1, 2. a) ¿Imanasqataq reqsisqa runamanta uyarisqallanchikwanqa mana nichwanchu allintañam reqsiruni nispaqa? b) ¿Imatam Jesusmanta pantaspanku ninku?

KAY pachapiqa achkallañam reqsisqa runakunaqa kachkan. Wakinmi ancha reqsisqa kanku llaqtankupi, hatun llaqtakunapi otaq nacionninkupipas, wakinñataqmi enteron pachapi. Ichaqa reqsisqa runapa sutinta yachasqaykiwanqa manamá niwaqchu chay runataqa reqsiniñam nispaqa, otaq imayna kasqantawan imayna kawsasqantaqa yachaniñam nispaqa.

² Iskay waranqa watakunaña kay Pachapi Jesuspa kawsasqanmanta pasaruptinpas, enteron pachapim paymanta hinalla rimanku. Chaywanpas manam cheqaptachu yachanku Jesucristo pi kasqanmantaqa. Wakinkunam ninku payqa allin runallam karqa nispa. Hukkunañataq, Diosmanta willakuq runallam karqa nispa. Wakinñataqmi ninku Jesusqa yupaychanapaq Diosmi, nispa. Chayna rimayninku, ¿cheqapchu kanman?

3. ¿Imanasqataq ancha allin Jesusmanta cheqap kaqta yachaynikiqa?

³ Ancha allinmi Jesusmanta cheqaptapuni yachaynikiqa. ¿Imanasqa? Bibliam niwanchik: “Chay wiñay kawsayniyoqqa kanku sapallan cheqap Dios kasqaykita reqsiqkunam hinaspa kachamusqayki Jesucristota reqsiqkunam”, nispa (Juan 17:3). Arí, Jehová Diosmanta hinaspa Jesucristomanta cheqap kaqta yachaynikiqa yanapasunkimanmi kay pachapi sumaq paraisopi wiñaypaq kawsakunaykipaq (Juan 14:6). Chaymantapas  Jesusqa sumaq ejemplotam saqerqa imayna kawsakunamanta hinaspa runamasinchikwan imayna kananchikmantapas (Juan 13:34, 35). Kay libropa punta kaq yachachikuyninpim Diosmanta cheqap kaqta yacharqanchik. Kunanñataqmi Bibliapa yachachisqanman hina Jesucristomanta yachasunchik.

4. ¿Ima ninantaq Mesias hinaspa Cristo nisqa sutikuna?

⁴ Manaraq Jesus nacechkaptinmi Bibliaqa willakurqaña Diospa kachamusqan Mesias otaq Cristo hamunanmanta. Mesias nisqa (hebreo rimaypi) hinaspa Cristo nisqa (griego rimaypi) sutikunaqa “Nombrasqa” ninanmi. Chayraykum kay hamuq runaqa Diospa nombrasqan otaq akllasqan karqa hatunchasqa kananpaq. Kay libropa  wakiqnin yachachikuyninkunapim astawan yachasunchik Diospa lliw promesankuna Mesiastakama cumplikunanmanta . Yachasuntaqmi kunan tiempopipas Jesus bendeciwananchikmanta. Manaraq Jesus nacechkaptinchá runakunaqa tapukurqakuña: “¿Pitaq Mesiasqa kanman?” nispa.

5. ¿Imamantam Jesuspa qatiqninkunaqa seguropuni karqaku?

⁵ Punta pachak wata ukupi Jesuspa qatiqninkunaqa manam iskayrayarqakuchu suyasqanku Mesias, Jesus kasqanmantaqa (Juan 1:41). Qatiqnin Simon Pedrom mana iskayrayaspan nirqa: “Qamqa kanki kawsaq Diospa Churin Cristom”, nispa (Mateo 16:16). Chaynaqa, ¿imanasqataq Jesuspa qatiqninkunaqa mana iskayrayarqakuchu Jesuspuni Mesias kasqanmantaqa? ¿imanasqataq ñoqanchikpas seguro kachwan Jesus Mesias kasqanmanta?

6. ¿Ima tupachikuytaq entiendechiwanchik imaynatam Jehová Dios yanaparqa payman sonqo kaq runakunata Mesiasta reqsinanakupaq?

⁶ Jesucristo manaraq hamuchkaptinmi Diosmanta willakuqkunaqa Mesias chayamuptin imayna reqsinamanta willakurqakuña. Tupachinapaq, sichu mana reqsisqayki runata maskaq riwaq carrokunapa chayamunan lawman otaq avionkunapa tiyanan lawman hinaspa chaypi achkallaña runakuna kanman, ¿manachu allin kanman chay runapa imayna rikchayniyoq kasqanta reqsiyniki? Chaynam Jehová Diospas paymanta willakuq runankunawan willachirqa Mesias imakuna rurananmanta chaynataq imakuna pasananmantapas. Chaynapim Diosman sonqo kaq runakunaqa chay willakuykunapa cumplikusqanta qawaspanku mana iskayrayaspa Mesiastaqa reqsinmanku karqa.

7. Jesusmanta iskay willakuykunapa cumplikusqanta willariy.

⁷ Qawarisun iskay ejemplokunata. Punta kaq: qanchis pachak wata masnintaraqmi Diosmanta willakuq Miqueas willakurqaña Juda nacionpi taksa kaq Belen llaqtachapi Mesias nacenanmanta (Miqueas 5:2). Chaynaqa, ¿maypitaq Jesus nacerqa? Chay llaqtachapipunim (Mateo 2:1, 3-9). Iskay kaq: Daniel 9:25 nisqanmi pichqa pachak wata ñawpaqtaraq willakurqaña ima watapi Mesias rikurimunanmanta tanteanapaq,  rikurimurqaqa 29 kaq watapim. * Kay willakuykunapa chaynataq wakin willakuykunapa cumplikusqanmi qawachin Jesus Mesias kasqanta.

8, 9. ¿Imaynatam Jesuspa bautizakusqanpi astawan qawakurqa Jesus Mesias kasqanta?

⁸ 29 kaq wata tukupayninpim astawanraq qawakurqa Jesus Mesias kasqanta. Chay tiempopim Jesusqa Jordan mayupi bautizakunanpaq Bautizaq Juanta mañakurqa. Jehová Diosmi Juanta prometerqa señalta qonanpaq chaynapi Mesiasta reqsinanpaq, chay señaltam qorqa Jesus bautizakuptin. Bibliam willawanchik: “Ñoqam rikurqani Chuya Espiritu hanaq pachamanta paloma hina uraykamuspa Jesuspa hawanman tiyaykuqta. [. . .] yakupi bautizanaypaq kachamuwaqniymi niwarqa: “Qawankim Espiritu uraykamuspa runapa hawanman tiyaykuqta, paymi bautizanqa Chuya Espirituwan.” Paytaqa ñam rikurqaniña chaymi willakuni payqa Diospa Churin kasqanta.”, nispa (Juan 1:32-34; Mateo 3:16, 17). Bautizaq Juan señalta qawaspam chaynataq uyarispanmi mana iskayrayarqachu Diospa kachamusqan Jesus kasqanmantaqa. Chay punchawmi Jehová Diospa chuya espiritun otaq imatapas atiq kallpan payman huntaykurqa chaynapim Jesusqa Mesiaspi otaq Cristopi rikurirurqa Kamachikuq Jefe hina kananpaqña (Isaias 55:4).

⁹ Bibliapa willakuyninkunapa cumplikusqanpiwan kikin Jehová Diospa nimusqanpas sutillatam qawachin Jesus Mesias kasqanta. Bibliaqa kutichintaqmi Jesucristomanta kay iskay tapukuykunatapas: maymanta hamusqanta chaynataq imayna runa kasqanmantapas.

10. ¿Imatam Bibliaqa yachachin manaraq kay Pachaman Jesus hamuchkaptin maypi kawsasqanmanta?

¹⁰ Bibliam yachachin Jesus manaraq kay Pachaman hamuchkaspan  hanaq pachapi kawsasqanmanta. Ejemplopaq, ñawpaqmantaraq Belenpi Mesias nacenanmanta willakusqanmantapas Diosmanta willakuq Miqueasqa nirqañam: “Ñawpaqmanta rikurimuqraqmi payqa”, nispa (Miqueas 5:2). Chaynallataqmi achka kutita kikin Jesuspas nirqa manaraq runa hina kay pachapi kachkaspan hanaq pachapi kawsasqanmanta (Juan 3:13; 6:38, 62; 17:4, 5). Chaypim Jesusqa espiritu hina Jehová Dioswan kuska kawsakurqa.

11. ¿Imaynatam Bibliaqa qawachin Jehová Diospa ancha kuyasqan Churin Jesus kasqanta?

¹¹ Achka razonkunam kan Señorninchik Jesucristo Jehová Diospa ancha kuyasqan churin kasqanmanta. Diospa punta kaq unanchasqan kasqanraykum Biblia nin: “Payqa karqañam llapa imakunapas manaraq unanchasqa kachkaptinqa”, nispa (Colosenses 1:15). * Chaymantapas Taytanpa ancha kuyasqanmi payqa, ‘sapallan churin’ kasqanrayku (Juan 3:16). Chaynatam Biblia sutichan mana pipa yanapakuyninwan Jehová Dios unanchasqanrayku. Chaymantapas Jesusllam Jehová Diostaqa yanaparqa tukuy kaqkunata unanchananpaq (Colosenses 1:16). Sutichantaqmi, ‘Simi’ nispa (Juan 1:14). Chayna sutichasqa kasqanmi qawachin Taytanpa sutinpi rimasqanta. Willarqachá kamachikuykunatawan willakuykunata Diospa unanchasqan angelkunaman chaynataq runakunamanpas.

12. ¿Ima pruebakunataq kachkan Diospa punta kaq Churin mana kikin Dios hina kasqanmanta?

¹² ¿Wakin runakunapa creesqankuman hinachu Diospa punta kaq Churinqa kikin Dios hina kanman? Manam chaynatachu Bibliaqa yachachin. Ñawpaq parrafopi yachasqanchikman hinam Churiqa unanchasqa karqa. Chayraykum Jesuspa qallariyninqa kan, Jehová Diosmi ichaqa wiña-wiñaypaq Dios (Salmo 90:2). Sapallan churiqa manam haykapipas  piensayllapas piensarqachu Taytanman igualakuytaqa. Bibliaqa cheqaptapunim yachachin Tayta Churimanta aswan atiyniyoq kasqanta (Juan 14:28; 1 Corintios 11:3). Jehová Diosllam “Tukuy Atipayniyoq Dios” (Genesis 17:1). Chayraykum pay hinaqa mana pipas kanchu. *

13. ¿Ima ninantaq Biblia “Mana rikuy atina Diospa rikchayninqa Cristom” nispa niptin?

¹³ Jehová Dioswan piwi Churinqa lucerokunapas kay Allpa pachapas manaraq unanchasqa kachkaptinmi wara-waranqantin watakuna hanaq pachapi kuska kuyanakuspanku kawsakurqaku. ¡Maynatachá kuyanakurqaku! (Juan 3:35; 14:31.) Kay kuyasqa Churiqa Taytan hinam karqa sumaq kayninkunapi. Chaymi Bibliaqa paymanta nin “Diospa rikchayninqa Cristom”, nispa (Colosenses 1:15). Imaynam warmakunapas taytanman rikchakunku, chaynam hanaq pachapi Diospa Churinpas sumaq kayninkunapi Taytanman rikchakun.

14. ¿Imaynatataq runa hinaqa nacerqa Jehová Diospa sapallan Churin espiritu kachkaspa?

¹⁴ Jehová Diospa sapallan Churinqa manam obligasqachu hanaq pachataqa saqemurqa kay Allpa pachapi runa hina kawsananpaqqa. Ichapas qam tapukunki: “¿Imaynataq espiritu kachkaspaqa runa hinaqa nacerqa?”. Hanaq pachapi kaq Piwi churin nacenanpaqmi Jehová Diosqa milagrota rurarqa, chuya espiritunwanmi Juda nacionpi Maria sutiyoq doncella sipasqa wiksayakururqa. Chaymi Jesuspa taytanqa manam runachu karqa, chayraykum Mariaqa mana huchayoq wawata wachakurqa hinaspam Jesus sutiwan suticharqa (Lucas 1:30-35).

15. ¿Imaynatam Jesustakama Jehová Diosta astawanraq reqsichwan?

¹⁵ Kay Pachapi Jesuspa tukuy rurasqan hinaspa rimasqankunapas yanapawanchikmi astawan reqsinanchikpaq. Hinaspapas  paynintakamam Jehová Diostaqa sumaqta reqsichwan. ¿Imaynata? Yuyarisun kay Churiqa Taytanman rikchakuqpunim. Chayraykum huk kaqnin qatiqninta nirqa: “Ñoqata rikuqniyqa Taytatapas rikuykunñam”, nispa (Juan 14:9). Bibliapim achka yachachikuykunata tarinchik Mateo, Marcos, Lucas hinaspa Juan sutiyoq librokunapi Jesucristopa kawsakuyninmanta, imam rurasqankunamanta chaynataq sumaq kayninkunamantapas.

16. ¿Imamantataq Jesusqa puntataqa astawan willakurqa, hinaspa pipataq chay yachachiyninkunaqa karqa?

¹⁶ Jesustam suticharqaku “Yachachikuq” nispa (Juan 1:38; 13:13). ¿Imamantataq yachachirqa? Puntataqa ‘Diospa munaychakusqanmantam allin noticiata’ willakurqa, chayqa Diospa Gobiernonmanta sumaq willakuymi. Kay gobiernom hanaq pachamanta kamachikamunqa enteron Allpa pachata hinaspam Diosman sonqo kaq runakunata anchallataña bendecinqa (Mateo 4:23). ¿Pipataq chay yachachikuyqa karqa? Jesuspunim nirqa: “Kay yachachisqayqa manam ñoqallapachu aswanqa kachamuwaqniypam” otaq Jehová Diospam nispa (Juan 7:16). Jesusqa yacharqam Taytanpa munasqanta: Diospa Munaychakusqanmanta allin noticiakunata runakuna yachananta. 8 kaq yachachikuypim astawan yachasunchik chay gobiernomanta hinaspa ima rurananmantapas.

17. ¿Maykunapitaq Jesusqa yachachirqa, hinaspa imanasqataq predicananpaq anchata kallpanchakurqa?

¹⁷ ¿Maykunapitaq Jesus yachachirqa? Runakuna maypi tarikusqankupim: chakrakunapi, taksa hinaspa hatun llaqtakunapi, mercadokunapi hinaspa wasikunapipas. Jesusqa manam tiyakuspachu runakuna payman hamunankutaqa suyarqa aswanqa paykunamanmi rirqa (Marcos 6:56; Lucas 19:5, 6). ¿Imanasqataq anchata kallpanchakurqa llumpayta predicananpaq hinaspa yachachinanpaqpas? Taytanpa munaynin kasqanraykum siemprepuni chaytaqa cumplirqa (Juan 8:28, 29). Llakipayaspantaqmi achkallaña payman hamuq runakunamanpas predicarqa (Mateo 9:35, 36). Punta apaq religiosokunam Diosmanta hinaspa munayninmantapas cheqap kaqta yachachinanku karqa, ichaqa manamá  chaynatachu yachachirqaku. Jesusmi ichaqa yacharqa allin noticiakunamanta uyarinankupaq necesitasqankuta.

18. ¿Jesuspa ima allin kayninkunataq gustasunki?

¹⁸ Jesusqa llakipayakuqmi, kuyakuqmi hinaspapas sumaq sonqoyoqmi karqa. Kuyakuywanmi runakunataqa sumaqta rimapayarqa, chaymi warmachakunapas paypa qayllanpiqa kusisqa tarikurqaku (Marcos 10:13-16). Manamá pimanpas sayapakurqachu. Cheqnirqam runakunapa mana allin rurayninkutaqa (Mateo 21:12, 13). Warmikunata mana respetowan runakuna qawaptinkupas, payqa sumaqtam respetarqa (Juan 4:9, 27). Jesusqa llampu sonqomá karqa. Huk kutipim apostolninkunapa chakinta mayllarqa, sirvientekunallapa chay ruray kachkaptinpas.

19. ¿Ima ejemplom qawachin ñakariq runakunata Jesus llakipayasqanmanta?

¹⁹ Jesusqa llakipayaqmi ñakariq runakunataqa, chaytam qawachirqa Diospa atiyninwan onqoqkunata hanpispan (Mateo 14:14). Ejemplopaq, leprawan onqoq runam Jesusman asuykuspan nirqa: “Munaspaykiqa allinyaykachillawayá”, nispa. Jesusqa sonqonpim llakipayarqa chay ñakariq runataqa.  Chaymi llapchaykuspan nirqa: “Arí, munanim, allinyayña”, nispa. ¡Hinaptinmi onqoqqa sanoyarurqa! (Marcos 1:40-42.) ¡Imaynaraqchá chay runaqa sientekurqa!

20, 21. ¿Imanasqataq nichwan Jesusqa sumaq ejemplom kasukunapaq chaynataq Diosman sonqo kanapaqpas?

²⁰ Jesusmi sumaq ejemplo Diosta kasukunapaq chaynataq Diosman sonqo kanapaqpas. Jesusqa Taytanpaqmi sonqo karqa ima sasachakuykunapiña kaptinpas, runakuna contranpi kaptinpas chaynataq ñakariykunaña kaptinpas. Mana iskayrayaspanmi Satanaspa munapayachisqankunataqa qepancharqa (Mateo 4:1-11). Qallariypiqa manam wakiqnin ayllunkunapas paypiqa creerqakuchu. Aswanmi nirqaku: “Locoyarunmi”, nispa (Marcos 3:21). Jesusmi ichaqa mana hukmanyaspan Diospa kamachisqantaqa hinalla kasukurqa. Enemigonkuna insultaspan maqaptinpas payqa controlakuqpunim, manamá kutipakuytapas munarqachu (1 Pedro 2:21-23).

 ²¹ Jesusqa wañukunankamam Diospaq sonqo karqa, enemigonkuna sinchita ñakarichispa wañuchiptinpas (Filipenses 2:8). Yuyaymanay wañukusqan punchawpi ñakariykuna aguantasqanmanta. Payqa aguantarqam kamachikuqkuna presochaptin, yanqa rimaqkuna tukuy imaymanata kamiptin, mana allin juezkuna yanqamanta presochaptin, runakuna paymanta burlakuptin chaynataq soldadokuna ñakarichiptinpas. Qerupi warkurayaspanmi wañuchkaspanña rurasqanmanta nirqa: “¡Tukusqañam!”, nispa (Juan 19:30). Kimsa punchaw pasaytam espiritu cuerpoyoqtaña Taytanqa kawsarichimurqa (1 Pedro 3:18). Mana achka semanakuna pasayllatam hanaq pachaman kutirqa hinaspam “Diospa alleqninpi tiyaykurqa” atiyta chaskinanpaq suyaspa (Hebreos 10:12, 13).

22. ¿Ima suyakuymi kan wañunankama Jesus Diosman sonqo kasqanrayku?

²² ¿Ima suyakuymi kan wañunankama Jesus Diosman sonqo kasqanrayku? Jesuspa wañukusqanwanmi wiñay kawsayta chaskichwan qallariymantapacha Jehová Diospa munasqanman hina enteron Allpa pacha paraisoña kaptin. Qatiqnin yachachikuypim qawasunchik imaynatam yanapawanchik Jesuspa wañukuynin chay sumaq suyakuyta chaskinapaq.