1, 2. (a) Ke ku manda obi faladu di un algin famosu ka signifika kuma bu kunsil diritu? (b) Kal konfuson ku ten aserka di Jesus?

I ten manga di jintis famosu na mundu. Alguns kunsidu diritu na se propi bairu, sidadi o pais. Utrus kunsidu na mundu ntidu. Ma, so kunsi nomi di un algin famosu ka signifika kuma bu kunsil diritu. I ka signifika kuma, bu sibi tudu aserka di si formason i kin propi ki sedu.

² Jintis na mundu ntidu obi faladu di Jesus Kristu, mesmu pa manera ki vivi na Tera serka di 2 mil anus atras. Ma, manga di jintis sta konfusu aserka di kin propi ki Jesus seduba. Alguns ta fala i seduba so un bon algin. Utrus ta fala i so un profeta. Utrus ta fia ki Jesus i Deus i dibi di adoradu. Sera ki i dibi di adoradu?

3. Ke ku manda i importanti pa bu kunsi Jeova Deus ku Jesus Kristu?

³ I importanti pa bu kunsi bardadi aserka di Jesus. Pabia di ke? Pabia Biblia fala: “Vida ku ka ta kaba i es: Pa tudu jinti kunsiu, abo son, uniku Deus di bardadi, ku Jesus Kristu, kil ku bu manda.” (Anos ku pui italiku; Jon 17:3) Na bardadi, kunsi bardadi aserka di Jeova Deus ku Jesus Kristu pudi da vida ku ka ta kaba na paraisu na Tera. (Jon 14:6) Alen di kila, Jesus disa minjor izemplu na manera di vivi i di trata utrus.  (Jon 13:34, 35) Na purmeru kapitulu des livru, no falaba di bardadi aserka di Deus. Gosi no na fala di ke ki Biblia na bardadi ta sina aserka di Jesus Kristu.

4. Ke ki signifika titulus “Mesias” ku “Kristu”?

⁴ Manga di tempu antis di Jesus padidu, Biblia falaba ja di ŝegada di kin ku Deus na manda suma Mesias o Kristu. Titulus “Mesias” (na lingua ebraiku) ku “Kristu” (na lingua gregu) signifika “Unjidu.” Es algin purmitidu na unjidu, ki signifika, i na kujidu pa Deus pa un kargu spesial. Na  utrus kapitulus des livru, no na bin aprindi mas aserka di funson importanti di Mesias na kumprimentu di promesas di Deus. No na bin aprindi tambi aserka di bensons ku Jesus pudi danu desdi gosi. Antis di Jesus padidu, sin duvida, manga di jintis staba na punta, ‘Kin ki na sedu Mesias?’

5. Disipulus di Jesus staba konvensidu di ke, aserka del?

⁵ Na purmeru sekulu E.K., disipulus di Jesus di Nazare staba konvensidu di ki Jesus i Mesias ku faladuba del. (Jon 1:41) Un di disipulus, un omi comadu Simon Pedru, fala Jesus di un manera klaru: “Abo i Mesias.” (Mateus 16:16) Ma, kuma ki kil disipulus pudiba tene serteza di kuma, na bardadi Jesus i Mesias purmitidu, i kuma ki anos aos, no pudi tene serteza?

6. Da zemplu di kuma ki Jeova juda jintis fiel identifika Mesias.

⁶ Profetas di Deus ku viviba antis di Jesus falaba di manga di nformasons aserka di Mesias. Es nformasons na judaba utrus identifika Jesus suma Mesias. No pudi splikal atraves des izemplu: Imaẑina bu pididu pa bu bai buska un algin ku bu ka kunsi, na paraẑen o eroportu. I ka na seduba di ajuda si un algin dauba alguns nformason aserka del? Di mesmu manera, atraves di profetas bibliku, Jeova daba nformason sufisienti aserka di ke ki Mesias na fasi i ke ki na bin pasa kel. Kumprimentu des manga di profesias na juda jintis fiel identifika Mesias sin purblema.

7. Kal dus profesias ki kumpri na Jesus?

⁷ Jubi so dus izemplu. Purmeru, mas di 700 anus antis, profeta Mikeias falaba kuma, Mesias purmitidu na padidu na Belen, un sidadi siñu na tera di Juda. (Mikeias 5:2) Nunde ki Jesus bin padidu? Na  ki sidadi propi! (Mateus 2:1, 3-9) Sugundu, manga di sekulus antis, palabras profetiku di Daniel falaba di anu izatu ki Mesias na bin — 29 E.K. * Kumprimentu des i di utrus profesias ta prova ki Jesus i Mesias purmitidu.

8, 9. Ke ki akontisi na batismu di Jesus ku ta prova kuma el i Mesias?

⁸ Mas prova di kuma Jesus i Mesias torna klaru na anu 29 E.K. Es seduba anu ku Jesus bai pa Jon Batista pa sedu batizadu na riu Jordon. Jeova purmiti Jon un sinal ku na judal identifika Mesias. Jon oja kil sinal na batismu di Jesus. Biblia fala: “N oja Spiritu na ria di seu suma pumba, i para riba del.  . . . ma Deus ku mandan pa N batisa ku yagu i falan: ‘Kil ku bu oja Spiritu para riba del, el ku na batisa ku Spiritu Santu.’ N bin ojal, N diklara kuma el i Fiju di Deus.” (Jon 1:32-34; Mateus 3:16, 17) Dipus di oja ke ki pasa, Jon ka tene duvida di kuma, Jesus mandadu pa Deus. Na mumentu ku spiritu di Deus, o forsa ativa di Deus, darmadu riba del, Jesus torna Mesias, o Kristu, algin ku kujidu pa sedu Lider i Rei. — Isaias 55:4.

⁹ Kumprimentu di profesia di Biblia ku propi tustumuñu ku Jeova da, mostra di manera klaru ki Jesus seduba Mesias purmitidu. Ma Biblia ruspundi manga di purguntas importanti aserka di Jesus Kristu. No na fala di dus des purguntas. Purmeru i: Di nunde ki bin? Sugundu i: Kal tipu di algin ki sedu? Gosi, no na oja resposta di purmeru purgunta: “Di nunde ki bin?”

10. Ke ki Biblia sina aserka di izistensia di Jesus antis di i bin pa Tera?

¹⁰ Biblia ta sina kuma, Jesus viviba na seu antis di i bin pa Tera. Mikeias falaba ki Mesias na padidu na Belen i fala tambi ki si oriẑen i di “tempus mas antigu.” (Mikeias 5:2) Manga di bias, propi Jesus fala ki, i viviba na seu antis di i padidu suma omi. (Lei Jon 3:13; 6:38, 62; 17:4, 5) Suma kriatura spiritual na seu, Jesus teneba un relason spesial ku Jeova.

11. Kuma ki Biblia mostra ki Jesus i Fiju ku Jeova mas ama?

¹¹ Jesus i Fiju ku Jeova mas ama — i pa un bon motivu. I comadu di “purmeru Fiju ku sta riba di tudu kriason,” pabia el i purmeru kriason di Deus. * (Kolosensis 1:15) I ten inda utru kusa ku fasi es Fiju sedu spesial. El i “uniku Fiju.” (Jon 3:16) Es signifika ki Jesus i uniku ku kriadu diretamenti pa Deus. Jesus tambi i uniku ku Deus usa pa kumpu tudu utru kusas. (Kolosensis 1:16) Jesus comadu tambi di “palabra.” (Jon 1:14) Es signifika ki i ta papiaba na nomi di Deus, sin duvida i ta transmiti mensaẑens ku orientasons pa utrus fijus di si Pape, kilis ku sta na seu suma kilis ku sta na Tera.

12. Kuma ki no sibi kuma Deus ku Jesus i ka mesmu algin?

¹² Sera ki Deus ku Jesus i mesmu algin, suma ki alguns ta fala? I ka es ki Biblia ta sina. Suma ku no oja na paragrafus antis, Fiju kumpudu. Asin, i tene kumsada, nkuantu ki Jeova Deus ka tene kumsada nin fin. (Salmu 90:2) Nunka uniku Fiju ka ciga di pensa sedu  igual ku si Pape. Biblia sina di manera klaru ki, Pape tene mas puder di ki Fiju. (Lei Jon 14:28; 1 Koríntius 11:3) So Jeova “ku ten tudu puder.” (Kumsada 17:1) Pa kila, i ka ten kumpañer. *

13. Ke ki Biblia misti fala ora ki fala di Fiju suma “parsensa di ki Deus ku ka ta ojadu”?

¹³ Jeova ku si Fiju Jesus teneba un relason intimu pa bilyons di anus — antis di seu, strelas ku Tera kumpudu. E teneba amor garandi pa n̈utru! (Jon 3:35; 14:31) Es Fiju amadu parsi si Pape. E ku manda Biblia fala di Fiju suma “parsensa di ki Deus ku ka ta ojadu.” (Kolosensis 1:15) Suma ki un fiju pudi parsi ciu ku si pape di manga di maneras, es Fiju ku sta na seu mostraba kualidadis ku personalidadi di si Pape.

14. Kuma ki pusivel pa Jesus padidu suma un omi?

¹⁴ Di livri vontadi, uniku Fiju di Jeova disa seu i bin pa Tera pa vivi suma un omi. Ma, talves bu na punta, ‘Kuma ki pusivel pa un kriatura spiritual padidu suma un omi?’ Pa kila pudi sedu, Jeova fasiba un milagri. I muda vida di si purmeru Fiju di seu pa bariga di un virẑen Judeu comadu Maria. Nin un pape umanu ka staba nvolvidu. Asin, Maria padi un fiju perfeitu i dal nomi di Jesus. (Lukas 1:30-35) Gosi, no na jubi sugundu purgunta: ‘Kal tipu di algin ki sedu’?

15. Ke ku manda no pudi fala kuma, atraves di Jesus no pudi kunsi Jeova minjor?

¹⁵ Ke ki Jesus fala i ke ki fasi oca i staba na Tera ta judanu kunsil diritu. Alen kila, atraves di Jesus, no ta pasa kunsi Jeova minjor. Ke ku manda i sedu sin?  Lembra kuma es Fiju parsi ku si Pape di un manera perfeitu. E ku manda Jesus fala un di si disipulus: “Kin ku ojan, i oja ña Pape.” (Jon 14:9) Kuatru livrus di Biblia kunsidu suma Ivanjelius — Mateus, Markus, Lukas ku Jon — ta kontanu mas aserka di vida, atividadi ku kualidadis di Jesus Kristu.

16. Kal ki mensaẑen prinsipal di Jesus, i nunde ku si nsinus bin?

¹⁶ Jesus kunsiduba suma “Mestre” o sinadur. (Jon 1:38; 13:13) Ke ki ta sinaba? Purmeru, si mensaẑen i “Bon Noba di renu” — ku sedu, Renu di Deus, guvernu ku sta na seu ki na bin guverna mundu ntidu i tisi bensons sin fin pa pekaduris obdienti. (Mateus 4:23) Es mensaẑen i di kin? Jesus propi fala: “Ña nsinamentu i ka di mi, ma i di kil ku mandan,” ku sedu, Jeova. (Jon 7:16) Jesus sibiba kuma si Pape misti pa jintis obi bon noba di Renu. Na Kapitulu 8 no na bin aprindi mas aserka di Renu di Deus i ke ki i na bin fasi.

17. Nunde ku Jesus ta sinaba, i ke ku manda i ta fasiba manga di sforsu pa sina utrus?

¹⁷ Nunde ku Jesus ta sinaba? Na kualker kau ki oja jintis — na pontas, na sidadis, na tabankas, na fera i na se kasas. Jesus ka ta peraba pa jintis bin nunde el. I ta baiba nunde elis. (Markus 6:56; Lukas 19:5, 6) Ke ku manda Jesus ta fasiba manga di sforsu i gasta manga di tempu pa prega i sina? Pabia kila seduba vontadi di Deus pa rel. Jesus sempri ta fasi vontadi di si Pape. (Jon 8:28, 29) Ma i tenba utru motivu ku manda i ta pregaba. I ta sintiba pena di manga di jintis ku ta baiba nunde el. (Lei Mateus 9:35, 36.) E ignoraduba pa se lideris riliẑiozu, ku dibi di sinaba elis bardadi aserka di Deus i di si intenson. Jesus sibiba kuma, jintis teneba nesesidadi garandi di obi mensaẑen di Renu.

18. Kal kualidadis di Jesus ku bu mas gosta del?

 ¹⁸ Jesus i un algin ku ta mostraba amor i ta sintiba pa utrus. Utrus ta nkaralba suma un algin abertu i bondosu. Te mesmu mininus ta sintiba avontadi kel. (Markus 10:13-16) Jesus ka ta diferensia jintis. I odiaba kurupson ku injustisa. (Mateus 21:12, 13) Na tempu ku minjeris ta daduba puku rispitu i puku opurtunidadis, i trataba elis ku dignidadi. (Jon 4:9, 27) Jesus mostraba umildadi di bardadi. Un bias, i laba pe di si apostulus, un tarbaju ku ta fasiduba pa un simplis kriadu.

19. Kal izemplu ku ta mostra ki Jesus ta sintiba pa kilis ku sta na nesesidadi?

¹⁹ Jesus ta sintiba pa kilis ku sta na nesesidadi. Es ojaduba kontra i fasiba milagris pa kura jintis ku ajuda di spiritu di Deus. (Mateus 14:14) Pur izemplu, un omi leprosu bai pa Jesus i falal: “Si bu misti, bu pudi limpan.” Jesus sinti dur ku sufrimentu de omi. Motivadu pa pena, Jesus distindi si mon i toka omi i falal: “N misti. Fika limpu!” I omi duenti kuradu! (Markus 1:40-42) Bu pudi imaẑina kuma kes omi sintiba?

20, 21. Kuma ki Jesus disa un bon izemplu di obdiensia leal pa Deus?

²⁰ Jesus disa minjor izemplu di obdiensia leal pa Deus. I kontinua sedu fiel pa si Pape ku sta na seu bas di tudu tipu di situasons, opusison ku sufrimentu. Jesus risisti ku firmeza i ku susesu tentasons di Satanas. (Mateus 4:1-11) I tenba un tempu, alguns membrus di propi familia di Jesus ka fiaba nel, te mesmu e falaba ki “si kabesa ka sta diritu.” (Markus 3:21) Ma, Jesus ka disa pa e nfluensial; i kontinua fasi tarbaju di Deus. Mesmu dianti di nsultus ku abusu, Jesus kontrola si kabesa, nunka i ka tenta fasi si inimigus mal. — 1 Pedru 2:21-23.

²¹ Jesus kontinua sedu fiel te na mortu — un mortu ku manga di dur na mon di si inimigus. (Lei Filipensis 2:8.) Imaẑina ke ki aguenta na ultimu dia di si vida suma omi. I prindidu, akusadu pa tustumuñus falsu, kondenadu pa juizis kuruptu, gozadu pa manga di jintis i turturadu pa soldadus. Pregadu na staka, i da si ultimu folgu i grita risu: “I sta kompletu.” (Jon 19:30) Ma, na tirseru dia dipus di Jesus muri, si Pape ku sta na seu resusital suma un kriatura spiritual. (1 Pedru 3:18) Korenta dias dipus, i riba pa seu. La na seu, i “sinta na mon direita di Deus” i na pera pa risibi puder suma rei. — Ebreus 10:12, 13.

22. Kal opurtunidadi ki Jesus yabri pa manera ki kontinua fiel te na mortu?

²² Kal opurtunidadi ki Jesus yabri pa manera ki kontinua fiel te na mortu? Mortu di Jesus yabri opurtunidadi pa vida ku ka ta kaba na un paraisu na Tera, konformi intenson ki Jeova teneba na kumsada. Kuma ki mortu di Jesus torna kila pusivel, na bin faladu del na prosimu kapitulu.