1. Nan̈ino ma Zan̈ahary niasa tany ty?

TEN̈A tsara fikasan̈any Zan̈ahary taminizy niasa tany ty. Tiany feno olo sambatra ndreky salama fo eto. Baiboly nan̈ambara fa Zan̈ahary niasa zaridain̈y tsara ta Edena. Naniry tao karazan̈a kakazo jiaby mety hahanin̈y ndreky tsara zahan̈a. Zan̈ahary amy zay niasa Adama ndreky Eva, napetrany tamy zaridain̈y tao. Volan̈iny karaha ty tamindro: “Irarian̈a anaro hanan̈a taranaka, ho maro, baka tany ty ho feno olo. Anaro hamehy tany ty.” (Genesisy 1:28; 2:8, 9, 15) Dikanizen̈y, Zan̈ahary koa fa niasa olombelon̈o, tiany iro hiteraka, hikarakara biby ndreky tany, baka tany jiaby hanjary paradisa.

2. a) Akory ahaizantsika fa ho vitany Zan̈ahary han̈ano tany ty paradisa? b) Olo karakory ma handova tany ty?

² Akory ahaizantsika fa mbala hanjary paradisa fo tany ty andra araiky an̈y? Nambarany Zan̈ahary karaha ty: “Raha koa fa nivolan̈iko, tsy maintsy vitako.” (Isaia 46:9-11; 55:11) Dikanizen̈y, raha koa fa volan̈iny Zan̈ahary, tsy maintsy ho tanteraka. Izy nivolan̈a fa matoa tany ty  namboariny tsarabe karaha io, nataony “hipitrahan̈a.” (Isaia 45:18) Olo karakory amy zay ma tiany hipetraka eto? Firaka ombian̈a ma iro io tiany hipetraka eto? Baiboly mivolan̈a karaha ty: “Olo marin̈y handova tany ty, ke hipetraka io tsisy farany.”—Salamo 37:29; Apokalypsy 21:3, 4.

3. Man̈ano karakory ma fiain̈anantsika izioty? Ino fan̈ontanian̈a mipetraka baka amy zen̈y?

³ Raha zen̈y mbala tsendriky navy, fotony olo mbala marary, maty, ndreky mifamono. Misy dikany nahavy raha jiaby zen̈y. Tsy tiany Zan̈ahary han̈ano karaha ty foeky fiain̈anantsika. Ino raha nandalo? Ino nahavy fikasan̈anany io tsy tanteraka? Baiboly zaraiky fo mahavaly zen̈y, fotony tandan̈itry tan̈y raha zen̈y niboaka.

4, 5. a) Azovy ma nampivolan̈a bibilava nikoran̈a taminy Eva in̈y? b) Karakory mety hahavy olo araiky tsara jery ho loso pangalatra?

⁴ Boky voanalohany amy Baiboly man̈ambara raha momba fahavalony Zan̈ahary io. “Bibilava” ivolan̈any izy, fa izio fo tsy ten̈a biby. Boky farany amy Baiboly ao mivolan̈a fa “Devoly ndreky Satana” an̈aranany. Mbala an̈arany koa “bibilava araiky tamy voanalohany tan̈y in̈y.” (Genesisy 3:1; Apokalypsy 12:9) Anjely io nampivolan̈a bibilava nikoran̈a taminy Eva. Karaha bibilava io fo nivolan̈a, kanefa feony Satana fo izio. Efa tandan̈itry tan̈y anjely io tamy Zan̈ahary niasa tany ty, ke hitany raha jiaby nandalo.—Joba 38:4, 7.

⁵ Raha jiaby niasainy Zan̈ahary karaha tsisy tsin̈iny, ke azovy fo niasa “Devoly” na “Satana” io? Ny marin̈y aminany, baka amy jerinany tompiny nahavy zanaka Zan̈ahary araiky io nanjary Devoly. Nan̈ino ma atsika mivolan̈a zen̈y? Fotony, ndray olo araiky tsara jery, mety  hanjary pangalatra. Mety misy raha tiany ho azo, kanefa tsy mety hadosony an̈atiny jerinany raha io. Farany izy mangalatra.—Vakia Jakoba 1:13-15.

6. Karakory nahavy zanaka Zan̈ahary araiky nanjary Satana Devoly?

⁶ Karaha zen̈y koa Satana Devoly. Ren̈iny volan̈a Zan̈ahary taminy Adama ndreky Eva hanan̈a taranaka, baka tany ty ho feno olo. (Genesisy 1:27, 28) Izy mety nieritreritry karaha ty: ‘Misora tsara izikoa zaho hivavahanolo jiaby!’ Tsy nadosony tan̈atiny jerinany raha zen̈y. Izy amy zay namitaka Eva, ke nivolan̈a raha tsy marin̈y momba Zan̈ahary. ( Vakia Genesisy 3:1-5.) Zen̈y nahavy izy nanjary Satana Devoly. Dikany an̈aranany “Satana” io “Panohitry.” Dikany “Devoly” zen̈y ndraiky “Pan̈aratsy.”

7. a) Nan̈ino ma Adama ndreky Eva naty? b) Nan̈ino ma taranaka Adama ndreky Eva matoe ndreky maty?

⁷ Satana navandy taminizy namitaka Adama ndreky Eva, ke zen̈y nahavy iro tsy nan̈araka volan̈a Zan̈ahary. (Genesisy 2:17; 3:6) Zan̈ahary efa nivolan̈a tamindro fa iro hofoaty, izikoa tsy man̈araka volan̈anany. Zen̈y nahavy Adama ndreky Eva naty. (Genesisy 3:17-19) Maty karaha iro koa taranakandro, fotony iro nandova fahotan̈a. ( Vakia Romanina 5:12.) Izio mira vilan̈iny mokary in̈y fo. Arakaraka vilan̈y mokary miboaka baka ao. Izikoa misy petso amy vilan̈y, mokary baka ao koa misy petso. Karaha zen̈y koa Adama koa fa nanota. Izy nanjary natoe, baka io naty. Taranakanany jiaby koa nandova fahotan̈a io, ke nanjary matoe ndreky maty koa.—Romanina 3:23.

8, 9. a) Karakory nataony Satana nankaratsy Jehovah? b) Nan̈ino Jehovah tamy zen̈y tsendriky namono iro?

⁸ Tsy Adama ndreky Eva fo tiany Satana hivadiky amy Zan̈ahary, fa olo jiaby koa. Satana nankaratsy Jehovah.  Karaha ty raha tiany volan̈iny: ‘Jehovah tsy mahay mitondra olonany. Izy mavandy, baka io tsy amiany iro raha mahatsara iro. Olombelon̈o tsy mila Zan̈ahary zen̈y. Iro tompiny fo mahay raha mahatsara iro ndreky raha mety hamono iro. Izikoa zaho mitondra, iro hiadan̈a tsarabe.’  Akory nataony Zan̈ahary naharen̈y fankaratsian̈a izy zen̈y? Misy olo mivolan̈a fa tokony nivonen̈a fo iro. Izikoa zen̈y raha nataony, ho hita edy fa diso ankitin̈y Satana? Ho hita edy fa fitondrasan̈a Zan̈ahary fo tsara?

⁹ Jehovah ten̈a mahay raha mety ndreky tsy mety. Zen̈y nahavy izy mbala tsendriky namono iro. Nambelany nandeha fo fotoan̈a, amy zen̈y haintsika fa mavandy ankitin̈y Satana, ke raha jiaby nivolan̈iny in̈y tsisy marin̈y. Zen̈y nahavy izy nan̈ambela olo hifampitondra, ke Satana mibeko iro. Ho hitantsika amy Toko faha-11 amy boky ty antony nahavy Jehovah mbala nan̈ambela zen̈y hitohy elabe karaha io. Ke fahitanao izy ma mety izikoa Adama ndreky Eva man̈araka volan̈a Satana, kanefa Satana tsiary nazahoandro raha? Izikoa Jehovah ratsy fan̈ahy, Adama ndreky Eva namiany raha jiaby nilaindro edy? Izikoa anao Adama na Eva, karakory nataonao?

10. Akory tokony hataonao, izikoa anao mifidy Jehovah?

¹⁰ Atsika mila mieritreritry fan̈ontanian̈a aby io, fotony atsika koa mba tafiditry amy koran̈a io. Izikoa anao mifidy Jehovah, anao tokony han̈araka volan̈anany amy fiain̈ananao jiaby. Zen̈y ahitan̈a fa Satana io mavandy ankitin̈y. (Salamo 73:28; vakia Ohabolana 27:11.) Aminolo marobe ambony tany ty, vitsy fo olo man̈araka volan̈a Jehovah. Ke ty fan̈ontanian̈a mipetraka: Izio ma Baiboly mivolan̈a fa Satana ankitin̈y manjaka amy donia ty?

11, 12. a) Ino raha nivolan̈iny Satana tamy Jesosy ahitan̈a fa Satana manjaka amy donia ty? b) Ino koa ivolan̈ana fa Satana manjaka amy donia ty?

¹¹ Jesosy nivolan̈a fa Satana fo manjaka amy donia ty.  Satana nan̈ano fahagagan̈a, ke naboakany Jesosy “fanjakan̈a jiaby amy donia ty ndreky voninahitry fanjakan̈a aby io.” Izy amy zay nivolan̈a karaha ty: “Hamiako anao raha jiaby io, izikoa anao mankohoko indraiky fo aminaka.” (Matio 4:8, 9; Lioka 4:5, 6) Zahava baka: Izikoa tsy Satana manjaka amy donia ty, Jesosy nan̈eky hahazo fanjakan̈a aby io. Fa matoa izy tsy nan̈eky, dikanizen̈y Satana ankitin̈y manjaka amy donia ty.

¹² Marin̈y ndraiky fa Zan̈ahary Jehovah Farany An̈abo ndreky Pamoron̈o raha jiaby. (Apokalypsy 4:11) Kanefa, Baiboly tsy mivolan̈a fa Jehovah na Jesosy manjaka amy donia ty. Jesosy nivolan̈a fa “Satana manjaka amy donia ty.” (Jaona 12:31; 14:30; 16:11) Koran̈iny Baiboly fa Satana io zan̈ahary, fa izy fo “zan̈ahariny donia ratsy ty.” (2 Korintianina 4:3, 4) Apostoly Jaona koa nivolan̈a fa ‘donia misy atsika ambany fahifan̈any araiky ratsy in̈y.’—1 Jaona 5:19.

13. Nan̈ino ma atsika ten̈a mila Paradisa?

¹³ Mahairatsy fo fiain̈anantsika izioty: Ady tsy mety vita, pan̈ano politiky mamitaka vahoaka, olo pitariky fivavahan̈a tsy man̈ano ny marin̈y, olo ratsy mahaimaro fo. Izikoa mbala olombelon̈o fo, tsisy mahavita mandamin̈y izy ty. Baiboly man̈ambara fa Haramagedona koa avy, Zan̈ahary han̈adoso raha ratsy jiaby ambony tany eto. Izio efa tsy ho ela eky. Izikoa efa vita zen̈y, hanjary paradisa amy zay tany ty.—Apokalypsy 16:14-16.

14. Azovy ma nifidiny Zan̈ahary hatao Panjakany Fanjakan̈anany? Ino raha efa nivolan̈iny Baiboly letry ela momba izio?

¹⁴ Jehovah nifidy Jesosy hatao Panjakany Fanjakan̈anany  andan̈itry an̈y. Letry ela, Baiboly efa nivolan̈a fa izy hatao panjaka, baka io Fanjakan̈anany io tsy ho rongan̈a. (Isaia 9:6, 7) Jesosy nampianatra pianatranany hivavaka momba Fanjakan̈a io. Karaha ty nivolan̈iny: “Irarian̈a ho avy Fanjakan̈anao. Irarian̈a hatao ambony tany eto koa sitraponao, karaha andan̈itry an̈y.” (Matio 6:10) Afara an̈y atsika mbala hianatra fa Fanjakan̈any Zan̈ahary io han̈adoso fanjakan̈a jiaby ambony tany eto, ke Fanjakan̈anany hisolo iro io. ( Vakia Daniela 2:44.) Fanjakan̈any Zan̈ahary amy zay han̈ano tany ty paradisa.

15. Ino ma “tany vaovao” zen̈y?

¹⁵ Baiboly man̈amia toky atsika karaha ty: ‘Misy lan̈itry vaovao ndreky tany vaovao, ke ny marin̈y fo hanjaka amy zen̈y. Miambin̈y zen̈y atsika, fotony zen̈y efa nivolan̈iny [Zan̈ahary].’ (2 Petera 3:13; Isaia 65:17) Ndraikindraiky, Baiboly koa fa mivolan̈a “tany” zen̈y olo raha tiany koran̈iny. (Genesisy 11:1) Ke dikany “tany vaovao” zen̈y olo man̈ano raha tiany Zan̈ahary.

16. Ino ma raha hamiany Zan̈ahary olonany? Izikoa tiantsika hahazo raha zen̈y, ino ma raha tsy maintsy ataontsika?

¹⁶ Jesosy efa nivolan̈a fa tany ty hanjary paradisa, ke olo man̈araka volan̈a Zan̈ahary fo ho “velon̈o tsisy farany.” (Marka 10:30) Sokafa Baibolinao, baka io vakia Jaona 3:16 ndreky Jaona 17:3. Ho hitanao ao ino raha tsy maintsy ataontsika baka atsika hiain̈y tsisy farany. Mbala maro koa hatsaran̈a hamiany Zan̈ahary olonany, tany ty koa fa manjary paradisa. Atsika izio hizaha raha momba zen̈y.

17, 18. Nan̈ino atsika matoky fa olo hiadan̈a ndreky hiain̈y milamin̈y ambony tany eto?

 ¹⁷ Tsy ho hisy eky raha ratsy, ady, pamono olo ndreky pangalatra. ‘Tsisy olo ratsy fan̈ahy eky amy zen̈y ... Olo pandefitry fo handova tany ty.’ (Salamo 37:10, 11) Hilamin̈y tany ty amy zen̈y, fotony Zan̈ahary ‘hampijanon̈o ady jiaby ambony tany eto.’ (Salamo 46:9; Isaia 2:4) “Olo marin̈y ho ravoravo”, ke hiadan̈a eto tsisy farany.—Salamo 72:7.

¹⁸ Olony Jehovah hiain̈y milamin̈y. Israelita taloha tan̈y koa fa nan̈araka volan̈a Zan̈ahary, nilamin̈y fiain̈anandro. (Levitikosy 25:18, 19) Tany ty koa fa manjary paradisa, tsisy olo havozo eky, ke ten̈a hamparavoravo fiain̈ana amy zen̈y!—Vakia Isaia 32:18; ­Mika 4:4.

19. Ino ahaizantsika fa ho treka hanin̈y amy Paradisa?

¹⁹ Tsy ho hisy eky mosary. “Tany Hahavokatra mare”, nambarany panoratra Salamo. “Nata an̈abony bongo mbala hahavokatra fo.” (Salamo 72:16) Zan̈ahary hitahy olonany, ke ‘tany hamokatra.’—Salamo 67:6.

20. Ino mahavy atsika matoky fa tany jiaby hanjary paradisa?

²⁰ Tany jiaby hanjary paradisa. Tany nirobatinolo ty ho feno tran̈o maro tsara ndreky zaridain̈y voakarakara. ( Vakia Isaia 65:21-24; Apokalypsy 11:18) Olo amy zen̈y hitsabo, ke tany jiaby hanjary tsara zahan̈a, mira zaridain̈y Edena in̈y. Amy zen̈y, ‘tan̈any Zan̈ahary hibiafiny, ke raha jiaby manampahin̈ana ho afapo amy raha ilaindro.’—Salamo 145:16.

21. Ino ahaizantsika fa olo ndreky biby hihavan̈a amy zen̈y?

²¹ Olo ndreky biby ho fankahazo. Biby an̈aty ala ndreky biby tamana hiaraka hihina. Ndray tsaiky madiniky tsy havozo biby.—Vakia Isaia 11:6-9; 65:25.

22. Mbala ho hisy olo marary ma amy zen̈y?

 ²² Tsy ho hisy eky aretin̈y. Jesosy Panjakany Fanjakan̈any Zan̈ahary mbala hampahivan̈a olo marary maromarony nataony taminizy tambony tany teto. (Matio 9:35; Marka 1:40-42; Jaona 5:5-9) Amy zen̈y, tsisy olo hitretre marary eky.—Isaia 33:24; 35:5, 6.

23. Hatao karakory ma havantsika efa naty aby in̈y? Akory fahitanao zen̈y?

²³ Havantsika efa naty aby in̈y mbala hivilomin̈y. Zan̈ahary tsy man̈adin̈a olo maro efa naty aby in̈y, ke zen̈y mahavy izy mbala hamelon̈o iro. “Olo marin̈y ndreky tsy marin̈y samy mbala hivilomin̈y.”—Asan’ny Apostoly 24:15; vakia Jaona 5:28, 29.

24. Karakory fahitanao fiain̈ana amy Paradisa zen̈y?

²⁴ Maro raha tsara miambin̈y olo mianatra Baiboly ndreky manompo Jehovah. Jesosy koa fa nikoran̈a Paradisa tamy lelahy nahanton̈o tankilanany in̈y, Paradisa ambony tany eto raha tiany volan̈iny. (Lioka 23:43) Izikoa tiantsika hahazo hatsaran̈a jiaby zen̈y, mila haintsika tsarabe Jesosy, fotony baka aminany hazahoantsika izio.