1, 2. (a) Ke ka baka la’ng go tseba ka motho yo mongwe yo a tsebegago go sa bolele gore o mo tseba e le ka kgonthe? (b) Ke go se kwešišwe gofe moo go lego gona mabapi le Jesu?

GO NA le batho ba bantši bao ba tsebegago kudu lefaseng. Ba bangwe ke ba tsebegago kudu setšhabeng sa gabo bona, motseng goba nageng ya gabo bona. Ba bangwe ke ba tsebegago lefaseng ka bophara. Lega go le bjalo, go fo tseba leina la motho yo a tsebegago ga go bolele gore o mo tseba e le ka kgonthe. Ga go bolele gore o tseba ditaba ka botlalo mabapi le setlogo sa gagwe le seo a lego sona e le ka kgonthe bjalo ka motho.

² Batho go dikologa lefase ba ile ba kwa se itšego ka Jesu Kriste, gaešita le ge a ile a phela lefaseng nywaga e ka bago 2 000 e fetilego. Lega go le bjalo, ba bantši ga ba kwešiše mohuta wa motho yoo Jesu ge e le gabotse e bego e le yena. Ba bangwe ba bolela gore e be e fo ba motho feela yo a lokilego. Ba bangwe ba bolela gore e be e fo ba moporofeta feela. Ba bangwe gape ba dumela gore Jesu ke Modimo gomme o swanetšwe ke go rapelwa. Na o swanetšwe ke go rapelwa?

3. Ke ka baka la’ng go le bohlokwa go wena gore o tsebe therešo ka Jesu?

³ Go bohlokwa go wena gore o tsebe therešo ka Jesu. Ka baka la’ng? Ka gobane Beibele e re: “Se se bolela bophelo bjo bo sa felego, gore ba hwetše tsebo ka wena Modimo a nnoši wa therešo le ka yo o mo romilego, Jesu Kriste.” (Johane 17:3) Ee, go tseba therešo ka Jehofa Modimo le ka Jesu Kriste go ka lebiša bophelong bjo bo sa felego lefaseng la paradeise.  (Johane 14:6) Go oketša moo, Jesu o bea mohlala o phalago yohle wa kamoo re ka phelago ka gona le kamoo re ka swarago ba bangwe ka gona. (Johane 13:34, 35) Kgaolong ya pele ya puku ye, re ahla-ahlile therešo ka Modimo. Ga bjale anke re eleng hloko seo ge e le gabotse Beibele e se rutago ka Jesu Kriste.

4. Direto “Mesia” le “Kriste” di bolela’ng?

⁴ Kgale pele ga ge Jesu a ka belegwa, Beibele e ile ya bolela e sa le pele ka go tla ga yoo Modimo a tlago go mo roma e le Mesia goba Kriste. Direto “Mesia” (go tšwa lentšung la Sehebere) le “Kriste” (go tšwa lentšung la Segerika) ka bobedi di bolela gore “Motlotšwa.” Yena Yo a holofeditšwego o be a tla tlotšwa, e lego seo se bolelago gore  o tla kgethwa ke Modimo go ba boemong bjo bo kgethegilego. Dikgaolong tša mafelelo tša puku ye, re tla ithuta mo go oketšegilego ka karolo e bohlokwa ya Mesia go phethagatšweng ga dikholofetšo tša Modimo. Re tla ithuta gape le ka ditšhegofatšo tšeo Jesu a ka re tlišetšago tšona gaešita le gona bjale. Lega go le bjalo, pele Jesu a ka belegwa, ga go pelaelo gore ba bantši ba ile ba ipotšiša gore, ‘Ke mang yo e tlago go ba Mesia?’

5. Ke’ng seo barutiwa ba Jesu ba bego ba kgodišegile ka sona ka mo go feletšego mabapi le yena?

⁵ Lekgolong la pele la nywaga C.E., barutiwa ba Jesu wa Natsaretha ba be ba kgodišegile ka mo go feletšego gore e be e le yena Mesia yo go boletšwego ka yena e sa le pele. (Johane 1:41) Yo mongwe wa barutiwa e lego monna yo a bitšwago Simone Petro, o ile a botša Jesu ka go lebanya gore: “Ke wena Kriste.” (Mateo 16:16) Lega go le bjalo, ke bjang barutiwa bao—le rena—ba bego ba ka kgodišega gore Jesu ge e le gabotse ke Mesia yo a holofeditšwego?

6. Bontšha kamoo Jehofa a ilego a thuša batho ba botegago gore ba hlaole Mesia.

⁶ Baporofeta ba Modimo bao ba phetšego pele ga Jesu ba ile ba bolela ditaba tše dintši e sa le pele mabapi le Mesia. Ditaba tše di be di tla thuša ba bangwe gore ba mo lemoge. Re ka bapiša dilo ka tsela ye: A re re o kgopetšwe gore o ye boema-peseng bjo bo šomago kudu goba seteišeneng sa setimela goba boema-fofaneng gore o yo tšea motho yo o sa kago wa kopana le yena le ka mohla. Na e be e ka se be mo go thušago ge e ba motho yo mongwe a go hlaloseditše ganyenyane mabapi le yena? Ka mo go swanago, ka baporofeta ba Beibele, Jehofa o neile tlhaloso e feletšego ya seo Mesia a bego a tla se dira le seo a bego a tla feta go sona. Go phethagala ga diporofeto tše tše dintši go be go tla thuša batho ba botegago go mo hlaola gabotse.

7. Ke diporofeto dife tše pedi tšeo di ilego tša phethagala mabapi le Jesu?

⁷ Ela hloko mehlala e mebedi feela. Wa mathomo, ka godimo ga nywaga e 700 e sa le pele, moporofeta Mika o ile a  bolela e sa le pele gore Yo a holofeditšwego o tla belegelwa Betlelehema, e lego toropo e nyenyane nageng ya Juda. (Mika 5:1) Jesu ge e le gabotse o belegetšwe kae? Motseng wona woo! (Mateo 2:1, 3-9) Wa bobedi, nywaga-kgolo e mentši e sa le pele, boporofeta bjo bo begilwego go Daniele 9:25 bo ile bja šupa wona ngwaga woo Mesia a bego a tla tšwelela ka wona—29 C.E. * Go phethagala ga diporofeto tše gotee le tše dingwe go tiišetša gore Jesu e be e le Mesia yo a holofeditšwego.

8, 9. Ke bohlatse bofe bja gore Jesu e be e le Mesia bjo bo ilego bja bonagala gabotse kolobetšong ya gagwe?

⁸ Bohlatse bjo bongwe bja gore Jesu e be e le Mesia bo ile bja bonagala gabotse go ya bofelong bja ngwaga wa 29 C.E. Woo ke ngwaga wo Jesu a ilego a ya go Johane Mokolobetši gore a kolobetšwe Nokeng ya Jorodane. Jehofa o be a holofeditše Johane gore o tla mmontšha sešupo e le gore a kgone go lemoga Mesia. Johane o ile a bona sešupo seo ge Jesu a kolobetšwa. Beibele e bolela gore seo se ilego sa direga ke se: “Jesu ka morago ga ge a kolobeditšwe a rotoga gatee-tee meetseng; bonang! magodimo a bulega, a bona moya wa Modimo o theoga bjalo ka leeba o e-tla godimo ga gagwe. Bonang! Le gona gwa ba le lentšu le le tšwago magodimong leo le itšego: ‘Yo ke Morwa wa-ka, morategi, yo ke mo amogetšego.’” (Mateo 3:16, 17) Ka morago ga go bona le go kwa seo se diregilego, Johane ga se a ka a belaela gore Jesu o be a romilwe ke Modimo. (Johane 1:32-34) Lebakeng la ge moya wa Modimo goba matla a šomago a tšhollelwa godimo ga gagwe letšatšing leo, Jesu o ile a fetoga Mesia goba Kriste, yena yo a kgethetšwego go ba Moetapele le Kgoši.—Jesaya 55:4.

⁹ Go phethagala ga boporofeta bja Beibele le bohlatse bja Jehofa Modimo ka noši go bontšha gabotse gore Jesu e be e le Mesia yo a holofeditšwego. Eupša Beibele e araba dipotšišo tše dingwe tše pedi tše bohlokwa mabapi le Jesu Kriste: O be a e-tšwa kae le gore e be e le motho wa mohuta mang?

10. Ke’ng seo Beibele e se rutago ka go ba gona ga Jesu pele a e-tla lefaseng?

¹⁰ Beibele e ruta gore Jesu o phetše legodimong pele a e-tla lefaseng. Mika o ile a porofeta gore Mesia o tla belegelwa Betlelehema gomme a bolela gape gore tlhago goba setlogo sa Gagwe e be e le sa “boxolo-xolo bya neng le neng.” (Mika 5:1) Mabakeng a mantši, Jesu ka boyena o boletše gore o phetše legodimong pele a belegwa e le motho. (Johane 3:13; 6:38, 62; 17:4, 5) E le sebopiwa sa moya seo se lego legodimong, Jesu o be a e-na le tswalano e kgethegilego le Jehofa.

11. Beibele e bontšha bjang gore Jesu ke Morwa yo a rategago kudu wa Jehofa?

¹¹ Jesu ke Morwa yo a rategago kudu wa Jehofa—gomme ka lebaka le le kwagalago. O bitšwa “leitšibulo la tlholo yohle,” ka gobane e bile sebopiwa sa pele sa Modimo. * (Ba-Kolose 1:15) Go na le se sengwe gape seo se dirago gore Morwa yo e be yo a kgethegilego. Ke “Morwa wa gagwe yo a tswetšwego a nnoši.” (Johane 3:16) Se se bolela gore Jesu ke yena a nnoši yo a bopilwego ke Modimo ka go lebanya. Jesu gape ke yena feela yo Modimo a mo dirišitšego ge A be a bopa dilo tše dingwe ka moka. (Ba-Kolose 1:16) E bile Jesu gape o bitšwa “Lentšu.” (Johane 1:14) Se se re botša gore e be e le mmoleledi wa Modimo, e bile ga go pelaelo gore o be a fetišetša melaetša le ditaelo go barwa ba bangwe ba Tatagwe, bobedi ba moya le bao e lego batho.

12. Re tseba bjang gore Morwa wa leitšibulo ga a lekane le Modimo?

¹² Na Morwa wa leitšibulo o lekana le Modimo go etša ge ba bangwe ba dumela? Seo ga se se Beibele e se rutago. Ka ge re bone serapeng se se fetilego, Morwa o ile a bopša. Ka gona, go molaleng gore o bile le mathomo, mola e le gore Jehofa Modimo ga a na mathomo goba mafelelo. (Psalme 90:2) Morwa yo a tswetšwego a nnoši ga se a ka a leka go itekanya le Tatagwe.  Beibele e ruta ka mo go kwagalago gore Tate ke yo mogolo go Morwa. (Johane 14:28; 1 Ba-Korinthe 11:3) Jehofa a nnoši ke “Modimo Ra-Matla-ohle.” (Genesi 17:1) Ka baka leo, ga go na yo a lekanago le yena. *

13. Beibele e bolela’ng ge e bolela ka Morwa e le “seswantšho sa Modimo yo a sa bonagalego”?

¹³ Jehofa le Morwa wa gagwe wa leitšibulo ba ile ba thabela bogwera bja kgaufsi ka nywaga e dimilione tše dikete—kgale pele ga ge magodimo a tletšego ka dinaledi gotee le lefase di ka bopša. Ba swanetše go ba ba be ba ratana kudu gakaakang! (Johane 3:35; 14:31) Morwa yo yo a rategago o be a swana gabotse le Tatagwe. Ke ka baka leo Beibele e bolelago ka Morwa e le “seswantšho sa Modimo yo a sa bonagalego.” (Ba-Kolose 1:15) Ee, go swana le ge morwa wa motho a ka swana le tatagwe gabotse ka ditsela tše di fapa-fapanego, Morwa yo wa legodimong o bonagaditše dika le semelo tša Tatagwe.

14. Go tlile bjang gore Morwa yo a tswetšwego a nnoši wa Jehofa a tle a belegwe e le motho?

¹⁴ Morwa yo a tswetšwego a nnoši wa Jehofa o ile a tlogela legodimo ka go rata gomme a tla tlase lefaseng e le gore a phele e le motho. Eupša o ka ipotšiša, ‘Go kgonegile bjang gore sebopiwa sa moya se belegwe e le motho?’ E le gore a fihlelele se, Jehofa o ile a dira mohlolo. O ile a fetišetša bophelo bja Morwa wa gagwe wa leitšibulo go tšwa legodimong go ya popelong ya kgarebe ya mo-Juda ye e bitšwago Maria. Ga go na tate wa motho yo a ilego a akaretšwa. Ka baka leo Maria o ile a belega morwa yo a phethagetšego gomme a mmitša Jesu.—Luka 1:30-35.

15. Ke ka baka la’ng re ka bolela gore ka Jesu re kgona go tseba Jehofa gakaone?

¹⁵ Seo Jesu a se boletšego le seo a se dirilego ge a be a le lefaseng se re thuša go mo tseba gabotse. Go feta moo, ka Jesu re kgona go tseba Jehofa gakaone. Ke ka baka la’ng go le bjalo?  Gopola gore Morwa yo ke seswantšho se se phethagetšego sa Tatagwe. Ke ka baka leo Jesu a boditšego yo mongwe wa barutiwa ba gagwe gore: “Yo a bonego nna o bone le Tate.” (Johane 14:9) Dipuku tše nne tša Beibele tše di tsebjago e le Diebangedi—Mateo, Mareka, Luka le Johane—di re botša mo gontši ka bophelo, modiro le dika tša motho ka noši tša Jesu Kriste.

16. Molaetša o mogolo wa Jesu e be e le ofe, gomme dithuto tša gagwe di be di e-tšwa kae?

¹⁶ Jesu o be a tsebega kudu e le “Morutiši.” (Johane 1:38; 13:13) O be a ruta’ng? Se segolo kudu ke gore molaetša wa gagwe e be e le “ditaba tše dibotse tša mmušo”—e lego Mmušo wa Modimo, mmušo wa legodimong wo o tlago go buša godimo ga lefase ka moka le go tliša ditšhegofatšo tše di sa felego bathong ba kwago. (Mateo 4:23) Molaetša wo e be e le wa mang? Jesu ka boyena o itše: “Seo ke se rutago ga se sa-ka, eupša ke sa yo a nthomilego,” e lego Jehofa. (Johane 7:16) Jesu o be a tseba gore Tatagwe o nyaka gore batho ba kwe ka ditaba tše dibotse tša Mmušo. Go Kgaolo 8, re tla ithuta mo go oketšegilego ka Mmušo wa Modimo le seo o tlago go se phethagatša.

17. Jesu o be a ruta kae, gomme ke ka baka la’ng a ile a katana ka matla e le gore a rute ba bangwe?

¹⁷ Jesu o be a ruta kae? Kae le kae moo a bego a hwetša batho—mafelong a magaeng gaešita le metseng-megolo, metsaneng, mebarakeng le malapeng a bona. Jesu ga se a ka a letela batho gore ba tle go yena. O ile a ya go bona. (Mareka 6:56; Luka 19:5, 6) Ke ka baka la’ng Jesu a ile a katana ka tsela ye e bile a fetša nako ya gagwe e ntši a bolela le go ruta? Ka gobane go dira bjalo e be e le thato ya Modimo go yena. Jesu ka mehla o be a dira thato ya Tatagwe. (Johane 8:28, 29) Eupša go be go e-na le lebaka le lengwe la gore a bolele. O ile a kwela bohloko lešaba la batho leo le ilego la tla le tlo mmona. (Matthew 9:35, 36) Ba be ba hlokomologilwe ke baetapele ba bona ba bodumedi, bao ba bego ba swanetše go ba ba be ba ba ruta therešo ka Modimo le merero ya gagwe. Jesu o be a tseba kamoo batho ba bego ba nyaka kudu ka gona go kwa molaetša wa Mmušo.

18. Ke dika dife tša Jesu tšeo o hwetšago e le tše ipiletšago kudu?

 ¹⁸ Jesu e be e le monna yo borutho le yo a kgomegago maikwelo ka mo go tseneletšego. Ka baka leo ba bangwe ba ile ba hwetša a batamelega e bile a le botho. Gaešita le bana ba ile ba ikwa ba lokologile ge ba e-na le yena. (Mareka 10:13-16) Jesu o be a sa bebe sefahlego. O be a hloile bokgopo le go hloka toka. (Mateo 21:12, 13) Nakong ya ge basadi ba be ba sa hwetše tlhompho e lekanego gomme ba e-na le ditokelo tše sego kae, o ile a ba swara ka seriti. (Johane 4:9, 27) Jesu o be a ikokobeditše e le ka kgonthe. Lebakeng le lengwe, o ile a hlapiša barutiwa ba gagwe maoto, e lego tirelo yeo gantši e dirwago ke mohlanka yo a nyatšegago.

19. Ke mohlala ofe wo o bontšhago gore Jesu o be a tshwenyega ka dinyakwa tša ba bangwe?

¹⁹ Jesu o be a tshwenyega ka dinyakwa tša ba bangwe. Se se be se bonagala kudu ge ka thušo ya matla a moya wa Modimo a be a dira mehlolo ya go fodiša. (Mateo 14:14) Ka mohlala, monna yo a nago le lephera o ile a tla go Jesu gomme a re:  “Ge feela o rata, o ka ntlhwekiša.” Jesu ka boyena o ile a kwa bohloko le tlaišego tša monna yo. A tutuetšwa ke kwelobohloko, Jesu o ile a otlolla letsogo la gagwe a kgwatha monna yo, gomme a re: “Ke a rata. Hlweka.” Monna yo a babjago o ile a fola! (Mareka 1:40-42) Na o ka kgona go akanya kamoo monna yoo a ka bego a ile a ikwa ka gona?

20, 21. Jesu o beile bjang mohlala wa go kwa Modimo ka potego e sa kwanantšhego?

²⁰ Jesu o beile mohlala o mobotse kudu wa go kwa Modimo ka potego e sa kwanantšhego. O ile a dula a botegela Tatagwe wa legodimong ka tlase ga mehuta ka moka ya maemo e bile go sa šetšwe mehuta ka moka ya kganetšo le tlaišego. Jesu o ile a ganetša diteko tša Sathane ka go tia le ka katlego. (Mateo 4:1-11) Lebakeng le lengwe, ba bangwe ba meloko ya Jesu ga se ba ka ba mo dumela, e bile ba bolela gore o be a “hlakane hlogo.” (Mareka 3:21) Eupša Jesu ga se a ka a ba dumelela gore ba mo tutuetše; o ile a tšwela pele a dira modiro wa Modimo. Go  sa šetšwe thogako le go swarwa gampe, Jesu o ile a kgomarela boitshwaro gomme le ka mohla a sa leke go gobatša baganetši ba gagwe.—1 Petro 2:21-23.

²¹ Jesu o ile a dula a botega go fihlela lehung—lehu le sehlogo le le le kwešago bohloko diatleng tša manaba a gagwe. (Ba-Filipi 2:8) Ela hloko seo a ilego a se kgotlelela letšatšing la mafelelo la bophelo bja gagwe e le motho. O ile a swarwa, a latofatšwa ke dihlatse tša maaka, a bewa molato ke baahlodi ba gobogilego, a segwa ke dihlopha tša bahlola-mpherefere gomme a hlokofatšwa ke mašole. A kokotetšwe koteng, o ile a hema la mafelelo gomme a goelela ka gore: “Go phethegile!” (Johane 19:30) Lega go le bjalo, letšatšing la boraro ka morago ga ge Jesu a hwile, Tatagwe wa legodimong o ile a mo tsošetša gape bophelong bja moya. (1 Petro 3:18) Dibeke tše sego kae ka morago, o ile a boela legodimong. Moo, o ile a “dula ka letsogong le letona la Modimo” gomme a letela gore a tle a amogele matla a bogoši.—Ba-Hebere 10:12, 13.

22. Jesu o ile a phethagatša eng ka go dula a botega go ba go fihla lehung?

²² Ke’ng seo Jesu a ilego a se phethagatša ka go dula a botega go ba go fihla lehung? Lehu la Jesu ge e le gabotse le re bulela sebaka sa go hwetša bophelo bjo bo sa felego lefaseng la paradeise, ka go dumelelana le morero wa Jehofa wa mathomong. Taba ya gore ke bjang lehu la Jesu le dirago gore seo se kgonege e tla ahla-ahlwa kgaolong e latelago.