1, 2. მუ გაგებათ რე ბიბლია ღორონთშე მოჩამილ ძვირფას საჩუქარი?

ქუნორღვენო თიცალ შემთხვევა, მუჟამს მეგობარქ გახიოლუნ ფერ მუდგარენ გაჩუქ? თენა ხვალე ვა გახიოლედუნ — გურს ხოლო გოიტიბუანდ. მეგობარქ საჩუქარ მერჩუნ თენა ნიშნენს, ნამდა თის უჸორქ დო ქიანაშა უსხუნ სქანწკუმა ურთიერთობა. მუშო ოკო რაგად, მარდიელ იჸიდ სქან მეგობარიშ თეცალ ყურადღებაშენ.

² ბიბლია ღორონთიშ საჩუქარ რე, ნამუშ დიდ მარდიელეფ ოკო ვორდათ. თე უნიკალურ წიგნიშე თიცალ მუდგარენს ბგებულენთ, მუდგას თიშ უმშო დღას ვეგებგენდით. მაგალთო, ბიბლიას ინოჭარ ცაშ, დედამიწაშ დო პირველ ქომოლკოჩ დო ოსურკოჩიშ გოჭყაფაშენ. თექ მოჩამილ რე საიმენდო პრინციპეფი, ნამუთ მიმეხვარებნა, მივერუათ ირდღას შეთმოფხვადუთინ თი პრობლემეფს. თინა მირაგადნა, მუჭო შეასრულენს ღორონთი მუშ ნებას დო მუჭო მიღანს უჯგუშ ცხოვრებას დედამიწაშა. ბიბლია მართალო ძვირფას საჩუქარ რე ღორონთშე.

3. მუს მირაგადნა იეჰოვაშენ თინა, ნამდა თიქ ბიბლია მაჩუქეს დო მუშენ ნიშნენს თენა ბრელს ჩქინო?

³ თე საჩუქარ, ნამუთ გურს მიტიბუანა, ბრელ მუთუნს მირაგადნა ღორონთშენ. ღორონთიქ ბიბლია თიშენ მუჩეს, ნამდა  თინა ჯგირო გეფჩინებაფუათ. ნამდვილო, ბიბლიას შეულებუ დუგაახლოვას იეჰოვაწკუმა.

4. მუ აზრიქ დუგოსკიდ, მუჟამს ბიბლიაშ გავრცელებაშ მაშტაბეფიშ გურშენ გეგინ?

⁴ ბიბლია ქოიღუნ-და თენა შურო ვა რე გასაკვირი, მუშენდა თინა ამდღა ბრელს უღუ. ნაწილ-ნაწილო ვარდა მთლიანო, ბიბლია 2 600-შე მეტ ნინაშა რე გიშაშკუმალირ დო დედამიწას მახორუეფიშ 90 პროცენტშე მეტის შეულებ თიშ კითხირ. ირ მარას, საშუალოთ მილიონშე მეტ ბიბლია ივრცელებუ. ამდღა ნაწილ-ნაწილო ვარდა მთლიანო, მილიარდოფით ბიბლია რე ბეშტელ. მუჭოთ ვორწყეთ, ბიბლიაშა ნამთინ შხვა წიგნის ვემიართე.

5. მუს ნიშნენს, ნამდა ბიბლია „ღორონთშე რე შთაგონებულ“?

⁵ თეშ გარდა, ბიბლია „ღორონთშე რე შთაგონებული“ (წეკითხი 2 ტიმოთეშ 3:16). მუს ნიშნენს თენა? ბიბლია პასუხენს, ნამდა ღორონთი კათას წმინდა შურით ორაგადაფუანდუ (2 პეტრე 1:21). ქიმიპჸონათ მაგალითი: ბიზნესმენქ მდივანს წერილ დაჭარაფუ. მართალ რე, მაჭარალ მდივან რე, მარა თინა ბიზნესმენიშ აზრეფს ჭარუნს. ათეშენ წერილიშ ავტორი ბიზნესმენ იჸი დო ვართ ხოლო მდივანი. თეგვარო, მართალ რე ბიბლია  მუსხირენ კოჩიქ ჭარუ, მარა თექ თინეფიშ აზრეფი ვარინ, ღორონთიშ აზრეფ ინოჭარ. თაშ ნამდა, თავისფალო ირაგადე, მთელ ბიბლია დასურო „ღორონთიშ სიტყვა რე“ (1 თესალონიკელები 2:13).

6, 7. მუშენ რე საინტერესო თინა ნამდა, ბიბლიაშ წიგნეფ ართიანს ოთანხმუ?

⁶ ბიბლია 1600-შე მეტ წანას იჭარუდ. თიშ მაჭარალეფ შხვადოშხვა დროს ცხოვრენდეს დო შხვადოშხვა მდგომარეობა უღუდეს. ნამთინე დიხაშ მოხანდე რდუ, მინ მეჩხომე დო მინ ხოლო მაჭყიშალი. შხვეფ წინასწარმარაგადეეფი, მოსამართლეეფ დო მეფეეფი რდეს. ართ-ართ სახარებაშ მაჭარალ ლუკა, ექიმ რდუ. მართალ რე, ბიბლია შხვადოშხვანერ კათაქ ჭარეს, მარა ბიბლიაშ წიგნეფ ართიანს ოთანხმუ. *

⁷ ბიბლიაშ პირველ წიგნიშე ბგებულენთ, მუჭო დიჭყუ კაცობრიობაშ პრობლემეფქ. ბოლო წიგნი მოძირანა, მუჭო გინირთუ დედამიწა კინ სამოთხეთ. მთელ ბიბლიას ანთას წანეფიშ ისტორია ჭარუ. თიშ თითოულ ნაწილი მოხვარუნა, უმოს ქიგებგათ ღორონთიშ განზრახვეფშენ დო თინეფიშ შესრულებაშენ. ბიბლიაშ წიგნეფი ართიანს ოთანხმუნ თინა შუროთ ვა რე გასაკირი, მუშენდა ბიბლია ღორონთშე მოჩამილ წიგნი რე.

8. ქიმიჸონ მაგალითეფი, ნამუთ ოძირანს, ნამდა ბიბლია მეცნიერულო ზუსტი რე.

⁸ ბიბლია მეცნიერულო ზუსტ რე. თექ მოჩამილ ინფორმაცია თი დროს ბრელშო უჩინებუ დო ახალ რდუ. მაგალთო, ბიბლიაშ ართ-ართ წიგნის ლევიანეფს, ჭარუ კანონეფი, ნამუთ ჰიგიენას დო კარანტინს ოხუ. ისრაელიშ გოხოლუას მახორუ შხვადოშხვა რჯულიშ კათას თეცალ კანონეფი აზრო ხოლო ვამალედეს. თიმ დროს, მუჟამს დედამიწაშ ფორმაშენ ხალხის არასწორ ინფორმაცია  უღუდუნ, ბიბლია გასაგებო იჩიებუდ, ნამდა დედამიწა კვარვკვალია რდუ (ესაია 40:22). ბიბლიას ზუსტას ინოჭარ, ნამდა „დედამიწა მუთუნს ვემკობუ“ (იობი 26:7). მართალ რე, ბიბლია მეცნიერულ წიგნი ვა რე, მარა თინა მეცნიერულო ხოლო ზუსტ რე. მართალო თეს ოკო ვეველდათო წიგნიშე, ნამუთ ღორონთიშ ნაჩუქერ რე?

9. ა) სოვრეშე იძირე, ნამდა ბიბლია ისტორიულო ზუსტ დო სანდო რე? ბ) მუს მირაგადნა ბიბლიაშ გურშენ მაჭარალეფიშ სიალალე?

⁹ ბიბლია ისტორიულო ხოლო ზუსტ დო სანდო რე. თექ კონკრეტულ ინფორმაცია რე მოჩამილი. ბიბლია ნამთინე კოჩის ხვალე სახელეფით ვემიშინუანსინ, თინეფი მიშ გამნარყი რდესინ თის ხოლო მირაგადნა. * ისტორიკოსეფ ხშირას ფულნა მუნეფიშ ხალხიშ ჩილათუეფს, მარა ბიბლიშ მაჭარალეფი ვა ფულუნდეს დო ალალას ჭარუნდეს მუჭოთ მუნეფიშ, თეშ მუნეფიშ ხალხიშ ჩილათუეფს ხოლო. მაგალთო, ბიბლიაშ ართ-ართ წიგნის, ნამუსით რიცხვეფი ჯოხო, მოსექ მუშ ხეთ ინაჭარ მუშ ჩილათა, ნამუშ გურშენ ღორნთიქ თინა სერიოზულო დასაჯუ (რიცხვები 20:2—12). თეცალ სიალალე ნაკლებო რე ისტორიულ მასალეფს, მარა ბიბლიაშე თენა არგამათ იძირე, მუშენდა ბიბლია ღორონთიშ სიტყვა რე.

10. მუშენ ვა რე გასაკვირ, ნამდა ბიბლია პრაქტიკულ წიგნი რე?

¹⁰ ბიბლია ღორონთშე შთაგონებულ რე, ათეშგურშენ „თინა მარგებელ რე ოგურაფალო, გიმოსაარგამებელო, გიშასწორებელო“ (2 ტიმოთე 3:16). ბიბლია პრაქტიკულ წიგნი რე. თექ ჯგირო რე ეჭარილ კოჩიშ ბუნება. თენა ვა რე გასაკვირ, მუშენდა ბიბლიაშ ავტორი, ჩქინ გუმაჭყაფალი, იეჰოვა ღორონთი რე. ღორონთის ჩქინ აზრეფი დო მუს ბგინაფლენთინ თინა ჩქინდე ბრელით უჯგუშო არჩქილე. იეჰოვას თინა ხოლო უჩქუ, მუ მოსაჭირნა ბედნერობაშო დო მუს ოკო ევუჩილითუათ დუდი.

11, 12. ა) მუ საკითხეფიშ გურშენ იჩუ იესოქ „გვალას ქადაგებაშ“ დროს? ბ) ნამ შხვა პრაქტიკულ საკითხეფშენ იჩიებ ბიბლია დო მუშენ რე თიშ ზუკოლ ირო კოჩიშ საჯგირობუოთ?

 ¹¹ ქობძირათ მათეშ 5—7 დუდეფს მოჩამილ იესოშ ქადაგება, ნამუსით „გვალას ქადაგება“ ჯოხო. თე ქადაგება შედევრო ითვალუ. გვალას ქადაგებას იესოქ მიშინუ გურიშ გაჩამალ საკითხეფი, მუნერით რე: მუჭო ვორდათ ბედნერეფი, მუჭო მუვაგვარათ უთანხმოებეფი, მუჭო იბლოცათ დო მუჭო ოკო უჯინათ  მატერიალურ საკითხეფს. იესოშ თე სიტყვეფს ამდღარ დღაშა ვა უდინუაფ ძალა დო პრაქტიკულ მნიშვნელობა.

¹² ბიბლიას მოჩამილ ნამთინე პრინციპი ოხუ ოჯახურ ცხოვრებას, ხანდას დო შხვეფწკუმა ურთიერთობას. თექ ინოჭარილ პრინციპეფი ირ კოჩის გიმადირთუ დო თიშ ზუკოლ ირო კოჩიშ საჯგირობუოთ რე. ბიბლიას მოჩამილ სიბრძნეშ გურშენ ღორონთიქ ესაიას ოჭარაფუ: „მა ვორექ იეჰოვა, სქან ღორონთი, ნამუთ გოგურუანს სქან საჯგირობუოთ“ (ესაია 48:17).

13. მუ დეტალეფი ოჭარაფუ იეჰოვაქ ესაიას ბაბილონიშ ეჭოფუაშ გურშენ?

¹³ ბიბლიას ქიანა წინასწარნარაგადა ინოჭარუ, თინეფშე ბრელქ უკვე შესრულ. მაგალთო, წინასწარმორაგადე ესაიაშ პიჯით, ნამუთ ჯვეშ წანაკოროცხუათ მა-8 საუკუნეს ცხოვრენდ, იეჰოვაქ წინასწარ თქუ, ნამდა ქალაქ ბაბილონს დიხას გასწორენდეს (ესაია 13:19; 14:22, 23). წინასწარნარაგადას დეტალურო რდუ ეჭარილ, მუჭო მოხვადუდ თენა. ბაბილონიშ ემაჭოფალეფ მალწყარს დასქირუანდეს დო ქალაქშა უჩხუპებუო გემშიშეს. თეშ გარდა, ესაიაქ თინა ხოლო თქუ, ნამდა ბაბილონიშ ემაჭოფალ მეფეშ სახელი, კიროსი იჸუაფუდ (წეკითხი ესაიაშ 44:27—45:2).

14, 15. მუჭო შესრულუ ესაიაშ წინასწარნარაგადაშ არძა დეტალქ, ნამუთ ბაბილონიშ ეჭოფუას ოხუდ?

¹⁴ სოდგარენ 200 წანაშ უკულ — ჯვეშ წანაკოროცხუათ 539 წანაშ 5-6 ოქტომბერიშ სერს ბაბილონს ჯარქ ქადირთუ. მი რდუ ჯარიშ უნჩაში? სპარსეთიშ მეფე კიროსი. ასე არძა პირობა რდუ თე წინასწარნარაგადუქ შესრულკონ თიშენ. მარა გეჭოფუნდუო კიროსიშ ჯარი ბაბილონს უჩხუპებუო, მუჭოთ წინასწანარაგადა რდუნ თეშ?

¹⁵ თიმ სერს ბაბილონელეფს დიდ შუმა-ჭკომუა უღუდეს. თინეფს ქალაქიშ ვერემხუტ კიდალეფიშ დინახალე დუდი თხილერო მიორჩქუდეს. კიროსიქ ქალაქიშ მალწყარს კალაპოტი დუთირუ. თეშ უკულ წყარიშ სიტომბაქ თეშ დერკუ, ნამდა ჯარქ კუჩხით გეგნორთუ დო ქალაქიშ კიდალეფს ქადირთუ. მარა,  მუჭო მიშეშეს ქალაქშა? თიმ სერს მუდგანერო იჸუნ ბაბილონელეფს ქალაქიშ დიდ კარეფქ ფართას ქუდასკიდეს!

16. ა) მუჭოთ ესაიაქ წინასწარ თქუნ, მუ აღოლედ ბაბილონს საბოლათ? ბ) მუჭო შესრულ წინასწარნარაგადუქ, ბაბილონს დღამუშის კოჩ ვედიხორუდუნ თიშ გურშენ?

¹⁶ ბაბილონიშ გურშენ წინასწარნარაგადა რდუ: „დღას ვედიხორუნა დო თაობაშე თაობაშა მითინ ვეცხოვრენს თექ, არაბი ვა დოდგუნს კარეს დო ჭყიშეფი ვა მასვანჯუანა თექ მუნეფიშ ოჭყიშალს“ (ესაია 13:20). თე სიტყვეფით ბაბილონიშ ეჭოფუაშე უმოს რე წინასწარნარაგადუ. თექ თინა ხოლო ჭარუ, ნამდა ბაბილონს დღამუშის კოჩი ვედიხორუდ. ამდღა არგამათ შემლებნა ბძირათ, ნამდა თე სიტყვეფქ დასურო შესრულუ. ბაღდადიშ (ერაყი) სამხრეთით, სოდგარენ 80 კილომეტრიშ იქილე, სოდეთ წოხოლე ჯვეშ ბაბილონ რდუნ, ამდღა მითინ ვა ცხოვრენს; თენა თის ამტკიცენს, ნამდა სინამდვილეს შესრულ თი სიტყვეფქ, ნამუთ იეჰოვაქ ესაიას წინასწარ ორაგადაფუ: „მოსპუალაშ ოქოსალით გოფხუშუნქ თინეფს!“ (ესაია 14:22, 23). *

17. მუჭო მიმანგარენა რწმენას ბიბლიურ წინასწარნარაგადუეფიშ შესრულება?

 ¹⁷ ბიბლიას ინოჭარილ წინასწარნარაგადუეფიშ შესრულება რწმენას მიმანგარენა. რახანს იეჰოვა ულირს ასრულენდ მუშ დუნაპირებუსინ, ირნერ სამანჯელ მიღუნა, ბჯერდან, ნამდა თინა ანწ ხოლო შეასრულენს მუშ დუნაპირებუს დო დედამიწას სამოთხეთ გინართინუანს (წეკითხი რიცხვეფიშ 23:19). ჩქი მიღნა მარადიულო ცხოვრებაშ იმენდი, მუშენდა თეს მოპირნა ღორონთი, ნამუთ ტყურას დღას ვა თქუანს (ტიტე 1:2). *

18. მუს იჩიებ პავლე მოციქულ „ღორონთიშ სიტყვაშ“ გურშენ?

¹⁸ მუჭოთ ბძირითინ თეშ, ბიბლია დასურო უნიკალურ წიგნი რე.  მარა ღორონთიშ სიტყვა ძვირფას ხვალე თით ვა რე, ნამდა თიშ წიგნეფ ართიანს ოთანხმუ, მეცნიერულო დო ისტორიულო ზუსტ რე დო პრაქტიკულ სიბრძნე დო სანდო წინასწარნარაგადუეფ რე მოჩამილი. მოციქულ პავლექ თქუ: „ღორონთიშ სიტყვა რე ცოცხალ დო მოქმედი, ირნერ ჟირგანშე ლასირელ ყამაშე უმოსო კვათუნს დო ინანჭუ თი ადგილს, სოდეთ ხორცი დო შური, სახსარეფი დო ძვალიშ ტვინ ირთუ დო არკვიენს გურიშ აზრეფს დო ზრახვეფს“ (ებრაელები 4:12).

19, 20. ა) მუჭო მიგეხვარებ ბიბლია გეგმირკვიე სქან დუდი? ბ) მუჭო შეილებ მარდიელ რდე ბიბლიაშ — ღორონთშე მოჩამილ განსაკუთრებულ საჩუქარიშ?

¹⁹ „ღორონთიშ სიტყვაშ“, ბიბლიაშ კითხირს შეულებ დოთირუას ჩქინ ცხოვრება. თინა მიმეხვარებნა, გეგმიბრკვიათ ჩქინ დუდი. შილებე იფჩიებუდათ, ნამდა ღოროთნი მიჸორა, მარა ჩქინ რეაქცია, ბიბლიაშ გურაფეფშე უჯგუშო მოძირანა ჩქინ აზროვნებას დო გურს.

²⁰ ბიბლია მართალო ღორონთშე მოჩამილ წიგნი რე. თენა რე წიგნი, ნამუთ ოკო იპკითხათ, იბგურუათ დო დუვაფასათ. ღორონთშე მოჩამილ საჩუქარიშ მარდიელ რდენ თიშენ, გაგრძელ თიშ გურაფა. თაშ გაკეთენქ-და, ქიგეგენქ მუშ კეთება ულამ ღორონთის კაცობრიობაშო. ანწიან დუდის ქიგეგენქ, მუ ულამ ღორონთის დო მუჭო შეასრულენს თინა მუშ განზრახვას.