1. Ԛьрара Хԝәде сәва әʹрде чь йә?

ԚЬРАРА Йаһоԝа Хԝәде сәва әʹрде бь рʹастийе жи гәлә баш ә. Йаһоԝа дьхԝазә кӧ әʹрд бь мәрьвед бәхтәԝар тʹьжә бьбә, йед кӧ ԝе сьһʹәт-ԛәԝат бьн у тʹӧ щар нәхԝәш нәкʹәвьн. Дь Кʹьтеба Пирозда ньвисар ә, ԝәки Йаһоԝа «Хԝәде Еденеда бахчәк дачʹьканд . . . у жь әʹрде һәр дар шин кьрьн, йе кӧ дитьнерʹа һʹәԝаскʹар у хԝарьнерʹа хԝәш» бун. Паши ԝе йәке ча Хԝәде мәрьвед пешьн Адәм у Һеԝа әʹфьранд, әԝи әԝана кьрә ви бахче бәдәԝ у готә ԝан: «Шин бьн у ль һәв зедә бьн, әʹрде тʹьжи кьн у хԝәйитийе ле бькьн» (Дәстпебун 1:28; 2:8, 9, 15, ПКʹМ). Демәк, ча те кʹьфше ԛьрара Хԝәде әԝ бу, ԝәки мәрьв ль һәв зедә буна, әʹрд бещәркьрана, һьн жи мьԛати һʹәйԝана буна. Бь ве йәке Хԝәде дьхԝәст, ԝәки тʹәмамийа әʹрде бьбуйа щьнәт.

2. (а) Әм жь кʹӧ заньн, ԝәки ԛьрара Хԝәде ԝе бе сери? (б) Чь әм жь Кʹьтеба Пироз педьһʹәсьн, кʹижан мәрьв дь щьнәтеда ԝе һʹәтаһʹәтайе бьжин?

² Ле ча тӧ дьшьрмиш дьби, ԛьрара Йаһоԝа Хԝәде ԝе бе сери? Мәри рʹасти ԝе дь щьнәтеда ль сәр әʹрде бьжин? Дь Кʹьтеба Пирозда дәрһәԛа Хԝәде ньвисар ә: «Хԝәде нә инсан ә кӧ дәрәԝа бькә . . . Әԝи гот ԝе нәкә? Хәбәр да ԝе нәйнә сери?» (Жьмар 23:19, ПКʹМ; Ибрани 6:17, 18).  Бәле, Йаһоԝа ԝе әʹсәйи һʹәму созед хԝә бинә сери! Кʹьтеба Пироз дьбежә кӧ Йаһоԝа Хԝәде әʹрд бадиһәԝа нә әʹфьрандийә, ле сәва кӧ мәрьв ль сәр бьжин (Ишайа 45:18). Ле кʹижан мәрьв ԝе дь щьнәтеда бьжин? У әԝана ԝе чьԛас ԝәʹдә бьжин? Кʹьтеба Пироз щаба ван пьрса дьдә: «Кәсед рʹаст ԝе рʹуйе әʹрде, . . . бьстиньн у һәр у һәр ль сәр бьжин» (Зәбур 37:29, АБ; Әʹйанти 21:3, 4).

3. Рʹожа иройин әʹмьре мә чь щурʹәйи йә, у жь бо ве йәке кʹижан пьрс тенә пешийа мә?

³ Ле ча әм дьбиньн, рʹожа иройин мәрьв нәхԝәш дькʹәвьн, дьмьрьн, шәрʹ дькьн у һәв дькӧжьн. Демәк ԛьрара Хԝәде дәрһәԛа жийина мәрийа нәһатә сери. Ле гәло чьрʹа? Гәло чь ԛәԝьми? Тʹӧ кʹьтебәкә тʹәрихийе нькарә щаба ван пьрса бьдә, чьмки сәбәбе һʹәму кӧл-дәрда ль әʹзмана дәстпебу.

4, 5. (а) Кʹи мәʹр да хәбате, ԝәки Һеԝайерʹа хәбәр да? (б) Ча мәрики намус у һʹәлал дькарә бьбә дьз йан меркӧж?

⁴ Дь Кʹьтеба Пирозда, Дәстпебунеда те гьликьрьне, ԝәки дь бахче Адәнеда, мьлйакʹәтәк мьԛабьли Хԝәде рʹабу. Ль сәр ԝи ӧса жи те готьне кӧ әԝ мина «мәʹр ә». Дь кʹьтеба Әʹйантида те готьне кӧ: «Жерʹа Мирещьн у Шәйтʹан дьбежьн, йе кӧ тʹәмамийа дьне хальфандийә». Ӧса жи ль сәр ԝи дьбежьн «мәʹре бәре» (Дәстпебун 3:1; Әʹйанти 12:9). Әв мьлйакʹәте ԛәԝат, йе кӧ найе дитьне, мәʹр да хәбате, ԝәки Һеԝайерʹа хәбәр дә. Әԝи ӧса кьр, ԝәки мәʹр бь дәнге мәрийа хәбәр да. Бейи шьк, әв мьлйакʹәте ԛәԝат пешийа әʹрде һатьбу әʹфьрандьне (Ибо 38:4, 7).

⁵ Чьмки һʹәму тьштед кӧ Хԝәде әʹфьрандийә беԛӧсур ьн, пьрс пешда те: ле «Мире-щьна» жь кʹидәре һат? Ԝәки кьн бежьн, пешийе әԝ мина һʹәму мьлйакʹәта бу, ле паше әԝи хԝәха хԝә кьрә Мире-щьна. Мәсәлә, тә тьште ӧса бьһистийә, ԝәки мәрики намус у һʹәлал бьбә дьз йан меркӧж? Щарна тьштед ӧса дьԛәԝьмьн, ӧса нинә?  Ле ча кәсәк дькарә бьбә хьраб у нәрʹастийе бькә? Дьбәк жи пешийе әԝ мәрьв тʹәне дьле хԝәда дәрһәԛа тьштәки нәрʹаст дьшьрмиш бә. Ле паше, һәрге әԝ һәр гав дәрһәԛа ве нета хԝәйә нәрʹаст дьшьрмиш бә, әԝе рʹожәке әʹсәйи ве нете бинә сери. (Бьхунә Аԛуб 1:13-15.)

6. Ча мьлйакʹәтәки Хԝәде, бу Мире-щьна?

⁶ Мире-щьна жи һәма ӧса кьр. Пешийе әԝи бьһист ча Йаһоԝа Адәм у Һеԝайерʹа гот, ԝәки әԝана ль һәв зедә бьн, у әʹрде тʹьжә кьн (Дәстпебун 1:27, 28). Паше дьбәк жи Шәйтʹан, демәк Мире-щьна ӧса дьшьрмиш дьбу: ‹Әв һʹәму мәри дькарьн дәԝса Хԝәде мьнрʹа ԛӧльх кьн!› Бь ве йәке нета нәрʹаст кʹәтә дьле ԝи. Мире-щьна дәрһәԛа ве нете дьшьрмиш дьбу у хьлазийе әԝи гӧнә кьр, әԝи Һеԝа хапанд у бӧхдан авитә Йаһоԝа Хԝәде. (Бьхунә Дәстпебун 3:1-5.) Чьмки Мире-щьна мьԛабьли Хԝәде чу у бӧхдан авитә сәр Хԝәде, ләма жи ль сәр ԝан зьмана, ль сәр кʹижани кӧ Кʹьтеба Пироз һатьбу ньвисаре, наве Мире-щьна бь дӧ хәбәра һатә кʹьфшкьрьне, йәк те һʹәсабе «дьжмьн» йе дьн жи «бӧхданбеж».

7. (а) Чьрʹа Адәм у Һеԝа мьрьн? (б) Чьма һʹәму мәри кал-пир дьбьн у дьмьрьн?

⁷ Мире-щьна бь мьхәнәтийе у дәрәԝа Адәм у Һеԝа да шашкьрьне, ԝәки әԝана гӧрʹа Хԝәде нәкьн (Дәстпебун 2:17; 3:6). Ләма жи хьлазийе, чаԝа Хԝәде пешда ԝанарʹа готьбу, әԝана мьрьн (Дәстпебун 3:17-19). Гава Адәм гӧнә кьр, әԝи беԛӧсуртийа хԝә ӧнда кьр у бу гӧнәкʹар, ләма жи һʹәму мәри гӧнәкʹар ьн, чьмки гӧне Адәм дәрбази мә тʹәмама бу. (Бьхунә Рʹомайи 5:12.) Сәва кӧ әв йәк һе фәʹмдари бә, мәсәләкә ӧса дькарьн бежьн. Һәрге тӧ тʹасәкә хар һьлди у теда тотьк чеки, ча тӧ дьшьрмиш дьби тотьк дькарә рʹаст дәркʹәвә? Фәʹмдари йә, на. Һәрге тʹас хар ә, һʹәму тотькед теда чекьри ԝе хар дәркʹәвьн. Демәк, һәрге Адәм гӧнәкʹар бу, зӧрʹәтед ԝи жи ԝе гӧнәкʹар бенә буйине. Һәма ӧса гӧнә жь Адәм дәрбази ль сәр һʹәму мәрьва бу. Ләма жи мәрьв кал-пир дьбьн у дьмьрьн (Рʹомайи 3:23).

8, 9. (а) Кʹижан гьлийед нәрʹаст Мире-щьна дәрһәԛа Хԝәдеда гот? (б) Чьрʹа Хԝәде әԝан кʹи мьԛабьли ԝи рʹабун, перʹа-перʹа ԛьрʹ нәкьрьн?

 ⁸ Мире-щьна ӧса кьр, ԝәки Адәм у Һеԝа мьԛабьли Йаһоԝа Хԝәде рʹабьн. Бь ве йәке әԝ хԝәха жи мьԛабьли сәрԝертийа Йаһоԝа чу у шәрʹ тʹәв Йаһоԝа дәстпекьр. Әԝи бь готьнед хԝә дьхԝәст бьда кʹьфше, кӧ Хԝәде  сәрԝерәки хьраб ә. Йан чь, әԝ мәрийа дьхапинә у тьштед рʹьнд жь ԝана вәдьшерә. Һьн жи әԝи дьгот кӧ: ‹Нә һʹәԝщә йә ԝәки мәри бьн сәрԝертийа Хԝәде бьжин, әԝана хԝәха бейи Хԝәде жи ԝе бькарьбьн пешда һәрʹьн, у хԝәха дькарьн рʹасти жь нәрʹастийе һәв дәрхьн. Мәрьварʹа ԝе һе рʹьнд бә, ԝәки сәрԝере ԝан әз бьм›. Ле ча Хԝәде дькарьбу сәва ван дәрәԝа щаба Мире-щьна бьда? Һьнәк дьшьрмиш дьбьн, ԝәки Хԝәде гәрәке перʹа-перʹа ԛьрʹа ԝан бьанийа, кʹи кӧ мьԛабьли ԝи рʹабун. Ле гәло бь ве йәке ԝе избат буйа кӧ сәрԝертийа Хԝәде рʹаст ә? Йан жи бь ве йәке Хԝәде ԝе чаԝа ль сәр бӧхдане Шәйтʹан Мире-щьна щаба хԝә бьда?

⁹ Рʹастийа Йаһоԝа пʹьрʹ мәзьн ә, у һәма жь бо ве рʹастийе Йаһоԝа перʹа-перʹа ԛьрʹа ԝан нәани. Әԝи заньбу, кӧ сәва щаба Мире-щьна бьдә лазьм ә ԝәʹдә, ԝәки избат бә кӧ Мире-щьна бь рʹастийе бӧхданбеж у дәрәԝин ә. Ләма жи Йаһоԝа Хԝәде һишт кӧ мәрьв хԝәха рʹебәрийе хԝә бькьн у һьнә ԝәʹдә бьн һʹӧкӧме Мире-щьнада бьн. Дь ве кʹьтебеда сәре 11-да, һур бь һур те шьровәкьрьне, чьрʹа Йаһоԝа ӧса кьр у һишт кӧ ԝәʹдә һаԛа дьреж бькʹьшинә? Һәла дьшьрмиш бә, әв йәк рʹаст бу, кӧ Адәм у Һеԝа гӧрʹа ви кәси кьрьн, йе кӧ сәва ԝан тʹӧ щар тʹӧ тьшт нәкьрьбу? Ча һун дьшьрмиш дьбьн, ԝана гәрәке гӧрʹа Хԝәде бькьра, йе кӧ һʹәму тьшт дабу ԝан у мьԛати ԝан дьбу, йан гӧрʹа ви бӧхданбежи? Ле тәйе чь бькьра?

10. Ча тӧ дькари алийе Йаһоԝа бьсәкьни у щаба пьрсед Мире-щьна бьди?

¹⁰ Ԝәрә әм дәрһәԛа ван пьрсед фәрз дьшьрмиш бьн, чьмки рʹожа иройин һәр кәс жь мә дькарә щаба хԝә ль сәр ван пьрса бьдә. Бәле, тӧ жи дькари щаба хԝә бьди ль сәр пьрсед Мире-щьнайе бӧхданбеж у бь ве йәке алийе Йаһоԝа бьгьри. Тӧ дькари бьди кʹьфше кӧ Хԝәде Йаһоԝа йә сәрԝере тә, нә кӧ Мире-щьна у бь ве йәке әʹйан ки, ԝәки Шәйтʹан Мире-щьна бӧхданбеж ә (Зәбур 73:28; бьхунә Мәтʹәлок 27:11). Ле хьраб әԝ ә, кӧ иро тʹәне һьнә мәри Хԝәде Йаһоԝа дьжберьн ча сәрԝере хԝә. Демәк  дәрдькʹәвә кӧ Мире-щьна рʹасти сәрԝере дьнйайе йә? Ле гәло Кʹьтеба Пироз чь һин дькә?

11, 12. (а) Бь хәбәрдана Мире-щьна тʹәви Иса, ча һатә кʹьфше кӧ сәрԝере ве дьне Мире-щьна йә? (б) Чь диса избат дькә, кӧ Мире-щьна сәрԝере ве дьнйайе йә?

¹¹ Рʹаст ә, Йаһоԝа Хԝәдайе Һьмзор ә, у әԝ ә Әʹфьрандаре дьнйайе (Әʹйанти 4:11). Ле дь Кʹьтеба Пирозда тʹӧ щикида найе готьне кӧ Йаһоԝа Хԝәде, йан жи Кӧрʹе Хԝәде Иса Мәсиһ, сәрԝере ве дьнйайе нә. Ль сәр Мире-щьна, Иса Мәсиһ хԝәха дьгот «сәрԝере ве дьнйайе» (Йуһʹәнна 12:31; 14:30; 16:11). Кʹьтеба Пироз жи ль сәр Мире-щьна дьбежә «Мире ве дьнйайейи нәһәԛ» (2 Корьнтʹи 4:3, 4). Дәрһәԛа ԝи дьжмьни, демәк Мире-щьна Йуһʹәнна пʹехәмбәр гьлийед ӧса гот: «Тʹәмамийа дьнйайе бьн һʹӧкӧме Йе Хьрабда йә» (1 Йуһʹәнна 5:19).

¹² Мәсәлә, щарәке Шәйтʹан, демәк Мире-щьна «һʹәму пʹадшатийед дьнйайе» нишани Иса Мәсиһ кьр у готә ԝи: «Һәгәр тӧ дәвәрʹуйа бейи, сәре хԝә ль бәр мьн дайни, әзе ван һʹәмуйа бьдьмә тә» (Мәтта 4:8, 9; Луԛа 4:5, 6). Һәла дьшьрмиш бә. Һәрге Мире-щьна сәрԝере ве дьне нибуйа, әԝи ԝе бькарьбуйа һʹәму пʹадшатийед дьнйайе бьда Иса? Фәʹмдари йә, на! У һьн жи, һәрге Мире-щьна сәрԝере ве дьне нибуйа, Иса сәва ве йәке ԝе әʹсәйи бьгота, ле Иса инкʹар нәкьр кӧ Мире-щьна сәрԝере ве дьне йә.

13. Чьрʹа мәрʹа дьнйа тʹәзә лазьм ә?

¹³ Зәман пәй зәманарʹа һʹале дьнйайе һе гәлә хьраб дьбә, у әʹмьре мәрийа жи һе чәтьн дьбә. Дьнйайеда һʹәму щийа шәрʹ, нәһәԛи у зӧлми һәнә. Хенщи ве йәке, жь дәсте сәрԝеред дине мәрийа у жь дәсте политика, мәрьв гәлә щәфе дькʹьшиньн. Ле ча һун дьшьрмиш дьбьн мәрьв дькарьн хԝәха һʹале дьнйайе рʹаст кьн йан жи бьгӧһезьн? Ча те кʹьфше, ԛәԝата мәрийа нагьһиже, ԝәки  әве йәке бькьн. Ле дь Кʹьтеба Пирозда те готьне, кӧ Хԝәде ве дьнйа нәһәԛ дь шәрʹе Һармәгәдонеда ԛьрʹ кә у дәԝсе, дьнйа тʹәзә ԝе бе, у әв ԝәʹдә ида гәләк незик ә (Әʹйанти 16:14-16).

14. Хԝәде кʹи кʹьфш кьр, ԝәки дь Пʹадшатийа әʹзманда сәрԝертийе бькә, у дәрһәԛа ԝи чь пешда һатьбу готьне?

¹⁴ Йаһоԝа Хԝәде, Иса кʹьфш кьр, ԝәки әԝ дь Пʹадшатийа әʹзманда сәрԝертийе бькә. Дь Кʹьтеба Пирозда дәрһәԛа Иса Мәсиһ һатьбу готьне: «Әԝе мәзьн бә у Кӧрʹе Йе Һәри Жорьн ԝе бе готьне  . . . Әԝе һʹәта-һʹәтайе пʹадшатийе . . . бькә у хьлазийа Пʹадшатийа ԝи ԝе тʹӧнәбә» (Луԛа 1:32, 33). Иса шагьртед хԝә һин дькьр, ԝәки әԝана дәрһәԛа ве пʹадшатийе дӧа бькьн: «Пʹадшатийа тә бе, әʹмьре тә бә, чаԝа ль әʹзмен, ӧса жи ль сәр әʹрде» (Мәтта 6:10). Һьнә ԝәʹдә шунда жь ве кʹьтебе әме пебьһʹәсьн, кӧ Хԝәде һʹәму сәрԝеред мәрьва ԝе бьдә һьлдане у дәԝса ве йәке тʹәне ԝе Пʹадшатийа Хԝәде бә. (Бьхунә Данийел 2:44.) Һьнге тʹәмамийа әʹрд ԝе бьбә щьнәт.

15. Чь те һʹәсабе «әʹрдәки ну»?

¹⁵ Кʹьтеба Пироз гӧмане дьдә мә: «Әм һивийа әʹрдәки ну у әʹзманед ну нә, ль гора созе ԝи, кʹижанада рʹастийе бьминә» (2 Пәтрус 3:13; Ишайа 65:17). Щарна дь Кʹьтеба Пирозда, хәбәра «әʹрд» те һʹәсабе мәри, йед кӧ ль сәр әʹрде дьжин (Дәстпебун 11:1). Ләма жи «әʹрдәки ну» әв те һʹәсабе мәрийед кӧ Хԝәде хԝәш тен.

16. Пʹешкʹешәкә ԛимәт, йа кӧ Йаһоԝа Хԝәде мәрʹа дьдә чь йә, у чь гәрәке бькьн, ԝәки ве пʹешкʹеше бьстиньн?

¹⁶ Иса Мәсиһ соз да, кӧ дьнйа тʹәзәда, мәрийед кӧ Хԝәде хԝәш тен, ԝе «жийина һʹәта-һʹәтайе» пʹешкʹеш бьстиньн (Марԛос 10:30). Жь кʹәрәма хԝә вәкә кʹьтеба Йуһʹәнна 3:16 у 17:3 бьхунә, у пебьһʹәсә һәла бь гьлийед Иса әм чь гәрәке бькьн, ԝәки жийина һʹәта-һʹәтайе бьстиньн. Ле ньһа ԝәрә әм жь Кʹьтеба Пироз бьньһерʹьн һәла чь кʹәрәм һивийа ԝан ә, кʹи кӧ ԝе дьнйа тʹәзәда, щьнәтеда ль сәр әʹрде бьжин.

17, 18. Чьрʹа әм дькарьн гӧман бьн, кӧ бь рʹастийе ль сәр әʹрде әʹдьлайи ԝе һәбә?

 ¹⁷ Зӧлми, нәһәԛи, шәрʹ у щәфа ԝе ида тʹӧнә бьн. Йаһоԝа Хԝәде ԝе ԛьрʹа һʹәму нәһәԛа бинә, ле мәрийед баш у һʹәлал ԝе хьлаз бьн (Зәбур 37:10, 11). Һьн жи ль һʹәму щийа әʹдьлайи ԝе һәбә, чьмки Хԝәде ль ‹доре рʹуйе әʹрде шәран дьсәкьнинә› (Зәбур 46:9; Ишайа 2:4). Һьнге мәрьвед һәԛ ԝе сәрфьраз бьн, у әʹрд бь әʹдьлайе тʹьжә бә, «һәта кӧ һив бьԛәдә»! (Зәбур 72:7, ИМ).

¹⁸ Ԛӧльхкʹаред Йаһоԝа ԝе бе хоф бьжин. Бәре, чахе щьмәʹта Исраел гӧрʹа Хԝәде дькьрьн, әԝана рʹьһʹәт у бе хоф дьжитьн (Ԛануна Кʹаһинтийе 25:18, 19). Бьдьн бәр чʹәʹве хԝә әʹмьре бе хоф дь щьнәтеда чьԛас ԝе бәхтәԝар бә! (Бьхунә Ишайа 32:18; Миха 4:4).

19. Әм жь кʹӧ заньн кӧ, дьнйа тʹәзәда бьрчибун ида ԝе тʹӧнә бә?

¹⁹ Бьрчибун ида ԝе тʹӧнә бә. «Әԝе иди нә тʹи бьн, нә жи бьрʹчи бьн» (Зәбур 72:16; Әʹйанти 7:16). Йаһоԝа Хԝәде мәрьвед рʹаст ԝе кʹәрәм бькә у «рʹуйе әʹрде ԝе . . . [бәре] хԝә бьдә» (Зәбур 67:6, АБ).

20. Чьрʹа әм гәрәке дӧдьли нибьн, ԝәки әʹрд бь рʹастийе ԝе бьбә щьнәт?

²⁰ Тʹәмамийа әʹрде ԝе бьбә щьнәт. Рʹожа иройин мәрьвед гӧнәкʹар дьне хьраб дькьн, ле чахе дьнйа бьбә щьнәт, ль сәр әʹрде малед у бахчед бәдәԝ ԝе һәбьн (Бьхунә Ишайа 65:21-24; Әʹйанти 11:18). Паше һедиһеди тʹәмамийа әʹрде ԝе ӧса бәдәԝ у хас бә ча щьнәта бахче Адәне. Дь Кʹьтеба Пирозда дәрһәԛа Йаһоԝа Хԝәде те готьне: «Тӧ дәсте хԝә вәдьки у һʹәму бьщанан [бинбәра] ль гор хԝәстьнед хԝә тʹер дьки» (Зәбур 145:16, АБ).

21. Әм жь кʹӧ заньн, ԝәки мәрьв у һʹәйԝан тʹәвайи дь әʹдьлайеда ԝе бьжин?

²¹ Мәрьв у һʹәйԝан, тʹәвайи дь әʹдьлайеда ԝе бьжин. Һʹәйԝан у тәрәԝьл тʹәвайи ԝе бьчʹерьн. Һәйнәсәр, зарʹед бьчʹук жи ԝе нәтьрсьн жь ԝан тәрәԝьла, йед кӧ иро гәлә хоф ьн (Бьхунә Ишайа 11:6-9; 65:25).

22. Чьрʹа нәхԝәши ида ԝе тʹӧнә бьн?

 ²² Нәхԝәши ԝе ида тʹӧнә бьн. Чахе Иса ль сәр әʹрде бу, әԝи гәлә мәрьва жь нәхԝәшийед ԝан ԛәнщ дькьр, ләма жи ча сәрԝере Пʹадшатийа Хԝәде ль әʹзмана, әԝ ида ԝе тʹәмама ԛәнщ бькә (Мәтта 9:35; Марԛос 1:40-42; Йуһʹәнна 5:5-9). Һьнге ԝе тʹӧ кәс жь мәрийа ԝе нәбежә кӧ «әз нәхԝәш ьм» (Ишайа 33:24; 35:5, 6).

23. Әԝ йәк кӧ Йаһоԝа мәрийа жь мьрьне ԝе рʹакә, чьрʹа мә дьлгәрм дькә?

²³ Мәрьвед мәйә незик жь мьрьне ԝе рʹабьн у һәрге әԝана гӧрʹа Йаһоԝа Хԝәде бькьн, ԝе ида тʹӧ щар нәмьрьн. Әԝ һʹәму мәри йед кӧ мьрьн ә дь бира Хԝәдеда ньн. Хԝәде ԝе әʹсәйи ԝана диса вәгәрʹинә жийине. Дь Кʹьтеба Пирозда ньвисар ә: «Һәԛ у нәһәԛе жь мьрьне рʹабьн» (Кʹаред Шандийа 24:15; бьхунә Йуһʹәнна 5:28, 29).

24. Тӧ ль сәр хԝә чь тʹәхмин дьки, гава педьһʹәси кӧ дькари дь щьнәтеда ль сәр әʹрде бьжийи?

²⁴ Ахьрикә чьԛас баш һивийа ԝан мәрьва йә, йед кӧ дьхԝазьн бона әʹфьрандаре Һьмзор Йаһоԝа Хԝәде пебьһʹәсьн, тʹәв бьбьнә нас у жерʹа ԛӧльх кьн! Иса гьлийед ӧса готә ԛачахәкирʹа, йе кӧ тʹәви ԝи дардакьри бу: «Те тʹәви мьн бӧһьштеда би» (Луԛа 23:43). Иса дәрһәԛа щьнәта ль сәр әʹрде ԝирʹа дьгот, йе кӧ ԝе бе. Ләма жи гәлә фәрз ә әм һе зәʹф пебьһʹәсьн дәрһәԛа Иса Мәсиһ, бь сайа кʹижани әв һʹәму кʹәрәм ԝе бенә сери.