1, 2. ა) მუშენ ვა ნიშნენს სახელიშ რჩქინა, კოჩის ჯგირო იჩინენქინ თის? ბ) მუნერ შხვადოშხვა აზრი უღუ ხალხის იესოშენ?

ამდღა ბრელ გიმორჩქინელ კოჩ ცხოვრენს. ნამთინეს მუშ უბანს, ქალაქის ვარდა ქიანას აფუ სახელი გოლაფირ. მინს მთელ ქიანა იჩინენს. მარა ხვალე სახელიშ რჩქინა ვა ნიშნენს, ნამდა კოჩის ჯგირო იჩინენქინ, გიჩქუ თიშ ულირ ცხოვრება დო ხასიათი.

² მართალ რე, იესო სოდგარენ 2000 წანაშ წოხოლე ცხოვრენდ, მარა ამდღა ძნელ ოგორალ რე თინერ კოჩი, ნამუსით იესოშენ ჭიჭემუთუნ ვარა ვაფუდას გუნაგონებუ. მარა ბრელს, სინამდვილეს ვა უჩქუ, მი რდუ თინა. ნამთინეს იესო უბრალოთ ჯგირ კოჩო მიორჩქ. შხვეფ თის წინასწარმარაგადეთ თვალნა. რენა თიცალეფ, მისით იესო ღორონთო მიორჩქუ დო ოთაყვანუ თის. ქორენო თენა სწორი?

3. მუშენ რე მნიშვნელოვან, იჩინენდე იეჰოვა ღორონთის დო იესო ქრისტეს?

³ მნიშვნელოვან რე, გიჩქუდას სიმრთლე იესოშენ. მუშენ? ბიბლია იჩიებ: „მარადიულ სიცოცხლეშ მიოღებელო, ოკო გიჩინებაფუანდან სი, ხვალე ართ ჭეშმარიტ ღორონთის დო თის, მიდგა სი დედამიწაშა მაშქვი, იესო ქრისტეს“ (იოანე 17:3). ნამდვილო, იეჰოვა ღორონთიშ დო იესო ქრისტეშ გაჩინებაფა მარადიულ სიცოცხლეშა მემჸონანა (იოანე 14:6). თეშ გარდა, იესო სწორი ცხოვრებაშ დო შხვეფწკუმა ურთიერთობაშ საუჯგუშო მაგალითის მარზენა (იოანე 13:34, 35). თე  წიგნიშ პირველ დუდის ჩქი გებგით სიმართლე ღორონთიშ გურშენ. ასე მორთი, ქობძირათ, მუს ოგურუანს ბიბლია იესო ქრისტეშენ.

4. მუს ნიშნენს ტიტულეფი „მესია“ დო „ქრისტე“?

⁴ იესოშ დაბადებაშა ბრელ ხანით ადრე ბიბლიას წინასწარნარაგადა რდუ, ნამდა ღორონთი დედამიწაშა მესიას ანუ ქრისტეს მაშქვანდუ. ტიტულეფი „მესია“ (ებრაულ სიტყვა) დო „ქრისტე“ (ბერძუნლ სიტყვა) ნიშნენს „ცხებულს“. თინა, მით დუნაპირებ რდუ, ცხებულ იჸუაფუდუ, შხვა სიტყვეფით  ქოფთქუათინ — ღორონთშე განსაკუთრებულ დავალებას მიღენდუ. ანწიან დუდის უმოს მეტის გებგენთ, მუ როლ უღუ იესოს ღორონთიშ განზრახვაშ შესრულებას. თეშ გარდა, ჩქი გებგენთ, ამდღა მუ ჯგირობუა მუღუ იესოს ჩქინო. მუშო ოკო რაგად, იესოშ დაბადებაშა ბრელს ოინტერესუდკონ იჸიდ, მი იჸუაფუდ მესია.

5. მუშა რდეს დარწმუნებულ იესოშ მოწაფეეფი?

⁵ პირველ საუკუნეს იესო ნაზარეთელიშ მოწაფეეფი ბოლოშა რდეს დარწმუნებულ, ნამდა იესო რდუ მესია, მიდგაშენ წინასწარ ითქუ (იოანე 1:41). ართ-ართ მოწაფექ, ნამუსით სიმონ პეტრე ჯოხოდ, პირდაპირ უწუ იესოს: „სი რექ ქრისტე“ (მათე 16:16). მუშენ ჯერდეს მოწაფეეფს დო მუშენ ოკო ბჯერდან ჩქი, ნამდა იესო მართალო ღორონთიშ დუნაპირებ მესია რდუ?

6. მაგალითით გენწყი, მუჭო მეხვარ იეჰოვაქ ართგურ კათას მესიაშ გიშაჩინებას?

⁶ ღორონთიშ წინასწარმარაგადეეფქ, ნამუთ იესოშ დაბადებაშა ცხოვრენდესინ, მესიაშენ ბრელ დეტალ ჭარეს. თე დეტალეფ მეხვარებუდ შხვეფს მესიაშ გიშაჩინებას. თენა უჯგუშო ქიგეგენ თიშენ წერმიდგინ, ნამდა რთხის, სადგურს ვარდა აეროპორტის ქუდოხვადე თიცალ კოჩის, ნამუთ დღას თოლო ვა გაფუ ნაძირეფ. უმოს ადვილ ვეჸიდუო თეცალ კოჩიშ ჩინება, თის გეიჭარუნდეს დო თიშ გურშენ მუსხირენ დეტალს ქოიწინდეს-და? თეგვარო, ღორონთიქ მუშ წინასწარმარაგადეეფიშ პიჯით დეტალურო ეჭარუ მესიაშ ცხოვრება. თეცალ წინასწარნარაგადუეფიშ შესრულება მეხვარებუდ ღორონთიშ ართგურ კათას მესიაშ გიშაჩინებას.

7. ქიმიჸონ ჟირ წინასწარნარაგადა, ნამუქით შესრულ იესოშენ.

⁷ ქიმიპჸონათ ჟირ წინასწარნარაგადა. პირველი: წინასწარმარაგადე მიქაქ 700 წანათ ადრე ჭარუ, ნამდა მესია იუდეაშ ჭიჭე ქალაქ ბეთლემს დებადებუდ (მიქა 5:2). სო დებად იესოქ? ზუსტას თე ქალაქის (მათე 2:1, 3—9). მაჟია: დანიელიშ  9:25-ის ინოჭარილ წინასწარნარაგადა ბრელ საუკუნეთ ადრე ოძირანდ, ნამდა მესია ახალ წანაკოროცხუათ 29 წანას მიშუ. * თენა დო ბრელ შხვა წინასწარნარაგადუეფიშ შესრულება ამტკიცენს, ნამდა იესო რდუ დუნაპირებ მესია.

8, 9. მუჭო იძირ ნათუაშ დროს ხოლო უჯგუშო, ნამდა იესო მართალო მესია რდუ?

⁸ ახალ წანაკოროცხუათ 29 წანაშ ბოლოს უჯგუშო ქიძირუ, ნამდა იესო რდუ მესია. თე წანას, იესოქ იოანე მანათალშა მერთუ დო იორდანეშ წყარს ინათუ. იეჰოვაქ დეპირუ იოანე მანათალს, ნამდა მესიაშ გიშაჩინებელო ნიშანს მეჩანდუ. თე ნიშან იოანექ იესოშ ნათუაშ დროს ძირუ. ბიბლიას ჭარუ: „მუჭოთ დინათუნ, იესოქ ხეთეშე გეშართ წყარშე დო გინწყუ ცაქ დო იოანექ ქოძირ, ნამდა ღორონთიშ შური ტორონჯო გიმიშ იესოშა. ცაშე ხონარქ გისიმ: „თენა რე ჩქიმ საჸოროფო სქუა, ნამუთ მა მიბწონე“ (მათე 3:16, 17). თეშ ძირაფაშ დო გაგონებაშ უკულ იოანეს მუთუნნერ ეჭვი ვა უღუდ, ნამდა იესო მართალო ღორონთიშ მუნაშქუმელ რდუ (იოანე 1:32—34). მუჟამს ღორონთიშ შურქ — ღორონთიშ მოქმედ ძალაქ იესოშა გეგნორთუნ, თიქ გინირთ მესიათ ანუ ქრისტეთ. თიმ დღას იესოქ დენიშნუ მეფეთ დო მანჯღვერალო (ესაია 55:4).

⁹ ბიბლიურ წინასწარნარაგადუეფიშ შესრულებაშე დო პირდაპირ იეჰოვაშ დამოწმებაშე დღაშ სინთეცალო იძირე, ნამდა იესო რდუ დუნაპირებ მესია. ბიბლია პასუხენს ჟირ მნიშვნელოვან კითხვას: სო რდუ იესო დედამიწაშა მოულაშახ დო მუნერ პიროვნება რდუ თინა?

10. მუს მოგურუანა ბიბლია იესოშ არსებობაშენ სოიშა თინა დედამიწაშა მიშუნ?

¹⁰ ბიბლია მოგორუანა, ნამდა დედამიწაშა მოულაშახ იესო  ზეცას ცხოვრენდუ. მიქაქ წინასწარ თქუ, მესია ბეთლემს დებადებუდუნ, მარა თინა ხოლო თქუ, ნამდა „ჯვეშ დროშე“ უღუდ „თის დაჭყაფუ“ (მიქა 5:2). იესოს ბრელშა აფუ ნარაგად, სოიშა კოჩო დებადებუდუნ თეიშა, თინა ზეცას ცხოვრენდ (წეკითხი იოანეშ 3:13; 6:38,  62; 17:4, 5). თექ იესო სულიერ ქმნილება რდუ დო იეჰოვაწკუმა განსაკუთრებულ ურთიერთობა უღუდ.

11. მუჭო ოძირანს ბიბლია, ნამდა იესო ღორონთიშ საჸოროფო სქუა რე?

¹¹ იესო ღორონთიშ არძაშ უმოს საჸოროფო სქუა რე დო თეშ მიზეზ არსებენს. იესოს ჯოხო „პირველგოჭყაფილ არძა ქმნილება შქას“, მუშენდა თინა ღორონთიშ პირველ ქმნილება რდუ * (კოლოსელები 1:15). შხვა მიზეზიშ გურშენ ხოლო რე იესო განსაკუთრებულ სქუა. თინა „ხვალეგუნაჭყეფ სქუა“ რე (იოანე 3:16). თენა თის ნიშნენს ნამდა, ხვალე იესო რე ღორონთშე ხვათახვალე გუნაჭყეფუ. თეშ გარდა ხვალე იესო რე თინა, მით ოხვარუდ ღორონთის შხვა ირფელიშ გოჭყაფას (კოლოსელები 1:16). იესოს „სიტყვა“ ხოლო ჯოხო (იოანე 1:14). თენა თის ნიშნენს, ნამდა თინა მუშ მუმაშ სიტყვეფს დო მითითებეფს შხვა სქუალეფს გინმოჩანდ, მუჭოთ სულიერ ქმნილებეფსინ, თეშ კათას ხოლო.

12. სოვრეშე მიჩქუნა, ნამდა იესო ვა რე ღორონთიშ მანგური?

¹² ბრელ ფიქრენს, ნამდა პირველგოჭყაფილ იესო ღორონთიშ მანგურ რე. მართალო თაშ რენო თენა? ბიბლია თეს ვა მოგურუანა. მუჭოთ წოხოლენ აბზაცშე ბძირით, ღორონთიშ სქუა გუნაჭყეფ რე. ათეშგურშენ არგამა რე, ნამდა თის უღუდ დაჭყაფუ, მარა იეჰოვა ღორონთის ვართ დაჭყაფუ უღუ დო ვართ ბოლო (ფსალმუნი 90:2). ღორონთიშ „ხვალეგუნაჭყეფ სქუას“ დღას ვამორთუმ აზრო, მუმაშ მანგურ ჸოფედუკო.  ბიბლია პირდაპირ იჩიებ, ნამდა მუმა სქუაშე დიდ რე (წეკითხი იოანეშ 14:28; 1 კორინთელები 11:3). ხვალე იეჰოვა რე „ირფელიშშემალებე ღორონთი“ (დაბადება 17:1). თაშ ნამდა, მითინ ვა რე თიშ მანგური. *

13. მუს ნიშნენს იესოშენ ბიბლიას ინოჭარილ სიტყვეფი, „უძირაფ ღორონთიშ ამნახანტი“?

¹³ იეჰოვას დო თიშ პირველგოჭყაფილ სქუას ცა დო ქიანაშ გოჭყაფაშა მილიარდობით წანათ ადრე უღუდეს ართიანწკუმა ხოლოშიან ურთიერთობა. არგამა რე, თინეფს ართიანიშ დიდი ჸოროფა უღუნა! (იოანე 3:35; 14:31). ღორონთიშ სქუა ირნერო გუდ მუშ მუმას. ზუსტას ათეშგურშენ ჭარ ბიბლიას, ნამდა იესო „უძირაფ ღორონთიშ ამნახანტი“ რე (კოლოსელები 1:15). მუჭოთ სქუა აგურუ მუმას ბრელ მუთუნით თეშ, ღორონთიშ ზეციერ სქუას ხოლო უღუ მუშ მუმაშ თვისებეფი.

14. მუჭო დებადუ კოჩო იეჰოვაშ „ხვალეგუნაჭყეფ სქუაქ“?

¹⁴ იეჰოვაშ ხვალეგუნაჭყეფ სქუაქ მუშ ნებათ დიტუ ზეცა დო მორთუ დედამიწაშა. თიქ კოჩო გინირთუ. მარა შილებე გაიკვირდას: მუჭო ოკო დებადუკო სულიერ ქმნილებაქ კოჩო? თექ ქუმოხვადუკონ თიშენ, იეჰოვაქ სასწაულ ქიმინუ. თიქ მუშ ხვალეგუნაჭყეფ სქუაშ სიცოცხლე ზეცაშე ებრაელ ცირასქუაშ სასქუოშა გეგნიღუ. იესოს დედამიწას მუმა ვა ჸუნდ. თეშნერო, მარიამს სრულყოფილ ქომოლსქუაქ ქაშუ დო თის იესო ქიგიოდუ (ლუკა 1:30—35).

15. მუშენ ირაგადე, ნამდა იესო მოხვარნა იეჰოვაშ გაჩინებაფას?

¹⁵ იესოს უჯგუშო გეფჩინებაფუანთ, მუჟამს ქიგებგენთ, მუს იჩიებუდ დო მუ საქმეებს ორთუდ თინა დედამიწას. იესო მოხვარნა მეტ ქიგებგათ იეჰოვაშენ. მუშენ ირაგადე თაშ? ფთქვითინ თეშ, იესო მუმაშ სრულყოფილ ამნახანტი რე. ათეშენ  უწუ თიქ მუშ ართ მოწაფეს: „მა ბძირუნ თიქ, მუმა ხოლო ძირუ“ (იოანე 14:9). ბიბლიაშ ოთხ წიგნი — მათე, მარკოზი, ლუკა დო იოანე, ნამუსით სახარებებს უძახნა, ბრელს მირაგადნა იესო ქრისტეშ ცხოვრებაშენ, საქმიანობაშენ დო თვისებეფშენ.

16. მუს ქადაგენდ იესო ძირითადო დო სოვრეშე მიშუ თე გურაფა?

¹⁶ იესოს იჩინენდეს, მუჭოთ „მასწავლებელს“ (იოანე 1:38; 13:13). მუს ქადაგენდ იესო? ძირითადო თინა ქადაგენდ „სახიოლო ამბეს სამეფოშ გურშენ“. იესო ხალხის ოგურუანდ ღორონთიშ სამეფოშენ, ზეციერ მთავრობაშენ, ნამუთ მთელ დედამიწას იმართველენს დო ღორონთიშ მორჩილ ხალხის მარადიულ ხვამას მუღანს (მათე 4:23). მიშე მიშუ თე გურაფა? იესოქ თქუ: „მუდგას ვოგურუანქინ, ჩქიმ ვარინ, ჩქიმ მუმაშქუმალარიშ რე“ (იოანე 7:16). იესოს უჩქუდ, ნამდა ღორონთის ოკოდ, ხალხიქ მირჩქილუკო სახიოლო ამბე სამეფოშ გურშენ. მა-8 დუდის უმოსო ქიგებგენთ, მუ რე ღორონთიშ სამეფო დო მუს აკეთენს თინა.

17. სო ქადაგენდ იესო დო მუშენ ვაზოგუდ დუდი დო ვართ დრო, ქუქადაგუკო დო ქუდაგურუკო ხალხის?

¹⁷ სო ქადაგენდ იესო? ირდიხას, სოდე ხალხი რდუ — ქალაქეფს, სოფელეფს დო ოვაჭრებელ ადგილეფს. იესო ჸუდეშა ხოლო აკითხანდ ხალხის. თინა ვა უჯინედ ხალხიშ აშო მოულას. იესო ვიშო მიშუ თინეფშა (მარკოზი 6:56; ლუკა 19:5, 6). მუშენ ვა ზოგენდ იესო დუდს დო ვართ დროს, ქუქადაგუკო დო ქუდაგურუკო ხალხის? მუშენდა თეს ღორონთი ელუდ იესოშე. იესო ირო მუმაშ ნებას ასრულენდ (იოანე 8:28, 29). მარა თინა შხვა მიზეზიშ გურშენ ხოლო ქადაგენდ. იესოს ოცოდუდ ხალხი (წეკითხი მათეშ 9:35, 36). რელიგიურ მანჯღვერებს ოვალუდეს, ხალხშა დუგურუაფდესკო სიმართლე ღორონთიშ დო თიშ განზრახვეფიშ გურშენ. მარა თინეფ საერთოთ ვაქციენდეს ხალხის ყურადღებას. იესოს არჩქილედ, მუშმანწარათ ოსაჭირუდ ხალხის სამეფოშენ სახიოლო ამბეშ მორჩქილაფა.

18. იესოშ ნამ თვისება მორწონს?

 ¹⁸ იესო მოჸოროფე დო ყურადღებიან რდუ. ხალხის ოხიოლუდ თიწკუმა ურთიერთობა. ბაღანეფი ხოლო გემოშა რდეს იესოწკუმა (მარკოზი 10:13—16). იესოს ვა უჸორდუ ხალხიშ გიშაკერძაფა. თის ჯოგუდ უსამართლობა დო უპატიოსნობა (მათე 21:12, 13). თიმ დროს ოსურკათა მუთუნო ვემიორჩქუდეს დო თინეფს ბრელ მუთუნიშ უფლება ვა უღუდეს. მარა იესო ოსურკათას დიდ პატის ცენდუ (იოანე 4:9, 27). იესო თანდაბალ რდუ. ართშა თიქ მუშ მოწაფეებს კუჩხ გუბონ, მუთ წესით, მოინალეეფს ოვალუდეს.

19. ნამ მაგალითშე იძირე, ნამდა იესოს გურშა მეუღუდ ხალხიშ გაჭირება?

¹⁹ იესოს გურშა მეუღუდ ხალხიშ გაჭირება. თენა ჯგირო იძირედ თიმწკუმა, მუჟამს იესო ღორონთიშ შურით, სასწაულო ოსქილიდუანდ ლეხეფს (მათე 14:14). მაგალთო, ართშა კეთრით დალახებული კოჩიქ მერთ იესოშა დო უწუ: „ქუგოკონ-და, შეილებუ ჩქიმ განწმენდა“. იესოს ეცოდუ თე  კოჩიქ დო გურშა ქიმიღ თიშ ტანჯება დო ჭუა, ხე ქიმეკიდ დო უწუ: „მოკო, გენიწმინდი“. ლეხი კოჩიქ დოსქიდ (მარკოზი 1:40—42). ქეშეილებნო წერმიდგინე, მუს იგინანდ თე კოჩი?

20, 21. მუჭო დომტუეს იესოქ ღორონთიშ ართგურო მორჩილებაშ მაგალითი?

²⁰ იესოქ ღორონთიშ ართგურო მორჩილებაშ არძაშ უჯგუშ მაგალითი მუჩეს. თინა ირნერ ძნელ გარზებელ სიტუაცია დო წინააღმდეგობაშ დროს მუშ ზეციერ მუმაშ ართგურ რდუ. იესო ოწინააღმდეგუდ დო ორუდ სატანაშ მაჩილითაფარ ხრიკეფს (მათე 4:1—11). ართშა იესოშ ნათესეფქ, ნამუსით ვა წანდეს თიშ, თინა ხოლო თქუეს, ნამდა ჭკუაშე გეგნურთუმუნია (მარკოზი 3:21). მარა იესო დღას ვა უშქურდუდ თინეფს დო აგრძელენდ ღორონთიშ საქმეშ კეთებას. თის ირდნენდეს დო გლახათ ოქცუდეს, მარა მანგიორს ვა უგანდ მუშ მოწინააღმდეგეეფს (1 პეტრე 2:21—23).

 ²¹ იესო ართგურ რდუ მტერიშ ხეთ წამებათ ღურაშა (წეკითხი ფილიპელეფიშ 2:8). დეფიქრი, მუ გინიღუ იესოქ დედამიწას ცხოვრებაშ ბოლო დღას: ჭოფუა, ცრუმოწმეეფშე ტყურაშ ეკოწამება, უპატიოსნო მოსამართლეეფშე განაჩენიშ გიმოღალა, გოძიცა დო წამება ჯარიშკოჩეფიშ ხეშე. მუჟამს ძელს მუკოჭკადუდ დო შური ეშმალუდუნ, იესოქ თქუ: „შესრულ“ (იოანე 19:30). ღურაშე მასმა დღას იესო მუშ ზეციერ მუმაქ გათელუ, მუჭოთ სულიერ ქმნილება (1 პეტრე 3:18). მუსხირენ მარაშა იესოქ ზეცაშა დირთუ. თექ „ღორონთიშ მორძგვიშე ქუდოზოჯუ“ დო უჯინედ, მუჟამ მეჩანდ ღორონთი მეფურ ძალაუფლებას (ებრაელები 10:12, 13).

22. მუ შედეგიქ მაჸუნ იესოშ ბოლოშა ართგურო დოსქილადას?

²² მუ შედეგიქ მაჸუნ იესოშ ბოლოშა ართგურობას? ჩქი სინამდვილეს იესო ქრისტეშ ღურაქ მუჩეს საშვალება, ნამდა მარადიულო იფცხოვრათ დედამიწას სამოთხეს, მუჭოთ იეჰოვას აფუდ თენა დუდშე განზრახული. ანწიან დუდის რაგად იჸუაფ, მუჭო შეულებ იესოშ ღურას, მუჩან მარადიულ ცხოვრებაშ საშვალება.