1, 2. (1) ¿Jamüshi nnojoika piʼraajüin wanee wayuu shiale neʼe pütüjaain saaʼu nünülia? (2) ¿Jamüsü pütchi nüchiki Jesuu?

WAINMA wayuu eʼraajünaka maʼin suluʼupünaa tü Mmakat, eeshii neʼraajünüle maʼin suluʼu noumain. Nnojoishi piʼraajüin wanee wayuu shiale neʼe pütüjaain saaʼu nünülia, nnojotsü pütüjaain saaʼu tü naainjapuʼukat jee tü nukuwaʼipakat.

² Mayaapejeʼe sülatüin maʼaka 2.000 juya süchikijee yaajachin Jesukürisüto Mmapaʼa, aashajaayülia wayuu nüchiki sainküin tü Mmakat. Akatsaʼa nnojoluin natüjaain aaʼu jaralin nia. Eeshii eeka namüin: ‹Wayuu anamia nia›, ‹nünüikimaajachi Maleiwa›, ‹nia chi Maleiwakai otta waʼwaajüinjachi nia›. ¿Shiimainchejeʼe tia?

3. ¿Jamüsü anaka maʼin pütüjaale saaʼu tü shiimainkat nüchiki Jesuu?

³ Anasü maʼin pütüjaale saaʼu tü shiimainkat nüchiki Jesuu. ¿Jamüsü? Müsü tü Wiwüliakat: ‹Eejeechi nümaa Maleiwa waneepia [kateerü noʼu waneepia TNM] eeka niyaawatüin tü shiimüin ekirajünakat püchiki sünain waneeshin pia sünain Maleiwain, jee tachiki tayakai Jesukürisüto sünain püjünalain taya› (Juan 17:2, 3). Kateerü poʼu waneepia suluʼu tü Paʼaraiisükat pütüjaale saaʼu tü shiimainkat nüchiki Jeʼwaa otta Jesukürisüto (Juan 14:6). Otta müsia naainjain Jesuu wapüleerua tü waainjainjatkat otta tü wakuwaʼipainjatkat sümaa wayuu  (Juan 13:34, 35). Suluʼu ekirajaaya 1 wekirajaaitpa anain tü shiimainkat nüchiki Maleiwa. Wekirajaa jooluʼu sünain tü shikirajakat tü Wiwüliakat nüchiki Jesukürisüto.

4. ¿Jamaluʼulu tü pütchikat Mesías otta Cristo?

⁴ Süpülapünaa jemein Jesuu, süküjatüjülia tü Wiwüliakat nüntajachin chi nüjünalakai Maleiwa, kanüliaka Mesías otta Kürisüto. Tü pütchikat hebreo Mesías otta tü pütchikat griego Cristo «Aneekuushi» maluʼulu. Nüneeküinjachi Maleiwa Jesuu süpüla wanee kasa anasü maʼin. Mapa wekirajaajeerü anain tü naainjainjatkat chi Mesíaskai süpüla shikeraajüin tü nümakat Jeʼwaa paala. Wekirajaajeerü  anain eein süpüla anain wakuwaʼipa maaʼulu nutuma Jesuu. Süpülapünaa jemein nia, müshii na wayuukana: «¿Jaraiche chi Mesíaskai?».

5. ¿Kasa tü natüjaakat aaʼu na nikirajüinkana Jesuu?

⁵ Soʼu nükalia Jesuu, natüjaa aaʼu na nikirajüinkana niain chi Mesías aküjünakai achiki paala (Juan 1:41). Müshi Simón Pedro: «Pia Cristokaʼaya» (Mateo 16:16). ¿Jamüsü natüjaaka saaʼu na nikirajüinkana Jesuu niain niakai chi Mesías aküjünakai achiki paala? ¿Jamüsü watüjaaka saaʼu niain Jesuu chi Mesíaskai?

6. ¿Kasa wanaawaka amaa tü naainjakat Jeʼwaa süpüla niyaawatünüin chi Mesíaskai?

⁶ Ayaawatünajachi chi Mesíaskai sükajee tü naküjakat na nünüikimaajanakana Maleiwa. Müsü aka saaʼin püchajaale metkaaraluʼu nüchiki wanee wayuu nnojoika piʼraajüin. Süpüla tia, pütüjawee aaʼu kasain piyaawatüinjachin akajee nia ¿aashimüin? Nüküjüin Jeʼwaa süchiki tü naainjainjatkat otta tü alatüinjatkat nümüin chi Mesíaskai nakajee na nünüikimaajanakana. Sutuma tia, na oonookana sümaa nünüiki Maleiwa natüjaainjatü aaʼu niain Jesuu chi Mesíaskai shikeraajapa tü pütchi aküjünakat suluʼu tü Wiwüliakat.

7. Püküja süchiki piamasü pütchi ekeraajaka nünain Jesuu.

⁷ Wekirajaa sünain piamasü pütchi ekeraajaka nünain Jesuu. Palajana: naashin Miqueas jemeijachi Jesuu Belén suluʼu tü mmakat Judá, ekeraajüsü tia 700 juya süchikijee (Miqueas 5:2). ¿Jalajachi jemein Jesuu? Chaaʼaya Belén (Mateo 2:1, 3-9). Tü wanee shia tü aküjünakat paala suluʼu Daniel 9:25. Aküjünüsü nüntajachin soʼu tü juyakat 29 soʼu wakalia. * Tüü otta waneeirua pütchi ekeraajaka shiiʼiyatüin niain Jesuu chi Mesíaskai.

8, 9. ¿Jamüsü shiiʼiyatia nutuma Jeʼwaa niain Jesuu chi Mesíaskai wanaa sümaa nuwoutisaajünüin?

 ⁸ Atüjaanüichipa aaʼu niain Jesuu chi Mesíaskai sajaʼlajaayamüin tü juyakat 29. Awoutisaajünüshi nia shiroku tü süchikat Jordán nutuma Juan chi awoutisaajüikai. Süpüla niyaawatüin Juan jaralin chi Mesíaskai niʼitaainjatü Jeʼwaa wanee shiyaawase. Niʼitaain Jeʼwaa tia nuwoutisaajünapa Jesuu. Müsü tü Wiwüliakat: ‹Kettaapa nuwoutisaajünüin Jesuu, ashaʼwalaa müshia nia shirokujee tü wüinkat. Eerulaasü tü sirumakat. Niʼrakalaka chi naaʼinkai Maleiwa sünain ashakataa nünainmüin sünain müin aka saaʼin wanee moʼuwa. Saapünakalaka wanee pütchi chaa iipünaajee sünain maa: «Anii chi Tachonkai aishikai tapüla. Talatüshi maʼin taya nümaa»› (Mateo 3:16, 17). Sutuma tia, nütüjaaitpa aaʼu Juan niain Jesuu chi nüjünalakai Maleiwa (Juan 1:32-34). Naapapa Maleiwa tü nütchinkat nümüin Jesuu niaichipa chi Mesíaskai otta chi Kürisütokai, chi nüneekakai süpüla Ekiipuʼuin jee Laülaain nia (Mateo 28:18).

⁹ Tü pütchi ekeraajakat nünain Jesuu otta nünüiki Jeʼwaa shiiʼiyatüin niain Jesuu chi Mesías aküjünakai achiki paala. Süküjüin wamüin tü Wiwüliakat jalapuʼuin kepiain Jesukürisüto nümaiwa otta süchiki jamüin nukuwaʼipa.

10. ¿Jamüsü sünüiki tü Wiwüliakat nüchiki Jesuu süpülapünaa nüntüin Mmapaʼamüin?

¹⁰ Süpülapünaa nüntüin Jesuu Mmapaʼamüin, kepiapuʼushi nia sirumatuʼu saashin tü Wiwüliakat. Nnojotsü shiain neʼe nüküjüin Miqueas jemeijachin Jesuu Belén, nüküjüin akumajuushin nia «sümaiwa paala» (Miqueas 5:2, TNM). Kojuyatua nüküjüin Jesuu chapuʼuin nia  sirumatuʼu süpülapünaa nüntüin Mmapaʼamüin (paashajeʼera Juan 3:13; 6:38, 62; 17:4, 5). Chaaʼaya sirumatuʼu aleewapuʼushi nia nümaa Jeʼwaa otta meʼrujusai nia.

11. ¿Jamüshi aika maʼin Jesuu nüpüla Jeʼwaa saashin tü Wiwüliakat?

¹¹ Aishi maʼin Jesuu nüpüla Jeʼwaa süka nukumajalain nia palajana, makalaka nia «chi Nüchon eʼirumaakai» sümüin tü Wiwüliakat (Hebreokana 1:6). * Otta wanee shia süka niain «chi waneeshikai Nüchoin», chi nukumalakai nümüiwaʼa (Juan 3:16). Aʼyataajiraashi nia nümaa sünain akumajaa süpüshuaʼa tü kasakalüirua (Colosas 1:16). Otta müsia «Pütchi» münüshi nia süka Pütchipuʼuin nutuma chi Nüshikai (Juan 1:14). Aküjüshi nia pütchi, nikirajüin na aapieekana otta na wayuukana.

12. ¿Jamüshi nnojoika wanaawain Jesuu nümaa Maleiwa?

¹² ¿Wanaawashiche Jesuu nümaa Maleiwa? Tia nnojotsü shiain tü shikirajakat tü Wiwüliakat. Maʼaka süküjüin tü pütchikat 11, akumajuushi Jesuu. Akaisaʼa Jeʼwaa eetüjüiya nia nümaiwa, nnojoishi jaralin akumajüin nia (Alateetkat Mapeena 1:8). Naashin Jesuu nnojoishi nia wanaawain nümaa chi Nüshikai. Saashin tü Wiwüliakat laülaa chi Nüshikai nuulia (paashajeʼera Juan 14:28; 1 Corinto 11:3). Nia neʼe Jeʼwaa ‹chi Maleiwa Pülashikai maʼin› (Génesis 17:1). Nnojoishi jaralin wanaawain amaa nia. *

13. Wanaawasü nukuwaʼipa Jesuu nümaa Maleiwa saashin tü Wiwüliakat, ¿jamaluʼulu tia?

¹³ Süpülapünaa sukumajünüin tü jolotsükalüirua otta tü Mmakat, aleewashi maʼin Jeʼwaa nümaa chi  Nüchonkai soʼu wainmashaata juya. ¡Aijiraakajasa maʼin naya! (Juan 3:35; 14:31.) Wanaawasü nukuwaʼipa Jesuu nümaa chi Nüshikai. Makalaka «wanaawasü nükuaippa nümaa Maleiwa» sümüin tü Wiwüliakat (Colosas 1:15). Müshi aka wanee jintüi eeka müin aka naaʼin chi nüshikai, nüshatüin Jesuu nukuwaʼipa chi Nüshikai.

14. ¿Jamüshi süpüla wayuuinjachin chi waneeshikai Nüchon Jeʼwaa?

¹⁴ Süpüla nüntüin Mmapaʼamüin chi Nüchonkai Jeʼwaa, ashakatüshi nia süka naaʼin nümüiwaʼa. Eesü püsakirüle paaʼin: «¿Jamüshi süpüla wayuuinjachin Jesuu sümaa meʼrujuin nia paala?». Aainjashi Jeʼwaa wanee kasa pülasü. Nülatirüin chi Nüchon niʼrumakai suluʼumüin süchonla wanee wayuu majayülü María sünülia. Süka nnojoluin wayuuin nüshi anaka maʼin nia. Jesuu nünülia sutuma tü niikat (Lucas 1:30-35).

15. ¿Jamüshi süpüla weʼraajüin Jeʼwaa nünainjee Jesuu?

¹⁵ Weʼraajüin Jesuu sutuma tü kasa nüküjakat otta tü naainjakat wanaa sümaa yaajachin nia Mmapaʼa. Otta müshia Jeʼwaa eeshi süpüla weʼraajüin nia nünainjee. ¿Jamüsü sukuwaʼipa tia? Soto paaʼin wanaawain nukuwaʼipa Jesuu nümaa chi Nüshikai. Sutuma tia nümaka nümüin wanee nikirajüin: «Chi eekai niʼrüin taya, niʼrüin chi Tashikaʼiya» (Juan 14:9). Suluʼu tü karalouktakat Mateo, Marcos, Lucas otta Juan, aküjünüsü süchiki nukuwaʼipa otta tü naainjapuʼukat Jesukürisüto.

16. ¿Kasa nikirajaka maʼin anain Jesuu? ¿Jara kaapajalaka nümüin Jesuu tü nikirajakalü anain?

¹⁶ «Ekirajüi» münüshi Jesuu (Juan 1:38; 13:13). ¿Kasa nikirajapuʼuka anain? Ekirajüshi maʼin sünain ‹tü pütchi anasükat süchiki nukuwaʼipa Maleiwa sünain aluwatawaa›. Tia shia tü pütchi anasükat süchiki Nuluwataaya  Maleiwa. Sutuma tü aluwataayakat anainjatü nakuwaʼipa na wayuu oonookana waneepia sümaa nünüiki Maleiwa otta aluwataainjatü saaʼu tü Mmakat (Mateo 4:23). ¿Jara kanüikika pütchikat tüü? Nia Jeʼwaa. Müshi Jesuu: «Tü tekirajakat anain, nnojotsü pütchin taleʼeruʼujeejatü neʼe, naapajala tamüin chi kajünalakai taya» (Juan 7:16). Nütüjaa aaʼu Jesuu keeʼireein naaʼin chi Nüshikai natüjaain saaʼu na wayuukana tü pütchi anasükat süchiki Nuluwataaya Maleiwa. Suluʼu ekirajaaya 8 wekirajaajeerü süchiki tü Nuluwataayakat Maleiwa otta tü eeinjatkat sutuma.

17. ¿Jalapuʼushi ekirajüin Jesuu? ¿Jamüshi nikirajaka maʼin Jesuu?

¹⁷ ¿Jalapuʼushi ekirajüin Jesuu? Ekirajüshi eepünaale eein wayuu nüpüla: suluʼupünaa pueulo, wünaʼapü, metkaaraluʼu otta shipialuʼu wayuu. Nüchajaain Jesuu na wayuukana, nnojoishi nia joyotüin sünain naʼatapajüin nantüin nünainmüin (Marcos 6:56; Lucas 19:5, 6). ¿Jamüshi nüküjaka maʼin pütchi otta nikirajaka maʼin Jesuu? Shia süka keeʼireein naaʼin shia Jeʼwaa, naainjain Jesuu tia waneepia (Juan 8:28, 29). Otta müshia nia nümüliajeein na wayuu antakana nünainmüin (paashajeʼera Mateo 9:35, 36). Na laülaashiikana naʼakajee na sacerdootekana nnojoishii nekirajüin na wayuukana tü shiimainkat nüchiki Maleiwa otta tü naainjainjatkat. Akaisaʼa Jesuu nütüjaa aaʼu choʼujaain maʼin namüin na wayuukana naapüin süchiki Nuluwataaya Maleiwa.

18. ¿Jarat tü nukuwaʼipakat Jesuu anaka maʼin pümüin?

¹⁸ Aipürai Jesuu otta anamia maʼin nia. Kojutüsü nümüin wayuu, kamaneeshi nia otta anasü naaʼin na tepichikana nümaa (Marcos 10:13-16). Wanaawasü wayuu nümüin Jesuu otta nülerajüin tü kasa mojusükat (Mateo 21:12, 13). Nnojoishii kojutüin na jieyuukana atumawaa, akaisaʼa Jesuu kojutüshii naya nümüin (Juan 4:9, 27).  Nnojotsü yaletayaain naaʼin Jesuu. Soʼu wanee kaʼi nuʼlojooin nooʼui na nikirajüinkana, tia naainjain neʼe na piuunakana.

19. ¿Jamüsü watüjaaka saaʼu nümüliajüin Jesuu na müliakana aaʼin?

¹⁹ Amülialaasü naaʼin Jesuu naalii na müliakana aaʼin, naainjain tia wanaa sümaa niiyajüin na ayuuishiikana süka tü nütchinkat Maleiwa (Mateo 14:14). Soʼu wanee kaʼi arütkaashi nünainmüin Jesuu wanee wayuu ajaʼtta atachi, müshi nia nümüin: «Müinka pücheküle, piiyaja taya». Amülialaasü naaʼin Jesuu sutuma müliain chia wayuukai. Niyurulaka nütüna nünainmüin sümaa naapaain nia, nümaka: «Tacheküin süpüleerua anainjachin pia». ¡Anaka chi ayuuishikai! (Marcos 1:40-42.) Talatakajasa maʼin chia wayuukai ¿aashimüin?

20, 21. ¿Jamüshi noonooka maʼin waneepia Jesuu sümaa nünüiki Maleiwa?

²⁰ Oonooshi maʼin Jesuu waneepia sümaa nünüiki Maleiwa. Jaʼitaichi müliain maʼin nia atumaa, ayatüshi oonooin sümaa nünüiki chi Nüshikai. Niyouktüin tü naapakat Satanaa nümüin (Mateo 4:1-11). Soʼu wanee kaʼi, nnojotsü nanoujain na nüpüshikana tü nünüikikat. Müshii naya: «Maaʼinkaicheje aaʼin nia» (Marcos 3:21). Nnojotsü mojuin naaʼin Jesuu sutuma tia, ayatüshi nia aʼyataain nümüin Maleiwa. Wanaa sümaa mojuin sünüiki wayuu nümüin otta saainjüneein kasa mojusü nümüin, nüchecherüin naaʼin otta nnojotsü nücheküin pasalaweein nia (1 Pedro 2:21-23).

 ²¹ Ayatüshi jüüjüüin Jesuu nümüin Maleiwa ouktaleepa nia. Süpülapünaa tia, müliashi maʼin nia natuma na nüʼünüükana (paashajeʼera Filipos 2:8). Soto paaʼin tü alatakat nümüin süpülapünaa ouktüin nia. Ataʼünüshi natuma na sülaülashiikana mma, aküjünüsü alawaa nüchiki, aapüna ekiichi süpüla ouktaa, meeʼerapalashi jee müliashi nia natuma na surulaatkana. Süpülapünaa ouktüin nia sünain tü wunuʼukat, müshi nia: «Kettaaitpa tatüma» (Juan 19:30). Apünüin kaʼi süchikijee ouktüin Jesuu asoʼireʼennüsü naaʼin nutuma Maleiwa maʼaka naaʼin wanee meʼrujusai (1 Pedro 3:18). Süchikijee tia aleʼejüshi sirumatuʼumüin, eere «nia joyotüin nikialuʼujee chi Maleiwakai» jee aʼatapajüshi nia süpüla nuluwataainjachin (Hebreokana 10:12, 13).

22. ¿Kasa eeka sünainjee jaa nümüin waneepia Jesuu?

²² ¿Kasa eeka sünainjee jaa nümüin waneepia Jesuu? Sükajee ouktüin nia katüinjatü woʼu waneepia suluʼu wanee paʼaraiisü maʼaka nüküjüin shia Jeʼwaa sümaiwa. Suluʼu tü wanee ekirajaayakat wekirajaajeerü anain katüinjatüin woʼu waneepia sükajee ouktüin Jesuu.