1, 2. (a) Bema ladana bada tauna ta ena ladana oi diba, dahaka dainai unai ese ia hahedinaraia lasi ia oi diba momokani? (b) Taunimanima momo ese Iesu be edena bamona idia laloa?

INAI tanobada ai ladana bada taudia be momo. Haida be edia noho gabuna, siti, eiava tano dekenai ladana bada idia abia. Ma haida be tanobada hegegemadai dekenai ladana bada idia abia. To, ladana bada tauna ta ena ladana oi diba karana ese ia hahedinaraia lasi unai tauna oi diba momokani. Anina be unai tauna ena noho dalana bona ena kara be oi diba lasi.

² Tanobada hegegemadai idia noho taudia be Iesu Keriso idia diba, herevana ia be lagani 2,000 gunanai tanobada dekenai ia noho. To, momo idia daradara Iesu be edena bamona tauna. Haida idia gwau ia be tau namona ta sibona. Ma haida idia gwau ia be peroveta tauna ta. To ma haida idia laloa Iesu be Dirava bona taunimanima ese ia idia tomadiho henia be namo. Oi laloa ia ita tomadiho henia be namo, a?

3. Dahaka dainai Iesu oi diba be gau badana?

³ Gau badana be Iesu oi diba. Dahaka dainai? Badina Baibel ia gwau: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.” (Ioane 17:3) Oibe, Iehova Dirava bona Iesu Keriso ita diba neganai, unai ese ita do ia hakaua lao tanobada paradaisona ai mauri hanaihanai ita abia totona. (Ioane 14:6) Bona danu, mauri dala maorona  bona ma haida kara henia dalana dekenai, Iesu ese haheitalai namona ia hahedinaraia. (Ioane 13:​34, 35) Inai buka ena karoa ginigunana ai, Baibel ena hadibaia hereva Dirava dekenai ita herevalaia vadaeni. Namona be hari ena hadibaia hereva Iesu Keriso dekenai ita laloa.

4. Inai dagi ladadia “Mesia” bona “Keriso” edia anina be dahaka?

⁴ Iesu ia do vara lasi neganai, Baibel be ia peroveta vadaeni Dirava ese Mesia, eiava Keriso do ia siaia. Inai dagi ladana “Mesia” (Heberu herevana ta amo idia abia) bona “Keriso” (Greek herevana ta amo idia abia) edia anina be tamona, “Horoa Tauna.” Dirava ese ia gwauhamatalaia  Tauna dekenai dagi badana ia henia. Inai buka ena karoa gabedia lalonai, Dirava ena gwauhamata idauidau hagugurua totona, Mesia ese ia karaia mai anina bada gaukarana do ita dibaia. Bona hari Iesu amo ita abia hahenamona do ita dibaia danu. To, Iesu ia do vara lasi neganai, momo idia henanadai, ‘Daika be Mesia ai do ia lao?’

5. Iesu ena hahediba taudia be dahaka idia diba momokani?

⁵ Aposetolo edia negai, Nasareta tauna, Iesu, ena hahediba taudia idia diba momokani Iesu be idia perovetalaia Mesiana. (Ioane 1:41) Hahediba tauna ta, ladana Simona Petero, be Iesu ia hamaoroa: “Oi be Keriso.” (Mataio 16:16) To, unai hahediba taudia bona ita be edena bamona ita diba Iesu be idia gwauhamatalaia Mesiana?

6. Iehova ese abidadama taudia ia durua Mesia do idia dibaia dalana oi gwauraia.

⁶ Iesu ia do vara lasi neganai, Dirava ena peroveta taudia be Mesia ese do ia karaia gaudia momo idia perovetalaia. Unai ese ma haida ia durua Iesu idia dibaia namonamo totona. Inai bamona ita haheitalaia diba: Reana ta ese oi ia hamaoroa, basi eiava peleini abia gabuna dekenai do oi lao, guna oi hedavari henia lasi tauna ta be emu motuka amo oi udaia totona. Bema ta ese oi dekenai unai tauna ena toana eiava kara ia gwauraia, unai ese oi do ia durua, ani? Unai hegeregerena, Iehova be Baibel idia perovetalaia taudia amo Mesia ese do ia karaia gaudia bona ia dekenai do idia vara karadia Ia gwauraia. Unai peroveta herevadia idia guguru karana ese abidadama taudia ia durua Mesia idia dibaia totona.

7. Edena peroveta herevadia rua be Iesu dekenai idia guguru?

⁷ Inai haheitalai rua mani oi laloa. Ginigunana be, lagani 700 gunanai, peroveta tauna Mika ia gwau, gwauhamata Mesiana be Betelehema, Iuda ena taoni maragina ta dekenai do ia vara. (Mika 5:2) Iesu be edeseniai ia vara? Unai taoni dekenai! (Mataio 2:​1, 3-9) Iharuana be, lagani handred momo gunanai, Daniela 9:25 dekenai ia noho peroveta herevana ese Mesia do ia hedinarai laganina​—lagani 29 C.E. unai—​ia  hahedinaraia. * Unai peroveta herevana bona ma haida idia guguru karana ese ia hamomokania Iesu be gwauhamata Mesiana.

8, 9. Iesu ia bapatiso neganai, dahaka ese ia hamomokania ia be Mesia?

⁸ Lagani 29 C.E. ena dokonai idia vara gaudia ese idia hamomokania danu Iesu be Mesia. Unai lagani ai, Iesu be Ioane Bapatiso dekenai ia lao, Ioridane sinavai dekenai bapatiso ia abia totona. Iehova be Ioane dekenai ia gwauhamata, toa ta amo ia dekenai Mesia do ia hahedinaraia. Iesu ia bapatiso neganai, Ioane ese unai toa ia itaia. Baibel ese ia vara gauna ia gwauraia: “Iesu ia bapatisoa, vadaeni maoromaoro, ranu dekena amo ia daekau neganai, guba be ia kehoa vadaeni, bona Iesu ese Dirava ena Lauma ia itaia, pune manu bamona ia diho, ia dekenai ia helai. Bona gado ta guba dekena amo ia boiboi, ia gwau, ‘Inai be lauegu Natuna, egu lalokau, lau moale bada ia dekenai.’ ” (Mataio 3:​16, 17) Ioane ese ia vara gauna ia itaia bona kamonai murinai, ia abia dae Dirava ese Iesu ia siaia. (Ioane 1:​32-34) Unai dina ai Iesu be Dirava ena lauma, eiava gaukara siahuna ia abia neganai, ia be Mesia, eiava Keriso, Dirava ese ia abia hidi Gunalaia Tauna bona King ai ia lao.​—Isaia 55:4.

⁹ Baibel ena peroveta herevana ia guguru bona Iehova Dirava be guba amo ia hereva ese ia hahedinaraia, Iesu be gwauhamata Mesiana. To Baibel ese Iesu dekenai mai anina bada henanadai rua ia haerelaia: Ia be edeseni amo ia mai, bona ia be edena bamona tauna?

10. Baibel ia gwau Iesu be tanobada dekenai ia do mai lasi neganai, ia be edeseniai ia noho?

¹⁰ Baibel ia gwau Iesu be tanobada dekenai ia do mai lasi neganai, ia be guba dekenai ia noho. Mika ia peroveta Mesia be Betelehema dekenai do ia vara bona danu ia gwau “ena  matamana be guna negadia amo.” (Mika 5:​2, NW) Nega momo, Iesu ia gwau ia be tanobada dekenai ia do mai lasi neganai, ia be guba dekenai ia noho. (Ioane 3:13; 6:​38, 62; 17:​4, 5) Iesu be guba dekenai ia noho neganai, Iehova ida hetura karana namona ia moalelaia.

11. Baibel ese edena bamona ia hahedinaraia Iesu be Iehova ena lalokau Natuna?

¹¹ Iesu be Iehova ena lalokau Natuna​—bona badina namona dainai ia lalokau henia. Ia be “vara guna Natuna” badina ia be Dirava ese ia havaraia gauna ginigunana. * (Kolose 1:15) Gau ma ta dainai unai Natuna be ia idau. Ia be Dirava ena “Natuna tamona sibona.” (Ioane 3:16) Anina be Iehova sibona ese Iesu ia havaraia. Danu, Dirava ese gau ma haida ia havaraia neganai, Ia ese Iesu sibona ia gaukaralaia. (Kolose 1:16) Bona danu, Iesu idia gwauraia “Hereva.” (Ioane 1:14) Unai ese ita ia hadibaia ia be Dirava totona ia hereva, anina be Tamana ena natudia ma haida, lauma taudia bona taunimanima dekenai Dirava ena hereva ia gwauraia.

12. Edena bamona ita diba, vara guna Natuna be Dirava hegeregerena lasi?

¹² Haida idia laloa vara guna Natuna bona Dirava be idia hegeregere, unai be momokani, a? Baibel be unai bamona hereva ia hadibaia lasi. Paragraf 11 dekenai ita itaia bamona, Dirava ese unai Natuna ia havaraia. Momokani, ia be mai ena matamana, to Iehova Dirava be mai ena matamana lasi bona dokona lasi. (Salamo 90:2) Unai Natuna be nega ta ia laloa lasi ia ura ena Tamana ida ia hegeregere. Baibel ese ia hahedinaraia goevagoeva Tamana ese Natuna ia hereaia. (Ioane 14:28; 1 Korinto 11:3) Iehova sibona be “Siahu Ibounai Dirava.” (Genese 17:1) Unai dainai, ma ta be ia hegeregerena lasi. *

13. Baibel ia gwau Iesu be ‘ita itaia diba lasi Diravana ena toana hegeregerena,’ unai ena anina be dahaka?

 ¹³ Lagani bilioni momo lalonai, guba mai ena hisiu momo bona tanobada idia do vara lasi neganai, Iehova bona ena vara guna Natuna be idia hetura heheni namonamo. Ta ta idia lalokau henia bada! (Ioane 3:35; 14:31) Unai Natuna lalokauna be ena Tamana bamona. Unai dainai Baibel ia gwau Iesu be ‘ita itaia diba lasi Diravana ena toana hegeregerena.” (Kolose 1:15) Oibe, tanobada ai natuna ta be dala idauidau ai ena tamana ena kara ia hahedinaraia hegeregerena, unai guba Natuna ese ena Tamana ena kara ia hahedinaraia goevagoeva.

14. Edena dala ai Iehova ena Natuna tamona be taunimanima bamona ia vara?

¹⁴ Iehova ena Natuna tamona be mai ena ura ida guba ia rakatania bona ia diho mai tanobada dekenai taunimanima ta bamona ia noho totona. To reana oi laloa, ‘Edena dala amo lauma tauna ta be taunimanima ta bamona ia vara diba?’ Maria be tau ta danu ia mahuta hebou lasi bena Iesu ia havaraia. Iehova ese hoa karana ta ia karaia. Ia ese ena vara guna Natuna ena mauri be rami-hebou Iuda kekenina ladana, Maria ena bogana lalonai ia atoa. Gabeai Maria be goevadae natuna ta ia havaraia bona ena ladana ia gwauraia Iesu.​—Luka 1:​30-35.

15. Dahaka dainai ita gwau diba Iesu amo Iehova ita dibaia namonamo diba?

¹⁵ Iesu be tanobada dekenai ia noho neganai, ia gwauraia bona karaia gaudia ese ita idia durua ia ita diba namonamo totona. Unai sibona lasi, Iesu amo Iehova ita dibaia namonamo. Badina be dahaka? Mani oi laloa lou, unai Natuna ese ena Tamana ena kara ia hahedinaraia goevagoeva. Unai dainai Iesu ese ena hahediba tauna ta ia hamaoroa: “Lau ia itaia tauna ese egu Tamana danu ia itaia.” (Ioane 14:9) Baibel ena Evanelia Bukadia foa​—Mataio, Mareko, Luka bona Ioane—​ ese ita dekenai Iesu Keriso ena mauri, gaukara bona kara idia gwauraia.

16. Iesu be dahaka ia hadibaia, bona ena hadibaia herevadia be daika amo ia abia?

¹⁶ Taunimanima momo ese Iesu idia gwauraia “Hadibaia Tauna.” (Ioane 1:38; 13:13) Dahaka ia hadibaia? Ia ese “Basileia ena Sivarai Namona” ia hadibaia​—unai be Dirava ena Basileia, unai guba gavamanina ese tanobada ibounai do ia lohiaia bona kamonai taudia dekenai hahenamo momo do ia mailaia. (Mataio 4:23) Daika ena hereva ia hahedibalaia? Iesu ia gwau: “Lauegu hadibaia herevadia be lauegu lasi, to lau ia siaia Diravana ena.” (Ioane 7:16) Iesu ia diba ena Tamana ia ura taunimanima ese Basileia ena sivarai namona do idia kamonaia. Karoa 8 dekenai, Dirava ena Basileia bona do ia karaia gaudia do ita dibaia.

17. Iesu ese ena hadibaia gaukarana be edeseniai ia karaia, bona dahaka dainai unai gaukara ia goadalaia?

¹⁷ Iesu ese ena hadibaia gaukarana be edeseniai ia karaia? Taunimanima idia noho gabudia ibounai​—hanua bona taoni, maketi gabudia bona taunimanima edia ruma dekenai ia hadibadia. Iesu be ia naria lasi taunimanima be ia dekenai do idia mai totona. To idia dekenai ia lao. (Mareko 6:56; Luka 19:​5, 6) Dahaka dainai Iesu be haroro bona hahediba gaukarana ia goadalaia bona nega bada ia haorea? Badina unai amo Dirava ena ura ia karaia. Iesu be hanaihanai ena Tamana ena ura ia karaia. (Ioane 8:​28, 29) To badina ma ta dainai ia haroro. Ia itaia totona idia mai taudia ia hebogahisi henidia. (Mataio 9:​35, 36) Edia tomadiho gunalaia taudia ese idia dekenai Dirava ena sivarai momokani bona ena ura idia hadibaia be namo, to unai bamona idia karaia lasi. Iesu ia diba taunimanima ese Basileia ena sivarai idia kamonaia be namo.

18. Iesu ese ia hahedinaraia karadia lalonai, edena kara ese emu lalona ia veria?

¹⁸ Iesu ese taunimanima ia hebogahisi henia bona ia laloa bada. Unai dainai ma haida ese ia idia hereva henia diba.  Natudia danu be ia dekenai idia gari lasi. (Mareko 10:​13-16) Iesu ese taunimanima edia toana ia laloa lasi. Koikoi karadia bona kara gageva ia inai henia. (Mataio 21:​12, 13) Unai negai taunimanima momo ese hahine idia matauraia lasi bona maoro idia henia lasi gau momo idia karaia totona, to Iesu ese mai hemataurai ida ia kara henidia. (Ioane 4:​9, 27) Iesu be ia manau momokani. Nega ta, ena aposetolo taudia edia aena ia huria, nega momo unai gaukara be hesiai tauna ese ia karaia.

19. Edena haheitalai ese ia hahedinaraia Iesu ese ma haida edia dabu gaudia ia laloa?

¹⁹ Iesu ese ma haida edia dabu gaudia ia laloa. Dirava ena lauma ena siahu amo, Iesu ese hoa dalanai gorere taudia ia hanamoa neganai, unai ia hamomokania. (Mataio 14:14) Hegeregere, lepera tauna ta be Iesu dekenai ia mai bona ia gwau: “Bema oi ura, mani oi hanamoa lau.” Iesu be unai tauna ia mamia hisihisina ia mamia danu. Iesu ese unai lepera tauna ia hebogahisi henia dainai, ia dogoatao bona ia  gwau: “Lau ura. Hari oi goeva.” Vadaeni unai gorere tauna ia namo lou! (Mareko 1:​40-42) Unai tauna ena hemami oi laloa diba, a?

20, 21. Dirava kamonai henia karana dekenai, edena dala ai Iesu ese haheitalai namona ia hahedinaraia?

²⁰ Mai kamonai ida Dirava badinaia karana dekenai Iesu ese haheitalai namona ia hahedinaraia. Herevana Iesu ena noho be edena bamona bona dagedage bona hisihisi ia davaria, to ena guba Tamana ia kamonai henia. Bona Satani ena hedibagani ia dadaraia momokani. (Mataio 4:​1-11) Nega ta, Iesu ena varavara haida ese ia idia abidadama henia lasi, idia gwau ia be “ia kavakava.” (Mareko 3:21) To Iesu ese unai ia laloa lasi; Dirava ena gaukara ia karaia noho. Herevana ia idia gwau dika henia bona hahisia, to ia boga-auka bona ia idia inai henia taudia ia hadikaia lasi.​—1 Petero 2:​21-23.

 ²¹ Iesu ese Dirava ia kamonai henia ela bona ia mase​—ena inai taudia ese mai dagedage ida idia hahisia bada bena ia mase. (Filipi 2:8) Iesu ena tanobada maurina ena dina ginigabena ai, ia haheaukalaia gaudia mani ita laloa. Ia idia dogoatao, uitnesi taudia koikoidia ese idia samania, kara gageva diadi taudia ese idia kota henia, taunimanima hutuma ese idia hevasehalaia, bona tuari taudia ese idia hasatauroa. Au dekenai idia tauadae, ena hahodi ginigabena ia abia bona ia boiboi: “Ia ore vadaeni!” (Ioane 19:30) To, Iesu ia mase bena dina ihatoina ai, ena guba Tamana ese lauma maurina ai ia hatorea isi lou. (1 Petero 3:18) Wiki haida murinai, guba dekenai ia giroa lou. Unuseniai, ia be “Dirava ena idiba kahanai ia helai diho” bona ia naria king siahuna ia abia totona.​—Heberu 10:​12, 13.

22. Iesu ese Dirava ia kamonai henia ela bona ia mase, unai ese dahaka ia havaraia?

²² Iesu ese Dirava ia kamonai henia ela bona ia mase, unai ese dahaka ia havaraia? Iesu ena mase ese dala ia kehoa ita ese tanobada paradaisona ai mauri hanaihanai ita abia totona, Iehova ena ura ginigunana hegeregerena. Iesu ena mase ese unai dala ia kehoa dalana be karoa gabena dekenai do ita herevalaia.