1, 2. a) Karakory ma mahay tsarabe olo malaza zen̈y? b) Azovy ma fahaizanolo Jesosy?

MARO olo malaza ambony tany ty. Sasany malaza amy tany faviany, sasany malaza amy tany jiaby. Kanefa, olo araiky ndray mahay an̈aranolo malaza, zen̈y tsy mivolan̈a fa izy ten̈a mahay izy. Tsy voatery hainy mombamomba izy ndreky toetrinany.

² Efa misy 2 000 taon̈o zay nialany Jesosy tambony tany teto, fa izy mbala malaza fo. Olo samy amy fahaizany Jesosy. Sasany mivolan̈a fa izy olo tsara fan̈ahy. Misy mivolan̈a fa izy paminan̈y. Sasany koa mivolan̈a fa Jesosy io Zan̈ahary, ke tokony hivavahan̈a. Marin̈y ma izy tokony hivavahan̈a zen̈y?

3. Nan̈ino ma anao mila mahay ny marin̈y momba Jesosy?

³ Nan̈ino ma anao mila mahay ny marin̈y momba Jesosy? Karaha ty volan̈iny Baiboly: “Baka iro ho velon̈o tsisy farany, iro mila mianatra momba anao, Zan̈ahary tokana sady marin̈y, ndreky Jesosy Kristy irakanao.” (Jaona 17:3) Dikanizen̈y, izikoa anao mahay ny marin̈y momba Jehovah ndreky Jesosy Kristy, anao ho velon̈o tsisy farany ambony tany eto. (Jaona 14:6) Nan̈amia modely atsika koa izy tamy raha  nataony ndreky fiain̈ananany. (Jaona 13:34, 35) Tamy toko voanalohany tamy boky ty atsika nianatra ny marin̈y mikasiky Zan̈ahary. Hizahavantsika ndraiky izio ny marin̈y momba Jesosy Kristy.

4. Ino ma dikany “Mesia” ndreky “Kristy” zen̈y?

⁴ Jesosy tsendriky honohono ho teraka, Baiboly efa nivolan̈a fa Zan̈ahary han̈iraka “Mesia” na “Kristy” io, hijotso ambony tany eto. Mesia zen̈y baka amy volan̈a hebreo, fa Kristy baka amy volan̈a griky.  “Voahosotro” dikany volan̈a aroe io. Mesia io ho voahosotro, fotony izy hifidiny Jehovah han̈ano asa araiky maventy. Mbala hianarantsika afara an̈y ino asa maventy nirahiny Zan̈ahary hataony io, baka fikasan̈any Zan̈ahary tanteraka. Ho hitantsika koa ino aby hatsaran̈a hamiany Jesosy atsika rango izioty. Izy mbala tsendriky honohono ho teraka, olo efa nieritreritry karaha ty: ‘Asa mba azovy eky Mesia zen̈y?’

5. Azovy ma fahaizany pianatra Jesosy aby io izy?

⁵ Tamy Jesosy tambony tany teto, pianatranany aby io nahay fa izy ankitin̈y Mesia na Kristy io. (Jaona 1:41) Nisy pianatranany araiky, Simona Petera an̈arany, nivolan̈a karaha ty: “Anao Kristy.” (Matio 16:16) Karakory ma nahaizandro fa Jesosy ankitin̈y Mesia io?

6. Karakory nataony Jehovah baka ho hainolo tsy mivadiky azovy Mesia io?

⁶ Raha nivolan̈iny paminan̈y aby taloha tan̈y nahaizanolo fa izy ankitin̈y Mesia io. Izio karaha ataony atsika irahin̈y mitsena olo mbala tsiary hitantsika in̈y. Akory ahaizanao olo io? Tsy sarotro aminao hahay izy, izikoa efa nambara anao raha jiaby tokony hahaizanao izy. Karaha zen̈y koa nataony Jehovah. Nirahiny paminan̈y aby io han̈ambara raha maro momba Mesia io, ke tsy sarotro taminolo tsy nivadiky aby io nahay izy.

7. Ino aby raha aroe momba Mesia, efa nivolan̈iny paminan̈y?

⁷ Aroe amy raha nivolan̈iny paminan̈y momba Jesosy fo hizahantsika. Voanalohany, 700 taon̈o tsy hitirahany Jesosy, paminan̈y Mika efa nivolan̈a fa Mesia io ho teraka a Betlehema, araiky a Jodia an̈y. (Mika 5:2) Taia amy zay ma Jesosy teraka? Ta Betlehema a Jodia ankitin̈y! (Matio 2:1, 3-9) Faharoe, amy Daniela 9:25, paminan̈y Daniela nivolan̈a fa amy taon̈o 29 hiboahany  Mesia io. * Raha aroe zen̈y ndreky raha nivolan̈iny paminan̈y hafa koa ahaizan̈a fa Jesosy ankitin̈y Mesia ho avy io.

8, 9. Ino ivolan̈ana fa tamy taon̈o 29 ankitin̈y Jesosy nanjary Mesia?

⁸ Nahainazava taminolo fo fa Jesosy ankitin̈y Mesia, tamy faramparany taon̈o 29. Tamy zen̈y Jesosy nan̈aton̈o Jaona Pan̈ano Batisa, tamy Ten̈aranony Jordana. Jehovah efa nan̈ambara Jaona Pan̈ano Batisa raha ­hiboaka aminio hahaizany fa Jesosy ankitin̈y Mesia. Karaha ty fivolan̈any Baiboly izy: “Jesosy koa fa vita batisa, izy nanonga baka tan̈aty rano tao. Lan̈itry nibian̈a, ke hitany Jaona fan̈ahy masin̈y Zan̈ahary karaha pizin̈y, nijotso tan̈abony Jesosy. Tio fo, nisy feo koa baka tandan̈itry nivolan̈a: ‘Io zanako ten̈a tiako.’ ” (Matio 3:16, 17) Jaona koa fa nahita raha jiaby zen̈y, izy tsy nisalasala eky fa Jesosy ankitin̈y iraka Zan̈ahary. (Jaona 1:32-34) Tamy Jesosy natao batisa, izy nanjary Mesia na Kristy nifidiny Jehovah hatao Panjaka ndreky Pitariky.—Isaia 55:4.

⁹ Raha nivolan̈iny paminan̈y aby io ndreky volan̈a Jehovah ahaizan̈a fa Jesosy ankitin̈y Mesia. Baka aia fo ma Jesosy io? Olo karakory ma izy? Alo zahantsika amy Baiboly ao valinizen̈y.

10. Izikoa Baiboly zahan̈a, baka aia ma Jesosy?

¹⁰ Baiboly mivolan̈a fa Jesosy baka andan̈itry an̈y. Paminan̈y Mika nan̈ambara fa Jesosy io efa nisy rango ela, baka io izy ho teraka a Betlehema. (Mika 5:2) Matetiky  Jesosy nivolan̈a fa izy baka andan̈itry an̈y. ( Vakia Jaona 3:13; 6:38, 62; 17:4, 5) Izy tamy zen̈y anjely. Zen̈y nahavy iro roeny Jehovah nanjary nifankazatra mare.

11. Ino aby raha koran̈iny Baiboly ahitan̈a fa Jesosy ten̈a tiany Jehovah ankitin̈y?

¹¹ Jehovah ten̈a tia Jesosy, fotony koran̈iny Baiboly fa izy raha niasainy Zan̈ahary voanalohany. “Talan̈olo amy raha jiaby” ivolan̈ana izy ao. * (Kolosianina 1:15) Mbala misy raha hafa koa mampiavaka izy. Jehovah zaraiky fo niasa izy, ke zen̈y mahavy Baiboly mivolan̈a fa izy ‘Zanany lelahy tokana.’ (Jaona 3:16) Izy amy zay nampiasainy Jehovah niasa raha jiaby andan̈itry an̈y ndreky ambony tany. (Kolosianina 1:16) “Hafatra” koa ikahian̈a Jesosy, fotony izy pitondra hafatra Zan̈ahary, na tamindro anjely aby io zen̈y na taminolombelon̈o.—Jaona 1:14.

12. Ino ivolan̈ana fa Jehovah ndreky Jesosy zen̈y tsy olo araiky?

¹² Misy olo mivolan̈a fa Jehovah ndreky Jesosy io araiky fo. Marin̈y ma zen̈y? Izikoa Baiboly zahan̈a, Jehovah ndreky Jesosy tsy olo araiky, fotony Jesosy niasainy Zan̈ahary, fa Jehovah tsisy olo niasa izy. (Salamo 90:2) Jesosy tsy nieritreritry hitovy soroko amy Jehovah zen̈y foeky. Baiboly mivolan̈a mazava fa Baba andan̈itry an̈y bebe toizay Zanaka. ( Vakia Jaona 14:28; 1 Korintianina 11:3) Jehovah zaraiky fo koa “Zan̈ahary Farany Mahery.” (Genesisy 17:1) Ke tsisy raha hafa eky mety hampitovisin̈y aminany. *

13. Ino ivolan̈ana fa Jesosy “sorany Zan̈ahary tsy hita maso”?

 ¹³ Ten̈a nifankahazo Jehovah ndreky Jesosy, fotony iro niaraka niasa andrivony tapitrisa taon̈o. Mbala tsendriky honohono ho hisy lan̈itry feno lakintan̈a ndreky tany ty. (Jaona 3:35; 14:31) Zen̈y nahavy toetriny Jesosy mira toetriny Jehovah, karaha ataony tsaiky mangala tahaka toetriny babany in̈y. Zen̈y mahavy Baiboly mivolan̈a fa “izy sorany Zan̈ahary tsy hita maso.”—Kolosianina 1:15.

14. Karakory ma nahavy Jesosy nanjary olombelon̈o?

¹⁴ Jesosy nan̈eky niala tandan̈itry tan̈y, niain̈y niaraka taminolombelon̈o tambony tany teto. Anao mety han̈ontany karaha ty: ‘Karakory ma nahavy anjely nanjary olombelon̈o?’ Jehovah nan̈ano fahagagan̈a, ke fahin̈ana Jesosy nafindrany tan̈atiny kibony man̈angy araiky virijiny, Maria an̈arany. Zen̈y nahavy Jesosy tsisy fahotan̈a.—Lioka 1:30-35.

15. Izikoa tiantsika hahay tsarabe Jehovah, nan̈ino atsika mila mahay Jesosy?

¹⁵ Raha nivolan̈iny Jesosy ndreky raha nataony tambony tany teto ahaizantsika izy tsarabe. Izikoa haintsika tsarabe Jesosy, hitombo koa fahaizantsika Jehovah, fotony mira fo toetrindro. Zen̈y nahavy Jesosy nivolan̈a tamy pianatranany karaha ty: “Zay olo nahita zaho nahita babako koa.” (Jaona 14:9) Misy boky efatra amy Baiboly ao mikoran̈a fiain̈ana Jesosy, asanany ndreky toetrinany. Tsy ino zen̈y fa Filazantsarany Matio, Marka, Lioka ndreky Jaona.

16. Ino ma raha ten̈a nampianariny Jesosy? Baka aminjovy ma raha nampianariny io?

 ¹⁶ “Papianatra” ten̈a nahaizanolo Jesosy. (Jaona 1:38; 13:13) Ino ma raha ten̈a nampianariny? ‘Vaovao tsara mikasiky Fanjakan̈any Zan̈ahary andan̈itry an̈y.’ Fanjakan̈a io hitondra tany ty ndreky hampiadan̈a olo jiaby eto. (Matio 4:23) Baka aminjovy ma raha nampianariny io? Jesosy nivolan̈a fa raha jiaby nampianariny baka amy Jehovah. (Jaona 7:16) Hainy Jesosy fa olo jiaby tiany Zan̈ahary haharen̈y raha mikasiky Fanjakan̈any io. Amy Toko faha-8 amy boky ty atsika hianatra raha momba Fanjakan̈any Zan̈ahary io ndreky raha handeha hataonizio.

17. Taia ma Jesosy nampianatra? Nan̈ino ma izy nifen̈y mare nampianatra olo?

¹⁷ Taia ma Jesosy nampianatra? Izy tsy nifidy tany nampianaran̈a, na tantran̈onolo, na ta bazary na tambanivolo. Izy tsy niambin̈y olo han̈aton̈o izy, fa izy foeky nan̈aton̈o. (Marka 6:56; Lioka 19:5, 6) Nan̈ino ma Jesosy nifen̈y mare nitory ndreky nampianatra? Voanalohany, zen̈y raha nirahiny Jehovah nataony. Tiany man̈ano sitrapony Zan̈ahary. (Jaona 8:28, 29) Faharoe, izy nahinakinaka nahita olo maro nan̈araka izy. ( Vakia Matio 9:35, 36.) Pitariky fivavahan̈a aby io tsy nampianatra olo ny marin̈y mikasiky Zan̈ahary ndreky raha tiany Zan̈ahary hatao. Jesosy nahay fa iro olo aby io nila nampianarin̈y.

18. Ino ma toetriny Jesosy ten̈a tianao?

¹⁸ Jesosy ten̈a tia olo. Izy tsara fan̈ahy ndreky tsy niavon̈o. Ndray tsaiky madiniky tsy navozo nan̈aton̈o izy. (Marka 10:13-16) Jesosy tsy nan̈avakavaka olo. Izy koa  tsy tia olo man̈ano risoriso ndreky mampijaly olo. (Matio 21:12, 13) Olo tamy zen̈y nan̈ambanimbany man̈angy, fa Jesosy tsy nan̈ano karaha zen̈y. (Jaona 4:9, 27) Jesosy koa tsy nan̈ambony ten̈a. Tandraraiky izy nanasa vitiny pianatranany aby io. Izio asa farany tsy tianolo tamy zen̈y, fotony asany andevo.

19. Ino ahaizantsika fa Jesosy nahay nandiniky raha nilainolo?

¹⁹ Jesosy nahazo fan̈ahy masin̈y tamy Zan̈ahary, ke zen̈y nahavy izy nahavita nan̈ano fahagagan̈a. Hita baka tamy fahagagan̈a nataony Jesosy fa izy nahay nandiniky raha nilainolo. (Matio 14:14) Nisy lelahy boka araiky nan̈aton̈o Jesosy, sady nivolan̈a karaha ty: ‘Izikoa tianao han̈adio zaho, ten̈a ho vitanao zen̈y.’ Jesosy ten̈a nahinakinaka lelahy io, fotony hainy tsarabe fa ­tsisy olo nety nikasiky izy. Jesosy amy zay nitana lelahy io, nivolan̈a taminany karaha ty: ‘Tiako. Anao madiova.’  Lelahy boka io janga ankitin̈y! (Marka 1:40-42) Misora ravoravo lelahy io tamy zen̈y!

20, 21. Izikoa atsika man̈iry tsy hivadiky amy Zan̈ahary, nan̈ino ma Jesosy ten̈a tsara alain̈y tahaka?

²⁰ Jesosy ten̈a tsara alain̈y tahaka, fotony izy nan̈araka volan̈a Zan̈ahary fo. Izy tsy nivadiky tamy Zan̈ahary foeky, na ino na ino raha nahazo izy, na olo tsy tia izy, na izy nampijalin̈y. Satana nitsapa jery izy fa izy tsy nivadiky. (Matio 4:1-11) Tandraraiky koa, havany Jesosy nivolan̈a fa ‘nisy avoa zen̈y jerinany.’ (Marka 3:21) Zen̈y tsy nataony Jesosy tamban̈a tsy hanompoan̈a Zan̈ahary. Izy nitihitihinolo, nankadalainolo, fa izy tsy namaly. Tsy tan̈atiny jerinany foeky hamaly ny ratsy nataondro izy.—1 Petera 2:21-23.

²¹ Tsisy raha nahavita nampivadiky Jesosy firaka izy naty, nata izy nampijalinolo tsy tia izy. ( Vakia Filipianina 2:8.) Tsy aradalàn̈a foeky fomba nitsarandro izy. Izy nisamborindro, maro raha tsy nataony nan̈odianolo izy. Izy koa nitokizandro ndreky nampijaliny maramila, baka io nahanton̈ondro tamy kakazo mitsatoko. Izy koa fa niady fahin̈ana, izy nivolan̈a karaha ty: “Vita!” (Jaona 19:30) Telo andra nifatesany, Jehovah namelon̈o izy. Efa tsy olombelon̈o eky izy tamy zen̈y, fa nimpody anjely. (1 Petera 3:18) Afaka 40 andra, izy nimpody tandan̈itry tan̈y. Izy ‘nipetraka tankavanan̈a Zan̈ahary’, niambin̈y fotoan̈a han̈anovan̈a izy panjaka.—Hebreo 10:12, 13.

22. Nan̈ino ma mahatsara atsika nifatesany Jesosy?

²² Nan̈ino ma mahatsara atsika nifatesany Jesosy? Baka amy Jesosy naty mahavy atsika mety hahazo fiain̈ana tsisy farany ambony tany eto. Zen̈y raha ten̈a tiany Zan̈ahary hatao amy tany ty. Zen̈y raha hianarantsika amy toko fan̈araka ty.