1, 2. (a) Sapos yu save long nem tasol bilong wanpela man i gat biknem, bilong wanem dispela i no makim olsem yu save tru long em? (b) Ol man i gat wanem kain tingting long Jisas?

LONG dispela graun i gat planti man i gat nem. Sampela i gat nem long komiuniti, o taun, o kantri bilong ol. Sampela i gat nem long olgeta hap bilong graun. Tasol sapos yu save long nem tasol bilong wanpela man i gat biknem, dispela i no makim olsem yu save tru long em. Em i no makim olsem yu save long ol samting bilong i stap bilong em na long pasin tru bilong em.

² Ol manmeri long olgeta hap bilong graun ol i gat sampela save long Jisas Krais, maski em i stap long graun inap 2,000 yia i go pinis. Tasol planti ol i no kliagut long Jisas em i husat tru. Sampela i tok em i wanpela gutpela man tasol. Sampela narapela i tok em i wanpela profet tasol. Na sampela i bilip olsem Jisas em i God na ol man i mas lotu long em. Yu ting yumi mas lotu long em?

3. Bilong wanem em i bikpela samting long yu kisim stretpela save long Jisas?

³ Em i bikpela samting long yu mas kisim stretpela save long Jisas. Bilong wanem? Long wanem, Baibel i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” (Jon 17:3) Yes, taim yumi kisim stretpela save long God Jehova na Jisas  Krais, dispela inap bringim yumi long laip oltaim long Paradais long graun. (Jon 14:6) Na tu, Jisas i stap nambawan gutpela piksa long pasin bilong wokabaut stret na long pasin i gutpela long mekim long ol arapela. (Jon 13:​34, 35) Long Sapta 1 bilong dispela buk, yumi bin skelim God em i wanem kain man tru. Orait nau yumi ken skelim tru tru Baibel i tok wanem long Jisas Krais.

4. Wanem mining bilong biknem “Mesaia” na “Krais”?

⁴ Paslain tru long taim mama i karim Jisas, Baibel i tok profet long Mesaia, o Krais, em God bai salim em i kam. Dispela biknem “Mesaia” (ol i kisim long wanpela tok Hibru) na “Krais” (ol i kisim long wanpela  tok Grik) mining bilong tupela tok em “Man God i Makim.” Dispela Man God i tok promis long en, God i makim em bilong holim bikpela namba. Long sampela sapta i kamap bihain long dispela buk, bai yumi kisim sampela save moa long bikpela wok Mesaia i mekim bilong helpim ol tok promis bilong God long kamap tru. Bai yumi kisim save tu long ol blesing yumi inap kisim long rot bilong Jisas long nau tu. Tasol paslain long mama i karim Jisas, ating planti ol i laik save, ‘Husat bai kamap Mesaia?’

5. Ol disaipel bilong Jisas i bilip tru long wanem samting?

⁵ Long taim bilong ol aposel, ol disaipel bilong Jisas bilong Nasaret ol i bilip tru olsem Jisas em i dispela Mesaia Baibel i tok profet long em. (Jon 1:41) Wanpela disaipel, nem bilong em Saimon Pita, em i tokaut stret long Jisas: “Yu dispela man God i bin makim.” (Matyu 16:16) Tasol olsem wanem ol dispela disaipel​—na yumi tu​—inap save olsem tru tru Jisas em i dispela Mesaia God i tok promis long en?

6. Stori long olsem wanem Jehova i bin helpim ol man i gat gutpela bel long luksave long Mesaia.

⁶ Ol profet bilong God husat i bin stap paslain long Jisas ol i tok profet long planti samting bilong Mesaia. Ol dispela samting bai helpim ol narapela long luksave long em. Yumi ken tok piksa long dispela olsem: Tingim olsem wanpela man i tokim yu long go long bas stop o ples balus bilong kisim wanpela man yu no bin lukim em bipo. Em bai gutpela sapos wanpela i stori long yu long sampela samting bilong dispela man. Na olsem tasol, long rot bilong ol tok profet bilong Baibel, Jehova i stori long planti samting em Mesaia bai mekim na ol samting i painim em. Truim bilong ol dispela tok profet bai helpim ol man i gat gutpela bel long luksave long em.

7. Wanem tupela tok profet i kamap tru long Jisas?

⁷ Tingim tupela tok profet. Namba wan, winim 700 yia paslain long samting i kamap, profet Maika i tok profet olsem Man God i bin tok promis long en bai kamap long  Betlehem, em wanpela liklik taun long kantri Juda. (Maika 5:2) Mama i karim Jisas long we? Long dispela taun tasol! (Matyu 2:​1, 3-9) Namba tu, planti handet yia paslain long samting i kamap, tok profet i stap long Daniel 9:25 i makim yia stret Mesaia bai kamap long en​—29 C.E. * Truim bilong dispela tupela tok profet na bilong planti tok profet moa i kamapim klia olsem Jisas em i dispela Mesaia God i tok promis long en.

8, 9. Long taim Jisas i kisim baptais, wanem samting i kamapim klia em i Mesaia?

⁸ Sampela samting moa i kamap klostu long pinis bilong 29 C.E., em dispela i soim olsem Jisas em i Mesaia. Long dispela taim Jisas i go long Jon Bilong Baptais bilong kisim baptais long wara Jordan. Jehova i bin tok promis long kamapim wanpela mak na bai Jon inap luksave long Mesaia. Jon i lukim dispela mak taim Jisas i kisim baptais. Baibel i tok long dispela olsem: “Jisas i kisim baptais pinis, na kwiktaim em i lusim wara na i kam antap. Na heven i op, na em i lukim Spirit bilong God i kam daun olsem wanpela bilong ol dispela kain pisin ol i kolim balus, na i kam i stap long em. Na long heven wanpela maus i singaut olsem, ‘Dispela em i Pikinini bilong mi. Mi laikim em tumas. Bel bilong mi em i amamas long em.’ ” (Matyu 3:​16, 17) Ol samting Jon i lukim na harim i kirapim em long bilip tru olsem God i bin salim Jisas i kam. (Jon 1:​32-34) Long taim spirit bilong God i kapsait long em, Jisas i kamap Mesaia, o Krais, em man God i makim bilong stap Lida na King.​—Aisaia 55:4.

⁹ Truim bilong ol tok profet bilong Baibel na tok bilong God Jehova yet i kamapim klia olsem Jisas em i Mesaia God i tok promis long salim i kam. Tasol Baibel i bekim tupela narapela bikpela askim long Jisas Krais: Em i kam long wanem hap, na em i wanem kain man?

10. Baibel i tok wanem long i stap bilong Jisas paslain long em i kam long graun?

¹⁰ Baibel i tok Jisas i bin stap long heven paslain long em i kam long graun. Maika i tok profet olsem Mesaia bai kamap long Betlehem na em i tok tu olsem Em i bilong “bipo tru.” (Maika 5:2) Planti taim Jisas yet i tok em i bin stap long heven paslain long em i kamap wanpela man long graun. (Jon 3:13; 6:​38, 62; 17:​4, 5) Jisas i wanpela spirit long heven, na em i pas gut tru wantaim Jehova.

11. Baibel i tok wanem bilong soim olsem Jisas em dispela Pikinini Jehova i laikim tru?

¹¹ Jisas em i dispela Pikinini Jehova i laikim tru​—na i gat as tru na Jehova i laikim em. Em i “namba wan pikinini bilong God,” long wanem, em i namba wan samting God i bin wokim. * (Kolosi 1:15) I gat narapela samting tu i mekim na dispela Pikinini i narapela kain. Em i dispela “wanpela Pikinini tasol” bilong God. (Jon 3:16) Dispela i makim olsem Jisas wanpela tasol em samting God yet i bin wokim. Na tu, God i mekim wok long Jisas tasol taim Em i wokim olgeta narapela samting. (Kolosi 1:16) Baibel i kolim Jisas olsem “Tok.” (Jon 1:14) Dispela i makim olsem Jisas em i mausman bilong God, em i karim tok i go long ol arapela pikinini bilong Papa, long ol pikinini spirit na ol man tu.

12. Olsem wanem yumi save namba wan Pikinini bilong God i no wankain olsem God?

¹² Olsem wanem? Namba wan Pikinini i wankain olsem God, olsem sampela i ting? Baibel i no tok olsem. Olsem yumi lukim long paragraf 11, God i bin wokim dispela Pikinini. Olsem na laip bilong Pikinini i gat kirap bilong en, tasol God Jehova i no gat kirap o pinis bilong em. (Song 90:2) Dispela Pikinini bilong God i no tingting liklik olsem  em i mas i stap bikpela olsem Papa bilong em. Baibel i kamapim klia olsem Papa i winim Pikinini. (Jon 14:28; 1 Korin 11:3) Jehova wanpela tasol em i “God I Gat Olgeta Strong.” (Stat 17:1) Olsem na i no gat wanpela i bikpela olsem em. *

13. Wanem mining bilong dispela tok bilong Baibel olsem Pikinini “em i wankain olsem God yet”?

¹³ Jehova na namba wan Pikinini bilong em i pas gut wantaim inap planti bilion yia​—paslain tru long God i wokim heven na graun. Narapela i laikim tru narapela! (Jon 3:35; 14:31) Dispela gutpela Pikinini i gat wankain pasin olsem Papa bilong em. Long dispela as Baibel i tok Pikinini “em i wankain olsem God yet.” (Kolosi 1:15) Wanpela pikinini man bilong graun i wankain olsem papa bilong em long planti rot, na olsem tasol dispela Pikinini bilong heven i kamapim ol pasin bilong Papa bilong em.

14. Olsem wanem dispela wanpela Pikinini bilong Jehova i kamap olsem man long graun?

¹⁴ Dispela Pikinini bilong Jehova i orait long lusim heven na kam daun long graun bilong stap olsem wanpela man. Tasol yu inap tingting, ‘Olsem wanem wanpela husat i gat bodi bilong spirit inap kamap olsem wanpela man bilong graun?’ Bilong mekim dispela samting, Jehova i wokim wanpela mirakel. Em i kisim laip bilong namba wan Pikinini bilong em long heven na putim long bel bilong wanpela meri Juda i no bin slip wantaim man, nem bilong em Maria. Jisas i no gat papa bilong graun. Olsem na Maria i karim pikinini man i gutpela olgeta na i givim nem Jisas long em.​—Luk 1:​30-35.

15. Bilong wanem yumi ken tok olsem long rot bilong Jisas yumi inap save gut moa long Jehova?

¹⁵ Ol tok bilong Jisas na ol samting em i bin mekim taim  em i stap long graun i helpim yumi long save gut long em. Na tu, long rot bilong Jisas yumi inap save gut moa long Jehova. Bilong wanem i olsem? Tingim, dispela Pikinini i kamapim stret ol pasin bilong Papa bilong em. Long dispela as Jisas i tokim wanpela disaipel bilong em olsem: “Man i lukim mi, em i lukim Papa.” (Jon 14:9) Fopela buk bilong Baibel ol i kolim ol Gutnius​—Matyu, Mak, Luk, na Jon​—ol i stori planti long laip, wok, na ol pasin bilong Jisas Krais.

16. Jisas i autim wanem tok? Ol tok em i lainim ol man long en i bilong husat?

¹⁶ Planti man i kolim Jisas olsem “Tisa.” (Jon 1:38; 13:13) Em i lainim ol man long wanem ol samting? Em i autim tok long “gutnius bilong kingdom”​—em Kingdom Bilong God, wanpela gavman i stap long heven na em bai bosim graun olgeta na kamapim planti blesing long ol man i harim tok. (Matyu 4:23) Em tok bilong husat? Jisas yet i tok: “Dispela tok mi givim yupela, em i no bilong mi yet. Nogat. Em i bilong God, em i bin salim mi na mi kam.” (Jon 7:16) Jisas i save Papa bilong em i laik bai ol manmeri i harim gutnius bilong Kingdom. Long Sapta 8, bai yumi kisim sampela save moa long Kingdom Bilong God na ol samting em bai kamapim.

17. Jisas i lainim ol manmeri we? Bilong wanem em i wok hat bilong lainim ol narapela?

¹⁷ Jisas i lainim ol manmeri we? Long olgeta hap em i painim ol long en​—long ol ples na ol taun, long ples maket, na long haus bilong ol man. Jisas i no ting ol man i mas kam long em. Em i go long ol. (Mak 6:56; Luk 19:​5, 6) Bilong wanem Jisas i wok hat olsem na lusim bikpela haptaim bilong em long autim tok na lainim ol man? Long wanem, God i laik bai em i mekim olsem. Oltaim Jisas i mekim laik bilong Papa bilong em. (Jon 8:​28, 29) Tasol i gat narapela as na em i autim tok. Em i sori long ol manmeri i kam lukim em. (Matyu 9:​35, 36) Ol bikman bilong lotu bilong ol i gat wok long helpim ol long kisim stretpela save long God na ol  samting em bai mekim, tasol ol i no mekim olsem. Jisas i save ol manmeri i mas harim tok bilong Kingdom.

18. Yu laikim tru wanem ol pasin bilong Jisas?

¹⁸ Jisas em i man bilong sori na pilim tru ol samting long bel bilong em. Olsem na ol narapela i luksave olsem em i gat gutpela pasin na ol i no pret long go long em. Ol pikinini tu i amamas long stap wantaim em. (Mak 10:​13-16) Jisas i mekim wankain pasin long olgeta. Em i nolaik tru long pasin giaman na pasin i no stret. (Matyu 21:​12, 13) Long dispela taim planti man i no rispek long ol meri na ol meri i no gat planti rait long mekim ol samting, tasol Jisas i mekim gutpela pasin long ol olsem ol i gat nem. (Jon 4:​9, 27) Jisas i gat pasin daun tru. Wanpela taim em i wasim lek bilong ol aposel bilong em, em wanpela wok ol wokboi nating i save mekim.

19. Wanem samting i soim olsem Jisas i pilim tru hevi bilong ol arapela?

¹⁹ Jisas i pilim tru hevi bilong ol arapela. Dispela i kamap ples klia taim spirit bilong God i givim strong long em long  wokim ol mirakel bilong oraitim ol sikman. (Matyu 14:14) Olsem: Wanpela man i gat sik lepra i kam long Jisas na i tok: “Sapos yu laik, yu inap long mekim mi i kamap klin long ai bilong God.” Jisas i pilim tru pen na hevi bilong dispela man. Jisas i sori tru long em, na i putim han long dispela man na i tok: “Mi laik. Yu kamap klin.” Na sik bilong man i pinis! (Mak 1:​40-42) Yu inap tingim dispela man i pilim olsem wanem?

20, 21. Olsem wanem Jisas i stap gutpela piksa long pasin bilong stap gut long God?

²⁰ Jisas i stap nambawan gutpela piksa long pasin bilong stap gut long God. Em i stap gut long Papa bilong em long heven maski em i stap olsem wanem na maski kain kain pasin birua na hevi i painim em. Jisas i sakim tru ol traim bilong Satan. (Matyu 4:​1-11) Sampela wanblut bilong Jisas yet i no bin bilip long em, ol i tok em i “longlong pinis.” (Mak 3:21) Tasol Jisas i no larim ol i pulim em; em i wok long mekim wok bilong God. Maski ol man i tok bilas na tok nogut  long em, Jisas i bosim gut bel, na em i no traim long bagarapim ol birua bilong em.​—1 Pita 2:​21-23.

²¹ Jisas i stap gut long God i go inap long em i dai​—em i dai long han bilong ol birua, ol i mekim nogut long em na givim bikpela pen long em. (Filipai 2:8) Tingim ol hevi em i karim long laspela de bilong em long stap laip olsem wanpela man. Ol soldia i holim em, ol witnes giaman i sutim tok long em, ol jas nogut i tok em i gat asua, ol manmeri i tok bilas, na ol soldia i givim bikpela pen long em. Taim em i stap long diwai ol i nilim em long en, em i pulim win laspela taim na i singaut: “Em i pinis nau.” (Jon 19:30) Tasol long namba 3 de bihain long Jisas i dai, Papa bilong em long heven i kirapim em bek. (1 Pita 3:18) Sampela wik bihain, em i go bek long heven. Long heven em i “sindaun long han sut bilong God” na wet long taim em bai kamap king.​—Hibru 10:​12, 13.

22. Jisas i stap gut long God i go inap long em i dai na dispela i kamapim wanem samting?

²² Jisas i stap gut long God i go inap long em i dai na dispela i kamapim wanem samting? Dai bilong Jisas i opim rot long yumi ken kisim laip oltaim long Paradais long graun, olsem Jehova i tingting pinis long en long pastaim. Sapta i kamap bihain long dispela bai skelim olsem wanem dai bilong Jisas inap mekim olsem.