1, 2. Mang fan nib fel’ ni ngaun fith ban’en?

GA MA guy rogon ni ma fith e bitir e deer? Boor i yad e ma fith ban’en u nap’an ni ka fini tabab i fil e thin. Yad ma fith ko: Mang fan e biney? Fa mang e ram? De mom ni ngam fulweg, ya ka ga ra pi’ e bin nth’abi fel’ e fulweg, maku ra gaar: Mang fan?

² Gathi goo piin bitir e ma fith ban’en. Nap’an ni gad ra ilal i yan ma ka gad ma fith boch ban’en. Gad ma rin’ ya ngad nanged e gin ni ngad sorgad ngay nge ngad pilo’gad ko riya’ ara ngad nanged e tin gad baadag ni ngad nanged. Machane, boor e girdi’ e kar talgad i fith e deer, nrib ga’ ni tin nib ga’ fan e deer. Ara kar talgad i gay e fulweg ko deer rorad.

3. Mang fan ni boor e girdi’ ndakir gay e fulweg ko pi deer nrib ga’ fan?

³ Mu lemnag fare deer ni bay u wuru’ e re ke babyor  ney ara pi deer ni bay u tabolngin e re ke babyor ney ara pi deer ni bay u tabolngin e re guruy ney. Pi deer ney e boch e deer nrib ga’ fan nrayog nim fith. Machane, boor e girdi’ ni ke pag i gay e fulweg ko pi deer ney. Mang fan? Bay e fulweg riy u lan e Bible, fa? Boch e girdi’ e ma lemnag nib mo’maw’ ni ngan nang fan e fulweg ko pi deer ney. Ma boch e be magar nri fith ban’en me tamra’. Ma boch e girdi’ e ke lemnag nib fel’ ni ngan pag ngak e pi tayugang’ ko teliw. Me gur, uw rogon u wan’um?

4, 5. Mang boch e deer nib ga’ fan ni gad ma lemnag yu ngiyal’? Mang fan ni ngad gayed e fulweg ko pi deer ney?

⁴ Dabisiy ni ga baadag ni ngam nang e fulweg u boch e deer ni bay rogon ko yafas nrib ga’ fan. Dabisiy ni bay yu ngiyal’ ni ga ma lemnag ko: ‘Mang fan e yafas? Kemus chi rogon e yafas aray? Ma uw rogon Got?’ Bfel’ ni ngam fith e deer ni bod e tiney, mab ga’ fan ndab mu tal i gay e fulweg riy nge taw ko ngiyal’ ni kam pirieg e fulweg riy nib fel’ ma rayog ni ngam pagan’um ngay. Jesus Kristus ni fare sensey nth’abi fel’ e gaar: “Mu ninged, me yog ngomed; mu gayed mi gimed pirieg; mu tugtuguyed e mab, min bing e mab ngomed.”​—Matthew 7:7.

⁵ Faanra um ‘gay’ e fulweg ko deer nib ga’ fan, ma rra fel’ rogom riy. (Proverbs 2:1-5) Demtrug ko mang e ke yog boch e girdi’ ngom ma bay e fulweg riy nrayog nim pirieg u Bible. Pi fulweg nem e de mo’maw’ ni ngan nang fan, ma kab gel e fel’ riy ya ma yibnag e athap nge felfelan’, ma ra ayuwegem ni nge fel’ rogon e yafas rom e chiney. Machane som’on e ngad weliyed reb e deer ni boor e girdi’ ni ma lemnag.

6. Mang fan ni boor e girdi’ ni ma lemnag ndariy fan e girdi’ nge gafgow rorad u wan’ Got?

⁶ Boor e girdi’ e ma lemnag nder ma runguydad Got ma dariy fadad u wan’. Yad ma lemnag ni: ‘Faan manga bay fadad u wan’ Got ma ra thil rarogon e fayleng.’ Ya chiney e gad ra sap u fayleng i yan ma ke yoor e mahl, ma ke gel e fanenikan nge gafgow, ma gad ma m’ar, ma be yim’ e girdi’ nib muun e piin nib t’uf rodad ngay. Ere boor e girdi’ ni be lemnag ni: ‘Faan manga bay fadad u wan’ Got nge magawon rodad, ma gathi ra taleg e pi n’ey ndab ki buch?’

7. (a) Uw rogon ni ke k’aring e pi tamachib ko teliw e girdi’ kar lemnaged nder runguydad Got? (b) Mang e be yog e Bible u murung’agen e pi skeng ni ma yib ngodad?

⁷ Magawon riy e yu ngiyal’ e ma fil e pi tamachib ko teliw boch ban’en ko girdi’ nde puluw, ere aram fan ni ma lemnag e girdi’ nder runguy Got e girdi’. Uw rogon? Nap’an nra yib e gafgow nib gel, mi yad yog ni aram rogon nib m’agan’ Got ngay. Me yan i aw ni ka ron’ed e kireb nga daken Got ko pi gafgow nem ni ke buch. Aram e tin riyul’ u murung’agen Got, fa? Mang e n’en ni be yog e Bible? Bay e fulweg riy ko James 1:13 ni gaar: “Faanra yib e mit nem e skeng ngak be’ nrayog ni nge waliy faanem nge denen, ma thingari dabi gaar u laniyan’, ‘Re n’ey ni be n’en ni nge waliyeg nggu denen e yib rok Got.’ Ya dariy ban’en nib kireb nrayog rok ni nge yan i guy rogon nge waliy Got nge denen, mi Got e der rin’ ngak be’.” Ere gathi Got tapgin e kireb ni ga be guy u fayleng. (Mu beeg e Job 34:10-12.) Riyul’ ni ma pag  Got ni nge yib e kireb. Machane ba thil e bin baaray ni ngan pag ban’en nge buch nge bin baaray ni ngan k’aring ban’en nge buch.

8, 9. (a) Uw rogon ni kan susunnag e n’en nib thil u thilin e bin ni nge pag Got e kireb ni nge buch nge bin ni ir e be k’aring? (b) Mang fan nde fel’ ni nga dogned nib kireb Got ni bochan e ke pag e girdi’ yad be rin’ e kireb?

⁸ Bod ba matam nib gonop ni bay ba pagel ni fak nib t’uf rok ni ke ilal ma ka be par u tabinaw. Nap’an nra tabab ko togopuluw me lemnag ni nge chuw u tabinaw ma dabi taleg fare matam. Me yan fare pagel me lek kanawoen e kireb me yib e gafgow ngak. Gur, fare matam e ir e ke k’aring e magawon ngak fak? Danga’. (Luke 15:11-13) Ere arrogon nder taleg Got e girdi’ u nap’an ni yad ra mel’eg ni nga ranod u kanawoen e kireb. Machane gathi ir e ma k’aring urngin e magawon ni ma sum ni bochan e n’en ni kar mel’eged. Ere de puluw ni nga nog nib kireb Got ni bochan e oloboch ko girdi’.

⁹ Bay fan ni ke pag Got e girdi’ yad be rin’ e kireb. Bochan ni Ir e Sunmiy urngin ban’en mab gonop mab gel gelngin ma de t’uf ni nge yog fan ngodad, machane ke rin’ ni bochan e gad ba t’uf rok. Ga ra fil boch i fan e pi n’ey ko Guruy ni 11. Machane dab mu pagtalin ni gathi Got tapgin urngin e magawon rodad. Ya ir e ke pi’ e athap ngodad nra pithig e pi magawon rodad!​—Isaiah 33:2.

10. Mang fan ni nge pagan’dad nrayog rok Got ni nge chuweg urngin e gafgow ni ke sum ni bochan e kireb?

¹⁰ Got e ba thothup. (Isaiah 6:3) Fan e re bugithin ney e ba machalbog mab beech ma dariy e kireb rok. Ere rayog ni nge pagan’dad ngak. Dabiyog ni nge  pagan’dad ko girdi’ ya yu ngiyal’ e darur yul’yul’gad. Mus ko girdi’ nib yul’yul’ ni yad ma yog e thin e dabiyog rorad ni ngar yal’uweged e kireb ni be rin’ e girdi’. Machane, Got e rib gel gelngin. Rayog rok ni nge chuweg urngin e gafgow ni ke sum ni bochan e girdi’ nib kireb. Nap’an nra rin’ ma ra rin’ u reb e kanawo’ nra chuweg e kireb ni manemus!​—Mu beeg e Psalm 37:9-11.

11. (a) Uw rogon e tin de mat’aw u wan’ Got? (b) Uw rogon u wan’ Got e gafgow ni ga be tay?

¹¹ Uw rogon u wan’ Got e pi n’en ni be buch u fayleng nge pi n’en ni be buch rom e chiney? Be yog e Bible ni Got e “ba t’uf rok e tin nib mat’aw.” (Psalm 37:28) Ere ri ma lemnag e tin nib mat’aw nge tin de mat’aw. Ma fanenikay urngin e tin nde mat’aw. Be yog e Bible ni “taganan’” Got u nap’an ni sug e fayleng ko kireb kakrom. (Genesis 6:5, 6) Got e dawori thil. (Malaki 3:6) Ka be kireban’ ni be guy urngin e gafgow u fayleng i yan. Ma dabun ni nge guy ni be gafgow e girdi’. Be gaar e Bible: “Be lemnag rogomed.”​—Mu beeg e 1 Peter 5:7.

12, 13. (a) Mang fan ni bay fel’ngidad nib fel’ ni bod e t’ufeg? Bochan ni bay e t’ufeg rodad ma uw rogon u wan’dad e gafgow nge tin de mat’aw ni be buch? (b) Mang fan nrayog ni nge mich u wan’um nra pithig Got e magawon u fayleng?

¹² Uw rogon nrayog ni nge mich u wun’dad ndabun Got ni nge guy e girdi’ ni be gafgow? Baaray e n’en nra micheg. Be yog e Bible nni sunmiy e girdi’ ni bod yaan Got. (Genesis 1:26) Ere, aram fan ni bay pi fel’ngin Got rodad. Bod ni, ga ra guy e girdi’ ni  yad be gafgow, ma gathi ra kireban’um ngorad? Faanra ga be runguy e girdi’ ni aram rogon, me ere Got e ri kab gel e runguy rok ngorad.

¹³ Reb e ban’en nth’abi fel’ ni bay ko girdi’ e aram e t’ufeg. Re t’ufeg ney e sum rok Got. Be yog e Bible ni “Got e t’ufeg.” (1 John 4:16) Gad ma t’ufeg e girdi’ ya bay e t’ufeg rok Got. Gur, ra k’aringem e t’ufeg ni ngam taleg e gafgow nge tin de mat’aw u fayleng? Faan manga bay gelngim ni ngam rin’, ma ga ra rin’ fa danga’? Dabisiy ni ga ra rin’! Ere rayog ni nge mich u wan’um nra chuweg Got e gafgow nge tin de mat’aw. Fapi n’em ni kan micheg u tabolngin e re ke babyor ney e gathi ba lik’ay fa ba athap ndariy angin. Tin ke micheg Got e ba mudugil nra riyul’! Machane, ra nge mich u wan’um e pi n’em mab t’uf ni ngkum nang boch murung’agen e bin riyul’ e Got.

14. Mini’ fithingan Got? Mang fan ni nga u dogned fithingan Got?

¹⁴ Faanra ga baadag ni nge nangem be’, ma mang e ga ra rin’? Gathi ga ra yog fithingam ngak? Bay fithingan Got fa dariy? Boor raba’ e teliw e ma yog ni fithingan Got e “Got” ara “Somol” machane gathi ba ngachal e gali bugithin ney, ya fan e gal bugithin ney e liw ni bod e “pilung” nge “togta.” Be yog e Bible ni boor e liw rok Got. Ma aram e “Got” nge “Somol” e ku l’agruw e liw rok. Maku be yog e Bible ni bay fithingan Got, ni Jehovah. Be gaar e Psalm 83:18, NW: “Nge nangem e girdi’ ni fithingam e Jehovah ni gur e  Th’abi Tolang u ga’ngin yang e fayleng.” Faanra dariy e re ngachal nem u lan e Bible rom, ma rayog ni ngam guy fare article ni bay ko Yugu Boch e Thin ni kenggin e “Rogon i Yog Fithingan Got nge Fan,” ya nge yag nim nang ko mang fan ndariy. Ere, baadag Jehovah ni ngam nang fithingan ma nga u mog. Be fanay e Bible ni nge yog ngom ko ir mini’.

15. Mang fan fare ngachal ni Jehovah?

¹⁵ I tunguy Got ba ngachal ngak ni boor fan. Ngachal rok ni Jehovah e be yip’ fan nrayog rok ni nge lebguy urngin ban’en nra micheg, ma rayog ni nge rin’ urngin ban’en nib m’agan’ ngay. * Yigoo Got e bay e re ngachal nem rok ma dariy reb e ngachal ni taareb rogon ngay. Re ngachal nem e kemus ni yigoo Got e fan ngak. Boor e kanawo’ nib thil Jehovah riy. Uw rogon nib thil?

16, 17. Mang e rayog ni ngad nanged u murung’agen Jehovah ko pi liw rok ni: (a) ‘Gubin ma Rayog Rok’? (b) “Pilung nde sum”? (c) ‘En Tasunmiy’?

¹⁶ Kad beeged u Psalm 83:18, NW murung’agen Jehovah ni  gaar: “Gur e Th’abi Tolang.” Maku arrogon ni yigoo Jehovah e ka nog ni ‘Gubin ma Rayog Rok.’ Be gaar e Revelation 15:3: “Somol ni Got, ni Gubin ma Rayog Rom, rib sorom nga rogon feni fel’ e ngongol rom! Me gur e pilung rok gubin e nam [“Pilung nde sum,” NW], rib mat’aw ma ba riyul’ e tirom e kanawo’!” Fare liw ni ‘Gubin ma Rayog Rok’ e be fil ngodad ni Jehovah e th’abi gel gelngin ma dariy ban’en ni taareb rogon gelngin ngak. Ma fare liw ni “Pilung nde sum” e be fil ngodad ni dariy be’ ni  bod Jehovah. Kemus ni goo ir e dan sunmiy. Be gaar e Psalm 90:2: “Gur e Got ndabi math biid, nda mu sum ma dariy e rofen ni ga ra mus.” Gathi yira ngat ko re n’em?

¹⁷ Ku dariy ban’en ni taareb rogon ngak Jehovah ya kemus ni yigoo ir e En Tasunmiy. Be gaar e Revelation 4:11: “Somol romad ma Got romad! Ba’ rogom ni nga nog e sorok ngom, min ta’ fam, ma ba’ rogom ni nge mil suwon urngin ban’en ngom.  Yi gur e mu sunumiy urngin ban’en, yi gur e mu lemnag mi yad sum ni yad ba fas.” Urngin ban’en ni ga ra lemnag, ni tabab ko pi kan nu tharmiy ndanir guyrad nge mada’ ko pi t’uf u lan e lang nge wom’engin e gek’iy nge nig u maday nge maran, ma gubin ni bay ni bochan e ke sunmiy Jehovah!

18. Mang fan ni ma lemnag boch e girdi’ ni dabiyog ni ngar chugurgad ngak Got? Mang e be fil e Bible u murung’agen e re n’ey?

¹⁸ Ma rus boch e girdi’ ni yad ma beeg murung’agen pi fel’ngin Jehovah ni yima ngat ngay. Yad ma rus ya kaygi mal’af Jehovah rorad, ma dabiyog ni ngar chugurgad ngak ara nge yib farad u wan’ ba Got ni aram rogon. Machane ba puluw ni ngan lem ni aram rogon, fa? Rib thil nga rogon murung’agen Jehovah ni be yog e Bible ni gaar: “Bin riyul’ riy e dariy bagadad nib mal’af Got rok nga orel.” (Acts 17:27) Maku be yog e Bible ni gaar: “Mu chugurgad ngak Got, me chugur ngomed.”​—James 4:8.

19. (a) Uw rogon mag chugur ngak Got, ma mang fel’ngin nra yib ngom? (b) Mang boch i fel’ngin Got nri ga baadag?

¹⁹ Ra diin mag chugur ku Got? Som’on e ngaum rin’ e n’en ni ga be rin’ e chiney ni aram e ga be fil murung’agen Got. I gaar Jesus: “Baara’ ira’ e yafos ndariy n’umngin nap’an: ni aram e nge nangem e girdi’ ni kari mmus ni gur e bin riyul’ e Got, mi yad nang ko mini’ Jesus Kristus, ni ir e kam l’og ke yib.” (John 17:3) Arrogon, be yog e Bible nra yag e “yafos ndariy n’umngin nap’an” ngom ni faan ga ra fil  murung’agen Jehovah nge Jesus. Kad weliyed faram ni: “Got e t’ufeg.” (1 John 4:16) Ku bay boch i fel’ngin Got. Be yog e Bible ni Jehovah e ir ‘fare Got nri ma runguy e girdi’ ma ma kireban’ ngorad, ma de machreg ni ma yib e puwan’ ngak, ma ma t’ufeg e girdi’ ma ma yul’yul’ ngorad.’ (Exodus 34:6) Ba ‘gol ma ma n’ag fan e kireb.’ (Psalms 86:5) Got e ma gum’an’nag ir. (2 Peter 3:9) Ra um beeg e Bible ma ga ra pirieg rogon ni ke dag Jehovah e pi fel’ngin ney nge ku boch i fel’ngin ni ka bay.

20-22. (a) Rayog ni ngad chugurgad ngak Got ni yugu aram rogon ni dabiyog ni ngad guyed, fa? Mu weliy rogon. (b) Mang e ra yog boch e girdi’ ngom, ma mang e ba fel’ ni ngam rin’?

²⁰ Riyul’ ni dabiyog ni ngam guy Got nga owchem ya ba Kan ni dabiyog ni ngan guy. (John 1:18; 4:24; 1 Timothy 1:17) Machane rayog ni ngam nang murung’agen Jehovah u lan e Bible. Bod ni yog faen ni yoloy e Psalm nrayog ni nge “felan’um nga feni fel’ Somol.” (Psalm 27:4; Roma 1:20) Ra yoor ban’en ni ga ra fil u murung’agen Jehovah ma ra riyul’ Jehovah u wan’um ma ra t’uf rom mag chugur ngak.

²¹ Munmun ma ga ra nang ko mang fan ni be fil e Bible ngodad ni Jehovah e bod e Chitamangidad. (Matthew 6:9) Gathi kemus ni ke pi’ e yafos ngodad, ya ku baadag ni nge yag e bin th’abi fel’ e yafos ngodad ni bod rogon ba matam ni ma t’ufeg pi fak. (Psalm 36:9) Maku be fil e Bible ngodad nrayog ni nge fager e girdi’ ngak Got. (James 2:23) Rayog ni ngam mang fager rok e En ni Sunmiy urngin ban’en!

²² Nap’an ni ga be fil boch ban’en u Bible ma bay  e girdi’ nra guy rogon ni nge talegnem ndab kum fil e Bible ya sana yad be magar nri thil e michan’ rom. Machane dab mu pag be’ nge talegnem ni nge dabi yag e bin th’abi fel’ e fager ngom.

23, 24. (a) Mang fan nthingar mu fith murung’agen e pi n’en ni ga be fil? (b) Mang e gad ra weliy ko bin migid e guruy?

²³ Dabisiy nra moy boch ban’en ndam nang ko som’on. Ba fel’ ni dab mu tamra’ ni ngam ning e ayuw, ya yog Jesus nib fel’ ni nge sobut’an’dad ni bod e bitir nib sobut’an’. (Matthew 18:2-4) Gad manang ni piin bitir e boor ban’en ni yad ma fith. Baadag Got ni ngam pirieg e fulweg ko deer rom. Be yog e Bible ni immoy boch e girdi’ nri yad baadag ni ngar filed murung’agen Got, ya ur gayed u lan e Babyor nib Thothup ni nge mich u wan’rad ko rriyul’ e tin kar filed fa danga’.​—Mu beeg e Acts 17:11.

²⁴ Bin th’abi fel’ e kanawo’ ni ngam fil murung’agen Jehovah riy e aram e ngam fil e Bible. Ba thil e Bible nga yu ken e babyor. Ni uw rogon? Yira weliy rogon nib thil ko bin migid e guruy.