Kapetulu 3

Vyuma Muka Ajinyine Kalunga Hakutenga Mavu?

Vyuma muka ajinyine Kalunga hakutenga vatu?

Uno Kalunga vamufumbukilile ngachilihi?

Uno kuyoya chahano hamavu nachikapwa ngachilihi kulutwe?

1. Vyuma muka ajinyine Kalunga hakutenga mavu?

VYUMA ajinyine Kalunga hakutenga mavu vyapwa vyamwaza chiyovo. Yehova asaka hamavu hatwamenga vatu vakuwahilila, vakulikangula. Mbimbiliya yamba ngwayo “Kalunga atumbile milemba muEtene” kaha nawa “asokeseleko mitondo yosena yinawahe kutala, nakuwaha kulya.” Kahomu Kalunga akumishile kutenga valunga napwevo vatete, vaAlama naEve, avahakile mulimbo lize lyamwaza nakuvalweza ngwenyi: “Semenunga mukavule chikuma, mukasulise hamavu, mukawononone.” (Kuputuka 1:28; 2:8, 9, 15) Kalunga ajinyine ngwenyi vatu vakapwe navana, nakutohwesa limbo lyavo lyapalachise, nakulama nawa tunyama.

2. (a) Tunejiva ngachilihi ngwetu vyuma ajinyine Kalunga hakutenga mavu mwakavitesamo? (b) Kweseka naMbimbiliya, vatu muka navakayoya haya myaka yosena?

² Unashinganyeka ngwove vyuma ajinyine Yehova Kalunga hakutenga vatu vatwamenga mupalachise hamavu mwakavitesamo nyi? Kalunga ngwenyi: “Chamwenemwene ngunahanjika, . . . kaha nawa nangukachilinga.” (Isaya 46:9-11; 55:11) Eyo, vyuma ajinyine Kalunga mwakavilinga chikupu! Amba ngwenyi ‘katangile mavu mangana hapwenga hapimbiko,’ oloze “mangana vatwamengaho.” (Isaya 45:18) Uno vatu muka asaka Kalunga ngwenyi vatwamenga hamavu? Kaha  asaka ngwenyi vatwamengaho myaka yingahi? Mbimbiliya yakumbulula ngwayo: ‘Vaka-kwoloka navakaswana lifuchi, navakatwamangamo haya myaka yosena.’—Samu 37:29; Kusoloka 21:3, 4.

3. Vyuma muka vyavipi vili hano hamavu, kaha vyuma kana vyaneha vihula muka?

³ Chuma kanechi kanda chichisoloke. Oholyapwa, vatu vachili nakuvizanga nakufwa, nakulizungisanga nakulijiha. Kuli vimwe vyapihileko numba kupwenga vyuma kanevi. Chipwe ngocho, Kalunga kajinyine mavu kupwa nganomu tuli nakuwamona makumbi anoko! Jino vyuma muka vyasolokele? Mwomwo ika vyuma ajinyine Kalunga kavyateselemoko? Kakweshi mukanda vasoneka kuli vatu unahase kutulumbunwinako, mwomwo ukalu kanou waputukilile mwilu.

MAPUTUKILO AMUKA-KOLE

4, 5. (a) Iya ahanjikile kuli Eve kuhichila muli linoka? (b) Uno mutu uze apwilenga wamwaza, wakashishi, nahase kupwa ngachilihi mwiji?

⁴ Mukanda wamaputukilo muMbimbiliya watulweza vyamuka-kulikanga kuli Kalunga uze ejile mumilemba yaEtene. Ou muka-kulikanga vamuvuluka ngwavo “linoka,” oloze kapwile linoka iveneko. Mukanda wamakumishilo muMbimbiliya walumbununa ou muka-kulikanga ngwawo ikiye “uze vavuluka ngwavo, Liyavolo, ngwavo, Satana, uze muka-kuhungumwisa vaka-mavu vosena.” Kaha vamuvuluka nawa ngwavo, ‘linoka wakushikulu.’ (Kuputuka 3:1; Kusoloka 12:9) Ou kangelo wangolo azachishile linoka hakuhanjika kuli Eve, ngana muze mutu nahase kuzachisa chuma chakuhona kuhanjika chisoloke nge chikiko chili nakuhanjika. Ou mutu wakushipilitu kwapwile omu Kalunga apwile nakuwahisa mavu mangana vatu vatwamengaho.—Yopa 38:4, 7.

⁵ Hakuwana nge vyuma vyosena atengele Yehova vyapwile vyakukupuka mwosena, kaha iyaze atengele ou “Satana Liyavolo”? Kuhanjika mukavatu, mwanaKalunga umwe wangolo wakushipilitu ikiye alyalumwine kupwa Liyavolo.  Uno ahashile ngachilihi kulinga ngocho? Twejiva ngwetu, mutu wamwaza, wakashishi nahase chikupu kupwa mwiji. Uno chuma kana cheji kusolokanga ngachilihi? Mutu nahase kuputuka kushinganyeka vyuma vyavipi mumuchima wenyi. Jino nge mwatwalaho nakushinganyeka vyuma kana, kaha vinahase kutohwa. Ngocho nahase kulinga vyuma vyavipi vize ali nakushinganyeka mumuchima.—WaYakova 1:13-15.

6. Uno mwanaKalunga wangolo wakushipilitu ejile nakupwa ngachilihi Satana Liyavolo?

⁶ Chuma kanechi chikiko chasolokele nakuli Satana Liyavolo. Satana atela evwileko omu Kalunga apwile nakulweza Alama naEve ngwenyi vakaseme nakusulisa hamavu. (Kuputuka 1:27, 28) Satana ashinganyekele ngwenyi: ‘Vatu vosena vatelanga kachi kulemesa yami muchishishisa chakulemesa Kalunga!’ Ngocho aputukile kushinganyeka vyuma vyavipi. Kutwala muze, ahungumwishile Eve navyuma vyamakuli vyakuvuluka Kalunga. (Kuputuka 3:1-5) Ngachize ejile nakupwa jino “Liyavolo,” kulumbununa nge apwa “Muka-lusongi.” Ejile nakupwa nawa “Satana,” kulumbununa nge apwa “Muka-kulikanga.”

7. (a) Vyuma muka vyalingishile vaAlama naEve vafwenga? (b) Mwomwo ika vana vaAlama vosena veji kushinakajiwilanga nakufwa?

⁷ Makuli aSatana Liyavolo nakulunguluka chenyi vyalingishile vaAlama naEve valikange kuli Kalunga. (Kuputuka 2:17; 3:6) Kaha kutwala muze vafwile, nganomu avalwezele Kalunga ngwenyi navakafwa nge navakalikanga kuli ikiye. (Kuputuka 3:17-19) Alama apwile jino wakuhona kukupuka mwosena hakuvulumuna mulonga washili, ngocho navana venyi vosena vatambwileko kushili yenyi. (Wavaka-Loma 5:12) Tunahase kufwanyisa chuma kanechi kuchikango chakwochela mbolo. Uno nge chikango chili nahamwe hanambokama, kaha jimbolo navocha muchikango kana najipwa ngachilihi? Jimbolo josena navocha najipwa jakumbokama. Chochimwe nawa, vatu vosena vatambula lipenga kufuma kuli Alama.  Echi chikiko chalingisa vatu vosena kushinakaja nakufwa.—Wavaka-Loma 3:23.

8, 9. (a) Vyuma muka vyamakuli ahanjikile Satana? (b) Mwomwo ika Kalunga ahonene kujiha vaze vaka-kulikanga hahaze vene?

⁸ Satana aputukile kuyula vaAlama naEve kufuma vene haze avahungumwishile vavulumune kuli Kalunga. Ngocho afumbukilile chiyulo chaYehova. Mujila yikwavo, Satana apwile  nakwamba ngwenyi: ‘Kalunga apwa muka-kuyula wamupi. Eji kwonganga vatu jenyi nakuhona kuvahana vyuma vyamwaza. Vatu nawa kavatela kuvayula kuli Kalungako. Vanahase kulisakwila vavene vyuma vyamwaza navyevi vyavipi. Kaha vanahase kuyoya kanawa muchiyulo chami.’ Uno Kalunga atelele kulinga muka hakumuvangijikila vyuma kanevi? Vatu vamwe vashinganyeka ngwavo Kalunga kachi ajihile vaze vaka-kulikanga hahaze vene. Uno kulinga chuma kana kachi chasolwele Satana kupwa muka-makuli nyi? Kutala kachi chasolwele chiyulo chaKalunga kupwa chakwoloka tahi?

⁹ Chiyulo chaYehova chakwoloka kachamulingishile ajihe vaze vaka-kulikanga hahaze veneko. Ashinganyekele ngwenyi atelele kuhichisamo lwola lwakuvatula kanawa chihande chaSatana, nakusolola ou Liyavolo kupwa muka-kwonga. Shikaho Kalunga ashinganyekele kwechelela vatu valiyule vavene hatando yimwe mungolo jaSatana. Vyuma vyalingishile Yehova kwechelela vatu valiyule vavene nakuhichisamo lwola numba akavatule echi chihande, navakavishimutwila muKapetulu 11 mumukanda vene uno. Tuchishinganyeke jino hachuma echi: Uno vaAlama naEve valingile mwakwoloka hakwitavila Satana uze kavalingilile chuma nachimwe chamwazako nyi? Kutala chapwile chakwoloka kuli vakivo kwitavila ngwavo Yehova uze avahanyine vyuma vyosena apwile muka-kwonga tahi? Uno nge yove, kachi walingile muka?

10. Nauhasa kuhakwila ngachilihi Yehova hachihande akatwile Satana?

¹⁰ Chapwa chamwaza kushinganyeka havihula kanevi mwomwo tuvosena makumbi ano tunalitalasana navihande vyovimwe. Enga, watela kuhakwila Yehova hachihande kanechi anehele Satana. Unahase kwitavila Yehova kupwa Muka-kukuyula nakusolola Satana kupwa muka-kwonga. (Samu 73:28; Vishimo 27:11) Chaluvinda, vatu vavandende kaha mukaye kosena vakivo vasaka kulinga ngocho. Echi chaneha chihula chachinene chakwamba ngwavo, Uno chikupu Mbimbiliya yanangula ngwayo Satana ikiye ali nakuyula kano kaye tahi?

 IYA ALI NAKUYULA KANO KAYE?

11, 12. (a) Cheseko chaYesu chasolola ngachilihi nge Satana ikiye ali nakuyula kano kaye? (b) Vyuma vyeka muka vyasolola nge Satana ikiye ali nakuyula kano kaye?

¹¹ Yesu ejivile chikupu ngwenyi Satana ikiye muka-kuyula kano kaye. Mujila yakukomwesa, Satana amwenesele Yesu “mawangana ahamavu osena naupahu wawo.” Kaha afwelelesele Yesu ngwenyi: “Nge naungufukamina nakulifukula kuli ami, nangukuhana vyosenevi.” (Mateu 4:8, 9; Luka 4:5, 6) Achishinganyeke hachuma kanechi. Nge Satana keshi ikiye apwile nakuyula mawangana ahamavuko, kaha kachi Yesu achimwene kupwa hicheseko nyi? Yesu kamuhamikile Satana ngwenyi jifulumende josena jahamavu kajapwa joveko nduma. Enga, Yesu kachi amuhamikile Satana nge jifulumende kajapwile mungolo jenyiko.

¹² Yehova apwa chikupu hiKalunga waNgolo josena, hiTengi uze atengele vyuma vyosena. (Kusoloka 4:11) Oloze nahamwe hauchi vasoneka muMbimbiliya ngwavo Yehova Kalunga chipwe Yesu Kulishitu vakivo vali nakuyula kano kayeko. Yesu avulukile Satana kupwa “mwangana wahano hamavu.” (Yowano 12:31; 14:30; 16:11) Mbimbiliya yavuluka nawa Satana Liyavolo kupwa “kalunga wamyaka yino.” (Wavaka-Kolinde 2, 4:3, 4) Kaposetolo Yowano asonekele kutalisa kuli ou muka-kole, Satana, ngwenyi: “Vaka-mavu vosena vatwama muli uze wamupi.”—WaYowano 1, 5:19.

MUJILA NAVAKAFUMISHILAMO KAYE KASATANA

13. Mwomwo ika kuli nakusakiwila lifuchi lyalihya?

¹³ Kaye kali nakupihilako lika mwaka himwaka. Kaye kanazale navaka-jita, navaka-mapolitiki vakuhona kashishi, navatwamina vamukwitava chamakuli, navaka-ulyanyi. Chinapu jino chachikalu kuwahisa cheka kano kaye. Oloze Mbimbiliya yasolola ngwayo kalinwomu Kalunga afumise vaka-kuhuka hamavu hajita yenyi yaAlamangetone, nakukaneha jino lifuchi lyalihya lyakwoloka.—Kusoloka 16:14-16.

14. Kalunga asakula iya kupwa Muka-kuyula Wangana Wenyi, kaha chuma kana vachihanjikile ngachilihi chimweza?

 ¹⁴ Yehova Kalunga asakwile Yesu Kulishitu kupwa ikiye Muka-kuyula Wangana, chipwe ngwetu fulumende Yenyi yamwilu. Mbimbiliya yambile chimweza ngwayo: “Kuli etu kunasemuka mwana, vanatuhane mwana walunga, wangana naukapwanga hachifwiji chenyi, kaha lijina lyenyi navakamuvuluka ngwavo . . . Ikiye Mwangana wakuunda. Wangana wenyi nakuunda navikayanga nakuvula chakuzeneka kukuma.” (Isaya 9:6, 7) Kutalisa kufulumende kaneyi, Yesu anangwile vaka-kumukavangiza valombenga ngwavo: “Wangana wove wize. Mwaya muchima wove vakalingemo hamavu nganomu veji kulingilangamo mwilu.” (Mateu 6:10) Nganomu natulinangula mumukanda uno, kalinwomu Wangana waKalunga ushise mawangana osena. (Ndanyele 2:44) Kaha ou Wangana waKalunga naukaneha jino palachise hano hamavu.

LIFUCHI LYALIHYA LILI HAKAMWIHI!

15. Uno “mavu amahya” chuma muka?

¹⁵ Mbimbiliya yatufwelelesa ngwayo: “Tuli nakutalilila melu amahya namavu amahya, kwatwama kwoloka, nge omu chaya kushika [chaKalunga].” (WaPetulu 2, 3:13; Isaya 65:17) Shimbu jimwe, Mbimbiliya yazachisa lizu ‘mavu’ kulumbununa vatu vatwama hamavu. (Kuputuka 11:1) Ngocho, “mavu amahya” akwoloka apwa chitungilo chavatu vaze etavila Kalunga.

16. Kalunga mwakahana wana muka waulemu kuli vaze etavila, kaha twatela kulinga vyuma muka numba tukautambule?

¹⁶ Yesu ashikile ngwenyi mulifuchi lyalihya lize lili nakwiza, vaze etavila Kalunga navakatambula wana “[wa]kuyoya chahaya myaka yosena.” (Mako 10:30) Tunakulombo utange chisoneka chaYowano 3:16 naYowano 17:3, umone vyuma ahanjikile Yesu vize twatela kulinga numba tukatambule kuyoya chahaya myaka yosena. Achikekese jino Mbimbiliya umone vyuma navakalivwisa kuwaha vaze navakatambula wana kufuma kuli Kalunga muPalachise yahamavu yili nakwiza.

17, 18. Vyuma muka navitulingisa twitavile ngwetu nakukapwa kuunda nakukatwama chakuzeneka woma mulifuchi lyosena?

 ¹⁷ Kuhuka, jijita, uhwanga, naulyanyi kavyeshi kukapwako chekako. ‘Vaka-kuhuka kaveshi kukapwako chekako. Oloze vavavwovu navakaswana lifuchi.’ (Samu 37:10, 11) Nakukapwa kuunda mwomwo ‘Kalunga mwakakumisa jijita mbwe nakusongosongo yamavu.’ (Samu 46:9; Isaya 2:4) Kaha “vaka-kwoloka navakafukilanga, nakuunda chachivulu nawa, palanga nomu mwakapwa kakweji wauchiko”—kulumbununa nge, haya myaka yosena!—Samu 72:7.

¹⁸ Vaka-kulemesa Yehova navakatwama chakuzeneka woma. Mulwola vasonekele Mbimbiliya, vaIsalele vatwaminenga chakuzeneka woma omu vononokelenga Kalunga. (VyavaLevi 25:18, 19) Ocho kuwaha kana natukevwa nayetu hakukatwama chakuzeneka woma muPalachise!—Isaya 32:18; Mika 4:4.

19. Tunejiva ngachilihi ngwetu kulya nachikalisala mulifuchi lyalihya lyaKalunga?

¹⁹ Nakukapwa kulya chakulisala. Muka-kwimba jisamu embile ngwenyi: “Nakukapwa kuhingunuka chajimbuto jamanona hamavu helu lyajipili.” (Samu 72:16) Yehova Kalunga mwakakisula vatu jenyi vakwoloka, kaha ‘mavu nawakahana evi vyakwimaho.’—Samu 67:6.

20. Mwomwo ika natwitavila ngwetu lifuchi lyosena nalikapwa palachise?

²⁰ Mavu nawakapwa palachise. Mumafuchi muze venyeka kuli vaka-kuhuka navakatungamo jizuvo nakutumbamo milemba yamwaza. (Isaya 65:21-24; Kusoloka 11:18) Vatu navakatwalaho lika kuwahisa hamavu palanga nomu lifuchi lyosena nalikapwa lyamwaza ngana mwamilemba yaEtene. Kaha Kalunga ‘mwakakamununa mulivoko lyenyi, nakwikuchisa vaka-kuyoya vosena omu vanevwila kuwaha.’—Samu 145:16.

21. Vyuma muka vyasolola nge vatu natunyama navakatwamanga hamwe mukuunda?

²¹ Vatu natunyama navakatwamanga hamwe mukuunda. Tunyama vamuchipapa navakalilanga hamwe navimuna.  Kaha kanyike wamundende keshi kukevwa woma visumako.—Isaya 11:6-9; 65:25.

22. Uno vyuma muka navikalingiwa kukukola?

²² Kakweshi kukapwa kukolako. Yesu hakupwa Muka-kuyula muWangana waKalunga wamwilu, mwakahindula vatu vavavulu kumisongo yavo kuhambakana muze alingile omu apwile hano hamavu. (Mateu 9:35; Mako 1:40-42; Yowano 5:5-9) Kaha “ava navakatwamako kaveshi kukambako ngwavo, Tuli nakukola.”—Isaya 33:24; 35:5, 6.

23. Mwomwo ika natukevwila kuwaha hakusanguka chavafu?

²³ Vafu navakavasangula nakukapwa nalutalililo lwakuyoya haya myaka yosena. Vafu vosena vaze vali muvishinganyeka vyaKalunga navakavasangula. “Nakukapwa kusanguka chavafu, nachavaka-kwoloka nachavaka-kuhenga.”—Vilinga 24:15; Yowano 5:28, 29.

24. Uli nakwivwa ngachilihi hachihande kanechi chakukatwama muPalachise hamavu?

²⁴ Kulutwe kuli chikupu vyuma vyamwaza vize vali nakutalilila vaze vali nakulinangula vyaTengi yetu Wamunene, Yehova Kalunga, nakumuzachila! Yesu avulukile vyaPalachise yahamavu omu ashikile uze muka-kupihisa vajihile hamwe naikiye ngwenyi: “[Naukatwama] nayami hamwe muPalachise.” (Luka 23:43) Ngocho, twatela chikupu kulinangula vyavivulu vyahanjika hali Yesu Kulishitu, mwomwo muli ikiye mukiko navakateselamo vyuma vyosenevi.

VYUMA YANANGULA MBIMBILIYA

▪ Vyuma ajinyine Kalunga vyakulingisa mavu kupwa palachise mwakavitesamo. —Isaya 45:18; 55:11.

▪ Satana ikiye ali nakuyula kano kaye. —Yowano 12:31; WaYowano 1, 5:19.

▪ Kalunga mwakakisula vatu mulifuchi lyalihya lize lili nakwiza.—Samu 37:10, 11, 29.

[Vihula vyaChilongesa]

[Muvwimbimbi halifwo 30]

Uno Satana ahanyinyine ika Yesu mawangana osena ahamavu nge kawapwile enyiko?

 [Muvwimbimbi wosena halifwo 35]