1, 2. Ino aby raha mety hahavy atsika han̈ontany?

ANAO mety efa nahita tsaiky nan̈ontany raha. Miaraka izy mahay mivolan̈a efa man̈ontany edy. Masonany mibian̈a, baka io izy man̈ontany karaha ty: Ino ma io e? Ino ataonao? Andeha aia anao e? Anao ndray efa mamaly, izy mbala man̈ontany fo, farany anao tsy mahita raha volan̈iny eky.

² Tsy tsaiky fo tia man̈ontany fa ndray olobe. Atsika man̈ontany koa fa tsy mahita lalan̈a, tsao fo misy raha mety handratra na hamono, ndreky koa fa misy raha tian̈a ho hay. Kanefa, koa fa fan̈ontanian̈a maventy na sarotro, maro olo tsy tia man̈ontany. Sasany efa tsy mieritreritry hahita valiny foeky.

3. Ino mahavy olo maro tsy mitady valiny fan̈ontanian̈a sarotro?

³ Misy fan̈ontanian̈a amy fon̈ony boky ty, amy pazy 3 ndreky pazy 6, ndreky amy  voanalohany amy toko ty. Anao mety efa navy nieritreritry fan̈ontanian̈a aby io. Izio ma amy Baiboly ao ahitan̈a valiny fan̈ontanian̈a aby io? Ino mahavy olo maro tsy mitady valiny fan̈ontanian̈a aby io? Olo sasany mivolan̈a fa Baiboly io sarotro loatra. Misy koa olo men̈atra man̈ontany. Misy ndraiky mieritreritry fa olo pitariky fivavahan̈a fo mahavaly zen̈y. Akory hevitrinao?

4, 5. Ino aby fan̈ontanian̈a mety handalo amy jerintsika? Nan̈ino atsika tsy tokony ho voly hitady valiny fan̈ontanian̈a aby io?

⁴ Anao koa mety mba tihahay raha mikasiky fiain̈ananao. Anao mety efa nieritreritry karaha ty: ‘Ino ma dikany niasany Zan̈ahary atsika? Raha ho teraka, mahaibe, matoe, baka io hofoaty fo? Karakory ma Zan̈ahary zen̈y?’ Tsara man̈ontany karaha zen̈y, ndreky mifen̈y mitady valiny. Jesosy Kristy nivolan̈a karaha ty: “Anaro koa tsy voly mangataka, hahazo. Anaro koa tsy voly mitady, hahita. Anaro koa tsy voly mikonkon̈o, hibiafin̈y.”—Matio 7:7.

⁵ Anao ten̈a ho ravoravo, izikoa “tsy voly mitady” valiny fan̈ontanian̈a aby io. (Ohabolana 2:1-5) Misy olo mivolan̈a fa fan̈ontanian̈a momba Baiboly sarotro valin̈a. Anao matokisa fa valinizio an̈atiny Baiboly ao. Tsy zen̈y fo fa rango ­izioty anao ho ravoravo, tsy ho mora kivy ndreky ho afapo, fotony misy raha antinain̈y. Atsika hizaha fan̈ontanian̈a araiky mampijaly jerinolo maro.

6. Ino mahavy olo maro mieritreritry fa Zan̈ahary tsy mijery atsika?

⁶ Maro olo mieritreritry fa Zan̈ahary tsy mijery atsika. Volan̈indro: ‘Tsy mety ho karaha ty fiain̈ana, izikoa Zan̈ahary mijery atsika.’ Maro raha mahazo olombelon̈o. Amy tany sasany misy ady, olo tsy fankatia, maro olo masikiny. Atsika koa mety marary, mijaly, baka io maty havan̈a. Baka amy zen̈y mahavy olo mivolan̈a fa  Zan̈ahary koa mijery atsika, atsika tsy mety havoa raha karaha ty.

7. a) Ino ma raha volan̈indro pitariky fivavahan̈a aby io, ke mahavy olo mieritreritry fa Zan̈ahary tsy mijery atsika? b) Ino ma raha ten̈a ampianariny Baiboly momba raha ratsy mahazo atsika?

⁷ Baka amindro pitariky fivavahan̈a aby io koa mahavy olo mieritreritry fa Zan̈ahary tsy mijery atsika. Ino ma raha volan̈indro, koa fa misy raha mandalo? Iro mivolan̈a fa Zan̈ahary mandahatra raha jiaby. Amindro, baka amy Zan̈ahary raha ratsy jiaby mahazo atsika io. Mba marin̈y edy zen̈y va? Ino ma raha ten̈a ampianariny Baiboly? Amy Jakoba 1:13 mivolan̈a karaha ty: “Izikoa fa misy raha ratsy mahazo anaro, aza mivolan̈a fa ‘Zan̈ahary mitsapa jery fo io’, fotony Zan̈ahary tsy mety hatao ratsy, sady izy koa tsy man̈ano ratsy olo foeky, na azovy izy na azovy.” Dikanizen̈y tsy baka amy Zan̈ahary foeky mahavy raha ratsy jiaby hitanao mandalo io. (Vakia Joba 34:10-12.) Tsy izy mahavy raha ratsy jiaby io, fa izy fo tsy sakanany. Ino tsy mampitovy raha aroe zen̈y?

8, 9. a) Hazavà aminy ohatra ino tsy mampitovy mahavy raha ratsy ndreky tsy misakana raha ratsy? b)  Nan̈ino atsika tsy tokony han̈amia tsin̈y Zan̈ahary?

⁸ Karaha ataony lelahy misain̈y ndreky tia zanaka in̈y fo raha ataony Zan̈ahary. Tsaiky io koa fa be, tsy nan̈araka malony olobeny eky. Izy baka tio nanapakevitry hiala ry olobeny. Babany tsy nisakana izy handeha. Naditry izy tan̈y, ke nanjary sahiran̈a mare. Ke aminao, baka amy babany ma nahavy izy sahiran̈a sa baka amy jerinany tompiny? Tsy baka amy babany. (Lioka 15:11-13) Mira zen̈y koa Zan̈ahary. Izy tsy misakana olo han̈ano ny ratsy, izikoa zen̈y safidindro. Fa zen̈y tsy mivolan̈a fa baka aminany mahavy raha ratsy mahazo olo. Zen̈y koa mahavy atsika tsy tokony han̈amia tsin̈y izy amy raha ratsy mahazo atsika.

 ⁹ Zan̈ahary koa misain̈y ndreky ten̈a tia atsika. Matoa izy tsy misakana olo han̈ano ny ratsy, ao antony. Baka amy fitiavany atsika mahavy izy man̈ambara antonizio amintsika. Ho hainao zen̈y amy Toko faha-11 amy boky ty. Fa anao ndraiky matokisa fa tsy baka amy Zan̈ahary raha manahiran̈a atsika. Izy zaraiky fo mahavita man̈adoso raha jiaby mampijaly atsika io.—Isaia 33:2.

10. Nan̈ino atsika matoky fa mbala hadosony Zan̈ahary raha ratsy jiaby?

¹⁰ Zan̈ahary io masin̈y. (Isaia 6:3) Dikany masin̈y zen̈y madio, tsisy raha ratsy foeky momba izy. Ke Zan̈ahary zaraiky fo ten̈a mety hatokisan̈a. Izy tsy mora mivadiky karaha olombelon̈o. Olo ndray tsara fan̈ahy, tsy mahavita man̈adoso olo ratsy jiaby ambony tany. Zan̈ahary ndraiky manan̈a angovo mahavita zen̈y, fotony izy Farany Mahery. Zen̈y ankitin̈y raha handeha hataony.—Vakia Salamo 37:9-11.

11. a) Akory ma fahitany Zan̈ahary olo man̈ano ny ratsy? b) Akory ma fahitany Zan̈ahary jalinao?

¹¹ Akory ma fahitany Zan̈ahary raha mandalo ambony tany ty ndreky raha mahazo anao? Baiboly mampianatra fa Zan̈ahary “tia raha marin̈y.” (Salamo 37:28) Hitany raha jiaby mandalo ambony tany ty. Halany mahita olo man̈ano ny ratsy. Koran̈iny Baiboly fa tany ty feno olo nan̈ano ny ratsy taloha tan̈y. ‘Nalahelo mare Zan̈ahary’ tamy zen̈y. (Genesisy 6:5, 6) Zan̈ahary tsiary niova. (Malakia 3:6) Mbala malahelo fo izy mahita jalinolo ambony tany ty. Ten̈a tsy din̈iny mahita olo mijaly. Baiboly mivolan̈a karaha ty: “Izy mikarakara anaro.”—Vakia 1 Petera 5:7.

12, 13. a) Ino mahavy atsika tia olo? Man̈ano karakory atsika koa fa mahita olo mijaly? b) Ino mahavy atsika matoky fa mbala hadosony Zan̈ahary raha jiaby mampijaly atsika?

 ¹² Ino koa ivolan̈ana fa ten̈a tsy din̈iny Zan̈ahary mahita olo mijaly? Baiboly mampianatra fa Zan̈ahary koa fa niasa olombelon̈o, nataony misy itovizan̈a aminany. (Genesisy 1:26) Baka amy zen̈y mahavy atsika manan̈a toetry tsara. Anao koa mahita olo mijaly, anao mahinakinaka, sa karakory? Ndray atsika fo mahay mahinakinaka olo mijaly, ke intsaka eky Zan̈ahary!

¹³ Fitiavan̈a toetry farany tsara anan̈anolo. Baka amy Zan̈ahary nazahoantsika toetry io, fotony Baiboly mampianatra fa “Zan̈ahary io fitiavan̈a.” (1 Jaona 4:8) Zan̈ahary tia olo. Atsika koa nataony mahay tia olo. Anao koa nanan̈a angovo han̈adoso raha jiaby mampijaly olo, nadosonao sa karakory? Nadosonao, fotony anao mahinakinaka olo. Karaha zen̈y koa Zan̈ahary. Izy manan̈a angovo, sady izy koa mahinakinaka atsika. Izy han̈adoso raha jiaby mampijaly atsika. Raha jiaby koran̈iny amy pazy 4 ndreky 5 io tsy angano, fa raha ten̈a ho hisy ankitin̈y. Zan̈ahary tsy mavandy. Anao fo mila mahay izy tsarabe, amy zen̈y anao matoky izy.

14. Azovy ma an̈aran̈a Zan̈ahary? Nan̈ino ma anao tokony hampiasa izio?

¹⁴ Izikoa tianao hahazo naman̈a vaovao, ambaranao izy an̈aranao.  Sa karakory? Ke Zanahary ma misy an̈aran̈a? Maro fivavahan̈a mivolan̈a fa efa “Zan̈ahary” zen̈y edy an̈aranany. Zan̈ahary zen̈y tsy ten̈a an̈aranany fa fan̈ajan̈a izy fo, karaha ataony “sefo” na “panjaka” in̈y. Baiboly mampianatra fa Zan̈ahary io misy an̈arana. Jehovah an̈aranany. Amy Salamo 83:18 mivolan̈a karaha ty: “Baka olo jiaby mahay fa anao, araiky manan̈a an̈aran̈a Jehovah, anao zaraiky fo Farany An̈abo amy tany jiaby.” Maro Baiboly tsisy an̈aran̈a Jehovah io. Izikoa tianao ho hay antony, zahava Fan̈ampiny Fan̈azavan̈a, “Dikany An̈aran̈a Zan̈ahary Ndreky Fampiasan̈a Izio”. Tamy voanalohany nanoratan̈a Baiboly  tan̈y, mimpody im-7 000 an̈aran̈a Jehovah io. Hitantsika baka amy zen̈y fa tiany Jehovah anao hahay an̈aranany, ndreky hampiasa izio. Baiboly fitaovana ampiasainy Zan̈ahary han̈ambaran̈a raha momba izy.

15. Ino dikany an̈aran̈a Jehovah io?

¹⁵ Misy dikany nifidianany Zan̈ahary an̈aranany io. Dikany an̈aran̈a Jehovah io, izy mahavita man̈ano zay raha tiany hatao. Zay raha volan̈iny tsy maintsy vitany. * Tsisy olo mahaleo an̈aran̈a io. Maro koa raha mampiavaka Jehovah. Atsika hizaha sasany amy zen̈y.

16, 17. a) Ino ma dikany an̈aran̈a fan̈ajan̈a Jehovah: “Farany Mahery”? b) “Panjakany Mandrakizay”?, baka io d) “Pamoron̈o”?

¹⁶ Tamy Salamo 83:18 in̈y mivolan̈a fa Jehovah “zaraiky  fo Farany An̈abo amy tany jiaby.” Izy koa “Farany Mahery.” Aminy Apokalypsy 15:3 mivolan̈a karaha ty: “Jehovah, Zan̈ahary Farany Mahery, ten̈a mahalany fan̈ahy raha niasainao. Anao Panjakany Mandrakizay, raha jiaby ataonao marin̈y fo.” An̈aran̈a fan̈ajan̈a Jehovah “Farany Mahery” zen̈y mivolan̈a fa tsisy raha mahadin̈y angovonany. Jehovah koa “Panjakany Mandrakizay”, fotony izy zaraiky fo efa nisy letrizay ary mbala ho hisy fo. Zen̈y mahavy Salamo 90:2 mivolan̈a: “Anao efa Zan̈ahary fo letry taloha be tan̈y firaka izioty, ndreky aminy hoavy koa.” Mahagaga raha zen̈y, tsy zen̈y?

¹⁷ Tsisy raha mira Jehovah koa, fotony izy zaraiky fo Pamoron̈o. Jehovah niasa anjely, lakintan̈a ndreky raha jiaby andan̈itry an̈y. Izy koa niasa kakazo, loko, ndreky raha jiaby ambony tany ty. Zen̈y mahavy Apokalypsy 4:11 mivolan̈a karaha ty: “Anao zaraiky fo Jehovah man̈eva hahazo voninahitry, fan̈ajan̈a ndreky angovo, fotony anao niasa raha jiaby. Izikoa tsy anao, raha jiaby io tsisy.”

18. a) Ino mahavy olo sasany mieritreritry fa Zan̈ahary tsy mety haton̈iny? b) Ino fo raha ampianariny Baiboly?

¹⁸ Olo sasany koa fa mahay toetriny Jehovah, iro mavozo. Iro mieritreritry fa izy lavitry loatra, ke tsy mety haton̈iny foeky. Tsy zen̈y raha ampianariny Baiboly. Ambarany ao: “Jehovah io tsy lavitry atsika ­tsiaraikiaraiky.” (Asan’ny Apostoly 17:27) Baiboly mivolan̈a karaha ty: “Man̈aton̈a Zan̈ahary, fa izy han̈aton̈o anaro edy.”—Jakoba 4:8.

19. a) Ino raha voanalohany mila atao, izikoa tianao han̈aton̈o Zan̈ahary? Ino hatsaran̈a ho azontsika, izikoa atsika man̈ano zen̈y? b) Ino toetriny Zan̈ahary ten̈a tianao?

 ¹⁹ Karakory ma han̈aton̈antsika Zan̈ahary? Raha voanalohany mila atao, mianatra raha momba izy, karaha ataonao izioty. Jesosy nivolan̈a karaha ty: “Baka iro ho velon̈o tsisy farany, iro mila mianatra momba anao, Zan̈ahary tokana sady marin̈y, ndreky Jesosy Kristy irakanao.” (Jaona 17:3) Koran̈iny Baiboly fa ho “velon̈o tsisy farany” atsika, izikoa mianatra momba Jehovah ndreky Jesosy. Efa nianarantsika fa “Zan̈ahary io fitiavan̈a.” (1 Jaona 4:16) Mbala maro koa toetriny Jehovah koran̈iny Baiboly. Volan̈iny ao fa Jehovah io “Zan̈ahary mamindra fo, tsara fan̈ahy, tsy mora meloko sady be fitiavan̈a ndreky fahamarin̈ana.” (Eksodosy 34:6) Izy ‘tsara sady mamela heloko.’ (Salamo 86:5) Izy maharidraha. (2 Petera 3:9) Izy tsy mivadiky. (Apokalypsy 15:4) Arakaraka ny hamakianao Baiboly hahaizanao toetrinany aby io ndreky hitiavanao izy.

20-22. a) Ino ivolan̈ana fa atsika mahavita man̈aton̈o Zan̈ahary fo nata izy tsy hitantsika? b) Mety han̈ino ry namanao ndreky havanao, izikoa mahita anao mianatra Baiboly? Karakory tokony hataonao, izikoa misy raha zen̈y?

²⁰ Atsika tsy mahita Zan̈ahary, fotony izy fan̈ahy. (Jaona 1:18; 4:24; 1 Timoty 1:17) Fa izikoa anao mianatra Baiboly, ho hainao fa Zan̈ahary zen̈y ten̈a misy marin̈y. Ho mira panoratra Salamo amy Baiboly ao anao, ke hahita fa tsara Jehovah. (Salamo 27:4; Romanina 1:20) Arakaraka ny hianaranao momba Jehovah, hahavy anao hino fa misy izy. Hitombo koa fitiavanao izy, ke hanjary ho tsara fihavan̈ana aminany anao.

²¹ Hazava aminao dikany ivolan̈any Baiboly fa Jehovah io Babantsika. (Matio 6:9) Izy mira baba araiky ten̈a tia zanaka in̈y. Tiany atsika ho sambatra, fa tsy raha velon̈o  fo. (Salamo 36:9) Baiboly koa mampianatra fa atsika olombelon̈o mety manjary kamaradiny Zan̈ahary. (Jakoba 2:23) Tsy mba tianao hanjary kamaradiny Zan̈ahary niasa raha jiaby io?

²² Namanao sasany na havanao mety han̈ano raha tsy hianaranao Baiboly eky. Iro mavozo, tsao anao hiala amy fivavahan̈anao. Izikoa tianao hanjary kamaradiny Zan̈ahary, tohiza fo fianaranao Baiboly.

23, 24. a) Nan̈ino ma anao mila mazoto man̈ontany, koa fa mianatra? b) Ino raha hianarantsika amy Toko faha-2 amy boky ty?

²³ Anao koa vo mianatra, maro raha mety tsy hazava aminao, ke aza mavozo man̈ontany. Jesosy nivolan̈a fa atsika tokony hanetry ten̈a karaha ataony tsaiky, ke han̈ontany izikoa fa misy raha tsy mazava amintsika. (Matio 18:2-4) Tiany Zan̈ahary anao hahay izy tsarabe. Misy olo koran̈iny Baiboly nazoto nianatra raha momba Zan̈ahary. Iro nangala toky tsarabe hahaizan̈a fa ten̈a marin̈y raha nampianarin̈y iro.—Vakia Asan’ny Apostoly 17:11.

²⁴ Fianaran̈a Baiboly ten̈a ahaizan̈a Jehovah tsarabe. Hianarantsika amy Toko faha-2 amy boky ty fa Baiboly io tsy mira boky hafa.