chidiay Sakatang wetu mwin manangu ni mwin dikand, kaswiridinap kuturumburil mayingishin mend. Pakwez, Nzamb wasala mwamu ku rukat rend. Ukez kwilej yivud piur pa mayingishin minam mu Shapitre wa 11. Pakwez ijik anch Nzamb kadiap musul wa mar miturishina nich. Ndiy utwinkishin ruchingej rimwing kusu ra kumapwish!—Isay 33:2.

10. Ov, mulong wak tukutwisha kuchingej anch Nzamb ukez kudiosh yibudikin yawonsu ya uyimp?

¹⁰ Chikwau kand, Nzamb udi utumbila. (Isay 6:3) Chirumburikin anch ndiy udi wishitwila ni wakad kwijond. Mwi ndiy mwikil karusis ka kuyip. Chawiy lel tukutwish kamu kumuchingejin. Tukutwishap kwikal ni ruchingej mud riner mudiau antu, akata kwijond mu yisu yimwing. Ikalap nchik muntu upandakena mu win-kashinsh ukweta ulabu chisu ni chisu kakwetingap dikand dia kudiosh uyimp usadilau antu. Pakwez Nzamb udi mwin dikand diawonsu. Ndiy ukutwish ni ukez kudiosh yibudikin yawonsu ya uyimp wasalau kal antu. Pakezay Nzamb kusal, ukez kusal mwamu mulong wa kupwish uyimp chikupu!—Kuseng 37:9-11.

11. (a) Mutapu ik wovilingay Nzamb piur pa kuburen kutentam? (b) Mutapu ik wovilingay Nzamb piur pa mar umena?

¹¹ Mu chisu chawiy chimwing, mutapu ik wovilingay Nzamb piur pa yom yisadikina mu mangand ni mu mwom wey? Cha kusambish, Bibil ufundishin anch Nzamb “ukatil kutentam.” (Kuseng 37:28) Chawiy ukat kubangin nakash piur pa yom yitentamina ni yakad kutentam. Ukisining milad yawonsu ya kuburen kutentam. Bibil ulondil anch Nzamb “wova ushon mu muchim wend” chisu chavulijana kuyip pa mangand mu chirung cha pakur. (Disambishil 6:5, 6) Nzamb kakarumukap bwat. (Malakiy 3:6) Ukisin kamu kuman mar madia pa mangand mawonsu. Nzamb ukisin kuyiman antu akat kuman mar. Bibil ulondil anch “Ndiy ukat kukulamany en.”—1 Pita 5:7.

12, 13. (a) Ov, mulong wak tukweta ngikadil yiwamp mud rukat, ni rikwet usu ik pa mutapu wetu wa kuman mangand? (b) Ov, mulong wak ukutwisha kwikal nich kashinsh anch Nzamb ukez kusal chakin kamu chom kanang piur pa yikokujol ya mangand?

 ¹² Ov, mutapu ik tukutwisha kwikal nich kashinsh anch Nzamb ukisin kuman mar? Tukwet uman umwing pinap. Bibil ufundishin anch muntu amutanga mu chifu cha Nzamb. (Disambishil 1:26) Chawiy niyetu tukwet ngikadil yiwamp mulong Nzamb niyend uyikwet. Chilikej, ov, chikatap kukovish ku muchim kuyip anch wayiman antu akad mulong akat kuman mar? Anch ukat kwiyakamish piur pa kuburen kutentam kwinoku, ijik anch Nzamb wovil yovil yikash pa mulong winou.

¹³ Chom chimwing chipandakena kuwap piur pa antu udi ukaliweny wetu wa kukat. Ukaliweny winou niwawiy umumekeshin Nzamb. Bibil utufundishin anch “Nzamb udi rukat.” (1 Yohan 4:8) Tukatining mulong Nzamb niyend ukatining. Ov, rukat rikutwish kukubachik kupwish mar ni kuburen kutentam umena mu mangand? Anch wading nich dikand dia kudiosh mar ni kuburen kutentam, ov, welang kuchisal? Chakin kamu anch ukuchisal! Ukutwish kwey kwikal nich kashinsh anch Nzamb ukez kupwish mar ni kuburen kutentam. Kushilamu kwisambinangau mu mazu ma kusambish ma buku winou kudiap mud yilat ap ruchingej ra chamwamu. Chakin kamu kushilamu kwa Nzamb kukuwanyin! Pakwel anch uteka ritiy mu kushilamu kwinoku, uswiridin kwijik yom yivud piur pa Nzamb washilamu.

14. Dijin dia Nzamb nany, ni mulong wak tufanyidin kudisadin?

¹⁴ Anch usotil muntu kanang akwijik, chom ik uwapidila kusal? Ov, ukumulejap dijin diey? Ov, Nzamb ukwet dijin? Marelijon mavud makat kwakul anch dijin diend “Nzamb” ap anch “Nsalejam,” pakwez minam kimadiap majin mend ma pakampwil. Yidi kwau yijiken, mud “mwant” ni “ntakel”. Bibil ufundishin anch Nzamb ukwet yijiken yivud. Mukach mway mudi “Nzamb” ni “Nsalejam.” Pakwez, Bibil ufundishin kand anch Nzamb ukwet dijin diend dia pakampwil: Yehova. Kuseng 83:18, NW ulondil anch: “Yey kusu, ukweta dijin dia Yehova, yey umwing kusu Udia Piur pa divu  diawonsu.” Anch dikarumun dia Bibil dikwetap dijin dined, ukutwish kushinshikin Wenjil pa mapaj 195-197 mu buku winou chakwel kwijik mulong wak chidia mwamu. Uyakin udi anch dijin dia Nzamb dimeken tunan ni tunan mu mamaniskri makur ma Bibil. Chawiy lel, Yehova usotil anch wijika dijin diend ni kudisadin. Tukutwish kulond anch, ndiy ukat kusadil Bibil mulong wa kwiyijikish amwinend kud ey.

15. Dijin dia Yehova dirumburikin ik?

¹⁵ Nzamb wipila amwinend dijin dikweta kurumburik. Dijin diend, Yehova, dirumburikin anch Nzamb ukutwish kuwanyish kushilamu kwin kwawonsu kusadinay ni ukutwish kuwanyish rutong rin rawonsu rikwetay mu manangu. * Dijin dia Nzamb didi dia pakampwil, kwikil difanakena nich. Didi  ching kusu diendendiy. Yehova udi wa pakampwil, mu mitapu kushalijan. Ov, mutapu ik chidia mwamu?

16, 17. Yom ik tukutwisha kwilejin piur pa Yehova ku yijiken yiney: (a) “Mwin Dikand Diawonsu”? (b) “Mwant wa chikupu”? (c) “Sakatang”?

¹⁶ Twamanang anch Kuseng 83:18 ulondil piur pa Yehova anch: “Yey kusu Udia Piur.” Chawiy chimwing kand, ching Yehova kusu ndiy wisambidinau anch udia “Mwin Dikand Diawonsu.” Kujingunik 15:3 ulondil anch: ‘Midimu yey yipandiken ni ya kushimokish, Yehova Nzamb Mwin Dikand Diawonsu. Jinjil jey jitentamin ni ja kashinsh, Mwant wa chikupu.’ Chijiken “Mwin Dikand Diawonsu” chitufundishin anch Yehova udi muntu umwing ukweta usu upandakena. Ukutwishap kwisikej usu wend; udi wa piur nakash. Ni chijiken “Mwant wa chikupu” chituvurishin anch Yehova udi wa pakampwil mwi njil yikwau kand. Ndiy umwing kusu udingaku chikupu. Kuseng 90:2 ulondil anch: “Kudiok chikupu ni chikupu, Ey uding kwey Nzamb.” Chitongijok chinech chikwatishen wom, ov, kimwawiyap?

¹⁷ Yehova udi kand wa pakampwil mulong ndiy umwing kusu udia Sakatang. Tutangin mu Kujingunik 4:11, Manswik Masu anch: “Ey yey uwanyidina kutambul uyaj, ni katumb, ni ukash. Mulong yey watanga yom yawonsu, ni yom yawonsu yidiaku yishich mulong wa rusot rey.” Chom chin chawonsu chiukutwisha kutongijokin—kusambishin ku yitang yakad kumekan yidia mwiur djat ku atutumbu izwila uchuku mwiur, mabuj makata kusong ku mitond djat ku ansh akata kwisay mu turung twa mem ni tuwit—yawonsu yidiaku mulong Yehova udi Sakatang!

18. Ov, mulong wak antu amwing akat kwiyov anch kakutwishap kumushejin Nzamb, pakwez yom ik yifundishinay Bibil?

¹⁸ Kwijik ngikadil yikwatishena wom ya Yehova kukat kuyikwatish antu amwing wom nakash. Ovil wom anch Nzamb udi piur nakash kudiau awiy, anch kakutwishap ap pakemp kumushejin piswimp ap kurumburik chom kanang kud Nzamb  winou wa piur nakash. Ov, chitongijok chinech chidi chakin? Bibil ufundish kamu yom yindjing. Ulondil piur pa Yehova anch: “Ndiy kadip kulemp ni umwing wetwetu.” (Midimu 17:27) Bibil utukasikeshin kand anch: ‘Shejany piswimp kud Nzamb, niyend ukushej piswimp ni yenen.’—Jakobu 4:8.

19. (a) Mutapu ik tukutwisha kusambish kumushejin Nzamb, ni yom ik tukutaninamu? (b) Ngikadil ik ya Nzamb yikusangareshina nakash?

¹⁹ Mutapu ik ukutwisha kumushejin Nzamb? Cha kusambish, ufanyidin kudandamen kusal yiusadina katat—kwilej piur pa Nzamb. Yesu walonda anch: “Kupand kwin kwa chikupu kwawiy oku, chakwel akwijika ey Nzamb wakin, ni watuma ey, ndiy kamu Yesu Kristu.” (Yohan 17:3) Mwawiy, Bibil ufundishin anch kwilej piur pa Yehova ni Yesu kutwadil ku ‘mwom wa chikupu’! Mud mutapu twamanang, “Nzamb udi rukat.” (1 Yohan 4:16) Yehova ukwet kand ngikadil yikwau yiwamp ni yisangareshina. Chilikej, Bibil ulondil anch Yehova udi “Nzamb wa ranaken ni mwin riy, wakad kwovang ujim swa, wizwila sens nich rukat ni uyakin.” (Kubudik 34:6) Udi “muwamp, witenchikin mu kulikishilan.” (Kuseng 86:5) Nzamb udi mwin kushimpish. (2 Pita 3:9) Ushinshamen. (Kujingunik 15:4, Les Saintes Écritures — Traduction du monde nouveau) Chiwilejina yom yivud mu Bibil, ukez kujingunin mutapu wamekeshay Yehova anch ukwet ngikadil yiney ni yikwau yivud yisangareshina.

20-22. (a) Ov, kukangany kwetu kumuman Nzamb kutukangeshin kumushejin piswimp? Rumburil. (b) Yom ik yikutwishau kukusadish antu amwing akweta yitongijok yiwamp, pakwez chom ik ufanyidina kusal?

²⁰ Chidi chakin anch, ukutwishap kumuman Nzamb mulong ndiy udi spiritu wakad kumekanang. (Yohan 1:18; 4:24; 1 Timote 1:17) Pakwez, kusutil ku kwilej piur pend ku yom yidia mu Bibil, ukutwish kumwijik mud muntu. Mud mwalonday nfund-a-kuseng, ukutwish ‘kubandjil ufun wa Yehova.’ (Kuseng 27:4; Rom 1:20) Anch wilej yivud piur pa Yehova, ndiy ukwijikan nakash kud ey ni ukez kwikal nich mayingishin mavud ma kumukat ni kwiyov piswimp nend.

²¹ Ukez kushiken ku kutesh mulong wak Bibil utufundishin kumutongin Yehova mud Tatukwetu. (Mateu 6:9) Chidiap kwau kusu anch mwom wetu udiokil kud ndiy pakwez utusotidil  mwom upandakena kuwap—mud kamu mukatay tatuku mwin rukat kuyisotil anend. (Kuseng 36:9) Bibil ufundishin kand anch antu akutwish kwikal arund a Yehova. (Jakobu 2:23) Tongap bil—ukutwish kwikal murund wa Sakatang wa mangand mawonsu!

²² Chiwilejina yom yivud mu Bibil, ukutwish kuman anch antu amwing akweta yitongijok yiwamp akez kukubachik anch ulika malejan minam. Akutwish kwiyakamish anch ey ukez kuswimp yitiyij yey. Pakwez kangal wamulik muntu ap umwing akukangesha kutenchik urund upandakena kuwap ukutwisha kwikal nich.

23, 24. (a) Ov, mulong wak ufanyidina kudandamen kwipul yipul piur pa yom yiwilejina? (b) Shapitre ulondwila ou ukwisambin ik?

²³ Chakin kamu, kukutwish kwikal yom yimwing ukutwishap kuyitesh kwinsambishil. Chitin kwikepish mulong wa kwit ukwash, pakwez kangal wachirik kwinyim mulong wa usany. Yesu walonda anch chiwapidil kwikal wikepishina, mud mwanikanch. (Mateu 18:2-4) An, mud mutwija, akat kwipulang yipul yivud. Nzamb usotil anch ey utana yakul. Bibil ukat kuyishiman antu amwing ading ni kusot nakash kwilej piur pa Nzamb. Asadila Mifund mulong wa kushinshikin chakwel kuman anch yom yadingau ni kwilej yadinga yakin.—Midimu 17:11.

²⁴ Njil yipandakenamu kuwap ya kwilej piur pa Yehova yidi kushinshikin Bibil. Ushalijadin kulemp ni buku mwin mwawonsu. Mwi njil ik? Shapitre wambakedinap ou ukwisambin rusangu riner.