Dul me Adek

Lubanga Tye ki Yub Ango pi Lobo?

Lubanga tye ki yub ango pi lobo ki pi dano?

Kikelo pyem i kom Lubanga nining?

Kwo mono bibedo nining i lobo i kare me anyim?

1. Lubanga tye ki yub ango pi lobo?

YUB pa Lubanga pi lobo tye ma mwonya mada. Jehovah mito ni lobo myero opong ki dano ma komgi yot, dok ma cwinygi yom. Baibul waco ni “Lubanga opito yadi i poto ma tye i Eden” dok ni en “omiyo yadi gutwi . . . kwa yadi ducu mamwonya ma neno ber, ki mabeco me acama.” I kare ma Lubanga ocweyo laco ki dako mukwongo, Adam ki Kawa, en oketogi i poto mamwonya ka owaco botgi ni: “Wunywal, wunya, wupong lobo, wulo bene.” (Acakki 1:28; 2:8, 9, 15) Pi meno yub pa Lubanga onongo tye ni dano myero gunywal lutino, giyar wang poto me paradic orom lobo ducu, dok gugwok wa lee bene.

2. (a) Wangeyo nining ni yub pa Lubanga pi lobo bicobbe? (b) Ngo ma Baibul loko i kom dano madok i kom kwo me labed naka?

² Itamo ni yub pa Lubanga Jehovah pi dano me kwo i lobo me paradic-ci, mono bicobbe ada? Lubanga owaco ni: ‘Dong aloko dok bene abitimo.’ (Icaya 46:9-11; 55:11) Eyo, gin ma Lubanga oketo i yubbe en bitimone ada! En wacciwa ni en ‘pe eketo lobo ci eweko onyobbe atata, en eketo ni dano twero bedo iye.’ (Icaya 45:18) Kit  dano ango ma onongo Lubanga mito ni gubed i lobo? Dok en onongo mito ni dano gubed iye pi kare ma romene? Baibul gamo ni: ‘Jo ma kitgi atir gibicamo lobo, dok gibibedo iye matwal.’​—Jabuli 37:29; Niyabo 21:3, 4.

3. Kit peko maraco ango ma tye ka timme kombeddi i lobo, dok man kelo lapeny ango?

³ Ngene kene ni man pud peya otimme. Kombeddi dano gitwo dok gito; gilwenyo dok gineke bene. Gin mo marac otimme. Ki lok ada, Lubanga gire pe omito ni lobo obed kit ma waneno tye kwede kombeddi-ni! Ngo ma otimme? Pingo yub pa Lubanga pe ocobbe? Pe tye buk me tekwaro mo ma dano aye ocoyo ma twero tittiwa lok man pien peko-ni ocakke ki i polo.

KIT MA LAMONE MAN OCAKKE KWEDE

4, 5. (a) Anga ma oloko bot Kawa kun tiyo ki twol-li? (b) Ngat ma kite ber dok ma gene twero doko lakwo nining?

⁴ Buk me acakki me Baibul tittiwa pi lajemo mo ma ojemo i kom Lubanga, ma obino i poto me Eden. Kitito ni en obedo “twol” ento en onongo pe obedo twol atwola-ni. Buk me agikki me Baibul nyuto ni en obedo “Ladot, ki Catan, labwol dano ma i wi lobo ducu.” Kilwonge ni ‘twol macon.’ (Acakki 3:1; Niyabo 12:9) Lamalaika man matek-ki, nyo cwec man ma obedo cwiny-nyi otiyo ki twol me lok ki Kawa, kit ma ladiro lok mo twero weko dwane winye calo dwan mo ma tye ka katti ki bot gin mo ma pe loko ma tye cok. Labongo akalakala mo, ngat ma obedo cwiny-nyi onongo tye i kare ma Lubanga yubo lobo pi dano.​—Yubu 38:4, 7.

⁵ Kit ma cwec pa Jehovah ducu onongo peke ki roc-ci, “Catan” ‘Larac-ci’ kono dok oa ki kwene? Ngene kene ni, latin pa Lubanga acel olokke odoko Larac pire kene. Man kono ocakke nining? Omyero waniang ni i kare-ni,  dano mo ma nongo kite ber twero doko lakwo. Meno twero cakke nining? En romo weko mitti marac dongo i cwinye. Ka obedo ka tamo pire, ci miti marac-ci twero bwoyo tamme woko. Ci ka kare onen, en romo timo miti marac moni ma en obedo ka tamone-ni.​—Yakobo 1:13-15.

6. Latin pa Lubanga mo matek ma obedo cwiny odoko Catan Larac nining?

⁶ Man aye gin ma otimme i kom Catan Larac. Nen calo en owinyo ka Lubanga ciko Adam gin ki Kawa ni omyero gunywal gupong lobo ki likwayogi. (Acakki 1:27, 28) Nen ni Catan otamo ni, ‘Dano magi ducu dong giromo woro an meka ka woro Lubanga!’ Pi meno, miti marac odongo i cwinye. Mot mot en ocako tic ki mitine-ni me bwolo Kawa ki loko lok goba i kom Lubanga. (Acakki 3:1-5) Pi meno en odoko “Larac” ma te lokke ni “Lakwot nying.” Kit meno bene, en odoko “Catan” ma tere ni “Lajemo.”

7. (a) Pingo Adam gin ki Kawa guto? (b) Pingo likwayo pa Adam gitii dok gito?

⁷ Pi tic ki goba ki diro, Catan Larac oweko Adam ki Kawa gukwero winyo dog Lubanga. (Acakki 2:17; 3:6) Macalo adwogine, gin guto kit ma onongo Lubanga owaco kwede ni gibito kace pe guwinyo cikke. (Acakki 3:17-19) Kit ma Adam dong odoko laroc i kare ma en obalo-ni, lutinone ducu gulako bal ki bote. (Jo Roma 5:12) Gin man obedo lanen ma kiromo porone ki bao lago matafali. Ka ce lago matafali mo tye ma ogom, ci gin ango ma timme i kom matafali ma kigoyo kwede? Matafali ducu katti ma ogom, nyo ma obale. I yo acelli, dano ducu gulako “kit meno ma ogom-ni” nyo me roc-ci ki bot Adam. Meno aye oweko dano tii dok to.​—Jo Roma 3:23.

8, 9. (a) Kit pyem ango ma Catan okelo? (b) Pingo Lubanga pe otyeko te lujemo meno cut cut?

 ⁸ I kare ma Catan odwoyo tam pa Adam ki Kawa me jemo i kom Lubanga, en i ada onongo tye ka telo wi jemo. Onongo tye ka kelo pyem i kom yo me loc pa Jehovah. Rom ma onongo Catan tye ka wacci: ‘Lubanga obedo laloc marac, ma loko lok goba dok kano jami mabeco  woko ki bot jo ma en loyo. Loc pa Lubanga pe mitte bot dano. Gin gitwero moko gin maber ki marac pirgi kengi. Dok gin gibibedo maber ka gitye i te locca.’ Lubanga onongo dong twero cobo kop me adot ki ayet meno nining? Jo mukene gitamo ni Lubanga onongo myero nene onek jo-ni woko. Ento meno onongo kono ogamo pyem pa Catan-ni? Onongo kono onyuto ni yo me loc pa Lubanga aye tye atir?

⁹ Kit pa Jehovah me ngolo kop atir onongo pe twero ye ki en me neko lujemo-ni cut. En otamo ni kare onongo mitte me gamo pyem pa Catan-ni i yo maber dok me nyuto ni Larac-ci obedo lagoba. Pi meno Lubanga omoko tamme me weko kare ki dano me lone kengi pi kare mo i te twero pa Catan. Tyen lok ma omiyo Jehovah otimo meno ki dok oweko ni kare kong okat malac ma peya en ocobo lok magi kibilok iye i Dul me 11 me buk man. Kombeddi kong watamu i kom lok man: Adam ki Kawa mono omyero nongo guye lok pa Catan, ma onongo peya otimigi gin mo maber wa acel-li? Onongo mono tye atir me ye ni Jehovah ma en aye omiyogi jami ducu ma gitye kwede-ni, obedo lagoba? Ka in, onongo kono itimo ngo?

10. In iromo cwako Jehovah nining i gamo pyem ma Catan okelo-ni?

¹⁰ Ber me tam i kom lapeny magi pien wan ki acel acel wakemme ki lok man i kareni. Pi meno, kare dong odong boti me miyo cwak bot Jehovah i kom pyem ma Catan okelo-ni. Dong iromo cwako Jehovah calo Lalocci kun ikonyo me nyuto ni Catan aye lagoba. (Jabuli 73:28; Carolok 27:11) Kama racce aye ni, jo manok keken ki i kin dano bilion i lobo-ni aye cwinygi yero me timone kumeno. Man kelo lapeny mo ma pire tek ni, Baibul mono ada pwonyo ni Catan aye tye ka loyo lobo-ni?

 ANGA MA LOYO LOBO MAN?

11, 12. (a) Atematema ma Yecu olimo-ni nyuto nining ni Catan aye laloc me lobo man? (b) Ngo mukene ma nyuto ni Catan aye loyo lobo man?

¹¹ Yecu pe obedo ki akalakala mo ni Catan aye laloc me lobo-ni. I nino mo acel, Catan onyuto bot Yecu “ker ducu ma i wi lobo ki deyogi” i yo me tango. Catan dok ocikke ni: “Magi ducu abimiyo boti, ka iryebbe iwora.” (Matayo 4:8, 9; Luka 4:5, 6) Tam kong i lok man. Ka onongo Catan aye pe obedo laloc me ker magi, onongo kono man obedo atematema bot Yecu? Yecu pe opyem ni gamente magi me lobo-ni ducu pe gubedo pa Catan. Adada, Yecu onongo kono opyem ka onongo nene Catan aye pe obedo lalocgi.

¹² Ngene kene gire ni, Jehovah aye Lubanga Won Twer Ducu, Lacwe polo ki lobo. (Niyabo 4:11) Kadi kumeno, pe tye ka kamo i Baibul ma waco ni Lubanga Jehovah nyo Yecu Kricito aye laloc me lobo-ni. Ada, i kare me cam me otyeno me agikki me kwo pa Yecu i lobo kany, en dok oloko i kom Catan aye ni “lalo lobo man.” (Jon 12:31; 14:30; 16:11) Baibul bene loko i kom Catan Larac ni en obedo “lubanga me lobo man.” (2 Jo Korint 4:3, 4) Madok i kom lajemo man nyo Catan, lakwena Jon ocoyo ni: “Lobo ducu tye i te loc pa Larac.”​—1 Jon 5:19.

KIT MA KIBIGIKO KWEDE TE LOBO PA CATAN

13. Pingo lobo manyen mitte mada?

¹³ Lobo tye ka doko rac medde ameda mwaka ki mwaka. Opong ki lweny, luwibye ma pe gigene, lutela dini ma lugoba, ki lutim bal maraco. Lobo-ni ducu ki pete tere pe dong twero yubbe. Baibul nyuto ni kare ma Lubanga bigiko iye te lobo man maracci i lwenye me Armagedon dong onyiko cok. Man biweko yo ki lobo manyen me kit ma atir.​—Niyabo 16:14-16.

14. Anga mono ma Lubanga oyero me bedo Laloc me Kerre, dok kitito pire con nining?

 ¹⁴ Lubanga Jehovah oyero Yecu Kricito me bedo Laloc me gamente nyo Kerre me polo. Baibul otito con ni: “Dong ginywalo botwa, latin, gimiyo botwa latin laco; gibimiyo en tingo twero me loc i wi gwoke, nyinge gibicako ni, . . . Laloc ma kelo kuc. Dong medde me locce ki kuc ma bia iye ka gikke bibedo pe.” (Icaya 9:6, 7) Ma dok i kom gamente man, Yecu opwonyo jo ma lubbe me lega ni: “Ker meri obin; giti gin ma imito i lobo kit ma gitiyo i polo.” (Matayo 6:10) Kit ma wabineno lacen i buk man, Ker pa Lubanga dong cok cokki bikwanyo gamente me loboni, ka dong leyo kaka-gi. (Daniel 2:44) Ci dong Ker pa Lubanga bikelo lobo me paradic.

LOBO MANYEN DONG TYE COK!

15. “Lobo manyen” ni obedo ngo?

¹⁵ Baibul niangowa atir ni: “Ento macalo en [Lubanga] yam ociko, watye ka kuro polo manyen ki lobo manyen, ka ma kit ma atir bedo iye.” (2 Petero 3:13; Icaya 65:17) Kare mukene ka Baibul oloko pi “lobo,” nongo tye ka lok i kom dano ma gibedo iye. (Acakki 11:1) Pi meno, “lobo manyen” me kit ma atir-ri obedo dul dano ma gitye ki cwak pa Lubanga.

16. Mot ango ma Lubanga tye kwede pi jo ma en cwako dok omyero watim ngo ka wek wanong mot meno?

¹⁶ Yecu ociko ni jo ma Lubanga cwakogi gibilimo mot me “kwo ma pe tum” i lobo manyen ma tye kabino-ni. (Marako 10:30) Tim ber iyab Baibulli i Jon 3:16 ki 17:3, ci ikwan gin ma Yecu owaco ni omyero watim ka wamito nongo kwo ma pe tum. Kombeddi, nen dong ki i Baibul kit mot ducu ma a ki bot Lubanga, ma jo ma gitimo jami ma mitte gibilimone i lobo Paradic ma tye ka bino-ni.

17, 18. Ngo ma weko watwero bedo ki gen ni kuc ki piny ma okwe mot bibedo tye i kabedo ducu ma i lobo?

 ¹⁷ Tim maraco, lweny, turo cik, ki tim gero dong bibedo pe matwal. “Dano marac dong bibedo pe matwal; . . . Ento jo mamwol aye gibicamo lobo.” (Jabuli 37:10, 11) Kuc bibedo tye pien ‘Lubanga bijuko lweny woko i wi lobo ducu.’ (Jabuli 46:9; Icaya 2:4) Ka dong ‘jo ma kitgi atir bimedde ameda ki camo kuc i kare me locce, dok kuc bene bibedo i lobo meno nakanaka nio wa i kare ma nongo dwe dong bibedo pe!’​—ma te lokke ni kuc bibedo matwal.​—Jabuli 72:7.

¹⁸ Luwor Jehovah gibibedo i piny ma okwe mot. I kare me Baibul, ka jo Icrael gulubo cik pa Lubanga, ci onongo gibedo ma piny okwe mot. (Lulevi 25:18, 19) Pud dong bibedo ber me bedo i piny ma okwe mot ma kumeno i Paradic ya!​—Icaya 32:18; Mika 4:4.

19. Pingo wangeyo ni cam bicek mabup i lobo manyen pa Lubanga?

¹⁹ Can cam bibedo pe. Laco Jabuli owaco ni: “Cam bene myero ocek mabup i lobone, opong wa wi godi-gu woko ducu.” (Jabuli 72:16) Lubanga Jehovah bigoyo tanga i kom jone ma kitgi atir, ci ‘lobo biceko cam mabup.’​—Jabuli 67:6.

20. Pingo wabedo labongo akalakala ni lobo ducu bidoko paradic?

²⁰ Lobo ducu bidoko paradic. Odi mabeco ki kabedo ma neno mit bileyo ka kabedo ma jo ma lubal gubalo. (Icaya 65:21-24; Niyabo 11:18) Ka kare woto ki kato, but lobo mogo ma nongo dong kiyubo maber bibedo ka medde nio wang ma lobo ducu odoko ma mwonya dok ma ceko cam calo poto me Eden. Dok Lubanga ‘biyabo cinge ci miyo gin makwo ducu giyeng.’​—Jabuli 145:16.

21. Ngo ma nyuto ni kuc bibedo tye i kin dano ki lee?

²¹ Kuc bibedo tye i kin dano ki lee. Lee tim ki ma  paco ducu gibicam kacel. Kadi wa latin matidi bene pe bilworo lee ma giger i kare-ni.​—Icaya 11:6-9; 65:25.

22. Ngo ma bitimme i kom two?

²² Two dong bibedo peke. Macalo Laloc me Ker pa Lubanga, Yecu bicango two i yo ma lamal ma loyo i kare ma en onongo pud tye i lobo. (Matayo 9:35; Marako 1:40-42; Jon 5:5-9) Dong, ‘pe tye dano mo ma biwaco ni, An koma lit.’​—Icaya 33:24; 35:5, 6.

23. Pingo gen me nicer bikelo yomcwiny botwa?

²³ Jo me amara ma guto kibicerogi ki gen me bedo kwo pi nakanaka. Jo ducu ma guto dok ma wi Lubanga po i komgi kibicerogi woko. Ki lok ada, “dano gibicer woko, jo ma kitgi atir wa ki jo ma kitgi pe atir.”​—Tic pa Lukwena 24:15; Jon 5:28, 29.

24. In iwinyo nining i lok kom bedo i lobo i Paradic?

²⁴ Anyim mamwonya adada tye ka kuro jo ma gimito ngeyo Lubanga Jehovah Lacwecwa Madit, ki dok me tic pi en! Yecu onongo tye ka lok pi Paradic ma tye ka bino anyimmi i kare ma en ocikke bot latim bal ma guto kacel kwede ni: “Wabibedo kwedi i Paradic.” (Luka 23:43) Pire tek ni omyero wapwony lok mapol i kom Yecu Kricito, ma en aye kibitic kwede me kelo mot magi ducu.

GIN MA BAIBUL PWONYO

▪ Yub pa Lubanga pi loko lobo me doko paradic bicobbe.​—Icaya 45:18; 55:11.

▪ Catan aye pud tye ka loyo lobo i kare-ni.​—Jon 12:31; 1 Jon 5:19.

▪ Lubanga bimiyo mot mapol bot dano i lobo manyen ma tye ka binoni.​—Jabuli 37:10, 11, 29.

[Peny me Kwan]

[Cal ma tye i pot karatac 30]

Catan onongo romo miyo ker me lobo-ni bot Yecu nining ka onongo en pe obedo lalocce?

 [Cal ma tye i pot karatac 35]