1, 2. (a) Ngera me a dodengelii a ngklel a merael a chisel el chad e ngdiak el belkul a kmo kede mera el medengelii? (b) Ngera el rraurreng a ngar er ngii el kirel a Jesus?

NGKMAL betok a merael a chisir el chad el ngar er tia el beluulechad. A rebebil a merael a chisir er a basio el lekiei er ngii me a rebebil a merael a chisir er a beluulechad el rokir. Engdi a di dodengelii a ngklel a chad el merael a chisel a diak el belkul a kmo, kede mera el medengelii. E le ngdiak dodengelii a omesodel a okurulel me a diak dodengelii el kmo ngkmal ua ngera el chad.

² A Jesus Kristus a kiliei er tia el chutem er a bekord el 2,000 el rak er a mla me mong, engdi te betok el chad el meliuekl er a beluulechad a mla remenges a chisel. Me nguaisei, engdi te betok a rrau a rengrir el kmo a Jesus ngmera el mle ua techa el chad. A rebebil a melekoi el kmo ngkuk di mle ta er a ungil el chad, me a rekmo ngmle ta er a profet. Me a ngar er ngii a oumerang el kmo a Jesus a Dios me ngkired el mengull el meluluuch el mo er ngii. Me ngmera el kired el mengull er ngii?

3. Ngera uchul me ngklou a ultutelel el bo modengelii a Jehovah el Dios me a Jesus Kristus?

³ Ngkmal klou a ultutelel el bo modengelii a klemerang el kirel a Jesus. E le Biblia a melekoi el kmo: “A diak  a ulebengelel klengar a belkul a kmo, bo lodengelkau el di ta el meral Dios, e bo lodengelii a Jesus Kristus el ngikel mulderchii el mei.” (Johanes 17:3) Me a dodengelii a klemerang el kirel a Jehovah el Dios me a Jesus Kristus e ngmo sebeched el mo nguu a diak a ulebengelel el klengar el ngar er a baradis el chutem. (Johanes 14:6) A Jesus a meskid a kot el ungil el kerebai el kirel a rolel a klengar er kid me a omerelled el mo er a rechad. (Johanes 13:34, 35) Ngar er a kot el bliongel, e kede milsaod er a klemerang el kirel a Dios. Chelechang, e me bo domes el kmo ngerang mera el lolisechakl a Biblia el kirel a Jesus Kristus.

4. Ngera belkul aika el dui el “Mesias” me a “Kristus”?

⁴ Betok el rak er a uchei er a lemechell a Jesus, e a Biblia a ulemlaoch el kirel a chad el bo loderechii a Dios el mo Mesias me a lechub e ng Kristus. Aika el dui el “Mesias” (el mlengai er a tekoi er a Hebru) me a “Kristus” (el mlengai er a tekoi er a Grik) a belkul a kmo “Ngike el Mlucheluch.” Ngar er a taem er a Biblia, e a chad a metutk el mo er a ileakl el deruchall sel lemoitel a cheluch er a bdelul. Me ngika el mle telbiil a mo mucheluch, el belkul a kmo, ngmetutk er a Dios el mo er a ileakl el deruchall. Ngar er a ulebengelel tia el babier, e kede mo mesuub a lmuut el betok el kirel a klou a ultutelel el ngerachel el loba Mesias er a chelsel a otutel a telbilel a Dios. Kede dirrek el mo mesuub el kirel aike el klengeltengat el sebeched el melai er chelechang el okiu a Jesus. Engdi, uchei er a lemechell a Jesus e te betok a locha millatk el kmo, ‘Ngtecha ngike el mo Mesias?’

5. Ngerang mle ulterekokl a rengrir er ngii a redisaiplo er a Jesus el kirel?

⁵ Ngar er a taem er a rekot el Kristiano, e a redisaiplo er a Jesus a mle ulterekokl a rengrir el kmo ngii el Jesus a ngike el mildung er a ulaoch el Mesias. (Johanes 1:41) A disaiplo el Simon Petrus a dilu er a Jesus el kmo: “Ikau a Kristus.” (Mateus 16:16, BT) Engdi te milekerang tirke el disaiplo e mle ulterekokl a rengrir el kmo a Jesus a mera el ngike el mla er a telbiil el Mesias? Me kid kede dirrek el mekerang e mo ulterekokl a rengud?

6. Ka msodii el kmo ngmilekerang a Jehovah e ngosuterir a reblak a rengrir el chad el mo dongchii a Mesias.

⁶ A reprofet er a Dios el kiliei er a uchei er a Jesus a uluuchais a betok el tekoi el kirel a Mesias. Aika el tekoi a mo ngosuterir a rechad el dongchii a Mesias. El di uai tiang: Omko ke mlodurech el mo er a kmal meseked el  bdelulachang el mo oltak er a chad el diak modengelii, e nglocha kmal mo ngosukau a lsekum a ta er a chad a uluuchais er kau a tekoi el kirel ngika el chad el otekiall. Me ngdi osisiu, a Jehovah a uluusbech er a reprofet el omeskid a komakai el omesodel a tekoi el bo loruul a Mesias me a tekoi el bo lecharm er a klengar er ngii, me bo el sebechir a reblak a rengrir el chad el mo dongchii.

7. Ngerang a eru er aike el ulaoch el mlotaut er a Jesus?

⁷ Ka molatk aika el eru el ulaoch. A kot, e ngbekord el 700 el rak er a uchei, e a profet el Mika a ulemlaoch el kirel ngike el mla er a telbiil el mo mechell er a Bethlehem, el kekerei el beluu er a Juda. (Mika 5:2) A Jesus ngmlechell er ker? Ngmlechell er tia el mats. (Mateus 2:1, 3-9) Ongerung, e a Daniel a ulemlaoch el ngar er a Daniel 9:25 el kmo, a Mesias a mo duum er a rak er a 29 C.E. * Me a otutel aikang me a lmuut el bebil er a ulaoch a meketeklii el kmo a Jesus a mera el ngike el mla er a telbiil el Mesias.

8, 9. Ngera olechotel el kmo a Jesus a Mesias a mlo bleketakl er a taem er a lemetecholb?

⁸ A lmuut el bebil er a olechotel a kmo a Jesus a mle Mesias a mlo bleketakl er a ulebengelel a rak er a 29 C.E. A Jehovah a tilbir el mo er a Johanes el kmo ngmo msa olengchelel a Mesias. Me a Jesus er a lebo er a Omoachel Jordan el mo metecholb, e a Johanes a milsa tia el olangch. A Biblia a ouchais el kmo: “Me ng di meltecholb a Jesus e mo tokerekl, e sola e a eanged a ulebok me ng milsa Reng er a Dios el ua teletelel a belochel el mer bebul. E a ngor a mlar a eanged e melekoi el kmo, ‘Ngkaikid a betik er a renguk el Ngelekek, el ngii odeuir a renguk.’” (Mateus 3:16, 17) Me a uriul er a leues e lerenges  aika el tekoi, e a Johanes a mlo ulterekokl a rengul el kmo a Dios a ulderchii a Jesus. (Johanes 1:32-34) Me sera lemetengel a chedaol reng me a lechub e ngoureor el klisichel a Dios er a bebul a Jesus, e ngmlo Mesias me a lechub e ng Kristus, el ngike el milengilt el mo Mengedereder el King.​—Isaia 55:4.

⁹ A otutel a ulaoch me a tekoi el lullekoi a Jehovah el Dios a bleketakl el ochotii el kmo a Jesus a ngike el mla er a telbiil el Mesias. Engdi a Biblia a onger a lmuut el eru er a meklou a ultutelel el ker el kirel a Jesus Kristus el kmo: Ngmla er ker el mei, e mle ua ngera el chad?

10. Ngera ngolisechakl a Biblia el kirel a Jesus er a uchei er a lemei er a chutem?

¹⁰ A Biblia a olisechakl el kmo a Jesus a kiliei er a eanged er a uchei er a lemei er a chutem. A Mika a ulemlaoch el kmo a Mesias a mo mechell er a Bethlehem me a uchelel a mla er a “kmal irechar” el mei. (Mika 5:2) A Jesus a mle betok el taem el lullekoi el kmo ngkiliei er a eanged. (Monguiu er a Johanes 3:13; 6:38, 62; 17:4, 5) Me sera lengar er a eanged, e ngmla er ngii a ileakl el deleuill er ngii me a Jehovah.

11. Ngmekerang a Biblia a lochotii el kmo a Jesus a mle kot el betik er a rengul a Jehovah el Ngelekel?

¹¹ A Jesus a kmal mle betik er a rengul a Dios el Ngelekel. “Ng Ngelekel el Sechal el okiu uchei e ngarbab er a ikel rokui el mle duubech” e le ngmle kot el blebelel a Dios. * (Kolose 1:15) Ngdirrek el ngar er ngii a ta er a tekoi el rullii el kmal ileakl. Ngii a “di tal Ngelekel” a Dios.  (Johanes 3:16) Tiang a belkul a kmo a Jesus a di mle ngii el tang a ulebeob er a Dios, e dirrek el di mle ngii el tang a luluusbech er ngii a Dios er a lomeob a rokui el tekoi. (Kolose 1:16) Ngdirrek el okedongall el “Tekoi.” (Johanes 1:14) Tiang a ouchais el kmo ngmle melekingel a Dios, el ullab a klumech me a ulekrael el mo er tirke el bebil er a rengelekel a Dios, el rechanghel me a rechad.

12. Kede mekerang e medengei el kmo ngike el kot el mlechell el Ngalek a diak el osisiu ngii me a Dios?

¹² Ngika el kot el mlechell el Ngalek ngosisiu ngii me a Dios? Ngdi ua aike el dulsaod, a Biblia a olisechakl el kmo a Ngalek a ulebeob. Me ngmla er ngii a uchelel, engdi Jehovah el Dios a diak a uchelel el diak a ulebengelel. (Psalm 90:2) Ngika el Ngalek a dirrek el dimlak a ta lolasem el mengaisisiu er ngii el mo er a Demal. Me a Biblia a bleketakl el olisechakl el kmo a Chedam a kuk ngarbab er a Ngalek. (Monguiu er a Johanes 14:28; 1 Korinth 11:3) E di ta el Jehovah a “Dios el Olab a Bek el Klisiich.” (Genesis 17:1) Me ngdiak a mo mekesiur. *

13. Ngera belkul sel lolekoi a Biblia el kirel a Ngalek el kmo ng “okesiul a diak le moues el Dios”?

¹³ A Jehovah me a Ngelekel a mle kaubltikerreng e uleldeu a rengrir er a kmes el deleuill er tir el betok el biliol el rak er a uchei er a lobeob a eanged me a chutem. (Johanes 3:35; 14:31) Ngika el Ngalek a kmal di mle ua Demal, a uchul me a Biblia a melekoi el kirel el kmo ng “okesiul a diak le moues el Dios.” (Kolose 1:15) Me ngdi ua ngalek el sechal el sebechel el ua demal er a betok el rolel, me ngika el Ngalek el ngar er a eanged a kmal mle ungil el okesiul a blekerdelel a Demal.

14. Ngmilekerang a di ta el Ngelekel a Jehovah e mle mechell er tia el chutem?

 ¹⁴ Ngika el di ta el ngelekel a Jehovah a kilengei el mei er a chutem el ua chad. Engdi ke locha mo melatk el kmo, ‘Ngmilekerang e sebechel a Jesus el kiliei er a eanged el me mechell el ua chad?’ A Jehovah a rirellii a ongasireng er a loiuelii a klengar er ngika el kot el Ngalek el Sechal er a eanged el mo er a omecherellel a klikiid el ekebil er a Juda el ngklel a Maria. Ngdimlak el bo lobengkel a chad el mo omekdubech er a klengar er ngii. Me a Maria a milechell er a cherrungel el ngalek el sechal e milengeklii el Jesus.​—Lukas 1:30-35.

15. Ngera uchul me kede melekoi el kmo ngoeak a Jesus e kede mo ungil el medengelii a Jehovah?

¹⁵ Aike el lullekoi me a lurruul a Jesus er sera lengar er tia el chutem a ngosukid el mo medengelii, e a ngar er a uchei er ngii, e kede mo ungil el medengelii a Jehovah. Ngoeak a ngera el rolel? Molatk el kmo, a Ngalek a mle cherrungel el okesiul a Demal, a uchul me ngdilu er a ta er a redisaiplo er ngii el kmo: “Ngikel mla mesekak a mla mesa Chedam.” (Johanes 14:9) Aike el eua el Ebangkelio, el babier er a Mateus me a Markus me a Lukas me a Johanes a ouchais er kid a betok el kirel a klengar er a Jesus Kristus me a tekoi el lurruul me a dirrek el blekerdelel.

16. Ngera mle klemechel a Jesus, e mla er ker el mei a osisecheklel?

¹⁶ A Jesus a mle merael a chisel el “Sensei.” (Johanes 1:38; 13:13) Ngera ngullisechakl? A klemechel a mle “Ungil Chais el kirel a Rengedel a Dios,” el ngii sel kabelment el ngar er a eanged el mo mengedereder er a beluulechad el rokir e mo uchul a diak a ulebengelel el klengeltengat el kirir a rebekongesenges el chad.  (Mateus 4:23) Tia el klumech ngmla er techang? A Jesus a di mle ngii el dmu el kmo: “A ikel kullisechakl a diak di losisecheklek; ng bai osisecheklel a Dios, el ngikel ulderchak,” el ngii a Jehovah. (Johanes 7:16) Ngmle medengei el kmo a Demal a soal a rechad a lrengesii tia el ungil chais el kirel a Renged. Me ngngar er a 8 el Bliongel, e kede mo mesuub a betok el kirel a Rengedel a Dios me aike el bo loruul.

17. A Jesus ngullisechakl er ker, e ngera uchul me ngmilengoit er a klou el temel el olisechakl er a rechad?

¹⁷ A Jesus ngullisechakl er ker? Ngullisechakl er aike el lemla er ngii a rechad, me ngmlo er a ikrel me a chelsel a beluu me a mats me a blil a makit me a blirir a rechad. Ngdimlak longiil er a rechad el mo er ngii. (Markus 6:56; Lukas 19:5, 6) Me ngera uchul me ngmilengoit er a klou el temel el olisechakl er a rechad? E le ngmle moktek er a Dios el kirel, e ngii a mle blechoel el meruul a  soal a Demal. (Johanes 8:28, 29) Engdi ngdirrek el ulemerk a klumech e le ngmle chubteterir tirke el chad el mlo omes er ngii. (Monguiu er a Mateus 9:35, 36.) A remengeteklel a klechelid el tir a mle kirir el olisechakl el kirel a Dios me a moktek er ngii a ullechib a osengir er tir. Engdi a Jesus a mle medengei el kmo ngmle kirir a rechad el rongesii a klumech er a Renged.

18. Ngera el blekerdelel a Jesus a kmal soam?

¹⁸ A Jesus a kmal mle betik a rengul e chubechubechad. Ngmle bekokuii e beot er a rechad a mengedecheduch er ngii, me ngmo lmuut er a rengalek me ngdimlak el medakt el mo kmeed er ngii. (Markus 10:13-16) Ngdirrek el dimlak longetukel er a rechad e uluuketui a chelebirukel. (Mateus 21:12, 13) Ngkiliei er a taem el dimlak a kmal techall me a omengull el mo er a redil, engdi ngullecholt el kmo te mle meklou a ultutelir. (Johanes 4:9, 27) Ngmera el mle ngariou a rengul, me ngmle ta el loriso a  ocherir a rechapostol er ngii, el ngii a urerel a ngariou el mesiou.

19. Ngera olecholt el kmo a Jesus a mle kerekikl aike el lousbech a rechad?

¹⁹ A Jesus a mle kerekikl aike el lousbech a rechad. Tiang a kmal sebeched el mesang er a lousbech er a chedaol reng er a Dios el omekungil a rakt. (Mateus 14:14) El uai tiang, ngmla er ngii a chad el silecher el chebedes el mlo er a Jesus e dilu el kmo: “Chomko ng soam, e ng sebechem el kikidak.” Me a Jesus a mlo mekngit a rengul e le ngmilechesuar er a rengelel ngii el chad. Me nguldersii a chimal el rutechii e dilu el kmo: “Ng soak, me bo mklikiid!” Me ngii el chad a mlo ungil er a rektel! (Markus 1:40-42) Ka di molatk er a deuil a rengul ngii el chad!

20, 21. Ngmilekerang a Jesus e kutmeklii a ungil el kerebai er a blekongesenges el mo er a Dios?

²⁰ A Jesus a ulechotii a kot el ungil el kerebai er a blekongesenges el mo er a Dios. Ngmillemolem el blak a rengul e uluutekangel a bek el bedengel a ultok me a ringel. Ngmle ulterekokl a uldesuel e mlo mesisiich er a omengarm er a Satan. (Mateus 4:1-11) Ngmla er ngii a taem e a rechedal a dimlak loumerang er ngii, e millekoi el kmo ng “mla mo kebelung.” (Markus 3:21) Engdi a Jesus a dimlak el bechititerir me lengedechii a uldesuel, e di millemolem el meruul a urerel a Dios. Me alta ngchilarm a otuub me a ringel, engdi ngdimlak lolaitechei.​—1 Petrus 2:21-23.

²¹ A Jesus a mle blak rengul el mo lmuut er a meringel el kodall er a chimorir a recherrouel. (Filipi 2:8) Ka molatk aike el tekoi el chilarm er a ulebengelel a klengar  er ngii. Ngmlekelebus, e mlotelechakl er a reklsuul el ocholt, e mloterekokl el kmo ngmekngit er a remechebirukel el chad er a kerrekeriil, e meldenguul er a seked, e mlukcharm er a resoldau. Me a ledeleel er a kerrekar, e longoit a telil, e nguleldiu el kmo: “Ngmla mecherrungel a rokui el tekoi!” (Johanes 19:30; Rellir 5:30, BT) Ngar er a ongedei el klebesei er a uriul er a kodellel, e a Demal a ulekisii. (1 Petrus 3:18) A sesei el sandei er a uriul, e ngliluut el mo er a eanged. Ngar er isei, e ngmlo “dengchokl ra kidekmel a Dios” e mlengiil er a taem el bo el nguu a klisichel a kleking.​—Hebru 10:12, 13.

22. Ngera ngkiltmeklii a Jesus er a lolemolem el blak a rengul el mo lmuut er a kodall?

²² Me ngngera ngkiltmeklii a Jesus er a lolemolem el blak a rengul el mo lmuut er a kodall? Ngokiu a kodellel, e ngar er ngii a techelled el mo kiei el diak a ulebengelel el ngar er a baradis el chutem, el oltirakl er sel mle moktek er a Jehovah er a kot el uchul. Ngar er a ongingil el bliongel, e kede mo mesaod el kmo ngmekerang a kodellel a Jesus e kutmeklii tia el tekoi.