SHEMPPUWAA HEEZZA

Xoossay Saˈau Halchchidoy Aybee?

Xoossay asaa naatussi halchchidoy aybee?

Xoossaa maataa bolli ayba oyshay denddidee?

Sinttappe saˈan deˈoy ay mala gidanee?

1. Xoossay saˈau halchchidoy aybee?

XOOSSAY saˈau halchchidobay tumuppe maalaalissiyaaba. Yihooway, saˈay payyanne ufayttiya asan kumana mala koyees. Geeshsha Maxaafay, “Xoossai . . . Edene giyoosan gannatiyaa kase tokkiis;” qassi i “xeellanau lo77⁠iya, maanaukka mal77⁠iya ubba qommo mittaa . . . mokissiis” yaagees. Xoossay koyro bitaniyaanne a maccaasiyo, Addaamanne Hewaano medhdhi simmidi, eta he loˈˈiya sohuwan wottidi: “Yelettite; corattite; ha sa7aa kumitenne haarite” yaagiis. (Doomettaabaa 1:28; 2:8, 9, 15) Yaatiyo gishshau, Xoossaa halchchoy asay naata yelanaadaana, gannatiyaa aassidi saˈaa ubbaa gattanaadaananne mehiyaanne doˈaa haaranaadaana.

2. (a) Xoossay saˈau halchchidobay polettanaagaa aybin eriyoo? (b) Geeshsha Maxaafay, merinau deˈanay ay mala asa gidiyoogaa yootii?

² Xoossaa Yihooway, asaa gannate saˈan wottanau halchchido halchchoy polettanaba neeyyo milatii? Xoossay: “Taani giidoogaa taani . . . oottana” yaagiis. (Isiyaasa 46:9-11; 55:11) Ee, Xoossay ba halchchidobaa polanaagee attenna! I ‘biittaa giigissidoogee, asi deˈanaadaanappe attin, coo medhdhibeennaagaa’ yootees. (Isiyaasa 45:18) Xoossay saˈan ay mala asay deˈana mala koyidee? Qassi eti he sohuwan ay keena wodiyaassi deˈana mala koyidee? Geeshsha Maxaafay hegau zaaruwaa immiiddi: “Xilloti biittaa laattananne yan  merinau de7ana” yaagees.—Mazamure 37:29; Ajjuutaa 21:3, 4.

3. Ha wodiyan saˈan ayba azzanttiya hanotati deˈiyoonaa? Hegee ayba oyshata denttii?

³ Hagee biron polettibeennaagee qoncce. Asay haˈˈi harggeesinne hayqqees; ubba issoy issuwaara waretteesinne issoy issuwaa worees. Issi moorettidabi deˈees. Gidoppe attin, saˈay haˈˈi nuuni beˈiyoogaa mala gidanaadan Xoossay halchchibeennaagee tuma. Yaatin aybi merettidee? Xoossaa halchchoy ayssi polettibeennee? Metoy doommidoy saluwaana gidiyo gishshau, asi xaafido ayba taarike maxaafinne hegaa nuuyyo yootana danddayenna.

ISSI MORKKEE DENDDIIS

4, 5. (a) SHooshshan goˈettidi Hewaano haasayissiday tumuppe oonee? (b) Issi wode ammanettida loˈˈo asa gidida uri laamettidi waani kayso gidana danddayii?

⁴ Geeshsha Maxaafan koyro maxaafay, Edene ataakiltte sohuwan Xoossaara eqettiyoogaa qoncciyan beessida, Xoossaa morkkiyaabaa yootees. I ‘shooshshaa’ geetettiis; shin i tumu shooshsha gidenna. Geeshsha Maxaafan wurssetta maxaafay i ‘xalahe halaqaa [Dabloosa] woikko Seexaanaa giyoogee, . . . sa7a ubbaa balettiyaagaa’ gidiyoogaa qonccissees. I, ‘beni shooshshaakka’ geetettiis. (Doomettaabaa 3:1; Ajjuutaa 12:9) Ha wolqqaama kiitanchchay woykko ayfiyan beettenna ayyaana meretay, issi hiillanchcha uri ba cenggurssay matan deˈiya asa milatiya ashangguluutiyaappe kiyiyaaba milatissiyoogaadan, shooshshan goˈettidi Hewaano haasayissiis. Xoossay asaayyo saˈaa giigissido wode, he ayyaana meretay deˈiyoogee sirissenna.—Iyyooba 38:4, 7.

⁵ Gidikkonne, Yihooway medhdhido ubba meretati polo gididaashin, Dabloosa woykko “Seexaanaa” medhdhiday oonee? Qanttan, Xoossaa naata gidida, wolqqaama ayyaana meretatuppe issoy bana Dabloosa oottiis. Hegee waanidi hanana danddayidee? Ha wodiyankka, issi wode ammanettida loˈˈo asa gidida uri, laamettidi kayso gidana danddayees.  Waanidi hegaadan hanii? He uri issi bala amoy ba wozanan diccanaadan oottana danddayees. I hegaabaa qoppiyoogaa aggennan ixxikko, he bala amoy keehippe wolqqaamana danddayees. Hegaappe injjee beettiyo wode, qoppiiddi takkido ba bala amuwaa polana danddayees.—Yaaqooba 1:13-15.

6. Wolqqaama ayyaana meretanne Xoossaa naˈa gididaagee waanidi Seexaananne Dabloosa gididee?

⁶ Seexaanaa Dabloosa xeelliyagan haniday hegaa. Addameenne Hewaana naata yelanaadaaninne saˈay eta zerettan kumanaadan Xoossay etau yootiyo wode, i siyidaba milatees. (Doomettaabaa 1:27, 28) Seexaanay: ‘Asaa naati ubbay Xoossaayyo goynniyoogaa aggidi taayyo goynnana danddayoosona!’ yaagidi qoppidoogee qoncce. Yaatiyo gishshau, a wozanan bala amoy dicciyoogaa doommiis. Wurssettan, Xoossaa xeelliyaagan worddobaa yootidi Hewaano cimmiis. (Doomettaabaa 3:1-5) Hegaa oottiyoogan i Dabloosa gidiis; hegau birshshettay “Sunttaa Mooriyaagaa” giyoogaa. Hegaadankka i “Seexaanaa” gidiis; hegau birshshettay “Eqettiyaagaa” giyoogaa.

7. (a) Addaameenne Hewaana aybissi hayqqidonaa? (b) Addaame zeretta ubbay cimiyoynne hayqqiyoy aybissee?

⁷ Seexaanaa Dabloosi worddottiyoogaaninne cimmiyoogan, Addaameenne Hewaana Xoossaassi azazettennaadan oottiis. (Doomettaabaa 2:17; 3:6) Hegaappe denddidaagan, Xoossay eti azazettana xayikko gakkiyaabaa odidoogaadan, wurssettan hayqqidosona. (Doomettaabaa 3:17-19) Addaamee nagaraa oottido wode ayyo polotettay paccido gishshau, a zeretta ubbay appe nagaraa laattiis. (Roome 5:12) Hanotaa, buddeenaa tigiyo bashiyan leemisana danddayettees. Bashiyaa bolli zaˈoy deˈikko, an tigido buddeena ubbay waanii? Ubba buddeenaa bollikka zirimoy woykko zaˈuwaa malaatay merettees. Hegaadankka, ubba asay Addaameppe polotettaa pacaa “zaˈuwaa” laattiis. Asay ubbay cimiyoyinne hayqqiyoy hegaassa.—Roome 3:23.

8, 9. (a) Seexaanay ayba qoncce gidida mootuwaa denttidee? (b) Xoossay ba bolli makkalidaageeta sohuwaara xayssibeennay aybissee?

 ⁸ Addaamanne Hewaano Xoossaa bolli nagaraa oottanaadan kaalettido wode, Seexaanay makkalatettaa kaalettidoogee qoncce. I hegan, Yihooway haariyo hanotaa xeelliyaagan oyshaa denttiis. Seexaanay hegaadan giyo wode, ‘Xoossaa haaroy iita. I worddoteesinne bau haarettiyaageeta loˈˈobaa diggees. Xoossay  haariyoogee asaayyo koshshenna. Eti loˈˈobaanne iitabaa banttau shaakki erana danddayoosona. Qassi eti taassi haarettiyoogee etassi loˈˈo’ yaagiyoogaa mala. Hegaa mala cashsha mala mootuwaa Xoossay waatidi shatimmaneeshsha? Issoti issoti Xoossay he wode makkalanchchata worana bessees giidi qoppoosona. SHin hegee Seexaanay denttido oyshaa zaaranee? Hegee Xoossaa haaroy suure gidiyoogaa boxooxissanee?

⁹ Paci baynna Yihoowa pirdday, makkalanchchata i sohuwaara woranaadan oottenna. I Seexaanaa mootuwaa bessiya ogiyan shatimmanaunne Dabloosi worddanchcha gidiyoogaa boxooxissanau, wodiyaa immana koshshiyoogau qofaa qachchiis. Yaatiyo gishshau Xoossay, asay Seexaanan sugettiiddi guutta wodiyaassi asaa haaranaadan qofaa qachchiis. Yihooway hegaa ayssi oottidaakkonne he denddida yohuwaa giigissanau i ayssi hegaa keena wodiyaa immidaakko, ha maxaafaa SHemppuwaa 11n tobbana. Gidikkonne, haˈˈi hagaadan giidi qoppiyoogee bessiyaaba: Addaameenne Hewaana etassi ayba loˈˈobanne oottibeenna Seexaanaa ammanidoogee bessiyaabee? Banttau deˈiya ubbabaa immida Yihoowa, eti meqetti baynna worddanchcha giidi ammanidoogee bessiyaabee? Nena gidiyaakko ay oottuutee?

10. Yihooway Seexaanaa oyshau zaaruwaa immanaadan maaddiyaabaa neeni waatada oottana danddayay?

¹⁰ Nuna ubbaa ha wodiyan hegaa mala oyshati xeelliyo gishshau, he oyshata qoppiyoogee loˈˈo. Ee, neenikka Yihooway Seexaanaa oyshaayyo zaaruwaa immanaadan maaddiyaabaa oottiyo injjiyaa demmadasa. Yihooway nena haaranaadan doorada, Seexaanay worddanchcha gidiyoogaa bessiyaabaa oottana danddayaasa. (Mazamure 73:28; Leemiso 27:11) Biilooniyan qoodettiya ha saˈaa asaappe hegaa mala dooruwaa dooridaageeti keehi guuttata gidiyoogee azzanttiyaaba. Hegee, tumuppe Geeshsha Maxaafay ha saˈaa haariyay Seexaanaa gidiyoogaa tamaarissii? yaagiya issi keehi koshshiya oyshaa denttees.

 HA ALAMIYAA HAARIYAY OONEE?

11, 12. (a) Seexaanay Yesuusa paaccido issi paacee, ha saˈaa haariyay Seexaanaa gidiyoogaa waatidi qonccissii? (b) Ha saˈaa haariyaagee Seexaanaa gidiyoogaa boxooxissiya harabi aybee?

¹¹ Ha alamiyaa haariyaagee Seexaanaa gidiyoogaa Yesuusi mule siribeenna. Seexaanay issi wode issi maalaalissiya ogiyan, “sa7an de7⁠iya kawotetta ubbaanne eta bonchchuwaa” Yesuusa bessiis. Seexaanay hegaappe guyyiyan, “Neeni taayyo gulbbatada goinnikko, taani hagaa ubbaa neeyyo immana” yaagidi qaalaa geliis. (Maatiyoosa 4:8, 9; Luqaasa 4:5, 6) Ane issibaa qoppa. He kawotettata haariyaagee Seexaanaa gidennaakko, hegee Yesuusa paacciyooba gidana danddayii? Ha saˈaa kawotettati ubbay Seexaanaaba gidiyoogaa Yesuusi kashi gibeenna. Etayyo wolqqaa immidaagee Seexaanaa gidennaakko, Yesuusi hegaadan gaanaagee tuma.

¹² Maalaalissiya yuniverssiyaa Medhdhidaagee, ubbaappe wolqqaama Xoossaa Yihoowa gidiyoogee qoncce. (Ajjuutaa 4:11) Gidikkonne, Geeshsha Maxaafay awaaninne ha alamiyaa haariyay Xoossaa Yihoowa woykko Yesuus Kiristtoosa geenna. Ubba, Yesuusi Seexaanaa qoncciyan, ‘saˈaa haariyaagaa’ yaagidi xeesiis. (Yohaannisa 12:31; 14:30; 16:11) Geeshsha Maxaafay Seexaanaa Dabloosa, ‘ha saˈaa Xoossaa’ yaagidikka xeesees. (2 Qoronttoosa 4:3, 4) Kiitettida Kiristtaanee Yohaannisi, ha eqettiyaagaa woykko Seexaanaa xeelliyaagan: ‘Mule saˈay xalahe halaqan haarettees’ yaagiis.—1 Yohaannisa 5:19.

SEEXAANAA ALAMEE WAANI XAYANAAKKO

13. Ooratta alamee keehi koshshidoy aybissee?

¹³ Issi layttay aadhdho payduwan, alamee deˈanau kaseegaappekka haa metiya soho gidi gidi bees. Alamee olettiya wotaaddaratun, ammanettenna polotikaa asatun, iita gididi loˈˈo milatiya haymaanootiyaa kaalettiyaageetuuninne danuwaa oottiyoogan zozzidaageetun kumiis. Kumetta alamee giigana danddayennaagaa gidiis. Geeshsha Maxaafay, Xoossay ba olaa Armmageedoonan iita alamiyaa xayssana wodee matattidoogaa  bessees. Hegee geeshsha ooratta alamiyau ogiyaa dooyana.—Ajjuutaa 16:14-16.

14. Xoossay Ba Kawotettan Haariyaagaa gidanaadan dooridoy oonee? Hegee hananaappe kase woygettidi odettidee?

¹⁴ Xoossaa Yihooway saluwan deˈiya Ba Kawotettan woykko aysuwan Haariyaagaa gidanaadan dooridoy Yesuus Kiristtoosa. Adussa wodiyaappe kase Geeshsha Maxaafay: “Na7⁠i nuuyyo yelettiis! Attuma na7⁠i nuuyyo imettiis! Kawotettai a hashiyan wodhdhana; a sunttai . . . Sarotettaa Halaqaa” geetettana. A kawotettaa daruwaunne a sarotettau zawai de7⁠enna” yaagidi yootiis. (Isiyaasa 9:6, 7) Yesuusi ha kawotettaa xeelliyaagan bana kaalliyaageetussi: “Ne kawotettai yo; ne shenee saluwan hanidoogaadan, sa7ankka hano” yaagidi woossanaadan tamaarissiis. (Maatiyoosa 6:10) Nuuni takkidi ha maxaafan beˈanaagaadan, Xoossaa Kawotettay ha alamiyaa kawotettata ubbaa mata wode xayssana; yaatidi i ba huuphe eta ubbaa sohuwaa oyqqana. (Daaneela 2:44) Hegaappe gannate saˈan, Xoossaa Kawotettay haarana.

OORATTA ALAMEE MATATTIIS!

15. ‘Ooratta saˈay’ aybee?

¹⁵ Geeshsha Maxaafay: “SHin nuuni Xoossai immana giido ooratta saluwaanne ooratta sa7aa xilloi de7anasaa naagoos” yaagidi ammanttiyaabaa yootees. (2 PHeexiroosa 3:13; Isiyaasa 65:17) Issitoo issitoo Geeshsha Maxaafay ‘saˈaa’ yaagiyoy saˈaa bolli deˈiya asaa malaatanaassa. Yaatiyo gishshau, xillotettay deˈana ‘ooratta saˈay’ issippetettan deˈiya, Xoossan nashettiya asaa malaatees.

16. Banan nashettiyaageetussi Xoossay immanau qaalaa gelido alˈˈo woytoy aybee? Hegaa demmanau nuuni ay oottana bessii?

¹⁶ Yesuusi, Xoossan nashettiya asati mata wode yaana ooratta saˈan “merinaa de7⁠uwaa” woytuwaa demmanaagau qaalaa geliis. (Marqqoosa 10:30) Hayyanaa ne Geeshsha Maxaafan Yohaannisa 3:16⁠nne 17:3 kessada, merinaa deˈuwaa demmanau nuuni ay oottana bessiyaakko Yesuusi yootidoogaa  nabbaba. Haˈˈi mata wode yaana Gannate saˈan, Xoossaappe he maalaalissiya woytuwaa ekkanau giday deˈiyoogeeti demmana ufayssiya anjjuwaa Geeshsha Maxaafan xeella.

17, 18. Saˈan ubbasan sarotettaynne woppatettay deˈanaagaa waanidi ammanana danddayiyoo?

¹⁷ Iitatettay, olay, danoynne kobabay xayana. “Iitaa oottiyaageeti . . . de7⁠okkona; . . . SHin ashkketi biittaa laattana.” (Mazamure 37:10, 11) Xoossay, ‘Sa7aa gaxaa gakkanaassi de7⁠iya olaa teqqiyo’ gishshau sarotettay deˈana. (Mazamure 46:9; Isiyaasa 2:4) Hegaappe guyyiyan ‘xillotettay daayana; aginay xayana gakkanaassi sarotettay darana’—hegee, sarotettay merinau deˈana yaagiyoogaa!—Mazamure 72:7.

¹⁸ Yihoowassi goynniyaageeti sarotettan woppu giidi deˈana. Beni wode, Israaˈeeleti Xoossaassi azazettido wode ubban sarotettan woppu giidi deˈidosona. (Wogaabaa 25:18, 19) Gannatiyankka hegaadan woppu giidi deˈanaagee ayba ufayssiyaabee!—Isiyaasa 32:18; Mikkiyaasa 4:4.

19. Xoossay ehiyo ooratta siraatan kattay kumanaagaa aybin eriyoo?

¹⁹ Kattay qaxuhatiyoogee attana. Mazamuriyaa yexxiyaagee: “Biittan daro kattai mokko; dereti kattan kamettona” yaagidi yexxiis. (Mazamure 72:16) Xoossaa Yihooway ba geeshsha asata anjjananne ‘biittay kattaa mokkana.’—Mazamure 67:6.

20. Kumetta saˈay gannate gidanaagaa ammanana danddayiyoy aybissee?

²⁰ Kumetta saˈay gannate gidana. Kase nagaranchcha asatun moorettida biittan loˈˈiya ooratta keettati keexettananne gadeti oosettana. (Isiyaasa 65:21-24; Ajjuutaa 11:18) Wodiyaappe wodiyan, kumetta saˈay Edene ataakiltte sohuwaadan araddanne loˈˈiyaagaa gidana gakkanaashin, murutaa immiya biittay aakki aakki baana. Xoossay ‘ba kushiyaappe yeggidi, paxa de7⁠iyaageeta ubbaa amuwaa aliyoogaa’ mule aggenna.—Mazamure 145:16.

21. Asaanne doˈaa giddon sarotettay deˈanaagaa bessiyay aybee?

²¹ Asaanne doˈaa giddonkka sarotettay deˈana. Doˈaynne  mehee issippe heemettana. Ubba guutta naˈikka ha wodiyan qoho gattiya doˈatussi he wode yayyenna.—Isiyaasa 11:6-9; 65:25.

22. Sahoy waananee?

²² Sahoy xayana. Yesuusi saluwan deˈiya Xoossaa Kawotettan Haariyaagaa gidiyoogaadan, i saˈan deˈiiddi oottidoogaappe keehi aadhdhiya hanotan harggiyaageeta pattana. (Maatiyoosa 9:35; Marqqoosa 1:40-42; Yohaannisa 5:5-9) Hegaappe guyye “ooninne, ‘Taani harggais’ yaagenna.”—Isiyaasa 33:24; 35:5, 6.

23. Denddoy nu wozanaa ufayssiyaagaa gidanay aybissee?

²³ Hayqqida nu siiqoti mule hayqoy baynna hidootay deˈiyo deˈuwau denddana. Xoossay hassayiyo, hayquwan xiskkida asati ubbay deˈuwau denddana. Ubba “worddoikka xilloikka haiquwaappe denddana”.—Oosuwaa 24:15; Yohaannisa 5:28, 29.

24. Gannate saˈan deˈanaagan neeyyo aybi siyettii?

²⁴ Nuna Medhdhida Gitaa, Xoossaa Yihoowabaa tamaaranaunne ayyo haggaazanau dooriyaageeta sinttappe ayba ufayssiya wodee naagii! Yesuusi baappe miyyessan kaqettida iitabaa oottida bitaniyaassi: “Neeni tanaara gannatiyan de7ana” yaagidi qaalaa gelido wode, malaatidoy sinttappe saˈan yaana Gannatiyaa. (Luqaasa 23:43) Ha ubba anjjoy a baggaara polettanau deˈiyo Yesuusabaa, nuuni gujjidi tamaaranau koshshees.

GEESHSHA MAXAAFAY TAMAARISSIYOOBAA

▪ Xoossay saˈaa gannate oottanau halchchido halchchoy polettana.—Isiyaasa 45:18; 55:11.

▪ Ha wodiyan alamiyaa haariyaagee Seexaanaa. —Yohaannisa 12:31; 1 Yohaannisa 5:19.

▪ Mata wode yaana ooratta alamiyan, Xoossay asaa daroban anjjana.—Mazamure 37:10, 11, 29.

[Oyshaa]

[Sinttaa 30n diya misiliyaa]

Seexaanay, babaa gidennaakko alamiyaa kawotettata ubbaa waatidi Yesuusassi immana danddayii?