1, 2. a) ¿Tleka xnoijki, tiktekakilis itech se akin melak noteneua niman kuajli tikixmatis? b) ¿Kenon tlamantik noso sejneka noneltoka itech Jesús?

IPAN tlaltikpaktli nemij tlaltikpakchanejkej akin miyekej melak kinteneuaj. Sekimej melak kinteneuaj kampa chantij, ipan inpaís niman oksekimej ipan nochiuiyan tlaltikpaktli. San ika, maski tejua tikmatstika kenon itoka yejuin akin miyekej melak kiteneuaj, xkijtosneki ika tikixmatstika, noso ika tikmati nochi tlen yejua yokichiuj niman kenon yemelak nouika.

² Maski yopanok kanaj ome mil xiuitl ijkuak Jesucristo onen ipan tlaltikpaktli, nochiuiyan noteneua. San ika, tlamantik noso sejneka tlen noijtoua itech yejua. Sekimej kijtouaj ika katka se tlakatl yolkuajli. Oksekimej kinemiliaj ika san se teotlajtoketl katka. Niman nemij akin kineltokaj ika Jesús yejua toTajtsin niman noneki tikueyichiuaskej. ¿Yejuin yemelak?

3. ¿Tleka melak noneki xkixmati tlen melauak itech toTajtsin Jehová niman Jesús?

³ Melak noneki xkixmati tlen melauak itech Jesús. ¿Tleka? Pampa Biblia kijtoua: “Niman ijkuak se mitsixmati tejua yejuan san moselti melauak tiDios, niman nejua niJesucristo yejuan otinechajtitlan, yejua kipia on nemilistli yejuan para nochipa” (Juan 17:3). Kema, yemelak tikixmatis toTajtsin Jehová niman Jesucristo, uelis kichiuas  xnemi ipan se xochitlalpan nochipa (Juan 14:6). Noijki, Jesús kuajli otechititi kenon touikaskej niman kenon titetlasojtlaskej (Juan 13:34, 35). Ipan kachtopa capítulo itech yejuin amoxtli otikitakej tlen melauak itech toTajtsin. Aman matikitakan tlen temachtia Biblia itech Jesucristo.

4. ¿Tlenon kijtosneki Mesías niman Cristo?

⁴ Ijkuak Jesús xiuajtlakatiya, Biblia okijto kemanon yejkoskia akin toTajtsin kuajtitlaniskia, akin noixmati ken Mesías noso Cristo. Mesías (tlen ualeua itech  tlajtojli hebreo) niman Cristo (tlen ualeua itech tlajtojli griego) kijtosneki “Tlapejpenijli”. Kuakon, akin yonoijtoka uajlaskia yeskia tlapejpenijli, kijtosneki akin toTajtsin kitlaliskia makichiua se kualtsin tekitl. Ipan okseki capítulos itech yejuin amoxtli kuajli tomachtiskej ika Mesías kipiya se ueyi tekitl itech tlen toTajtsin yokijto kichiuas. Noijki tikitaskej ika Jesús uelis techteochiuas ipan yejuin tonaltin. Kanaj ijkuak Jesús xiuajtlakatiya, tlaltikpakchanejkej notlajtoltiayaj: “¿Akinon yes Mesías?”.

5. ¿Itech tlenon kuajli kimatstoyaj inomachtijkauan Jesús?

⁵ Inomachtijkauan Jesús kuajli okixmatkej ika yejua katka Mesías akin yonoijtoka uajlaskia (Juan 1:41). Se akin itoka, Simón Pedro, xokpa okinemili ijkuak okijli: “Tejua tiCristo” (Mateo 16:16). Aman, ¿tleka kuajli kimatstoyaj inomachtijkauan Jesús, ika melauak yejua katka Mesías akin yonoijtoka uajlaskia? Niman tejuamej, ¿kenon tikmatstokej ika kema yejua katka Mesías?

6. ¿Tlenon uelis techpaleuis niman ijkon tikasikamatiskej kenon Jehová okinpaleui akin yolmelaujkej, makimatikan akinon yeskia Mesías?

⁶ Iteotlajtokauan toTajtsin akin onenkej ijkuak Jesús xiuajtlakatiya, okijtokej miyek tlemach tlen ueliskia kinpaleuiskia kimatiskej akinon yeskia Mesías. Matiknemilikan yejuin: xnemili ika noneki tias tikontejtemos se akin xtikixmati kampa tojlan tlanemakalo. ¿Xmelak ika mitspaleuiskia tla mitsijliaj kenon tlachia akin tias tikontejtemos? Noijki ijkon, ika teotlajtokej, Jehová kuajli okijto tlenon kichiuaskia Mesías niman tlenon ipan nochiuaskia. Ika yejuin, tlaltikpakchanejkej akin yolmelaujkej ueliskiaj kimatiskiaj akinon yeskia, ijkuak nochiuaskia nochi yejuin tlen yonoijtoka itech yejua.

7. Xkijto ome teotlajtoltin tlen onochiujkej itech Jesús.

⁷ Matikitakan ome neskayotl. Kachtopa: ipantsin setecientos xiuitl ika tlakuitlapan, teotlajtoketl Miqueas okijto ika akin yonoijtoka uajlaskia tlakatiskia Belén, se pitentsin kalpan tlen nokaua itech Judá (Miqueas 5:2). ¿Kanon  otlakat Jesús? Ipan yejon pitentsin kalpan (Mateo 2:1, 3-9). Ika ome, tiknextiaj itech tlen onoijto ipan Daniel 9:25, ipantsin 500 xiuitl ika tlakuitlapan ouel onomat ipan tlen xiuitl yejkoskia Mesías: xiuitl 29. * Ipampa yejuin tlen onochiuj niman okseki, techititia ika Jesús yejua Mesías akin yonoijtoka uajlaskia.

8, 9. ¿Kenon kuajli onoteititi ijkuak onoapolakti Jesús ika yejua katka Mesías?

⁸ Itlamiyan xiuitl 29 melak kuajli ones ika Jesús yejua katka Mesías. Ipan yejon tonaltin okitlajtlanili Juan Teapolaktijketl makiapolakti ipan atentli Jordán. Yejuin apolaktilistli nochiua ijkuak se kipolaktiaj ijtik atl niman ijkon noteixpantia ika nosentemaka itech toTajtsin. Jehová yokijlika Juan ika kichiuaskia makimati akinon yeskia Mesías, niman ijkon okichiuj ijkuak onoapolakti Jesús. Biblia kijtoua: “Ijkuak Jesús yonoapolakti, nimantsin okis ipan atl. Niman, ¡xkita!, iluikamej otlapoujkej, niman yejua okitak iespíritu [santo] toTajtsin uajtemouaya ipan ken paloma. Niman okakistik se tlajtojli tlen okijto: ‘Yejuin yejua noKoneuj, akin niktlasojtla, niman nechyolpaktia’” (Mateo 3:16, 17, TNM). Ijkuak Juan okitak niman ijkon okikak, kuajli okimat ika Jesús yejua katka akin okuajtitlan toTajtsin (Juan 1:32-34). Ipan yejon tonajli, ijkuak okimakak iespíritu santo toTajtsin —ichikaualis tlen tekititok—, Jesús onochiuj Mesías, noso Cristo, akin okitlapejpenijkej yes Tlayekanketl niman Tekiuaj (Isaías 55:4).

⁹ Ijkuak onochiuj tlen yonoijtoka niman tlen Jehová okichiuj, kuajli ones ika Jesús yejua katka Mesías akin yonoijtoka uajlaskia. San ika, Biblia ok kinankilia ome tlajtoltilistin tlen melak noneki matikmatikan itech Jesucristo: kanon oualeuj niman kenon katka.

10. ¿Tlen temachtia Biblia itech inemilis Jesús ijkuak xiuajnemiya ipan tlaltikpaktli?

¹⁰ Biblia temachtia ika Jesús onen iluikak ijkuak xiuajnemiya ipan tlaltikpaktli. Miqueas xsan yokijtoka ika tlakatiskia Belén, noijki okijto ika Mesías onen “yeuejkaui” (Miqueas 5:2). Niman xsan yejon, noijki Jesús miyekpa okijto ika ijkuak xiuajnemiya ken se tlaltikpakchane, onen iluikak (xpoua Juan 3:13; 6:38, 62; 17:4, 5). Se iluikaktekitketl katka akin kualtsin iuan nemiya Jehová.

11. ¿Kenon techititia Biblia ika Jehová melak kitlasojtla Jesús?

¹¹ Onka miyek tleka Jehová melak kitlasojtla Jesús. Biblia kijtoua ika “yejua nemi desde ijkuak nochi tlen onkaj xe onkatka”, pampa yejua akin toTajtsin kachtopa okichijchiuj (Colosenses 1:15). * Noijki kitlasojtla pampa yejua “isenteKonetsin” (Juan 3:16). Yejuin kijtosneki ika san toTajtsin okichijchiuj Jesús. Noijki san yejua akin okipaleui Jehová makichijchiua nochi okseki tlemach (Colosenses 1:16). Noijki, noixmati kentla “Tlajtojli” (Juan 1:14). Yejuin techititia ika yejua tlajtouaya ipampa iTaj. Kimijliaya tlen toTajtsin kinekiya niman kinmakaya tlanauatiltin ikoneuan toTajtsin, iluikaktekitkej niman noijki tlaltikpakchanejkej.

12. ¿Tlenon techititia ika Tekoneuj yenkuiyotl xijkon ken toTajtsin?

¹² ¿Tekoneuj yenkuiyotl noijki ijkon ken toTajtsin? Sekimej ijkon kinemiliaj, san ika, Biblia xijkon techmachtia. Ken otikitakej ipan okse párrafo, Tekoneuj san okichijchiujkej. Kuakon okipix kemanon ouajpeuj inemilis, xuelis ijkon tikijtoskej itech Jehová pampa xkipiya kemanon ouajpeuj inemilis nion xkipiya kemanon tlamis (Salmo 90:2). IsenteKonetsin toTajtsin xkeman okinemili  nochiuas noijki ken iTaj. Biblia kuajli temachtia ika Tajtli yejua ueyixtika xijkon ken Tekoneuj (xpoua Juan 14:28; 1 Corintios 11:3). San Jehová akin “Nochi ueli kichiua” (Génesis 17:1). Kuakon, xakaj nemi ijkon ken Yejua. *

13. ¿Tlenon kijtosneki ijkuak Biblia kijtoua ika Tekoneuj “[okiteititiko] ken ijki yejua nemi yejuan xnesi inemilis”?

¹³ Tekoneuj yenkuiyotl niman Jehová, kualtsin onouikakej ipan melak miyek xiuitl, ijkuak xkinchijchiuayaj sitlalimej niman tlaltikpaktli. ¡Melak ueyi tlasojtlalistli okipixkej! (Juan 3:35; 14:31.) Yejuin Tekoneuj noijki ijkon kipiya ikualneskayouan ken iTaj. Ika yejon, Biblia kijtoua ika “yejua [okiteititiko] ken ijki yejua nemi yejuan xnesi inemilis” (Colosenses 1:15). Kema, ijkon ken kokonej tlachiaj ken intajuan, iKoneuj toTajtsin iluikakchane noijki kipiya kualneskayomej niman kichiua ken iTaj.

14. ¿Kenon onemiko isenteKonetsin Jehová ken se tlakatl?

¹⁴ IsenteKonetsin Jehová ika iyojlo okikauj iluikak ijkuak ouajla ipan tlaltikpaktli niman onochiuj ken se tlakatl. San ika, kanaj tejua timotlajtoltia: “¿Kenon se iluikaktekitketl onemiko ken se tlakatl?”. Pampa Jehová okichiuj se milagro. Inemilis iKonetsin, akin nemiya ne iluikak, okipanolti ijtik se ichpochtli judía itoka, María. Pampa xiuan onotekak se tlakatl, xtlajtlakole onemiko ikoneuj, akin okitokayoti Jesús (Lucas 1:30-35).

15. ¿Kenon itech Jesús uelis tikixmatiskej Jehová?

¹⁵ Nochi tlen Jesús okichiuj niman okijto ijkuak onen ipan tlaltikpaktli techpaleuiya kuajli matikixmatikan. Niman noijki itech yejua uelis kuajli tikixmatiskej Jehová. ¿Kenon? Xkilnamiki ika yejuin Tekoneuj tlachia ijkon ken iTaj. Ika yejon, okijli se inomachtijkauj: “On yejuan  nechita, no kita on Tajtli” (Juan 14:9). Itech naui amoxtin tlen uajlauej ipan Biblia kimixmatij kentla Evangelios —Mateo, Marcos, Lucas niman Juan—, ijkuiliujtok miyek tlemach itech inemilis, tlen okichiuj niman ikualneskayouan Jesucristo.

16. ¿Tlenon temachtiaya Jesús, niman akinon itlamachtil katka?

¹⁶ Jesús kixmatiyaj kentla “Tlamachtijketl” (Juan 1:38; 13:13). ¿Tlenon temachtiaya? Kiteijliaya “kuajli tlajtojli” itech iTekiuajyo toTajtsin, kijtosneki nochi tlemach tlen kuajli kichiuas iTekiuajyo. Yejuin tekiuajyotl uajtlanauatijtos ne iluikak ipan nochi tlaltikpaktli niman kinteochiuas tlaltikpakchanejkej akin xkeman kikauaj toTajtsin (Mateo 4:23). ¿Akinon itlajtol kiteijliaya Jesús? Yejua okijto: “Notemachtil xnoyaxka. Onikselij itech on yejuan onechajtitlan”, kijtosneki ualeuaya itech Jehová (Juan 7:16). Niman yejua kimatiya ika iTaj, kinekiya tlaltikpakchanejkej makimatikan yejuin kuajli tlajtoltin itech iTekiuajyo. Ipan capítulo 8 tikitaskej okseki tlemach itech yejuin tekiuajyotl niman tlenon kichiuas.

17. ¿Kanon temachtiaya Jesús, niman tleka nokojtiliaya kichiuaya yejon?

¹⁷ ¿Kanon tlamachtiaya Jesús? San kanon kampa nemilouaya: ipan tepetl, kalpamej, uejueyimej kalpamej, kampa tlanemakalo niman techajchan. Jesús xtlamachiaya makitatij, yejua komintejtemouaya (Marcos 6:56; Lucas 19:5, 6). ¿Tleka onosentemakak itech yejuin tekitl, onokojtili ika otenojnots niman otlamachti? Pampa yejon tlen kinekiya iTaj, niman Jesús nochipa okichiuj (Juan 8:28, 29). San ika, noijki kichiuaya pampa kimikneliaya akin uajlayaj itech (xpoua Mateo 9:35, 36). Tlayekankej ipan tlaneltokiltin nonekiya temachtiskiaj tlen melauak itech toTajtsin niman tlen yejua kichiuaskia ika tlayekapan, san ika, san ijkon yokinkaujkaj tlaltikpakchanejkej niman xkinmachtiayaj. Niman Jesús kimatiya  ika melak nonekiya makikakikan yejuin tlajtoltin itech Tekiuajyotl.

18. ¿Katlejua ikualneskayouan Jesús melak tikinuelita?

¹⁸ Jesús katka se tlakatl tetlasojtlani, teikneliani niman kuajli iyojlo. Melak tenotski katka, hasta kokonej kuajli nomachiliayaj itech (Marcos 10:13-16). Xtechikoitaya. Xkuelitaya manochiua tlen xkuajli noso matekajkayaualo (Mateo 21:12, 13). Ipan yejon tonaltin ijkuak xkintlakaitayaj niman xkinkakiyaj siuamej, yejua nochipa kualtsin okiminnots (Juan 4:9, 27). Jesús melak yolyemanki katka. Se tonajli okinpajpakili imikxiuan itlatitlankauan, yejon tekitl kichiuayaj san akin tlakeualtin.

19. ¿Tlen neskayotl techititia ika Jesús kimikneliaya akin tlajyouiayaj?

¹⁹ Jesús kimikneliaya tlaltikpakchanejkej akin tlajyouiayaj, niman okiteititi ijkuak okichiuj milagros ika iespíritu santo toTajtsin (Mateo 14:14). Se neskayotl, se akin kipiaya lepra okitejtemo niman okijli: “Tla tikneki, uelis tinechpajtis”.  Jesús okimachili ipan iyojlo tlen kikokouaya yejon tlakatl. Okikneli, okasik ipan ima niman okijli: “Nikneki. Aman xpajti”. ¡Akin kualouaya opajtik! (Marcos 1:40-42.) ¿Kenon tiknemilia okimachili yejon tlakatl?

20, 21. ¿Tleka uelis tikijtoskej ika Jesús se kuajli neskayotl itech kenon titetlakamatiskej niman xkeman tijkauaskej toTajtsin?

²⁰ Jesús techititia se kuajli neskayotl ika otetlakamat niman xkeman okikauj toTajtsin. Nochipa oyolmelaujkanen itech iTaj iluikakchane, maski ijkuak okitlaueltokakej niman otlajyoui. Okimapeuj nochi tlen Satanás okitekiuilti (Mateo 4:1-11). Noijki nemiyaj ichanejkauan akin xkineltokayaj. Okijtokej: “Yotlamachilispoliu” (Marcos 3:21). San ika, Jesús xonoyolkoko niman xkeman okikauj kichiua itekiyo toTajtsin. Ijkuak itlauelikniuan opeuj tlemach kijliaj niman okiuisojkej noso okimajmaakej,  nochipa okijyoui niman xokinemili itlaj kinchiuilis (1 Pedro 2:21-23).

²¹ Jesús nochipa okitlakamat toTajtsin, hasta ijkuak melak xkuajli ken okimiktijkej itlauelikniuan (xpoua Filipenses 2:8). Xnemili itech tlen okijyoui sa itlamiyan inemilis ken se tlaltikpakchane. Okasikej, okijtokej tlen xmelauak itech, jueces okitemakakej makimiktikan maski xtlaj tlajtlakojli kipiaya, okipijpinaujtikej niman soldados okitlajyouiltijkej. Ijkuak pilkatoya ipan kojtli melaktik, otsajtsik: “¡Yonochiuj!” (Juan 19:30, TNM). Ipan yeyi tonajli, iTaj iluikakchane okiyoliti (1 Pedro 3:18). Opanok cuarenta tonaltin niman oksejpa oyaj iluikak, niman “onotlalij iyekmakopa Dios” kampa otlamachix makitlalikan kentla tekiuaj (Hebreos 10:12, 13).

22. ¿Tlenon ouel okichiuj Jesús pampa nochipa oyolmelaujkanen?

²² ¿Tlenon ouel okichiuj Jesús pampa nochipa oyolmelaujkanen? Ika imikilis ouel okichiuj tejuamej matiuelikan matikselikan nemilistli tlen xkeman tlamis, ipan se xochitlalpan nikan ipan tlaltikpaktli, ijkon ken Jehová kinekiya manochiua. Ipan okse capítulo tikitaskej kenon ika imikilis Jesús uelis nochiuas tlen tikchiatokej.