1. Ko e hā ‘a e taumu‘a ‘a e ‘Otuá ki he māmaní?

KO E taumu‘a ‘a e ‘Otuá ki he māmaní ‘oku fakaofo mo‘oni. ‘Oku fiema‘u ‘e Sihova ke fakafonu‘aki ‘a e māmaní ‘a e kakai fiefia mo mo‘ui lelei. ‘Oku pehē ‘e he Tohi Tapú “na‘e tō ‘e Sihova Elohimi ha ngouetapu ‘i Iteni” pea na‘á ne “fakatupu . . . ‘a e ‘akau kehekehe na‘e ha faka‘ofo‘ofa, pea lelei ki he kai.” Hili hono fakatupu ‘e he ‘Otuá ‘a e ‘uluaki tangatá mo e fefiné, ‘a ‘Ātama mo ‘Ivi, na‘á Ne tuku kinaua ki he ‘api fakalata ko iá peá ne tala ange kiate kinaua: “Mo fakatupu, mo fakatokolahi, mo fakafonu ‘a mamani, pea ikuna ia.” (Senesi 1:28; 2:​8, 9, 15) Ko ia ko e taumu‘a ia ‘a e ‘Otuá ke ma‘u ‘e he tangatá ‘a e fānau, fakalahi atu ‘a e ngaahi ngata‘anga ‘o e ‘api ngoue ko iá ki he kotoa ‘o e māmaní, pea tokanga‘i ‘a e fanga manú.

2. (a) ‘Oku anga-fēfē ‘etau ‘ilo‘i ‘e fakahoko ‘a e taumu‘a ‘a e ‘Otuá ki he māmaní? (e) Ko e hā e lau ‘a e Tohi Tapú fekau‘aki mo e mo‘ui ta‘engata ‘a e fa‘ahinga ‘o e tangatá?

² ‘Okú ke fakakaukau ‘e faifai ange pea fakahoko ‘a e taumu‘a ‘a Sihova ko e ‘Otuá ki he kakaí ke nau mo‘ui ‘i ha palataisi fakamāmaní? “Kuou fakaha ia,” ko e fanongonongo ia ‘a e ‘Otuá, “bea teu fai ia.” (Aisea 46:​9-11, PM; 55:11) ‘Io, ko e me‘a ‘oku taumu‘a ki ai ‘a e ‘Otuá te ne fai mo‘oni! ‘Okú ne folofola “na‘e ‘ikai te ne fakatupu ia [‘a e māmaní] ke maomaonganoa,” ka “na‘a ne fa‘u ia ke nofo‘anga.” (Aisea 45:18) Ko e fa‘ahinga kakai fēfē na‘e fiema‘u ‘e he ‘Otuá ke nau nofo ‘i he māmaní? Pea ko e hā hono lōloa ‘ene fiema‘u ke nau nofo ‘i hení? ‘Oku tali  ‘e he Tohi Tapú: “Ko ha‘a fai totonu te nau ma‘u ‘a e fonua, pea te nau nofo ai ‘o tuputupu‘a.”—Faka‘ītali ‘amautolu; Sāme 37:29; Fakahā 21:​3, 4.

3. Ko e hā ‘a e ngaahi tu‘unga fakamamahi ‘oku lolotonga hoko ‘i he māmaní, pea ko e hā ‘a e ongo fehu‘i ‘oku langa‘i hake hení?

³ ‘Oku hā mahino, kuo te‘eki ai ke hoko eni. ‘Oku hoko ‘a e kakaí ‘o puke mo mate he taimí ni; ‘oku a‘u ‘o nau tau mo fetāmate‘aki. Na‘e ‘i ai ‘a e me‘a na‘e fehālaaki. Kae kehe, ko e mo‘oni, na‘e ‘ikai fakataumu‘a ‘e he ‘Otuá ke hoko ‘a e māmaní ki he me‘a ‘oku tau sio ki ai he ‘aho ní! Ko e hā na‘e hokó? Ko e hā kuo ‘ikai ke fakahoko ai ‘a e taumu‘a ‘a e ‘Otuá? ‘Oku ‘ikai ha tohi hisitōlia kuo hiki ‘e he tangatá ‘e lava ke ne tala mai kiate kitautolu koe‘uhí he ko e faingata‘á na‘e kamata ia ‘i hēvani.

4, 5. (a) Ko hai mo‘oni na‘e lea kia ‘Ivi fakafou ‘i ha ngatá? (e) ‘E anga-fēfē nai ‘a e lava ke hoko ko ha kaiha‘a ha tokotaha taau mo faitotonu ki mu‘a?

⁴ Ko e ‘uluaki tohi ‘o e Tohi Tapú ‘oku fakamatala ai ki ha tokotaha-fakafepaki ki he ‘Otuá ‘a ia na‘e ‘asi hake ‘i he ngoue ko ‘Ītení. ‘Oku fakamatala‘i ia ko e “ngata,” ka na‘e ‘ikai ko ha manu pē ia. Ko e tohi faka‘osi ‘o e Tohi Tapú ‘oku fakahaa‘i ai ia ko e “toko taha ‘oku ui ko e Tevolo mo Setane, ‘a e toko taha ‘oku ne kākā‘i ‘a mamani kātoa.” ‘Oku toe ui ia ko e “Ngata ‘o ono ‘aho.” (Faka‘ītali ‘amautolu; Senesi 3:1; Fakahā 12:9) Ko e ‘āngelo mālohí ni, pe me‘amo‘ui laumālie ta‘ehāmaí, na‘á ne ngāue‘aki ha ngata ke ne lea kia ‘Ivi, ‘o hangē pē ko hono lava ‘e ha taha pōto‘i ‘o ‘ai ke hā ngali ko hono le‘ó ē ‘oku ha‘u mei ha tamapua ofi mai pe ko ha tokotaha lea fakapuli. Ko e tokotaha laumālie ko iá ‘oku ‘ikai ha veiveiua na‘á ne ‘i ai ‘i he taimi na‘e teu‘i ai ‘e he ‘Otuá ‘a e māmaní ma‘á e tangatá.—Siope 38:​4, 7.

⁵ Kae kehe, koe‘uhi ko e ngaahi fakatupu kotoa ‘a Sihová ‘oku haohaoa, ko hai na‘á ne ngaohi ‘a e “Tevolo” ko ení, ‘a e “Setane” ko ení? Ko hono ‘ai mahinó, ko e taha ‘o e ngaahi foha laumālie mālohi ‘o e ‘Otuá na‘á ne liliu ‘o hoko tonu ko e Tēvoló. Na‘e malava fēfē ení? Sai, ‘i he ‘ahó ni ‘e lava ha tokotaha ‘a ia na‘e ‘ulungāanga taau mo faitotonu ki mu‘a ke hoko ko ha  kaiha‘a. ‘Oku anga-fēfē ‘ene hoko iá? ‘E lava ke faka‘atā ‘e ha tokotaha ha holi fehālaaki ke tupu ‘i hono lotó. Kapau ‘okú ne hanganaki fakakaukau fekau‘aki mo ia, ‘e lava ke hoko ‘a e holi fehālaaki ko iá ‘o mālohi ‘aupito. Pea kapau ‘oku malanga tonu hake ‘a e faingamālié, te ne ngāue nai ki he holi kovi kuó ne fakakaukau fekau‘aki mo iá.—Semisi 1:​13-15.

6. Na‘e anga-fēfē ‘a e hoko ‘a ha foha laumālie mālohi ‘o e ‘Otuá ko Sētane ko e Tēvoló?

⁶ Na‘e hoko eni ‘i he tu‘unga ‘o Sētane ko e Tēvoló. ‘Oku ngalingali na‘á ne fanongo ki he ‘Otuá ‘i he‘ene tala kia ‘Ātama mo ‘Ivi ke na ma‘u fānau pea ke fakafonu ‘a e māmaní ‘aki ‘ena fānaú. (Senesi 1:​27, 28) ‘⁠Ko ē, ko e fa‘ahinga kotoa ko eni ‘o e tangatá ‘e lava ke nau lotu mai kiate au kae ‘ikai ko e ‘Otuá!’ ko e fakakaukau mahino ia ‘a Sētané. Ko ia na‘e langa‘i ai ha holi fehālaaki ‘i hono lotó. Na‘e faifai pē ‘o ne fai ha me‘a ke kākaa‘i ai ‘a ‘Ivi ‘aki hono tala kiate ia ha ngaahi loi fekau‘aki mo e ‘Otuá. (Senesi 3:​1-5) Na‘á ne hoko ai ko ha “Tevolo,” ‘a ia ‘oku ‘uhingá ko e “Tokotaha Lau‘ikovi Loi.” ‘I he taimi tatau, na‘á ne hoko ai ko “Setane,” ‘a ia ‘oku ‘uhingá ko e “Tokotaha-Fakafepaki.”

7. (a) Ko e hā na‘e mate ai ‘a ‘Ātama mo ‘Iví? (e) Ko e hā ‘oku tupu ai ‘o motu‘a pea mate ‘a e fānau kotoa ‘a ‘Ātamá?

⁷ ‘I hono ngāue‘aki ‘a e ngaahi loí mo e kākaá, na‘e fakatupunga ‘e Sētane ko e Tēvoló ‘a ‘Ātama mo ‘Ivi ke na talangata‘a ki he ‘Otuá. (Senesi 2:17; 3:6) Ko hono olá, na‘e faifai atu pē ‘o na mate, ‘o hangē ko ia na‘e tala ‘e he ‘Otuá ‘e hoko kia kinaua kapau te na talangata‘á. (Senesi 3:​17-19) Koe‘uhi na‘e hoko ‘a ‘Ātama ‘o ta‘ehaohaoa ‘i he‘ene faiangahalá, na‘e ma‘u tukufakaholo ai ‘e he kotoa ‘o ‘ene fānaú ‘a e angahalá meiate ia. (Loma 5:12) Ko e tu‘ungá ni ‘e fakatātaa‘i‘aki nai ha kapa ‘oku ngāue‘aki ki he ta‘o maá. Kapau ‘oku makoko ‘a e kapá, ko e hā ‘e hoko ki he fo‘i mā taki taha ‘e ta‘o ‘i he kapá? Ko e fo‘i mā taki taha ‘e makoko, pe ‘i ai ha ta‘ehaohaoa ai. ‘I he tu‘unga meimei tatau, kuo ma‘u tukufakaholo ‘e he tangata taki taha ha “makoko” ‘o e ta‘ehaohaoá meia ‘Ātama. Ko e ‘uhinga ia ‘oku tupu ai ‘o motu‘a pea mate ‘a e tangatá kotoa.—Loma 3:23.

8, 9. (a) Ko e hā ‘a e pole ‘oku hā mahino na‘e fai ‘e Sētané? (e) Ko e hā na‘e ‘ikai faka‘auha ai ‘e he ‘Otuá ‘a e kau angatu‘ú ‘i he taimi pē ko iá?

 ⁸ ‘I hono taki ‘e Sētane ‘a ‘Ātama mo ‘Ivi ke na faiangahala ki he ‘Otuá, na‘á ne taki mo‘oni ai ha angatu‘u. Na‘á ne pole‘i ai ‘a e founga pule ‘a Sihová. Na‘e hangē na‘e pehē ‘e Sētane: ‘⁠Ko e ‘Otuá ko ha pule kovi. ‘Okú ne tala ‘a e ngaahi loi peá ne ta‘ota‘ofi ‘a e ngaahi me‘a lelei mei he fa‘ahinga ‘okú ne pule  ki aí. ‘Oku ‘ikai fiema‘u ‘e he tangatá ke pule mai kiate kinautolu ‘a e ‘Otuá. ‘E lava ke nau fili ma‘anautolu ‘a e me‘a ‘oku leleí mo e me‘a ‘oku koví. Pea te nau lelei ange kinautolu ‘i he malumalu ‘o ‘eku pulé.’ ‘E anga-fēfē hono fakalelei‘i ‘e he ‘Otuá ha pole fiematamu‘a pehē? ‘Oku fakakaukau ‘a e ni‘ihi na‘e totonu ke tāmate‘i ai pē ‘e he ‘Otuá ‘a e kau angatu‘ú. Ka na‘e mei tali ‘e he me‘a ko iá ‘a e pole ‘a Sētané? Na‘e mei fakamo‘oni‘i ai ‘oku tonu ‘a e founga pule ‘a e ‘Otuá?

⁹ Ko e ongo‘i haohaoa ‘a Sihova ki he fakamaau totonú ‘e ‘ikai te ne faka‘atā ia ke ne tāmate‘i he taimi pē ko iá ‘a e kau angatu‘ú. Na‘á ne fakapapau‘i na‘e fiema‘u ‘a e taimi ke tali ai ‘a e pole ‘a Sētané ‘i ha founga fakafiemālie pea ke fakamo‘oni‘i ko e Tēvoló ko ha tokotaha-loi. Ko ia na‘e fakapapau‘i ‘e he ‘Otuá te ne faka‘atā ‘a e tangatá ke nau pule pē kiate kinautolu ‘i ha taimi ‘i he malumalu ‘o e tākiekina ‘a Sētané. Ko e hā na‘e fai ai ia ‘e Sihová pea ko e hā kuó ne faka‘atā ai ‘a e taimi lahi ‘aupito ke matolo atu ki mu‘a ke ne fakalelei‘i ‘a e ngaahi ‘īsiu ko eni ‘e lāulea ki ai ‘i he Vahe 11 ‘o e tohí ni. Kae kehe, ‘i he taimi ní, ‘oku lelei ke fakakaukau fekau‘aki mo eni: Na‘e tonu kia ‘Ātama mo ‘Ivi ke na tui kia Sētane, ‘a ia na‘e ‘ikai ‘aupito te ne fai ha me‘a lelei ‘e taha ma‘anauá? Na‘e tonu ke na tui ko Sihova, ‘a ia kuó ne ‘oange kiate kinaua ‘a e me‘a kotoa na‘á na ma‘ú, ko ha tokotaha loi anga-fakamamahi? Ko e hā na‘á ke mei faí?

10. ‘E lava-fēfē ke ke poupou‘i ‘a e tafa‘aki ‘a Sihová ‘i he tali ki he pole ‘a Sētané?

¹⁰ ‘Oku lelei ke fakakaukau fekau‘aki mo e ngaahi fehu‘í ni koe‘uhí ko kitautolu taki taha ‘oku tau fehangahangai mo e ngaahi ‘īsiu meimei tatau ‘i he ‘ahó ni. ‘Io, ‘okú ke ma‘u ‘a e faingamālie ke poupou ai ki he tafa‘aki ‘a Sihová ‘i he tali ki he pole ‘a Sētané. ‘E lava ke ke tali ‘a Sihova ko ho Pule pea tokoni ki hono fakahaa‘i ko ha tokotaha loi ‘a Sētane. (Sāme 73:28; Palovepi 27:11) Ko e me‘a fakamamahí, ko ha tokosi‘i pē ‘i he lotolotonga ‘o e kakai ‘e laui piliona ‘i he māmani ko ení ‘oku nau fai ha fili peheé. ‘Oku langa‘i hake ‘e he me‘á ni ha fehu‘i mahu‘inga, ‘Oku ako‘i mo‘oni ‘e he Tohi Tapú ‘oku pule‘i ‘e Sētane ‘a e māmani ko ení?

11, 12. (a) ‘Oku anga-fēfē hono fakahaa‘i ‘i he ‘ahi‘ahi‘i ‘o Sīsuú ko Sētane ‘a e pule ‘o e māmani ko ení? (e) Ko e hā ‘a e toe me‘a ‘oku fakamo‘oni‘i ai ko Sētane ‘a e pule ‘o e māmani ko ení?

¹¹ Na‘e ‘ikai ‘aupito veiveiua ‘a Sīsū ko Sētane ‘a e pule ‘o e māmani ko ení. ‘I ha founga fakaemana, na‘e fakahaa‘i ai ‘e Sētane ‘i ha taimi kia Sīsū “ ‘a e ngāhi pule‘anga kotoa pe ‘o mamani mo honau nāunau.” Na‘e palōmesi leva ai ‘a Sētane kia Sīsū: “Koe ngāhi me‘a ni kotoa pe te u ‘atu mo‘ou, ‘o kapau te ke fakatomape‘e ‘o lotu kiate au.” (Mātiu 4:​8, 9; Luke 4:​5, 6) Fakakaukau fekau‘aki mo eni. Na‘e hoko ‘a e tu‘uakí ni ko ha ‘ahi‘ahi kia Sīsū kapau ko Sētané na‘e ‘ikai ko e pule ia ‘o e ngaahi pule‘anga ko ení? Na‘e ‘ikai ke faka‘ikai‘i ‘e Sīsū ko e ngaahi pule‘anga fakamāmani kotoa ko ení ko e me‘a ‘a Sētane. Ko hono mo‘oní, na‘e mei fai ia ‘e Sīsū kapau na‘e ‘ikai ko Sētane ‘a e mālohi na‘e tekemui ‘iate kinautolú.

¹² Ko e mo‘oni, ko Sihova ‘a e ‘Otua māfimafi-aoniú, ko e Tokotaha-Fakatupu ‘o e ‘univeesi fakaofó. (Fakahā 4:11) Neongo ia, ‘oku ‘ikai ha konga Tohi Tapu ‘oku pehē ai ko Sihova ko e ‘Otuá pe ko Sīsū Kalaisi ‘a e pule ‘o e māmani ko ení. Ko hono mo‘oní, na‘e lave papau ‘a Sīsū kia Sētane ko e “ ‘eiki [pe pule] ‘o e maama ko eni.” (Sione 12:31; 14:30; 16:11) ‘Oku a‘u ‘o lave ‘a e Tohi Tapú kia Sētane ko e Tēvoló ko e “ ‘otua ‘o e tu‘u ko eni.” (2 Kolinito 4:​3, 4) ‘I he fekau‘aki mo e tokotaha-fakafepaki ko ení, pe ko Sētané, na‘e tohi ‘a e ‘apositolo Kalisitiane ko Sioné: “Ko hono kotoa ‘o mamani ‘oku ‘i he nima ‘o e Fili.”—1 Sione 5:19.

13. Ko e hā ‘oku ‘i ai ai ha fiema‘u ki ha māmani fo‘oú?

¹³ ‘I he ‘alu atu ‘a e ta‘u taki taha, ‘oku hoko ai ‘a e māmaní ‘o fakatu‘utāmaki lahi ange. ‘Oku fonu ia ‘i he ngaahi kau tau ‘oku nau fepaki, kau politiki ta‘efaitotonu, kau taki lotu mālualoi mo e kau faihia loto-fefeka. Ko e māmaní fakalūkufua ‘oku faingata‘a ke toe fakalelei‘i. ‘Oku fakahaa‘i ‘e he Tohi Tapú ‘oku ofi ‘a e taimi ‘e fakangata ai ‘e he ‘Otuá ‘a e māmani fulikivanú he lolotonga ‘ene tau ‘o ‘Āmaketoné. ‘E faka‘atā ai ‘e he me‘á ni ke ‘i ai ha māmani fo‘ou mā‘oni‘oni.—Fakahā 16:​14-16.

14. Ko hai kuo fili ‘e he ‘Otuá ke hoko ko e Pule ‘o Hono Pule‘angá, pea na‘e anga-fēfē hono tomu‘a tala ení?

 ¹⁴ Na‘e fili ‘e Sihova ko e ‘Otuá ‘a Sīsū Kalaisi ke hoko ko e Pule ‘o Hono Pule‘angá, pe founga-pule fakahēvaní. ‘I he kuohilí, na‘e tomu‘a tala ai ‘e he Tohi Tapú: “He kuo ‘alo‘i mai ha Tama, kuo tuku mai ha Foha: pea ‘e ‘i hono uma ‘a e pule‘anga. Pea ko e huafa ‘e ui‘aki . . . ko e ‘Eiki ‘o e Melino. ‘E ‘ikai fakangatangata ‘a e tupu o ‘ene pule mo e melino.” (Aisea 9:​6, 7 [9:​5, 6, PM]) ‘I he fekau‘aki mo e founga-pulé ni, na‘e ako‘i ‘e Sīsū ‘a hono kau muimuí ke nau lotu: “Ke hoko mai ho Pule‘angá. Ke fai ho finangaló ‘i māmani, ‘o hangē ko ia ‘oku fai ‘i Hēvaní.” (Mātiu 6:​10, Ko e Kōsipeli ‘e Fā) Hangē ko ia te tau sio ki ai ‘amui ange ‘i he tohí ni, ko e Pule‘anga ‘o e ‘Otuá ‘e vavé ni ke ne to‘o ‘a e ngaahi founga-pule kotoa ‘o e māmani ko ení, pea ko ia tonu te ne fetongi kinautolú kotoa. (Taniela 2:44) ‘E toki fokotu‘u leva ‘e he Pule‘anga ‘o e ‘Otuá ha māmani palataisi.

15. Ko e hā ‘a e “fonua fo‘ou”?

¹⁵ ‘Oku fakapapau‘i mai ‘e he Tohi Tapú kiate kitautolu: “ ‘I he funga ‘o e tala‘ofa [‘a e ‘Otuá] ‘oku tau ‘amanaki ki ha ngaahi langi fo‘ou mo ha fonua fo‘ou, ‘a ia ‘oku nofo‘anga ai ‘a ma‘oni‘oni.” (2 Pita 3:13; Aisea 65:17) ‘I he taimi ‘e ni‘ihi ‘i he lau ‘a e Tohi Tapú fekau‘aki mo e “fonua,” ‘oku ‘uhinga iá ki he kakai ‘oku nofo ‘i he māmaní. (Senesi 11:1) Ko ia ko e “fonua fo‘ou” mā‘oni‘oní ko ha sōsaieti ‘o e kakai ‘oku nau ma‘u ‘a e hōifua ‘a e ‘Otuá.

16. Ko e hā ha me‘a‘ofa mahu‘inga mei he ‘Otuá ki he fa‘ahinga ‘okú Ne hōifua ki aí, pea ko e hā kuo pau ke tau fai ke ma‘u ai iá?

¹⁶ Na‘e palōmesi ‘a Sīsū ‘o pehē ‘i he māmani fo‘ou ka hoko maí, ko e fa‘ahinga ko ē ‘oku hōifua ki ai ‘a e ‘Otuá te nau ma‘u ‘a e me‘a‘ofa ko e “mo‘ui ta‘engata.” (Maake 10:30) Kātaki ‘o fakaava ho‘o Tohi Tapú ki he Sione 3:16 mo e 17:​3, pea lau ‘a e me‘a na‘e lea‘aki ‘e Sīsū kuo pau ke tau fai ke ma‘u ai ‘a e mo‘ui ta‘engatá. Sai, fakakaukau mei he Tohi Tapú ki he ngaahi tāpuaki ‘a ia ‘e ma‘u ‘e he fa‘ahinga ‘oku nau taau ki he me‘a‘ofa fakaofo ko ia mei he ‘Otuá ‘i he Palataisi fakamāmani ka hoko maí.

17, 18. ‘Oku lava fēfē ke tau fakapapau‘i ‘e ‘i ai ‘a e melino mo e malu ‘i he feitu‘u kotoa pē ‘i he māmaní?

 ¹⁷ Ko e fulikivanú, taú, faihiá mo e fakamālohí ‘e mole atu ia. ‘E “mole ‘a ia ‘oku faikovi . . . Ka ‘e ma‘u ‘a e fonua ‘e he fa‘a kataki.” (Sāme 37:​10, 11) ‘E ‘i ai ‘a e melino koe‘uhi ‘e ‘⁠lolololo ‘a e ngaahi taú ‘e he ‘Otuá ‘o a‘u ki he ngata‘anga ‘o mamaní.’ (Sāme 46:9; Aisea 2:4) Pea ‘e “to‘ulu ‘a e ma‘oni‘oni ‘i hono kuonga; pea ke leta ‘a e melino, kae ‘oua ke ngata ‘a e mahina”—pea ‘oku ‘uhinga iá ko e melino ‘o ta‘engata!—Sāme 72:7.

¹⁸ Ko e kau lotu ‘a Sihová te nau nofo malu. Lolotonga ‘a e talangofua ‘a e kau ‘Isileli ‘i he taimi ‘o e Tohi Tapú ki he ‘Otuá, na‘a nau nofo malu ai. (Livitiko 25:​18, 19) He fakaofo ē ko ia ke ma‘u ha tu‘unga malu meimei tatau ‘i Palataisi!—Aisea 32:18; Maika 4:4.

19. Ko e hā ‘oku tau ‘ilo‘i ai ‘e hulu fau ‘a e me‘akaí ‘i he māmani fo‘ou ‘a e ‘Otuá?

¹⁹ ‘E ‘ikai ‘i ai ha nounou fakame‘atokoni. “E i ai ae falukuga oe uite i he fonua,” ko e hiva ia ‘a e tokotaha-tohi-sāmé. “ ‘I he tumutumu oe gaahi mouga.” (Sāme 72:​16, PM) Ko Sihova ko e ‘Otuá te ne tāpuaki‘i ‘a ‘ene fa‘ahinga mā‘oni‘oní, pea ‘e “foaki ‘e he kelekele hono fua.”—Sāme 67:6.

20. Ko e hā ‘oku lava ai ke tau fakapapau‘i ko e fo‘i māmaní kotoa ‘e hoko ko ha palataisí?

²⁰ Ko e māmaní kotoa ‘e hoko ko ha palataisi. ‘E langa ‘a e ngaahi ‘api mo e ngaahi ngoue faka‘ofo‘ofa ‘i he fonua ‘a ia na‘e maumau‘i ki mu‘a ‘e he fa‘ahinga angahala‘ia ‘o e tangatá. (Aisea 65:​21-24; Fakahā 11:18) ‘I he faai mai ‘a e taimí, ko e ngaahi konga ‘o e māmaní kuo ‘osi ngoue‘í ‘e fakalahi atu ia kae ‘oua kuo hoko ‘a e fo‘i kolopé kotoa ‘o faka‘ofo‘ofa mo fua lahi ‘o hangē ko e ngoue ko ‘Ītení. Pea ‘e ‘ikai ‘aupito ta‘emalava ‘e he ‘Otuá ke ‘⁠folahi hono nimá, pea ke fakamakona ‘a e holi ‘a e me‘a mo‘ui kotoa.’—Sāme 145:16.

21. Ko e hā ‘okú ne fakahaa‘i ‘e ‘i ai ‘a e melino ‘i he vaha‘a ‘o e tangatá mo e fanga manú?

²¹ ‘E ‘i ai ‘a e melino ‘i he vaha‘a ‘o e tangatá mo e fanga manú. ‘E kai fakataha ‘a e fanga manu hehengí mo e fanga manu lalatá. Na‘a mo ha ki‘i leka ‘e ‘ikai ha me‘a ke ne manavahē  ki ai mei he fanga manu ‘a ia ‘oku nau fakatu‘utāmaki he taimi ní.—Aisea 11:​6-9; 65:25.

22. Ko e hā ‘e hoko ki he mahamahakí?

²² ‘E mole atu ‘a e mahamahakí. ‘I he tu‘unga ko e Pule ‘o e Pule‘anga fakahēvani ‘o e ‘Otuá, ‘e fai ‘e Sīsū ‘a e fakamo‘ui ‘i ha tu‘unga mahu‘inga lahi ange ia ‘i he taimi ko ia na‘á ne ‘i māmani aí. (Mātiu 9:35; Maake 1:​40-42; Sione 5:​5-9) Pea “ ‘oku ‘ikai ha nofo ai te ne pehe, ‘Oku ou mahaki.”—Aisea 33:24; 35:​5, 6.

23. Ko e hā ‘e ‘omai ai ‘e he toetu‘ú ‘a e fiefia ki hotau lotó?

²³ ‘E toe fakafoki mai ‘a e fa‘ahinga ‘ofeina kuo maté ki he mo‘uí fakataha mo e ‘amanaki ko e ‘ikai ‘aupito ke toe mate. Ko e fa‘ahinga kotoa ‘oku mohe ‘i he maté ‘a ia ‘oku nau ‘i he manatu ‘a e ‘Otuá ‘e toe fakafoki mai ki he mo‘uí. Ko hono mo‘oní, “ ‘e faifai pea hoko ha toetu‘u ‘a e angatonu mo e angahala fakatou‘osi.”—Ngāue 24:15; Sione 5:​28, 29.

24. ‘Oku anga-fēfē ho‘o ongo‘i fekau‘aki mo e nofo Palataisi ‘i he māmaní?

²⁴ Ko ha kaha‘u fakaofo ē ‘oku fakatatali mai ki he fa‘ahinga ‘oku nau fili ke ako fekau‘aki mo hotau Tokotaha-Fakatupu Ma‘ongo‘ongá, ‘a Sihova ko e ‘Otuá, pea ke tauhi kiate ia! Ko e Palataisi ka hoko mai ‘i he māmaní na‘e fakahaa‘i ‘e Sīsū ‘i he taimi na‘á ne palōmesi ai ki he tokotaha faihia na‘e mate ‘i hono tafa‘akí: “Te ke ‘i Palataisi mo au.” (Luke 23:43) ‘Oku mātu‘aki mahu‘inga ke tau ako lahi ange fekau‘aki mo Sīsū Kalaisi, ‘a ia ‘e ‘ai ke malava fakafou ‘iate ia ‘a e ngaahi tāpuaki kotoa ko ení.