1, 2. Kungani kukuhle kubuta imibuto?

UKE wayinaka yini indlela bantfwana lababuta ngayo imibuto? Labanyenti bacala kubuta ngalesikhatsi nje bafundza kukhuluma. Bavula emehlo, futsi ngemndlandla bayakubuka bese bacala kubuta imibuto lefanana nalena: Kungani sibhakabhaka siluhlata? Tentiwe ngani tinkhanyeti? Ngubani lowafundzisa tinyoni kucula? Ungetama kamatima kuphendvula, kodvwa akusimelula ngaso sonkhe sikhatsi. Ngobe nemphendvulo yakho lenhle itawuholela kulomunye umbuto: Kungani?

² Akusibo bantfwana kuphela lababuta imibuto. Njengobe natsi sikhula, siyabuta. Siyabuta kuze silayelwe indlela, kuze sati ngetingoti lokufanele sitigweme, nobe sanelise sifiso setfu sekwati. Kodvwa kubonakala shengatsi linyenti lebantfu liyayekela kubuta imibuto, ikakhulukati leyo lebaluleke kakhulu. Lokungenani bantfu bayayekela kutfola timphendvulo.

3. Kungani bantfu labanyenti baye bayekela kufuna timphendvulo temibuto lebaluleke kakhulu?

³ Ase ucabange ngalemibuto lesesetfulweni salencwadzi,  naleyo  lesekucaleni kwalesehluko. Lena nguleminye yemibuto lebalulekile longayibuta. Nobe kunjalo, bantfu labanyenti baye bayekela kufuna timphendvulo talemibuto. Kungani? LiBhayibheli linato yini timphendvulo? Labanye bacabanga kutsi timphendvulo talo tilukhuni kakhulu kutsi bangaticondza. Labanye bakhatsateka ngekutsi kubuta imibuto kutawubehlisa sitfunti nobe kubaphoce. Kantsi labanye bancuma kutsi imibuto lenjalo kuncono bayishile kubafundisi. Kutsiwani ngawe?

4, 5. Nguyiphi leminye yemibuto lebaluleke kakhulu lesingatibuta yona, futsi kungani kufanele sifune timphendvulo tayo?

⁴ Kungenteka kutsi nawe uyafuna kutfola timphendvula temibuto lebalulekile ekuphileni. Akumangalisi kutsi uke utibute: ‘Iyini injongo yekuphila? Lokuphila lesikuphilako nyalo, kukuphela kwako yini? Unjani Nkulunkulu?’ Kuhle kutibuta imibuto lenjena, futsi kubalulekile kutsi ungayekeli kubuta kuze kube ngulapho utfola timphendvulo letenetisako nalongatetsemba. Umfundzisi lodvumile Jesu Khristu watsi: “Celani, nitawuphiwa; funani, nitawutfola; nconcotsani, nitakuvulelwa.”—Matewu 7:7.

⁵ Nangabe uchubeka “ufuna” timphendvulo temibuto lebalulekile utawutfola kutsi kufuna kwakho kuba nemvuzo lomkhulu. (Taga 2:1-5) Nobe ngabe bantfu bakutjelani, tikhona timphendvulo futsi ungatitfola eBhayibhelini. Letimphendvulo atisilukhuni kutsi utivisise. Kodvwa tiletsa litsemba nenjabulo. Tingakusita kutsi nyalo uphile kuphila lokwenetisako. Kwekucala, asesicabangele umbuto loye wahlupha bantfu labanyenti.

6. Kungani bantfu labanyenti bacabanga kutsi Nkulunkulu akanendzaba nekuhlupheka kwebantfu?

⁶ Bantfu labanyenti bacabanga kutsi imphendvulo yalombuto nguyebo. Batsi, ‘Kube Nkulunkulu abesikhatsalela, umhlaba bewungeke yini ube yindzawo leyehlukile kulena  lesiphila kuyo?’ Nasibuka yonkhe indzawo, umhlaba ugcwele timphi, kutondzana nelusizi. Sonkhe siyagula, siyahlupheka futsi sifelwa tihlobo tetfu. Ngenca yaloko bantfu batsi, ‘Kube Nkulunkulu abesikhatsalela abengeke yini ativimbe tonkhe letintfo leti kutsi tingenteki?’

7. (a) Bafundisi babente njani bantfu bacabanga kutsi Nkulunkulu unelunya? (b) Lifundzisani mbambambamba liBhayibheli ngetilingo lesingahle sibhekane nato?

⁷ Lokubi nakakhulu kutsi, bafundisi benta bantfu bacabange kutsi Nkulunkulu unelunya. Njani? Nakuvela inhlekelele batsi bekuyintsandvo yaNkulunkulu. Ngekusho kanjalo, bafundisi basola Nkulunkulu ngetintfo letimbi letentekako. Kuliciniso yini loko ngaNkulunkulu? Lifundzisani mbambambamba liBhayibheli? Jakobe 1:13 utsi: “Umuntfu lolingwako angabosho kutsi: ‘Ngilingwa nguNkulunkulu;’ ngobe Nkulunkulu angeke alingwe ngalokubi, futsi akalingi muntfu.” Nkulunkulu akasuye nanini lobangela lobubi lobubona emhlabeni wonkhe. (Jobe 34:10-12) Kuyavunywa, yena uyakuvumela lokubi kutsi kwenteke. Kodvwa kunemehluko lomkhulu emkhatsini wekuvumela intfo kutsi yenteke nekuyibangela.

8, 9. (a) Ungawufanekisa kanjani umehluko emkhatsini wekuvumela bubi kutsi bube khona nekububangela? (b) Kungani kungaba ngulokungakalungi ngatsi kusola sincumo saNkulunkulu sekuvumela bantfu kutsi baphile imphilo lembi?

⁸ Nasi sibonelo: Cabanga ngababe lohlakaniphile futsi lonelutsandvo, lonendvodzana leseyikhulile lesahlala ekhaya nebatali bayo. Lapho lendvodzana seyicala kuba lihlongandlebe futsi seyikhetsa kuhamba ekhaya, babe wayo uyayikhulula. Lendvodzana iyahamba bese icala kuphila imphilo lembi, ekugcineni ingene etinkingeni. Tinkinga lesuke ihlangabetane nato tibangelwe ngubabe wayo yini? Cha. (Lukha 15:11-13) Ngalokufananako-ke, Nkulunkulu akabavimbanga bantfu nabakhetsa kuphila imphilo lembi, kepha akusuye lobangela tinkinga letivelako. Ngako-ke, akukuhle ngatsi kutsi sisole Nkulunkulu ngato tonkhe tinkinga letivelela bantfu.

 ⁹ Nkulunkulu unetizatfu letinhle tekuvumela bantfu kutsi baphile imphilo lembi. NjengeMdali lohlakaniphile nalonemandla, akudzingeki kutsi asichazele tizatfu takhe. Kodvwa ngenca yelutsandvo lanalo, uyasichazela. Utawufundza ngaletinyenti taletizatfu eSehlukweni 11. Kodvwa ciniseka kutsi akusuye Nkulunkulu lobangela tinkinga lesibhekana nato. Ngale kwaloko, usiniketa litsemba lesisombululo saletinkinga.—Isaya 33:2.

10. Kungani singetsemba kutsi Nkulunkulu utabucedza bonkhe bubi lobukhona?

¹⁰ Ngetulu kwaloko Nkulunkulu ungcwele. (Isaya 6:3) Loku kusho kutsi umsulwa futsi uhlantekile. Kute ngisho nalobuncane bubi kuye. Ngako-ke, singametsemba ngalokuphelele. Kumetsemba kwetfu kungetulu kwelitsemba lesingaba nalo ngebantfu labonakele. Ngisho nemuntfu lowetsembekile loneligunya, ute emandla ekucedza wonkhe umonakalo lowentiwa bantfu lababi. Kodvwa Nkulunkulu unawo onkhe emandla. Unemandla ekucedza bubi, futsi utabucedza bonkhe bubi lobusemhlabeni. Utabucedza bungaphindze bube khona!—Tihlabelelo 37:9-11.

11. (a) Nkulunkulu utiva njani ngekungalungi? (b) Nkulunkulu utiva njani lapho wena uhlupheka?

¹¹ Nkulunkulu utiva njani ngaloko lokwenteka emhlabeni, nasekuphileni kwakho? LiBhayibheli lifundzisa kutsi Nkulunkulu “uyakutsandza kwenta tintfo ngendlela lefanele.” (Tihlabelelo 37:28) Ngako unendzaba nekutsi yini lelungile nalengakalungi. Uyatitondza tonkhe tinhlobo tekungalungi. LiBhayibheli litsi Nkulunkulu “wadzabuka enhlitiyweni yakhe” ngalesikhatsi bubi bugcwala emhlabeni esikhatsini lesindlulile. (Genesisi 6:5, 6) Nkulunkulu akakashintji. (Malakhi 3:6) Usakutondza kuhlupheka lokusemhlabeni wonkhe. Nkulunkulu uyakutondza kubona bantfu bahlupheka. LiBhayibheli litsi ‘uyakukhatsalela.’—1 Phetro 5:7.

12, 13. (a) Kungani sinetimfanelo tebuntfu letinhle letinjengelutsandvo, futsi lutsandvo lungawutsintsa njani umbono wetfu ngemhlaba? (b) Kungani ungaciniseka kutsi Nkulunkulu utawenta lokutsite ngetinkinga letigcwele emhlabeni?

 ¹² Yini lengasicinisekisa kutsi Nkulunkulu akatsandzi kubona bantfu bahlupheka? Nabu lobunye bufakazi lobengetiwe. LiBhayibheli lifundzisa kutsi bantfu badalwe ngemfanekiso waNkulunkulu. (Genesisi 1:26) Ngako natsi sinetimfanelo tebuntfu letinhle ngobe naNkulunkulu naye unetimfanelo tebuntfu letinhle. Nasi sibonelo: Kuyakukhatsata yini wena kubona bantfu labangenacala bahlupheka? Nangabe kukukhatsata, ciniseka kutsi naNkulunkulu kumkhatsata ngisho nakakhulu.

¹³ Lenye intfo lenhle kakhulu ngebantfu kutsi bayakwati kubonisa lutsandvo. NaNkulunkulu naye unjalo. LiBhayibheli lifundzisa kutsi “Nkulunkulu ulutsandvo.” (1 Johane 4:8) Sibonisa lutsandvo ngobe naNkulunkulu uyasitsandza. Lutsandvo lungakwenta yini kutsi ucedze kuhlupheka nekungalungi lokubonako emhlabeni? Nangabe bewunemandla ekukwenta loko, bewutakwenta yini? Yebo, bewungakwenta! Ungaciniseka kutsi naNkulunkulu utakucedza konkhe kuhlupheka nekungalungi. Letetsembiso lokukhulunywe ngato ekucaleni kwalencwadzi atisiwo nje emaphupho nobe ematsemba langeke agcwaliseke. Tetsembiso taNkulunkulu titawugcwaliseka nakanjani! Kute utikholwe letetsembiso, kudzingeka wati lokwengetiwe ngaNkulunkulu lotetsembisako.

14. Ngubani libito laNkulunkulu, futsi kungani kufanele silisebentise?

¹⁴ Yini longayenta nawufuna kutsi umuntfu lotsite akwati? Bewungeke yini umtjele libito lakho? Nkulunkulu unalo yini libito? Tinkholo letinyenti titsi libito lakhe “NguNkulunkulu” nobe “Nkhosi,” kodvwa lawo akusiwo emabito akhe. Amane nje aticu takhe njengobe lelitsi “nkhosi” nalelitsi “mengameli” aticu. LiBhayibheli lifundzisa kutsi Nkulunkulu uneticu letinyenti. Letinye tato titsi “Nkulunkulu” nobe “Nkhosi.” Nobe kunjalo, liBhayibheli lifundzisa kutsi Nkulunkulu unalo libito lakhe lelitsi Jehova. Tihlabelelo 83:18 titsi:  “Nguwe wedvwa lolibito lakhe [“linguJehova,” NW], nguwe Losetikwako Konkhe, lophakeme abuse umhlaba wonkhe.” Nangabe liBhayibheli lakho lite lelibito, ungafundza Sandzisanchazo emakhasini 195-7 alencwadzi kute utfole kutsi kungani lite. Liciniso likutsi libito laNkulunkulu livela tikhatsi letitinkhulungwane eBhayibhelini lakudzala. Ngako-ke, Jehova ufuna kutsi ulati futsi ulisebentise libito lakhe. Usebentisa liBhayibheli kute atatise kitsi.

15. Lisho kutsini libito lelitsi Jehova?

¹⁵ Nkulunkulu watiniketa libito lelinenchazelo. Libito lakhe lelitsi Jehova lisho kutsi Nkulunkulu ubangela tonkhe tintfo kutsi tibe khona, futsi ugcwalisa nobe ngabe nguyiphi injongo lanayo. * Libito laNkulunkulu lehlukile, alifanani nalamanye  futsi lakhe yedvwa. Jehova wehluke nangaletinye tindlela letinyenti. Njani?

16, 17. Yini lesingayifundza ngaJehova kuleticu letilandzelako: (a) “Somandla”? (b) “Nkhosi yetive tonkhe”? (c) “Mdali”?

¹⁶ Sifundzile kutsi Tihlabelelo 83:18 titsi ngaJehova: ‘Nguwe wedvwa . . . Losetikwako Konkhe.’ Ngako-ke, nguJehova yedvwa lobitwa ngekutsi “nguSomandla.” Sembulo 15:3 sitsi: “Tinkhulu tiyamangalisa tento takho, [“Jehova,” NW], Nkulunkulu, Somandla! Tilungile tiliciniso tindlela takho, Nkhosi yetive tonkhe.” Sicu letsi “Somandla” sisifundzisa kutsi Jehova nguye lonemandla lamakhulu kwendlula nobe ngabe yini lekhona. Emandla akhe angeke sewuwalinganise, ngobe uphakeme. Sicu lesitsi “Nkhosi yetive tonkhe” sisikhumbuta kutsi Jehova wehlukile nangalomunye umcondvo. Nguye yedvwa labekhona futsi loyawubakhona kuze kube phakadze. Tihlabelelo 90:2 titsi: “Kusukela phakadze kuze kube phakadze, wena Nkulunkulu ukhona.” Akumangalisi yini loko?

¹⁷ Jehova wehluke nangekutsi nguye yedvwa uMdali. UmBhalo weSembulo 4:11 utsi: “Ufanele wena, Nkulunkulu, [Jehova, NW] loyiNkhosi yetfu, kutsi wemukele bukhosi, neludvumo, nemandla, ngobe konkhe kwadalwa nguwe. Konkhe kwenteka ngentsandvo yakho, kwadalwa ngayo.” Konkhe longase ukucabange—kusukela etidalweni temoya letisezulwini kuye etinkhanyetini letigcwele sibhakabhaka, titselo letitsela etihlahleni netinhlanti letiselwandle nasemifuleni—konkhe kukhona ngenca yekutsi Jehova unguMdali!

18. Kungani labanye bantfu bacabanga kutsi angeke bakhone kusondzela kuNkulunkulu, kodvwa liBhayibheli lifundzisani?

¹⁸ Kufundza ngetimfanelo letimangalisako taJehova, kwenta labanye bative bangakhululeki. Besaba kutsi Nkulunkulu uphakeme kakhulu kunabo, futsi angeke bakhone kusondzela kuye. Bacabanga nekutsi akanendzaba nabo. Lombono uliciniso yini? LiBhayibheli lifundzisa lokwehlukile. Litsi ngaJehova: “Akekho khashane ngisho nakumunye wetfu.”  (Imisebenti 17:27) Liphindze lisincuse litsi: “Sondzelani kuNkulunkulu, naye utawusondzela kini.”—Jakobe 4:8.

19. (a) Singacala njani kusondzela kuNkulunkulu, futsi siyotfolani ngekwenta kanjalo? (b) Ngutiphi timfanelo taNkulunkulu lotitsandzako?

¹⁹ Wena ungasondzela njani kuNkulunkulu? Kwekucala, kufanele uchubeke wenta loku lokwentako nyalo—ufundze ngaNkulunkulu. Jesu watsi: “Kuphila lokuphakadze nguloku: kutsi bakwati wena, Nkulunkulu longuye yedvwa weliciniso, bamati naJesu Khristu lomtfumile.” (Johane 17:3) LiBhayibheli lifundzisa kutsi kufundza ngaJehova nangaJesu kuholela ‘ekuphileni lokuphakadze’! Njengobe sekuchaziwe, “Nkulunkulu ulutsandvo.” (1 Johane 4:16) Jehova unaletinye timfanelo letinhle kakhulu. Nasi sibonelo: LiBhayibheli litsi Jehova ‘nguNkulunkulu lonesihawu nemusa; uyephuta kutfukutsela andze ngemusa nangekwetsembeka.’ (Eksodusi 34:6) “Ulungile futsi ulungele kutsetselela.” (Tihlabelelo 86:5) Nkulunkulu uyabeketela. (2 Phetro 3:9) Wetsembekile. (Sembulo 15:4) Njengobe ufundza lokunyenti eBhayibhelini, utawubona kutsi Jehova ukhombisile kutsi unaletimfanelo kanye naletinye letinhle.

20-22. (a) Kungamboni ngemehlo enyama Nkulunkulu kungasivimbela yini kutsi sisondzele kuye? Chaza. (b) Bantfu labangakahlosi lokubi, bangakuncenga kutsi wenteni, kodvwa yini lokufanele uyente?

²⁰ Kuliciniso, angeke umbone Nkulunkulu ngobe ungumoya. (Johane 1:18; 4:24; 1 Thimothi 1:17) Ngekufundza ngaye eBhayibhelini, ungamati kahle njengemuntfu. Njengobe umhlabeleli asho, ‘ungabubukisisa buhle baSimakadze.’ (Tihlabelelo 27:4; Roma 1:20) Njengobe uchubeka ufundza ngaJehova, utawumati kancono futsi utawuba netizatfu letinyenti tekumtsandza futsi utive usondzelene naye.

²¹ Kancane kancane utawucondza kutsi kungani liBhayibheli lisifundzisa kutsi sicabange ngaJehova njengaBabe wetfu. (Matewu 6:9) Akasiniketi kuphila nje kuphela, kodvwa ufuna siphile ncono kakhulu—njengobe nje bonkhe bobabe labanelutsandvo bafuna kubenjalo kubantfwana babo.  (Tihlabelelo 36:9) LiBhayibheli liphindze lifundzise kutsi bantfu bangaba bangani baJehova. (Jakobe 2:23) Cabanga nje—ungaba ngumngani weMdali wendzawo yonkhe!

²² Njengobe ufundza lokunyenti eBhayibhelini, ungatfola kutsi bantfu labangakahlosi lokubi bayakucela kutsi uyekele kufundza. Bangase bacabange kutsi mhlawumbe utawushintja tinkholelo takho. Kodvwa ungavumeli muntfu kutsi akwente uyekele kwakha bungani lobuhle kakhulu longahle ube nabo.

23, 24. (a) Kungani kufanele uchubeke ubuta imibuto ngaloko lokufundzako? (b) Sitawufundza ngani esehlukweni lesilandzelako?

²³ Kuliciniso kutsi kunetintfo longeke uticondze ekucaleni. Kungase kudzingeke kutsi utitfobe kute utfole lusito, kodvwa ungabimatsintsanyawo ngobe nje wesaba lihlazo. Jesu watsi kuhle kutitfoba njengemntfwana lomncane. (Matewu 18:2-4) Njengobe nje bantfwana sibati, babuta imibuto leminyenti. Nkulunkulu ufuna utfole timphendvulo. LiBhayibheli liyabatisa labanye labebanesifiso sekwati ngaNkulunkulu. Bebakuhlolisisa loko lokwakusemiBhalweni kute baciniseke kutsi loko lebebakufundza kwakuliciniso yini.—Imisebenti 17:11.

²⁴ Indlela lehamba embili yekufundza ngaJehova ikuhlola liBhayibheli. Lehlukile kuletinye tincwadzi. Ngayiphi indlela? Sehluko lesilandzelako sitawukhuluma ngalendzaba.