1, 2. (a) Akin ya no antam so ngaran na sakey ya sikat a too et agto labay ya ibagan sikatoy kabkabat mo la? (b) Antoy nanduruman papanisiaan na totoo nipaakar ed si Jesus?

DAKEL so sikat ya totoo ed mundo. Saray arum et kabkabat diad mismon lugar, syudad, odino bansa ra. Say arum et balitado ed interon mundo. Balet, no antam so ngaran na sakey ya sikat a too, agto labay ya ibagan sikatoy kabkabat mo la. Agto labay ya ibagan antam la ray agawgawad bilay to tan no anton talagay ugali to.

² Nadngelan met la na totoo ed interon mundo so nipaakar ed si Jesu-Kristo, anggano manga 2,000 taon lay apalabas nen nambilay diad dalin. Balet, nandurumay papanisiaan na totoo no siopa si Jesus. Ibabaga na arum a sikatoy sakey labat a maong a too. Saray arum balet et ibabaga ran sikatoy sakey ya propeta. Balet panisiaan na arum ya si Jesus et Dios ya nepeg a dayewen. Antoy nibagam ey?

3. Akin ya importantin amtaen moy katuaan nipaakar ed si Jehova a Dios tan si Jesu-Kristo?

³ Importantin naamtaan mo so katuaan nipaakar ed si Jesus. Akin? Ta oniay ibabaga na Biblia: “Saya so mankabaliksay bilay ya andi-anggaan, a kabaten da ka, say saksakey a tuan Dios tan samay imbakim, si Jesu-Kristo.” (Juan 17:3) No kabaten tayoy Jehova a Dios tan si Jesu-Kristo, nayarin tuloytuloy tayon manbilay diad paraison dalin. (Juan 14:6) Sakey ni, impanengneng nen Jesus so sankaabigan ya alimbawa no  panon so pambilay tan no panon a tratoen so arum. (Juan 13:34, 35) Diad Kapitulo 1 na sayan libro, naaralan tayoy katuaan nipaakar ed Dios. Natan et aralen tayo no anton talagay ibabangat na Biblia nipaakar ed si Jesu-Kristo.

4. Antoy labay ya ibaga na saray titulon “Mesias” tan “Kristo”?

⁴ Antis nin iyanak si Jesus, abayag lan impasakbay na Biblia ya onsabi imay ibaki na Dios ya Mesias odino Kristo. Saray titulon “Mesias” (a nanlapud Hebreon salita) tan “Kristo” (a nanlapud Griegon salita) et parehon mankabaliksan na “Nilanaan.” Sayan impromisan Mesias et lanaan, labay ton ibaga et sikatoy pinili na Dios parad sakey  ya espisyal a posisyon. Diad bandad sampot iran kapitulo na sayan libro, dakel ni naaralan tayo nipaakar ed importantin betang na Mesias diad pakasumpal na saray impromisa na Dios. Naaralan tayo met iray bendisyon ya natan ni labat et iter la nen Jesus ed sikatayo. Balet, antis nin iyanak si Jesus, seguradon dakel so nantepet, ‘Siopa kasi so Mesias?’

5. Kasin kombinsido iray disipulo nen Jesus ya sikato so Mesias?

⁵ Nen inmunan siglo C.E., saray disipulo nen Jesus a taga Nazaret et talagan kombinsido ya sikato so impasakbay a Mesias. (Juan 1:41) Sakey ed saray disipulo ya man-ngaran na Simon Pedro, so angibaga ed si Jesus: “Sika so Kristo.” (Mateo 16:16) Balet, akin et segurado iratan ya disipulo, tan panon tayon naseguro ya talagan si Jesus so impromisan Mesias?

6. Mangiter na ilustrasyon no panon ya tinulongan nen Jehova iray matoor pian nabidbir da so Mesias.

⁶ Abayag lan insulat na saray propeta na Dios so dakel a detalye nipaakar ed Mesias antis nin nambilay si Jesus diad dalin. Makatulong iratan pian naamtaan no siopan talagay Mesias. Bilang ilustrasyon: Kunwari et imbaki kad istasyon na bus odino tren odino diad airport pian abeten so sakey ya agmo ni kabat. Agta makatulong no walay mangiter ed sika na pigaran detalye nipaakar ed sikato? Mipadpara, panamegley na saray propeta ed Biblia, angiter si Jehova na impormasyon ed no antoy gawaen na Mesias tan no antoy nagawad sikato. Say impakasumpal na sarayan dakel a propesiya so ontulong ed saray matoor pian nabidbir da ya talagan si Jesus so Mesias.

7. Anto so duara ed saray abayag lan imbaga na Biblia ya tinmua ed si Jesus?

⁷ Nia ray duaran alimbawa. Unona, 700 a taon antis nin iyanak si Jesus, impasakbay la nen propeta Miqueas a say Mesias et iyanak ed Betlehem, sakey a melag a baley diad Juda. (Miqueas 5:2) Iner so talagan angiyanakan ed si Jesus? Diad saman a mismon baley! (Mateo 2:1, 3-9) Komadua, nilasus  taon lan impasakbay ed Daniel 9:25 ya onsabi so Mesias ed taon 29 C.E. * Say impakasumpal na saraya tan saray arum ni et prueba ya si Jesus so impromisan Mesias.

8, 9. Nen abautismoan si Jesus, antoy prueba ya sikato so Mesias?

⁸ Say sakey nin prueba et nen malinlinew ya impaamta nen Jehova ya si Jesus so Mesias. Impromisa na Dios ya ikdan to si Juan a Managbautismo na tanda no siopa so Mesias. Nen nampabautismo si Jesus ed si Juan diad Ilog Jordan diad bandad sampot na 29 C.E., anengneng nen Juan itan ya tanda. Ibabaga na Biblia ya onia so agawa: “Kayarin abautismoan si Jesus, sikatoy inmimwas; tan alukasan so tawen, tan anengneng to so espiritu na Dios a singa malapati ya ondadapo ed sikato. Wala met so sakey a boses manlapud tawen ya angikuan: ‘Saya so Ana’ko, say inad-arok, ya inabobonan ko.’” (Mateo 3:16, 17) Sanen anengneng tan nadngel nen Juan so agawa, sikatoy segurado lan si Jesus so imbaki na Dios. (Juan 1:32-34) Diad saman, sanen nikalbo ed si Jesus so espiritu odino aktibon puersa na Dios, sikatoy nagmaliw a Mesias odino Kristo, say pinilin magmaliw ya Lider tan Ari.​—Isaias 55:4.

⁹ Saray abayag lan imbaga na Biblia ya tinmua tan say mismon impansalita nen Jehova a Dios so malinew a prueba ya si Jesus so impromisan Mesias. Balet eebatan na Biblia so duara nin importantin tepet nipaakar ed si Jesu-Kristo: Iner so nanlapuan to, tan antoy personalidad to?

10. Antoy ibabangat na Biblia nipaakar ed si Jesus antis ya linma diad dalin?

¹⁰ Ibabangat na Biblia ya abayag lan nambilay si Jesus ed tawen antis ya linma diad dalin. Impropesiya nen Miqueas a say Mesias et iyanak ed Betlehem tan imbaga to met a  say nanlapuan To et “nensaman nin panaon.” (Miqueas 5:2) Si Jesus ya mismo et aminpiga ton imbaga ya sikatoy nambilay ed tawen antis ya iyanak bilang too. (Basaen so Juan 3:13; 6:38, 62; 17:4, 5) Bilang espiritun pinalsa ed tawen, si Jesus et walaan na nikadkaduman relasyon ed si Jehova.

11. Panon ya ipapanengneng na Biblia ya si Jesus so inad-aron Anak nen Jehova?

¹¹ Si Jesus so inad-aron Anak nen Jehova. Sikatoy sankaunaan ya pinalsa na Dios. Kanian si Jesus et tinawag a “say panguloan na amin a pinalsa.” * (Colosas 1:15) Wala ni sananey a rason no akin ya inad-aro iyan Anak. Sikato so “bogbogtong [odino saksakey] ya Anak.” (Juan 3:16) Say labay ton ibaga, si Jesus labat so direktan pinalsa na Dios. Si Jesus met labat so inusar na Dios nen pinalsa To so arum ni ran bengatla. (Colosas 1:16) Sakey ni, si Jesus et tinawag met ya “say Salita.” (Juan 1:14) Ipapanengneng na saya ya sikatoy nansalita parad Dios. Ipapasabi to ray mensahe tan bilin ed arum ni ran ananak na Ama​—saray anghel tan totoo.

12. Panon tayon naseguro ya say panguloan ya Anak et agto kapantay so Dios?

¹² Kasin say panguloan ya Anak et pareho labat ed Dios, a singa papanisiaan na arum? Aliwan ontan so ibabangat na Biblia. Singa naaralan tayo lad inmunan parapo, say Anak et pinalsa. Malinew sirin ya walay gapoan to, balet si Jehova a Dios et anggapoy gapoan tan anggaan to. (Salmo 90:2) Agbalot inisip na Anak ya paraan o pantayan so Ama to. Malinew ya ibabangat na Biblia ya say Ama et mas superyor nen say Anak. (Basaen so Juan 14:28; 1 Corinto 11:3) Si Jehova labat  so “Dios a Makapanyarin-Amin.” (Genesis 17:1) Kanian anggapoy kapara o kapantay to. *

13. Antoy labay ya ibaga na Biblia nen imbaga ton say Anak et “kaulibay na agnanengneng a Dios”?

¹³ Panliliketan nen Jehova tan na panguloan ya Anak to so malet ya ulopan da ed binilyon a taon​—antis nin pinalsa so tawen tan dalin. Talagan inad-aro da so balang sakey! (Juan 3:35; 14:31) Inalig na sayan pinabpablin Anak iray kualidad na Ama to kanian imbaga na Biblia ya sikatoy “kaulibay na agnanengneng a Dios.” (Colosas 1:15) Singa diad too, say sakey ya anak et nayarin kaulibay o mipara iray kualidad to ed ama to. Ontan met, say Anak na Dios et mipara iray kualidad tan personalidad to ed Ama to.

14. Panon ya niyanak a too so saksakey ya Anak nen Jehova?

¹⁴ Say saksakey ya Anak nen Jehova et akaparaan ya taynanan so tawen tan onleksab diad dalin pian manbilay bilang too. Balet ompan naisip mo, ‘Panon ya niyanak ya too so sakey ya espiritun pinalsa?’ Nanggawa si Jehova na sakey a milagro. Say bilay na panguloan ya Anak to ed tawen et inyalis to ed eges na sakey a Judion birhen a man-ngaray Maria. Agla kaukolan so toon ama pian manlukon si Maria. Kanian inyanak nen Maria so perpekton anak a laki tan nginaranan toy Jesus.​—Lucas 1:30-35.

15. Akin a nibaga tayon panamegley nen Jesus et lalo tayon nakabat si Jehova?

¹⁵ Ontulong ed sikatayo iray imbaga tan ginawa nen Jesus nen wadiad dalin pian sikatoy nakabat tayon maong. Aliwan satan labat, panamegley nen Jesus et lalo tayon nakabat si Jehova. Akin et nibaga tayo ’tan? Nanengneng tayod sayan Anak iray kualidad na Ama to. Kanian imbaga nen Jesus ed sakey ed saray disipulo to: “Siopaman ya akanengneng  ed siak et anengneng to met lay Ama.” (Juan 14:9) Diad apatiran libro na Biblia a tatawagen ya Saray Ebanghelyo​—say Mateo, Marcos, Lucas, tan Juan​—dakel so naaralan tayo nipaakar ed bilay, kimey, tan saray kualidad nen Jesu-Kristo.

16. Antoy manunan mensahe nen Jesus, tan iner so nanlapuan na saray ibabangat to?

¹⁶ Si Jesus et kabkabat ya “Managbangat.” (Juan 1:38; 13:13) Antoy imbangat to? Say manunan mensahe to et say “maong a balita na Panarian” odino Panarian na Dios, say gobierno ed tawen ya manguley ed interon dalin tan mangiter na agmanampot iran bendisyon ed matulok a totoo. (Mateo 4:23) Nanlapuan na satan a mensahe? Oniay inkuan a mismo nen Jesus: “Say ibabangat ko et agmanlalapud siak, noagta manlalapud samay angibaki ed siak,” si Jehova. (Juan 7:16) Amta nen Jesus ya labay na Ama to ya naamtaan na totoo so maong a balita na Panarian. Diad Kapitulo 8, dakel ni naaralan tayo nipaakar ed Panarian na Dios tan no antoy gawaen na satan.

17. Iner so nambangatan nen Jesus, tan akin ya makulikulin nambangat?

¹⁷ Iner so nambangatan nen Jesus? Anggan iner ya kawalaan na totoo, diad kaumaan, saray syudad, baryo, tindaan, tan kaabungan. Agla inalagar nen Jesus ya onasingger ed sikato so totoo. Sikato so inmasingger ed sikara. (Marcos 6:56; Lucas 19:5, 6) Akin et makulikuli si Jesus tan inyuna tod bilay to so panagpulong tan panagbangat? Lapud atan so labay na Dios ya gawaen to. Naynay ya gagawaen nen Jesus so panlabayan na Ama to. (Juan 8:28, 29) Balet wala ni sananey ya rason no akin ya sikatoy nampulong. Akasian to ray totoo ya inmasingger ed sikato. (Basaen so Mateo 9:35, 36.) Pinaulyanan ira na saray lider na relihyon da, anta sikara komon so nepeg ya mangibangat na katuaan nipaakar ed Dios tan ed saray panlabayan to. Amta nen Jesus a kakkaukolan ya narengel na totoo so mensahe na Panarian.

18. Anto ran kualidad nen Jesus so labalabay mo?

 ¹⁸ Inar-aro nen Jesus iray totoo tan walay malasakit tod sikara. Kanian amta na arum ya sikatoy mainomay ya asinggeran tan mapangasi. Anggan saray ugugaw et agnatatakot ya onasingger ed sikato. (Marcos 10:13-16) Patas si Jesus ed amin. Kabusol toy amin ya klase na kurapsion tan panagsaol. (Mateo 21:12, 13) Nen panaon nen Jesus saray bibii et nibabaliwala tan agtanton rerespetoen, balet inikdan to ra na dignidad. (Juan 4:9, 27) Talagan mapaabeba si Jesus. Aminsan, inurasan toy sali na saray apostol to. Kaslakan ya say manggagawad satan et sakey ya abeban aripen.

19. Anton alimbawa so mangipanengneng ya malikas si Jesus ed pankaukolan na arum?

¹⁹ Si Jesus et malikas ed pankaukolan na arum. Talagan sankaimano itan nen pinaabig to ray mansasakit diad pakayari na espiritu na Dios. (Mateo 14:14) Singa bilang, nen inmasingger ed si Jesus so sakey ya akating a laki tan inkuan to: “No labay mo, sarag mo ak a linisan,” alikna nen Jesus  so ermen tan irap na sayan too. Lapud akasian to, inyunat toy lima to tan diniwit to, tan kuan to: “Labay ko! Nalinisan ka.” Tan inmabig so mansasakit a laki! (Marcos 1:40-42) Naiimadyin moy alikna na saman a laki?

20, 21. Panon ya impanengneng nen Jesus so katutulok ed Dios?

²⁰ Angipanengneng si Jesus na sankaabigan ya alimbawa na katutulok ed Dios. Sikatoy nansiansian matoor ed Ama to anggano mairap so situasyon, tan wala ray onkokontra tan mamapairap ed sikato. Determinadoy Jesus tan alabanan to ray tukso nen Satanas. (Mateo 4:1-11) Anggan saray mismon kakanayon to et ag-anisia ed sikato, tan inkuan dan “aderal lay ulo to.” (Marcos 3:21) Balet agnampaapekto si Jesus ed saratan, tuloytuloy ton ginawa so kimey na Dios. Anggano ininsulto tan pinairap si Jesus, kinontrol toy sarili to, tan agton balot sinakitan iray mamubusol ed sikato.​—1 Pedro 2:21-23.

 ²¹ Anggano si Jesus et pinairap tan maruksan pinatey na saray mamubusol ed sikato, sikatoy nansiansian matoor. (Basaen so Filipos 2:8.) Isip mo pay graben impan-anos to diad sampot lan agew na bilay to bilang too. Sikatoy inaresto, inakusaan na matitilan testigo, senentensiaan na mauges iran ukom, inelek-elekan na totoo, tan pinairap na saray sundalo. Nen manpapanabos lad kiew ya angipasakan ed sikato, oniay inyeyag to: “Asumpal la!” (Juan 19:30) Anggaman ontan, diad komatlon agew kayari na impatey nen Jesus, sikatoy pinaoli na Ama to tan nagmaliw lamet ya espiritu. (1 Pedro 3:18) Kayari na pigaran simba, sikatoy pinmawil ed tawen tan “yinmurong ed nikawanan na Dios.” Diman et nanalagar ya iter ed sikato so pakayari bilang Ari.​—Hebreo 10:12, 13.

22. Antoy maong ya agawaan na impanmatoor nen Jesus anggad patey?

²² Antoy maong ya agawaan na impanmatoor nen Jesus anggad patey? Lapud impatey to, naikdan tayoy pankanawnawan manbilay ya tuloytuloy diad paraison dalin, a panlabayan nen Jehova parad totoo. Aralen ed ontumbok a kapitulo no panon itan ya posible lapud impatey nen Jesus.