1, 2. Tanbasá mak diʼak atu husu pergunta sira?

BAIBAIN, labarik sira gosta atu husu pergunta barak, hanesan ita bele haree iha dezeñu neʼe. Kuandu labarik sira foin hatene atu koʼalia, sira komesa atu husu pergunta hanesan: ‘Tansá mak ida-neʼe la diʼak? Ka tansá mak ida neʼebá hanesan neʼe?’ Karik Ita koko atu fó resposta diʼak, maibé dala ruma neʼe la fasil. Ita-nia resposta diʼak liu bele mós halo labarik sira husu pergunta ida tan. Sira husu: ‘Tanbasá?’

² Tuir loloos, laʼós deʼit labarik sira mak husu pergunta. Nuʼudar ita sai boot, ita mós kontinua atu husu pergunta sira. Ita halo hanesan neʼe tanba ita hakarak atu hatene dalan ba ita-nia moris, hatene kona-ba perigu ruma neʼebé ita tenke sees, no mós tanba ita iha interese, ka hakarak hatene buat ruma. Maibé ema barak para atu husu pergunta, liuliu  kona-ba pergunta sira neʼebé importante liu. No se sira husu karik, sira la hakaʼas an atu buka resposta.

3. Tanbasá mak ema barak lakohi tan atu buka resposta ba pergunta sira neʼebé importante liu?

³ Hanoin toʼok kona-ba pergunta iha livru neʼe nia oin, pergunta sira iha pájina tolu no neen, ka pergunta sira neʼebé atu komesa kapítulu neʼe. Pergunta sira-neʼe mak pergunta balu neʼebé importante liu. Maibé, ema barak lakohi tan atu buka resposta ba pergunta sira-neʼe. Tanbasá? Tuir loloos, Bíblia fó resposta ka lae? Ema balu sente katak Bíblia nia resposta sira susar liu atu komprende. Ema balu seluk hanoin katak husu pergunta hanesan neʼe, sei halo sira sente moe. No ema seluk tan hanoin katak diʼak liu husik ulun-naʼin relijiaun sira atu buka-hatene resposta ba pergunta sira-neʼe. Oinsá ho Ita?

4, 5. Pergunta importante saida deʼit mak ita hakarak atu husu? Tanbasá mak importante atu buka-hatene resposta?

⁴ Klaru katak Ita mós hakarak hatene resposta ba pergunta sira neʼebé importante liu. Dala ruma, karik Ita mós hanoin kona-ba pergunta sira hanesan: ‘Tansá ita moris? Ita-nia moris hanesan neʼe deʼit ka lae? Tuir loloos, Maromak hanesan saida?’ Diʼak atu husu pergunta hanesan neʼe, no Ita tenke kontinua buka resposta sira neʼebé Ita bele simu no fiar. Ita-nia Mestre Boot, Jesus Kristu hatete: “Kontinua husu, no imi sei simu. Kontinua buka, no imi sei hetan. Kontinua tuku odamatan, no odamatan sei loke ba imi.”—Mateus 7:7.

⁵ Se Ita “kontinua buka” resposta ba pergunta importante sira, Ita sei haree katak halo ida-neʼe sei lori kontente ba Ita. (Provérbios [Amsal] 2:1-5) No maski ema seluk dehan ba Ita katak la iha resposta, maibé resposta iha duni, no Ita bele hetan resposta sira-neʼe iha Bíblia laran. Resposta sira-neʼe la susar liu atu komprende. Liután neʼe, resposta sira-neʼe fó ksolok no esperansa kapás ba aban-bainrua. No mós, bele ajuda Ita atu moris kontente ohin loron. Atu hahú, mai ita buka  resposta ba pergunta ida neʼebé halo ema barak hanoin.

6. Tanbasá mak ema barak hanoin katak Maromak la iha interese ba ema nia terus?

⁶ Ema barak sente katak resposta ba pergunta neʼe mak lae. Sira hanoin: ‘Se Maromak iha interese karik, mundu neʼe la hanesan agora.’ Kuandu ita haree ba situasaun iha mundu neʼe, ita haree funu, odi no terus mosu iha fatin hotu. Ita ida-idak bele sai moras, hetan terus, no lakon ema neʼebé ita hadomi tan mate. Nuneʼe, ema barak hatete: ‘Se Maromak iha interese mai ita no ita-nia problema sira, nia sei la husik buat aat sira-neʼe akontese, loos ka lae?’

7. (a) Oinsá mak ulun-naʼin relijiaun sira halo ema barak hanoin katak Maromak la iha sentimentu? (b) Tuir loloos, saida mak Bíblia nia hanorin kona-ba susar neʼebé ita hasoru?

⁷ Buat neʼebé aat liután mak dala ruma ulun-naʼin relijiaun sira halo ema hanoin katak Maromak la iha sentimentu. Oinsá? Kuandu dezastre ida mosu, sira dehan katak ida-neʼe mak Maromak nia hakarak. Neʼe hanesan sira duun Maromak, hodi dehan katak nia mak hamosu dezastre sira. Maibé, ida-neʼe mak lia-loos kona-ba Maromak ka lae? Tuir loloos, saida mak Bíblia hanorin? Eskritura iha Tiago 1:13 hatán: “Kuandu iha susar laran, ema ida labele dehan: ‘Maromak koko haʼu.’ Tanba ema ida la bele koko Maromak  no nia mós la koko ema ida ho buat neʼebé aat.” Tan neʼe, buat aat neʼebé mosu nunka mai husi Maromak. (Roma 9:14) Maski Maromak husik buat aat akontese, maibé husik buat ruma akontese la hanesan ho halo ida-neʼe akontese.

8, 9. (a) Fó toʼok ezemplu oinsá mak husik buat aat akontese la hanesan ho halo ida-neʼe akontese. (b) Tanbasá mak Maromak la presiza esplika ninia razaun atu husik ema moris iha dalan neʼebé la diʼak?

⁸ Porezemplu, hanoin toʼok kona-ba aman ida neʼebé matenek no hadomi ninia oan-mane. Oan neʼe boot ona no sei hela hamutuk ho inan-aman. Bainhira oan neʼe lakohi halo tuir tan ninia aman no deside atu sai husi uma hodi hela mesak, nia aman husik nia sai. Oan neʼe hili atu moris iha dalan neʼebé aat no nia hetan susar. Entaun, aman mak halo oan neʼe hetan susar sira-neʼe ka lae? Lae. (Lucas 15:11-13) Hanesan neʼe mós, Maromak la hapara ema kuandu sira hili rasik atu moris iha dalan neʼebé la diʼak. Nuneʼe, laʼós Maromak mak halo susar neʼebé mosu daudaun, no sala atu duun Maromak ba susar hotu neʼebé ema hasoru.

⁹ Maromak iha razaun tanbasá nia husik ema moris iha dalan neʼebé la diʼak. Nuʼudar ita-nia Kriadór neʼebé iha matenek no forsa boot, nia la presiza esplika ninia razaun mai ita. Maibé, tanba Maromak hadomi ita, nia esplika razaun sira-neʼe. Ita sei aprende liután kona-ba ninia razaun sira iha Kapítulu 11. Maibé, ita bele fiar katak laʼós Maromak mak halo problema sira neʼebé ita hasoru. Tuir loloos, ita iha esperansa katak Maromak sei rezolve problema hotu!—Roma 15:13.

10. Tanbasá mak ita bele fiar katak Maromak sei rezolve no hadiʼa problema hotu neʼebé ema aat sira halo?

¹⁰ Liután neʼe, Maromak mak santu. (Apokalipse 4:8)  Neʼe katak nia moos, la iha buat foʼer ida, no la iha buat aat ida. Tan neʼe, ita bele fiar nia ho laran tomak. Maibé ita la bele tau fiar tomak ba ema, tanba ema bele sai bosok-teen. Maski ulun-naʼin ida laran-moos, nia la iha kbiit no forsa atu rezolve no hadiʼa problema sira neʼebé ema aat halo. Maibé Maromak iha forsa boot liu hotu. Nia bele rezolve no hadiʼa problema hotu neʼebé mosu tanba ema nia hahalok aat, no nia sei halo nuneʼe duni. Bainhira Maromak halo ida-neʼe, nia sei halakon buat aat hotu ba nafatin!—Salmo (Mazmur) 37:9-11; 2 Pedro 3:7.

11. (a) Maromak sente oinsá kona-ba buat neʼebé la loos? (b) Maromak hanoin oinsá kona-ba ita-nia terus?

¹¹ Maibé ohin loron, Maromak sente oinsá kona-ba buat neʼebé akontese daudaun iha mundu no iha ita-nia moris? Bíblia hanorin katak Maromak “hadomi justisa”. (Salmo [Mazmur] 37:28) Nuneʼe, nia iha interese tebes kona-ba buat neʼebé loos no la loos. Nia odi buat hotu neʼebé la loos. Iha tempu uluk, kuandu mundu nakonu ho buat aat, Bíblia hatete katak Maromak “sente laran-kanek”. (Gênesis [Kejadian] 6:5, 6) Maromak sente hanesan neʼe nafatin, “nia la muda ka la troka”. (Tiago 1:17) Nia la gosta haree terus neʼebé akontese daudaun iha mundu tomak. Bíblia hatete: “Nia hanoin imi.”—1 Pedro 5:7.

12, 13. (a) Tanbasá mak ita hatudu hahalok diʼak, hanesan domin? Domin halo ita sente oinsá kona-ba buat neʼebé akontese iha mundu neʼe? (b) Tanbasá mak ita bele fiar katak Maromak sei hapara duni terus iha mundu neʼe?

¹² Tansá mak ita bele fiar katak Maromak la gosta haree ema nia terus? Iha buat seluk tan neʼebé hatudu  ida-neʼe. Bíblia hanorin katak Maromak kria ema tuir nia ilas. (Tiago 3:9) Nuneʼe, ita hatudu hahalok diʼak tanba Maromak hatudu hahalok diʼak. Porezemplu, kuandu Ita haree ema neʼebé la halo sala hetan terus, Ita hanoin sira ka lae? Se Ita hanoin kona-ba buat neʼebé la loos hanesan neʼe, Ita bele fiar katak Maromak mós hanoin liután kona-ba buat neʼebé la loos.

¹³ Buat furak tebes kona-ba ita ema mak ita bele hatudu domin. Ida-neʼe mós haleno Maromak nia hahalok. Bíblia hanorin katak “Maromak mak domin”. (1 João 4:8) Ita hatudu domin tanba Maromak hatudu domin. Entaun hanoin toʼok kona-ba neʼe: Se karik Ita iha forsa atu hapara terus no buat neʼebé la justisa iha mundu neʼe, Ita sei halo ka lae? Halo duni! No domin sei book Ita atu halo nuneʼe, loos ka lae? Nuneʼe mós, ita bele fiar katak Maromak sei halakon terus no buat hotu neʼebé la loos. Promesa sira neʼebé temi tiha ona iha pájina haat no lima husi livru neʼe laʼós mehi deʼit. Buat hotu neʼebé Maromak promete sei sai loos! Maibé, hodi bele fiar ba promesa sira-neʼe, ita tenke hatene buat seluk tan kona-ba Maromak.

14. Maromak nia naran saida, no tansá mak ita tenke temi nia naran?

¹⁴ Se Ita hakarak koñese didiʼak ema ida, Ita sei halo saida? Ita fó-hatene Ita-nia naran ba nia, loos ka lae? Entaun, Maromak iha naran ka lae? Relijiaun barak dehan katak ninia naran mak “Maromak” ka “Naʼi”, maibé liafuan sira-neʼe laʼós naran. Liafuan sira-neʼe mak títulu deʼit, hanesan mós ho liafuan “liurai” no “prezidente”. Bíblia hanorin duni katak Maromak iha títulu hanesan “Maromak” no “Naʼi”, no mós iha títulu barak tan. Maibé, Bíblia mós hanorin katak Maromak iha naran rasik. Neʼe mak Jeová. Eskritura iha Salmo (Mazmur) 83:18 dehan: “Ita, neʼebé naran Jeová, Ita mesak deʼit mak Maromak Aas Liu Hotu iha mundu tomak.” Iha tradusaun Bíblia balu, Maromak nia naran neʼebé habadak ona mosu iha Apokalipse 19:6 iha liafuan “Aleluia”. Aleluia katak “hahiʼi Jah”. Ita bele lee Apéndise iha pájina 225-7 atu hatene tansá mak Bíblia barak la uza Maromak nia naran. Tuir loloos, kuandu ema hakerek Bíblia iha tempu uluk, Maromak nia naran  mosu dala rihun ba rihun. Ida-neʼe hatudu katak Maromak Jeová hakarak ita atu hatene no temi ninia naran. Ita bele dehan katak nia uza Bíblia hodi ita bele hatene kona-ba nia.

15. Jeová nia naran hatudu buat importante saida kona-ba ninia an?

¹⁵ Maromak nia naran hatudu buat neʼebé importante kona-ba ninia an. Nia naran, Jeová, katak Maromak bele kumpre buat hotu neʼebé nia promete no bele halo buat hotu neʼebé nia hakarak atu halo. * Maromak nia naran úniku, la iha naran ida neʼebé hanesan ninian . Nia deʼit mak iha naran neʼe. Maromak Jeová úniku iha dalan barak. Ezemplu saida deʼit mak hatudu kona-ba neʼe?

16, 17. Ita bele aprende saida kona-ba Maromak Jeová husi títulu sira tuirmai neʼe: (a) Ida neʼebé “Kbiit Boot Liu Hotu”? (b) “Liurai neʼebé la iha rohan”? (c) “Kriadór”?

¹⁶ Iha Salmo (Mazmur) 83:18 ita lee katak Jeová “mesak deʼit mak Maromak Aas Liu Hotu”. Nuneʼe mós, iha Bíblia Jeová deʼit mak bolu nuʼudar Ida neʼebé iha “Kbiit Boot Liu Hotu”. Iha Apokalipse 15:3 dehan: “Maromak Jeová, neʼebé iha Kbiit Boot Liu Hotu, Ita-nia hahalok sira mak boot no furak. Liurai neʼebé la iha rohan, Ita-nia dalan sira mak diʼak no loos.” Maromak nia títulu “Kbiit Boot Liu Hotu”, ida-neʼe hatudu mai ita katak la iha ida neʼebé iha forsa boot liu fali Jeová. No ninia títulu “Liurai neʼebé la iha rohan”, ida-neʼe hatudu katak Jeová úniku iha dalan seluk tan. Nia deʼit mak sempre iha, no nia la iha hun no rohan. Iha Salmo (Mazmur) 90:2 dehan: “Husi tempu sura la bele toʼo tempu ba nafatin Ita mak Maromak.” Hodi hanoin kona-ba neʼe sei book ita atu iha respeitu neʼebé kleʼan ba Maromak, loos ka lae?

¹⁷ Maromak Jeová mós úniku tanba nia deʼit mak Kriadór. Iha Apokalipse 4:11 ita lee: “Jeová, ami-nia Maromak, Ita-Boot merese simu glória, hahiʼi no  kbiit, tanba Ita kria ona buat hotu, no tanba Ita-nia hakarak mak buat hotu iha no kria tiha.” Sin, buat hotu iha tanba Jeová mak Kriadór. Nia kria anju sira iha lalehan, fitun sira neʼebé nabilan kalan-kalan, ai-hun ho ai-fuan sira, no ikan neʼebé nani iha mota no tasi.

18. Tanbasá mak ema balu sente katak sira la bele hakbesik ba Maromak? Maibé, saida mak Bíblia hanorin kona-ba ida-neʼe?

¹⁸ Kuandu ema lee kona-ba Maromak Jeová nia hahalok furak sira, ida-neʼe halo ema balu sente taʼuk uitoan. Sira sente taʼuk tanba Maromak boot tebes, no hanoin katak sira la bele hakbesik ba Maromak neʼebé aas hanesan neʼe tanba nia la iha interese ba sira. Maibé, ida-neʼe loos ka lae? Lae, buat neʼebé Bíblia hanorin oin-seluk fali. Kona-ba Maromak Jeová, Bíblia hatete: “Tuir loloos nia la dook husi ita ida-idak.” (Apóstolu 17:27) Bíblia mós dehan: “Hakbesik ba Maromak, no nia sei hakbesik ba imi.”—Tiago 4:8.

19. (a) Oinsá mak ita bele hakbesik ba Maromak? Tanbasá mak halo ida-neʼe diʼak mai ita? (b) Husi Maromak nia hahalok furak sira, ida-neʼebé mak Ita gosta liu?

¹⁹ Oinsá mak Ita bele hakbesik ba Maromak? Ulukliu, kontinua atu halo buat neʼebé Ita halo daudaun, neʼe mak aprende kona-ba Maromak. Jesus hatete: “Neʼe mak moris rohan-laek: Katak sira hatene didiʼak Ita, Maromak loos mesak deʼit, no ida neʼebé Ita haruka mai, Jesus Kristu.” (João 17:3) Loos, Bíblia hanorin katak aprende kona-ba Maromak Jeová no Jesus mak lori ita ba “moris rohan-laek”! Hanesan temi tiha ona, “Maromak mak domin”. (1 João 4:16) Maromak Jeová mós iha hahalok furak seluk tan.  Porezemplu, Bíblia hatete katak Jeová mak “Maromak neʼebé laran-sadiʼa no laran-luak, neineik atu hirus no nakonu ho laran-diʼak no lia-loos”. (Êxodo [Keluaran] 34:6) Bíblia mós dehan katak nia “diʼak no prontu atu fó perdua”. (Salmo [Mazmur] 86:5; Ebreu 8:12) Maromak hatudu pasiénsia. (1 Pedro 3:20) Nia laran-metin. (Apokalipse 15:4) Kuandu Ita lee Bíblia beibeik, Ita sei hatene oinsá Maromak Jeová hatudu hahalok furak hirak-neʼe no mós hahalok furak seluk tan.

20-22. (a) Tanba ita la bele haree Maromak, ida-neʼe katak ita la bele hakbesik ba nia ka lae? Esplika toʼok. (b) Karik ema balu sei koko atu halo saida? Maibé, saida mak Ita tenke halo?

²⁰ Ita la bele haree Maromak tanba nia laʼós ema, nia mak espíritu. (João 1:18; 4:24; 1 Timóteo 1:17) Maibé hodi lee Bíblia, ita bele hatene kona-ba nia. Hanesan ema neʼebé hakerek salmu ida hatete, ita bele “haree Maromak Jeová nia laran-diʼak”. (Salmo [Mazmur] 27:4; Roma 1:20) Kuandu ita aprende barak liután kona-ba Jeová, ita iha razaun barak tan atu hadomi nia no sente besik ba nia.

²¹ Neineik-neineik ita sei hatene tansá Bíblia hanorin ita atu hanoin kona-ba Jeová nuʼudar ita-nia Aman. (Mateus 6:9) Laʼós deʼit katak ita-nia moris mai husi nia, maibé nia mós hakarak atu ita moris kontente, hanesan ho aman ida neʼebé hadomi nia oan sira. (Apóstolu 17:24, 25) Bíblia mós hanorin katak ema bele sai Maromak Jeová nia belun. (Tiago 2:23) Hanoin toʼok, Ita bele sai belun ho Maromak neʼebé kria buat hotu iha lalehan no rai!

²² Kuandu Ita aprende liután husi Bíblia, karik ema balu sei koko atu hapara Ita atu la estuda tan, tanba sira hanoin katak ida-neʼe laʼós dalan diʼak liu. Karik sira hanoin Ita sei troka relijiaun. Maibé labele husik ema ida atu hapara Ita sai belun ho Maromak, belun neʼebé diʼak liu hotu.

23, 24. (a) Tanbasá mak Ita tenke husu pergunta beibeik kona-ba buat neʼebé Ita aprende? (b) Kapítulu tuirmai sei koʼalia kona-ba saida?

²³ Foufoun, sei iha buat ruma neʼebé Ita seidauk komprende. Maski Ita tenke haraik an atu husu ajuda, lalika sente moe. Jesus gaba ema neʼebé haraik-an hanesan labarik kiʼik sira. (Mateus 18:2-4) Hanesan ita hatene ona, labarik sira sempre husu pergunta barak. Maromak hakarak ita atu hetan resposta sira. Bíblia mós gaba ema neʼebé hakarak tebes atu aprende kona-ba Maromak. Sira lee beibeik eskritura sira iha Bíblia atu buka-hatene se buat neʼebé sira aprende mak loos ka lae.—Apóstolu 17:11.

²⁴ Dalan diʼak liu hotu atu aprende kona-ba Maromak Jeová mak lee no estuda Bíblia. Bíblia la hanesan livru sira seluk. Oinsá? Kapítulu tuirmai sei koʼalia kona-ba ida-neʼe.