1. ¿Toni kineki Dios maj mochiua nikan taltikpak?

DIOS kipialia se kualtsin tanejnekilis taltikpak: maj pexoni ika taltikpakneminij, maj nemikan ika yolpakilis uan maj amo kokolispeuakan. Biblia techiluia ika “Jiova Dios kichiuak se xochital itech Edén” uan “kichiuak maj moskaltiani [...] koujmej tel kualtsitsin uan itakilo kuali se kimajseuaskia”. Satepan kinchijchiuak yekinika taltikpakneminij Adán uan Eva, uan kintalij itech nejon tel kualtsin xochital uan kiniluij: “Xikinpiakan konemej uan ximomiakilikan uan ximomoyauakan noyampa taltikpak uan xikixyekanakan” (Génesis 1:28; 2:8, 9, 15). Kemej tikitaj, itanejnekilis Dios katka maj taltikpakneminij kinpianij konemej, maj kipatauanij nejon xochital semanauak taltikpak, uan maj kinyekpianij tapialmej.

2. 1) ¿Keyej uelis titakuaujtamatiskej ke yekmelauj mochiuas itanejnekilis Dios nikan taltikpak? 2) Kemej kijtoua Biblia, ¿akonimej nemiskej nochipaya?

² ¿Tikonnemilia tejuatsin ke se tonal yekmelauj tinemiskej itech se xochital nikan taltikpak ijkon kemej Jiova kineki? Yejuatsin motenkauak: “Nikixtalijya uan no  ijkon nikchiuas” (Isaías 46:9-11; 55:11). Kemaj, Dios yekmelauj kichiuas ijkon kemej kiixtalijtok. Yejuatsin kijtoua ke taltikpak “amo sayoj nenkaj kichijchiuak, ta kichijchiuak maj ompa nemikan” (Isaías 45:18). ¿Akonimej kinekia Dios maj neminij nikan taltikpak, uan kanachi xiujmej? Biblia tanankilia: “Akin yolmelaujkej ininaxkatis taltikpak, uan ompa nemiskej nochipaya” (Salmo 37:29; Apocalipsis 21:3, 4).

3. ¿Toni tikitaj nikan taltikpak tein tetayokoltij, uan ika nejon, toni netajtanilmej timochiuiliaj?

³ Kemej tikitaj, itanejnekilis Dios ayamo mochiua. Taltikpakneminij kokolispeuaj uan momikiliaj; uan tein okachi amo kuali, miakej moteuiaj uan momijmiktiaj. Moyekita ke amo mochiujtok tein kuali. Tein melauj, Jiova amo keman kinekik maj taltikpak yeto kemej axkan tikitaj. ¿Toni mochiuak? ¿Keyej amo mochiua itanejnekilis Dios? Tanankililmej amo moajsij itech nion se ininamaix taltikpakneminij, ta kuejmol peuak ne iluikak.

4, 5. 1) ¿Akoni tajtoj iuan Eva itenkopa se kouat? 2) ¿Keniuj aksa uelis yeski yolmelauak uan satepan mochiuas tachtekkej?

⁴ Itech yekinika amaix tein kipia Biblia, techiluia ke itech xochital tein moajsia Edén, nesik se aksa akin kiixnamiki Dios. Maski kitokaytiaj “kouat” amo se okuilij. Amaix tein ika tami Biblia, kijtoua ke “kitokaytijke [...] amokuali, uan no kitokaytijke Satanás, ne ten kinkajkayautinemi nochi in taltikpakuani”. No kitokaytiaj “kouat ten ne achtopa ipa nentiuits” (Génesis 3:1; Apocalipsis 12:9). Kemej tikitaj, yejua se ángel tel chikauak, se espíritu tein kichiuak maj mokaki ke kisaya se tajtolis itech kouat keman kinojnotsak Eva. Amo tiomeyolouaj ke nejon ángel ompa moajsia keman  Dios kinchijchiuilij taltikpak, takamej uan siuamej (Job 38:4, 7).

⁵ Kemej tikmatij, nochi tein Jiova kichijchiua tel kuali uan amo teyi kipoloua. Komo ijkon, ¿akoni kichijchiuak akin motokaytia “Amokuali” uan “Satanás”? Uelis tikijtoskej ijkon: se ángel tel chikauak tein Dios kichijchiuak yejua iselti mochiuak Amokuali. ¿Keniuj uelik mochiuak nejon? Ijkon kemej aksa yolmelauak mochiua tachtekkej satepan. ¿Keniuj mochiua nejon? Taltikpaknenkej xa kikaua maj ixua iyolijtik se tanejnekilis tein amo kuali. Komo kisentoka itech tanemilia, nejon tanejnekilis uelis mochiuas tel chikauak. Satepan, keman moajsi kampa uelis kichiuas, ika tami kichiua tein kinemilijtoya (xikonixtajtolti Santiago 1:13-15, TNM).

6. ¿Keniuj se ángel tel chikauak tein Dios kichijchiuak mochiuak Satanás uan Amokuali?

⁶ Yejua nejon tein kipanok Satanás. Xa kitenkakik Jiova keman kiniluij Adán uan Eva, maj kinpianij konemej uan maj kipexontianij taltikpak (Génesis 1:27, 28). Uan xa kinemilij nejin: “¡Nochin ueliskia nechueyichiuaskej nejua uan amo Dios!”. Nejon tanejnekilis tein amo kuali, ixuak iyolijtik uan satepan, kichiualtij maj kitakajkayauili Dios uan yejua nejon kiluij Eva (xikonixtajtolti Génesis 3:1-5). Ijkon, nejon ángel mochiuak “Diablo” oso Amokuali, tokayit tein kijtosneki “Tetakajkayauilijkej ika tein tel amo kuali”. Uan no mochiuak “Satanás”, tokayit tein kijtosneki “Taixnamikkej”.

7. 1) ¿Keyej momikilijkej Adán uan Eva? 2) ¿Keyej tiueuejtij uan timomikiliaj tinochin tiikoneuan Adán?

⁷ Satanás achtook kuali kinemilij keniuj takajkayauas, uan ika nejon uelik kinchiualtij Adán uan Eva maj amo kitakamatinij Dios (Génesis 2:17; 3:6). Uan ika tamik, nochin omen momikilijkej, ijkon kemej Dios kinnejmachtijka  (Génesis 3:17-19). Kemej Adán mochiuak tajtakojkej keman amo tatakamatikok, nochin ikoneuan kinpanoltilij tajtakol (xikonixtajtolti Romanos 5:12). Mochiuak kemej se molde tein ika kichijchiuaj koyotaxkal tein kitelojkej uan tekochtiak. ¿Keniuj kisas koyotaxkal tein itech kichijchiuaskej? Amo kualtsin kisas, no tekochtik yeski. No ijkon tejuan, tinochin tiyolij kemej yeskia “titekochtikej” ika itajtakol Adán. Yejua ika tiueuejtij uan timomikiliaj (Romanos 3:23).

8, 9. 1) Kemej kinextia tein mochiuak, ¿toni taixnamikilis kitalij Satanás? 2) ¿Keyej Dios amo niman kinixpoloj taixnamikinij?

⁸ Keman Satanás kichiuak maj Adán uan Eva tajtakouanij iixpan Dios, tein melauj yejua taixyekanak maj kinekepilikan Dios. Kiixnamikik Jiova, ta kijijtoj kemej tekiuajti. Kemej yeskia kijtoskia: “Yejua se tekiuaj amo yolkuali tein kinkajkayaua akin kinixyekana, uan kintsakuiltilia miak taman tein kuali. Taltikpakneminij amo moneki maj yejua kinixyekana, ta yejuan ininselti uelis moitiliskej tein kuali uan tein amo kuali. Tein melauj, okachi kuali kiyas komo nejua nechtakamatij”. ¿Toni kichiuaskia Dios ika nejin tapantilis tein tel amo kuali? Sekin kinemiliaj ke monekia kinmiktis taixnamikinij. Axkan, ¿kinextiskia nejon ke Satanás takajkayauak? ¿Moitaskia ke kemej tekiuajti Dios yejua tein okachi kuali?

⁹ Jiova amo keman mopoloua ijkuak kitekitiltia melaujkayot. Yejua ika, amo uelik niman kinixpoloj taixnamikinij. Ta, kiixejekoj monekia maj panouani xiujmej, uan ijkon moitaskia ox melauak katka tein kijtouaya Satanás uan kinextiskia ke yejua se takajkayaujkej. Yejua ika, Dios kiixtalij maj panouani seki xiujmej maj taltikpakneminij moixyekananij ininselti, uan maj moajsinij imaixko Satanás. Itech capítulo 11 itech  nejin amaix, kimelaua keyej ijkon kichiuak uan keyej kikaua maj pano tel miak xiujmej uan ijkon kimelauas nejon kuejmolmej. Kemej tikmatij, Satanás amo kinmakatoya nion teyi Adán uan Eva. Yejua ika xionmotajtani, ¿onkaya keyej maj kineltokilianij? Uan Jiova kemaj kinmakatoya nochi tein kipiayaj. Yejua ika, ¿kuali tein kichiujkej keman kinemilijkej ke katka se takajkayaujkej  uan amo teiknelijkej? ¿Toni tikonchiuaskia tejuatsin?

10. ¿Keniuj uelis tionyetos itechkopa Jiova uan ijkon yejuatsin uelis kinankilis itaixnamikilis Satanás?

¹⁰ Semi kuali maj titanemilikan itech nejin netajtanilmej, ta tisejsemej no moneki tikpejpenaskej akoni tiktajtolkakiskej. Kemaj, tejuatsin uelis tionyetos itechkopa Jiova uan ijkon yejuatsin uelis kinankilis itaixnamikilis Satanás. Uelis tikonselis Dios kemej moTekiuaj uan ijkon moitas ke Amokuali se takajkayaujkej (Salmo 73:28; xikonixtajtolti Proverbios 27:11). Maski nikan taltikpak nemij tel miakej millones, semi tetayokoltij maj sayoj se ome eyi kichiuakan nejon. Uan yejua ika techuika maj timochiuilikan se netajtanil tein motelneki: ¿yekmelauj tamachtia Biblia ke Satanás taixyekantok nikan taltikpak?

11, 12. 1) Keman Amokuali kitalilij Jesús se tayejyekolis, ¿keniuj kinextia ke yejua taixyekantok nikan taltikpak? 2) ¿Toni okseki tajtolmej kinextia ke Satanás taixyekantok nikan taltikpak?

¹¹ Jesús amo keman omeyolouak ke Satanás yejua taixyekantok nikan taltikpak. Se tonal, Amokuali kinextilij ika se mouiskatekit “kampa tayekanaj ueyi chiuanime de nikan taltikpak. Uan no kinextilij nochi ninueyipanchiualisme”, uan motenkauak: “Takan timotankuaketsas uan timotentokas noixpan uan takan tinechmouistilis, ijkuakon nochi nijin ten tikitstok nimitsmaktilis” (Mateo 4:8, 9; Lucas 4:5, 6). Xiontanemili itech nejin. Komo Satanás amo iaxka yeskia nejon tekiuajyomej, ¿yekmelauj kitaliskia Jesús itech tayejyekolis ika tein kinextilij? Jesús amo keman kijtoj ke nejon tekiuajyomej amo iaxka Amokuali. Senkis tikmatij, komo amo moajsiskia imaixko, Jesús kiluiskia.

 ¹² Kemej tikyekmatij, Jiova yejua Dios tein kipia nochi uelilis, akin kichijchiuak nochi tein onkak uan se kimoujkaita (Apocalipsis 4:11). Sayoj ke, itech Biblia nion seko kijtoua ke Jiova uan Jesucristo taixyekantokej nikan taltikpak. Tein melauj, Jesús kitokaytij yejua Amokuali “naken takitskijtok [oso taixyekantok] axkan taltikpak” (Juan 12:31; 14:30; 16:11). Uan Biblia no kiyekijtoua ke nejon taixnamikkej, oso Satanás, yejua “ueyi chiuke in amokuali ten tayekantinemi nikan taltikpak” (2 Corintios 4:3, 4). Tatitanil Juan ika tajtoj yejua keman kijkuiloj: “Nochi in taltikpakuani kinyekana ok yejua in amokuali Satanás” (1 Juan 5:19).

13. ¿Keyej moneki maj sayoj nemikan akin yolmelaujkej nikan taltikpak?

¹³ Ijkon kemej panotiuj xiujmej, kampa tinemij okachi mochiua tamouililpan. Noyampa moteuijtokej itech uejueyi neteuilismej, moajsij temiktianij, tekiuanij tein kichiuaj tein amo kuali ika tomin, uan tayekananij itech taneltokalis ixkepmej. Nochin nejin akin amo yolkualmej, amo mopataskejok. Kemej kinextia Biblia, amo uejkaua Dios kinixpolos itech neteuilis tein itokay Armagedón, uan satepan sayoj moajsiskej akin yolmelaujkej (Apocalipsis 16:14-16).

14. ¿Akoni kiixpejpenak Dios kemej Tekiuaj itech iTekiuajyo tein moajsi iluikak, uan toni tanauatil achtook moijtojka ke kiseliskia?

¹⁴ Jiova kiixpejpenak Jesucristo, kemej Tekiuaj itech iTekiuajyo Dios tein moajsi iluikak. Ne uejkauj, Biblia achtook kijtojka: “Se konet yolik, se konet techmakakej, uan itayekanalis tein kiselis moajsis iajkoltipan, uan motokaytis [...] Tayekankej tein kiualkui Yolseuilis. Itayekanalis kipatauas uan yekyetolis amo kipias itamilis”  (Isaías 9:6, 7). Jesús kinnextilij imomachtijkauan maj no tajtaninij itech ininnetataujtiluan, keman kiniluij: “Maj uiki motekiuajyo. Maj mochiua motanejnekilis, kemej iluikak, no ijkon nikan taltikpak” (Mateo 6:10, TNM). Kemej tikitaskej satepan, amo uejkaua iTekiuajyo Dios kintamis nochin taltikpaktekiuajyomej uan sayoj yejua moajsis (xikonixtajtolti Daniel 2:44). Uan satepan kichiuas se xochital nikan taltikpak.

15. ¿Toni “yankuik taltikpak”?

¹⁵ Biblia techyekiluia ke moajsi “se yankuik eluiyak uan ne yankuik taltikpak, kampa mochiutos sayo ten kualtsin chipaukanemilis ijkon keme yejuatsin motenkauak ya de kichiuas” (2 Pedro 3:13; Isaías 65:17). Keman Biblia ika tajtoua “taltikpak”, kemansa kijtosneki akin ompa nemij (Génesis 11:1). Yejua ika, “yankuik taltikpak” kampa onkas melaujkayot, kijtosneki se oloch taltikpakneminij akin kiseliaj ipoujkaitalis Dios.

16. ¿Toni tel ueyi uan kualtsin netetayokolil kinmakas Dios akin kinmaka ipoujkaitalis, uan toni moneki tikchiuaskej uan ijkon uelis tikseliskej?

¹⁶ Jesús motenkauak keman ejkos yankuik taltikpak, Dios kinmakas se tel ueyi uan kualtsin netetayokolil akin kinmaka ipoujkaitalis: se “nemilis ten amo keman tamis” (Marcos 10:30). Xikontemo itech moBiblia Juan 3:16 uan 17:3, uan tikonixtajtoltis tein kijtoj Jesús tein moneki tikchiuaskej, uan ijkon uelis tikseliskej nemilis nochipaya. Axkan maj tikitakan itech Biblia tatiochiualismej tein kipiaskej itech Xochital akin kiseliskej ipoujkaitalis Dios.

17, 18. ¿Keyej uelis titakuaujtamatiskej ke onkas yekyetolis semanauak taltikpak uan amo akin moujkanemis?

¹⁷ Amo onkasok tein amo kuali, neteuilismej, eliuisyot uan amo akin kitapanauilis tanauatilmej. “Akin  amo yolkuali amo nemisok [...]. Sayoj ke akin yolnejmachmej ininaxkatis taltikpak.” (Salmo 37:10, 11.) Onkas yekyetolis, ta Dios ‘kitamis neteuilismej itech nochi semanauak taltikpak’ (Salmo 46:9; Isaías 2:4). Keman ejkos nejon tonal, sayoj “moajsis akin yolmelauak” uan onkas “ueyi yekyetolis uan uejkauas keman ajsis itamilis metsti”, tein kijtosneki, nochipaya (Salmo 72:7).

¹⁸ Itekitikauan Jiova amo moujkanemiskej. Ne uejkauj, keman israelitas kitakamatiaj Dios, amo moujkanemiaj (Levítico 25:18, 19). No ijkon itech Xochital amo timoujkanemiskej. ¡Tel kualtsin yeski! (Xikonixtajtolti Isaías 32:18; Miqueas 4:4.)

19. ¿Keniuj tikyekmatij ke Dios kichiuas maj onka tel miak takual itech yankuik taltikpak?

¹⁹ Amo tasojtis tein se kikuas. Akin kijkuiloj Salmo mokuikatij: “Onkas tel miak tatet nikan taltikpak; uan ininkuapan tepemej onkas okachi miak” (Salmo 72:16). Jiova Dios kintatiochiuis akin kitakamatij, uan “itech taltikpak moteltachiuas” (Salmo 67:6).

20. ¿Keyej uelis titakuaujtamatiskej ke semanauak taltikpak mochiuas se xochital?

²⁰ Semanauak taltikpak mochiuas se xochital. Moajsiskej kualtsitsin kalmej uan takualtsinkan yeski, itech talmej tein axkan kijtakojtokej akin amo yolkualmej (xikonixtajtolti Isaías 65:21-24; Apocalipsis 11:18). Ijkon kemej panotiyas xiujmej, xochital mopataujtiyas, uan ika tamis, semanauak taltikpak yeski tel takualtsinkan uan tel tatakis kemej xochital itech Edén. Dios nochipaya ‘kitapojtos imay uan kinchiuilijtos inintanejnekilis nochin tein yoltoskej’ (Salmo 145:16).

21. ¿Toni kinextia ke taltikpakneminij sennemiskej iniuan okuilimej?

²¹ Sennemiskej taltikpakneminij iniuan okuilimej. Koujtaj okuilimej uan tapialmej sentakuaskej. Nion se  konetsin kinmouilis okuilimej tein axkan tamouililmej (xikonixtajtolti Isaías 11:6-9; 65:25).

22. ¿Toni mochiuas ika kokolismej?

²² Amo onkasok kokolis. Jesús, kemej Tekiuaj itech iTekiuajyo Dios tein moajsi iluikak, okachi miakej kinpajtis, amo kemej ijkuak moajsia nikan taltikpak (Mateo 9:35; Marcos 1:40-42; Juan 5:5-9). “Nion se taltikpaknenkej kijtos: ‘Nimokokoua’.” (Isaías 33:24; 35:5, 6.)

23. ¿Keyej techtelyolpaktis neajokuilis?

²³ Tochankauan uan totasojikniuan akin momikilijkej moajokuiskej, uan komo kichiuaj tein Dios tajtani amo momikiliskejok. Moajokuiskej nochin mikemej akin yetokej itech italnamikilis Dios. Kemaj, “Dios kinpankixtis yoltokke nochi in animajme [oso mikemej], amo sayo in yolkualime. Ta, no nekes ten amo yolkualime” (Hechos 24:15; xikonixtajtolti Juan 5:28, 29).

24. ¿Tikonuelitaskia tionnemis itech se Xochital nikan taltikpak?

²⁴ Akin kinekiskej okachi kiixmatiskej toUeyi Tachijchiujkej Jiova, uan kiixtaliskej kitekitiliskej, kipiaskej se tel kualtsin nemilis. Uan no, motelneki maj okachi tikixmatikan Jesucristo, ta nochi nejin tatiochiualismej mochiuas yejua itechkopa.