1, 2. a) Ni iti käikitakata aune kädrieta ni olote akwa ni ye rükadre gare kwin nie, ¿ye ñobätä ñaka ja erebe? b) ¿Kukwe meden jene jene nieta Jesús yebätä?

KÄ JÖKRÄBITI nitre tärä kwati abokän käikitakata. Ruäre nüke gare tä nüne yekänti, juta kwe yete bätä kä jökräbiti tibien. Nitre ye kä gare mäi, akwa ye ñaka tä mike gare ni ye gare kwin mäi, töi ño aune dre dre nuainbare kwe ye ñaka gare metre mäi.

² Kä nikanina bäsi mil krobu ta Jesukwe nünanbare Kä tibienbätä, akwa kä jökräbiti tibien blitatabätä. Akwa, kukwe keta kabre jene jene nieta niarabätä. Nitre ruäre tä niere niara töi nämene kwin. Nitre mada tä niere niara namani Ngöbö kukwei niekä. Nitre ruäre tä nütüre Jesús abokän Ngöbö aune nikwe mikadre täte. Akwa, ¿ye metre raba ruin mäi?

3. ¿Ñobätä ütiäte mäkwe Ngöbö Jehová aune Jesukristo mikadre gare jai?

³ Kukwe metre rabadre gare mäi Jesubätä ye ütiäte krubäte. ¿Ñobätä? Ñobätä ñan aune Biblia tä niere: “Ne gärätä ja nire kärekäre, mä aibe Ngöbö metre ye rükadre gare ietre, bätä ni juani mäkwe, Jesukristo ye arato” (Juan 17:3, TNM). Ngöbö Jehová aune Jesukristo mikadre gare metre jai, ye raba niken mä ngwena ja nire kokwäre nünankäre kärekäre kä bä nuäre  yete (Juan 14:6). Ne madakäre, nünandre ño bätä nitre mada mikadre tuin ño jai ye Jesukwe bämikani ni kräke (Juan 13:34, 35). Kukwe meden metre Ngöböbätä ye nikwe mikaba gare jai tärä nebätä kapitulo kena yekänti. Akwa, Biblia kätä dre driere Jesukristo yebätä ye ani mike gare jai.

4. ¿Mesías bätä Kristo ye abokän dre gärätä?

⁴ Jesús jämi därere ye känenkri, Bibliakwe mikani gare ni dianinkä Ngöbökwe Mesías o Kristo ye rükadi.  Mesías (kukwe hebreore) bätä Kristo (kukwe griekore) ye abokän “Ni dianinkä” meden gärätä. Ni iti juain käbämikani ye abokän Ngöbökwe dianinkä sribi ütiäte nuainkäre. Ngöböta dre käbämike ye rabai bare Mesías ye köböire ye nikwe mikai gare jai kapitulo mada yebätä. Jesús raba kukwe kwin mike nemen bare ni kräke kä nengwane ye mikai gare jai arato. Jesús jämi därere ye känenkri ni kwati nämene kukwe ne ngwentari: “¿Nire kädekai Mesías?”.

5. ¿Kukwe meden metre nämene gare nitre ja tötikaka Jesube yei?

⁵ Siklo kena ye ngwane nitre ja tötikaka Jesús Nazaret yebe, yei nämene gare kwin Jesús abokän Mesías käbämikani (Juan 1:41). Iti kädeka nämene Simón Pedro käkwe niebare ie: “Mä abokän Kristo” (Mateo 16:16, TNM). Akwa, ¿ñokänti nitre ja tötikaka Jesube ie nämene gare kwin Jesús ye ara Mesías käbämikani? Arato, ¿ñobätä nikwe kukwe ye mikadre era jai?

6. ¿Kukwe meden bämikata abokän erere Jehovakwe nuainbare ne kwe Mesías rükadre gare nitre niara mikaka täte metre yei?

⁶ Jesús jämi därere ye känenkri, nitre Ngöbö kukwei niekä käkwe kukwe keta kabre mikani gare ne kwe Mesías ye rükadre gare. Ani bämike: Mä rikadre ni iti ñaka gare mäi kain ngäbiti jutate nitre kwati ngätäite. Ni ye bä o ja ngwäkitani ño ye mä törbadre mikai gare jai ¿ñan ererea? Ye erere arato, Mesías käkwe dre nuaindre aune dre rabai barebätä ye Jehovakwe mikani gare metre nitre Ngöbö kukwei niekä yebiti. Ye köböire kukwe niebare kwe ye jatadre nemen bare jatäri ye ngwane, nitre Ngöbö mikaka täte metre yei Mesías rükadre gare.

7. ¿Kukwe meden ketebu niebare abokän namani bare Jesús yebätä?

⁷ Ani kukwe ruäre ye mike gare jai. Kena: Miqueas ni Ngöbö kukwei niekä käkwe niebare, ni dianinkä ye däredi kä kädeka nämene Belén kä Judá yekänti, rabadre  bare ye känenkri kukwe ye mikani gare kwe kä 700 biti bäri nikani ta yete (Miqueas 5:2). Akwa, ¿medente Jesús därebare? Erametre, kä ye arabe känti (Mateo 2:1, 3-9). Ketebukäre: Ñongwane Mesías rükadi ye niebare Daniel 9:25 yebätä, kukwe ye mikani gare siklo kwati känenkri aune erametre nükani kä 29 yete. * Kukwe ketebu kädrieni nete bätä kukwe mada namani bare ye käkwe mikani gare Jesús abokän Mesías käbämikani.

8, 9. Jesús ngökani ñöte ye ngwane, ¿ñokänti namani gare metre niara abokän Mesías?

⁸ Kä 29 namanina krüte ye ngwane Jesús abokän Mesías namani gare bäri kwin. Kä ye ngwane, niara ngökadre ñö Jordán yete namani ribere Juan Bautista ie. Jehovakwe kukwe mikai gare käbämikani Juan ie ne kwe rükadre gare ie nire abokän Mesías, aune nuainbare kwe niara Jesús ngökani ñöte ye ngwane. Biblia kätä mike gare: “Jesu ngökani ñöte, jataninta ñöte käin angwane, kä käin se namani tuen ñäkänintbe ie angwane, Ngöbö Üai jatani ütü bä kwrere timonkwäre, nükani mate Jesubti namani tuin ie. Ye btäräbe ni kukwei jarabare kä käinbti, käkwe niebare: Ni ne [...] ti Ngobo tikwe. Niara tare kri tikwe” (Mateo 3:16, 17). Kukwe ye juruabare Juan ie aune tuani kwe ye ngwane namani gare metre ie Jesús abokän Ngöbökwe juani (Juan 1:32-34). Kä ye ngwane Ngöbö üai deme namani Jesubiti angwane niara Mesías o Kristo namani gare, ni dianinkä Ji ngwanka käne aune rabakäre Reire (Isaías 55:4).

⁹ Kukwe niebare Bibliabätä abokän namani bare aune Jehovakwe kukwe niebare ye käkwe mikani gare metre Jesús ye abokän Mesías käbämikani. Kukwe ütiäte ketebu ngwantarita Jesukristo yebätä: nämene medente  jatani bätä töi nämene ño, ye Biblia tä mike gare arato.

10. ¿Jesús jämi nüke Kä tibienbätä ye känenkri nämene medente drieta Bibliakwe?

¹⁰ Biblia kätä driere Jesús jämi nüke Kä tibienbätä ye ngwane nünanbare kwe kä kwinbiti. Ñodre, Miqueas käkwe niebare Mesías däredi kä Belén yekänti, akwa ye ñan aibe ngörä, ñakare aune Mesías “nünanka kirabe” ye mikani gare kwe arato (Miqueas 5:2). Erametre, Jesukwe niebare bati bobu niara jämi nüke Kä tibienbätä ye känenkri nünanbare kwe kä kwinbiti (ñäkädre Juan 3:13; 6:38, 62 yebätä; 17:4, 5). Kä kwinbiti niara nämene üaire aune ja ketani kwin kwe Jehovabe.

11. ¿Jehová tä Jesús tarere bäri ye Biblia tä mike gare ño?

¹¹ Kukwe keta kabrebätä Jehová nämene Jesús tarere bäri. Biblia tä Jesús kädeke “monso mubai, Ngöbökwe sribebare käne jondron jökrä ye känenkri” (Colosenses 1:15). * Arato niara “itibe” ye medenbätä Jehová nämene tarere bäri (Juan 3:16). Kukwe ne kätä mike gare Jesús aibe Ngöbökwe sribebare kaibe. Arato niara aibe käkwe Jehová dimikani jondron jökrä mada sribere (Colosenses 1:16). Ne madakäre, niara kädekata “Kukwe” (Juan 1:14). Ne tä mike gare niara nämene blite Rün kwe ye käbiti. Erametre, niara nämene Ngöbö kukwei niere angeletre yei bätä nitre kä tibienbätä yei.

12. ¿Kukwe meden tä mike gare Monso mubai ye ñaka ja erebe Ngöböbe?

¹² Nitre ruäre tä nütüre Monso mubai ye Ngöbö ara,  akwa ¿ye metre? Biblia ñaka tä kukwe ye driere. Jesús sribebare ye miri gare párrafo käne yebätä. Ye medenbätä, niara sribebare ye ngwane jatani nüne ja känenkäre, akwa Jehová abokän nüne kirabe nükebe kä nengwane (Salmo 90:2). Jesukwe ñaka ja biani jire chi Rün kwe ye erere. Biblia kätä driere Rün abokän bäri kri Monso yebiti ta (ñäkädre Juan 14:28 yebätä; 1 Corintios 11:3). Jehová ye aibe “Ngöbö Di[e] Kri” (Génesis 17:1, JK). Ye medenbätä, ni ñaka iti jire ja erebe niarabe. *

13. Biblia tä niere Jesús yebätä: “Ngöbö ñaka tuin ye abokän [kwrere] niara bä” ¿ye abokän dre gärätä?

¹³ Muke bätä Kä tibien ye sribe jämi känenkri, kä kwati krubäte te Jehová bätä Jesús käkwe ja mäkäni kwin. ¡Niaratre käkwe ja tarebare krubäte! (Juan 3:35; 14:31). Monso ye töi nämene Rün kwe ye erere. Ye medenbätä, Biblia tä niere “Ngöbö ñaka tuin ye abokän [kwrere] niara bä” (Colosenses 1:15, TNM). Kukwe keta kabre känti monsotre ruäre rün kwe ye kwrere, ye erere arato Jesús käkwe ja ngwani aune töi nämene Rün kwe ye kwrere.

14. ¿Ñokänti Monso mubai Jehovakwe därebare ni kä nebätä kwrere?

¹⁴ Jesús, Monso ngöräbe Jehovakwe, käkwe kä kwin tuanimetre ja töi jeñebiti aune jatani Kä tibienbätä ni brare kwrere. Akwa, mä raba ngwentari: “¿Ñokänti ni üaire raba därere ni kä nebätä kwrere?”. Jehovakwe kukwe ñan tuabare nuainbare. Monso mubai kwe nämene kä kwinbiti mikani nemen nire kwe, meri iti jämi ja mike gure kädeka nämene María yebätä, meri ye nämene nüne kä Judá yekänti. Monso ye kädekani Jesús,  niara rün ñaka ni kä tibien nebätä, ye medenbätä därebare töi metre (Lucas 1:30-35).

15. ¿Jesús köböire ño Jehová raba nüke gare kwin nie?

¹⁵ Jesús nämene Kä tibienbätä ye ngwane, kukwe niebare kwe bätä nuainbare kwe, ye jökrä tä ni dimike niara mike gare bäri kwin jai. Aune niara köböire Jehová raba nüke gare bäri kwin nie. ¿Ño? Ngwenta törö jai Monso ye Rün bä kwrere. Ye medenbätä, ni iti ja tötikaka ben yei niebare kwe: “Nire nire kätä ti tuen, ye abko tä ti Rün tuen arato” (Juan 14:9). Jesukristo nünanbare ño, sribi meden nuainbare kwe bätä töi nämene ño, ye jökrä mikata gare tärä ketabokä yebätä Bibliabätä: Mateo, Marcos, Lucas bätä Juan.

16. ¿Kukwe medenbätä Jesukwe blitabare metrere bätä nire kukwei driebare kwe?

¹⁶ Jesús kädekata “Dirikä” (Juan 1:38; 13:13). ¿Dre driebare kwe? Metrere, nämene blite ‘kukwe kwin’ yebätä, ye abokän Gobran Ngöbökwe kukwei drie nämene kwe. Gobran ne tä kä kwinbiti aune gobrandi kwe Kä jökräbiti tibien bätä kukwe kwin mikai nemen bare nitre ja mikaka täte metre Ngöböi ye kräke (Mateo 4:23). ¿Nire kukwei drie nämene kwe? Jesús arabe käkwe niebare: “Tita kukwe dirire, ye abko ñakare tikwe, akwa ni ti juanka abko kukwei dirita tikwe”, niara nämene Jehová kukwei driere (Juan 7:16). Jesús ie nämene gare, Rün kwe tö namani nitre jökrä tuai kukwe kwin Gobran Ngöbökwe yebätä kukwe nuin. Kukwe mada Gobran yebätä aune dre nuaindi kwe, ye mikai gare bäri kapitulo 8 yebätä.

17. ¿Jesukwe diribare medente aune ñobätä ja di ngwani nuainne kwe?

¹⁷ ¿Jesús nämene kukwe driere medente? Kä jökrä  känti: nitre nämene sribire yekänti, jutate, jondron rürübäin nämene yekänti bätä ju ju te. Jesús ñaka nämene nemen kwekebe täkäni tibien nitre mada ngübare, ñakare aune nämene niken nitre mada yekänti (Marcos 6:56; Lucas 19:5, 6). ¿Ñobätä kä dianinkä krubäte kwe jai bätä ja di ngwani kwe kukwe driekäre aune nitre mada tötikakäre? Ñobätä ñan aune, Rün ye erere töi nämene aune niarakwe käre Rün kukwei mikani täte (Juan 8:28, 29, TNM). Arato nitre nämene niken känti ye nämene nemen tuin bobre ie (ñäkädre Mateo 9:35, 36 yebätä). Kukwe metre Ngöbökwe bätä Ngöbö töi nämene ño ye nitre ji ngwanka käne käkwe driedre nitre madai, akwa ye erere ñaka nuainbare kwetre. Jesús abokän ie nämene gare, nitre mada tö nämene kukwe Gobran Ngöbökwe yebätä kukwe nuai.

18. ¿Jesús töi meden nibi tuin bäri kwin mäi?

¹⁸ Jesús töi nämene ni madabätä aune nämene ni  mada tarere. Ñaka nämene nemen rubun nitre mada ye kräke, ñakare aune nämene kain ngäbiti kwin. Monsotre kia yei ja nämene ruin kwin nüke niara ken arato (Marcos 10:13-16). Jesús nämene nitre jökrä mike tuin ja erebe jai. Kukwe käme aune kukwe ñaka metre nuain nämene ye kräke niara brukwä nämene (Mateo 21:12, 13). Niara näire meritre ñaka mika nämene tuin ütiäte, akwa niarakwe mikani tuin ütiäte jai (Juan 4:9, 27). Erametre Jesús töi nämene bobre. Bati, niarakwe nitre apóstol ngoto bätäninte, sribi ye abokän nitre klabore aibe nämene nuainne.

19. ¿Kukwe meden kätä mike gare nitre nämene ja tare nike ye ngwane nämene nemen tuin bobre Jesús ie?

¹⁹ Ngöbö üai deme ye köböire Jesukwe nitre mikaninta kwin aune yebiti bämikani kwe nitre nämene ja tare nike ye nämene tuin bobre ie (Mateo 14:14). Ñodre, ni iti bren lepra kisete nikani känti käkwe niebare  ie: “Ma tö ti mikaita kuinta ne ngwane, makwe ti mikata kuinta”. Ni ye nämene ja tare nike ye erere ja namani ruin Jesús ie. Namani tuin bobre ie aune kise mikanibätä kwe aune niebare kwe ie: “Ma rabata kuinta, ie ti tö”. Aune ni ye namaninta kwin (Marcos 1:40-42). ¿Ja namani ruin ño ie raba ruin mäi?

20, 21. Jesús Ngöbö mikani täte bätä ja ngwani metre kwe, ¿ñobätä ni raba niere kukwe kwin bämikani kwe ni kräke?

²⁰ Jesús Ngöbö mikani täte bätä ja ngwani metre kwe, yebiti kukwe kwin bämikani kwe ni kräke. Kukwe keta kabre ben ja tuani kwe bätä ngwani ja tare nike, akwa yebiti ta Rün kwe ye mikani täte erametre kwe. Satana käkwe nuatebare ye ngwane ñaka kukwei ye kani ngäbiti jire chi kwe (Mateo 4:1-11). Kena mräkätre kwe käkwe ñaka tödekabare niarabiti, ruäre käkwe niebare “kä namani [ngwarbe] Jesu dokwäbti” (Marcos 3:21). Akwa Jesukwe ñaka ja di ngwani nekä bätä sribi Ngöbökwe ye nuainbare jankunu kwe. Nitre ja mikaka niara rüere käkwe ñäkäbare tare ie bätä metani, akwa ja töi mikani jäme kwe bätä ñaka ja ngie mikani kwe (1 Pedro 2:21-23).

²¹ Nitre ja mikaka Jesús rüere käkwe mikani ja tare nike krubäte murie keta jämi känenkri akwa Ngöbö mikani metre täte kwe nememe mrä (ñäkädre Filipenses 2:8 yebätä). * Kukwe meden meden tare nuainbare Jesubätä murie ketani ye ngwane yebätä mäkwe töbika. Jänikani gobran ngwärekri kitakäre ngite, nitre käkwe blitabare ngwarbe niara rüere, nitre kukwe  ükatekä käkwe ñaka kukwe ükaninte metre kräke, nitre namani niara kötaire bätä nitre rükä käkwe ngwani ja tare nike, kukwe ye jökrä ben ja tuani kwe. Nämene metani kribätä angwane mrä niebare kwe: “Sribita ti kisete, erere nibira bare täte jökrä tie” (Juan 19:30). Yebiti köbömäkäre Rün kwe käkwe ganinkröta ni üaire erere (1 Pedro 3:18). Köbö gre ketebu ye bitikäre nikaninta kä kwinbiti “namani täkänintbe Ngöbö küde ruenkri” niara mikadre gobrane ye ngübakäre (Hebreos 10:12, 13).

22. ¿Jesukwe ja ngwani metre nememe mrä ye köböire kukwe meden namani bare?

²² ¿Jesukwe ja ngwani metre nememe mrä ye köböire kukwe meden kwin namani bare? Ja nire biani kwe ni ütiäre, ye köböire ni raba nüne kärekäre kä tibienbätä kä bä nuäre yete, Jehová töi namani kena ye erere. Jesús ja nire biani ye köböire kukwe ye rabai bare ño, ye mikai gare kapitulo mada yebätä.