1, 2. (a) Tanbasá mak hatene ema-boot nia naran la hanesan ho hatene loloos ema neʼe? (b) Ema hanoin saida deʼit kona-ba Jesus?

IHA mundu neʼe, iha ema barak ho naran-boot. Ema balu iha naran-boot iha sira-nia suku, sidade, ka rai. Ema seluk iha naran-boot iha mundu tomak. Maibé, hatene deʼit ema-boot nia naran la hanesan ho hatene loloos ema neʼe. Ita la hatene informasaun barak kona-ba nia, hanesan ninia esperiénsia, hahalok, no ema neʼe loloos hanesan saida.

² Maski Jesus Kristu moris iha mundu maizumenus tinan 2.000 liubá, ema barak iha mundu tomak rona tiha ona kona-ba nia. Maibé, ema barak sei konfuzaun kona-ba Jesus. Ema balu sente katak Jesus mak ema diʼak deʼit. Ema seluk hatete katak nia mak profeta baibain deʼit. Ema seluk tan fiar katak Jesus mak Maromak no katak ita tenkesér adora nia. Neʼe loos ka lae?

3. Tanbasá mak importante ba ita atu hatene lia-loos kona-ba Jesus?

³ Importante atu ita hatene lia-loos kona-ba Jesus. Tanbasá? Tanba Bíblia dehan: “Neʼe mak moris rohan-laek: Katak sira hatene didiʼak Ita, Maromak loos mesak deʼit, no ida neʼebé Ita haruka mai, Jesus Kristu.” (João 17:3) Sin, hatene lia-loos kona-ba Maromak Jeová no kona-ba Jesus Kristu bele lori ita ba  moris rohan-laek iha paraízu iha mundu. (João 14:6) Liután neʼe, Jesus hatudu ezemplu diʼak liu hotu kona-ba moris kontente no hatudu domin ba ema seluk. (João 13:34, 35) Kapítulu primeiru husi livru neʼe esplika lia-loos kona-ba Maromak. Agora mai ita estuda kona-ba saida mak Bíblia loloos hanorin kona-ba Jesus Kristu.

4. Títulu “Mesias” no “Kristu” katak sá?

⁴ Kleur antes Jesus moris, Bíblia fó-hatene nanis katak Maromak sei haruka ema ida nuʼudar Mesias, ka Kristu. Títulu “Mesias” (husi liafuan ebraiku)  no mós “Kristu” (husi liafuan gregu) dehan katak “Ema neʼebé Maromak hili”. Nuneʼe, Maromak hili ema ida atu sai Mesias no fó ba nia pozisaun espesiál. Iha kapítulu sira seluk husi livru neʼe, ita sei aprende kona-ba knaar espesiál neʼebé Maromak fó ba Mesias hodi kumpre Ninia promesa sira. Ita sei aprende mós kona-ba bensaun sira neʼebé ita bele hetan liuhusi Jesus. Maibé, antes Jesus moris, karik ema barak iha tempu neʼebá husu: ‘Sé loos mak sei sai Mesias neʼe?’

5. Jesus nia dixípulu sira fiar saida kona-ba nia?

⁵ Iha tempu neʼebé Jesus husi Nazaré hela iha rai, ninia dixípulu sira fiar metin katak nia mak Mesias neʼebé promete nanis ona. (João 1:41) Dixípulu ida naran Simão Pedro la ho dúvida hatete ba Jesus: “Ita mak Kristu.” (Mateus 16:16) Maibé, oinsá mak dixípulu sira-neʼe, no ita hotu, bele fiar katak Jesus loloos mak Mesias neʼebé promete nanis ona?

6. Fó toʼok ezemplu ida kona-ba oinsá mak Maromak Jeová ajuda fiar-naʼin sira atu hatene Mesias mak sé.

⁶ Maromak nia profeta sira, neʼebé moris kleur antes Jesus, fó-hatene nanis informasaun barak kona-ba Mesias. Informasaun hirak-neʼe ajuda ema atu hatene Mesias mak sé loos. Karik ezemplu tuirmai neʼe bele ajuda ita komprende kona-ba ida-neʼe: Hanoin toʼok ema husu Ita atu bá hasoru ema ida neʼebé Ita seidauk koñese iha terminál, ka aeroportu. Se ita hatene nanis informasaun ruma kona-ba ema neʼe, ida-neʼe sei halo fasil ba Ita atu hetan nia, loos ka lae? Hanesan neʼe mós, liuhusi profeta sira neʼebé hakerek Bíblia, Maromak Jeová fó-hatene nanis informasaun barak kona-ba buat neʼebé Mesias sei halo no saida mak nia sei hasoru. Kuandu fiar-naʼin sira haree informasaun sira-neʼe sai loos, sira bele hatene Mesias mak sé.

7. Profeta rua hakerek saida kona-ba Mesias? Oinsá mak liafuan neʼebé sira hakerek sai loos?

 ⁷ Hanoin toʼok kona-ba ezemplu rua. Primeiru, tinan 700 liu antes Mesias moris, profeta Miquéias fó-hatene nanis katak Ida neʼebé Maromak hili atu sai Mesias sei moris iha Belein, sidade kiʼik ida iha rai-Judeia. (Miquéias [Mikha] 5:2) Tuir loloos, Jesus moris iha neʼebé? Nia moris duni iha sidade neʼe! (Mateus 2:1, 3-9) Segundu, tinan atus ba atus molok Mesias mosu, liafuan neʼebé hakerek iha Daniel 9:25 hatudu tinan loos neʼebé nia sei mosu mai, tinan neʼe mak 29. * Liafuan neʼebé profeta rua neʼe hakerek nanis, no mós profeta seluk nia liafuan, hatudu katak Jesus mak Mesias neʼebé promete nanis ona.

8, 9. Kuandu Jesus hetan batizmu, saida mak akontese hodi hatudu katak nia mak Mesias?

⁸ Besik tinan 29 nia rohan, iha buat seluk tan neʼebé akontese hodi hatudu katak Jesus mak Mesias. Iha tinan neʼe mak Jesus bá hasoru João Batista atu hetan batizmu iha Mota Jordaun. Maromak Jeová promete tiha katak nia sei fó sinál ida ba João atu bele hatene Mesias mak sé. João haree sinál neʼe mosu bainhira Jesus hetan batizmu. Bíblia hatete: “Hetan tiha batizmu, Jesus sai husi bee, no tuirmai lalehan nakloke, no nia haree Maromak nia espíritu hanesan manu-pombu ida tun ba Jesus. No mós, lian ida husi lalehan dehan: ‘Neʼe mak haʼu-nia Oan-Mane neʼebé haʼu hadomi, ida neʼebé halo haʼu-nia laran kontente.’” (Mateus 3:16, 17) Kuandu haree no rona tiha buat sira-neʼe, João la duvida katak Maromak mak haruka Jesus mai. (João 1:32-34) Kuandu Maromak fakar ninia espíritu santu, ka  forsa, ba Jesus, iha tempu neʼebá kedas mak Jesus sai Mesias, ka Kristu, ida neʼebé hetan knaar atu sai Ulun-Naʼin no Liurai.—Isaías (Yesaya) 55:4.

⁹ Liafuan iha Bíblia kona-ba Mesias neʼebé sai loos ona no sasin husi Maromak Jeová rasik, hatudu katak Jesus mak Mesias neʼebé promete nanis ona. Maibé Bíblia fó resposta ba pergunta importante rua tan kona-ba Jesus Kristu: Nia mai husi neʼebé? Nia ema hanesan saida?

10. Saida mak Bíblia hanorin kona-ba Jesus antes nia mai toʼo mundu?

¹⁰ Bíblia hanorin katak Jesus moris iha lalehan antes nia mai toʼo mundu. Profeta Miquéias fó-hatene nanis katak Mesias sei moris iha Belein, no mós katak iha “tempu uluk kedas” nia moris ona. (Miquéias [Mikha] 5:2) Jesus rasik hatete dala barak katak nia moris iha lalehan antes nia moris nuʼudar ema iha mundu. (João 3:13; 6:38, 62; 17:4, 5) Nuʼudar kriatura espíritu ida iha lalehan, Jesus iha relasaun espesiál ho Maromak Jeová.

11. Tuir Bíblia, tanbasá Jesus mak Oan neʼebé Maromak Jeová hadomi liu?

¹¹ Jesus mak Oan neʼebé Maromak Jeová hadomi liu no iha razaun loos kona-ba ida-neʼe. Bíblia bolu Jesus nuʼudar “oan primeiru husi kriasaun sira hotu”, tanba Maromak kria Jesus ulukliu. * (Koloso 1:15) Iha buat seluk tan neʼebé halo Jesus espesiál. Nia mak  “Oan-Mane mesak”. (João 3:16) Ida-neʼe hatudu katak Jesus deʼit mak Maromak kria rasik, no depois neʼe Maromak uza Jesus atu kria buat sira seluk. (Koloso 1:16) Bíblia mós bolu Jesus “Liafuan”. (João 1:14) Ida-neʼe hatudu katak nia dehan sai Maromak nia liafuan ba oan sira seluk, katak ema no anju sira.

12. Tanbasá mak ita bele hatene katak Jesus la hanesan ho Maromak?

¹² Ema balu hanoin katak Jesus hanesan ho Maromak. Ida-neʼe loos ka lae? Bíblia la hanorin ida-neʼe. Tuir buat neʼebé ita foin lee, Maromak mak kria Jesus. Nuneʼe, klaru katak Jesus iha hun, maibé Maromak Jeová la iha hun no rohan. (Salmo [Mazmur] 90:2) Jesus nunka hanoin atu iha pozisaun hanesan ho ninia Aman. Tuir loloos, Bíblia hanorin katak Aman mak boot liu Oan. (João 14:28; 1 Korinto 11:3) Maromak Jeová mesak mak “Kbiit Boot Liu Hotu”. (Gênesis [Kejadian] 17:1; Apokalipse 16:7) Tan neʼe, la iha ida neʼebé hanesan ho Maromak Jeová. *

13. Kuandu Bíblia hatete katak Oan mak “ilas husi Maromak neʼebé matan la bele haree”, ida-neʼe katak sá?

¹³ Kleur antes Maromak Jeová kria mundu ka fitun sira iha lalehan, nia no ninia Oan-Mane moris kontente hamutuk ba tinan rihun ba rihun. Sira hadomi malu tebes! (João 3:35; 14:31) Oan doben neʼe halo tuir ninia Aman nia ezemplu iha buat hotu. Tan neʼe, Bíblia hatete katak Oan mak “ilas husi Maromak neʼebé matan la bele haree”. (Koloso 1:15) Sin, hanesan oan neʼebé hatudu hahalok hanesan ho ninia aman, Maromak nia Oan-Mane iha lalehan mós haleno ninia Aman nia hahalok sira.

14. Oinsá mak Maromak Jeová nia Oan-Mane mesak bele moris iha rai nuʼudar ema?

 ¹⁴ Maromak Jeová nia Oan-Mane mesak halo tuir ho laran hodi husik lalehan no tun ba rai nuʼudar ema ida. Maibé, karik Ita hanoin: ‘Oinsá mak kriatura iha lalehan bele moris iha rai nuʼudar ema?’ Hodi halo ida-neʼe, Maromak Jeová halo milagre ida. Nia muda ninia Oan-Boot nia moris husi lalehan ba virjen ida nia knotak. Feto neʼe mak ema judeu naran Maria. Nuneʼe Maria sai isin-rua maski nia seidauk hamutuk ho mane ida, no ninia oan la iha aman ida iha rai. Hanesan neʼe mak Maria tuur ahi oan-mane neʼebé perfeitu, ka la iha sala ida, no hanaran nia Jesus.—Lucas 1:30-35.

15. Tanbasá mak ita bele dehan katak ita bele hatene buat barak kona-ba Maromak Jeová liuhusi Jesus?

¹⁵ Ita bele hatene Jesus diʼak liu hodi estuda kona-ba ninia hahalok sira kuandu nia iha mundu. Buat importante liu mak liuhusi Jesus, ita sei hatene Maromak Jeová diʼak liután. Tanbasá? Hanoin-hetan katak Oan neʼe haleno ninia Aman nia hahalok iha buat hotu. Tanba ida-neʼe Jesus hatete ba ninia dixípulu ida: “Ema neʼebé haree ona haʼu, haree ona mós Aman.” (João 14:9) Livru haat iha Bíblia neʼebé ema hatene nuʼudar Evanjellu, Mateus, Marcos, Lucas, no João, konta buat barak kona-ba Jesus Kristu nia moris, atividade, no hahalok sira.

16. Saida mak Jesus nia mensajen importante liu? Mensajen neʼe mai husi sé?

¹⁶ Ema barak bolu Jesus nuʼudar “Mestre”. (João 1:38; 13:13) Nia hanorin saida? Ninia mensajen importante liu mak “liafuan diʼak kona-ba Maromak nia  Ukun”. Ukun neʼe mak Maromak nia governu iha lalehan neʼebé sei ukun mundu tomak no sei lori bensaun ba nafatin ba ema neʼebé halo tuir. (Mateus 4:23) Mensajen neʼe, sé-nian? Jesus rasik hatete: “Buat neʼebé haʼu hanorin ba imi laʼós haʼu-nian, maibé husi ida neʼebé haruka haʼu mai”, neʼe mak Maromak Jeová. (João 7:16) Jesus hatene katak Ninia Aman hakarak ema atu rona liafuan diʼak kona-ba Ninia Ukun. Iha Kapítulu 8, ita sei aprende liután kona-ba Maromak nia Ukun no saida mak Ukun neʼe sei halo.

17. Jesus hanorin iha neʼebé deʼit? Tanbasá mak nia hakaʼas an no gasta tempu barak atu hanorin ema seluk?

¹⁷ Jesus hanorin iha neʼebé deʼit? Nia hanorin iha fatin hotu neʼebé bele hasoru ema, hanesan iha foho, iha sidade, iha knua, iha merkadu, no iha ema nia uma. Jesus la hein deʼit ema atu hakbesik nia. Nia mak bá buka sira. (Marcos 6:56; Lucas 19:5, 6) Tanbasá mak Jesus  hakaʼas an no gasta tempu barak atu haklaken no hanorin? Tanba ida-neʼe mak Maromak nia hakarak ba nia. Jesus sempre halo ninia Aman nia hakarak. (João 8:28, 29) Maibé iha mós razaun seluk. Nia hanoin ema-lubun neʼebé mai hasoru nia. (Mateus 9:35, 36) Tuir loloos, ulun-naʼin relijiaun nian tenke hanorin ema lia-loos kona-ba Maromak no Ninia hakarak, maibé ulun-naʼin sira-neʼe la tau matan diʼak ba sira. Jesus hatene katak ema presiza duni atu rona mensajen kona-ba Maromak nia Ukun.

18. Saida mak Ita gosta kona-ba Jesus?

¹⁸ Jesus hatudu domin no laran-diʼak ba ema seluk. Nuneʼe, ema la taʼuk atu hakbesik nia. Labarik mós gosta atu hamutuk ho nia. (Marcos 10:13-16) Jesus la hili ema. Nia odi korrupsaun no hahalok neʼebé laloos. (Mateus 21:12, 13) Iha Jesus nia tempu ema barak trata feto sira la diʼak, maibé Jesus sempre hatudu respeitu  ba sira. (João 4:9, 27) Jesus ema haraik-an loos. Loron ida, nia mós fase ninia apóstolu sira-nia ain, serbisu neʼebé baibain atan mak halo.

19. Ezemplu saida mak hatudu katak Jesus hanoin kona-ba buat neʼebé ema seluk presiza?

¹⁹ Jesus hanoin kona-ba buat neʼebé ema seluk presiza. Ita haree ida-neʼe, liuliu, kuandu nia uza Maromak nia espíritu hodi halo milagre atu fó isin-diʼak. (Mateus 14:14) Porezemplu, ema moras-lepra hakbesik Jesus hodi hatete: “Se Ita-Boot hakarak, Ita bele halo haʼu sai moos.” Rona tiha neʼe, nia hanoin tebetebes mane neʼe, no nia lolo liman hodi kona mane neʼe no dehan: “Haʼu hakarak. Sai moos bá.” No mane neʼe sai moos kedas husi ninia moras-lepra! (Marcos 1:40-42) Hanoin toʼok oinsá ema moras neʼe sente!

20, 21. Jesus fó ezemplu saida deʼit kona-ba halo tuir Maromak ho laran-metin?

²⁰ Jesus fó ezemplu diʼak liu hotu kona-ba halo tuir Maromak ho laran-metin. Nia hatudu laran-metin ba ninia Aman iha lalehan, maski hasoru problema no terus oioin, no ema barak kontra hasoru nia. Jesus hamriik metin no la monu ba Satanás nia tentasaun sira. (Mateus 4:1-11) Iha tempu neʼebá, Jesus nia família balu mós la hatudu fiar ba nia, sira hatete katak “nia bulak ona”. (Marcos 3:21) Maibé Jesus la husik sira atu hapara nia serbí Maromak, nia halo nafatin Maromak nia hakarak. Maski ema goza no fó-terus ba nia, Jesus sempre kontrola nia an, no nunka koko atu halo aat ba ema neʼebé kontra hasoru nia.—1 Pedro 2:21-23.

²¹ Ikusmai, Jesus nia inimigu sira haterus no oho nia. Maibé Jesus laran-metin toʼo mate. (Filipe 2:8) Hanoin  toʼok kona-ba terus neʼebé nia hetan iha ninia loron ikus. Ema kaer nia, testemuña falsu sira duun matak nia, tesi-lia naʼin balu neʼebé laran-dodok fó kastigu-mate ba nia, ema-lubun hamnasa no goza nia, no soldadu sira fó terus ba nia. Ema prega nia ba ai-riin, no nia hakilar: “Buat hotu kumpre ona!” depois nia iis kotu. (João 19:30) Maibé, iha loron tolu depois Jesus mate, ninia Aman iha lalehan fó moris-hiʼas ba nia nuʼudar espíritu ida. (1 Pedro 3:18) Loron 40 tuirmai, nia bá fali lalehan. Iha neʼebá, nia ‘tuur iha Maromak nia liman-loos’ hodi hein tempu neʼebé nia sei simu kbiit atu ukun nuʼudar Liurai.—Ebreu 10:12, 13.

22. Tanba Jesus laran-metin toʼo mate, ita bele hetan oportunidade saida?

²² Tanba Jesus laran-metin toʼo mate, ita bele hetan oportunidade kapás saida? Jesus nia mate loke dalan ba ita atu moris ba nafatin iha paraízu iha mundu, hanesan Maromak nia hakarak horiuluk kedas. Kapítulu tuirmai sei koʼalia kona-ba ida-neʼe.