1, 2. a) ¿Juk runata riqsisunmanchu sutillanta yachaspa? b) ¿Imatataq runas Jesucristomanta pantasqata yuyanku?

KAY pachapiqa, may riqsisqa runas tiyan. Wakinkunaqa llaqtankupi, suyunkupi, wakinkunataq Jallpʼantinpi riqsisqa kanku. Chaywanpis, juk runap sutillanta yachaspaqa, mana nisunmanchu chay runata riqsisqanchikta, imaraykuchus mana yachanchikchu imayna runachus kasqanta.

² Jesucristo Jallpʼaman jamusqanmanta iskay waranqa wataña kaptinpis, runasqa paymanta parlallankupuni, chaywanpis pichus kasqanta mana allinta yachankuchu. Runasqa, Jesús kʼacha runalla kasqanta, profetalla kasqanta ima ninku. Wakinkunataq Jesús Diosllataq kasqanta yuyasqankurayku payta yupaychanata ninku. ¿Jinachu kanman?

3. ¿Imaptintaq Jesucristomanta chiqata yachanayki tiyan?

³ Qamqa, chiqata Jesucristomanta yachanayki tiyan. ¿Imaptintaq? Biblia jinata kutichiwanchik: “Kaymin chay wiñay kawsayqa: Qan kʼata cheqa Diosta rejsisunanku, kachamusqayki Jesucristotapis”, nispa (Juan 17:3). Arí, Jehovamanta, Jesusmanta, chiqata yachaspaqa, paraisopi wiñaypaq kawsayta atinki (Juan 14:6). Chantapis, Jesusmanta yachakuyqa, wakkunawan allinta  kawsakunaykipaq, allinta apanakunaykipaq ima, yanapasunqa (Juan 13:34, 35). Ñawpaq kaq yachaqanapi, Diosninchikmanta yachakurqanchikña. Kunantaq, Biblia imatachus Jesucristomanta yachachisqanta yachakusunchik.

4. ¿Imatataq Cristo, chayri Mesías niyta munan?

⁴ Manaraq Jesús paqarikuchkaptin, Bibliaqa, Diosninchikpa  akllasqan chayamunanta willarqaña, paytaq Mesías chayri Cristo sutichasqa kanan karqa. Hebreo simipi Mesías, chayri griego simipi Cristo rimayqa, akllasqa chayri ungido niyta munan. Kay Diospa akllasqanqa, Diospa munayninta ruwananpaq churasqa kachkan. Qhipan yachaqanaspi Diospa munaynin juntʼakunanpaq imatachus Mesías ruwasqanta imatachus ruwananta ima yachakusunchik. Chantapis, Jesucristo imaynatachus kunan tiempopipis tʼinkawasqanchikta yachakullasunchiktaq. Jesús manaraq paqarikuchkaptin runasqa tapukuq kanku: “¿Pitaq Mesías kanqarí?”, nispa.

5. ¿Imatataq Jesuspa discipulosnin allinta yacharqanku?

⁵ Jesuspa discipulosnin, Jesús Mesías kasqanta allinta yacharqanku (Juan 1:41). Pedro jinata nirqa: “Qanqa Cristo kanki”, nispa (Mateo 16:16). ¿Imaptintaq discipulosnin Jesús Diospa akllasqan kasqanta nirqanku? ¿Imaynatataq ñuqanchikpis Jesús Mesías kasqanta yachasunman?

6. ¿Imaynamanta Mesiasta riqsinanku karqa?

⁶ Ñawpa profetasqa tukuy imata Jesusmanta qillqarqanku, pichus Mesías kasqanta yachanapaq. Tʼukuriy, ichapis mana riqsisqa runata feriapi maskʼamunayki tiyan, ¿manachu imayna pʼachallisqachus kasqanta yachay, tarinaykipaq yanapasunkiman? Jinallataq Mesiaswanpis, Jehová profetasniqta, imatachus Mesías ruwananmanta, ñakʼarinanmanta ima willarqa. Kay profeciasta juntʼakuqta rikuspa, chiqa sunqu runasqa pichus Mesías kasqanta reparankuman karqa.

7. ¿Ima iskay profeciastaq Jesuspi juntʼakurqa?

⁷ Iskay profeciasta qhawarina. Profeta Miqueas, manaraq Jesús paqarikuchkaptin qanchis pachak wata ñawpaqta, Mesías juchʼuy Belén llaqtapi paqarikunanta willarqa (Miqueas 5:2). ¿Maypitaq Jesús paqarikurqarí?  Kikin chay Belenpi (Mateo 2:1, 3-9). Profeta Danieltaq, Daniel 9:25, pʼitipi, phichqa pachak wata ñawpaqtaña willarqa Mesías 29 kunan pacha watapi chayamunanta. * Tukuy profecías juntʼakusqanqa, Jesús Mesías kasqanta rikuchiwanchik.

8, 9. ¿Imaynatá Jesús bautizakuchkaptin Mesías kasqan rikukurqa?

⁸ Iskay chunka jisqʼunniyuq wata tukukuchkaptin, sutʼimanta Jesús Mesías kasqan rikukurqa. Jesusqa, Juan Bautistaman rirqa, Jordán mayupi bautizakunanpaq. Jehovaqa, Juanman imaynamantachus Mesiasta riqsinanta willarqa, Jesús bautizakuchkaptintaq chayta rikuchirqa. Jinata Biblia nin: “Jesús bautizachikuytawan yakumanta llojsishajtin, cielo kicharikorqa, rikorqataj Diospa Espiritunta paloma jina paypa patanman uraykʼamushajta. Jinallapi janaj pachamanta Dios nimorqa: Kaymin ancha munasqa Chureyqa. Paywan sonqo juntʼasqa kani”, nispa (Mateo 3:16, 17). Juantaq chayta rikuytawan, Jesús Diospa akllasqan kasqanta yacharqa (Juan 1:32-34). Diospa espiritun Jesusman uraykamusqanmantapacha, payqa Mesiasman chayri Cristoman tukurqa. Jinamanta kamachinanpaq akllasqa karqa (Isaías 55:4).

⁹ Bibliap profeciasnin, Jehovap nisqan ima, Jesuspuni Mesías kasqanta rikuchiwanchik. Chantapis Bibliaqa, maymantachus Jesús jamusqanta, chantapis imayna runachus kasqanta willawanchik.

10. ¿Imatataq Jesús wiñaymantapacha kasqan niyta munan?

¹⁰ Bibliaqa, manaraq Jesús kay Jallpʼaman jamuchkaptin, janaqpachapi kawsakusqanta niwanchik. Mana Belenpi  paqarikusqallantachu willawanchik, manaqa profeta Miqueasniqta, “wiñaymantapacha” kasqanta willallawanchiktaq (Miqueas 5:2). Chantapis, Jesucristollataq janaqpachamanta jamusqanta nirqa (Juan 3:13; 6:38, 62; 17:4, 5). Janaqpachapiqa angeljina kawsarqa, Diospa munasqa Churintaq karqa.

11. ¿Imaptintaq Jesús Diospa munasqa Churin karqa?

¹¹ Jesusqa, Diospa munasqa churin. Diosninchikqa, Jesusta tukuy imamanta ñawpaqta ruwarqa. Bibliaqa, Jesuspi ‘Diospa tukuy ruwasqasnin qallarikusqanta’ niwanchik (Apocalipsis 3:14). * Astawanpis, Diosninchik Jesusta munakun ‘kʼata Churin’ kasqanrayku (Juan 3:16). Diosqa, sapallan Jesusta ruwarqa, chayrayku kʼata Churin. Chantapis, Jehová tukuy imata ruwachkaptin, Jesús payta yanaparqa (Colosenses 1:16). Chantapis Jesustaqa, ‘Palabra’ nispa sutichakun, Tatanpa sutinpi parlasqanrayku (Juan 1:14). Jesusqa, angelesman, runasman ima, Diospa parlasqanta willarqa.

12. ¿Jesucristowan Diosninchikwan kikinchu kanku?

¹² ¿Jesucristowan Diosninchikwan kikinchu kanku? Bibliaqa, mana chayta yachachinchu. Rikunchikjina, Diosninchik Jesusta ruwarqa, chaymantapacha Jesús kawsayta qallarirqa. Mana chaymanjinataq Jehovaqa, wiñaymanta wiñaykama kawsan, payqa mana qallariyniyuqchu (Salmo 90:2). Diospa kʼata Churinqa, mana jaykʼaq Tatanwan kikinchakurqachu, manaqa, payllataq jinata nirqa: Tatayqa “noqamanta kuraj”, nispa (Juan 14:28; 1 Corintios 11:3). Jehová Dioslla “Tukuy  Atiyniyoj” (Génesis 17:1). Mana pipis paywan kikinchakunchu. *

13. ¿Imatataq Jesús niyta munarqa, “noqata rikuwajqa Tataytapis rikun”, nispa?

¹³ Manaraq, Jallpʼapis, chʼaskakunapis ruwakuchkaptin Jehovawan, Churinwan may chhika unaytaña khuska karqanku, chay chhika unaypitaq, sumaqta masichakurqanku. ¡Anchatachá munanakurqanku! (Juan 3:35; 14:31.) Chayrayku, kay munasqa Churinqa, Tatanjina karqa. Jesús nirqa: “Noqata rikuwajqa Tataytapis rikun”, nispa (Juan 14:9). Imaynatachus juk wawa tatanman rikchʼakun, kikillantaq Diospa Churinqa Tatanman tukuy imapi rikchʼakun.

14. ¿Imaynatá Diospa kʼata Churin, runajina paqarikurqa?

¹⁴ Diospa kʼata Churin Jallpʼaman jamunanpaqqa, janaqpachata saqirqa. Ichapis tapukunki: “¿Imaynatá juk angeljina kaspa runaman tukurqa?”, nispa. Jehovaqa juk milagrota ruwarqa. Kʼata Churinpa kawsayninta, juk mana qharip chayasqan sipaspa wiksanman churarqa, chay sipastaq María sutikurqa. Mariap wawanqa, Diospa Churin kasqanrayku, mana juchayuq, juntʼa runa karqa. Chay wawatataq Mariaqa Jesús nispa suticharqa (Lucas 1:30-35).

15. ¿Imaynatá Jesusniqta Jehová Diosta riqsisunmanrí?

¹⁵ Jesusta riqsisunman, Jallpʼapi kachkaspa imatachus parlasqanta, ruwasqanta ima yachaspa. Chantapis, Jesusniqta Jehovata astawan riqsisunman. ¿Imaynatá? Yuyariy, Jesús Diosninchikman rikchʼakun, chayrayku Jesús  discipulosninman nirqa: “Noqata rikuwajqa Tataytapis rikun”, nispa (Juan 14:9). Mateo, Marcos, Lucas, Juan ima Evangeliospi, Jesuspa kawsayninmanta, ruwasqasninmanta, kʼacha kaykunasninmanta ima, astawan yachakusunman.

16. ¿Imamantataq Jesús yachachirqa, yachachisqantaq piqpatataq karqarí?

¹⁶ Jesustaqa, “Yachachej” niq kanku (Juan 1:38; 13:13). ¿Imamantataq pay yachachirqa? “Reinoj evangelionmanta” chayri Reinomanta allin willaykunata yachachirqa. Kay Reinoqa, janaqpachamanta Jallpʼaman kamachimunqa, Diosta yupaychaqkunatataq, mayta bendecinqa (Mateo 4:23). Jesuspa yachachisqan, ¿piqpatataq karqarí? Jesusllataq kutichirqa: “Kay yachachisqayqa mana noqajtachu, manachayqa Kachamuwajniypata” chayri Jehovapta (Juan 7:16). Diosninchik tukuy runas Reinonmanta uyarinankuta munarqa. Chaytataq Diospa Churinqa yacharqa. Pusaq yachaqanapi Diospa Reinonmanta astawan yachakusunchik.

17. ¿Maypitaq Jesús yachachirqa, imaptintaq chayjinatapuni yachachirqarí?

¹⁷ ¿Maypitaq Jesús yachachirqarí? Tukuyniqpi, ranchospi, llaqtaspi, campospi, qhatuspi, wasispi ima. Jesusqa, mana payman runa jamunantachu suyarqa, manaqa, pay runata maskʼarqa (Marcos 6:56; Lucas 19:5, 6). ¿Imaraykutaq chayjinatapuni willarqa, yachachirqa ima? Diospa munaynin kasqanrayku, Jesustaq Diospa munayninta ruwaqpuni (Juan 8:28, 29). Chantapis, Jesusqa runasmanta khuyakurqa (Mateo 9:35, 36). Religionta kamachiqkuna, runasman Diospa munayninta yachachinanku karqa, chaywanpis, jinallata saqirpasqanku, chayta rikuspataq Jesús Diospa kamachiyninmanta runasman yachachirqa.

18. ¿Jesuspa ima kʼacha kaykunasnintataq astawan allinpaq qhawanki?

 ¹⁸ Jesusqa kʼacha runa karqa, tukuymanta llakikuq. Runasta kʼachamanta parlapayaq, chayrayku wawaspis mana manchachikuspalla payman qayllaykuq kanku (Marcos 10:13-16). Tukuyta allinpaq qhawaq, chaywanpis llukʼiqkunata, mana chiqan kaqmanjina ruwaqkunata ima chiqniq (Mateo 21:12, 13). Chantapis, chaypacha warmistaqa mana allinpaqchu qhawaq kanku, chaywanpis Jesusqa, warmista jatunpaq qhawaspa, paykunawan parlaq (Juan 4:9, 27). Jesusqa, llampʼu sunqu runa karqa. Juk kutiqa, discipulosninpa chakisninta mayllarqa.

19. ¿Imaynatá Jesús runamanta khuyakusqanta yachanchik?

¹⁹ Jesusqa, runata llakisqata rikuspa khuyarqa, Diospa atiyninwantaq unqusqa runasta sanoyachirqa (Mateo 14:14). Juk kuti leprawan unqusqa juk runa, Jesusta nirqa: “Munankichus chayqa, atinki sanoyachiwayta”, nispa.  Jesustaq chay runata rikuspa sunqunta nanachikurqa. Khuyakuspataq, makinwan llamkhaytawan nirqa: “Arí, munani; llimphuchasqa kay”, nispa. ¡Chay runataq lepra unquyninmanta sanoyakurqa! (Marcos 1:40-42.) Maytachá chay runa kusikurqa.

20, 21. ¿Imaynatá Jesús, Jehovata kasukurqa?

²⁰ Jesusjina ñuqanchikpis Jehovaman chiqa sunqu kananchik tiyan, paytataq kasukunanchik tiyan. Payqa ñakʼarispapis, wakkuna chiqniptinkupis, mana jaykʼaq Tatanta wasancharqachu. Mana Kuraq Supaytapis kasurqachu (Mateo 4:1-11). Familianpis juk kuti “mana yuyaynimpichu kashan”, nispa qhisacharqanku (Marcos 3:21). Chaywanpis Jesusqa, mana llakikurqachu, tukuy sunqu Diospa munayninta ruwarqa. Astawanpis, paymanta  millayta parlaptinku, maqayta munaptinku ima, payqa mana nirqachu pagachikunanta (1 Pedro 2:21-23).

²¹ Jesusqa, wañunankama chiqa sunqu runa karqa. Wañuchichkaptinku mayta ñakʼarichirqanku. Kamachiqkunaqa, payta japʼiytawan wisqʼarqanku, llullakuspa payta tumparqanku, chiqa kaqta qʼiwispa juchacharqanku, asipayarqanku, maqarqanku ima. Jesustaq kurkupi warkhusqa kachkaspa nirqa: “Tukuy ima tukuychasqaña”, nispa (Juan 19:30). Wañupusqanmanta kimsa pʼunchayninmantaq Tatan Jehovaqa, juk angeltajina Jesusta kawsarichimurqa (1 Pedro 3:18). Tawa chunka pʼunchayninmantaq, janaqpachaman ripurqa. Chaypitaq “Diospa pañanman tiyaykukorqa”, Diosninchik kamachiqtajina churanankama (Hebreos 10:12-14).

22. ¿Imaraykutaq Jesús wañupunankama chiqa sunqu karqa?

²² ¿Imaraykutaq Jesús chiqa sunqu wañupurqa? Jesús ñuqanchikrayku wañupurqa, chayrayku Jehovap munayninmanjina tukuypis, paraisopi wiñay wiñaypaq kawsayta atinchik. Qhipan yachaqanapi rikusunchik, imaynatachus Jesuspa wañupuynin wiñay kawsayta taripanapaq yanapawasqanchikta.