1. Elalakano laKalunga olashike li na sha nedu?

ELALAKANO laKalunga li na sha nedu olikumwifa shili. Jehova okwa hala edu li kalwe kovanhu va hafa nove na oukolele. Ombibeli otai ti kutya “Kalunga okwa twika oshikunino muEden” ndele “okwa menifa . . . omiti dilili da wapala okutala nodinyenye okuliwa.” Eshi Kalunga a shita omulumenhu nomukainhu wotete, Adam naEva, okwe va tula meumbo olo liwa, ndele te va lombwele a ti: “Dalafaneni nokuhapupala ndee yadifeni edu, lo nali kale mepangelo leni.” (Genesis 1:28; 2:8, 9, 15) Hano osha li elalakano laKalunga opo ovanhu va kale ve na ounona, va tamunune mo oshikuninoumbo osho fiyo sha mana ko edu alishe, nokufila oshisho oinamwenyo.

2. (a) Otu shi shii ngahelipi kutya elalakano laKalunga li na sha nedu otali ka wanifwa? (b) Ombibeli otai ti ngahelipi shi na sha nokukala fiyo alushe kwovanhu?

² Mbela oto diladila kutya elalakano laJehova Kalunga li na sha nokukala kwovanhu meduparadisa onali ka wanifwe ngoo fiku limwe? Kalunga okwa ti: “Ngaashi nde shi tongele, osho handi ka ninga yo.” (Jesaja 46:9-11; 55:11) Heeno, osho Kalunga a lalakanena ote ke shi ninga shili! Ota ti kutya ina “shita [edu] li kale ombuwa, ndelenee okwe li ma li kalwe.” (Jesaja 45:18) Kalunga okwa hala ovanhu voludi lilipi va kale  kombada yedu? Nokwa hala va kale ko oule wefimbo li fike peni? Ombibeli otai nyamukula tai ti: ‘Ovayuki, vo otava ka fyuulula edu, ndee tava kala mo alushe.’ — Epsalme 37:29, yelekanifa OB-1986; Ehololo 21:3, 4.

3. Eenghalo dinyikifa oluhodi dilipi di li kombada yedu kunena, naasho osha etifa omapulo elipi?

³ Osha yela kutya osho inashi ningwa natango. Ovanhu kunena otava ehama notava fi; otava lwifafana nokudipaafana nokuli. Opwa ningwa epuko lasha. Ndele doshili, Kalunga ina lalakanena opo edu li kale ngaashi tu li wete kunena! Oshike sha ningwa po? Omolwashike elalakano laKalunga inali wanifwa? Kape na embo londjokonona la shangwa kovanhu tali dulu oku tu lombwela, molwaashi oupyakadi owa hovela meulu.

4, 5. (a) Olyelye a li a popya lelalela naEva okupitila meyoka? (b) Ongahelipi omunhu oo kwa li e li nawa nomunashili ha dulu okuninga omulunga?

⁴ Embo lotete lOmbibeli otali tu lombwele shi na sha nomupataneki waKalunga oo a holokele moshikunino shaEden. Ota hokololwa e li “eyoka,” ndele ka li ashike oshinamwenyo shongaho. Embo laxuuninwa lOmbibeli otali mu popi kutya ota “ifanwa ondiaboli naSatana, ou ta hongaula ounyuni aushe.” Okwa ifanwa yo ‘eyoka likulu.’ (Genesis 3:1; Ehololo 12:9) Omweengeli oo omunaenghono ile oshishitwa osho shopamhepo ihashi monika, osha longifa eyoka li popye naEva, ngaashi naanaa omunhu e na owino ta dulu okuningifa ondaka yaye i kale ya fa tai di moshipopifa. Omunhu oo wopamhepo osha yela kutya opo a li eshi Kalunga a shitila ovanhu edu. — Job 38:4, 7.

⁵ Molwaashi oishitwa aishe yaJehova oya li ya shitwa ya wanenena, mbela olyelye a shita “Ondiaboli” “Satana”? Oku shi popya paunafangwa, umwe womovanamati vaKalunga vopamhepo ovanaenghono okwe lininga ye mwene Ondiaboli. Osho okwa li tashi shiiva ngahelipi? Doshili, kunena omunhu oo  kwa li e li nawa nomunashili ota dulu okuninga omulunga. Osho ohashi ningwa ngahelipi? Omunhu otashi dulika a efe omahalo a puka a kule momutima waye. Ngeenge okwa kala ta diladila kuo, omahalo a puka a tya ngaho otaa dulu okukala e na eenghono dinene. Opo nee ngeenge omhito oya holoka, ota dulu okukatuka she likolelela komahalo mai oo a kala ta diladila kuo. — Jakob 1:13-15.

6. Ongahelipi omona waKalunga umwe wopamhepo omunaenghono a ninga Satana Ondiaboli?

⁶ Osho osho sha ningwa shi na sha naSatana Ondiaboli. Oku na okukala kwa li a uda Kalunga ta lombwele Adam naEva va dale ounona nova yadife edu noludalo lavo. (Genesis 1:27, 28) ‘Doshili, ovanhu aveshe ovo otava dulu okulongela nge ponhele yokulongela Kalunga!’ Osha yela kutya Satana osho a li a diladila ngaho. Onghee hano, okwa li a kulika omahalo a puka momutima waye. Xuuninwa, okwa katuka onghatu a pukife Eva moku mu lombwela oipupulu kombinga yaKalunga. (Genesis 3:1-5) Kungaha, okwa ninga “Ondiaboli,” osho tashi ti “Omulundili.” Nokwa ninga yo “Satana,” osho tashi ti “Omupataneki.”

7. (a) Omolwashike Adam naEva va fya? (b) Omolwashike oludalo alishe laAdam hali kulupa nohali fi?

⁷ Mokulongifa oipupulu nekonda, Satana Ondiaboli okwa ningifa Adam naEva va nyone kuKalunga. (Genesis 2:17; 3:6) Oshidjemo, xuuninwa ova fya, ngaashi Kalunga a popile kutya otava ka fya ngeenge inava dulika. (Genesis 3:17-19) Molwaashi Adam okwa ninga omunhu ina wanenena eshi a nyona, oludalo laye alishe ola fyuulula oulunde kuye. (Ovaroma 5:12) Onghalo oyo otai dulu okufaafanifwa noshipana osho hashi longifwa okuteleka eemboloto. Ngeenge oshipana oshi na embodokela, oshike tashi ka ningwa po nomboloto keshe oyo tai telekwa moshipana osho? Omboloto keshe otai ka kala i na embodokela ile epuko. Sha faafana, omunhu keshe okwa fyuulula kuAdam embodokela lopafaneko, sha hala okutya okuhawanenena. Omolwaasho ovanhu aveshe hava kulupa nohava fi. — Ovaroma 3:23.

8, 9. (a) Nope he na omalimbililo, Satana okwa eta po eshongo lilipi? (b) Omolwashike Kalunga ina hanauna po ovanashibofa meendelelo?

 ⁸ Eshi Satana a ningifa Adam naEva va nyone kuKalunga, okwa li lelalela ta xumifa komesho ounashibofa. Okwa li ta shongo onghedi yaJehova yokupangela. Satana okwa li ta ti lelalela kutya: ‘Kalunga omupangeli mwii. Oha popi oipupulu noha ngungunine ovapangelwa vaye oinima iwa. Ovanhu inava  pumbwa Kalunga e va pangele. Otava dulu okutokola kuvo vene osho shi li mondjila naasho sha puka. Notava ka kala ve li nawa koshi yepangelo lange.’ Kalunga okwa li ta ka ungaunga ngahelipi neshongo olo tali ulike odino? Vamwe ohava diladila kutya Kalunga okwa li ashike e na okudipaa ovanashibofa ovo. Ndele mbela osho okwa li ngoo tashi ka kandula po eshongo laSatana? Mbela osho ngeno osha ka ulika kutya onghedi yaKalunga yokupangela oi li mondjila?

⁹ Eliudo laJehova li na sha nouyuki la wanenena kala li le mu pitika a hanaune po ovanashibofa ovo efimbo olo. Okwa li a tokola kutya opa li pa pumbiwa efimbo opo a nyamukule eshongo laSatana monghedi tai mbilipaleke notai ulike kutya Satana omunaipupulu. Onghee hano, Kalunga okwa tokola kutya ota ka efa ovanhu ve lipangele vo vene oule wefimbo koshi yenwefemo laSatana. Etomheno kutya omolwashike Jehova e shi ningila nomolwashike a efa pa pite efimbo fimbo ina kandula po eemhata odo, otali ka kundafanwa mEtukulwa eti-11 lembo eli. Ndele oshiwa okudiladila kombinga yaashi: Mbela Adam naEva ova li ve li mondjila eshi va itavela Satana, oo a li ine va ningila sha shiwa nande onale? Mbela osha li sha yuka kuvo okwiitavela kutya Jehova oo a li e va pa keshe shimwe osho va li ve na oku li omunaipupulu omukwanyanya? Ngeno okwa li oove, ngeno owa ninga ngahelipi?

10. Ongahelipi to dulu okuyambidida ombinga yaJehova mokunyamukula eshongo laSatana?

¹⁰ Oshiwa okudiladila shi na sha nomapulo oo, molwaashi keshe umwe womufye okwa taalela omhata oyo tuu oyo kunena. Heeno, ou na omhito okuyambidida ombinga yaJehova mokunyamukula eshongo laSatana. Oto dulu okutambula ko Jehova e li Omupangeli woye nokukwafela u ulike kutya Satana omunaipupulu. (Epsalme 73:28; Omayeletumbulo 27:11) Shi nyikifa oluhodi, ovanhu ashike vanini vomomamiliyona omayovi mounyuni ou hava ningi ehoololo la tya ngaho. Osho otashi pendula epulo la fimana kutya: Mbela Ombibeli otai hongo shili kutya Satana oye omupangeli wounyuni ou?

11, 12. (a) Ongahelipi okuyelekwa kwaJesus taku holola kutya Satana oye omupangeli wounyuni ou? (b) Oshike vali tashi ulike kutya Satana oye omupangeli wounyuni ou?

¹¹ Jesus ka li nande a limbililwa kutya Satana oye omupangeli wounyuni ou. Monghedi yopashikumwifilonga yonhumba, Satana okwa ulikilile Jesus pomhito imwe “omauhamba aeshe omounyuni nefimano lao.” Opo nee Satana okwa udanekela Jesus a ti: “Aishe ei ohandi i ku pe, ngenge to twile nge eengolo ndee to linyongamene nge.” (Mateus 4:8, 9; Lukas 4:5, 6) Diladila shi na sha naasho. Mbela ngeno onghendabala yokupa Jesus omauhamba oo oya kala ngoo eyeleko kuye ngeno Satana haye a li omupangeli wao? Jesus okwa dimina kutya omapangelo aeshe ounyuni oku li meke laSatana. Doshili, ngeno Satana haye a li omupangeli wao, ngeno Jesus ine shi dimina.

¹² Doshili, Jehova oye Kalunga omunaenghono adishe, Omushiti weshito alishe likumwifi. (Ehololo 4:11) Ndelenee kape na nande opapa Ombibeli tai ti kutya Jehova Kalunga ile Jesus Kristus oye omupangeli wounyuni ou. Doshili, Jesus okwa popya Satana kondadalunde e li “omupangeli wounyuni ou.” (Johannes 12:31; 14:30; 16:11) Ombibeli otai ulike nokuli kuSatana Ondiaboli e li ‘kalunga kounyuni ou.’ (2 Ovakorinto 4:3, 4, OB-1954) Shi na sha nomupataneki oo ile Satana, Omukriste omuyapostoli Johannes okwa shanga a ti: ‘Ounyuni aushe ou li mepangelo lomunawii.’ — 1 Johannes 5:19.

13. Omolwashike pe na omhumbwe younyuni mupe?

¹³ Mokweendela ko kwomido, ounyuni otau ende tau ningi onhele ya nyika oshiponga neenghono. Ou yadi omatanga ovakwaita taa lwifafana, ovanapolotika ve he fi ovanashili, ovawiliki vomalongelokalunga ovanaihelele nosho yo ovakaulinyanga ihava yavala. Ounyuni aushe itau dulu vali okuxwepopalekwa. Ombibeli otai holola kutya efimbo oli li popepi  eshi Kalunga ta ka kufa po ounyuni woukolokoshi pefimbo loita yaye yaHarmagedon. Ounyuni ou otau ka pingenwa po kounyuni mupe wouyuki. — Ehololo 16:14-16.

14. Kalunga okwa hoolola lyelye a kale Omupangeli wOuhamba waYe, naasho osha li sha xunganekwa ngahelipi?

¹⁴ Jehova Kalunga okwa hoolola Jesus Kristus a kale Omupangeli wOuhamba ile epangelo laYe lomeulu. Nalenale, Ombibeli oya xunganeka ya ti: “Okaana ke tu dalelwa, Omona omumati e tu yandjelwa, nepangelo oli li komapepe aye, ndee ta ifanwa: . . . Ohamba yombili. Epangelo laye tali ningi linene, nombili itai xulu po.” (Jesaja 9:5, 6) Shi na sha nepangelo olo, Jesus okwa honga ovashikuli vaye va ilikane tava ti: “Ouhamba woye nau uye; ehalo loye nali wanifwe kombada yedu yo ngaashi meulu.” (Mateus 6:10) Ngaashi hatu ke shi mona nale membo eli, Ouhamba waKalunga otau ka kufa po diva omapangelo aeshe ounyuni ou, notau ke a pingena po aeshe. (Daniel 2:44) Opo nee Ouhamba waKalunga otau ka eta eduparadisa.

15. ‘Edu lipe’ oshike?

¹⁵ Ombibeli otai tu shilipaleke tai ti: “Paudaneko [laKalunga] fye hatu teelele eulu lipe nedu lipe omo tamu ka kala ouyuki.” (2 Petrus 3:13; Jesaja 65:17) Omafimbo amwe ngeenge Ombibeli tai popi “edu,” otai popi ovanhu ovo ve li kombada yedu. Onghee hano, ‘edu lipe’ louyuki olo oulikumwe wovanhu ovo va hokiwa kuKalunga.

16. Ovo va hokiwa kuKalunga otava ka mona oshali i na ondilo i he fi okuyelekwa ilipi, notu na okuninga shike opo tu i mone?

¹⁶ Jesus okwa udaneka kutya mounyuni mupe oo tau uya, ovo va hokiwa kuKalunga otava ka mona oshali ‘yomwenyo waalushe.’ (Markus 10:30) Pandja Ombibeli yoye kuJohannes 3:16 nosho yo 17:3, ndele to lesha osho Jesus a popya kutya osho tu na okuninga opo tu mone omwenyo waalushe. Paife tala mOmbibeli omanangeko noupuna oo taa ka hafelwa kwaavo va wana okumona oshali oyo ikumwifi ya dja kuKalunga mOparadisa yokedu oyo tai uya.

17, 18. Ongahelipi hatu dulu okukala noushili kutya otaku ka kala ombili neameno keshe pamwe kombada yedu?

 ¹⁷ Oukolokoshi, oita, ekaulo lonyanga nosho yo elongifo leenghono itai ka kala po vali. “Omuhenakalunga ita kala po vali . . . Ndelenee ovananheni vo otava ka fyuulula edu.” (Epsalme 37:10, 11) Otaku ka kala ombili molwaashi ‘Kalunga ota ka xulifa po oita fiyo okeengaba dedu.’ (Epsalme 46:10; Jesaja 2:4) Opo nee “omuyuki ta kala a temuna, nombili oi yadi mo, fiyo ohani ya fya ko,” sha hala okutya, fiyo alushe! — Epsalme 72:7.

¹⁸ Ovalongeli vaJehova otava ka kala meameno. Shimha ashike Ovaisrael vomefimbo lOmbibeli va li tava dulika kuKalunga, ova li hava kala meameno. (Leviticus 25:18, 19) Itashi ka kala tuu shiwa okuhafela eameno la tya ngaho mOparadisa! — Jesaja 32:18; Mika 4:4.

19. Otu shi shii ngahelipi kutya mounyuni mupe waKalunga otamu ka kala oikulya ihapu?

¹⁹ Omhumbwe yoikulya itai ka kala po vali. Omupsalme okwa imba a ti: “Moshilongo namu kale oshishipo shoilya, yo i mene fiyo keexulo deemhunda.” (Epsalme 72:16) Jehova Kalunga ota ka nangeka noupuna ovayuki vaye, ‘nedu otali ka menifa omumeno walo.’ — Epsalme 67:7.

20. Omolwashike hatu dulu okukala noushili kutya edu alishe otali ka ninga oparadisa?

²⁰ Edu alishe otali ka ninga oparadisa. Otaku ka tungwa omaumbo mawa mape notaku ka ningwa oikunino kombada yedu olo kwa li la nyonwa kovanhu ovalunde. (Jesaja 65:21-24; Ehololo 11:18) Mokweendela ko kwefimbo, oitukulwa yedu oyo ya pwa okulongwa otai ka tamunuka mo fiyo edu alishe la wapala notali imike ngaashi oshikunino shaEden. Na Kalunga ita ka kala nande ina ‘kamutulula eke laye ndele ta palula oinamwenyo aishe.’ — Epsalme 145:16.

21. Oshike tashi ulike kutya otapa ka kala ombili pokati kovanhu noinamwenyo?

²¹ Otapa ka kala ombili pokati kovanhu noinamwenyo. Oifitukuti noinamwenyo yomomaumbo otai ka wandjela pamwe.  Nokuli nokaana kanini itaka ka tila oinamwenyo oyo ya nyika oshiponga kunena. — Jesaja 11:6-9; 65:25.

22. Oshike tashi ka ningilwa omikifi?

²² Omikifi otadi ka xula po. E li Omupangeli wOuhamba waKalunga womeulu, Jesus ota ka velula ovanhu keshe pamwe shi dulife eshi a li kombada yedu. (Mateus 9:35; Markus 1:40-42; Johannes 5:5-9) Opo nee ‘oonakukala mo nande umwe ta ti: Aame oshingone.’ — Jesaja 33:24; 35:5, 6.

23. Omolwashike enyumuko tali ka hafifa omitima detu?

²³ Oonakufya ovaholike otava ka nyumuninwa momwenyo ve na etimaumbwile lokuhafya vali. Aveshe ovo va fya, ovo ve li medimbuluko laKalunga, otava ka nyumuninwa momwenyo. Doshili, “otaku ka kala enyumuko lovayuki nolovalunde.” — Oilonga 24:15; Johannes 5:28, 29.

24. Ou udite ngahelipi shi na sha nokukala mOparadisa kombada yedu?

²⁴ Kai fi tuu onakwiiwa ikumwifi oyo ya tuvikililwa ovo va hoolola okulihonga kombinga yOmushiti Munenenene, Jehova Kalunga, nosho yo oku mu longela! Jesus okwa li a popya shi na sha nokuuya kwOparadisa kombada yedu eshi a udanekela omukolokoshi oo a fya pamwe naye a ti: “[Oto] ka kala pamwe naame muParadis.” (Lukas 23:43) Osha fimanenena okulihonga shihapu shi na sha naJesus Kristus, oo okupitila muye omanangeko noupuna aeshe oo taa ka monika.