1, 2. a) Hazavao fa tsy mitovy ty hoe mahay olo malaza raiky noho ty hoe mahay azy soa. b) Ino iaby ty hevitsy samby hafa volanin’olo mikasiky Jesosy?

MARO ty olo malaza amy tany toy eto. Misy amin-drozy hay soa amy tanà, na tany misy azy eo. Ty ilany hain’olo amy tany toy iaby. Fe ty fahaizanao anaran’olo malaza raiky tsy midika hoe hainao soa ty mikasikasiky azy. Tsy fonga ho hainao iaby ty fiainany noho ty toetsiny.

² Fa naharè resaky mikasiky Jesosy Kristy ty olo an-tany etoy, ndre fa ho 2 000 tao lasa zay ro nipetrahany tetoy. Fe maro ty tsy mahay azy soa. Misy mivola fa olo soa avao ie. Ty ilany mivola fa mpaminany ie. Mino koa ty sisany fa Ndranahary Jesosy, ka tokony hivavaha. Marina va raha reo?

3. Manino iha ro mila mahay soa ty marina mikasiky Jesosy?

³ Mila mahay soa ty marina mikasiky Jesosy iha. Ino ty antony? Satria mivola ty Baiboly hoe: “Mba hahavy an-drozy ho velo zisiky farany, le ilàn-drozy ty mianatsy hahay mikasiky anao, azy Ndranahary marina raiky avao iny noho Jesosy Kristy, azy nirahinao iny.” (Jaona 17:3) Afaky ho velo zisiky farany amy tany paradisa tsika, laha mahay soa ty mikasiky Jehovah Ndranahary noho Jesosy  Kristy. (Jaona 14:6) Modely farany ze soa ho ahintsika koa ty fandesany ty fiainany noho ty fahaizany mifandramby amin’olo. (Jaona 13:34, 35) Niresaky ty raha marina mikasiky Ndranahary tsika tamy toko voalohany tany. Hanenty koa tsika henanizao hoe ino marina ro ampianary ty Baiboly mikasiky Jesosy Kristy.

4. Ino ty dika ty hoe “Mesia” noho “Kristy”?

⁴ Fa ela taloha ty nahateraha Jesosy, le fa nivola ty Baiboly fa haniraky Mesia na Kristy, Ndranahary. Samby “Voahosotsy” ty dika ty hoe “Mesia” (baka amy safà hebreo) noho ty hoe “Kristy” (baka amy  safà grika). Ho voahosotsy Mesia io. Midika zay fa hitingy azy Jehovah, ka hanome azy pilasy manoka. Hianarantsika afarafara ao, fa ilà amy fanatanteraha Ndranahary ty raha nampitamaniny ty raha atao Mesia io. Hianarantsika koa hoe ino ty fitahia andesy Jesosy ho ahintsika manomboky henanizao. Fe taloha ty nahateraha Jesosy, le azo antoky fa maro ty nanontany hoe: ‘Ia va ty ho Mesia?’

5. Ino ty nekè mpianatsy Jesosy reo mikasiky azy?

⁵ Tamy taonjato voalohany, le fa naneky mpianatsy Jesosy reo fa ie ro Mesia. (Jaona 1:41) Tsy nisalasala ohatsy Simona Petera nivola tamy Jesosy hoe: “Iha ro Kristy.” (Matio 16:16) Manino rozy ro natoky fa Jesosy baka a Nazareta ao iny vatany ro Mesia nampitamany? Ino koa ro hanampy antsika hatòky fa marina vatany raha zay?

6. Manao akory ty nanampea Jehovah ty olo tsy mivaliky mba hahay ty Mesia? Hazavao amy ohatsy.

⁶ Nivola raha maro mikasiky Mesia ty mpaminany niay taloha Jesosy. Raha zay ro nanampy ty olo hahay hoe ia ro ho Mesia. Ndao ataontsika hoe nirahy hitsena olo amy fijanona tomabily, na amy garan-dropilany eny iha. Fe mbo tsy nihitanao ndraiky olo io. Manao akory ty hahaizanao azy? Ho mora aminao ty hahay azy, laha fa nisy raha kelikely mikasiky azy, nivolany taminao. Mitovy amy zay avao koa ty natao Jehovah. Nampanoratiny mpaminany reo amy Baiboly ao, ty raha hatao Mesia io noho ty raha hahazo azy. Hanampy ty olo tsy mivaliky amy Jehovah hahay soa ty Mesia ty fahatanteraha faminania reo.

7. Mivolana faminania roe tanteraky tamy Jesosy?

⁷ Handiniky faminania roe avao tsika. Voalohany, 700 tao taloha ty nahateraha Jesosy, le fa nivola Mika mpaminany, fa hateraky a Betlehema, tanà kelikely a Joda  ao Mesia nampitamany iny. (Mika 5:2) Taia Jesosy ro nateraky? Tamy tanà io ao vatany! (Matio 2:1, 3-9) Faharoe, fa nivolany amy Daniela 9:25 ao taonjato maro taloha tany koa, fa amy tao 29 A.K ro hiseho Mesia io. * Ty fahatanteraha faminania reo ro ahaiza, fa Jesosy vatany ro Mesia.

8, 9. Tamy Jesosy natao batisa, ino ro mampiseho fa ie vatany ro Mesia?

⁸ Voaporofo soa fa Jesosy ro Mesia, tamy farampara ty tao 29 A.K. Namonjy Jaona mpanao Batisa tamy vavarano Jordana teo Jesosy tamy fotoa io mba hataony batisa. Fa nivola tamy Jaona, Jehovah fa hanome famantara azy mba hahaizany hoe ia Mesia zao. Nihita Jaona famantara io, lafa natao batisa Jesosy. Hoy ty Baiboly: “Laha vo nivita batisa Jesosy, le niboaky baka anaty rano ao. Nivoha ty lanitsy, le nihita Jaona ty fanahy Ndranahary nijotso atao ho pizon io, nandeha tanabo Jesosy teo. Nay koa nisy feo baka an-danitsy any nanao hoe: ‘Toy ro anako teako sady ekeko.’ ” (Matio 3: 16, 17) Laha vo naharè noho nahita raha zay Jaona, le nihainy fa Jehovah ro naniraky Jesosy. (Jaona 1:32-34) Lafa nilatsaky tamy Jesosy ty fanahy Ndranahary na ty hery ampiasany, le nanjary Mesia, na Kristy ie. Voatendry ho Mpitariky noho Mpanjaka ie, tamy fotoa zay.—Isaia 55:4.

⁹ Ndre ty fahatanteraha faminania rey ndre ty safà Ndranahary, le samby manambara hoe Jesosy ro Mesia nampitamany. Fe mbo misy fanontanea roe bevata mikasiky Jesosy, valỳ amy Baiboly ao. Retoa iaby fanontanea zay: Baka aia Jesosy? Olo nanao akory ie?

10. Araky ty volany amy Baiboly ao, taia Jesosy taloha ty niaviany tan-tany etoy?

¹⁰ Volany ty Baiboly fa nipetraky tan-danitsy any Jesosy, taloha ty niaviany tan-tany etoy. Nivola Mika mpaminany fa hateraky a Betlehema any ty Mesia. Fe, fa nivolaniny koa hoe fa nisy “fa liany ela” ie. (Mika 5:2) Tsy indraiky avao koa Jesosy ro nivola hoe, fa niay tan-danitsy any ie taloha ty naha olombelo azy. (Vakio Jaona 3:13; 6:38, 62; 17:4, 5) Tamy Jesosy mbo nianjely tan-danitsy any, le nana fifandrambesa manoka tamy Jehovah ie.

11. Aia amy Baiboly ao ro ahità fa Jesosy ro Ana Jehovah teany marè?

¹¹ Jesosy ro tea Jehovah marè amy ty Anakiny. Manino tsika ro mivola raha zay? Satria ie ro niforony Ndranahary voalohany, zay ro ikaiha azy hoe: “Talanolo amy zavaboary iaby.” * (Kolosianina 1:15) Fe mbo misy raha hafa koa mampiavaky azy. “Anakilahiny toka” ie. (Jaona 3:16) Midika zay, fa ie raiky avao ro niforony Jehovah mivanta. Nampiasa azy koa Jehovah tamy famorona ty raha hafa iaby. (Kolosianina 1:16) Kaihy hoe “ty Safà” koa Jesosy. (Jaona 1:14) Midika zay, fa mpanday ty safà Ndranahary ie. Azo inoa fa ie ro nampandesy Jehovah hafatsy ho ahy ty anakiny hafa, ndre anjely io ndre olombelo.

12. Manino tsika ro mivola fa tsy mitovy Jehovah noho Jesosy?

¹² Maro ty mino fa mitovy Ndranahary noho Jesosy. Marina va raha zay? Tsy mivola ho zay ty Baiboly. Hitantsika teo fa nisy namoro ty Anaky. Midika zay, fa nana fanomboha ie. Tsy manahaky zay Jehovah satria tsy mana fanombaha ie sady tsy hana fiafarà. (Salamo 90:2) Tsy nieritseritsy ty vatany mitovy amy Babany mihintsy  Anakilahy toka io. Mivola mazava soa ty Baiboly hoe be mandilatsy ty Anaky ty Baba. (Vakio Jaona 14:28; 1 Korintianina 11:3) Jehovah raiky avao ro ‘Ndranahary Farany ze Mahery.’ (Genesisy 17:1) Hita baka amy zay fa tsy misy ty mitovy aminy. *

13. Ino ty dika ty hoe “tarehy Ndranahary tsy hita maso” ty Anaky?

¹³ An’arivony tapitrisa tao taloha ty namorona lanitsy feno basia noho ty tany, le nifandramby soa avao Jehovah noho Anakiny talanolo io. Azo antoky fa nifankatea marè rozy mianaky! (Jaona 3:35; 14:31) Nanahaky Babany marè Anakiny teany io. Zay mahavy ty Baiboly hivola hoe “ie ro tarehy Ndranahary tsy hita maso.” (Kolosianina 1:15) Mety hisy raha maro mampitovy ty anaky amy ty babany. Manahaky zay koa Anaky an-danitsy any io. Nanahaky ty toetsiny Babany ie. Hita taminy ty toetsiny Babany noho ty maha ie azy.

14. Manao akory ty nahavy Anaky talanolo Jehovah iny hanjary olombelo?

¹⁴ Sitrapo Anakilahy toka Jehovah io ro niala tan-danitsy any, ka nijotso tan-tany etoy. Fe mety hanontany iha hoe: ‘Manao akory ty hahavy anjely hanjary olombelo?’ Ty fahagaga natao Jehovah ro nampety raha zay. Nafindrany tanaty kibo ampela virijiny raiky kaihy hoe Maria, ty ay Anakilahiny toka io. Hita baka amy zay, fa tsy olombelo ty baba Jesosy. Zay nahavy ana Maria io, tsy nandova fahotà.—Lioka 1:30-35.

15. Manino ro ho haintsika soa Jehovah lafa mahay mikasiky Jesosy tsika?

¹⁵ Manampy antsika hahay soa mikasiky Jesosy ty raha nivolaniny noho ty raha nataony. Ho haintsika soa koa  Jehovah lafa mahay mikasiky Jesosy tsika. Ino ty antony? Ka halino fa nitovy soa tamy Babany Anakiny io. Zay nahavy Jesosy hivola tamy mpianatsiny reo hoe: “Ze nahita ahy, le nahita ty Baba koa.” (Jaona 14:9) Mitantara raha maro mikasiky ty fiaina Jesosy noho ty asany voho ty toetsiny, Filazantsara efatsy amy Baiboly ao retoa: Matio, Marka, Lioka, Jaona.

16. Ino ty nampianary Jesosy, sady baka amin’ia ty fampianarany?

¹⁶ “Mpampianatsy” ro nahaizan’olo any Jesosy marè. (Jaona 1:38; 13:13) Ino ty nampianariny? “Ty vaovao soa mikasiky ty Fanjakà”, na ty Fanjakà Ndranahary an-danitsy any. Io ro handay ty olo an-tany etoy sady hanome fitahia zisiky farany ho ahin’olo manoriky safà. (Matio 4:23) Ahin’ia fampianara zay? Hoy Jesosy: “Tsy ahy ty fampianarako, fa ahy azy naniraky ahy iny”, tsy ia zay fa Jehovah. (Jaona 7:16) Hay Jesosy fa tea Jehovah haharè ty vaovao soa mikasiky Fanjakà io iaby ty olo. Amy Toko faha-8 any tsika vo hianatsy raha maro mikasiky Fanjakà Ndranahary io noho ty raha hataony.

17. Taia Jesosy ro nampianatsy, sady ino ro nahavy azy niezaky marè hanao raha zay?

¹⁷ Taia Jesosy ro nampianatsy? Tsy nifily ie, fa nandehanany iaby ze misy olo. Ndre ambanivohitsy any, ndre amy tanà malinidiniky, ndre amy tanà bevata, ndre am-bazary eny, ndre an-tranon’olo any. Tsy nandiny olo hamonjy azy ie, fa ie mihintsy ro nandeha namonjy olo rey. (Marka 6:56; Lioka 19:5, 6) Ino ty nahavy Jesosy niezaky marè sady nandany fotoa hitoria noho hampianara? Satria zay ty raha tea Ndranahary hataony. Nanao ty sitrapo Babany avao Jesosy. (Jaona 8:28, 29) Fe nisy raha hafa koa nahavy azy hitory. Niferinesany olo niavy taminy teo rey. (Vakio Matio 9:35, 36.) Tsy nidarea ty mpitariky fivavaha olo reo, ndre mpitariky fivavaha reo aza ro tokony ho nampianatsy an-drozy ty marina mikasiky Ndranahary noho  ty raha teany hatao. Hay Jesosy fa nila naharè hafatsy mikasiky Fanjakà io ty olo.

18. Aia amy toetsy Jesosy reo ro teanao marè?

¹⁸ Be fitiava noho miferinay olo Jesosy. Soa fanahy ie, ka tsy nisalasala ty olo namonjy azy. Ndre ty ajà, tsy navakavaka niaraky taminy. (Marka 10:13-16) Tsy nanavakavaky Jesosy. Halany ty kolikoly noho ty tsy rariny. (Matio 21:12, 13) Tsy nanambanimbany ampela ie, ndre tsy nihajà loatsy aza ty ampela tamy fotoa zay. (Jaona 4:9, 27) Niambany koa Jesosy. Nisy fotoa ie, nanasa ty tomboky mpianatsiny reo, ndre ty andevo aza ro mpanao raha zay.

19. Hazavao amy ohatsy fa nikarakara ze raha nilàn’olo Jesosy.

¹⁹ Nikarakara ze hahasoa ty olo Jesosy. Hita raha zay, lafa nahazo hery baka amy fanahy masy Ndranahary ie, ka nanao fahagagà mba hahajanga olo. (Matio 14:14) Nisy lahilahy boka, niavy tamy Jesosy teo sady nivola taminy hoe: “Laha teanao ty hampalio ahy, le ho vitanao raha  zay.” Hay Jesosy soa, fa nijaly marè lahilahy io. Niferinesany lahilahy io, ka nampariny ty tanany sady nikasiky azy ie, noho nivola hoe: “Teako vatany. Maliova iha.” Afaky vatany habokà tamy lahilahy iny! (Marka 1:40-42) Azonao an’eritseritsy va fihetseham-po lahilahy io!

20, 21. Manomeza porofo fa modely soa tamy fanoriha ty safà Ndranahary noho ty tsy fivaliha taminy Jesosy.

²⁰ Modely soa Jesosy satria nanoriky safà Ndranahary avao ie. Tsy nivaliky tamy Babany an-danitsy any iny ie, ndre nisy fanohera ndre nisy fijalea ndre ino ndre ino ty raha nahazo azy. Avy le nandà Jesosy lafa nisy fakam-panahy baka amy Satana, ka tsy naharesy azy raha zay. (Matio 4:1-11) Nisy fotoa, tsy nino azy ty longony. Nivola mihintsy aza longony reo hoe “voa ty sainy.” (Marka 3:21) Fe tsy nidarea Jesosy raha zay, fa ty sitrapo Jehovah avao ro nataony. Nitanjaky ty ainy avao ie ndre nisy nanao safà  raty taminy noho nampijaly azy. Tsy nanohatsy hanao raty ty mpanohitsy azy ie ndre indraiky.—1 Petera 2:21-23.

²¹ Tsy nivaliky zisiky farany Jesosy, ndre nampijaly azy noho namono azy aza ty mpanohitsy. (Vakio Filipianina 2:8.) Eritsereto ty raha niaretany, tamy andro taloha ty nahafatesany. Sinambotsy ie, nasara ty vavolombelo mavandy raha raty, nahazo heloky baka amy mpitsara miangatsy, nikizahy sady nihehezan’olo noho nampijalijalỳ ty maramila. Nifantsihy tamy hazo fijalea teo ie, bakeo lafa niala ay le nivola hoe: “Vita!” (Jaona 19:30) Fe nivelomy Babany tamy maty ie, telo andro tafara atoy, le nanjary fanahy ndraiky. (1 Petera 3:18) Nimpoly tan-danitsy any ie, herinandro vitsivitsy tafara atoy. “Nipetraky tan-kavana Ndranahary teo ie”, sady nandiny ty fotoa hanomeza azy fahefà ho mpanjaka.—Hebreo 10:12, 13.

22. Ino ty nitanterahy Jesosy lafa tsy nivaliky zisiky farany ie?

²² Ino ty nitanterahy Jesosy lafa tsy nivaliky zisiky farany ie? Lafa nimaty ie, le afaky hiay zisiky farany amy paradisa an-tany etoa tsika, sady raha zay ro tea Ndranahary hatao tamy voalohany tany. Handiniky mikasiky raha zay tsika amy toko manaraky ao.