1, 2. Xidal ór, ¿xigony galán láani guinabdiitzno?

¿MA BIDUIDYLO cuent ximod mbioxien ranabdiitz guirá ór la? Xidalyibu rony láani órni rasaló raniʼ. Bisalóyenbu raduidy diitz que nainy layibu ganyibu né ranabdiitzyibu xidal cós xomod: «¿Xigony guibá azulni?», «¿Xigony racaptzaʼ vitzón?» «¿Chú bisuidy manybiguin goʼol?». Por más ni ronyno xtem par guicapyno layibu, diti radzelno xí guinino. Scú láani, ná racapytzayno, ndeʼ riné lóono a stoib galrranabdiitz: «¿Xigony?».

² Diti nosi mbioxien ranabdiitz. Conforma caniʼsno, láaca ranabdiitzno. Sigory ronyno ndeʼ par ganno ximod guidxinno toib lagary, láaca ranabdiitzno par diti guiabno ló desgrasy, o por ni násini lóono. Per ralooypani xidal buñ rasian ranabdiitz ni más rasac gann buñ. O rasian rayopyibu ximod rarexani.

3. ¿Xigony xidal buñ ma diti ná guiyopy ximod rarexa tipnés galrranabdiitz ni más rasac?

 ³ Bunysi pensary galrranabdiitz ni nap guiichlaidy libro reʼ, né ni sieed ro rasaló libro reʼ, o ro rasaló capítulo ni casuidyno. Ndeʼ nac tipnés galrranabdiitz ni más rasac gonyno. Ná scú nacní, xidal buñ ma diti rony por guidzel ximod rarexani. ¿Xigony? ¿Racapy la Biblia láani la? Xidal buñ rasac nagann guieen ni racapy la Biblia. Stipnés buñ ratoy, por ngú diti ranabdiitzyibu. Né noʼ stipnés buñ rasian guirá galrranabdiitz reʼ a guirá ni rasanir né mextra ni noʼ ló religión. Looy, ¿ximod nálo?

4, 5. ¿Xí ni ranabdiitzno ni más rasac, né xigony non guiyopyno ximod rarexani?

⁴ Nandxichdo que nainy looy gannlo ximod rarexa guirá galrranabdiitz reʼ: «¿Xigony nabanyno ló Gudxlio? ¿Nóono ló Gudxlio nabanysi galnabany la? ¿Ximodpa nac Dios?». Galán láani guinabdiitzlo guirá ndeʼ. Né rasacgoluʼ diti guireʼganlo dada guidzelo ximod racapytzay la Biblia láani. Jesucristo ni góc toib galán mextra, goniʼ: «Diti guisian guinabto, né sacaʼto; diti guisian guiyopyto, né sadzelto; diti guisian cannto, né saxal» (Mateo 7:7).

⁵ Pal looy diti rasian rayopylo ximod rarexa galrranabdiitz ni más rasac, saduidylo cuent que nigolú rasac gonylo por guidzelo ximod rarexani (Proverbios 2:1-5). Ná noʼ ni ma góoch looy xidal cós, guirá ni ma gonabdiitzno noʼni ló la Biblia né labúu gannlo láani. Né diti nagann par guienlo láani. Per ni más galán, ndeʼ raduidy confianz lóono né ronyni que rabaladxno. Né racné par guibanylo ló naareʼ sacrodiguieʼ. Salóno né toib galrranabdiitz ni rony que buñ rioʼ ló galrasaʼ.

6. ¿Xigony xidal buñ rony pensary que Dios diti ragoʼ cuent órni buñ cadudy ló galrrioop?

⁶ Xidal buñ scú rony pensary. Xpensaryibu que pal  Dios ñoʼ ló galrasaʼ por lóono, gadzé mod nabanyno. Ló Gudxlio reʼ noʼ guerr, galrrianladx, galsii. Guiráno, raxoʼno, radudyno ló galrrioop né raity xfamilno. Por ngú, noʼ buñ ni raniʼ: «Pal nasacno nisló Dios, ¿diti nalaabu lóono de guirá galnagan reʼ la?».

7. a) ¿Ximod guirá mextra ni rasanir ló religión ronyibu que buñ gony pensary que Dios nagudx xcalnabany? b) ¿Xí ni merpa rasuidy la Biblia órni cadudyno ló galrrioop?

⁷ Né ni máspa, xidal mextra ni rasanir ló religión ronyibu que buñ gony pensary que Dios nagudx xcalnabany. ¿Ximod ronyibu láani? Órni rioʼ toib desgrasy raniʼyibu, que ndeʼ nainy Dios gac. Scú láani, guirá mextra reʼ ragotzyibu dool Dios por cós mal ni cayac. ¿Nigolú ndeʼ la? ¿Xí ni merpa rasuidy la Biblia? Santiago 1:13 ná scareʼ: «Órni nóono ló prueby, ni toib guiniʼ: Dios ragoʼ naʼ ló prueby. Portín né cós mal Dios diti rioʼ ló prueby, né láacabu diti ragoʼbu ló prueby ni toib buñ». Scú láani, Dios dipa rony que tzó cós mal ló Gudxlio (bíil Job 34:10-12). Nigolú, láabu raduidybu lagary tzó cós mal. Per diti ngúca láani guiduidyno lagary gac toib cós, que gonyno láani.

8, 9. a) ¿Ximod labúu cuéxalo que diti láacani ngú guiduidyno lagary tzó cós mal né que lóono gonyno cós mal? b) ¿Xigony diti xinésni guinino que Dios nap dool ni caduidybu lagary que buñgudxlio gony cós mal?

⁸ Cuéxano láani scareʼ, bunysi pensary toib buñguieeu ni naní xcalrrien né buñtzaygoluʼ, né noʼ toib xiimbu ni ma nigox, né rabésbu lidx bixiosbu. Órni láabu diti rasobdiitzbu né raniʼbu tzalésbu stoib lagary, bixiosbu diti racaa láabu. Mbioxhlas reʼ rasaló rony pór cós mal né rioʼ ló galnagan. ¿Xpensarylo bixiosbu buny que xiimbu ñoʼ ló galnagan la? Yaca (Lucas 15:11-13). Scúca, Dios diti racaa buñgudxlio órni rabúyibu gonyibu cós mal, per ndeʼ diti raduidy diitz que Jehová rony que buñ guiab ló  desgrasy ni láacayibu rayopyibu. Scú, diti xinésni guinino que Dios nap dool por guirá galnagan ni nap buñgudxlio.

⁹ Dios nann xigony raduidy lagary buñgudxlio gony cós mal. Dios ni Bisaʼ lóono nangoluʼ né nap galnadip, per diti napbu xí portín gaibybu lóono xigony caduidybu lagary tzó cós mal. Por ni nadxiʼbu lóono raibybu láani buñ. Ló capítulo 11 sasuidyno más xí razón napbu. Labúu guiluladxlo que Dios diti nap dool por guirá galnagan ni racalóno. Ni máspa, raduidybu confianz lóono par labúu tudyno ló galnagan (Isaías 33:2).

10. ¿Xigony labúu gapnó confianz lóo Dios que sanitlóbu galnagan ni cadudyno ló?

¹⁰ Noʼ más ni non ganno, Dios ngú nayaa (Isaías 6:3). Ndeʼ raduidy diitz que diti napbu galkié. Nigolú nayaa xpensarybu. Por ngú, labúu gapnó confianz Jehová. Lóono diti labúu gapnó confianz buñgudxlio ni rioʼ ór radxin rac buñ yox. Scú nacní, buñchiin ni más natzaay xcalnabany diti labúu guinitló cós mal ni rony buñ. Per Dios nap xiroʼgolu galnadip. Dios labúu guinitló guirá cós mal ni cayony buñgudxlio. Órni gonybu ndeʼ sanitlóbu guirá cós mal por tipzó (bíil Salmo 37:9-11).

11. a) ¿Ximod rasac Dios órni diti rac xinésni? b) ¿Ximod rasac Dios órni rabiʼbu cadudylo ló galrrioop?

¹¹ ¿Ximod rasac Jehová órni rabiʼbu ni cayac ló Gudxlio, né mod nabanyno? Scú, la Biblia rasuidy que Dios «nadxiʼ ni nac xinés» (Salmo 37:28). Rioʼbu ló galrasaʼ xí ngú cós tzaay né cós mal. Láabu rianladxbu órni diti rac xinésni. La Biblia ná que «xcalnabanybu goyoʼni nabann» órni cós mal bidzagoluʼni ló Gudxlio nírcu (Génesis 6:5, 6). Dios diti ma bitzá mod nac xpensary (Malaquías 3:6). Rianladxsabu galrrioop ni noʼ ló guidopynac Gudxlio. Dios rianladx  órni rabiʼbu buñ cadudy ló galrrioop. La Biblia ná: «Láabu rioʼbu ló galrasaʼ por lóoto» (bíil 1 Pedro 5:7).

12, 13. a) ¿Xigony nadxiʼno, né ximod racnéni lóono guibiʼno galrrioop ni noʼ ló Gudxlio? b) ¿Xigony nandxichno que Dios guinitló galnagan ni nap buñgudxlio?

¹² ¿Ximod labúu ganno que Dios rianladxbu galrrioop?Guibiʼno stoib mod. La Biblia rasuidy que buñ goyaʼ xomod nac Dios (Génesis 1:26). Scú láani, nacno buñtzay portín Dios natzaaybu. Biduidysi cuent, ¿rioʼobni looy órni rabiʼlo toib buñ ni diti nap dool cadudy ló galrrioop la? Pal rioʼobni looy labúu gandxichlo que más rioʼobni Dios.

¹³ Toibtica cós ni rasac ni napnó ngú galnadxiʼ. Láaca raslooyni que nacno xomod Dios. La Biblia rasuidy que «Dios ngú galnadxiʼ» (1 Juan 4:8). Nadxiʼno portín Dios nadxiʼ. ¿Galnadxiʼ ni naplo nachiinni looy nanitlólo guirá cós mal ni cayac ló Gudxlio reʼ la? ¿Pal ñoʼni ladxñalo ñonylo láani la? ¡Ñonylo láani pue! Labúu guiluladxlo que Dios sanitló galrrioop né cós ni diti rac xinésni. Guirá galrranabdiitz ni sieed ro rasaló libro reʼ diti nacní toib bacaʼal o galrrascú: guirá ni Dios ma biduidy xtiitz sonybu láani. Par labúu gapló fe de guirá ni gony Dios raquiin gannlo más de láabu.

14. ¿Ximod laa Dios, né xigony guiquiinno laabu?

¹⁴ ¿Xí primer ronylo pal nainy looy tzó ni guimbu looy? ¿Diti  raibylo láabu ximod laalo la? ¿Dios noʼ laabu la? Xidal religión racapy que laabu «Dios» o «Señor», per ndeʼ diti nacní toib laa. Nacní nosi diitz xomod «buñchiin». La Biblia rasuidy que Dios nap xidal títulos xomod «Dios» né «Señor». Per la Biblia rasuidy que Dios noʼ laabu: Jehová. Salmo 83:18 ná scareʼ: «Looy, laalo ngú Jehová nosi looy ni noʼ más Guiaʼ ló guidopynac gudxlio». Pal ló la Biblia ni naplo diti sieed laa Dios labúu guiyopylo apéndice ni laa, «Laa Dios: mod raquiinni né mod rarexani» ni sieed ló libro reʼ par guienlo xigony. Nigolú ngú que laa Dios sieed xidal mil buelt ló guiich ni cuá ma xidzú íz. Jehová  rioladx que guimbulo né guiquiinlo laabu. Labúu guinino que Dios raquiin la Biblia par gannlo chú láabu.

15. ¿Ximod rarexa laa Jehová?

¹⁵ Dios goniʼ laabu gac Jehová, né rarexani xidal mod. Laa Jehová, raduidy diitz que sony cumplirbu guirá ni ma goniʼbu, né labúu gonybu nitisi cós nainy láabu gonybu. * Nosi toibguielot Dios rac laa, Jehová, portín nosi láabu radzakni. Diti noʼ stoib ni nac xomod Jehová. ¿Xigony ranino scá?

16, 17. ¿Xí rasuidy diitzreʼ lóono de Jehová: a) «Ni nap Xiroʼgolu galnadip»? b) «Ni rony Mandary por tipzó»? c) «Ni Bisaʼ»?

¹⁶ Ma bienno que Salmo 83:18 raniʼ de Jehová: «Nosi looy ngú ni noʼ más Guiaʼ». Scú, nosi láabu rareʼ laabu  «ni nap Xiroʼgolu galnadip». Revelación 15:3 náni: «Nirodann né sacrodiguieʼ nac guirá ni bisaʼlo, Jehová Dios, ni nap Xiroʼgolu galnadip. Xinés né nigolú nac néz ni naplo, Ni rony Mandary por tipzó». Diitz «ni nap Xiroʼgolu galnadip» rasuidy lóono que Jehová nap más galnadip ló guirá ni nabany. Diti noʼ chú rigaʼl láabu. Né diitz «Ni rony Mandary por tipzó» rasien lóono que diti noʼ stoib xomod láabu. Nosi láabu nabanybu por tipzó. Salmo 90:2 náni scareʼ: «Desde tipzó né dada por tipzó, looy nga Dios». Órni ronyno pensary guirá ndeʼ radziguiaʼno.

¹⁷ Jehová láaca nac toibguielot portín diti noʼ stoib xomod láabu ni Bisaʼ guirá ni rabiʼno. Revelación 4:11 ná: «Nosi looy, Jehová, Dios xtunydo, looy ngú non gonyxiroʼdo, guisanadxdo né guicaʼlo galnadip, portín looy bisaʼlo guirá cós, né por ni nálo goyoʼni né goyaʼni». Guirá ni rieed ló xpensarylo, xomod ángeles ni noʼ guibá, vitzón ni noʼ guibá, cuánnax, beel ni noʼ lainy nisdaʼ né guʼuc, guirá ndeʼ bidxin gocni portín Jehová Bisaʼ láani.

18. ¿Xigony tipnés buñ rasac que dipa labúu guibignoyibu Dios, per xí láani rasuidy la Biblia?

¹⁸ Noʼ buñ órni roʼol xí clas Dios nac Jehová radzuibyibu mod nac Jehová. Radzuibyibu que Dios nigolú noʼ guiaʼ, que diti labúu guibigaxyibu o que diti rasacyibu nisló Dios. Per ¿scú nacní la? La Biblia diti rasuidy ngú. Ndeʼ raniʼni de Jehová: «Diti noʼbu sit de cada toibno» (Hechos 17:27). La Biblia raiby lóono: «Colguibig ronoʼ Dios, né láabu sabigbu ro nóoto» (Santiago 4:8).

19. a) ¿Ximod labúu salóno guibigaxno Jehová, né ximod racné ndeʼ lóono? b) ¿Xí ni más rioladxlo mod nac Dios?

¹⁹ ¿Ximod labúu guibignolo Jehová? Ni sacné looy ngú diti guisianlo ni cayonylo nigoreʼ: guisuidylo más de Dios. Jesús goniʼ: «Ndeʼ raduidy diitz galnabáiny tipzó, que  guimbuyibu looy toibguielot Dios ni nigolú, né guimbuyibu xiinlo Jesucristo ni bixel lo» (Juan 17:3). Scú, xomod ná la Biblia guisuidyno xí ranab Jehová né Jesús, modreʼ «guibanyno tipzó». Xomod ma bienno, «Dios ngú galnadxiʼ» (1 Juan 4:16). Jehová láaca nap xidal mod ni rioladx buñ, ni nac sacroyen. La Biblia raslooy ximod nac Jehová: «Toib Dios ni nap galrronladx né ni rien xí rasac buñ, ni diti radzuitz ni maca né ni nap galnadxiʼ ni diti raché né ni diti radudy xtzú né ni nigolú» (Éxodo 34:6). La Biblia ná: «Natzaaylo né puext nóolo par guituidylo galkié scásiʼ» (Salmo 86:5). Dios ngú paseinys (2 Pedro 3:9). Láabu ronybu xinésni (Revelación 15:4). Laʼga goʼol lo más ni ná la Biblia saduidylo cuent mod nac Jehová né de stipnés cós tzaay ni napbu.

20-22. a) Ni diti labúu rabiʼno Dios, ¿ronyni que diti labúu guibigaxno Dios la? Golexa láani. b) ¿Xí litz labúu gaiby buñ looy ni ralooypani diti mal, per xí raquiin gonylo?

²⁰ Diti labúu rabiʼno Dios, portín nacbu toib Espíritu (Juan 1:18; 4:24; 1 Timoteo 1:17). Pal rasuidylo ni ná la Biblia, labúu guimbulo láabu xomod toib buñ. Xomod goniʼ salmista, looy labúu «guibiʼ[lo] ximod natzaayxat Jehová» (Salmo 27:4; Romanos 1:20). Conforma casuidylo mod nac Jehová saduidylo cuent que nabanybu. Sapló más razón par gandxiʼlo láabu né guisaclo que nóolo más gahx de láabu.

²¹ Dxoga, dxoga, looy guienlo xigony la Biblia rasuidy lóono guibiʼno Jehová xomod Bixiosno (Mateo 6:9). Diti nosi bisaʼbu lóono, láaca raniiny láabu guibanyno sacrodiguieʼ, xomod toib buñguieeu ni nadxiʼ xiin scú nac Jehová (Salmo 36:9). La Biblia láaca rasuidy que buñgudxlio labúu gac ximig Dios (Santiago 2:23). ¡Bunysi xpensarylo: looy labúu gaclo ximig ni Bisaʼ Gudxlio né guibá!

 ²² Conforma guisuidylo más ni ná la Biblia, sigory sioʼ buñ ni guilitz looy par guisianlo goʼol lo la Biblia, par layibu cayacnéyibu looy per diti scú nacní. Sigory ronyibu ndeʼ portín rioʼyibu ló galrasaʼ que looy guitzálo mod nac xpensarylo. Per diti guiduidylo lagary ni toib guicaa looy par gaclo ximig Dios portín ndeʼ ni más rasac.

23, 24. a) ¿Xigony diti guisianlo guinabdiitzlo órni noʼ ni diti rienlo ni sieed ló la Biblia? b) ¿Xí guisuidyno ló capítulo ni sietra?

²³ Scú láani, órni casalólo sioʼ cós ni diti sienlo. Gaclo buñdxo né guinaplo toib ni gacné looy, diti guitoylo. Jesús goniʼ que galán láani gacno buñdxo, xomod toib mbioxien (Mateo 18:2-4). Né xomod nánno mbioxien ranabdiitz guirá ór. Dios raniiny gannlo ximod rarexa la Biblia. Scú láani, la Biblia rasetlaa tipnés buñ ni bibany nírcu goniiny nimbuyibu Dios. Bíilyibu la Biblia nanoy modreʼ gondxichyibu que ni bisuidyibu nigolúni (bíil Hechos 17:11).

²⁴ Toib mod galán par guimbuno Jehová ngú, guisuidyno nanoy la Biblia, diti noʼ stoib libro xomod láani. ¿Xigony ranino scá? Ló capítulo ni sieed ganno xigony.