1. Wetin mek Gɔd mek di wɔl?

GƆD mek di wɔl fɔ lɛ mɔtalman ɛnjɔy fɔ de de. I want mek di wɔl ful-ɔp wit pipul dɛn we gɛt gladi at ɛn wɛlbɔdi. Di Baybul se Jiova “GƆD mek wan fam na Idɛn” ɛn i “mek fayn fayn tik dɛn gro de we gɛt gud frut fɔ it.” Afta Gɔd mek Adam ɛn Iv, i put dɛn na dis fayn fayn ples ɛn tɛl dɛn se: “Una bɔn bɔku pikin dɛn, fɔ mek una de ɔlsay na di wɔl ɛn kɔntrol di wɔl.” (Jɛnɛsis 1:​28; 2:​8, 9, 15) So, Gɔd bin want mek mɔtalman bɔn pikin dɛn ɛn mek di wɔl fayn lɛk di gadin we bin de na Idɛn, ɛn kia fɔ ɔl di animal dɛn.

2. (a) Aw wi no se wetin Gɔd bin want fɔ di wɔl go bi? (b) Uskayn pipul dɛn di Baybul se go de na di wɔl sote go?

² Yu tink se di wɔl go ɛva bi Paradays lɛk aw Gɔd bin want? Gɔd se: “A dɔn tɔk am, ɛn a go mek I bi.” (Ayzaya 46:​9-11; 55:​11) Na tru, Gɔd go mɔs du wetin i bin dɔn prɔmis. Gɔd tɔk se i “nɔ mek [di wɔl] fɔ natin, bɔt i mek am fɔ lɛ pipul dɛn de de.” (Ayzaya 45:​18, NW) Uskayn pipul dɛn Gɔd want fɔ de na di  wɔl? Ɛn aw lɔng Gɔd want dɛn fɔ de de? Di Baybul gi wi di ansa. I se: “Udat dɛn de du wetin rayt go gɛt di land, ɛn dɛn go de de sote go.”—Na wi mek am italiks; Sam 37:​29; Rɛvɛleshɔn 21:​3, 4.

3. Us bad tin dɛn de apin na di wɔl tide? Us kwɛstyɔn dɛn dis de mek wi aks?

³ Wi si se dis nɔ apin yet. Tide, pipul dɛn de sik ɛn day; dɛn de fɛt ɛn kil dɛnsɛf. Na sɔntin apin we mek ɔl dis de bi. Bɔt Gɔd nɔ bin mek di wɔl fɔ de di we aw wi de si am tide! So wetin apin? Wetin mek di tin dɛn we Gɔd bin want fɔ di wɔl nɔ apin yet? No mɔtalman nɔ go ebul gi wi di ansa bikɔs di prɔblɛm bigin na ɛvin.

4, 5. (a) Udat bin yuz wan snek fɔ tɔk to Iv? (b) Aw pɔsin we bin gɛt fayn abit kin tɔn tifman?

⁴ Di fɔs buk na di Baybul tɔk bɔt sɔmbɔdi we bin chalenj Gɔd na di gadin we bin de na Idɛn. Di Baybul kɔl am “snek.” Bɔt dis pɔsin we chalenj Gɔd, nɔto tru tru snek. Di las buk na di Baybul se na in na “da snek we dɛn kɔl Dɛbul ɔ Setan.” Na in de ful pipul dɛn na di wɔl. (Jɛnɛsis 3:​1; na wi mek am italiks; Rɛvɛleshɔn 12:​9) Dis pawaful enjɛl yuz wan snek fɔ go tɔk to Iv. I mek Iv biliv se di vɔys we i de yɛri, de kɔmɔt frɔm di snek. Dis enjɛl go mɔs dɔn de na ɛvin we Gɔd bin de mek di wɔl fɔ mɔtalman.—Job 38:​4, 7.

⁵ Wi no se ɔl di tin dɛn we Gɔd mek nɔ gɛt wan bɔt. So, udat mek “Setan”? Na wan pan di pawaful enjɛl dɛn we Gɔd mek, na in mek insɛf Setan. Aw dis apin? I jɔs tan lɛk we pɔsin we bin gɛt fayn abit kin tɔn tifman. Aw dis kin apin? Di pɔsin kin bigin tink  bɔt bad tin na in at. If i kɔntinyu fɔ tink bɔt da bad tin de, na di mɔ i go want fɔ du am. If i gɛt di chans fɔ du da bad tin de, i go du am.—Rid Jems 1:​13-15.

6. Aw wan pawaful enjɛl mek insɛf Setan?

⁶ Na di sem tin apin to Setan. I go mɔs bi se, i bin yɛri we Gɔd bin tɛl Adam ɛn Iv fɔ bɔn pikin dɛn te dɛn ful-ɔp di wɔl. (Jɛnɛsis 1:​27, 28) Setan bigin tink se na in mɔtalman fɔ wɔship; dɛn nɔ fɔ wɔship Gɔd. So smɔl smɔl, i bigin fɔ tink bɔt bad tin na in at. Leta, i go to Iv ɛn lay to am bɔt Gɔd. (Rid Jɛnɛsis 3:​1-5.) So, na dat mek dɛn de kɔl am “Dɛbul” we min “pɔsin we de lay pan sɔmbɔdi fɔ pwɛl in nem.” Dɛn kɔl am bak “Setan” we min “pɔsin we de chalenj ɔda pɔsin.”

7. (a) Wetin mek Adam ɛn Iv day? (b) Wetin mek Adam in pikin dɛn de ol ɛn day?

⁷ Setan lay to Adam ɛn Iv ɛn mek dɛn du wetin Gɔd nɔ want. (Jɛnɛsis 2:​17; 3:​6) Gɔd bin dɔn se if dɛn du wetin i nɔ want, dɛn go day. So, dɛn day jɔs lɛk aw Gɔd bin dɔn tɔk. (Jɛnɛsis 3:​17-19) We Adam sin, i nɔ bin pafɛkt igen, so i mek ɔl in pikin dɛn gɛt sin. (Rid Lɛta Fɔ Rom 5:​12.) I jɔs tan lɛk pan we dɛn de yuz fɔ bek bred. If di pan dɛnt, wetin go apin to ɔl di bred dɛn we dɛn go bek na da pan de? Dɛn ɔl go gɛt di dɛnt. Jɔs lɛk aw ɔl di bred dɛn we dɛn bek na da pan de gɛt dɛnt, na so ɔl mɔtalman dɔn gɛt sin frɔm Adam. Na dat mek wi ɔl de ol ɛn day.—Lɛta Fɔ Rom 3:​23.

8, 9. (a) Aw Setan chalenj Gɔd? (b) Wetin mek Gɔd nɔ kil Setan, Adam ɛn Iv wantɛm wantɛm?

⁸ We Setan mek Adam ɛn Iv du wetin Gɔd nɔ want, i mek dɛn jɔyn am fɔ chalenj Gɔd. So Setan bin de tray fɔ se Jiova nɔ sabi rul ɛn i nɔ fit fɔ rul  mɔtalman. I bin tray fɔ sho bak se Gɔd de lay, ɛn i nɔ want mek gud tin mit di wan dɛn we i de rul. I bin tray bak fɔ se Gɔd nɔ nid fɔ rul mɔtalman. Dɛn ebul no wetin gud ɛn wetin bad ɛn ɔltin go fayn fɔ dɛn if in rul dɛn. Aw Gɔd go sɔlv dis prɔblɛm? Sɔm pipul dɛn tink se Gɔd bin fɔ dɔn kil dɛn wantɛm wantɛm.  Bɔt yu tink se dat bin fɔ dɔn sɔlv di prɔblɛm? Yu tink se dat bin fɔ dɔn sho se Gɔd sabi rul?

⁹ Jiova nɔ kil dɛn wantɛm wantɛm bikɔs in na pɔsin we de du wetin rayt ɔltɛm. I lɛf dɛn fɔs so dat ɔlman go no se Setan nɔ sabi rul ɛn na lay i bin de lay. So Gɔd lɛf Setan fɔ rul mɔtalman fɔ sɔm tɛm. Wetin mek Jiova du dat ɛn wetin mek te naw i nɔ sɔlv di prɔblɛm yet? Wi go tɔk bɔt dat na Chapta 11. Bɔt naw, lɛ wi tink bɔt dis: Yu tink se Adam ɛn Iv fɔ biliv Setan we nɔ wan de du ɛni gud tin fɔ dɛn? Yu fil se i fayn we dɛn biliv se Jiova de lay, pan ɔl we na in gi dɛn ɔl wetin dɛn gɛt? If na bin yu, wetin yu bin fɔ dɔn du?

10. Aw yu go sho se yu de fɔ Jiova?

¹⁰ I fayn fɔ lɛ wi tink bɔt dɛn kwɛstyɔn ya bikɔs di sem tin de apin to wisɛf tide. Wi ɔl gɛt di chans fɔ sho se wi de fɔ Jiova. Aw wi go du dat? Wi fɔ gri mek Gɔd rul wi ɛn sho se Setan na layman. (Sam 73:​28; rid Prɔvabs 27:​11.) Bɔt pan ɔl di bɔku bɔku pipul dɛn we de na di wɔl, na wan-wan pipul dɛn nɔmɔ de sho se dɛn de fɔ Jiova. Ɔl di ɔda wan dɛn de sho se dɛn de fɔ Setan. So i go mɔs bi se na Setan de rul di wɔl. Bɔt wetin di Baybul se?

11, 12. (a) Aw di tray we Setan bin de tray fɔ mek Jizɔs du bad sho se na Setan de rul di wɔl? (b) Us ɔda tin bak de sho se na Setan de rul di wɔl?

¹¹ Jizɔs bin rili no se na Setan de rul di wɔl. We Setan bin de tray fɔ mek Jizɔs du bad, i bin yuz mirekul fɔ sho Jizɔs “ɔl dɛn neshɔn na wɔl wit ɔl dɛn pawa ɛn jɛntri.” Dɔn i tɛl Jizɔs se: “A go gi yu ɔl dɛn tin ya, if yu nil dɔŋ ɛn se mi na yu masta.” (Matyu  4:​8, 9; Lyuk 4:​5, 6) Yu fil se Setan bin fɔ tɛl Jizɔs se i go gi am ɔl di tin dɛn we de na di wɔl, if nɔto in bin de rul di wɔl? If nɔto Setan bin de rul di wɔl, Jizɔs bin fɔ dɔn tɛl am se nɔto in gɛt dɛn. Bɔt Jizɔs nɔ du so, bikɔs i no se na Setan de rul di wɔl.

¹² Jiova gɛt pawa pas ɔlman na di wan ol wɔl ɛn na in mek ɔltin. (Rɛvɛleshɔn 4:​11) Bɔt we Jizɔs bin de na di wɔl, i bin tɔk se na Setan de “rul dis wɔl.” (Jɔn 12:​31; 14:​30; 16:​11) We di apɔsul Jɔn bin de tɔk bɔt Setan, i bin se na “Setan de rul di ol wɔl.”—Jɔn In Fɔs Lɛta 5:​19.

13. Wetin mek Gɔd de kam pul Setan in wɔl?

¹³ Ɛvride, di wɔl de bad pas aw i bin de. Bɔku pipul dɛn de fɛt wɔ, pɔlitishian dɛn de lay to pipul dɛn, di bigman dɛn pan Gɔd biznɛs nɔ de du wetin Gɔd want, ɛn plɛnti ɔda bad bad tin dɛn de apin. Di wɔl dɔn pwɛl bad, so no mɔtalman nɔ go ebul mek am. Di Baybul se i nɔ go te igen, Gɔd de kam pul ɔl di bad pipul dɛn na di wɔl. I go du dis we i kam fɛt wan wɔ we dɛn kɔl Amagɛdɔn. Afta dis wɔ, na gud pipul dɛn nɔmɔ go de na di wɔl.—Rɛvɛleshɔn 16:​14-16.

14. Na udat Gɔd dɔn pik fɔ rul in Kiŋdɔm? Wetin di Baybul bin dɔn tɔk bɔt dis?

¹⁴ Jiova Gɔd dɔn pik Jizɔs Krays fɔ rul in Kiŋdɔm ɔ in gɔvmɛnt we de na ɛvin. Trade trade, di Baybul bin tɔk se: “Dɛn dɔn bɔn wan pikin gi wi, dɛn dɔn gi wi bɔypikin ɛn nain ed di gɔvmɛnt go de, ɛn in nem we dɛn go kɔl am, na, . . . Prins ɔf pis. Fɔ in gɔvamɛnt in bɛtɛ wan ɛn fɔ ko lat, dat go de sote go.” (Ayzaya 9:​6, 7) Jizɔs bin tich di wan dɛn we de fala am, fɔ pre fɔ Gɔd in gɔvmɛnt. I bin tɛl dɛn fɔ pre se:  “Wi de pre mek yu rul wi; mek wetin yu want, bi na dis wɔl, lɛkɛ aw i de bi na ɛvin.” (Matyu 6:​10) Leta, wi go lan se i nɔ go te igen, Gɔd in gɔvmɛnt go kam pul ɔl di gɔvmɛnt dɛn we de na dis wɔl, ɛn na Gɔd in yon gɔvmɛnt go bigin rul. (Rid Daniɛl 2:​44.) Afta dat, Gɔd in gɔvmɛnt go mek di wan ol wɔl bi Paradays.

15. Wetin na di “nyu wɔl”?

¹⁵ Di Baybul se: “Wi de wet fɔ di nyu ɛvin ɛn di nyu wɔl we Gɔd dɔn tɔk se wi go gɛt; ɔlman go de du wetin rayt insay da wɔl de.” (Pita In Sɛkɛn Lɛta 3:​13; Ayzaya 65:​17) Sɔntɛnde we di Baybul kin tɔk bɔt di “wɔl,” i kin min di pipul dɛn we de na di wɔl. (Sam 96:​1) So di “nyu wɔl” we di Baybul tɔk bɔt, min di pipul dɛn we Gɔd lɛk bikɔs dɛn de du wetin i want.

16. Wetin Gɔd go gi di wan dɛn we i lɛk? Wetin pɔsin fɔ du fɔ gɛt da tin de?

¹⁶ Jizɔs bin prɔmis se, insay Paradays Gɔd go gi di wan dɛn we i lɛk, “layf we go de sote go.” (Mak 10:​30) Duya, opin yu Baybul na Jɔn 3:​16 ɛn Jɔn 17:​3, ɛn rid wetin Jizɔs se wi fɔ du we go mek wi gɛt layf we go de sote go. Naw, lɛ wi tɔk bɔt di fayn fayn tin dɛn we di Baybul se Gɔd go gi di wan dɛn we go gɛt da layf de insay Paradays.

17, 18. Wetin mek wi shɔ se pis go de, ɛn bad tin nɔ go mit wi na Paradays?

¹⁷ Wɔ, pipul dɛn we de brok lɔ, ɛn ɔda bad bad tin dɛn nɔ go de igen. Di Baybul se: “Smɔl bit mɔ, yu nɔ go si di bad man igen . . . Bɔt dɛn wan we nɔ tek dɛnsɛf mek natin go gɛt wetin PAPA GƆD prɔmis dɛn  ɛn ɛnjɔy pis.” (Sam 37:​10, 11) Pis go de ɔlsay na di wɔl bikɔs ‘Gɔd go mek ɔl di wan dɛn we de fɛt na di wɔl, lɛf fɔ fɛt.’ (Sam 46:​9; Ayzaya 2:​4) Afta dat, ‘di land go ful-ɔp wit Gɔd in gudnɛs ɛn di pipul dɛn go gɛt kol at te di mun lɛf fɔ shayn.’ Dat min se pis go de sote go!—Sam 72:​7.

¹⁸ Bad tin nɔ go apin to di wan dɛn we go de wɔship Jiova. We di Izrɛlayt dɛn bin de obe Jiova, bad tin nɔ bin de apin to dɛn. (Lɛvitikɔs 25:​18, 19) Yu nɔ tink se na fayn tin dat we wi nɔ go gɛt ɛnitin fɔ fred na Paradays?—Rid Ayzaya 32:​18; Mayka 4:​4.

19. Wetin mek wi no se plɛnti tin go de fɔ it na Paradays?

¹⁹ Tin fɔ it go de plɛnti. Di Baybul se ‘it go gro ɔlsay na di land ɛn ivin pantap dɛn il ɛn dɛn mawnten.’ (Sam 72:​16) Jiova Gɔd go blɛs ɔl di wan dɛn we de du wetin i want, ɛn “di fam dɛn go gɛt bɔku tin fɔ avɛst.”—Sam 67:​6.

20. Wetin mek wi biliv se di wan ol wɔl go bi Paradays?

²⁰ Di wan ol wɔl go bi Paradays. Na fayn fayn os ɛn gadin dɛn go de ɔlsay na di wɔl. (Rid Ayzaya 65:​21-24; Rɛvɛleshɔn 11:​18) As tɛm de go, di pipul dɛn we go de na di wɔl, go de mek di wɔl smɔl smɔl te ɔlsay tan lɛk di gadin we bin de na Idɛn. Ɛn Gɔd nɔ go ɛva taya fɔ satisfay ɔl wetin i mek na di wɔl.—Sam 145:​16.

21. Aw wi no se animal ɛn mɔtalman go gɛt pis?

²¹ Mɔtalman nɔ go de fred di animal dɛn ɛn di animal dɛnsɛf nɔ go de fred mɔtalman. Dɛn wayl animal dɛn we de na bush ɛn di animal dɛn we wi de mɛn, go de it togɛda. Smɔl pikin sɛf nɔ go fred di animal dɛn we wi de fred naw.—Rid Ayzaya 11:​6-9; 65:​25.

22. Wetin go apin to sik?

 ²² Sik nɔ go de igen. Jizɔs we na di Kiŋ fɔ Gɔd in Kiŋdɔm go mɛn pipul dɛn pas aw i bin du trade we i bin de na di wɔl. (Matyu 9:​35; Mak 1:​40-42; Jɔn 5:​5-9) Da tɛm de, “nɔbɔdi . . . nɔ go se ‘A nɔ wɛl.’”—Ayzaya 33:​24; 35:​5, 6.

23. Wetin mek wi gladi fɔ no se di wan dɛn we dɔn day go gɛt layf bak?

²³ Di wan dɛn we dɔn day go gɛt layf bak. If dɛn obe Gɔd, dɛn nɔ go ɛva day igen. Ɔl di wan dɛn we dɔn day we Gɔd de mɛmba, go gɛt layf bak. Di Baybul se “Gɔd go mek ɔlman, gud ɔ bad, rayz frɔm dɛn grev.”—Di Apɔsul Dɛn Wok [Akt] 24:​15; Rid Jɔn 5:​28, 29.

24. Aw yu go fil if yu de na Paradays?

²⁴ Plɛnti blɛsin de fɔ di wan dɛn we de lan bɔt Jiova ɛn we rɛdi fɔ sav am. Jizɔs bin tɔk bɔt di Paradays we gɛt fɔ kam to wan pan di man dɛn we dɛn bin nel nia am. I bin tɛl am se: “Yu go de wit mi na Paradays.” (Lyuk 23:​43, NW) So, i impɔtant fɔ lɛ wi lan bɔt Jizɔs Krays bikɔs na in Gɔd go yuz fɔ mek wi ɛnjɔy ɔl dɛn blɛsin ya.