1, 2. (a) Ka mɔgɔba dɔ koo mɛn, mun na o t’a yira ko i b’a tigi lɔn ka ɲɛ? (b) Mɔgɔw be sɔsɔli jumanw kɛ Yezu koo la?

MƆGƆ caaman tɔgɔ bɔra duniɲa kɔnɔ. Dɔw tɔgɔ bɔra kosɔbɛ u ka siya, u ka dugu wala u ka jamana kɔnɔ. Dɔ wɛrɛw tɔgɔ bɔra duniɲa kuru bɛɛ kɔnɔ. Nka, k’o ɲɔgɔnna mɔgɔ dɔ tɔgɔ dɔrɔn lɔn, o kɔrɔ tɛ ko i b’o tigi lɔn ka ɲɛ. O kɔrɔ tɛ fana ko i b’o tigi sɔɔn ani a ka koo tɛmɛnenw lɔn.

² Mɔgɔw ye Yezu koo mɛn duniɲa yɔrɔ bɛɛ la hali k’a sɔrɔ a ye ɲɛnamaya kɛ dugukolo kan a saan 2 000 ɲɔgɔn ye nin ye. Nka, mɔgɔ caaman t’a lɔn a tun ye mɔgɔ tigitigi min ye. Dɔw b’a fɔ ko a tun ye mɔgɔ ɲuman dɔrɔn lo ye. Dɔw fana b’a fɔ ko mɔgɔ wɛrɛ tɛ kira kɔ. Dɔ wɛrɛw b’a fɔ ko Yezu ye Ala ye ani ko mɔgɔw ka kan k’a bato. Nka, yala o ye tiɲɛn ye wa?

3. Mun na a kɔrɔtalen lo i ka tiɲɛn lɔn Yezu koo la?

³ A kɔrɔtalen lo i ka tiɲɛn lɔn Yezu koo la. Mun na do? Katuguni Bibulu b’a fɔ ko: “Ɲɛnamaya banbali ye nin de ye ko, u bɛ e dɔn ko i ye Ala sɛbɛ kelenpe ye, ka Yesu Krisita dɔn, i ye o min ci.” (Zan 17:3, ABM ). O cogo la, ka tiɲɛn lɔn Jehova Ala ani Yezu Krista koo la, o be se k’i dɛmɛ ka ɲɛnamaya banbali sɔrɔ alijɛnɛ kɔnɔ dugukolo kan (Zan 14:6). Ka fara o kan, Yezu lo ye ɲɛnamaya kɛcogo ani mɔgɔw minɛcogo ɲɛyira cogo  fisaman na (Zan 13:34, 35). Gafe nin kalansen fɔlɔ y’a yira min ye tiɲɛn ye Ala koo la. Sisan, an k’a filɛ Bibulu be min fɔ tigitigi Yezu Krista koo la.

4. Bonyali tɔgɔw “Masiya” ani “Krista” kɔrɔ ko di?

⁴ Wagati jan, sanni Yezu ka wolo, Bibulu tun kɔnna ka mɔgɔ dɔ nali kofɔ. Ala tun bena o tigi ci k’a kɛ Masiya wala Krista ye. Bonyali tɔgɔ “Masiya” (Heburukan na) ani “Krista” (Gɛrɛkikan na), u fila bɛɛ kɔrɔ ko “Mɔlen.” Layidu tara Masiya min koo la, a tun bena kɛ mɔlen ye, o kɔrɔ ko Ala tun bena lɔyɔrɔ kɛrɛnkɛrɛnnin dɔ di a ma. Masiya be ni lɔyɔrɔba min ye Ala ka  layiduw dafali koo la, an bena koo wɛrɛw lɔn o kan gafe nin kalansen nataw kɔnɔ. An bena a lɔn fana Yezu be se ka duga minw lase an ma kabini sisan. Nka, sanni Yezu ka wolo, n’a sɔrɔ mɔgɔ caaman tun b’u yɛrɛ ɲininga ko: ‘Jɔn lo bena kɛ Masiya ye?’

5. Yezu ka kalandenw tun lanen be mun lo la tigitigi a koo la?

⁵ Saan kɛmɛkulu fɔlɔ Krista tile la, Nazarɛtika Yezu ka kalandenw tun lanen b’a la tigitigi ko ale lo ye Masiya ye, kiraw tun kɔnna ka min koo fɔ (Zan 1:41). U la kelen min tɔgɔ ko Simɔn Piyɛri, ale y’a fɔ Yezu ye ko: ‘I ye Krisita ye.’ (Matiyo 16:16, ABM ). Cogo di a ka kalandenw tun be se ka la a la ko Yezu yɛrɛ lo ye Masiya ye, layidu tara min koo la ani an fana be se ka la o la cogo di?

6. Cogo min na Jehova ye mɔgɔ kantigiw dɛmɛ u ka se ka Masiya faranfasi k’a lɔn, i k’o ɲɛyira.

⁶ Ala ka kira minw ye ɲɛnamaya kɛ ka kɔn Yezu ɲɛ, olu tun ye koo caaman fɔ Masiya koo la. O koow tun bena mɔgɔw dɛmɛ u ka se ka Masiya faranfasi k’a lɔn. An be se k’o koow ɲɛyira ten: Miiri k’a filɛ, n’u ye i ci ka taga mɔgɔ dɔ kunbɛn mobili wala tɛrɛn gari la, wala awiyɔnso la, ani i m’o tigi ye ka ye. N’u y’o tigi cogoya lakali i ye dɔɔni, yala o tɛna i dɛmɛ wa? O cogo kelen na, Jehova tɛmɛna kiraw fɛ ka Masiya ka koow bɛɛ lakali Bibulu kɔnɔ k’a yira a tun bena min kɛ ani koo minw tun bena a sɔrɔ. O kiraya kuma caaman dafali tun bena mɔgɔ kantigiw dɛmɛ u ka se ka Masiya faranfasi k’a lɔn.

7. Kiraya kuma fila jumanw lo dafara Yezu kan?

⁷ An ka ɲɛyirali fila dɔrɔn lajɛ. A fɔlɔ, saan 700 ka kɔn Krista nali ɲɛ, kira Mise kɔnna k’a fɔ ko layidu tara Masiya min koo la, a tun bena wolo Bɛtilehɛm, Juda dugu dennin dɔ la (Mise 5:2). Yezu wolola yɔrɔ juman do? O dugu yɛrɛ kɔnɔ tigitigi! (Matiyo 2:1, 3-9). A filanan, saan kɛmɛkulu caaman ka kɔn Krista nali ɲɛ, Daniyɛli 9:25  ka kiraya kuma tun y’a yira ko Masiya tun ka kan ka bɔ kɛnɛ kan saan 29 an tile la. * O kiraya kuma ani dɔ wɛrɛw dafara Yezu kan k’a yira ko ale lo ye Masiya ye, layidu tara min koo la.

8, 9. Yezu ka batɛmu tuma na mun lo y’a yira ka gwɛ ko a ye Masiya ye?

⁸ Seereya wɛrɛ kɛra saan 29 laban na an tile la min y’a yira ka gwɛ ko Yezu ye Masiya ye. O saan na, Yezu tara Zan ( Yuhana) batiselikɛla fɛ walisa ka batise Zurudɛn baji kɔnɔ. Jehova tun y’a daa di Zan ma ko a bena tagamasiɲɛ dɔ yira a la walisa k’a dɛmɛ ka Masiya faranfasi k’a lɔn. Zan y’o tagamasiɲɛ ye Yezu ka batɛmu tuma na. Koo min kɛra, Bibulu b’o fɔ ten: “Yezu batizenin kɔ, a bɔra jii la. O yɔrɔnin bɛɛ, sankolo dayɛlɛla. Yezu ye Ala ka Nii jigitɔ ye a yɛrɛ kan i n’a fɔ tuganin. Kumakan dɔ bɔra sankolo la k’a fɔ ko: ‘Nin ye ne Dencɛ kanunin ye. A koo ka di ne ye haali.’ ” (Matiyo 3:16, 17). Koo min kɛra Zan y’o ye ani a y’o mɛn minkɛ, a ma sigasiga a la ko Ala lo ye Yezu ci (Zan 1:32-34). Ala ka hakili senu, wala a ka baarakɛ fanga, jigira Yezu kan tuma min na, Yezu kɛra Masiya wala Krista ye, o kɔrɔ, min ɲɛnatɔmɔna ka kɛ Kuntigi ani Masacɛ ye.—Ezayi 55:4.

⁹ Bibulu ka kiraya kuma dafali ani Jehova Ala yɛrɛ ka seereya b’a yira ka gwɛ ko Yezu tun ye Masiya ye, layidu tara min koo la. Nka, Bibulu be ɲiningaliba fila wɛrɛ jaabi Yezu Krista koo la: A bɔra min ka na ani a tun ye mɔgɔ sifa juman lo ye?

10. Bibulu ka fɔta la, sanni Yezu ka na dugukolo kan, a tun be min?

¹⁰ Bibulu b’a fɔ ko Yezu ye ɲɛnamaya kɛ sankolo la ka  sɔrɔ ka na dugukolo kan. Mise ye kiraya kɛ ko Masiya tun bena wolo Bɛtilehɛm ani a tun y’a fɔ fana ko “a tun bɛ yen kabini fɔlɔfɔlɔ.” (Mise 5:1, ABM ). Tuma caaman na Yezu yɛrɛ y’a fɔ ko ale ye ɲɛnamaya kɛ sankolo la ka sɔrɔ ka na wolo adamaden cogo la (Zan 3:13; 6:38, 62; 17:4, 5). Yezu tun ye mɛlɛkɛ ye sankolo la tuma min na, a tun be jɛnɲɔgɔnya teriman na ni Jehova ye.

11. Bibulu b’a yira cogo di ko Yezu ye Jehova Dencɛ ye min koo ka di a ye ka tɛmɛ tɔɔw bɛɛ kan?

¹¹ Yezu ye Jehova Dencɛ ye min koo ka di a ye ka tɛmɛ tɔɔw bɛɛ kan ani kuun b’o la. Yezu weelela ko “Danfɛnw bɛɛ la fɔlɔ bangelen” katuguni Ala kɔnna ka ale lo dan fɔlɔ * (Kɔlɔsikaw 1:15, NW ). Koo wɛrɛ b’a to o Dencɛ nin be dan na: a ye Ala “Denkɛ kelenpe” bangelen ye (Zan 3:16, ABM ). O kɔrɔ ko Ala ye Yezu kelenpe dan n’a yɛrɛ bolo ye. Ala tɛmɛna Yezu kelenpe lo fɛ fana ka fɛɛn tɔɔw bɛɛ dan (Kɔlɔsikaw 1:16). Faan wɛrɛ fɛ, Yezu weelela fana ko “Kuma” (Zan 1:14, ABM ). O b’a yira an na ko a tun be kuma Ala tɔgɔ la. Siga t’a la, a tun be cikanw lase a Faa deenw tɔɔw ma: adamadenw fara mɛlɛkɛw kan.

12. An b’a lɔn cogo di ko Dencɛ kelenpe bangelen ni Ala tɛ kelen ye?

¹² I ko mɔgɔ dɔw b’a miiri cogo min na, yala Ala Dencɛ fɔlɔ bangelen ni Ala ye kelen ye wa? Bibulu tɛ o fɔ. I ko an y’a ye dakun tɛmɛnen kɔnɔ, Dencɛ danna. A gwɛnen lo ko daminɛ be ale la, k’a masɔrɔ Jehova Ala tɛ ni daminɛ wala laban ye (Zaburuw 90:2). Dencɛ kelenpe bangelen m’a ɲini abada ka yɛrɛ kɛ kelen ye n’a Faa ye. Bibulu b’a fɔ ka gwɛ ko Faa ka bon ni Dencɛ ye (Zan 14:28; 1 Korɛntikaw 11:3). Jehova kelenpe ye  “Ala Sebaayabɛɛtigi” ye (Zɛnɛzi 17:1, ABM ). O kama, a ɲɔgɔn tɛ yen. *

13. Bibulu b’a fɔ ko Dencɛ ye “Ala jaa ye, an tɛ se ka Ala min ye.” O kɔrɔ ko di?

¹³ Jehova n’a Dencɛ fɔlɔ bangelen ye jɛnɲɔgɔnya teriman kɛ saan miliyari caaman kɔnɔ, o kɔrɔ, wagati jan sanni sankolo ni lolow ani dugukolo ka dan. U koo tun ka di ɲɔgɔn ye dɛ! (Zan 3:35; 14:31). O Dencɛ kanulen tun be komi a Faa, tigitigi. O lo kama Bibulu b’a fɔ ko Dencɛ ye “Ala jaa ye, an tɛ se ka Ala min ye.” (Kɔlɔsikaw 1:15). I n’a fɔ adamaden dencɛ be se k’a faa cogoya dɔw ta ka bɔ a fɛ tigitigi cogo min na, o cogo kelen na, Ala jogow n’a ka mɔgɔya be ye a sankolola Dencɛ la.

14. Cogo juman na Jehova Dencɛ kelenpe bangelen wolola ka kɛ adamaden ye?

¹⁴ Jehova Dencɛ kelenpe bangelen sɔnna ka bɔ sankolo la ka na ɲɛnamaya kɛ dugukolo kan i ko adamaden. Nka, n’a sɔrɔ i b’i yɛrɛ ɲininga ko: ‘Danfɛn yebali be se ka na wolo ka kɛ adamaden ye cogo di?’ Jehova ye kabako dɔ lo kɛ walisa k’o dafa. A y’a Dencɛ fɔlɔ bangelen niin ta sankolo la k’a don Yahutu npogotigi dɔ wolonugu la. O npogotigi tɔgɔ tun ko Mariyama. Mariyama tun ma la ni cɛɛ si ye. O cogo la, Mariyama ye dencɛ dafalen wolo k’a tɔgɔ la ko Yezu.—Luka 1:30-35.

15. Mun na an be se k’a fɔ ko an be se ka Jehova lɔn koɲuman Yezu sababu fɛ?

¹⁵ Yezu ye min fɔ ani a ye min kɛ k’a to dugukolo kan, o b’an dɛmɛ k’a lɔn ka ɲɛ. Min kɔrɔtalen lo ka tɛmɛ o kan yɛrɛ, o ye ko an be se ka Jehova lɔn koɲuman ale sababu fɛ. Mun na do? I hakili to a la k’o Dencɛ bɔlen be  a Faa fɛ tigitigi. O lo kama Yezu y’a fɔ a ka kalanden dɔ ye ko: “Ni mɔgɔ min ɲaa lara ne kan, o tigi ye n Faa fana ye.” (Zan 14:9). Bibulu ka kitabu naani minw be weele ko kibaru diiman (Matiyo, Mariki, Luka ani Zan), olu be koo caaman fɔ an ye Yezu Krista ka ɲɛnamaya, a ka baara n’a ka jogow koo la.

16. Yezu tun be mɔgɔw kalan mun lo la ani a ka kalan tun bɔra jɔn lo fɛ?

¹⁶ Mɔgɔw tun be Yezu lɔn ka ɲɛ ko “karamɔgɔ” tun lo (Zan 1:38; 13:13). A tun be mɔgɔw kalan mun lo la? Fɔlɔ, a tun be “masaya kibaru diman” fɔ mɔgɔw ye. O masaya ye Ala ka Masaya lo ye, sankolola gofɛrɛnɛman lo min bena dugukolo kuru bɛɛ mara ani ka kanminɛbagaw duga fɔɔ abada (Matiyo 4:23). Jɔn lo tun ye o cikan di a ma? Yezu yɛrɛ y’a fɔ ko: “Ne be mɔgɔw kalan koo minw na, u ma bɔ ne fɛ, u bɔra ne cibaga le fɛ”, o kɔrɔ, Jehova (Zan 7:16). Yezu tun b’a lɔn ko a Faa b’a fɛ adamadenw ka Masaya kibaro duman mɛn. Kalansen 8nan bena koo caaman fɔ an ye Ala ka Masaya koo la ani a bena min kɛ.

17. Yezu tun be mɔgɔw kalan yɔrɔ juman na, ani mun na a tun be jijaliba kɛ o la?

¹⁷ Yezu tun be mɔgɔw kalan yɔrɔ juman na? A tun mana mɔgɔw sɔrɔ yɔrɔ o yɔrɔ, kongo soow wo, dugubaw wo, dugu denninw wo, lɔgɔfiyɛw wo ani u ka soow kɔnɔ. Yezu tun tɛ sigi ka mɔgɔw kɔnɔ u ka na ale fɛ. Ale yɛrɛ tun be taga u fɛ (Mariki 6:56; Luka 19:5, 6). Mun na Yezu tun b’a jija ten ani a tun be wagati caaman kɛ ka mɔgɔ waaju ani k’u kalan? Katuguni o lo tun ye Ala sago ye. Yezu tun b’a Faa sago kɛ tuma bɛɛ (Zan 8:28, 29). Nka, a tun be waajuli kɛ kuun wɛrɛ kama. A tun be hinɛ jamaba la, o min tun be na a sɛgɛrɛ (Matiyo 9:35, 36). U ka diinan ɲɛmɔgɔ minw tun ka kan ka tiɲɛn fɔ u ye Ala  n’a sagonataw koo la, u tun tɛ u mako don u la. Yezu tun b’a lɔn ko Masaya kibaro negeba tun be mɔgɔw la.

18. Yezu ka jogow la, juman lo koo ka di e ye ka tɛmɛ?

¹⁸ Kanuyaba ni hinɛ tun be Yezu la. O kama, mɔgɔw tun b’a jati mɔgɔ ɲuman ye ani u tun tɛ sigasiga ka gwɛrɛ a la. Hali denmisɛnw tun tɛ siran ka gwɛrɛ a la (Mariki 10:13-16). Yezu tun tɛ mɔgɔ woloma. Nanbara ni tilenbaliya koow tun ka gwo a ye (Matiyo 21:12, 13). A ka wagati la cɛɛw tun tɛ musow bonya ani lɔyɔrɔ bɛrɛ tun tɛ u fɛ. Nka, Yezu kɔni tun b’u minɛ ni danbe ye (Zan 4:9, 27). Yezu majigilen tun lo sɔbɛ la. Loon dɔ la, a y’a ka cidenw seenw ko. Koow sira fɛ, baaraden lo tun ka kan k’o kɛ.

19. Mun lo b’a yira ko Yezu tun b’a janto mɔgɔw makoyaw la?

¹⁹ Yezu tun b’a janto mɔgɔw makoyaw la. A y’o yira ka gwɛ tuma min na a ye mɔgɔw kɛnɛya kabakoya la Ala ka hakili senu fanga barika la (Matiyo 14:14). Ɲɛyirali fɛ,  kunatɔcɛ dɔ gwɛrɛla a la k’a fɔ a ye ko: “N’i sɔnna, i be se ka ne kɛnɛya.” Yezu tun b’a lɔn dimi ni tɔɔrɔ min b’o cɛɛ kan. Hinɛ fɛ, Yezu y’a bolo sin ka maga o cɛɛ la ani a y’a fɔ a ye ko: “N sɔnna, kɛnɛya.” Ani kunatɔcɛ kɛnɛyara! (Mariki 1:40-42). I ka miiri k’a filɛ o koo ye min kɛ o cɛɛ la!

20, 21. Ka Ala kaan minɛ ni kantigiya ye, Yezu y’o ɲɛyira an na cogo di?

²⁰ Yezu ye Ala kaan minɛ kantigiya la. O koo la, a ye ɲɛyirali ɲumanman to an ye. Yezu tora kantigiya la a sankolola Faa ye hali ni mɔgɔw tun be a kɛlɛ k’a tɔɔrɔ ani ka koo sifaw bɛɛ kɛ a la.Yezu tora kelen kan ani a ye see sɔrɔ Sutana ka kɔrɔbɔliw kan (Matiyo 4:1-11). Tuma dɔ la, a somɔgɔ dɔw tun lanen tɛ a la ani u yɛrɛ tun b’a fɔ ko: “a kuun wilila.” (Mariki 3:21). Nka, a m’a to u y’a fari faga, a tora ka Ala ka baara kɛ. Nɛniniw ni nintɔɔrɔ bɛɛ n’a ta,  Yezu y’a yɛrɛ minɛ ka ɲɛ. A m’a ɲini abada ka kojugu kɛ a kɛlɛbagaw la.—1 Piyɛri 2:21-23.

²¹ Yezu tora kantigiya la fɔɔ ka taga sa, saya jugu yɛrɛ, a tɔɔrɔbagaw bolo (Filipikaw 2:8). A filɛ a ye koo minw muɲu a ka loon laban na k’a to adamaden cogoya la. U y’a minɛ, seere juguw y’a jalaki, kititigɛla nanbaratɔw ye saya kiti ben a kan, jama y’a lɔgɔbɔ ani sɔrɔdasiw y’a niin tɔɔrɔ. U y’a gwengwe yiri la, a y’a ka nɛnɛkiri laban kɛ ka kule ni kaanba ye ko: “Koo bɛɛ dafara.” (Zan 19:30). Nka, tile sabanan loon o kɔ, a sankolola Faa y’a lakunu k’a kɛ danfɛn yebali ye (1 Piyɛri 3:18). Lɔgɔkun damanin kɔ, a kɔsegira sankolo la. O yɔrɔ la, ‘a sigira Ala kinibolo la’ ka kɔnɔni kɛ Ala ka Masaya fanga di a ma.—Eburuw 10:12, 13.

22. Yezu kɛtɔ ka kantigiya kɛ fɔɔ ka taga sa, mun lo bena sɔrɔ o sababu fɛ?

²² Yezu kɛtɔ ka kantigiya kɛ fɔɔ ka taga sa, mun lo bena sɔrɔ o sababu fɛ? A ka saya sababu fɛ, an be se ka ɲɛnamaya banbali sɔrɔ alijɛnɛ kɔnɔ dugukolo kan i ko Ala tun b’a fɛ cogo min na. Kalansen nata bena a yira cogo min na o bena dafa.