1, 2. ¿Chucoch mi laj cʌl chaʼan jiñi Biblia jiñʌch jumpʼejl majtañʌl wen ñuc bʌ tilem bʌ ti Dios?

¿CʼAJAL baʼ chaʼan cheʼ bʌ juntiquil a wamigo tsiʼ yʌqʼueyet jumpʼejl majtañʌl wen ñuc bʌ i cʼʌjñibal? Mi cʌl tsaʼ taja cabʌl a tijicñʌyel. Cheʼ bʌ jiñi a wamigo tsiʼ yʌqʼueyet jiñi majtañʌl, tsaʼ ñaʼta chaʼan mucʼʌch i cʼuxbiñet, jin chaʼan tsaʼ wʌqʼue wocolix i yʌlʌ.

² Jiñi Biblia jiñʌch jumpʼejl majtan tilem bʌ ti Dios, jin chaʼan yom mi laj cʌqʼuen wocolix i yʌlʌ. Ili cojach bʌ libro, miʼ tsictesan maʼañic bʌ miʼ mejlel lac tsictesʌbentel ti yambʌ libro. Miʼ subeñonla bajcheʼ tsaʼ mejli jiñi panchan, ecʼ tac, Pañimil yicʼot jiñi ñaxam bʌ wiñic yicʼot ñaxam bʌ xʼixic. Cheʼ jaʼel, miʼ pʌsbeñonla principio tac muʼ bʌ i coltañonla chaʼan mi lac lʌtʼ jiñi wocol tac yicʼot jiñi muʼ bʌ laj cʼojoʼtan. Miʼ tsictesʌbeñonla jaʼel bajcheʼ mi caj i tsʼʌctesan i tʼan Dios wʌn albil bʌ i chaʼan yicʼot chaʼan ñumen wem bʌ lac chumlib wʌʼ ti Pañimil. ¡Jiñʌch jumpʼejl majtañʌl wen utsʼatax bʌ!

3. ¿Chuqui tsiʼ pʌsbeyonla Jehová cheʼ tsiʼ yʌqʼueyonla jiñi Biblia yicʼot chucoch miʼ ñijcan lac pusicʼal jiñi majtañʌl?

³ Jiñi Biblia jumpʼejlʌch majtañʌl jaʼel muʼ bʌ i ñijcan lac pusicʼal come miʼ cʌntesañonla majqui tsiʼ mele jiñi. Cheʼ  bʌ tsiʼ yʌqʼueyonla ili libro, Dios tsiʼ pʌsbeyonla chaʼan yom mi lac wen cʌn. Cheʼ jaʼel, miʼ coltañonla chaʼan miʼ mejlel lac lʌcʼtesan lac bʌ tiʼ tojlel.

4. ¿Baqui bʌ jiñi muʼ bʌ i yʌcʼ ti toj sajtel a pusicʼal chaʼan bajcheʼ yoñel miʼ pujquel jiñi Biblia?

⁴ Mi an a Biblia, mach jatetic jach an a chaʼan. Ili libro melbil ti tsʼʌcʌl o ti lamital jach, i lʌcʼʌl cheʼ bʌ 2,600 an i ñusayob ti yambʌ tʼan tac, ñumen ti 90 por ciento jiñi wiñicob xʼixicob (quixtañujob) añob i chaʼan jiñi Biblia jaʼel. Ti jujumpʼejl semana, ñumen ti jumpʼejl millón miʼ pujquel jiñi Biblia tac, pero an yonlel jiñi Biblia tsʼʌcʌlix bʌ melbil o an lamital jaxto bʌ melbil. Cheʼ wen mi laj cʌl, maʼañic yambʌ libro bajcheʼ jiñi.

5. ¿Chuqui i sujmlel cheʼ «chʼoyol ti Dios» jiñi Biblia?

⁵ Cheʼ jaʼel, jiñi Biblia «chʼoyol ti Dios» (pejcan 2 Timoteo 3:16). ¿Chuqui i sujmlel ili tʼan? Jiñi Biblia miʼ tsictesan: «Wiñicob ñijcʌbiloʼ bʌ i chaʼan Chʼujul bʌ Espíritu tsiʼ chaʼ subuyob chuqui tsiʼ yubiyob ti Dios» (2 Pedro 1:21). Lajal bajcheʼ juntiquil yumʌl ti eʼtel (troñel) miʼ suben i secretaria chaʼan miʼ mel jumpʼejl carta. Jiñi tʼan woli (choncol) bʌ ti  tsʼijbuntel i chaʼañʌch jiñi yumʌl ti eʼtel, jin chaʼan jiñi carta i chaʼañʌch, mach i chaʼañic jiñi secretaria. Cheʼ lajal jaʼel jiñi Biblia, muʼ bʌ lac taj yaʼi i tʼañʌch Dios, mach i chaʼañic jiñi wiñicob tsaʼ bʌ i tsʼijbuyob. Jin chaʼan, tiʼ pejtelel jiñi Biblia tiʼ sujm «i tʼañʌch Dios» (1 Tesalonicenses 2:13).

6, 7. ¿Chucoch wen tsiquil chaʼan maʼañic miʼ contrajin i bʌ tiʼ tʼan jiñi tsʼijbubil bʌ ti Biblia?

⁶ Jiñi Biblia tsaʼ jalʼa 1,600 jab chaʼan miʼ tsʼijbuntel, jiñi wiñicob tsaʼ bʌ i tsʼijbuyob mach ti jiñic jach bʌ jabil tsaʼ laj chumleyob, mach lajalobic i yeʼtel yicʼot mach junlajalic i chubʌʼañob: An xcholejeloʼ bʌ, xchucchʌyoʼ bʌ yicʼot xcʌnta tiñʌmeʼob, cheʼ jaʼel xʼaltʼañob, juezob yicʼot reyob. Cheʼ bajcheʼ jiñi tsaʼ bʌ i tsʼijbu jumpʼejl Evangelio juntiquilʌch doctor i cʼabaʼ Lucas. Anquese mach junlajalic baqui chʼoyolob, jiñi Biblia junsujm jach chuqui mi yʌl tiʼ tejchibal cʼʌlʌl tiʼ yujtibal yicʼot maʼañic miʼ contrajin i bʌ tiʼ tʼan. *

⁷ Yaʼ ti ñaxam bʌ libro am bʌ ti Biblia mi yʌl bajcheʼ tsaʼ tejchi jiñi wocol tac am bʌ tiʼ tojlel quixtañujob, pero yaʼ ti cojix bʌ libro miʼ pʌsbeñonla chaʼan jiñi Pañimil mi caj i sujtel ti jumpʼejl paraíso. Ti jujumpʼejl i yopol jiñi Biblia, mi yʌl cʌntesʌntel mach bʌ ujtelix i yujtel, cheʼ jaʼel, jiñi tsʼijbubil bʌ yaʼi, miʼ taj ti tʼan chaʼan bajcheʼ mi caj i tsʼʌctiyel i tʼan Dios wʌn albil bʌ i chaʼan. Ili junmujchʼ cʌntesʌntel maʼañic bʌ miʼ contrajin i bʌ miʼ pʌsbeñonla chaʼan jiñi libro chʼoyolʌch ti Dios.

8. Miʼ mejlel a wʌl ejemplo tac chaʼan lajal chuqui miʼ yʌlob jiñi científicojob yicʼot tsaʼ bʌ i wʌn alʌ jiñi Biblia.

⁸ Jiñi científicojob, an cʼotem i cʌñob chaʼan jiñi tsʼijbubil  bʌ yaʼ ti Biblia lajalʌch bajcheʼ jiñi yujiloʼ bʌ jaʼel. Cheʼ jaʼel tsaʼ wʌn ajli chuqui tac maxto bʌ ñaʼtʌbilic. Qʼuele a wilan, jiñi libro chaʼan Levítico chʼʌmʌl tilel i chaʼan mandar tac tsaʼ bʌ aqʼuentiyob jiñi israelob ti wajali chaʼan sʌc yom miʼ yajñelob yicʼot chaʼan bajcheʼ yom miʼ cʌntañob i bʌ jiñi cʼamoʼ bʌ, pero cheʼ bʌ ora jiñi, an yan tac bʌ tejclum mach bʌ yujilobic iliyi. Ti wajali mach weñic tsaʼ ñaʼtʌnti chaʼan bajcheʼ yilal jiñi Pañimil, pero jiñi Biblia tsiʼ wʌn alʌ chaʼan pitil o wolol (Isaías 40:22, TNM). Cheʼ jaʼel tsiʼ wʌn alʌ ti toj chaʼan jiñi Pañimil ‹maʼañic baqui chucul› (Job 26:7). Anquese jiñi Biblia mach jumpʼejlic libro chaʼan ciencia, pero wen tsʼʌcʌl chuqui mi yʌl cheʼ bʌ miʼ taj ti tʼan jiñi. ¿Mach ba cheʼic bʌ libro la com bajcheʼ jiñi tilem bʌ ti Dios?

9. a) ¿Chuqui miʼ pʌs jiñi Biblia chaʼan isujmʌch yicʼot chaʼan tsʼʌcʌlʌch miʼ tsictesan jiñi tsaʼ bʌ ujti wajali? b) ¿Chucoch maʼañic chuqui tsiʼ mucuyob jiñi tsaʼ bʌ i tsʼijbuyob jiñi Biblia?

⁹ Isujmʌch chuqui mi yʌl jiñi Biblia yicʼot tsʼʌcʌl mi yʌl chuqui tsaʼ bʌ ujti wajali. Mi yʌl baqui tac tsaʼ ujti jiñi yaʼ bʌ tsʼijbubil yaʼi, mach cojic jach mi yʌl chuqui i cʼabaʼob jiñi muʼ bʌ i tajtʌlob ti tʼan, mi yʌl i cʼabaʼ i ñojteʼelob jaʼel. * An cabʌl muʼ bʌ i tsʼijbuñob historia tac maʼañic bʌ miʼ subob tiʼ pejtelel chuqui tac mach bʌ weñic miʼ yujtel tiʼ tojlel i tejclumob, pero mach cheʼic tsiʼ meleyob jiñi tsaʼ bʌ i tsʼijbuyob jiñi Biblia, tsiʼ laj tsʼijbuyob i sajtemal yicʼot chuqui mach bʌ weñic tsiʼ mele i tejclumob. Cheʼ bajcheʼ Moisés tiʼ tsʼijbu jiñi libro am bʌ ti Biblia i cʼabaʼ Números, yaʼi tiʼ jamʌ tsictesa jiñi tsʌts bʌ mulil tsaʼ bʌ i mele yicʼot chaʼan jiñi tsʌts bʌ ticʼojel tsaʼ bʌ aqʼuenti (Números 20:2-12). Mach pejtelic libro cheʼ an tsʼijbubil bajcheʼ jiñi, pero tsaʼ bʌ i tsʼijbuyob jiñi Biblia tsʼʌcʌl tiʼ tsʼijbuyob chuqui tac wen o mach bʌ weñic tsiʼ meleyob come jiñʌch jumpʼejl libro tilem bʌ ti Dios.

10. ¿Chucoch mi la cʌl chaʼan jiñi Biblia jiñʌch jumpʼejl libro wen ñuc bʌ i cʼʌjñibal i ticʼojel?

¹⁰ Jiñi Biblia chʼoyolʌch ti Dios «an i cʼʌjñibal ti cʌntesa chaʼan lac ticʼol yicʼot chaʼan lac tojʼesʌntel» (2 Timoteo 3:16). Jiñʌch jumpʼejl libro ñuc bʌ i cʼʌjñibal. Jiñi tsaʼ bʌ i yʌcʼʌ ti tsʼijbuntel jiñi Biblia tsiquil chaʼan wen cʌmbil i chaʼan  bajcheʼ yilal jiñi quixtañujob. Jin chaʼan, wen la cujil chaʼan majqui tsiʼ yʌcʼʌ ti melol jiñi Biblia jiñʌch Jehová Dios, tsaʼ bʌ i Meleyonla. Yujil chuqui mi lac ñaʼtan yicʼot bajcheʼ yubil mi laj cubin, ñumen yujil to bajcheʼ joñonla. Cheʼ jaʼel, yujil chuqui yom mi lac mel chaʼan tijicña mi laj cajñel yicʼot mach bʌ yomic mi lac mel.

11, 12. a) ¿Baqui tac bʌ temaj tsiʼ yʌlʌ Jesús yaʼ ti bujtʌl? b) ¿Baqui bʌ yambʌ temaj miʼ taj ti tʼan jiñi Biblia yicʼot chucoch tiʼ pejtelel ora an i cʼʌjñibal?

¹¹ Ñaʼtancu jiñi cʌntesa tsaʼ bʌ i yʌlʌ Jesús yaʼ ti bujtʌl, yaʼ bʌ tsʼijbubil ti Mateo capítulo 5 cʼʌlʌl ti 7. Ti ili ñuc bʌ cʌntesʌntel, cabʌl temaj tsiʼ yʌlʌ Jesús, junchajp jiñʌch bajcheʼ mi lac taj lac tijicñʌyel, bajcheʼ yom mi lac tojʼesan lac wocol, bajcheʼ yom mi lac mel oración yicʼot bajcheʼ yom mi laj qʼuel jiñi chubʌʼañʌl. Jiñi tʼan tsaʼ bʌ i yʌlʌ yaʼ ti bujtʌl miʼ coltañonla cʼʌlʌl wʌle ora yicʼot i cʼʌjñibal cheʼ bajcheʼ ti wajali.

¹² Jiñi lamital principio tac muʼ bʌ a taj yaʼ ti Biblia mi yʌl bajcheʼ yom mi laj cajñel yicʼot lac familia, ti la queʼtel yicʼot bajcheʼ yom mi laj qʼuel jiñi yañoʼ bʌ. Jiñi ticʼojel tac tsʼijbubil bʌ chaʼan pejtelel wiñicob xʼixicob an i cʼʌjñibal tiʼ pejtelel ora. Yaʼ ti Biblia mi lac taj wen ñuc tac bʌ ñaʼtʌbal. Miʼ mejlel lac pam al chaʼan jiñi ñuc tac bʌ ñaʼtʌbal ti jiñi tʼan tsaʼ bʌ i yʌlʌ Dios tiʼ tojlel jiñi xʼaltʼan Isaías: «Joñon [Jehová] a Yumon, a Dioson muʼ bʌ j cʌntesañet chaʼan maʼ taj chuqui wen» (Isaías 48:17).

13. ¿Baqui bʌ jiñi tʼan chʼoyol bʌ ti Jehová tsaʼ subenti i tsʼijbun jiñi xʼaltʼan Isaías chaʼan jiñi Babilonia?

¹³ Jiñi Biblia miʼ chʼʌm tilel profecía tac, an cabʌl tsaʼix bʌ tsʼʌctiyi. Laʼ laj qʼuel jumpʼejl ejemplo. Tiʼ tojlel jiñi xʼaltʼan Isaías, tsaʼ bʌ chumle ñumeñix ti 700 jab cheʼ maxto tilemic Cristo, Jehová tiʼ tsictesa chuqui miʼ caj ti ujtel tiʼ tojlel jiñi tejclum i cʼabaʼ Babilonia: Mi caj i jisʌntel (Isaías  13:19; 14:22, 23). Yicʼot jaʼel tsiʼ yʌlʌ bajcheʼ miʼ caj ti ujtel. Jiñi soldadojob maʼañic tsiʼ chaʼleyob guerra chaʼan miʼ yochelob yaʼ ti Babilonia, tsiʼ tiquesayob jiñi colem jaʼ am bʌ tiʼ joytilel jiñi tejclum. Yicʼot mach cojic jach jiñi. Jiñi profecía tsiʼ yʌlʌ chuqui i cʼabaʼ jiñi rey muʼ bʌ caj i jisan Babilonia: Jiñʌch Ciro (pejcan Isaías 44:27–45:2).

14, 15. ¿Bajcheʼ tsaʼ tsʼʌctiyi chaʼpʼej uxpʼejl tʼan tac tsaʼ bʌ i yʌlʌ Isaías yaʼ ti profecía chaʼan Babilonia?

¹⁴ Cheʼ bʌ ñumeñix 200 jab, ti acʼʌlel 5 cʼʌlʌl 6 i chaʼan octubre ti jiñi jabil 539 cheʼ maxto tilemic Cristo, cheʼ ti acʼʌlel junmojt soldadojob tsiʼ tempayob i bʌ tiʼ tʼejl Babilonia. ¿Majqui jiñi tsaʼ bʌ i chaʼle tempaya tilel? Jiñʌch juntiquil rey chʼoyol bʌ ti Persia i cʼabaʼ Ciro. Laj chajpʌbilix chaʼan miʼ tsʼʌctiyel jiñi profecía. Pero ¿muʼ ba caj i mejlelob ti ochel i soldadojob Ciro cheʼ bajcheʼ tsaʼ wʌn ajli chaʼan miʼ jisañob jiñi Babilonia anquese maʼañic miʼ chaʼleñob guerra?

¹⁵ Jiñi yaʼ bʌ chumulob ti Babilonia woliyob (yʌquelob) ti qʼuiñijel jiñi acʼʌlel, tsiʼ ñaʼtayob chaʼan maʼañic chuqui mi caj i chaʼleñob come wen chan i tsʼajquil jiñi tejclum. Pero ti jimbʌ ora, Ciro woliʼ wen chajpan bajcheʼ mi caj i xoyben i  bijlel jiñi jaʼ yaʼ bʌ ñumen ti Babilonia, jiñi colem jaʼ tsaʼ caji ti jubel o sajpʼel, cheʼ jiñi, tsaʼ cajiyob ti cʼaxel i soldadojob Ciro. Pero ¿bajcheʼ tsaʼ mejliyob ti cʼaxel ti jiñi tsʼajc am bʌ ti Babilonia? ¡Jiñi babiloniojob maʼañic tsiʼ qʼueleyob mi jamʌl tsaʼ cʌyle i puertajlel jiñi tejclum!

16. a) Cheʼ bajcheʼ tsiʼ wʌn tsʼijbu Isaías, ¿chuqui tsiʼ chaʼle Babilonia? b) ¿Bajcheʼ tsaʼ tsʼʌctiyi jiñi profecía tsaʼ bʌ i wʌn alʌ Isaías chaʼan maʼañix majqui mi caj i chumtan Babilonia?

¹⁶ Jehová tsiʼ wʌn alʌ chaʼan bajcheʼ mi caj i cʌytʌl Babilonia: ‹Maʼañix miʼ cajelob ti chʌn chumtʌl wiñicob ti Babilonia mi i yalobilob, mi i butsob tiʼ pejtelel ora. Jiñi xñumelob maʼañic mi caj i jijlelob yaʼi. Jiñi xcʌnta tiñʌmeʼ maʼañic mi caj i pʌy tilel i tiñʌmeʼ› (Isaías 13:20). Jiñi profecía mach cojach tsiʼ yʌlʌ chaʼan mi caj i jisʌntel, tsiʼ yʌlʌ jaʼel chaʼan maʼañix majqui mi caj i chumtan tiʼ pejtelel ora. Miʼ mejlel a cʌn chaʼan jiñi tʼan tac tsaʼ tsʼʌctiyi. An cheʼ bajcheʼ 80 kilómetro i ñajtlel baʼan jiñi Babilonia yaʼ tiʼ tojel sur ti Bagdad, tiʼ capital Irak, yaʼi mi lac taj laj qʼuel yaʼ ti dibujo bajcheʼ tsaʼ cʌyle jiñi tejclum Babilonia. Maʼañix majqui chumul yaʼi, jiñʌch baqui miʼ yʌcʼ ti ñaʼtʌntel chaʼan tsaʼʌch tsʼʌctiyi jiñi tʼan tsaʼ bʌ wʌn subenti Isaías ti Jehová: «Mi  caj j cʼʌn c misujib chaʼan mic junyajlel jisañob» (Isaías 14:22, 23, TNM). *

17. ¿Chucoch miʼ pʼʌtʼesan lac ñopoñel ti Dios jiñi profecía tac tsaʼix bʌ tsʼʌctiyi yaʼ bʌ mi lac taj ti Biblia?

¹⁷ ¿Mach ba muqʼuic i ñumen pʼʌtʼan a ñopoñel ti Dios cheʼ bʌ tsaʼix laj qʼuele chaʼan mucʼʌch i tsʼʌctiyel jiñi profecía muʼ bʌ i yʌjlel yaʼ ti Biblia? Come tsaʼʌch i tsʼʌctesa chuqui tsiʼ wʌn alʌ Jehová ti wajali, miʼ mejlel laj cʌl chaʼan mucʼʌch caj i tsʼʌctesan jaʼel jiñi i tʼan wʌn albilix bʌ i chaʼan, baʼ mi yʌl chaʼan mi caj i sujtesan ti jumpʼejl paraíso jiñi Pañimil (pejcan Números 23:19). Jin chaʼan, mucʼʌch lac ñop «chaʼan mi lac taj laj cuxtʌlel mach bʌ añic miʼ jilel, woli bʌ lac pijtan. Come Dios, mach bʌ yujilic lot, tsiʼ wʌn acʼʌ i tʼan cheʼ maxto añic pañimil» (Tito 1:2). *

18. ¿Chuqui wen ñuc bʌ cʌntesʌntel tsiʼ yʌlʌ jiñi apóstol Pablo chaʼan «i tʼan Dios»?

¹⁸ Jiñi tsaʼix bʌ laj qʼuele ti ili cʌntesʌntel miʼ yʌqʼueñonla lac ñaʼtan chaʼan jiñi Biblia jiñʌch jumpʼejl libro cojach bʌ. Maʼañic miʼ contrajin i bʌ tiʼ tʼan, lajalʌch chuqui mi yʌl cheʼ bajcheʼ muʼ bʌ i yʌlob jaʼel jiñi científicojob, miʼ chʼʌm tilel ticʼojel wen ñuc bʌ i cʼʌjñibal yicʼot miʼ chʼʌm tilel profecía tac muʼ bʌ i tsʼʌctiyel, pero mach cojic jach jiñi miʼ yʌcʼ ti qʼuejlel ti ñuc jiñi Biblia. Pero an to yambʌ chuqui miʼ subeñonla. Jiñi apóstol Pablo tiʼ tsʼijbu: «Come cuxul i tʼan Dios.  Wen pʼʌtʌl. Ñumen jay bajcheʼ espada am bʌ i yej tiʼ chaʼwejlel. Miʼ sʌl jecʼ lac pusicʼal yicʼot lac chʼujlel. Miʼ tsictesan chuqui woliʼ yʌl lac pusicʼal yicʼot chuqui yom lac pusicʼal» (Hebreos 4:12).

19, 20. a) ¿Bajcheʼ miʼ coltañonla jiñi Biblia chaʼan mi lac wen tsajin lac melbal? b) ¿Bajcheʼ miʼ mejlel a pʌs chaʼan mucʼʌch a qʼuel ti ñuc jiñi Biblia, jiñi cojach bʌ majtañʌl tsaʼ bʌ i yʌqʼueyonla Dios?

¹⁹ Cheʼ mi lac pejcan «i tʼan» Dios o jiñi wen tʼan muʼ bʌ lac taj yaʼ ti Biblia miʼ mejlel i qʼuextan bajcheʼ chumulonla. Miʼ coltañonla chaʼan mi lac wen qʼuel bajcheʼ yilal lac melbal come maʼañic yambʌ bajcheʼ miʼ mejlel laj qʼuel. Pero mach jasʌl jach mi laj cʌl chaʼan choncol laj cʼuxbin Dios. Muʼ bʌ caj i ñumen tsictesan chuqui mi lac ñaʼtan ti lac pusicʼal yicʼot chuqui woli lac ñaʼtan lac mel jiñʌch mi woli lac jacʼ jiñi cʌntesʌntel am bʌ ti Biblia.

²⁰ Jiñi Biblia chʼoyol ti Dios. Yom mi lac pejcan yicʼot mi laj cʼuxbin. Chʌn tsajin majlel, mi cheʼʌch maʼ mel, choncolʌch a pʌs chaʼan mucʼʌch a cʼuxbin jiñi a majtan tilem bʌ ti Dios. Cheʼ jaʼel, mi caj a wen qʼuel ti ñuc jiñi ñaʼtʌbil bʌ i chaʼan Dios yom bʌ tiʼ tojlel jiñi quixtañujob. Ti jiñi yambʌ cʌntesʌntel mi caj laj qʼuel baqui bʌ jiñi ñaʼtʌbil bʌ i chaʼan Dios yicʼot bajcheʼ mi caj i tsʼʌctesan.