1. Anyoin alosikinet naka Edeke kanuka akwap?

ALOSIKINET naka Edeke kanuka akwap erai cut naeumokin. Ekoto Yawe akwap kilelebata itunga luiyalamas ido kongaleete. Ebala Ebaibuli ebe: “Kiraik Edeke emanikor toma Eden ido kitabwaŋ . . . ŋolikitoi loisiyamikinit akonyen, loejok ainyam.” Kedau Edeke aisub etunganan lusodit Adam ka Keba, abu kibwaik kesi ore loibus kosodi alimokin kesi ebe: “Kouriaros kipuaros, kilelebunos akwap, kiruma.” (Ageun 1:28; 2:8, 9, 15) Aso, arai alosikinet naka Edeke ebe kouriata itunga idwe, kitanyanyaas ikoruon luka emanikor airiam akwap kere ka aidar itiang.

2. (a) Epone bani ijenuna oni ebe alosikinet naka Edeke kanuka akwap ebuni aitodolikin? (b) Anyoika nuinera Ebaibuli nuikamunitos itunga aijar ikaru kere?

² Iwomit ijo ebe alosikinet naka Edeke kanu itunga aiboi kotoma aparadais kakwap ebuni aitodolikin? Ebala Edeke ebe: “ener, etodoli da.” (Isaia 46:9-11; 55:11) Eebo, nuadau Edeke aitemokin, ebuni nges aswam! Ebala ebe “mam asubuni [akwap] atai” konye “tetere iboikinoi toma.” (Isaia 45:18) Itunga luikote ai ekoto Edeke aiboi kotoma akwap? Ido adaun apak naetia ai ekotor ngesi kesi aiboi kanen? Ebongokinit ebaibuli ebe: ‘Irumete  ikadolitok akwap, ebusete kotoma ikar kere.’​—Isabulin 37:29; Apukokinio 21:3, 4.

3. Ani ejautene loerono loejai toma akwap lolo, ido eyagaunit aingiseta anu?

³ Eebo, mam ber nuiswamauna. Edekanakinos kwana itunga ido kotwakete, kojiosi, koaranakinos da bonik. Ejaasi nueroko nuapotu kotakanutu. Kabeit, mam Edeke alosikinit akwap ajaut kwape iteio oni lolo! Inyo abu kotakan? Kanukinyo mam alosikinet naka Edeke itodolikino? Emamei ediotabo loiwadikat idiotunganan loepedori alimokin oni naarai abu ationis na kogeun kokuju.

4, 5. (a) Ingai cut kenerasi ka Keba kitosomai emun? (b) Epone ani epedoria etunganan lolem ejokuna ido komunono araun ekokolan?

⁴ Itetemit eitabo losodit loka Ebaibuli nuikamunitos etepegan loka Edeke loabu kotakan komanikor loka Eden. Itodiariatai nges kwape “emun,” konye mam nges arai etiang. Eitabo loka Ebaibuli loawasia itodunit ngesi cut kwape “loenyaritai Ekejodijodon, ka Satan da, ekeŋaalaran loka akwapin kere.” Enyaritai ngesi bobo ‘emun ŋol lokolo sek.’ (Ageun 3:1; Apukokinio 12:9) Abu emalaika loagogong lo, lomoyo lomam etakani, kitosom emun ainerakinor ka Keba, kwape da epedoria etunganan loeco ainakin ekeporoto aisub bala ebunit kanejai icebore. Kajai emalaika lo neasubia Edeke akwap kanuka itunga.​—Yob 38:4, 7.

⁵ Kwape edolitotor isuban kere luka Edeke, ingai bo asubuni “Ekejodijodon lo, Satan”? Koipone loepatana, ediopet kodwe luka Edeke luagogong lumoyon ngesi abu kibelokin elopet araun Ekejodijodon. Apedoros bo nu koipone kani? Lolo da, epedori etunganan loejokuna ido komunono araun ekokolan. Iswamaunos bo nu biai?  Epedori etunganan acamakin eipud loaronon alibun kotauke. Arai kiyatak ngesi aomoom nuikamunitos ngun, ebuni eipud ngol loaronon aiyatakin. Arai kedumu ngesi apak, epedori aswam nukaroko nulem aomoomoi ngesi.​—Yakob 1:13-15.

6. Epone ani abu okoku loka Edeke lomoyo loagogong koraunor Satan Ekejodijodon?

⁶ Apotu nu kiswamaunos kanejai Satan Ekejodijodon. Abu kopup Edeke elimokini Adam ka Keba auriar ka aileleb akwap kede idwekec. (Ageun 1:27, 28) Komoom Satan ebe, ‘Koany, itunga lu kere ti emaata eong itia Edeke!’ Kodukun do eipud loaronon kotau ke. Akaulo, abu kolimokin Keba nukaingal nuikamunitos Edeke. (Ageun 3:1-5) Kanuka ngun, koraun do ngesi “Ekejodijodon” apolou ke “Engalan” ka “Satan” apolou ke “Etepegan.”

7. (a) Kanukinyo atwakiata Adam ka Keba? (b) Kanukinyo emojongata idwe luka Adam kere ido kotwakete da?

⁷ Kanu aitosom aingal, abu Satan Ekejodijodon koinak Adam ka Keba aimwang Edeke. (Ageun 2:17; 3:6) Kanukangun, apotu kesi kotwakata kwape abalar Edeke ebe epote araai kemwangata ngesi. (Ageun 3:17-19) Kwape abu Adam koraunor lomam adolit neadiakara, apotu do idweke kere kirumut adiakar kane ajai ngesi. (Iromayon 5:12) Ipedori aituput ejautene kede atuba nainomere amatapalin. Arai ejaatar atuba kede aniikinet, inyo etakanikini amatapalin kere nuitolomuno katuba kangin? Ngin matapalit kere ejaunos kede aniikinet. Kwape kwangin, nginitunganan kere irumunit aniikinet naka amamus adolit kanejai Adam. Ngupengun emojongata itunga kere kotwakete da.​—Iromayon 3:23.

8, 9. (a) Epone bani abu Satan kitoronitor Yawe? (b) Kanukinyo mam Edeke abu komudiara amwangak ngun nepediakarata kesi?

⁸ Nengarenikina Satan Adam ka Keba adiakar, abu ngesi koinaki kesi amwanga Edeke. Etepegit ngesi eipugae  loka Yawe. Kanu aswam ngun, abala Satan ebe: ‘Erai Edeke epugan lokaronon. Inera nukaingal ido ibwait iboro luejokuk kanejaas lueyait nges. Mam itunga ekotos Edeke aipuga kesi. Epedorete kesi kanukec bon aseun nuejokak ka nueroko. Epote kesi adumun ajokis kotoma apugan ka.’ Epone bani abeitor Edeke ti aitemokina epeget ngon loetoronit ngesi? Eomitos icetunga ebe ti Edeke eyarit  abenyak lu. Konye ti ngin kereka ebongoki epeget loka Satan? Ti kereka ngin itodu ebe edolit eipone loipuga Edeke?

⁹ Kanunarai erai Yawe loetube loedolit mam ngesi abu komudia kesi atipet nepediakarata kesi . Abu ngesi koseu ainakin kesi apak kanu abongokin epeget loka Satan koipone loejok loepedori aitodun Satan kwape engalan. Aso, abu do Edeke koseu acamakin itunga apak aipugaikin bonik kingarenikinite Satan. Akiro nueswamaun Yawe ngun, ka nuacamakina nges apak naepol atubor eroko itemokina epeget ngol, ebunio aitetem kosula 11 koitabo kalo. Konye, ejok aomoom nuikamunitos nu: Ajokuna kereka Adam ka Keba aiyuun Satan, lomam eswamaikit kesi idiobore yen ajok? Ajokuna kereka kesi aiyuun ebe Yawe, loejaikit kesi iboro kere luejokak, ebe erai teni engalan? Anyoika ti nu iswama ijo?

10. Eipone ani ipedoria ijo aigang ewai loka Yawe kanu abongokin epeget loka Satan?

¹⁰ Ejok aomoom nuikamunitos aingiseta nu naarai nginidiopet kaoni iterekina kede iboro kwape kalu lolo. Eebo, ijaatar ijo arereng na aigang ewai loka Yawe kanu abongokin epeget loka Satan. Ipedori ijo acamun Yawe kwape Epugan kon kaingarakin aitodun ebe erai Satan engalan. (Isabulin 73:28; Awaragasia 27:11) Nukaiturur, ikidioko itunga lolo kotoma akwap luecamutos aseun aswam ngun. Ikeunit do na aingiset naepol noi, Konye isisianakini cut Ebaibuli ebe Satan ngesi ipugat akwap na?

11, 12. (a) Eipone ani itodunitor acodunio naka Yesu ebe Satan ngesi epugan loka akwap kana? (b) Inyoin bobo icebore yen itodunit ebe Satan ngesi epugan loka akwap kana?

¹¹ Mam Yesu cut abu kobuonokin ebe Satan nges ipugat akwap na. Koipone loaumokin, abu Satan kitodik  Yesu “ajakanuto kere nuka akwap, ka aibusesukec.” Kosodi Satan alimokin Yesu ebe: “Kainakini ŋun kere, arai kibiror aima eoŋ.” (Matayo 4:8, 9; Luka 4:5, 6) Komoom ber ijo nuikamunitos ngun. Ti kereka ainakinet na erai acodunet nejai Yesu korai mam erai Satan ipugat ajakanuto nu? Mam Yesu abu kitepege ebe Satan ngesi epugan loka ajakanuto kangun kere. Kabeit, ti Yesu iswamat ngun karai mam erai Satan eyait ajakanuto ngun.

¹² Kabeit, erai Yawe Edeke lokapedor kere, Lokasuban akwap kere. (Apukokinio 4:11) Kabeit, abu Yesu cut kitodu Satan kwape “ekapolon loka akwapin kanu.” (Yokana 12:31; 14:30; 16:11) Itodunit bobo Ebaibuli Satan Ekejodijodon kwape “edeke loka ikar kalu.” (2 Ikorinton 4:3, 4) Ewadikat ekiyakia lo Kristoyot Yokana nuekamunitos Satan etepegan ebe: “iboiete da akwapin kere kotoma lokaronon.”​—1 Yokana 5:19.

13. Kanukinyo ipudar oni akwap naitetet?

¹³ Kangon karu loetubor, iyata akwap amunar noi. Ipu ajoresio nuejiosi, epugak lumam emunoko, engarenok luka idiinin luesoswai ka itunga luebilibilete ikisila. Emunar akwap kere. Konye itodunit Ebaibuli ebe eyapie apak naebeitor Edeke amudiar itunga lukarokok kotoma ojie ke loenyaritai Arumagedon. Ebuni na apukor do erot kanuka akwap naitetet naedolit.​—Apukokinio 16:14-16.

14. Ingai bo eseunit Edeke araun Ekabaka loka Ajakanut Ke, ido epone bani adwaritere nu?

¹⁴ Abu Edeke Yawe koseu Yesu Kristo araun Epugan loka Akejakanut nako kuju. Abu Ebaibuli kodwarite ebe: “Naarai kiwurikinitai oni ikoku, kiinakinitai oni ikoku yenisapat: Ejaenena rwaru airum okeperike: Ekekiror da enyarao . . . Ekapolon loka Ainapakin. Mam enaŋete airumuke  ka ainapakin.” (Isaia 9:6, 7) Nuikamunito apugan na, abu Yesu kisisianak oni ailip ebe: “Akonijakanut kobu. Nuikoto kiswamai kakwapin Kwape iswamaere kotoma akuj.” (Matayo 6:10) Kwape ibunio oni aanyun kotoma oitabo kalo, eyapie Ajakanut naka Edeke amudiar ajakanuto nuka akwap na kere, ido nges bon ebuni aburokin kesi kere. (Daniel 2:44) Kosodi do Ajakanut naka Edeke ayaun eparadais toma akwap.

15. Inyoin bo “akwap naitetet”?

¹⁵ Itijenikinit oni Ebaibuli ebe: “kimuno akuj nakitetet ka akwap da nakitetet, neiboio adolit.” (2 Petero 3:13; Isaia 65:17) Irwan nuipu, neinerar Ebaibuli nuikamunitos “akwap,” inera nges nuikamunitos itunga luiboiete kotoma akwap. (Ageun 11:1) Aso, “akwap nakitetet” naedolit nges atukot naka itunga luisialamikinit Edeke.

16. Anyoin ainakinet naka Edeke naejok noi mama ejaasi ngul luisialamikinit nges, ido anyoika nuibusakinit oni aswam kanu adumun ainakinet ngin?

¹⁶ Abu Yesu kisumunite ebe kotoma akwap naitetet naebunit, ngul luisialamikinit Edeke epote adumun ainakinet naka “aijar namam edaun.” (Marako 10:30) Kilipit ijo kopuko Ebaibuli kon kosiom Yokana 3:16 ka 17:3, ido koany nuabu Yesu kinerite nuibusakinit oni aswam kanu adumun aijar namam edaun. Kanuka ngun, ekoto ijo aisisianen Ebaibuli kanu ajenun arerengusio nuepote ngul luisialamikinit Edeke adumun kotoma paradais kakwap.

17, 18. Epone bani ipedoria oni cut amunokin ebe ebuni ainapakin ka ayuara ajaun toma akwap kere?

¹⁷ Emameun aronis, ejie, abilibilio naikisila, ka eyarit. “Emameun ikaronon . . . Konye luitasonos irumete akwap.” (Isabulin 37:10, 11) Ejaun ainapakin naarai ‘itasangi Edeke ijiisio kiton osaŋe loka akwap.’ (Isabulin 46:9;  Isaia 2:4) “Ekeriakaros ikadolitok kapaarasiake; Ainapakin da naepol aitodol naemamuunor elap”​—ikar kere!​—Isabulin 72:7.

¹⁸ Epote ikamaak luka Yawe aiboi kotoma ayuara. Nepe duc arimaritotor itunga luka Isirael Edeke, apotu kesi kiboenenete kotoma ayuara. (Ilebin 25:18, 19) Eraunos cut nukaumokin oni adumun ayuara naeputos kangin kotoma aparadais kakwap!​—Isaia 32:18; Mika 4:4.

19. Kanukinyo ijenia oni ebe idilunete inyamat kotoma akwap nakitetet naisumunit Edeke?

¹⁹ Mam aikidiokonut naka inyamat ejaun. Abu ayoon isabulin kowoo ebe: “Idiliunete akima kakwap kaidiasia nuka iroan.” (Isabulin 72:16) Isirerengi Edeke Yawe itunga lukadolitok, ido “Ara akwap akemio.”​—Isabulin 67:6.

20. Kanukinyo ipedoria oni amunokin cut ebe ebuni akwap kere araun eparadais?

²⁰ Eraun akwap kere eparadais. Ejaunos ireria luibusiak noi ka imanikoria toma akwap napotu itunga lukadiakanarak komunaritos. (Isaia 65:21-24; Apukokinio 11:18) Ebuni akwap kere araun naibus noi ido korai naiboliaikit kwape kolo kejaar emanikor loka Eden. ‘Epukor Edeke akekan ka aisimonikin da eimiel loka ŋinibore kere yenikajaran.’​—Isabulin 145:16.

21. Inyo itodunit ebe ejaun ainapakin kiding itunga kede itiang?

²¹ Ejaun ainapakin kiding itunga ka itiang. Epote itiang lukais ka luipisio kore adak nepepe. Mam ikoku yenididi ebuni akurianar itiang luededeng bobo.​—Isaia 11:6-9; 65:25.

22. Inyoin bo ebuni atakanikin adeka?

²² Emameun bobo adek. Kwape Epugan loka Ajakanut naka Edeke, ebuni Yesu aswam nuka aitangaleun itunga kere adepar nukolo eswamat ngesi kotoma akwap. (Matayo 9:35; Marako 1:40-42; Yokana 5:5-9)  Kosodi, “Loiboienenei kanen mam ebala ebe, ‘Adek eoŋ.’”​—Isaia 33:24; 35:5, 6.

23. Kanukinyo ebunio ajarun ainakin oni aiyalama naepol noi?

²³ Itajaruno luminawok lukatwak ido ejaunos kesi kede amuno naka aijar ikaru kere. Ngul kere luejotoete kotoma atwanare luiitunit Edeke, ebunio ainyakun toma aijar. Kabeit, “ejaun ajarun naka luedolito ka lumam edolito da.”​—Aswamisio 24:15; Yokana 5:28, 29.

24. Epone ani ipupio ijo nuikamunitos ajaikin toma aparadais kakwap?

²⁴ Ngul luisisiate nuikamunitos Lokasuban wok Edeke Yawe ido kijaanakinete ngesi, epote adumun aijar naeumokina nakoingaren! Abu Yesu kisumuno ekaronon loebubukitai kangesi ebe: “Ijaun nepepe keoŋ Paradais,” inera ngesi nuikamunitos Aparadais naebeit ajaikin ingaren. (Luka 23:43) Ibusakinit oni aisisia nuipu nuikamunitos Yesu Kristo, naarai arerengusio nu kere ebunete kitoritere nejai ngesi.