1, 2. (a) Wetin mek we yu no pɔsin we plɛnti pipul dɛn sabi nɔ min se yu rili sabi am? (b) Udat pipul dɛn kin se Jizɔs bi?

SƆM pipul dɛn de na di wɔl we plɛnti pipul dɛn sabi. Dɛn sabi sɔm pan dɛn na dɛn eria, tɔŋ ɔ di kɔntri usay dɛn de. Ɔda pipul dɛn de we dɛn sabi ɔlsay na di wɔl. Bɔt fɔ no pɔsin in nem, nɔ min se yu sabi ɔltin bɔt am.

² Plɛnti pipul dɛn dɔn yɛri bɔt Jizɔs, pan ɔl we i dɔn pas lɛk 2,000 ia so frɔm we i bin de na di wɔl. Bɔt bɔku pipul dɛn nɔ no udat rili Jizɔs bi. Sɔm dɛn se in na gud man nɔmɔ. Ɔda wan dɛn se in na ɔdinari prɔfɛt. Dɔn, ɔda pipul dɛn se Jizɔs na Gɔd ɛn wi fɔ wɔship am. Wetin yu tink?

3. Wetin mek i impɔtant fɔ lɛ yu no di tru tin bɔt Jiova Gɔd ɛn Jizɔs Krays?

³ Wetin mek i impɔtant fɔ lɛ yu no di tru tin bɔt Jizɔs? I impɔtant bikɔs di Baybul se: “Fɔ gɛt da layf de, we go de sote go, dɛn fɔ no yu, we na di wangren tru Gɔd, ɛn dɛn fɔ no Jizɔs Krays, we yu sɛn kam to dɛn.” (Na wi mek am italiks; Jɔn 17:​3) So, we yu no di tru tin bɔt Jiova ɛn Jizɔs Krays go mek yu ɛnjɔy layf na dis wɔl sote go. (Jɔn 14:​6) Apat frɔm dat, Jizɔs bin du sɔm tin dɛn we de sho wi aw fɔ liv wi layf  ɛn aw wi fɔ trit ɔda pipul dɛn. (Jɔn 13:​34, 35) Insay chapta wan, wi bin tɔk bɔt di tru tin dɛn bɔt Gɔd. Naw, lɛ wi si wetin di Baybul tɔk bɔt Jizɔs Krays.

4. Wetin “Mɛsaya” ɛn “Krays” min?

⁴ Bifo dɛn bɔn Jizɔs, di Baybul bin dɔn tɔk bɔt di pɔsin we Gɔd go sɛn fɔ bi di Mɛsaya ɔ Krays. “Mɛsaya” na Ibru wɔd ɛn “Krays” na Grik wɔd. Dɛn tu wɔd ya min “pɔsin we Gɔd dɔn put in spirit pan.” Dis min se Gɔd dɔn pik di pɔsin fɔ du spɛshal wok fɔ am. Insay ɔda chapta dɛn na  dis buk, wi go lan mɔ bɔt di impɔtant tin dɛn we di Mɛsaya du fɔ ɛp mek wetin Gɔd want, apin. Wi go lan bak bɔt di blɛsin dɛn we Jizɔs go mek wi ɛnjɔy rayt naw. Bɔt bifo dɛn bɔn Jizɔs, bɔku pipul dɛn nɔ bin no udat go bi di Mɛsaya.

5. Wetin Jizɔs in disaypul dɛn bin rili no bɔt am?

⁵ Jizɔs in disaypul dɛn bin rili biliv se na Jizɔs na di Mɛsaya. (Jɔn 1:​41) Wan pan Jizɔs in disaypul dɛn we nem Pita bin tɛl Jizɔs se: “Yu na di Mɛsaya.” (Matyu 16:​16) Aw Jizɔs in disaypul dɛn bin ebul no se na Jizɔs na di Mɛsaya, ɛn aw wisɛf go ebul no?

6. Us ɛgzampul yu go gi fɔ sho aw Jiova dɔn ɛp pipul dɛn fɔ no udat na di Mɛsaya?

⁶ Di prɔfɛt dɛn we bin de bifo dɛn bɔn Jizɔs, bin tɔk plɛnti tin dɛn bɔt di Mɛsaya. Di tin dɛn we dɛn bin tɔk, go ɛp pipul dɛn fɔ no udat na di Mɛsaya. Fɔ ɛgzampul, if dɛn tɛl yu fɔ go tek pɔsin we yu nɔ wande sabi, na say usay bɔku pipul dɛn de, yu nɔ tink se i go fayn fɔ mek dɛn tɛl yu smɔl tin bɔt di pɔsin? Semweso, Jiova bin mek sɔm prɔfɛt dɛn rayt plɛnti tin dɛn bɔt di Mɛsaya. Dɛn rayt bɔt wetin di Mɛsaya go du ɛn wetin go apin to am. Ɔl dɛn tin ya go ɛp pipul dɛn fɔ no udat na di Mɛsaya.

7. Us tu tin dɛn sho se na Jizɔs na di Mɛsaya?

⁷ Naw, lɛ wi tɔk bɔt tu tin dɛn we go ɛp wi fɔ no udat na di Mɛsaya. Di fɔs wan bin apin lɛk 700 ia so bifo dɛn bɔn Jizɔs. Wan prɔfɛt we nem Mayka bin tɔk se dɛn go bɔn di Mɛsaya na wan smɔl tɔŋ we nem Bɛtliɛm we de na Judia. (Mayka 5:​2) Usay dɛn bɔn Jizɔs? Dɛn bɔn am na di tɔŋ usay dɛn bin se dɛn go bɔn am. (Matyu 2:​1, 3-9) Di sɛkɔn wan insɛf bin apin lɔntɛm bifo dɛn bɔn Jizɔs. Insay Daniɛl 9:​25, Daniɛl  bin sho di ia we di Mɛsaya go kam. I bin se di Mɛsaya go kam insay di ia 29. * Bikɔs Jizɔs du ɔl di tin dɛn we di Baybul bin tɔk bɔt di Mɛsaya, sho se fɔ tru na in na di Mɛsaya.

8, 9. Wetin apin di tɛm we dɛn baptayz Jizɔs, we sho se fɔ tru na in na di Mɛsaya?

⁸ Wan ɔda tin we sho se Jizɔs na di Mɛsaya, bin apin insay di ia 29. Na dis ia ya Jizɔs bin go to Jɔn na di Riva Jɔdan fɔ lɛ i baptayz am. Jiova bin tɛl Jɔn se i go sho am sayn fɔ mek i no udat na di Mɛsaya. Jɔn si da sayn de we Jizɔs bin de baptayz. Di Baybul se as “Jɔn baptayz Jizɔs so, Jizɔs kɔmɔt insay di wata. Gɔd opin di klawd mek i si, ɛn i si Gɔd in Spirit de kɔmɔt ɔp kam pan am lɛkɛ aw dɔv kin kam dɔŋ. Dɔn dɛn yɛri vɔys we kɔmɔt ɔp na ɛvin we se, ‘Dis na mi Pikin we a lɛk, a gladi fɔ am.’” (Matyu 3:​16, 17) We Jɔn si ɛn yɛri dɛn tin ya, i biliv se fɔ tru na Gɔd sɛn Jizɔs. (Jɔn 1:​32-34) As Gɔd in spirit kam pan Jizɔs so, na da tɛm de Jizɔs bi di Mɛsaya, ɛn na da sem tɛm de Gɔd pik am fɔ bi Kiŋ ɛn Lida.—Ayzaya 55:​4.

⁹ Na tu tin dɛn sho se na Jizɔs na di Mɛsaya. Wan, na we di tin dɛn we di Baybul tɔk, bin apin. Tu, na di tin we Gɔd insɛf bin tɔk di tɛm we Jizɔs bin baptayz. Bɔt di Baybul ansa tu ɔda impɔtant kwɛstyɔn dɛn bɔt Jizɔs Krays. Usay i kɔmɔt ɛn uskayn pɔsin i bi?

10. Usay Jizɔs bin de bifo i kam na di wɔl?

¹⁰ Di Baybul se Jizɔs bin de na ɛvin bifo i kam na di wɔl. Di prɔfɛt Mayka bin tɔk se dɛn go bɔn di Mɛsaya na Bɛtliɛm. Ɛn i tɔk bak se, Jizɔs bin dɔn de lɔntɛm  bifo Gɔd mek di wɔl. (Mayka 5:​2, NW) Bɔku tɛm, Jizɔs insɛf bin de tɔk se i bin dɔn de na ɛvin bifo i kam na di wɔl. (Rid Jɔn 3:​13; 6:​38, 62; 17:​4, 5) We Jizɔs na bin spirit na ɛvin, in na bin spɛshal pɔsin to Jiova.

11. Aw di Baybul sho se Jizɔs spɛshal to Gɔd?

¹¹ Jizɔs na spɛshal pɔsin to Jiova. Gud rizin de we mek i spɛshal. Di Baybul se “nain fɔs bin de bifo Gɔd mek ɛnitin we de na di wɔl.” Na in na Gɔd in fɔs Pikin. * (Lɛta Fɔ Kɔlɔse 1:​15) Bɔt ɔda tin de we mek Jizɔs spɛshal. In na Gɔd in “wangren Pikin.” (Jɔn 3:​16) Dis min se na Gɔd in wangren mek Jizɔs. Na Jizɔs nɔmɔ Gɔd bin yuz fɔ mek ɔl di ɔda tin dɛn. (Lɛta Fɔ Kɔlɔse 1:​16) Di Baybul kɔl Jizɔs bak “di Wɔd.” (Jɔn 1:​14) Dis min se na in Gɔd bin de yuz fɔ tɔk fɔ am. Na in Gɔd bin de gi mɛsej fɔ tɛl di enjɛl dɛn ɛn mɔtalman.

12. Aw wi no se Jiova ɛn Jizɔs nɔ ikwal?

¹² Sɔm pipul dɛn tink se Jizɔs ɛn Gɔd ikwal. Wetin yu tink? Di Baybul nɔ ɛva tɔk se Jizɔs ɛn Gɔd ikwal. Wi jɔs dɔn lan se na Gɔd mek Jizɔs. So, Jizɔs gɛt biginin, bɔt Jiova nɔ gɛt biginin ɛn i nɔ gɛt ɛndin. (Sam 90:​2) Jizɔs nɔ bin ɛva fil se in ɛn Gɔd ikwal. Di Baybul tɛl wi klia wan se Jizɔs ɛn Gɔd nɔ ikwal. (Rid Jɔn 14:​28; Fɔs Lɛta Fɔ Kɔrint 11:​3) Na Jiova nɔmɔ na “GƆD Ɔlmayti”. (Jɛnɛsis 17:​1) So in ɛn nɔbɔdi nɔ ikwal. *

13. Wetin di Baybul min we i se Jizɔs ‘na in mek wi no aw Gɔd tan’?

 ¹³ Jiova ɛn Jizɔs bin dɔn de togɛda na ɛvin fɔ lɔntɛm, ivin bifo Gɔd mek di wɔl. Dɛn go mɔs dɔn lɛk dɛnsɛf bad. (Jɔn 3:​35; 14:​31) Jizɔs rili fiba in Papa. Na dat mek di Baybul se: “Krays we pipul dɔn si, nain mek wi no aw Gɔd, we wi nɔ de si, tan.” (Lɛta Fɔ Kɔlɔse 1:​15) Jɔs lɛk aw pikin kin gɛt in papa in kwaliti dɛn, na so Jizɔs gɛt plɛnti pan Jiova in kwaliti dɛn.

14. Aw Jizɔs bin ebul kam na di wɔl as mɔtalman?

¹⁴ Jizɔs bin kɔmɔt na ɛvin ɛn kam de na di wɔl as mɔtalman. Bɔt aw dɛn go ebul bɔn pɔsin we na spirit as mɔtalman? Na mirekul Jiova bin du fɔ mek dis apin. I tek di layf we in Pikin bin gɛt na ɛvin ɛn put am insay wan vajin we nem Meri, in bɛlɛ. Nɔto ɛni man bin mek Meri gɛt bɛlɛ. So di pikin we Meri bɔn nɔ bin gɛt wan sin ɛn i gi am di nem Jizɔs.—Lyuk 1:​30-35.

15. Wetin mek wi se Jizɔs dɔn mek wi no mɔ bɔt Jiova?

¹⁵ Di tin dɛn we Jizɔs tɔk ɛn du we i bin de na di wɔl ɛp wi fɔ no uskayn pɔsin i bi. Apat frɔm dat, Jizɔs dɔn ɛp wi fɔ no mɔ bɔt Jiova. Wetin mek wi se so? Na bikɔs Jizɔs gɛt di kwaliti dɛn we in Papa gɛt. Na dat mek Jizɔs tɛl wan pan in disaypul dɛn se: “Ɛnibɔdi we dɔn si mi, dɔn si mi Papa.” (Jɔn 14:​9) Di Baybul buk dɛn we nem Matyu, Mak, Lyuk, ɛn Jɔn tɛl wi bɔt di tin dɛn we Jizɔs du, ɛn di kwaliti dɛn we i gɛt.

16. Wetin na di men tin we Jizɔs bin de tich? Na udat bin de tɛl am wetin fɔ tich?

¹⁶ Plɛnti pipul dɛn bin de kɔl Jizɔs “Ticha.” (Jɔn 1:​38; 13:​13) Wetin i bin de tich? Di men tin we  Jizɔs bin de tich na “di Gud Nyuz bɔt di tɛm we Gɔd de kam rul.” Gɔd go yuz in Kiŋdɔm we go de na ɛvin fɔ rul di ol wɔl. Ɛn i go mek ɔl di wan dɛn we de du wetin i want, gɛt plɛnti blɛsin. (Matyu 4:​23) Na udat bin de tɛl Jizɔs wetin fɔ tich? Jizɔs insɛf tɔk se: “Nɔto mi yon sɛns a de tek lan una, bɔt na Gɔd we sɛn mi tɛl mi wetin a fɔ lan una.” (Jɔn 7:​16) Jizɔs bin no se in Papa want mek ɔlman yɛri di gud nyus bɔt Gɔd in Kiŋdɔm. Insay Chapta 8, wi go lan mɔ bɔt Gɔd in Kiŋdɔm ɛn wetin i go du fɔ wi.

17. Usay Jizɔs bin de tich? Wetin mek i bin de tich pipul dɛn?

¹⁷ Usay Jizɔs bin de tich? Jizɔs bin de tich pipul dɛn ɛnisay we i mit dɛn. I bin de prich to pipul dɛn na tɔŋ, na vilej, na makit ɛn na dɛn os dɛn. Jizɔs nɔ bin de wet fɔ lɛ pipul dɛn kam to am, na in bin de go mit dɛn. (Mak 6:​56; Lyuk 19:​5, 6) Wetin mek Jizɔs bin de du ɔl dis? Ɛn wetin mek i bin de spɛn plɛnti tɛm fɔ tich pipul dɛn? I bin de du dis bikɔs i no se na dat Gɔd want. (Jɔn 8:​28, 29) Bɔt ɔda rizin bin de we mek Jizɔs bin de prich. I bin de fil sɔri fɔ di pipul dɛn we bin de kam to am. (Rid Matyu 9:​35, 36.) Di bigman dɛn pan Gɔd biznɛs nɔ bin bisin bɔt di pipul dɛn. Dɛn nɔ bin de tich di pipul dɛn di tru tin bɔt Gɔd. Bɔt Jizɔs bin no se i impɔtant fɔ lɛ pipul dɛn yɛri di gud nyus bɔt Gɔd in Kiŋdɔm.

18. Us kwaliti dɛn Jizɔs gɛt we yu lɛk mɔ?

¹⁸ Jizɔs bin lɛk pipul dɛn ɛn i bin bisin bɔt dɛn. Pipul dɛn nɔ bin de fred fɔ go nia am. Smɔl pikin dɛnsɛf bin de go to Jizɔs. (Mak 10:​13-16) Jizɔs nɔ bin de tek wan pɔsin impɔtant pas ɔda pɔsin. I et we pipul dɛn nɔ de du wetin rayt. (Matyu 21:​12, 13) Insay Jizɔs in tɛm, plɛnti pipul dɛn nɔ bin de  rɛspɛkt uman dɛn, ɛn uman dɛn nɔ bin gɛt wan rayt. Bɔt Jizɔs bin rɛspɛkt dɛn. (Jɔn 4:​9, 27) Jizɔs nɔ bin prawd. Wan tɛm, i was ɔl in disaypul dɛn fut. Na savant dɛn bin de du da kayn wok de.

19. Wetin sho se Jizɔs bin de sɔri fɔ pipul dɛn?

¹⁹ Jizɔs bin de sɔri fɔ pipul dɛn ɛn i bin rɛdi fɔ ɛp dɛn. Na dat mek i bin de yuz di pawa we Gɔd gi am fɔ du mirekul dɛn. (Matyu 14:​14) Fɔ ɛgzampul, wan man we bin gɛt wan bad sik we dɛn kɔl lɛprɔsi, bin kam mit Jizɔs ɛn tɛl am se: “If yu gri fɔ mɛn mi, yu ebul mɛn mi ɛn mek a klin.” Jizɔs fil sɔri fɔ di man. So, i tɔch di man ɛn tɛl am se: “A want mɛn yu, wɛl naw!” Ɛn wantɛm wantɛm di man wɛl. (Mak 1:​40-42) Jɔs tink bɔt aw dat go dɔn mek di man fil!

20, 21. Aw Jizɔs sho wi aw fɔ obe Gɔd?

²⁰ Jizɔs bin sho wi aw fɔ du wetin Gɔd want. Pan ɔl we plɛnti bad bad tin dɛn bin de mit am, i bin stil de du wetin Gɔd want. Setan bin de du difrɛn difrɛn tin dɛn fɔ tray Jizɔs, bɔt Jizɔs nɔ ɛva du wetin Setan want. (Matyu 4:​1-11) Wan tɛm, sɔm pan Jizɔs in fambul dɛn nɔ bin biliv am ɛn dɛn bin ivin tɛl am se, “i de mek lɛkɛ se in ed nɔ de.” (Mak 3:​21) Bɔt dis nɔ mek Jizɔs in at pwɛl, i kɔntinyu fɔ du Gɔd in wok. I bin kɔntrol insɛf pan ɔl we dɛn bin de du am bad bad tin dɛn. I nɔ bin ɛva tray fɔ du bad to di wan dɛn we bin de du am bad.—Pita In Fɔs Lɛta 2:​21-23.

²¹ Jizɔs du wetin Jiova want te i day. In ɛnimi dɛn  mek i sɔfa fɔs bifo i day. (Rid Lɛta Fɔ Filipay 2:​8.) Lɛ wi tɔk bɔt di tin dɛn we bin apin to Jizɔs di de we i day. Dɛn ol am, kɔl pipul dɛn fɔ kam lay pan am, jɔj dɛn we nɔ de tɔk tru, se mek dɛn kil am, pipul dɛn laf am, ɛn sojaman dɛn du am bad bad tin dɛn. Dɔn, dɛn nel am pan stik. Bifo i day, i ala lawd wan se: “A dɔn dɔn mi wok!” (Jɔn 19:​30) Bɔt afta tri dez we Jizɔs day, in Papa gi am layf bak. (Pita In Fɔs Lɛta 3:​18) Afta lɛk fɔti dez so, i go bak na ɛvin. We i go de, “i go sidɔm na Gɔd in raytan” ɛn wet te i bi kiŋ.—Di Ibru Pipul Dɛn 10:​12, 13.

22. Wetin Jizɔs in day du fɔ wi?

²² Wetin Jizɔs in day du fɔ wi? Jizɔs in day gi wi di chans fɔ gɛt layf we go de sote go na Paradays. Na dat Gɔd bin want fɔ mɔtalman frɔm di biginin. Bɔt aw ɔl dis go bi? Na dat wi go tɔk bɔt na di nɛks chapta.