1, 2. (a) Kungani kwati ngemuntfu lotsite lodvumile kungasho kutsi sewati konkhe ngaye? (b) Ngukuphi kudideka lokukhona ngaJesu?

KUNEBANTFU labanyenti labadvumile emhlabeni. Labanye badvumile emimangweni, emadolobheni kanye nasemaveni akubo. Labanye badvume emhlabeni wonkhe. Kodvwa kumane wati libito lemuntfu lodvumile akusho kutsi sewumati kahle. Akusho nekutsi sewati imininingwane mayelana nemlandvo wakhe nekutsi uluhlobo luni lwemuntfu.

² Nanobe Jesu Khristu aphila eminyakeni letsi ayibe ngu-2 000 leyendlulile, bantfu emhlabeni wonkhe beva lokutsite ngaye. Nobe kunjalo, bantfu labanyenti badidekile ngekutsi Jesu abengubani vele. Labanye batsi abemane nje ayindvodza lelungile. Kantsi labanye batsi abefane nje angumphrofethi. Kodvwa labanye solo bakholwa kutsi Jesu nguNkulunkulu futsi kufanele akhontwe. Vele kufanele yini akhontwe?

3. Kungani kubalulekile kutsi wati liciniso ngaJesu?

³ Kubaluleke kakhulu kutsi wati liciniso ngaJesu. Ngani? Ngobe liBhayibheli litsi: “Kuphila lokuphakadze nguloku: kutsi bakwati wena, Nkulunkulu longuye yedvwa weliciniso, bamati naJesu Khristu lomtfumile.” (Johane 17:3) Kwati liciniso ngaNkulunkulu Jehova naJesu Khristu kungaholela ekuphileni lokuphakadze emhlabeni lolipharadisi. (Johane 14:6) Ngetulu kwaloko, Jesu usibekele sibonelo lesihle kunato tonkhe sekutsi singaphila kanjani nalabanye,  futsi sibaphatse kanjani. (Johane 13:34, 35) Esehlukweni sekucala salencwadzi, sifundze ngekutsi liyini liciniso ngaNkulunkulu. Nyalo, ase sifundze ngekutsi yini mbambambamba lefundziswa liBhayibheli mayelana naJesu Khristu.

4. Sisho kutsini sicu lesitsi “Mesiya” nalesitsi “Khristu”?

⁴ Kusasele sikhatsi lesidze ngembi kwekutalwa kwaJesu, liBhayibheli labiketela ngekufika kwaloyo Nkulunkulu labetamtfuma njengaMesiya, nobe Khristu. Sicu lesitsi “Mesiya” (lesivela egameni lesiHebheru) nalesitsi “Khristu” (lesivela egameni lesiGriki), totimbili tisho “Logcotjiwe.” Lona lotsenjisiwe abetawugcotjwa, lokusho kutsi  Nkulunkulu abetambeka esikhundleni lesikhetsekile. Etehlukweni letilandzelako talencwadzi, sitawufundza lokunyenti ngendzima lebalulekile yaMesiya ekugcwalisekeni kwetinjongo taNkulunkulu. Sitawuphindze sifundze nangetibusiso Jesu langasiletsela tona ngisho nalamuhla. Ngembi kwekuba Jesu atalwe, labanyenti bebatibuta kutsi, ‘Ngubani loyo lotawuba nguMesiya?’

5. Yini bafundzi baJesu lebebaciniseka ngayo ngalokuphatselene naye?

⁵ Ngelikhulu lekucala C.E., bafundzi baJesu waseNazaretha bebaciniseka kutsi Jesu abenguMesiya. (Johane 1:41) Lomunye webafundzi bakhe, labebitwa ngekutsi nguSimoni Phetro, washo ngalokucondzile kutsi: “UnguKhristu.” (Matewu 16:16) Bafundzi baJesu bebangaciniseka njani—tsine singaciniseka njani—kutsi vele Jesu unguMesiya lowetsenjisiwe?

6. Fananisa indlela Jehova lasita ngayo labetsembekile kutsi bambone Mesiya.

⁶ Baphrofethi baNkulunkulu labaphila ngembi kwaJesu, babiketela imininingwane leminyenti ngaMesiya. Lemininingwane yayiyosita bantfu kutsi bambone. Loku singakufananisa ngalendlela: Ase sitsi utfunywa esiteshini semabhasi lesiphitsitelako, esiteshini sesitimela nobe esikhumulweni setindiza kutsi uyohlangabeta umuntfu longazange sewumbone. Bewungasheshe umbone nangabe bakutjele imininingwane letsite ngaye. Ngalokufanako-ke, asebentisa tiphrofetho letiseBhayibhelini, Jehova usinikete imininingwane ngaloko Mesiya abetawukwenta nangaloko abetawubhekana nako. Lokugcwaliseka kwaletiphrofetho letinyenti kwakuyosita labo labetsembekile kutsi bambone.

7. Ngutiphi tiphrofetho letagcwaliseka kuJesu?

⁷ Cabanga ngetibonelo letimbili: Sekucala, kusasele iminyaka lengu-700, umphrofethi Mikha wabiketela kutsi Loyo lotsenjisiwe abetawutalelwa eBhetlehema, lidolobha lelincane lakaJuda. (Mikha 5:2) Watalelwa kuphi Jesu? Kulo kanye lelo dolobha! (Matewu 2:1, 3-9) Sesibili, kusasele emakhulu  eminyaka, siphrofetho lesikuDanyela 9:25 sakhomba umnyaka Mesiya abetawuvela ngawo—29 C.E. * Kugcwaliseka kwaletiphrofetho naletinye kufakazela kona kutsi Jesu abenguMesiya lowetsenjisiwe.

8, 9. Ngubuphi bufakazi bekutsi Jesu abenguMesiya lobabonakala ngalokucacile ngalesikhatsi abhajatiswa?

⁸ Lobunye bufakazi bekutsi Jesu abenguMesiya bavela ngasekupheleni kwa-29 C.E. Lona ngulomnyaka Jesu laya ngawo kuJohane uMbhabhatisi kute ambhabhatise eMfuleni iJordane. Jehova wetsembisa Johane luphawu labetawumbona ngalo Mesiya. Johane walubona loluphawu nakabhabhatisa Jesu. LiBhayibheli litsi naku lokwenteka: ‘Jesu watsi kube abhajatiswe, asakhuphukile emantini, kwavuleka lizulu, kwabonakala umoya waNkulunkulu anjengelituba, ehlela etikwakhe. Kusenjalo kwevakala livi livela ezulwini litsi: “Lena yiNdvodzana yami, letsandzekako, lengijabula ngayo.”’ (Matewu 3:16, 17) Ngemuva kwekubona nekuva lokwakwentekile, Johane akazange angabate kutsi Jesu abetfunywe nguNkulunkulu. (Johane 1:32-34) Ngesikhatsi umoya waNkulunkulu, nobe emandla lawasebentisako wehlela kuye, ngalelolanga Jesu waba nguMesiya nobe Khristu, loyo lokhetfwe kutsi abe nguMholi futsi abe yiNkhosi.—Isaya 55:4.

⁹ Kugcwaliseka kwetiphrofetho teliBhayibheli nebufakazi baNkulunkulu Jehova, kubonisa ngalokucacile kutsi Jesu abenguMesiya lowetsenjisiwe. LiBhayibheli liphendvula leminye imibuto lemibili lebalulekile ngaJesu Khristu. Wavela kuphi futsi abengumuntfu lonjani?

10. LiBhayibheli litsi Jesu abekuphi ngembikwekuba ete emhlabeni?

¹⁰ LiBhayibheli lifundzisa kutsi Jesu waphila ezulwini ngembikwekuba  ete emhlabeni. Mikha waphrofetha kutsi Mesiya abetawutalelwa eBhetlehema futsi washo nekutsi ‘abevele akhona kwasekucaleni.’ (Mikha 5:2) Etikhatsini letinyenti, Jesu watsi abehlala ezulwini ngembikwekuba atalwe. (Johane 3:13; 6:38, 62; 17:4, 5) Njengesidalwa semoya ezulwini, Jesu abenebuhlobo lobukhetsekile naJehova.

11. LiBhayibheli lisikhombisa njani kutsi Jesu uyiNdvodzana yaJehova leligugu?

¹¹ Jesu uyiNdvodzana yaJehova leligugu futsi loku kungesizatfu lesinhle. Ubitwa ngekutsi ‘litubulo layo yonkhe indalo,’ ngenca yekutsi Nkulunkulu wamdala kucala. * (Kholose 1:15) Kunalokunye lokwenta leNdvodzana ibe ligugu. ‘IyiNdvodzana lekukuphela kwayo.’ (Johane 3:16) Loku kusho kutsi Jesu ukuphela kwemuntfu lowadalwa nguNkulunkulu ngalokucondzile. NguJesu kuphela lowasetjentiswa nguNkulunkulu ngalesikhatsi adala tonkhe tintfo letisemhlabeni nasezulwini. (Kholose 1:16) Jesu uphindze abitwe ngekutsi ‘nguLivi.’ (Johane 1:14) Loku kusho kutsi abekhulumela Nkulunkulu, etfula imilayeto kanye nemitsetfo kulamanye emadvodzana eYise langumoya nalabantfu.

12. Sati njani kutsi iNdvodzana lelitubulo ayilingani naNkulunkulu?

¹² Litubulo laNkulunkulu lilingana naye yini, njengobe labanye bantfu bakholelwa loko? Akusiko loko lokufundziswa liBhayibheli. Njengobe sibonile etigabeni lesitifundzile, iNdvodzana yadalwa. Ngako yona yaba nesicalo kantsi Nkulunkulu Jehova yena akanaso sicalo nobe siphetfo. (Tihlabelelo 90:2) INdvodzana lekukuphela kwayo ayikaze iticabange kutsi ilingana neYise. LiBhayibheli lifundzisa ngalokucacile kutsi Babe mkhulu kuneNdvodzana. (Johane 14: 28; 1 Khorinte 11:3) Jehova yena yedvwa ‘unguNkulunkulu Somandla.’ (Genesisi 17:1) Ngako-ke, akekho lolingana naye. *

13. Lisho kutsini liBhayibheli nalitsi iNdvodzana “ingumfanekiso waNkulunkulu longabonwa ngemehlo enyama”?

¹³ Jehova neNdvodzana yakhe lelitubulo bajabulela buhlobo lobusedvute tigidzi teminyaka kungakadalwa emazulu nemhlaba. Bebatsandzana kakhulu! (Johane 3:35; 14:31) LeNdvodzana letsandvwako beseyifanana neYise. Kungako liBhayibheli libita Jesu ngekutsi ‘ungumfanekiso waNkulunkulu longabonwa ngemehlo enyama.’ (Kholose 1:15) Njengobe nendvodzana lengumuntfu ingafanana neyise ngetindlela letinyenti, leNdvodzana yasezulwini yakhombisa timfanelo letinhle teYise.

14. Kwenteka njani kutsi iNdvodzana yaJehova lekukuphela kwayo italwe ifanane nemuntfu?

¹⁴ INdvodzana yaJehova lekukuphela kwayo yashiya lizulu ngekutitsandzela yeta emhlabeni kutewuphila njengemuntfu. Kodvwa ungahle utibute, ‘Kungenteka njani kutsi sidalwa semoya sitalwe sibe njengemuntfu?’ Kuze ente loku, Jehova wenta simangaliso. Wendlulisela kuphila kweNdvodzana yakhe lelitubulo esibeletfweni sentfombi ntfo lengumJuda, lebitwa ngekutsi nguMariya. Mariya akazange ahlangane nendvodza ngekwemacasi. Ngako wabeleka indvodzana lephelele futsi wayetsa libito watsi nguJesu.—Lukha 1:30-35.

15. Yini lesenta sitsi ngaJesu singamati kancono Jehova?

¹⁵ Loko Jesu lakusho futsi wakwenta nakasemhlabeni kusisita simati kancono. Ngetulu kwaloko, ngaJesu singamati kancono Jehova. Kungani kunjalo? Khumbula phela kutsi  leNdvodzana ingumfanekiso lophelele waBabe wayo. Kungako Jesu atjela lomunye webafundzi bakhe: “Lowo losabone mine, umbonile naBabe.” (Johane 14:9) Tincwadzi letine teliBhayibheli letatiwa ngekutsi ngemaVangeli—Matewu, Makho, Lukha kanye naJohane—tisitjela lokunyenti ngekuphila kwaJesu Khristu, ngetintfo latenta kanye nebuntfu bakhe.

16. Ngalokuyinhloko, Jesu abefundzisa ngani, futsi abekutsatsakuphi loko abefundzisa ngako?

¹⁶ Jesu bekatiwa kakhulu ngekutsi “nguMfundzisi.” (Johane 1:38; 13:13) Yini abeyifundzisa? Ngalokuyinhloko, abefundzisa “ngetindzaba letinhle tembuso”—lokusho kutsi, uMbuso waNkulunkulu, longuhulumende wasezulwini lotawubusa emhlabeni wonkhe futsi uletsele bonkhe bantfu labalungile tibusiso letinhle. (Matewu 4:23) Kwakuvela kubani loko abefundzisa ngako? Jesu ngekwakhe watsi: “Loku lengikufundzisako akusiyo imfundziso yami, kodvwa yalongitfumile,” libito lakhe lokunguJehova. (Johane 7:16) Jesu bekati kutsi Babe wakhe ufuna bantfu beve ngetindzaba letinhle teMbuso. ESehlukweni 8, sitawufundza lokunyenti ngeMbuso waNkulunkulu nekutsi yini lotayenta.

17. Abefundzisa kuphi Jesu, futsi kungani aya kuto tonkhe tindzawo kuze afundzise?

¹⁷ Abefundzisa kuphi Jesu? Nobe ngabe ngukuphi lapho kwakunebantfu khona—emaphandleni, emadolobheni lamakhulu nalamancane, etimakethe, kanye nasemitini ngemiti. Jesu abengalindzeli kutsi bantfu bete kuye, kodvwa yena abesuka aye kubo. (Makho 6:56; Lukha 19:5, 6) Kungani Jesu atinikela wacitsa sikhatsi sakhe lesinyenti ashumayela futsi afundzisa? Kungobe nguloko kanye Nkulunkulu abefuna akwente. Ngaso sonkhe sikhatsi abenta intsandvo yaBabe wakhe. (Johane 8:28, 29) Kodvwa kunalesinye sizatfu lesamenta washumayela. Abenesihawu ngesicumbi sebantfu lesasite kutembona. (Matewu 9:35, 36) Lesicumbi sebantfu sasishiywe bafundisi, lokwakufanele ngabe  basifundzisa emaciniso ngaNkulunkulu nangetinjongo takhe. Jesu bekati kamhlophe kutsi labantfu bakudzinga kangakanani kwati ngetindzaba letinhle teMbuso.

18. Ngutiphi timfanelo taJesu lotitsandza kakhulu?

¹⁸ Jesu abeyindvodza lenesisa futsi aneluvelo ngebantfu. Labanye bebativa bakhululekile kukhuluma naye, futsi abenemusa. Ngisho nebantfwana bebakhululeka nabanaye. (Makho 10:13-16) Jesu abengakhetsi. Abebutondza bubi nekungalungi. (Matewu 21:12, 13) Ngalesikhatsi labasikati bangahlonishwa futsi banemalungelo lambalwa, wabaphatsa ngenhlonipho. (Johane 4:9, 27) Jesu abetfobeke sibili. Ngalesinye sikhatsi, wageza tinyawo tebafundzi bakhe, umsebenti lowawuvamise kwentiwa bantfu lababukelwa phasi.

19. Ngusiphi sibonelo lesikhombisa kutsi Jesu abetikhatsalela tidzingo talabanye?

¹⁹ Jesu abetikhatsalela tidzingo talabanye. Loku kwakubonakala kahle nakenta timangaliso ngemandla aNkulunkulu. (Matewu 14:14) Nasi sibonelo: Indvodza leyayinebulephelo  yeta kuye yatsi: “Nawutsandza, ungangihlambulula.” Jesu wayivela buhlungu lendvodza ngekuhlupheka kwayo. Ngenca yesihawu labenaso welula sandla sakhe watsi: “Ngiyatsandza, hlambuluka.” Lendvodza yelapheka! (Makho 1:40-42) Ucabanga kutsi lendvodza yativa njani?

20, 21. Jesu wasibekela njani sibonelo sekumlalela ngekwetsembeka Nkulunkulu?

²⁰ Jesu wabeka sibonelo lesihle sekumlalela ngekwetsembeka Nkulunkulu. Wahlala etsembekile kuBabe wakhe wasezulwini kuto tonkhe timo ngisho nobe abephikiswa futsi ahlupheka. Jesu waphumelela ekumelaneni ngalokucinile netilingo taSathane. (Matewu 4:1-11) Ngalesinye sikhatsi letinye tihlobo takhe atizange timkholwe futsi tatize titsi “usangene ingcondvo.” (Makho 3:21) Kodvwa akavumanga kutsi timcedze emandla; wachubeka enta umsebenti waNkulunkulu. Ngisho nobe abetfukwa futsi ahlukunyetwa,  Jesu abetibamba, akazange afune kubalimata labo bebamphikisa.—1 Phetro 2:21-23.

²¹ Jesu wahlala etsembekile waze wafa—wafa kufa lokubuhlungu etandleni tetitsa takhe. (Filiphi 2:8) Cabanga ngaloko lakubeketelela ngelilanga lakhe lekugcina angumuntfu. Waboshwa, wamangalelwa ngemanga, tikhulu letingakalungi tambeka licala, wahlekwa ticumbi tebantfu futsi wahlukunyetwa ngemasotja. Wabetselwa elugodvweni, futsi kwatsi nje sekatawufa wamemeta watsi: “Kuphelele!” (Johane 19:30) Nobe kunjalo, ngelilanga lesitsatfu Jesu afile, Babe wakhe wasezulwini wamvusela ekuphileni kwemoya. (1 Phetro 3:18) Ngemuva kwemaviki lambalwa, wenyukela ezulwini. Lapho “wase uhlala ngesekudla saNkulunkulu” futsi walindzela kutsi atfole ligunya lekuba yinkhosi.—Hebheru 10:12, 13.

22. Yini Jesu layifeza ngekuhlala etsembekile kuze kube sekufeni?

²² Yini Jesu layifeza ngekuhlala etsembekile kuze kube sekufeni? Kufa kwaJesu kusivulele litfuba lekutfola kuphila lokuphakadze epharadisi emhlabeni njengobe kwakuyinjongo yaJehova yasekucaleni. Esehlukweni lesilandzelako, sitawufundza ngekutsi kufa kwaJesu kukwenta kanjani loko.