3-нҗи бап

Худай ери нәме максат билен яратды?

Худай адамлары нәме максат билен яратды?

Худайың душманы нәдип пейда болды?

Ер йүзүнде нәхили яшайыш болар?

1. Худай ери нәме максат билен яратды?

ХУДАЙ, догрудан-да, ери аҗайып максат билен яратды. Ехова ер йүзүнде адамларың кеселлемән, багтлы яшамагыны ислейәр. Төвратда: «Реб Худай... бир баг дикди; гөрмәге овадан ве иймәге оңат хер агаҗы... гөгертди» дийилйәр. Худай Адам ата билен Хов энәни яраданда, олары аҗайып багда ерлешдирип: «Хасыллы болуң, ве көпелиң, ве ер йүзүни долдурың, ве оны табын эдиң» дийип табшырды (Барлык 1:28; 2:8, 9, 15). Гөршүмиз ялы, Худай адамларың чага догруп, ер йүзүни Җеннете өврүп, хайванлара гөзегчилик этмегини иследи.

2. а) Худайың ере дегишли максадыны ерине етирҗекдигине нәме үчин шүбхеленмән билерис? б) Мукаддес Язгыларың айтмагына гөрә, ер йүзүнде нәхили адамлар эбеди яшар?

² Хава, Худай адамларың ер йүзүнде Җеннетде яшамагыны ислейәр. Сениң пикириңче, Җеннет болармыка? Худай: «Мен айтдым... эдерин» дийди (Ишая 46:9—11; 55:11). Ехова максадыны хөкман амала ашырар! Ол ер йүзүни «бидерек ере яратмады, оны яшайыш үчин дөретди» (Ишая 45:18). Худайың максадына гөрә, ер йүзүнде нәхили адамлар ве  нәче вагтлап яшамалы? Мукаддес Язгылар: «Догры адамлар ери мирас алып, онда эбеди яшар» диййәр (Зебур 37:29; Ылхам 21:3, 4).

3. Ер йүзи нәхили гөзгыны ягдайда ве шонуң билен баглы нәхили сораг йүзе чыкяр?

³ Гөршүмиз ялы, Худайың максады хениз амала ашанок. Муңа башда бир зат пәсгел берди. Шу гүнлер адамлар кеселлейәрлер ве өлйәрлер; олар сөвешйәрлер ве бири-бирлерини өлдүрйәрлер. Элбетде, Худай шейле болмагыны ислемеди. Онда Худайың максады нәме үчин амала ашмадыка? Бу сорага тарыхы китапларың бири-де җогап бермейәр, себәби оларда гөкде болуп гечен затлар барада айдылмаяр.

ХУДАЙЫҢ ДУШМАНЫ НӘДИП ПЕЙДА БОЛДЫ?

4, 5. а) Йылан аркалы Хов эне билен ким гүрлешди? б) Догручыл хем халал адам нәдип огры болуп билер?

⁴ Төвратда Эрем багында болуп гечен вака гүррүң берилйәр. Шол вакадан Худайың душманының бардыгыны билйәрис. Бу душмана «йылан» дийилйәр; эмма ол хакыкы йылан дәл. Инҗилде оңа «Иблис я шейтан» ве «бүтин дүнйәни аздырян көне йылан» дийилйәр (Барлык 3:1; Ылхам 12:9). Театрда гурҗак ойнадян адам ялы, гүйчли гөзе гөрүнмейән перишде-де йыланы уланып, Хов эне билен гүрлешди. Худай ери адамлар үчин тайярлап йөркә-де, онуң бу рухы оглы барды (Эйюп 38:4, 7).

⁵ Худайың әхли ярадан затлары кәмил. Онда Шейтан Иблис нәдип пейда болдука? Гысгача айтсаң, Худайың рухы огулларының бири Иблис болды. Эйсем, шейле зат болуп билерми? Хатда иң догручыл ве халал адамам огры болуп билер. Нәдип?  Адамың йүрегинде нәдогры ислег дөрейәр. Эгер-де ол шол ислеги хакда хемише пикир этсе, ислег гитдигиче гүйҗейәр. Аматлы пурсат дөрәнде, адам гүнә эдйәр (Якуп 1:13—15).

6. Худайың рухы оглы нәдип Шейтан Иблис болды?

⁶ Шейтан Иблис билен хем шейле болды. Ол Худайың: «Көпелиң ве ер йүзүни долдурың» дийип, Адам ата билен Хов энә берен табшырыгыны эшиден болса герек (Барлык 1:27, 28). Шейтан: «Адамлар Худая дәл-де, маңа сежде этселер болмаярмы?» дийип, пикир эден болмалы. Онуң йүрегиндәки нәдогры ислег гүйҗеди. Онсоң, Худая төхмет атып, Хов энәни алдады (Барлык 3:1—5). Шейдип, ол Иблис, ягны «төхметчи» ве Шейтан, ягны «душман» болды.

7. а) Адам ата билен Хов эне нәме үчин өлди? б) Адам атаның несли нәме үчин гарраяр ве өлйәр?

⁷ Шейтан Адам атаны ве Хов энәни хиле билен алдава салып, Худая гулак асмазлыга итерди (Барлык 2:17; 3:6). Ахыры Худайың айдышы ялы, олар өлдүлер (Барлык 3:17—19). Адам ата гүнә эдип кәмиллигини йитирени үчин, онуң әхли несли гүнәли догулды (Римлилер 5:12). Керпич гуюлян галыбы гөз өңүне гетир. Эгер-де шол галып заяланан болса, онда ясалан керпичлер нәхили болар? Керпичлериң барысы зая чыкар. Шонуң ялы-да хер бир адама Адам атадан «зая» гечди. Ине, шонуң үчинем хемме адамлар гарраярлар ве өлйәрлер (Римлилер 3:23).

8, 9. а) Шейтан Худая нәхили төхмет атды? б) Худай питнечилери нәме үчин дессине ёк этмеди?

⁸ Шейтан Адам ата билен Хов энәни Худая гаршы гүнә этдирип, Ехованың хөкүмдарлыгына гаршы питне турузды. Аслында, Шейтан шейле дийди:  «Худай — эрбет хөкүмдар. Ол бенделерини алдаяр ве олара говы зат беренок. Адамлар Худайсыз хем яшап билер. Ягшыны-яманы оларың өзлери хем селҗерип билер. Мен Худайдан хас говы хөкүмдар боларын». Худай бу кемсидиҗи төхмете нәхили җогап береркә? Кәбир адамлар Худай питнечилери ёк этмелиди  диййәрлер. Йөне шейле эден болса, пайхаслы болармыды? Бу Худайың адалатлы хөкүмдардыгыны субут эдермиди?

⁹ Ехова адалатлы боланы үчин, питнечилери дессине ёк этмеди. Ол Шейтаның атан төхметине догры җогап берип, Иблисиң яланчыдыгыны субут этмек үчин, вагт герек диен карара гелди. Шонуң үчинем Худай адамлары Шейтаның тәсиринден гораман, өзлерине хөкүм сүрмәге ёл берди. Шу китабың 11-нҗи бабында Ехованың нәме үчин шейле эдендиги хем-де меселәни чөзмәге нәме үчин көп вагт берендиги дүшүндирилйәр. Хәзир болса ойланып гөр: Хич хили ягшылык этмедик Шейтана, Адам ата билен Хов энәниң ынанмагы пайхаслымы? Әхли зады берен Ехованы хилегәр яланчы хасапламага оларда себәп бармыды? Сен болсаң киме ынанардың?

10. Сен нәдип Худайың тарапыны тутуп билерсиң?

¹⁰ Бу сорагларың үстүнде ойланмак герек, себәби бизиң хер биримиз өзбашдак карара гелмели. Хава, сен Ехованы өз Хөкүмдарың хасаплап, онуң тарапыны тутуп билерсиң ве Шейтаның яланчыдыгыны субут эдип билерсиң (Зебур 73:28; Сүлейманың тымсаллары 27:11). Гынансак-да, миллиардларча адамларың санлыҗасы Худайың тарапыны тутяр. Онда бу дүнйәниң хөкүмдары Шейтанмы? Мукаддес Язгылар нәме өвредйәр?

БУ ДҮНЙӘНИҢ ХӨКҮМДАРЫ КИМ?

11, 12. а) Исаның дүшен сынагы бу дүнйәниң хөкүмдарының Шейтандыгыны билмәге нәдип көмек эдйәр? б) Бу дүнйәниң хөкүмдарының Шейтандыгыны ене нәме субут эдйәр?

¹¹ Бу дүнйәниң хөкүмдарының Шейтандыгыны Иса инкәр этмейәрди. Бир гезек Шейтан гудрат  билен «дүнйәниң бүтин патышалыкларыны, оларың шан-шөхратыны [Иса] гөркезди» ве: «Дыза чөкүп, маңа сежде этсең, мен шу затларың хеммесини саңа берейин» дийди (Матта 4:8, 9; Лука 4:5, 6). Әхли патышалыклар Шейтаның элинде болмадык болса, ол Исаны шейдип сынап билермиди? Иса бу дүнйәниң хөкүмдарының Шейтандыгыны билйәрди, ёгса онуң хөкүмдар дәлдигини айдарды.

¹² Элбетде, Ехова — Гүйҗи хер зада етйән Худай, тәсин әлемиң Ярадыҗысы (Ылхам 4:11). Муңа гарамаздан, Иса «бу дүнйәниң хөкүмдарының» Шейтандыгыны айтды (Яхя 12:31; 14:30; 16:11). Шейтан Иблисе «бу дүнйәниң таңрысы» хем дийилйәр (2 Коринтослылар 4:3, 4). Яхя ресул Шейтан барада шейле язды: «Бүтин дүнйә... иблисиң гол астында» (1 Яхя 5:19).

ШЕЙТАНЫҢ ДҮНЙӘСИ НӘДИП ЁК ЭДИЛЕР?

13. Тәзе дүнйә нәме үчин герек?

¹³ Гитдигиче дүнйәниң ягдайы агырлашяр. Хемме ерде диен ялы уруш гидйәр, адамлар найынсап сыясатчылардан, икийүзли дини ёлбашчылардан ве доңйүрек җенаятчылардан яңа эҗир чекйәр. Бу затлара хич хили чәре тапыланок. Мукаддес Язгыларда Худай Армагеддонда худайсыз дүнйәни ёк эдип, тәзе адалатлы дүнйәни гурҗак вагтының етип гелйәндиги айдыляр (Ылхам 16:14—16).

14. Худай Патышалыгына кими Хөкүмдар белледи ве бу барада нәхили велилик эдилди?

¹⁴ Ехова гөкдәки Патышалыгына я-да Хөкүметине Иса Месихи Хөкүмдар эдип белледи. Бу барада Мукаддес Язгыларда бир эййәм велилик эдилипди: «Бизе бир чага догулды, бизе бир огул берилди;  хөкүмдарлык Онуң гершинде болар; Онуң адына... Парахатлык Шазадасы диерлер. Онуң хөкүмдарлыгы улы болар, парахатчылыгының болса чәги болмаз» (Ишая 9:6, 7). Иса бу хөкүмет барада: «Патышалыгың гелсин; Гөкде болшы ялы, ерде-де Сениң ислегиң амала ашсын» дийип, дога этмеги өвретди (Матта 6:10). Адамзат хөкүметиниң ерине басым Худайың Патышалыгы гелер (Даниел 2:44). Шонда ер йүзүнде Җеннет болар.

БАСЫМ ТӘЗЕ ДҮНЙӘ ГЕЛЕР!

15. «Тәзе ер» нәмәни аңладяр?

¹⁵ Мукаддес Язгыларда: «Биз... [Худайың] вадасына гөрә тәзе гөклере, тәзе ере гарашярыс; оларда болса догрулык хөкүм сүрер» дийилйәр (2 Петрус 3:13; Ишая 65:17). Кәте Язгылардакы «ер» сөзи ер йүзүнде яшаян адамлары аңладяр (Зебур 66:1, 4). Диймек, адалатлы «тәзе ер» — Худайың мерхеметини газанан адамлар.

16. Худайың мерхеметини газанан адамлар бахасына етип болмаҗак нәхили совгат алар ве оны алмак үчин нәме этмели?

¹⁶ Иса тәзе дүнйәде догры адамларың «эбеди яшайшы» совгат алҗагыны сөз берди (Маркус 10:30). Мукаддес Язгылары элиңе ал-да, Яхя 3:16 ве 17:3-дәки сөзлери ока. Шу аятлардан сен эбеди яшайшы алмак үчин нәме этмелидигини билерсиң. Инди болса Худайың бу аҗайып совгадына мынасып адамлара, ер йүзүнде болҗак Җеннетде нәхили берекетлериң гарашяндыгыны гөрели.

17, 18. Ер йүзүнде парахат хем ховпсуз дурмушың болҗакдыгына биз нәме үчин ынанярыс?

¹⁷ Эрбетлик, уруш, җенаятчылык ве зорлук болмаз. «Эрбет ёк болар... Эмма мылакатлылар ери  мирас алар» (Зебур 37:10, 11). Парахатлык болар, себәби Худай «ериң уҗуна ченли урушлары тогтадар» (Зебур 46:9; Ишая 2:4). Шонда «догры адам гүлләр, Ай ёк болана деңеч [эбеди] бол парахатлык болар» (Зебур 72:7).

¹⁸ Ехованың гуллукчылары ховпсуз яшар. Гадымы дөвүрде ысрайыллылар Худая гулак асяркалар, ховпсуз яшаярды (Левилилер 25:18, 19). Җеннетде асуда дурмушың болҗакдыгы нәхили аҗайып! (Ишая 32:18; Мика 4:4).

19. Худайың тәзе дүнйәсинде ачлык болмаҗакдыгыны ниреден билйәрис?

¹⁹ Иймит бол болар. «Галла дагларың башына ченли юртда бол болар» (Зебур 72:16). «Ер хасылыны берер» дийип, мезмурчының пыгамберлик эдиши ялы, Ехова Худай догры адамлара ак пата берер (Зебур 67:6).

20. Бүтин ер йүзүниң Җеннет болҗагына нәме үчин шүбхеленмели дәл?

²⁰ Бүтин ер йүзи Җеннет болар. Адамларың хәзирки даргадян ерини овадан җайлар ве баглар безәр. (Ишая 65:21—24; Ылхам 11:18). Вагтың гечмеги билен бүтин ер йүзи Эрем багы ялы гүлләр. Худай хемише «элини ачып, әхли дирилери ислеглери боюнча дойрар» (Зебур 145:16).

21. Адамларың ве хайванларың парахат яшаҗакдыгыны ниреден билйәрис?

²¹ Адамлар ве хайванлар парахат яшар. Ябаны ве өй хайванлары бир ерде отлар. Чагалар хәзирки ховплы хайванлардан хем горкмазлар (Ишая 11:6—9; 65:25).

22. Адамларың саглыгы нәхили болар?

²² Кеселчилик болмаз. Иса ерде яшанда көп  кеселлилери сагалтды. Ол Худайың гөкдәки Патышалыгының Хөкүмдары хөкмүнде адамларың саглыгы барада алада эдер (Матта 9:35; Маркус 1:40—42; Яхя 5:5—9). Шонда «яшайҗыларың хич бири: «мен ярамок» диймез» (Ишая 33:24; 35:5, 6).

23. Дирелиш нәме үчин шатлык гетирер?

²³ Өлен адамлар эбеди яшамак үчин дирелер. Худай өлүм укусына гиденлериң, эмма өз ядында саклаян адамларының хеммесини дирелдер. «Хем догрулар, хем эгрилер өлүмден дирелер» (Ресулларың ишлери 24:15; Яхя 5:28, 29).

24. Ер йүзүндәки Җеннет барада сен нәме пикир эдйәң?

²⁴ Бейик Ярадыҗымыз Ехова Худая якынлашян ве оңа гуллук эдйән адамлара аҗайып гелеҗек гарашяр! Иса янындакы пүрсе чүйленен җенаятчыларың бирине: «Сен... Мениң билен биле бехиштде боларсың» дийди. Иса оңа гелеҗекдәки ер йүзүнде болҗак Җеннет барада айдыпды (Лука 23:43). Худай бу вадалары Иса пыгамбер аркалы ерине етер. Шонуң үчин ол хакда көпрәк билмели.

МУКАДДЕС ЯЗГЫЛАР НӘМЕ ӨВРЕДЙӘР?

▪ Худайың бүтин ер йүзүни Җеннете өвүрмек максады хөкман ерине етер (Ишая 45:18; 55:11).

▪ Бу дүнйәниң хөкүмдары Шейтан (Яхя 12:31; 1 Яхя 5:19).

▪ Гелеҗекдәки тәзе дүнйәде Худай әхли адамлара бол берекет берер (Зебур 37:10, 11, 29).

[Макаланың сораглары]

[30 Сахыпадакы сурат]

Әхли патышалыклар Шейтаның элинде болмадык болса, ол оны Иса пыгамбере хөдүрләп билермиди?

 [35 сахыпадакы сурат]