1, 2. მუშენ რე საჭირო ხშირას კითხვეფიშ დასვება?

დღას ქუდაკვირებექო, მუჭო სვენა ბაღანეფ კითხვეფს? ბრელ მუჭო რაგადის ქიდიჭყანს-დო, ხეთეშე კითხვეფს სვენს. მუნეფიშ გვირალ თოლეფით ენგოპირჭინანა დო გოკითხნა: მუშენ რე ცა ლურჯი? მუჭო გორჩქინდ მურიცხეფქ? მიქ დაგურუ ჩიტეფს ღურჭული? შილებე ირნერო ოცადუდე პასუხეფიშ მეჩამას, მარა თენა გვალო ადვილ ვა რე. მუდგა ჯგირო ვა უპასუხენ, იშენით რკითხენა: მუშენ?

² კითხვეფი ხვალე ბაღანეფს ვარ, დიდებს ხოლო მიღნა. მინშა შხვას შარას ვოკითხუთ, მინშა მოკონა ღამაკის დუდი ეუჩილითუათ დო თიშენ ფსვენთ კითხვეფს. კანკალეშა უბრალოთ მუდგარენიშ გაგება მოინტერესნა თიშენ ვორთუთ თეს. მარა ბრელქ მიოტუ არძაშ უმოს მნიშვნელოვან კითხვეფიშ დასვება დო პასუხეფიშ გორუა.

3. მუშენ ვაცად ბრელ თიცალ კითხვეფიშ პასუხეფიშ გორუას, ნამუთ არძაშ უმოს მნიშვნელოვან რე?

³ დეფიქრი თი კითხვეფშენ, ნამუთ მოჩამილ რე თე წიგნიშ კაბრას, წოხოლენ გვერდეფს  ვარდა დუდიშ დაჭყაფუს. თენა მნიშვნელოვან კითხვეფ რე, მარა ბრელ ვაცად პასუხეფიშ გორუას. მუშენ? ქორენო პასუხეფი ბიბლიას? მინ ფიქრენს, ნამდა თე პასუხეფი ძნელ გაგებელ რე. მინს ხოლო ონჯღორე უჩქუ შეკითხირშა. შხვეფ თის ფიქრენა, ნამდა თეცალ საკითხეფ რელიგიურ მანჯღვერეფიშ საქმე რე. სი ხოლო თაშ ფიქრენქო?

4, 5. მუ მნიშმნელოვან კითხვეფ მირჩქინდუნა ცხოვრებას დო მუშენ ოკო ბგორათ პასუხეფი?

⁴ შილებე სი ხოლო გოინტერესდას მნიშვნელოვან კითხვეფშე პასუხეფიშ გაგება. მინშა ალბათ ფიქრენქ: მუ რე ცხოვრებაშ აზრი? ხვალე თენა რენო ჩქინ რინა? მუნერ რე ღორონთი? დიდებულ მასწავლებელქ, იესო ქრისტექ თქუ: „ქითხით დო მიგაჩამუნა, დოგორით დო ქოძირუნთ, დუხაკეთ დო გუგანჯამუნა“ (მათე 7:7).

⁵ მნიშმნელოვან კითხვეფიშ პასუხეფიშ გორუას გაგრძელენქ-და, სქან მონდომას აუცილებერო მაჸუნუ შედეგი (იგავები 2:1—5). შხვაქ მუდგა ვა თქუასინ, რშუდას, ნამდა პასუხეფ არსებენს დო შეილებუ თინეფიშ გორუა. პასუხეფ ბიბლიას რე მოჩამილ დო თინეფ ვა რე ძნელ გაგებელი. თე პასუხეფს ჩქინო იმენდი დო ხიოლი მოუღუ. თინეფიშ ჭყოლოფუათ სი ამდღა ხოლო გაღვენუ აზრით ეფშა ცხოვრება. მორთ, დიო ქიფჩუათ თი კითხვაშენ, ნამუთ ბრელს აწუხენს.

6. მუშენ ფიქრენს ბრელ, ნამდა ღორონთი სასტიკ რე დო ვა წუხენს ხალხიშ რინა?

⁶ ბრელ მართალო თაშ ფიქრენს. თინეფიშ აზრით ღორონთი მოჸორეფე ქორდასინ, თეცალ გაჭირებულ ცხოვრება ვეჸიდ. ამდღარ ქიანა ეფშა რე ჩხუპეფით, წვალებათ, ხალხის ჯოგუ ართიან. ლახალა დო საჸოროფო კოჩიშ ღურა ხიოლს მიდმამღანა. ათეშენ ბრელ იჩიებუ: „ღორონთის ჩქინ რინა დო პრობლემეფი დასურო ქაწუხენდასინ, თესხი ხანს ქიმმეხვარებდეს“.

7. ა) მუჭო მიჸონეს რელიგიურ მანჯღვერეფქ ხალხი თი აზრშა, ნამდა ღორონთი სასტიკ რენ? ბ) მუს იჩიებუ ბიბლია გაჭირებეფშენ, ნამუსით შეთმოფხვადუთ?

 ⁷ ხოლო უფრაშ თინა რე, მუჟამს რელიგიურ მანჯღვერეფს ხალხი თი აზრშა მეჸუნა, ნამდა ღორონთი სასტიკ რე. მუთუნ უბედრობა ქუმოხვადუნ, თინეფ იჩიებნა, თენა ღორონთიშ ნება რდუა. სინამდვილეს, რელიგიურ მანჯღვერეფი მოხვალამირს ღორონთის აბრალუაფნა. მარა მართალო თაშ რენო თენა? მუს მოგურუანა ბიბლია? იაკობიშ 1:13 პასუხენს: „გაჭირებაშ დროს მითინქ ვა თქუას, ღორონთი გიმოფცადუნსია, მუშენდა მითინს ვეშულებ ღორონთიშ გიმოცადუა უბადობათ დო მუ ხოლო მითინს ვეგმოცადუნს“. თაშ ნამდა, ღორონთი დღას ვა რე უბადობაშ მიზეზი, მუთ თე ქიანას მუთმოხვადუ (წეკითხი იობიშ 34:10—12). მართალ რე, ღორონთი უშვენს თე ირფელს, მარა ართ რე დუშვე უბადობა დო მაჟია — თიშ მიზეზი რდე.

8, 9. ა) მაგალითით გენწყი, მუ სხვაობა რე უბადობა დუშვე დო უბადობაშ მიზეზი რდენ თი შქას? ბ) მუშენ ვეჸი სწორ, გუვაკრიტიკათ ღორონთი, კაცობრიობას არასწორ შარათ ულაშ ნება მეჩუნ თიშენ?

⁸ ქიმიპჸონათ მაგალით: მუმაქ სიბრძნე დო ჸოროფათ მორდუ ქომოლსქუა, თინა უკვე ძინათებულ რე, მარა დიო ხოლო დიდა დო მუმაწკუმა ცხოვრენს. მუჟამს სქუა დიდა დო მუმას ოპირისპირუ დო ჸუდეშე ულა ულამუნ, მუმა ვაჩერენს თის. სქუა გლახა შარას გიოდირთუ დო დიდ პრობლემეფს შეთმოხვადუ. ქირაგადენო, ნამდა მუმა რე სქუაშ პრობლემეფიშ მიზეზი? მუშო ოკო რაგად, ვარ (ლუკა 15:11—13). თეგვარო, მუჟამს ხალხიქ გლახა შარა ეირჩუნ, ღორონთის ვა გუჩერებუ თინეფ. მარა ღორონთი ვა რე თი პრობლემეფიშ მიზეზი, ნამუქით თე არჩევანს მაჸუნ. ნამდვილო ვეჸიდ სწორ, ღორონთშა ეკომბრალებდესკო კაცობრიობაშ პრობლემეფი.

⁹ ღორონთის უღუ სერიოზულ მიზეზეფი, მუშ გურშენით დუშვუ, ნამდა კაცობრიობას არასწორ შარათ ულინუდკო. ჩქინ ბრძენ დო დიდ ძალაშ მენდულ გუმაჭყაფალ ვა რე ვალდებულ, თე მიზეზეფ ემინწყან. მარა ჩქი უჸორთინ თიშენ, თეს ხოლო  ორთუ. მა-11 დუდს უმოს მეტის ქიგეგენქ თე მიზეზეფიშ გურშენ. დარწმუნებულ რდა, ჩქინ პრობლემეფი ღორონთიშ ბრალ ვა რე. პირიქით, ღორონთი პრობლემეფიშ გინოჭყვადუაშ რეალურ იმენდის მარზენა! (ესაია 33:2)

10. მუშენ ოკო ვორდათ დარწმუნებულ, ნამდა ღორონთი უბადობაშ არძანერ შედეგის მოსპუნს?

¹⁰ ღორონთი წმინდა რე (ესაია 6:3). თინა სპეტაკ რე დო თიწკუმა უბადობაშ მუთუნნერ ნიშანწყარ ვა რე. თაშ ნამდა, შემლებნა სრულას მივენდათ ღორონთის. თეცალ მუდგარენ ვერაგადე ხალხიშ გურშენ. თინეფ მინშა მანგარ გლახა საქმეეფს მიშმალუნა. ძალაუფლება უღუნ ფერ არძაშ უმოს პატიოსან კოჩის ხოლო გაუჭირდუდ ხალხიშ უბადო საქმეეფიშ გიშანწყუალა. მარა ღორონთი ირფელიშ შემალებე რე. თის შეულებუ დო ქოთ ოკო ედომშამო მოსპას თი დუდიშოტახალ შედეგეფი, ნამუთ კაცობრიობას უბადო ხალხიშ საქმეეფქ მოუღუ. მუჟამს ღორონთი მოქმედებას ქიდიჭყანსინ, უბედურიშ მაკეთებელეფს ართ დო სამუდამოთ მოსპუნს! (წეკითხი ფსალმუნიშ 37:9—11).

11. ა) მუჭო უჯინე ღორონთი უსამართლობას? ბ) მუჭო უჯინე ღორონთი მუთ სი გაწუხენსინ თის?

¹¹ მუჭო უჯინე ღორონთი თის, მუთ მთელ მსოფლიოს დო სქან ცხოვრებას მუთმოხვადუ? ბიბლია მოგურუანა, ნამდა ღორონთის სამართალ უჸორს (ფსალმუნი 37:28). თაშ ნამდა, თიშო არძა ართ ვა რე ჯგირ დო ფური. ღორონთის ჯოგუ უსამართლობა. ბიბლია იჩიებუ, ნამდა ჯვეშო, მუჟამს თე ქიანაქ უბადობათ ეიფშუნ, ღორონთის „გურქ შეჭირუ“ (დაბადება 6:5, 6). ღორონთი ვათირე (მალაქია 3:6). თის კინ თიშნერო ჯოგუ უსამართლობა. ღორონთის გურს ჭუნს ხალხიშ წვალებაშ ჯინა. „თინა თქვანო ზრუნენს“, — იჩიებუ ბიბლია (წეკითხი 1 პეტრეშ 5:7).

12, 13. ა) მუშენ მიღნა ჯგირ თვისებეფი, მაგალთო ჸოროფა, დო მუჟამს ჸოროფა მიღნა, მუჭო უჯინეთ ამდღარ მსოფლიო მდგომარეობას? ბ) მუშენ ოკო ბჯერდან, ნამდა ღორონთი მართალო მაგვარენს მსოფლიო პრობლემეფს?

 ¹² მუ მარწმუნენა თიშა, ნამდა ღორონთის ჯოგუ ხალხიშ წვალებაშ ჯინა? მორთ, დეფიფქრათ: ბიბლია მოგურუანა, ნამდა ღორონთიქ კოჩი მუშ ამნახანტო გაჭყუ (დაბადება 1:26). ჩქი ჯგირ თვისებეფ მიღუნა, მუშენდა ღორონთის უღუ ჯგირ თვისებეფი. მაგალთო, ვეშქეწუხებუნო გური, მუჟამს ორწყექ, მუჭო წვალენა მუთუნ ვა დუშებუნან ფერ კათა? სქანო ქორე ძნელ უსამართლობაშ ჯინა-და, ღორონთშო ხოლო უმოს ძნელ ვა რენო?!

¹³ ართ-ართ ჯგირ თვისება, ნამუთ ჩქი მიღნა, ჸოროფა რე. თენა ბრელ მუთუნს მირაგადნა ღორონთშენ. ბიბლია მოგურუანა, ნამდა „ღორონთი ჸოროფა რე“ (1 იოანე 4:8). ჩქი გიმოფხანტუნთ ჸოროფას, მუშენდა ღორონთი გიმოხანტუნს თის. ზუსტას ჸოროფაშ გურშენ ვაიძახუნო გური, ნამდა ბოლო მუღე წვალებას დო უსამართლობას? ქეშეილებდასინ, ვაკეთენდიო თეს? მუშო ოკო რაგად, ქო! დარწმუნებულ რდა ნამდა, ღორონთი მოსპუნს წვალებას დო უსამართლობას. თე წიგნიშ დაჭყაფუს მოჩამილ დუნაპირებ ცარიელ დო ტყურა იმენდ ვა რე. ღორონთი მუშ დუნაპირებუს აუცილებერო შეასრულენს. თე დუნაპირებ ქირწმუნენ თიშენ, უმოს ოკო ქიგეგე ღორონთიშ გურშენ, ნამუთ თეს მოპირუნა.

14. მუ ჯოხო ღორონთის დო მუშენ ოკო გიმიბრინუათ თიშ სახელი?

¹⁴ მუს ქიმინუნქ, ქუგოკო მითინქ გაიჩინებაფუას-და?  ვა უწინქო სქან სახელს? ქოუღუნო ღორონთის სახელი? ბრელ რელიგია ოგურუანს, ნამდა თის „ღორონთი“ დო „უფალი“ ჯოხო. მარა თენა თიცალ ტიტულეფ რე, მუჭოთ „მეფე“ დო „პრეზიდენტი“. ბიბლიას ინოჭარ, ნამდა ღორონთის ბრელ ტიტულ უღუ. „ღორონთი“ დო „უფალი“ ხოლო თინეფშა მიშმურს. მარა ბიბლია თის ხოლო მოგურუანა, ნამდა ღორონთის მუშ კუთნეულ სახელ უღუ — იეჰოვა. ფსალმუნიშ 83:18-ს ინოჭარ: „სი, ნამუშ სახელ იეჰოვა რენ, ხვალე სი რექ უზენაეს მთელ დედამიწას!“. სქან ბიბლიას ვენოჭარ ღორონთიშ სახელ-და, ქოძირ თე წიგნის გეძინელ თემეფი („ღორონთიშ სახელი — თიშ გიმორინაფა დო მნიშვნელობა“), სოდეთ ენწყუმილ რე თეშ მიზეზი. ღორონთიშ  სახელ მუსხირენ ანთასშა რე მოშინაფილ ჯვეშ ბიბლიურ ხეშნაჭარეფს. თაშ ნამდა, ღორონთის ოკო გიჩქუდას თიშ სახელი დო გიმირინუე თინა. შილებე ითქუას, ნამდა ღორონთი მუშ დუდს ბიბლიაშე გოჩინებაფუანს.

15. მუს ნიშნენს სახელი იეჰოვა?

¹⁵ ღორონთიქ მუშ დუდშო გიშეგორ სახელი, ნამუსით ქვერსემ მნიშვნელობა უღუ. სახელი იეჰოვა ნიშნენს, ნამდა ღორონთის შეულებ მუშ ირნერ დუნაპირებუშ დო ჩანაფიქრიშ შესრულება. * ღორონთიშ სახელი უგნუმეორებ რე, თინა ხვალე ღორონთის ოკუთნუ. იეჰოვა შხვადოშხვა კუნთხუთ ხოლო რე უგნუმეორებუ. მაგალთო, მუ კუნთხუთ?

16, 17. მუს მოგურუანა იეჰოვაშენ ტიტულეფი: ა) „ირფელიშ შემალებე“? ბ) „მარადიულობაშ მეფე“? გ) „გუმაჭყაფალი“?

 ¹⁶ მუჭოთ ბძირითინ, ფსალმუნეფიშ 83:18-ს იეჰოვაშენ ინოჭარ: „ხვალე სი რექ უზენაეს“. თეშნერო, „ირფელიშ შემალებე“ ხვალე იეჰოვას ჯოხო. გამოცხადებაშ 15:3-ს ჭარუ: „დიდებულ დო მერეთ რე სქან საქმეეფი, ირფელიშ შემალებე ღორონთი იეჰოვა. მართალ დო ჭეშმარიტ რე სქან შარა, მარადიულობაშ მეფე“. ტიტულ „ირფელიშ შემალებე“ მოგურუანა, ნამდა ღორონთი არძაშ უმოს ძალიერ რე. თიშ ძალაშა ნამთინ ძალას ვემიართე. ტიტულ „მარადიულობაშ მეფე“ მოგურუანა, ნამდა იეჰოვა ღორონთი შხვა კუნთხუთ ხოლო რე უგნუმეორებუ. ხვალე თინა რე ართ, მით ირიათო არსებენდუ. ფსალმუნიშ 90:2-ს ინოჭარუ: „მარადიულო სი რექ ღორონთი“. თეს გურს ქუგუჩანთ-და, თენა ღორონთიშ შიშის დო რიდის გომრჩქინანა, თაშ ვა რენო?

¹⁷ იეჰოვა თით ხოლო რე უგნუმეორებუ, ნამდა ხვალე თინა რე ირფელიშ გუმაჭყაფალ. გამოცხადებაშ 4:11-ის ბკითხულენთ: „სი ღირს რექ, იეჰოვა, ჩქინ ღორონთი, მიღე დიდება, პატი დო ძალიერება, მუშენდა ირფელ სი გაჭყი, სქან ნებათ არსებენს დო გოჭყაფილ რე“. ირფელ, მუთ აზრშა მუმალენა — თოლით უძირაფ ზეციერ სულიერ არსებეფი, მურიცხეფით მოჭკადილ ცა, ნაყოფიშ მუმაჩამალ ჯალეფი, ოკეანეშ დო მდინარეშ ჩხომეფი — ირფელ თიშენ არსებენს, ნამდა იეჰოვა რე გუმაჭყაფალი!

18. მუშენ ფიქრენს ნამთინე, ნამდა დღას ვეშიალებე ღორონთწკუმა დაახლოება, მარა მუს მოგურუანა ბიბლია?

¹⁸ ნამთინეს შიშ ენულუანს, მუჟამს იგენს იეჰოვაშ თვისებეფშენ, ნამუთ მოწოწებას დო რიდის ურჩქინანს კოჩის. თინეფიშ აზრით ღორონთი თიცალ დიდებულ რე, ნამდა მითინს ვეშულებ თიწკუმა დაახლოება დო თინა დღას ვემიჩომილუანს კოჩშო. მარა ქორენო თეცალ აზრი სწორი? ბიბლია გვალო შხვას მოგურუანა. ღორონთიშ სიტყვა იეჰოვაშენ იჩიებუ: „თინა შორს  ვა რე ჩქინდე“ (საქმეები 17:27). ბიბლია მირაგადნა: „დეახლოვით ღორონთის დო თინა ხოლო დეგეახლოვებუნა“ (იაკობი 4:8).

19. ა) მუ ოკო ვაკეთათ პირველ რიგის, ღორონთის დევეახლოვათინ დო მუ მაჸუნუ თეს? ბ) არძაშ უმოსო ღორონთიშ ნამ თვისება მორწონს?

¹⁹ მუჭო შეგალებე ღორონთწკუმა დაახლოება? პირველ რიგის, გაგრძელ იეჰოვაშენ გურაფა. იესოქ თქუ: „მარადიულ სიცოცხლეშ მიოღებელო ოკო გიჩინებაფუანდან სი, ხვალე ართ ჭეშმარიტ ღორონთის დო თის, მიდგა სი დედამიწაშა მაშქვი, იესო ქრისტეს“ (იოანე 17:3). ბიბლია მოგურუანა, ნამდა იეჰოვა დო იესოშენ გურაფა, „მარადიულ სიცოცხლეშა“ მემიჸონანა! მუჭო დუდშე ბთქვითინ, „ღორონთი ჸოროფა რე“ (1 იოანე 4:16). იეჰოვას ბრელ ჯგირ დო მიკოიჭოფანსინ ფერ თვისება ხოლო უღუ. მაგალთო, ბიბლია იჩიებ, ნამდა „ღორონთი მოჭყოლოფე დო შემაცოდილაფარ რე, რისხვას ვა ჩქარენს დო ხვეიან რე სიკეთეს დო ჭეშმარიტებას“ (გამოსვლა 34:6). თინა „ჯგირ რე დო მზათ რე, აპატუას“ (ფსალმუნი 86:5). ღორონთი მუმათვინებელ რე (2 პეტრე 3:9). თინა „ართგურ“ რე (გამოცხადება 15:4). ბიბლიაშ კითხირიშ დროს ქოძირუნქ, მუჭო გიმოხანტუნს იეჰოვა თეს დო ბრელ შხვა ჯგირ თვისებეფს.

20^—22. ა) მოცილნანო ღორონთწკუმა დაახლოებას თის ვა ვორწყეთინ თინა? გენწყი. ბ) მუ შილებე გიწუან სქანო ჯგირ ოკონან ფერ კათაქ, მარა სი მუ ოკო ქიმინე?

²⁰ ღორონთი შურ რე, ათეშენ ჩქი ვეშემლებნა თიშ ძირაფა (იოანე 1:18; 4:24; 1 ტიმოთე 1:17). მარა ბიბლიაშ გურაფათ, უმოსო ქინანჭუქ თიშ პიროვნებას. ფსალმუნმაბირექ თქუ, ნამდა სი შეილებ ძირე იეჰოვაშ მშვენება (ფსალმუნი 27:4; რომაელები 1:20). მუთ უმოსის გეგენქ იეჰოვაშენი, თით უმოს რეალურ იჸუაფ თინა სქანო, უმოსო ქიგეჸოროფებ დო დეახლოებუქ თის.

²¹ მუთ ხან მიკურსინ, უმოსის გეგენქ, მუშენ მოგურუანა ბიბლია, ნამდა იეჰოვა მუმათ ოკო მიფრჩქინათ (მათე 6:9). იეჰოვაქ სიცოცხლე მუჩეს დო ჩქინო ირფელ ჯგირ ოკო, მუჭოთ მოჸოროფე მუმას სქუალეფშო (ფსალმუნი 36:9). ბიბლია თის  ხოლო ოგურუანს, ნამდა ხალხის შეულებუ იეჰოვაშ მეგობრეფო გინირთან (იაკობი 2:23). წერმიდგინ, სი შეილებუ ცა დო ქიანაშ გუმაჭყაფალიშ მეგობარო გინირთე!

²² იშო-იშო უმოსის დიგურუანქ ბიბლიაშე. შილებე სქანო ჯგირ ოკონან ფერ კათაქ გიწუან, გურაფა მიოტევა. ეგება თინეფს ოშქურდან, ნამდა რწმენას დითირანქ. მარა მითინს ვემეჩა უფლება, გეცილას არძაშ უჯგუშ მეგობრობაშ განვითარებას.

23, 24. ა) მუშენ ოკო ვემიოტუე კითხვეფიშ დასვება ბიბლიაშ გურაფაშ დროს? ბ) მუშ გურშენ იჸი რაგად ანწიან დუდის?

²³ მართალ რე, გურაფაშ დროს თიცალ საკითხეფს აუხვადუქ, ნამუშ გაგება დუდშე გაიჭირდუ. მოხვარას გიახვილ-და, ვემგერიდას, უკახალე ვეკნიკინა. იესოქ თქუ ნამდა, ჭიჭე ბაღანეფცალ თანდაბალეფი ოკო ვორდათ (მათე 18:2—4). ფთქვითინ თეშ, ბაღანეფს ბრელიშ შეკითხირ უჸორა. ღორონთის ოკო პასუხეფ დოგორე. ბიბლია ჯგირო მიშინუანს თი კათას, მიდგა ოცადუდ მთელ გურით უმოს ქიდიგურუკო ღორონთიშ გურშენ. თინეფ გურგედვალირო ირკვიენდეს ბიბლიას, ნამდა მუნეფიშ თოლო ქუძირდესკო, მუდგას გურაფლენდესინ თინა, მართალ ქორდ დო ვარ (წეკითხი საქმეეფიშ 17:11).

²⁴ არძაშ უჯგუშ საშვალება იეჰოვაშ გაჩინებაფალო ბიბლიაშ გურაფა რე. თინა ვა გუ ნამთინ შხვა წიგნის. მუთ? თეს ანწიან დუდის ქიგებგენთი.