1, 2. 1) Se kikakis maj ika motajto se aksa tein kitelixmatij, ¿keyej taman maj tejuan se kiyekixmati? 2) ¿Toni kinemiliaj miakej ke katka Jesús?

NIKAN moajsij miakej taltikpakneminij akin kintelixmatij. Sekin kuali kinixmatij itech ininxolal, ininaltepeuj uan oksekin semanauak taltikpak. Sayoj ke komo tejuatsin tikonmati itokay se aksa tein kitelixmatij, amo kijtosneki ke tikonyekixmati, tein kijtosneki, amo tikonmati nochi tein kichiuak oso keniuj yekmelauj moixmati nejon taltikpaknenkej.

² Maski Jesucristo nemik nikan taltikpak panouaya ome mil xiuit, noyampa ika motajtoua. Sayoj ke, mopojpolouaj uan amo kimatij akoni yekmelauj katka. Sekin kijtouaj ke sayoj katka se takat yolkuali. Oksekin kinemiliaj ke sayoj katka se tanauatijkej. Uan oksekin kinemiliaj ke Jesús yejua Dios uan moneki tikueyichiuaskej. ¿Melauj tein kijtouaj?

3. ¿Keyej semi moneki xikonixmati Jiova Dios uan Jesús?

³ Semi moneki xikonmati akoni yekmelauj katka Jesús. ¿Keyej? Porin Biblia kijtoua: “Nachipa nemilis kijtosneki yejua nijin: [...] Ma mitsonixmatikan Tejuatsin ke tion Dios tion Yolmelauaktsin, uan sayo Tejuatsin tion Dios. Uan [...] ma nechixmatikan Nejuatsin ke ni  Jesucristo ten Tejuatsin tinechonualtitanik ya nikan taltikpak” (Juan 17:3). Kemaj, tikonyekixmatis Jiova Dios uan Jesucristo uelis mitsonuikas xionnemi nochipaya itech se xochital nikan taltikpak (Juan 14:6). Uan no, Jesús techkauilij okachi kuali neskayot keniuj moneki tinemiskej, uan keniuj timouikaskej iniuan oksekin (Juan 13:34, 35). Itech iyekinika capítulo nejin amaix, tikitakej keniuj yekmelauj moixmati Dios. Axkan maj tikitakan akoni yekmelauj katka Jesucristo kemej tamachtia Biblia.

4. ¿Toni kijtosneki tajtolmej Mesías uan Cristo?

⁴ Miak xiujmej achtopa keman Jesús yoliskia,  Biblia achtook kijtojka ke ejkoskia akin Dios kititaniskia, akin itokay Mesías oso Cristo. Tajtol Mesías (tein uitse itech tajtol hebreo) uan Cristo (tein uitse itech tajtol griego) kijtosneki “Taixpejpenal”. Yejua ika Dios kiixpejpenaskia akin kititaniskia maj kichiuani se teisa tein motelneki. Itech okseki capítulos tein kipia nejin amaix, okachi tikyekitaskej tein kichiuak Mesías uan kichiuatiok tein motelneki, uan ijkon uelis mochiuas tein Dios motenkaujtok. No tikitaskej ke Jesús uelis techtatiochiuis axkan. Amo tiomeyolouaj ke achtopa keman Jesús yoliskia, miakej motajtaniayaj: “¿Akoni yeski Mesías?”.

5. ¿Toni senkis kineltokayaj imomachtijkauan Jesús?

⁵ Ne uejkauj, imomachtijkauan Jesús akin kayot katka Nazaret, senkis kineltokayaj ke yejua katka Mesías akin moijtojka ualaskia (Juan 1:41). Semej, akin itokay Simón Pedro, kiyekiluij: “Tejuatsin tion Cristo” (Mateo 16:16). Axkan, ¿keyej senkis kineltokayaj imomachtijkauan Jesús, ke yejua yekmelauj katka Mesías akin moijtojka ualaskia? ¿Uan keyej axkan uelis senkis tikneltokaskej?

6. ¿Toni neskayot techpaleuia maj tikajsikamatikan, keniuj Jiova kinpaleuij akin yolmelaujkej maj kiixmatinij Mesías?

⁶ Itanauatijkauan Dios akin nenkej achtopa keman Jesús nemiskia, achtook kijtojkej miak taman tein kinpaleuiskia akin yolmelaujkej maj kiixmatinij Mesías. Maj tiktalikan se neskayot: maj tikijtokan ke tejuatsin moneki tikonchiatiuj aksa akin amo tikonixmati kampa ejkoj autobuses. ¿Melauj ke mitsonpaleuiskia maj mitsoniluikan keniuj tamati? No ijkon, Jiova inintenkopa itanauatijkauan tein kijkuilojkej Biblia, kijtoj nochi taman tein kichiuaskia Mesías uan tein kipanoskia. Ijkon, akin yolmelaujkej ueliskiaj kiixmatiskiaj uan  amo omeyolouaskiaj nion tepitsin, keman kiitaskiaj mochiujtokya tein achtook moijtojka.

7. Xikonijto ome taman tein achtook moijtojka tein itech mochiuak Jesús.

⁷ Maj tikitakan ome neskayomej. Yekinika yejua nejin: panoua 700 xiujmej achtopa keman mochiuaskia, tanauatijkej Miqueas achtook kijtojka ke akin Dios kititaniskia yoliskia Belén, se altepekonet tein pouia Judá (Miqueas 5:2). Uan ¿kani yolik Jesús? Ompa kampa moijtojka (Mateo 2:1, 3-9). Ojpatika neskayot tikajsij itech Daniel 9:25. Ika nejin, miak ciento xiujmej achto, ueliskiaj kiixejekoskiaj itech toni xiuit monextiskia Mesías: itech xiuit 29. * Ika nejin tajtolmej tein mochiuak uan oksekiok, kinextia ke Jesús katka Mesías akin moijtojka ualaskia.

8, 9. Keman moauij Jesús, ¿keniuj okachi moyekitak ke yejua katka Mesías?

⁸ Itamian xiuit 29 okachi moitak ke Jesús katka Mesías. Itech nejon xiuit, Jesús kiluij Juan Taauijkej maj kiauiani itech ueyiat Jordán. Jiova motenkaujka ke kimakaskia Juan se neskayot, uan ika nejon kimatiskia akoni yeskia Mesías, uan ijkon mochiuak keman kiauij Jesús. Biblia kijtoua: “Nikitak in Yektikatsin Espíritu kuak [...] ual pantemouaya de ne eluiyaktsinko ijkon keme ual temoa se tototsin paloma. Uan no nikitak ke kalakito itech ne Jesús. [...] Ika ya nojon namechtapouij de ke Jesús yejua ya nijin Tekonetsin de Dios” (Juan 1:32-34; Mateo 3:16, 17). Keman Juan kiitak nejon, amo omeyolouak ke Jesús katka akin Dios kiualtitanik. Nejon tonal, keman Dios kititanilij Jesús yektikatsin espíritu, oso ichikaualis tein tekititok, mochiuak  Mesías oso Cristo, akin Dios kiixpejpenak maj mochiua Tayekankej uan Tekiuaj (Isaías 55:4).

⁹ Keman mochiuak tein achtook kijtojka Biblia uan neskayot tein Jiova kitemakak, moyekitak ke Jesús katka Mesías tein moijtojka ualaskia. Uan no, Biblia kinankilia okseki ome netajtanilmej tein motelneki kampa kimelaua akoni yekmelauj katka Jesucristo. Netajtanilmej yejua nejin: kani ualeuak uan keniuj katka.

10. ¿Toni tamachtia Biblia ika inemilis Jesús achtopa keman ualaskia nikan taltikpak?

¹⁰ Biblia tamachtia ke Jesús nemik ne iluikak achtopa keman ualaskia nikan taltikpak. Se neskayot, tanauatijkej Miqueas amo sayoj kijtojka ke Mesías yoliskia Belén, ta no kijtoj ke “uejkauj kayot” katka (Miqueas 5:2). Uan no, yejua Jesús miakpa kijtoj ke achtopa keman yoliskia kemej takat, nemia ne iluikak (xikonixtajtolti Juan 3:13; 6:38, 62; 17:4, 5). Ompa nemia kemej se espíritu tein tel kualtsin mouikaya iuan Jiova kemej amo akin ueli ijkon kichiua.

11. ¿Keniuj kinextia Biblia ke Jesús yejua teKoneuj akin Jiova okachi kitasojta?

¹¹ Moajsi miak taman keyej Jesús yejua tekoneuj akin Jiova okachi kitasojta. Biblia kijtoua ke “Cristo ipa yetinemi ya achtopa ke mochiuaskia nochi ten ongak”, tein kijtosneki, Dios yekinika yejua kichijchiuak (Colosenses 1:17). * Uan moajsi okse taman: yejua ‘Iyoj Konetsin’ (Juan 3:16). Nejin kijtosneki ke sayoj yejua akin Dios kichijchiuak iselti. Uan no sayoj Jesús kipaleuij  Jiova keman kichijchiuak nochi tein onkak (Colosenses 1:16). No kitokaytiaj “Tajtoltsin” (Juan 1:14). Nejin technextilia ke yejua tajtouaya itokaykopa Dios. Amo tiomeyolouaj ke Jesús kinmakaya tanauatilmej uan kiniluiaya keniuj maj kichiuakan teisa oksekin ikoneuan Dios, ijkon kemej ángeles uan kemej taltikpakneminij.

12. ¿Toni neskayomej tikpiaj ke Dios uan itayekankaKonetsin amo mochiuaj sayoj se?

¹² Dios uan itayekankaKonetsin, ¿sayoj se kemej miakej kinemiliaj? Nejon amo yejua tein Biblia tamachtia. Kemej tikitakejya, teKoneuj kichijchiujkej. Yejua ika, kemej tikmatij, kipiak ipeujyan, uan Jiova amo kipia ipeujyan nion no itamilis (Salmo 90:2). Iyoj Konetsin Dios amo keman kinemilij mochiuas kemej yejuatsin. Biblia kiyeknextia ke Dios okachi ueyichiujkej, amo ijkon teKoneuj (xikonixtajtolti Juan 14:28; 1 Corintios 11:3). Sayoj Jiova yejuatsin ‘Dios tein kipia nochi uelilis’ (Apocalipsis 15:3). Yejua ika amo akin kemej yejuatsin. *

13. ¿Toni kijtosneki Biblia keman kijtoua ke teKoneuj “tamati ijkon keme Totajtsin Dios tamati”?

¹³ Jiova uan itayekankaKonetsin tel kualtsin mouikakej, miak, tel miak millones xiujmej, achtopa keman mochijchiuaskia sitalimej uan taltikpak. ¡Tel ueyi netasojtalis mopialijkej! (Juan 3:35; 14:31.) Nejin itasojKonetsin Dios tamatia kemej yejuatsin. Yejua ika Biblia kijtoua ke Jesús “tamati ijkon keme Totajtsin Dios tamati” (Hebreos 1:3). Kemaj, ijkon kemej tekoneuan tamatij kemej tepopaj itech miak taman, nejin teKoneuj akin nemi iluikak no kinextij ikualneskayouan Dios.

14. ¿Keniuj yolik kemej takat iyoj Konetsin Jiova?

 ¹⁴ Iyoj Konetsin Jiova kikauak iluikak ika miak pakilis, uan ualaj nikan taltikpak kemej takat. Sayoj ke xa tionmotajtania: “¿Keniuj uelik se espíritu nemik kemej se taltikpaknenkej?”. Jiova kichiuak se mouiskatekit. Kikuik inemilis itayekankaKonetsin tein moajsia iluikak, uan kipanoltij iijtik se siuapil tein amo kiixmatia takat. Nejin siuapil katka judía uan motokaytij María. Kemej konet amo kipiak se ipopaj taltikpaknenkej, yejua ika amo tajtakolej katka. Nejon konet kitokaytij Jesús (Lucas 1:30-35).

15. ¿Keniuj okachi kuali uelis tikixmatiskej Jiova itechkopa Jesús?

¹⁵ Nochi tein Jesús kijtoj uan kichiuak keman moajsia nikan taltikpak techpaleuia maj kuali tikixmatikan. Uan okse tamanok, itechkopa Jesús techpaleuia maj okachi kuali tikixmatikan Jiova. ¿Keniuj? Xikonelnamiki, teKoneuj tamati kemej Dios tamati. Yejua ika kiluij semej imomachtijkauan: “Ijkon keme Nejuatsin tinechitstinemi, no ijkon Totajtsin Dios tikitstinemi” (Juan 14:9). Itech iamaixuan Biblia tein moixmatij kemej Evangelios, Mateo, Marcos, Lucas uan Juan, tikajsij miak nemachtil kampa techiluia keniuj katka inemilis Jesucristo, itachiualis uan ikualneskayouan.

16. ¿Toni okachi ika tajtouaya Jesús, uan akoni itech ualeuaya itamachtilis?

¹⁶ Jesús kitokaytiayaj “Tamachtijke” (Juan 1:38; 13:13). ¿Toni ika tamachtiaya? Okachi kitetapouij “kuali Tajtoltsin” oso kuali tanauatilmej tein kichiuati iTekiuajyo Dios. Nejin iluikak tekiuajyot, tekiuajtis ipan taltikpak uan kinteltatiochiuis akin amo kikauaj Dios (Marcos 16:15). ¿Akoni itech ualeuaya nejin tamachtilis? Jesús kijtoj: “Notanextililisuan amo ualeuak de  nejua notanemililis san. Ta, ualeujtok de Notajtsin Dios ten nechualtitanik”, tein kijtosneki Jiova (Juan 7:16). Jesús kimatia ke Dios kinekia maj taltikpakneminij kimatinij kuali tanauatilmej tein kichiuati iTekiuajyo Dios. Itech capítulo 8 okachi ika titajtoskej nejin tekiuajyot uan tein kichiuas.

17. ¿Kani tamachtiaya Jesús, uan keyej motelyolchikauak kichiuas nejon?

¹⁷ ¿Kani tamachtiaya Jesús? Noyampa kampa moajsiaj taltikpakneminij: kemej kampa tatokayaj, itech altepemej, itech xolalmej, tanamakaloyan uan kajkalpan. Jesús amo mochiaya maj kitemouanij, ta yejua kintemouaya (Marcos 6:56; Lucas 19:5, 6). ¿Keyej senkis motemakak uan moyolchikauak tanojnotsas uan tamachtis? Porin yejua katka itanejnekilis Dios, uan Jesús nochipa yejua kichiuak (Juan 8:28, 29). Uan no, onkaya okse taman tein kioliniaya, yejua kinikneliaya  akin kitemouayaj tein katkaj tel miakej (xikonixtajtolti Mateo 9:35, 36). Tayekananij itech taneltokalis monekia kinmachtiskej tein kijtoua Dios uan itanejnekilis, sayoj ke amo yejua kichiuayaj. Uan no, Jesús kimatia ke motelnekia kikakiskej tanauatilmej tein kichiuati iTekiuajyo Dios.

18. ¿Toni kualneskayomej tein kipiak Jesús okachi tikonuelita?

¹⁸ Jesús katka tetasojtakej uan teiknelijkej. Nochin kualtsin kinseliaya, uan konemej no kiuelitayaj yetoskej iuan (Marcos 10:13-16). Amo kinchichikotasojtaya. Kitauelitaya tachtekilis uan komo teisa amo mochiuaya ika melaujkayot (Mateo 21:12, 13). Itech xiujmej keman amo semi kinpoujkaitayaj siuamej nion no kinajsikamatiaj, yejua kinpoujkaitak (Juan 4:9, 27). Jesús yekmelauj amo moueyimatia. Se tonal kinmetspajpakak tatitanilmej, se tekit tein sayoj kichiuayaj takeualmej akin amo katkaj ueyichiuanimej.

19. ¿Toni neskayot kinextia ke Jesús kinikneliaya akin tajyouiayaj?

 ¹⁹ Jesús kinikneliaya akin tajyouiayaj. Nejin okachi kinextiaya keman tapajtiaya ika ichikaualis iespíritu Dios (Mateo 14:14). Se neskayot, se takat akin kipiaya kokolispalanilis kitemoto Jesús uan kiluij: “Ta komo tikonekiskia, tionuelis tinechonchipauas de nijin pitsotik kokolis”. Jesús kiyolmachilij tajyouilis tein kipanotoya nejon takat. Kemej kiiknelij, momamelauak, kimatokak uan kiluij: “Nikneki ma tejua xichipaua de mokokolis”. ¡Uan kokoxkej pajtik! (Marcos 1:40-42.) ¿Tionmonemilia tejuatsin keniuj momachilij nejon takat?

20, 21. ¿Keyej uelis tikijtoskej ke Jesús techkauilij okachi kuali neskayot, keniuj tiktakamatiskej Dios uan amo keman tikauaskej?

²⁰ Jesús techkauilij okachi kuali neskayot keniuj tiktakamatiskej Dios uan amo keman tikauaskej. Yejua amo keman kikauak Dios akin nemi iluikak, maski kipanok tataman taixnamikilis uan tajyouilis. Senkis kiixtopeuak tein Satanás kimakasnekia (Mateo 4:1-11). Itech seki tonalmej, nion no ichankauan kineltokakej. Uan no kijtouilijkej ke “amo yek talnamikia ok” (Marcos 3:21). Sayoj ke Jesús amo motsinkixtij, ta kisentokak kichiuak itekiyo Dios. Keman taixnamikinij kiuijuikaltijkej uan kichiuilijkej tein amo kuali, nochipa kimatik moxikos uan amo kitemoj keniuj momakepas (1 Pedro 2:21-23).

²¹ Jesús amo keman kikauak Dios nion no itamiampa inemilis, maski taixnamikinij kiteltajyouiltijkej uan kimiktijkej (xikonixtajtolti Filipenses 2:8, TNM). Xionmonemili tein kixikoj itamiampa inemilis kemej takat. Kixikoj maj tekiuanij kikitskianij, maj takamej kitakajkayauilianij, maj tamelauanij tel amo yolkualmej  kiluianij ke kinamikia mikilis, maj taltikpakneminij kikejkelouanij, uan maj tajpianij kiteltajyouiltianij. Ijkuak pilkatoya itech kouit, keman yaya ijyotamiti, kijtoj chikauak: “Nochi notekiuan niktamichiuak ya axkan” (Juan 19:30, Hechos 5:30). Eyi tonal satepan, Dios akin nemi iluikak kiajokuik kemej se espíritu (1 Pedro 3:18). Ome poual tonal satepan oksepa yajki iluikak, uan ompa “motalito iyekmakopaka Itajtsin” kampa kichiato tanauatil kemej Tekiuaj (Hebreos 10:12, 13).

22. Kemej Jesús amo keman kikauak Dios nion no itamiampa inemilis, ¿toni kichiuak ika nejon?

²² Kemej tikitaj, Jesús amo keman kikauak Dios nion no itamiampa inemilis. Axkan ¿toni kichiuak ika nejon? Ika imikilis kichiuak maj tejuan tiuelikan tinemikan itech se xochital nikan taltikpak, ijkon kemej Jiova kiixtalijka yekinika. Itech okse capítulo tikitaskej keniuj kichiua imikilis Jesús maj nejin nechialis yekmelauj mochiua.