1, 2. Yaan kʼiineʼ, ¿baʼaxten maʼalob u kʼáatchiʼitaʼal wa baʼax?

¿MÁASAʼ mejen paalaleʼ jach yaʼab u kʼáatchiʼitkoʼob máak? Yaʼabeʼ bey u beetik chéen pʼelak u káajal u tʼaaneʼ. Táanileʼ ku jach paktikechoʼob, tsʼoʼoleʼ ku kʼáatkoʼob: «¿Baʼaxten azul le kaʼanoʼ?», «¿Baʼaxten ku jóopbal le estrellaʼoboʼ?», «¿Máax kaʼans le chʼíichʼoʼob kʼaayoʼ?». Kex k-ilik núukik tiʼobeʼ, yaan oraeʼ maʼ k-kaxtik baʼax k-aʼaliktiʼob. Tak wa maʼalob bix t-núukil tiʼobeʼ, maʼ xaaneʼ jeʼel u kaʼa kʼáatkoʼobeʼ: «¿Baʼaxten túun...?».

² Maʼ chéen paalal suuk u kʼáatchiʼitkoʼob máakiʼ. Tak nukuch máakoʼob beetik beyoʼ, maʼ xaaneʼ utiaʼal u yojéeltkoʼob bix jeʼel u kʼuchloʼob wa tuʼuxeʼ, bix jeʼel u kanáantkubaʼob tiʼ wa baʼaxeʼ wa chéen utiaʼal u yojéeltkoʼob wa baʼax. Baʼaleʼ yaʼab máakeʼ ku pʼáatal maʼatech u kʼáatik mix baʼal, mix tak le baʼaloʼob jach unaj u yojéeltikoʼ, wa ku xulik u kaxtik u núukil.

3. ¿Baʼaxten yaʼab máakeʼ ku xulik u kaxtik u núukil le kʼáatchiʼob jach unaj u yojéeltaʼal u núukiloʼ?

 ³ Tuukulnen tiʼ le kʼáatchiʼ yaan tu táan le libroaʼ, tiʼ le ku chíikpajloʼob tu káajbaloʼ yéetel tiʼ le yanoʼob tu káajbal le xookaʼ. Leloʼobaʼ chéen jaypʼéel tiʼ le kʼáatchiʼob maas jach unaj u yojéeltaʼal u núukiloʼ. Baʼaleʼ yaʼab máakeʼ tsʼoʼok u xulik u kaxtik u núukil. ¿Baʼaxten? ¿Ku núukik wa le Biblia le kʼáatchiʼobaʼ? Ku núukik, baʼaleʼ yaan máaxeʼ ku yaʼalik talam u naʼataʼal bix u núukik. Yaan xaneʼ suʼlak u kʼáatoʼob tiʼ wa máax. Uláakʼoʼobeʼ ku tuklikoʼobeʼ le kʼáatchiʼobaʼ chéen jeʼel u núukaʼal tumen le máaxoʼob ku kaʼansajoʼob tiʼ Diosoʼ. Techeʼ, ¿bix a wilik?

4, 5. ¿Baʼax kʼáatchiʼiloʼob jach unaj k-beetik, yéetel baʼaxten kʼaʼabéet k-kaxtik u núukiloʼob?

⁴ Maʼ xaaneʼ, yaan kʼiineʼ techeʼ ka kʼáatik: «¿Baʼax oʼolal kuxaʼanoʼon? ¿Chéen wa utiaʼal síijil, chʼíijil yéetel kíimil? ¿Bix Dios?». Maʼalob ka beet le kʼáatchiʼobaʼ yéetel maʼ xulik a kaxtik u núukiloʼob. Utéenjeakileʼ Jesuseʼ tu yaʼalaj: «Kʼáatneneʼex, bíin tsʼaʼabak teʼex [...]; kaxanneneʼex, bíin a nuptáanteʼex; kʼoopneneʼex, bíin jeʼebek teʼex le jool najoʼ» (Mateo 7:7).

⁵ Wa teech maʼ tu xuʼulul a kaxtik u núukil le kʼáatchiʼobaʼ, yaan a kaxtikoʼob (Proverbios 2:1-5). Kex jeʼel baʼaxak ka aʼalaʼaktecheʼ, le kʼáatchiʼobaʼ yaan u núukiloʼob yéetel jeʼel u páajtal a wojéeltikeʼ. U núukiloʼobeʼ tiaʼan teʼ Bibliaoʼ yéetel maʼ talam u naʼataʼaliʼ. U maas maʼalobileʼ, u núukiloʼobeʼ ku taasiktoʼon kiʼimak óolal yéetel ku yáantkoʼon k-bis upʼéel maʼalob kuxtal. Koʼox ilik upʼéel kʼáatchiʼ ku beetaʼal tumen yaʼab máakoʼob.

6. ¿Baʼaxten yaʼab máax tuklikeʼ Dioseʼ baʼaliʼ u kʼáat tiʼ u muʼyaj máakeʼ?

⁶ Yaʼabeʼ bey u tuklik. Ku yaʼalikoʼobeʼ, wa Dios ka u yil  u yáantkoʼoneʼ, bejlaʼa yaanal bix yanikoʼoneʼ. Le yóokʼol kaabaʼ chuup yéetel baʼateloʼob, pʼekbai yéetel muʼyajil. Tuláakloʼon k-kʼojaʼantal, k-muʼyaj yéetel ku kíimil máaxoʼob k-yaabilmaj. Le oʼolal yaan máaxoʼob aʼalik: «Wa Dios u yaabiltmoʼoneʼ, bejlaʼa úuch u luʼs tuláakal le talamiloʼobaʼ».

7. 1) ¿Baʼaxten k-aʼalikeʼ yaʼab máaxoʼob unaj u kaʼansajoʼob tiʼ Dioseʼ tsʼoʼok u beetkoʼob u tuklaʼal jach kʼasaʼan Dios? 2) ¿Baʼax ku kaʼansik le Biblia tu yoʼolal k-muʼyajiloʼoboʼ?

⁷ U maas kʼaasileʼ, yaʼab tiʼ le máaxoʼob unaj u kaʼansajoʼob tiʼ Diosoʼ tsʼoʼok u beetkoʼob u tuklaʼal jach kʼasaʼan Dios. Ken úuchuk upʼéel nojoch loobeʼ, ku yaʼalkoʼobeʼ bey u kʼáat Dios ka úuchkoʼ. Bey ka u yaʼaloʼob letiʼ beetik u yúuchleʼ. Baʼaleʼ ¿jaaj wa? ¿Baʼax jach tu jaajil ku kaʼansik le Bibliaoʼ? Santiago 1:13 ku núukik: «Le ken túuntaʼak u yóol máak[eʼ] [...], maʼ unaj u tukultik wa Jajal Dios máax túuntik u yóoliʼ; tumen Jajal Dioseʼ maʼ tu túuntaʼal u yóol tumen le kʼaasoʼ, mix letiʼ ku túuntik u yóol mix máak». K-ilik túuneʼ maʼ Dios beetik u yúuchul le kʼaas ku yilaʼal way yóokʼol kaabeʼ (Job 34:10-12). Ku chaʼik u yúuchul baʼaloʼob kʼaastak, baʼaleʼ maʼ u kʼáat u yaʼal wa letiʼ beetik u yúuchliʼ.

8, 9. 1) ¿Bix jeʼel a ketik utiaʼal a weʼesik maʼ Dios beetik u yantal le muʼyajiloʼoboʼ? 2) ¿Baʼaxten maʼ unaj k-tuklik kʼasaʼan Dios úuchik u chaʼik tiʼ wíinik ka u bis upʼéel bej maʼ maʼalobiʼ?

⁸ Koʼox ketik yéetel utúul utsul taatatsil jach yaan u naʼat tiʼ kajaʼan u táankelem hijo tu yéeteleʼ. U hijoeʼ ku pʼáatal maʼ tu yuʼubik tʼaan yéetel ku yaʼalik u jóokʼol tu yotoch; le taatatsil túunoʼ ku chaʼik u bin. Le hijotsiloʼ ku kʼastal bix u kuxtal yéetel ku yokskuba tiʼ talamiloʼob. ¿Jeʼel wa a waʼalik le taatatsil beet u yúuchul tiʼoʼ? ¿Máasaʼ maʼ? (Lucas 15:11-13.) Dios xaneʼ tsʼoʼok u chaʼik tiʼ wíinik ka u bis upʼéel bej maʼ maʼalobiʼ, baʼaleʼ maʼ letiʼ beetik u yantal le talamiloʼob tu juunal wíinik kaxtikoʼ. K-ilik  túuneʼ maʼ maʼalob ka k-tsʼáa u kuuch Dios yoʼolal le muʼyajiloʼob ku máansik wíinikoʼ.

⁹ Dioseʼ yaan baʼax oʼolal ku chaʼik tiʼ wíinik ka u bis upʼéel bej maʼ maʼalobiʼ. Letiʼeʼ maʼ unaj u yaʼaliktoʼon baʼaxten ku chaʼikiʼ, tumen letiʼ beetmailoʼon, yéetel jach yaan u naʼat yéetel u páajtalil. Baʼaleʼ yoʼolal u yaabilajeʼ, ku yaʼaliktoʼon baʼaxten. Tu 11 xookil le libroaʼ tiʼ ken k-il baʼaxten ku chaʼik tiʼ wíinik ka u bis upʼéel bej maʼ maʼalobiʼ, baʼaleʼ maʼ letiʼ beetik u yantal le talamiloʼoboʼ. Baʼaxeʼ chéen letiʼ jeʼel u yutskíintikoʼobeʼ (Isaías 33:2).

10. ¿Bix k-ojéeltik Dioseʼ yaan u luʼsik tuláakal le muʼyaj tsʼoʼok u taasik le kʼasaʼaniloʼ?

¹⁰ Dios xaneʼ santo (Isaías 6:3). Lelaʼ u kʼáat u yaʼaleʼ jach minaʼan mix upʼéel kʼaas ichil tiʼ letiʼ. Le oʼolal jeʼel u páajtal k-jach kʼubik óol tiʼ letiʼeʼ. Baʼaleʼ tiʼ wíinikoʼobeʼ maʼatech, tumen yaan oraeʼ ku kʼastaloʼob. Mix tak le maas maʼalob gobernante jeʼel u páajtal u yutskíintik le kʼaas ku beetik le kʼasaʼan máakoʼoboʼ. Baʼaleʼ Dioseʼ minaʼan u xuul u páajtalil. Yaan u luʼsik tuláakal le muʼyaj ku taasik le kʼasaʼaniloʼ. Ken u beeteʼ, yaan u xuʼulsik upuliʼ le kʼaasoʼ (Salmo 37:9-11).

11. 1) ¿Bix u yilik Dios le kʼaas ku beetaʼaloʼ? 2) ¿Baʼax ku yuʼubik Dios ken u yil k-muʼyaj?

¹¹ Dioseʼ, ¿bix u yuʼubikuba yoʼolal le baʼaxoʼob ku yúuchul way yóokʼol kaab yéetel yoʼolal baʼaxoʼob ku yúuchultoʼoneʼ? Le Bibliaoʼ ku yaʼalikeʼ Dioseʼ u yaabiltmaj baʼax uts (Salmo 37:28). Letiʼeʼ jach táan u yilik wa maʼalob baʼax ku beetaʼal, yéetel u pʼekmaj tuláakal baʼax kʼaas. Tu kʼiiniloʼob Noeiʼ, Dioseʼ «yajchaj tu yóol» u yilik chuʼup le yóokʼol kaab yéetel kʼaasoʼ (Génesis 6:5, 6). Dioseʼ maʼ kʼexpajak u tuukuliʼ (Malaquías 3:6). Láayliʼ  u pʼekmaj le kʼaasoʼ yéetel ku chʼaʼik óotsilil tiʼ máax ku muʼyaj. Le Bibliaoʼ ku yaʼalik ka k-pʼat tuláakal k-muʼyajiloʼob tu kʼab Dios, «tumen letiʼeʼ u tsʼaamaj u yóol u kanáant[oʼon]» (1 Pedro 5:7).

12, 13. 1) ¿Baʼaxten ku páajtal k-eʼesik jatsʼuts modos, jeʼex le yaabilajoʼ? 2) Le yaabilajoʼ, ¿baʼax jeʼel u túulchʼinkoʼon k-beeteʼ? 3) ¿Bix k-ojéeltik Dioseʼ yaan u xuʼulsik tuláakal muʼyajil?

¹² ¿Baʼax oʼolal uláakʼ ku yaatal tu yóol Dios u yilik k-muʼyaj? Le Bibliaoʼ ku yaʼalikeʼ Dioseʼ tu beetaj wíinik jeʼel bix letiʼeʼ (Génesis 1:26). Le oʼolal yantoʼon utsul modos, tumen Dioseʼ uts u modos. ¿Ka chʼaʼik wa óotsilil ken a wil u muʼyaj máaxoʼob mix baʼal u beetmoʼob? Wa teech ku yaatal a wóoleʼ, Dioseʼ maas ku yaatal u yóol.

¹³ Upʼéel baʼax jach maʼalob ku páajtal u beetik wíinikeʼ u yeʼesik yaakunaj. Tiʼ lelaʼ chíikaʼanoʼon xan tiʼ Jéeoba, tumen le Bibliaoʼ ku yaʼalikeʼ «Dioseʼ yaakunaj» (1 Juan 4:8). K-yaakunaj, tumen Dioseʼ ku yaakunaj. Wa ka yanaktech u páajtalil a xuʼulsik tuláakal muʼyaj bey xan baʼax maʼ maʼalobeʼ, ¿jeʼel wa a beetik yoʼolal a yaakunajeʼ? ¿Máasaʼ jeʼeleʼ? Dios xaneʼ, yoʼolal u yaakunajeʼ, yaan u xuʼulsik tuláakal muʼyajil. Le baʼaxoʼob u yaʼalmaj u beetik ku yeʼesaʼal teʼ táan juʼun 4 yéetel 5, maʼ chéen tsikbaliʼ: letiʼ aʼalik u beetik, yéetel yaan u béeykuntik. Baʼaleʼ utiaʼal k-oksaj óoltik jach jaaj yaan u béeytaleʼ, kʼaʼabéet k-kʼaj óoltik Dios tubeel.

14. ¿Bix u kʼaabaʼ Dios, yéetel baʼaxten kʼaʼabéet u meyajtoʼon?

¹⁴ Wa a kʼáat ka kʼaj óoltaʼakech tumen wa máaxeʼ, ¿máasaʼ jeʼel a waʼalik a kʼaabaʼ tiʼeʼ? Kux túun Dios, ¿yaan wa u kʼaabaʼ? Yaʼab religionoʼobeʼ ku kaʼanskoʼobeʼ u kʼaabaʼ bineʼ «Dios» wa «Yuumtsil», baʼaleʼ leloʼobaʼ maʼ kʼaabaʼobiʼ. Chéen tsikbeʼen tʼaanoʼob, jeʼex le tʼaan «jalaʼach» wa «presidente». Le Bibliaoʼ ku yeʼesikeʼ Dioseʼ yaʼab bix u tʼaʼanal. Ku yaʼalaʼal «Dios» yéetel «Yuumtsil» tiʼ. Baʼaleʼ le Bibliaoʼ ku yeʼesikeʼ u kʼaabaʼeʼ Jéeoba. Salmo 83:18 (Nuevo Mundo, NM) ku yaʼalik: «A kʼaabaʼeʼ Jéeoba,  chéen teech u Sen Kaʼanlil yóokʼol tuláakal le luʼumaʼ». Wa ta Biblia maʼ tu chíikpajal le kʼaabaʼaʼ, ilawil baʼax ku yaʼalik le tipʼaʼanil «U kʼaabaʼ Dios: baʼaxten unaj u meyajtoʼon yéetel baʼax u kʼáat u yaʼale». U kʼaabaʼ Dioseʼ yaʼab utéenel ku chíikpajal teʼ yáax Bibliaʼob tsʼíibtaʼaboʼ. Jéeobaeʼ u kʼáat ka kʼaj óoltaʼak u kʼaabaʼ yéetel ka chʼaʼachiʼitaʼak, le oʼolal ku yaʼaliktoʼon u kʼaabaʼ teʼ Bibliaoʼ.

15. ¿Baʼax u kʼáat u yaʼal le kʼaabaʼ Jéeoba?

¹⁵ Jach nojoch baʼax u kʼáat u yaʼal le kʼaabaʼ tu yéeyaj Dios u tiaʼaloʼ. Ku tsʼáaik naʼatbil ku páajtal u béeykuntik tuláakal baʼax ku yaʼalik. * Minaʼan uláakʼ kʼaabaʼ jeʼex tiʼ letiʼoʼ. Chéen letiʼ unaj u bisik le kʼaabaʼaʼ. U jaajileʼ, minaʼan uláakʼ dios jeʼex Jéeobaoʼ. Koʼox ilik baʼax oʼolal k-aʼalik lelaʼ.

16, 17. Baʼax ku kaʼansiktoʼon yoʼolal Jéeoba u yaʼalaʼal: 1) «yaan tuláakal páajtalil» tiʼ. 2) «minaʼan u xuul». 3) letiʼ beetmil tuláakal baʼal.

 ¹⁶ Le Salmo 83:18 ku yaʼalik yoʼolal Jéeoba: «Chéen teech u Sen Kaʼanlil yóokʼol tuláakal le luʼumaʼ». Chéen xan tiʼ letiʼ ku yaʼalaʼal «yaan tuláakal páajtalil» tiʼ. Apocalipsis 15:3 ku yaʼalik: «Nojoch yéetel jakʼbeʼen tuláakal baʼax a beetmaj, Yuumtsil[,] Jajal Dios tiʼ máax yaan tuláakal páajtalil». Lelaʼ u kʼáat u yaʼaleʼ mix máak jeʼel u páajtal u ketik u muukʼ yéetel Jéeobaeʼ, letiʼ yaan yóokʼol tuláakal. Romailoʼob 16:26 ku yaʼalik xaneʼ Jéeobaeʼ «minaʼan u xuul». Lelaʼ u kʼáat u yaʼaleʼ chéen letiʼ tsʼoʼok u yantal mantatsʼ. Salmo 90:2 ku yaʼalik: «Tiʼ le kʼiinoʼob [...] máanjaʼanoʼoboʼ tak tiʼ le kʼiinoʼob ku taalbaloʼoboʼ [wa utiaʼal minaʼan u xuuleʼ], teech [Diosech]». Chéen k-tuklik lelaʼ, ¿máasaʼ ku beetik u jaʼakʼal k-óol?

¹⁷ Yaan uláakʼ baʼax oʼolal minaʼan uláakʼ dios jeʼex Jéeobaoʼ: letiʼ beetmil tuláakal baʼal. Apocalipsis 4:11 ku yaʼalik: «Yuumtsil yéetel k-Jajal Dios, techeʼ [ka] náajmatik a kʼamik nojbeʼenil, tsiikil bey xan páajtalil; tumen teech ta beetaj tuláakal baʼaloʼob, tu yoʼolal a wóolajeʼ yanoʼob yéetel j-beetaʼaboʼob». Jéeoba beetmil le angeloʼoboʼ, le estrellaʼoboʼ, u yich le cheʼoboʼ, le kayoʼob yanoʼob ichil le jaʼoboʼ, yéetel tuláakal baʼal yaan.

18. ¿Baʼaxten yaan máaxeʼ ku tuklik maʼ tu páajtal u natsʼkuba tiʼ Dios, baʼaleʼ baʼax ku yaʼalik le Bibliaoʼ?

¹⁸ Yaan máax ku wéej sajaktal yoʼolal le jakʼ óolal baʼaloʼob ku yaʼalik le Biblia yoʼolal Jéeobaoʼ. Tumen jach yaan u páajtalileʼ ku tuklikoʼob maʼ tu páajtal u natsʼkubaʼob tiʼ letiʼ, wa mix tu beetaʼal u cuentailoʼob. ¿Jaaj wa le baʼax ku tuklikoʼobaʼ? Le Bibliaoʼ ku yeʼesik maʼatech, tumen ku yaʼalikeʼ Jéeobaeʼ «maʼ náach yanil tiʼ [cada utúul] tiʼ toʼoniʼ» (Beetaʼanoʼob [Hechos] 17:27). Yéetel ku  yaʼaliktoʼon xan: «Natsʼabaʼex tiʼ Jajal Dios, letiʼ xaneʼ bíin u natsʼuba tiʼ teʼex» (Santiago 4:8).

19. 1) ¿Bix jeʼel u páajtal k-natsʼikba tiʼ Dioseʼ, yéetel baʼax utsil ken k-kʼame? 2) ¿Baʼax maas utstawich tiʼ bix Dios?

¹⁹ ¿Bix jeʼel u páajtal a natsʼkaba tiʼ Dioseʼ? Yáaxeʼ, maʼ xulik a kaambal tiʼ letiʼ. Jesuseʼ tu yaʼalaj: «Le kuxtal minaʼan u xuuloʼ letiʼ lelaʼ: ka u kʼaj óoltoʼob teech chéen juntúuliliʼ Jajal Dios, yéetel ka u kʼaj óoltoʼob Jesucristo le máax ta túuxtajoʼ» (Juan 17:3). Le Bibliaoʼ ku yaʼalikeʼ u kʼaj óoltaʼal Jéeoba yéetel Jesuseʼ ku bisaj tiʼ «kuxtal minaʼan u xuul». Tsʼoʼok k-kanikeʼ «Dioseʼ yaakunaj» (1 Juan 4:16). Baʼaleʼ Jéeobaeʼ yaʼab uláakʼ u jatsʼuts modos yaan. Le Bibliaoʼ ku yaʼalikeʼ «muun u puksiʼikʼal[,] ku chʼaʼa óotsilil, chúukaʼan yóol [wa maʼ tu jáan kʼuuxil], nojoch u yaakunaj bey xan u jaajil» (Éxodo 34:6). Ku tsʼáaik tiempo u kʼexik u tuukul máak (2 Pedro 3:9). Chúukaʼan u yaakunaj (Salmo 94:14). Jeʼex kun bin a maas kaambal tiʼ le Bibliaoʼ, yaan a wilikeʼ Jéeobaeʼ bey jeʼex tsʼoʼok aʼalikaʼ.

20-22. 1) ¿Jeʼel wa u páajtal k-natsʼikba tiʼ Dios kex maʼ tu páajtal k-ilkeʼ? Tsole. 2) Maʼ xaaneʼ, ¿baʼax jeʼel u yaʼaliktech yaanal máax yoʼolal u saajkil a kʼexik baʼax kaʼansaʼantech ta chichnileʼ, baʼaleʼ baʼax unaj a beetik?

²⁰ Maʼ tu páajtal k-ilik Dios tumen letiʼeʼ pixan (Juan 1:18; 4:24). Baʼaleʼ le Bibliaoʼ ku yeʼesik bix letiʼ. Jeʼex tu yaʼalil le salmistaoʼ, jeʼel u páajtal «[k-paktik] u kiʼichkelmil» Jéeobaeʼ (Salmo 27:4; Romailoʼob 1:20). Wa maʼ ta xulik a kaambal tiʼ Dioseʼ, yaan a wilik jach tu jaajil yaan, yaan xan a maas yaabiltik yéetel a wuʼuykaba naatsʼ tiʼ letiʼ.

²¹ Jujumpʼíitil kun bin a naʼatik baʼaxten ku yaʼalik le Biblia ka k-il Jéeoba bey k-Taatatsileʼ (Mateo 6:9). Maʼ chéen tu tsʼáaj k-kuxtaliʼ, u kʼáat ka kuxlakoʼon maʼalob. Letiʼeʼ bey jeʼex utúul utsul taatatsil u kʼáat ka kuxlak maʼalob u paalaleʼ (Salmo 36:9). Le Biblia xanoʼ ku yeʼesik  jeʼel u páajtal k-amigotik Jéeobaeʼ (Santiago 2:23). ¡Chéen tukle: techeʼ jeʼel u páajtal a amigotik le Máax beet tuláakal baʼaloʼ!

²² Jeʼex kun bin a maas kaambaleʼ, maʼ xaaneʼ yaan u yantal máax kun aʼaliktech ka pʼat a kaambal tiʼ le Bibliaoʼ. Maʼ xaaneʼ jeʼel u beetik tumen sajak a kʼexik baʼax kaʼansaʼantech ta chichnileʼ. Baʼaleʼ maʼ chaʼik tiʼ mix máak u beetik maʼ a biskaba yéetel Jéeoba, le maas maʼalob amigo jeʼel u yantaltechoʼ.

23, 24. 1) ¿Baʼaxten maʼ unaj a chʼaʼik saajkil a kʼáatik yoʼolal baʼax táan a kanikiʼ? 2) ¿Baʼax ken k-il tuláakʼ xookoʼ?

²³ Jeʼex kun bin a kaambaleʼ, yaan baʼaxoʼob maʼ ken a jáan naʼate. Baʼaleʼ maʼ chʼaʼik saajkil a kʼáatik áantaj. Jesuseʼ tu yaʼaleʼ kʼaʼabéet k-beetikba jeʼex utúul chan paaleʼ (Mateo 18:2-4). Jeʼex tsʼoʼok ilkoʼ, le mejen paalaloʼ yaʼab u kʼáatchiʼitkoʼob máak. Dioseʼ u kʼáat ka a kaxt u núukil a kʼáatchiʼob. Le Bibliaoʼ maʼalob u tʼaan tiʼ junmúuchʼ máakoʼob jach u kʼáat u kʼaj óoltoʼob Dios kaʼachi. Le oʼolal tu xakʼalxoktoʼob le Kiliʼich Tsʼíiboʼob utiaʼal u yilkoʼob wa jach jaaj le baʼax ku kankoʼoboʼ (Beetaʼanoʼob 17:11).

²⁴ Utiaʼal k-kʼaj óoltik Jéeobaeʼ kʼaʼabéet k-kaambal tiʼ le Bibliaoʼ, upʼéel libro maʼ jeʼex u maasileʼ. ¿Baʼax jelaʼankúuntik tiʼ u maasil? Lelaʼ le ken k-il tuláakʼ xookoʼ.