1. Prithume pasot Devacho kitem ud’dhex aslo?

HEA prithume pasot Devacho ud’dhex ekdom boro aslo. Ak’khe prithumer lok, khuxalkaien ani borea bolaiken ravlole taka zai asle. Bible sangta, Jehova ‘Devan udente vatten ek bag laili’ ani tantunt tannem ‘pollounk sobit ani khaunk ruchik, zhaddam kirlom-xim kelim’. Tea uprant tannem, Adanv hea poilea dadleak ani tachi bail Evek rochun, tea sobit bagent ghatlim ani mhunnttlem, “Choddat ani vaddat, prithum bhorat ani tika tumchea hata khal dovrat.” (Utpoti 1:28; 2:8, 9, 15) Tor, lokank bhurgim zaunchim, tannim soglea zonvaranchi kallji gheunchi ani ak’kho sonvsar sobit bage sarko korcho, ho Devacho ud’dhex aslo.

2. (a) Devan munxam pasot chintlam tem to khorench kortolo mhunn ami koxem sangonk zata? (b) Bible-a pormonnem hea prithumer koslo lok jietolo ani kitlim vorsam?

² Devan munxam pasot chintun dovorlolem soglem to purnn kortolo oxem tumkam dista? Dev mhunntta, “Hanvem sanglam tem Hanv kortolonch.” (Izaias 46:9-11; 55:11) Hoi, Devan jem kitem chintlam tem to kortoloch. Tannem hi prithum bexttich rochunk nam, punn ‘mon’xamnim thoim vosti korunk ti akarlea’. (Izaias 45:18) Devak hea prithumer koslo lok ravlolo zai?  Ani to lok kitlim vorsam porian jielolo taka zai? Bible amkam hea prosnancho zobab dita. Tantunt mhunntta, “Des zatolo borea mon’xanchem daiz: thoim tim tthikann kortolim sasnnachea sasnnak!”—Stotr 37:29; Prokasovnni 21:3, 4.

3. Sonvsaracher kosli vaitt poristhiti asa, ani hem polloun amchea monant kosle prosn ietat?

³ Devan munxam pasot chintlolem tem azunui purnn zaunk na. Atam, lok duent zata ani morta. Te zhogoddttat, ani eka-mekacho jiv pasun kaddttat. Punn oxem zal’lem Devak kednanch naka aslem. Torui astana, aiz oxem kiteak ghoddtta zait? Devacho ud’dhex azunui purnn kiteak zaunk na? Hea prosnancho zobab amkam munis vo tannem boroilolem khoinchench pustok diunk xokona, karonn hachi survat sorgar zal’li.

4, 5. (a) Sorpa udexim Eve kodden konn uloilo? (b) Ek boro munis chor koso zata?

⁴ Bible-antlea poilea pustokant Devachea dusmana vixim boroilolem asa. Ho dusman poilech pavtt Eden bagent dislolo. Thoim taka ek “sorop” mhunnttla, punn to khoroch ek sorop naslo. Bible-achea nimannea pustokant, taka “Devchar ani Soitan” mhunnttlolo asa zo ak’khea sonvsarak fosoita. Taka “adlo sorop” oxem-i mhunnttlam. (Utpoti 3:1; Prokasovnni 12:9) Khorem mhunnttlear, Soitan ek xoktivont ainz zaun asa. Eve kodden ulounk, hea xoktivont ainzan eka sorpak uzar kelo. Zoso baulecho khell dakhoupi, apunn avaz kaddun bauli uloita mhunn dakhoita, tosoch ho ainz sorpa udexim Eve kodden uloilo. Dev munxam pasot sonvsar rochtana, her ainzam sangata ho-ui ainz thoim aslo.—Job 38:4, 7.

 ⁵ Jehovan rochlolem tem soglem borem aslem. Toxem zalear, ho “Devchar” vo “Soitan” khoim thaun ailo? Sompea ritin sangchem mhunnttlear, Devcharak vo Soitanak Devan rochunk na, punn Devacho ek xoktivont ainz, apunnuch Devchar zalo. Hem koxem zaunk xokta? Hache vixim somzonk, ami ek udharonn gheum-ia. Eka tempar boro aslolo munis, chor zalo mhunn tumi aikolam astolem. Ho boro munis, chor koso zalo? Poilea suvater, hea munxachea kallzant as zali astoli. Magir, to tea axe vixim chintit ravlolean ti as tachea kallzant vaddot voita. Ani uprant sondhi melltta tednam to chori korta.—Jakob 1:13-15 vachat.

6. Devacho ek xoktivont ainz koxe ritin Devchar ani Soitan zalo?

⁶ Soitana vixim oxench zalem. Dev, Adanv ani Evek bhurgim zaun, tanchea sonstin ak’khi prithum bhorat mhunn sangtana, Soitanan aikololem. (Utpoti 1:27, 28) Soglea munxamnim Devak soddun, apli bhokti kel’li taka zai asli. Hi chukichi as tachea kallzant vaddot geli. Ani uprant sondhi mell’lli tednam Evek fosounk tannem Deva vixim fott marli. (Utpoti 3:1-5 vachat.) Hea toren, Devacho ek xoktivont ainz Devchar ani Soitan zalo. “Devchar” mhunnttlear “fott marun nanv pidd’ddear korpi” ani “Soitan” mhunnttlear “Dusman.”

7. (a) Adanv ani Evecher moronn kiteak ailem? (b) Ami kiteak zannttim zatat ani mortat?

⁷ Soitanan fott marun, Adanv ani Evek Devachi adnea moddunk uksailim. Tachem aikon tannim Devachi adnea moddli. (Utpoti 2:17; 3:6) Adnea moddlear tim mortolim mhunn Devan adinch sanglolem, ani toxench zalem. Tancher moron ailem. (Utpoti 3:17-19) Adanv ani Even Devachi adnea moddun patok kel’lean, tanchi ak’khi sonsot patki zali. (Romkarank 5:12 vachat.) Hem somzonk amchean ek udharonn gheunk zata.  Panv kortat tem aidon tumi polloilam astolem. Tea aidonak chep poddloli asa zalear, tantunt kel’le panv koxe zatole? Tankam sogleank chep poddttolem nhoi! Tech bhaxen, Adanv ani Even kel’lem patok amcherui ailem karonn ami tanchim bhurgim. Hea patkak lagon ami soglim zannttim zatat ani mortat.—Romkarank 3:23.

8, 9. (a) Soitanan Jehovachea add koslo prosn ubarlo? (b) Virodh kortoleank Devan tednanch kiteak marunk na?

⁸ Adanv ani Evek patok korunk uksailim tednam thaun, Soitanan Devacho virodh korunk suru kel’lo. Dev jea ritin Raj choloita, tacher tannem prosn ubarlo. Soitan dakhounk sodhtalo ki, ‘Dev ek vaitt raza, to fott marun, munxam thaun borem tem lipoita. Ani munxak borem kitem ani vaitt kitem tem Devan sangpachi goroz na. Punn munxamnim apleak zai tem korunk zata.’ Apunn raz choloit zalear munis chodd sukhi astolo, oxem to mhunnonk sodhtalo. Hea boglanttacho Dev koso zobab ditolo? Tannem Adanv, Evek ani Soitanak thoinch marun uddounk zai aslem, oxem ghoddie thodde mhunnot. Punn Devan toxem kel’lem zalear, Soitanan ghatlolem boglantt chukichem mhunn koxem kollon ieta aslem? Ani Dev sarke ritin Raj choloita hem koxem kollttolem aslem?

⁹ Jehova Dev sarki nit korpi zaun asa. Ani taka lagon tannem, aplo virodh kortoleank tednanch marun uddounk na. Soitanan ghatlolea boglanttacho sarko zobab diunk, ani Devchar fottkiro mhunn dakhounk, thoddo vell diuncho poddttolo mhunn Devan tharailem. Taka lagon, tannem munxank Soitanachea odhikara khala zai tem korunk soddun dilim. Punn Jehovan oxem kiteak kelem, ani Soitanan  ubo kel’lea prosnacho zobab diunk, to itlo vell kiteak laita tem ami hea pustokachea odheai 11-ant zannam zatolim. Sod’deak ami fuddlea prosnam vixim chintun polloum-ia. Soitanan, Adanv ani Eve pasot kainch borem korunk naslem torui tannim tacher visvas dovorlo. Oxem korun tannim sarkem kelem kai? Ani jea Devan tankam soglem dilolem, taka fottkiro mhunn  manop sarkem aslem? Tumi tanchea zagear aslolim zalear, kitem korpachim?

10. Jehovak sangat diunk tumkam kosli sondhi asa?

¹⁰ Hea prosnam vixim chintop gorjechem, karonn aiz amchea-i mukhar oslech prosn ietat. Oslea vellar tumi kitem kortolim? Jehova sangta tem aikon, to tumcho Raza mhunn dakhounk tumkam ek bori sondhi asa. Oxem korun Soitan fottkiro mhunn tumchean dakhounk zata. (Stotr 73:28; Mhonn’nneo 27:11 vachat.) Punn aiz choddxe lok Soitanachem aikotat. Hache voilean, ak’khea sonvsaracher Soitan odhikar choloita mhunn kollon ieta. Hache vixim Bible kitem sangta?

11, 12. (a) Hea sonvsaracher Soitan odhikar choloita mhunn Jezucher ailolea tallnnentlean amkam koxem kolltta? (b) Soitan hea sonvsaracho odhikari mhunn Bible-ant anik khoim boroilolem asa?

¹¹ Soitan hea sonvsaracher odhikar choloita mhunn Jezuk matso pasun dubhav naslo. Ek pavtt Soitanan Jezuk tallnnent ghalunk, “sonvsarantleo soglleo razvottkio” dakhoileo. Ani, “mhaka nomoskar korxi zalear, hanv hem sogllem tuka ditolom” mhunn tannem Jezuk sanglem. (Matev 4:8, 9; Lukas 4:5, 6) Hea rajeancho odhikari Soitan naslo zalear, tim rajeam dakhoun to Jezuk tallnnent koso ghalunk xoktalo? Hachea voilean, sonvsarantlim rajeam Soitanachea tabeant asat ani to odhikar choloita mhunn kollon ieta. Tim tachea tabeant nasli zalear, Jezu taka tednanch sangta aslo.

¹² Jehova Dev, sorv-xoktivont ani soglea vostuncho rochnnar zaun asa tem khorem. (Prokasovnni 4:11)  Torui, hea sonvsaracher Jehova Dev vo Jezu Krist raz choloita, mhunn Bible-ant khoinch boroilolem na. Punn Jezun, “hea sonvsaracho odhikari” Soitan mhunn sanglolem asa. (Juanv 14:30; 12:31; 16:11) Bible-ant taka, ‘hea iugacho dev’, oso-i mhunnttla. (2 Korintkarank 4:3, 4) Toxench apostl Juanv Soitana vixim boroitana, “ak’kho sonvsar Noxtteachea tabeant asa” mhunn sangta.—1 Juanv 5:19.

13. Amkam novea sonvsarachi kiteak goroz asa?

¹³ Sonvsarant polloilem zalear, disan-dis vaittponn vaddot asa. Zhuzant vantto gheupi soinik, sorkar choloupi fotting munis, dhongi dhormik fuddari ani sudorna tosle opradi hea sonvsarant sogleakuch bhorlole asat. Ho ak’kho sonvsar kosoch sudronk xokona. Punn, Dev beginuch hea sonvsarantlem soglem vaittponn kaddun uddoitolo mhunn Bible amkam sangta. Hem to, Armageddon mhunnttlolea zhuza udexim kortolo. Ani tea uprant, eka novea sonvsarachi survat zatoli.—Prokasovnni 16:14-16.

14. Aplea sorkaracho raza mhunn Devan konnank vinchun kaddla ani tache vixim tannem kitem sanglolem?

¹⁴ Jehova Devan, aplea sorginchea Rajeacho, vo sorkaracho raza Jezu Krist mhunn vinchun kaddla. Khub vorsam poilim, Bible-ant hea vixim boroun dovorlolem. Thoim mhunntta, “zolmola amkam ek ballok, dila amkam ek put: tachea khandar odhikar ghal’lo asa; ani taka hea nanvan vollkhotolim . . . Xanticho Kunvor. Tachi razvottki soglleak pavtoli, ani tache xantik mitmer” vo xevott ascho na. (Izaias 9:5, 6) Hea Rajea vixim Jezun aplea xisank magnnem korunk xikoilem. “Tujem Raj [amkam] ieum, Tuji khuxi sorgar zata toxi  sonvsarant zaum”. (Matev 6:10) Dev aplem Raj haddun, hea sonvsarachea soglea sorkarank beginuch koso kaddun uddoitolo hache vixim ami hea pustokachea attvea odheai-ant xiktolim. (Daniel 2:44 vachat.) Ani sonvsarantlea soglea rajeank kaddlea uprant, Dev ho ak’kho sonvsar ek sobit bage sarko kortolo.

15. ‘Novi prithum’ mhunnttlear kitem?

¹⁵ Bible-a pormonnem, “Ami novea mollbachi ani nove prithumechi vatt polletanv, kiteak oxi Devan amkam bhas dilea: thoi sogllem Devak man’ta toxem zatolem.” (2 Pedru 3:13; Izaias 65:17) Thodde pavtt, Bible-ant ‘prithum’ ho sobd, lokankui uzar kel’lo asa. (Utpoti 11:1) Taka lagon, hanga hi ‘novi prithum’ mhunnttlear Devak manvota te sogle nitivont lok.

16. Devak manvota tea lokank koslem moladik dennem mellttolem ani tem mellonk ami kitem korchem poddttolem?

¹⁶ Devak manvota tea lokank, novea sonvsarant ‘sasnik jivitachem’ moladik dennem mellttolem, oxi Jezun bhas dilea. (Marku 10:30) Hem jivit mellonk ami kitem korchem poddttolem mhunn tannem sanglem? Tumi tumcho Bible Juanv 3:16 ani 17:3 ukto korun, Jezu hanga kitem mhunntta tem vachunk zata. Sobit bag zal’lea prithumer, sasnak jietolea lokank koslim besanvam astolim, tem tumi Bible-antlean zannam zatolim.

17, 18. Prithumecher sogleak xanti ani surokxa astoli mhunn ami khatren kiteak sangonk zata?

¹⁷ Vaittponn, zhuzam, oprad ani zhogddim aschim na. “Noxtte monis nanch zatole . . . Punn Des zatolo khaltea mon’xancho.” (Stotr 37:10, 11) ‘Soglea prithumer Dev zhuzam sompoitolo’ taka lagon sonvsarbhor  xanti astoli. (Stotr 46:9; Izaias 2:4) Tednam promannik lok xantin ravtole ani tem-ui ‘chondrim aso-sor’, mhunnttlear sasnachea sasnank!—Stotr 72:7.

¹⁸ Jehovachea utra pormonnem choltat te lok surokxit astole. Adlea kallar, Israel lok Devachea kaideam pormonnem choltale ani taka lagon Jehova Devan tankam surokxit dovorle. (Levi-Xastr 25:18, 19) Toxench, fuddarak zaunchi asa tea sobit bagent, Dev aplea visvaxi sevokank surokxit dovortolo. To kitlo khuxalkaiecho vell astolo nhoi!—Izaias 32:18 vachat; Mika 4:4.

19. Novea sonvsarant jevonn-khann khub astolem mhunn amchean koxem mhunnonk zata?

¹⁹ Jevonn-khannachem unnemponn aschem na. Stotr boroupean mhunnttlem, “Porvotanche tengxe meren . . . piktolo dhanno” ani ak’khea “desant follanchi pikavoll” zatoli. (Stotr 72:16) Aplea utra pormonnem choltat tea munxancher, Jehova Dev besanv ghaltolo, ani ‘zomin aplem pik ditoli.’—Stotr 67:6.

20. Ak’khi prithum ek sobit bag zatoli mhunn ami kiteak khatri dovrunk zata?

²⁰ Ak’khi prithum ek sobit bag zatoli. Munxamnim pidd’ddear kel’lea zomnir pasun, hea vellar lok novim ghoram bandtole ani sobit zhaddam roitole. (Izaias 65:21-24 vachat; Prokasovnni 11:18) Vorsam voita toxim, ak’khi prithum Eden bage sarki sobit ani folladik zait ravtoli. Dev aplo “hat ugddun . . . sogllea rochnnank dhadoxi” kortolo.—Stotr 145:16.

21. Munxam ani zonvaram modem xanti astoli mhunn koxem kolltta?

²¹ Munis ani zonvaram xantin jietolim. Ranvotti ani ghorant postat tim zonvaram sangata ravtolim. Ami bhietat toslea zonvaram sangata pasun, ek lhan bhurgem khellttolem.—Izaias 11:6-9 vachat; 65:25.

22. Duensanchem kitem zatolem?

 ²² Duens aschem na. Prithumer astana, Jezun thoddea lokank borim kel’lim. Sorgar, Devachea Rajeacho raza zal’lean, fuddarak to ak’khea sonvsaracher aslolea lokank boro kortolo. (Matev 9:35; Marku 1:40-42; Juanv 5:5-9) Ani tednam “thoinsor ravpi konnuch ‘apunn boro na mhonn’ sangcho na.”—Izaias 33:24; 35:5, 6.

23. Melolim portun jivont zatolim hem zannam zaun amkam khuxi kiteak bhogta?

²³ Melolim munxam portun jivont zatolim ani tankam sasnank jieunk mellttolem. Devachea ugddasant asat tim soglim melolim munxam, portun jivont zatolim. Bible sangta, “borea toxench vaitt mon’xanchem punorjivontponn astolem.”—Itihas 24:15; Juanv 5:28, 29 vachat.

24. Novea sonvsarant ravchea vixim tuka koxem dista?

²⁴ Jehova Deva vixim xikon, tachi seva korunk sodhtat tanchea pasot, kitlo boro fuddar asa nhoi! Ho fuddar amkam mellttolo zalear, Jezu Kristachi-i vollokh ghevop gorjechem zaun asa. Karonn, him soglim besanvam amkam tachea udexim favo zatolim.