1, 2. 1) Jumatakixa, ¿kuna kasta churäwisa chuymar purtʼkirixa? 2) ¿Kunatsa qhispiyäwix taqi churäwinakat sipansa jilïri jachʼa churäwixa?

 ¿KUNA suma churäwsa jumax katuqirïta? Mä churäwixa janiw jila alaniñapäkapuniti chuymar purtʼañapatakixa. Qhawqha alanïskpasa, jumarutix uka churäwix kusisiystam ukat jakäwimatakisa wakisirïchi ukhaxa, suma churäwiwa.

² Taqi churäwinakat sipansa, mä jachʼa aski suma churäwiw utji. Jaqinakataki Diosan jachʼa churäwipawa. Chiqasa, Jehová Diosaxa taqikunwa churistu, ukampisa jilïri jachʼa churäwipaxa qhispiyäwiwa, mä arunxa, Jesucristo, Yuqapan luqtasïwipawa (Mateo 20:28). Kunjamtï aka jaljan uñjkañänixa, uka qhispiyäwisti jiwasanakatakix wali suma jachʼa churäwiwa, chiqasa wal kusisiyistu, ukat kunatï jiwasataki wakiski ukwa churarakistu. Ukhamasti, uka qhispiyäwimpiwa Jehová Diosax sapa mayniru munasitapxa uñachtʼayistu.

3. ¿Kunasa qhispiyäwixa, ukat wali wakisiriw sañatakix kun yatiñasas wakisispa?

³ Uka qhispiyäw aruxa, juchampita jiwañampita Jehová Diosax jaqinakaru kutsuyi, ukwa sañ muni (Efesios 1:7). Uka yatichäwi sum amuyañatakixa kunatï Edenan paskatayna uk yatiñasawa. Kunsa Adanax juchachasisax aptʼatayna, uk sum yatisawa uka qhispiyäwin wali wakiskïritapxa amuyañäni.

4. ¿Kunjamäpachänsa Adanatakixa jan juchani suma jakasiñaxa?

⁴ Kunapachatï Jehová Diosax Adanar lurkatayna ukhaxa, jan juchani suma jakäwi churatayna. Amuyarakma, kunja sumakikäna jupatakixa uka jakäwixa. Janipuniwa usuntañapäkänsa, chuymankiptañapäkänsa, jiwañapäkänsa niyakixay amuyupasa jañchipasa jan juchanïchïnxa. Ukatsti, Jehová Diosampi Adanampixa wali sumwa apasipxäna. “Adanasti Diosan wawapänwa” siw Bibliaxa (Lucas 3:38). Ukhamasti, Adanampi Diosampixa wal munasipxäna, kunjamtix mä munasir awkix wawapampi sum apasipki ukhama. Ukatsti, Diosax uraqxankiri wawapampix sum parlasïna, ukat wali kusisita jakasiñapatakisa suma lurañanakwa churatayna, ukhamaraki, Adanax kunjam sarnaqañapänsa ukxa Diosax sum qhanañcharakitayna (Génesis 1:28-30; 2:16, 17).

5. Diosax “jupar uñtasitwa” Adanarux luratayna siski uka arunakaxa, ¿kamsañsa munpacha?

⁵ Diosaxa “jupar uñtasitwa” Adanarux luratayna (Génesis 1:27). ¿Uka arunakax kamsañs munpacha? Jehová Diosax janiw jiwasjam jañchini chʼakhanïkiti, jan ukasti, jan uñjkaña mä ajayuwa, kunjamtï mayïri jaljan yatiqaniwayktan ukhama (Juan 4:24). Adanaxa Diosjama munasiñani, yatiñani, chʼamani ukat chiqa kankañani luratänwa, uka tuqitwa Adanax Diosar uñtasitänxa. Ukhamaraki, taqi kunsa chuymapat lurañapänwa, mä  arunxa, amtaparuw kuns lurañapäna, uka tuqitarakwa Awkipar uñtasitänxa. Ukhamasti janiw mä makinjamäkänti, jan ukasti, jupawa kunatix walïki ukat jan walïki uksa ajllisapänxa. Ukat Diosar istʼañtï amtasapänxa, wiñayatakiw kusipach Uraqin jakasispänxa.

6. ¿Adanax Diosar jan istʼasaxa kunarus purtʼasiwayi, ukat wawanakaparux kunarus aptʼawayi?

⁶ Adanaxa Diosar jan istʼasaxa, jan walirupuniw purtʼasïna, jiwañaru apxaruyataw uñjasiwayi. Juchachasisawa uka jan juchani suma jakäwipsa, taqi aski churäwinakapsa aptʼawayi (Génesis 3:17-19). Adanaxa janiw suma jakäwipaki aptʼawaykiti jan ukasti wawanakapamppacharuwa aptʼawayi. Diosan Arupax akham siwa: “Mä sapa jaqi [Adán] tuqi juchax aka uraqir mantankixa, ukat jiwax uka jucha laykurak utjixa, ukhamarakiw jiwax taqi jaqirux katuntawayi juchachasitap layku” sasa (Romanos 5:12). Ukhamasti, taqiniwa Adanan juchapxa katuqawaytanxa. Adanamp chika juchampiru jiwañampiru taqinis ‘aljantatätanwaʼ, ukham siw Bibliaxa (Romanos 7:14). Adanatakisa Evatakisa janiw suytʼäwix utjxiti, jupanakasti yatkasawa Diosar jan istʼapkänti. Ukampisa, ¿kunas wawanakapampixa pasañapäna?

7, 8. ¿Kunas mä qhispiyäwixa?

⁷ Jehová Diosaxa jaqinakaru qhispiyañwa amti. ¿Kunas mä qhispiyäwixa? Pä tuqitäspawa. Maynïrixa akäspawa, kun chhaqayasasa, yaqhan amparapata kutsuyasxañatakixa jallasku churañawa wakisispa, jan ukax mä katuntata jaqir kutsuyañatakisa qullqi churañarakiwa wakisispa, ukamp sasiw qhispiyäwixa. Payïrix akarakispawa, yaqhanakaru jan walir puriyasaxa tʼaqhisïwinakapatxa pagañaw wakisispa, ukaw Biblianxa qhispiyäwi sataxa. Amuytʼañataki, maynix yaqhanakar chijir aptʼasaxa, ukhat ukhwa kuttʼayañapäna jan ukax pagañapäna.

 ⁸ Kunjamtï yatiqawayktanxa, Adanaxa juchachasisinxa taqiniruw jan walir puriyistu. ¿Ukxa kunjamsa pagsna? Ukatxa, ¿kunjamatsa juchampita jiwañampita mistsna? Kunjamsa Jehová Diosax qhispiyistu ukat kunjamsa jumar yanapiristamxa uk uñjañäni.

9. ¿Kuna kasta qhispiyäwisa munasïna?

⁹ Jan juchani suma jakäwiwa aptʼasiwayi. Uka lantisti janiw khitisa jucharara jakäwipxa luqtkasapänti (Salmo 49:7, 8). Kunatix aptʼasiwayki uk kutsuyañatakixa mä ukham jan juchani jakäwirakiwa munasïna. Ukham sarakiwa Diosan Arupanxa. Ukatwa, ‘jakañata jakañarakix’ churasiñapäna (Éxodo 21:23). Ukhamasti, ¿uka jan juchani suma jakäwi Adanax aptʼawayki uksti, khitin jakäwipampiraki phuqsnasti? Yaqha jan juchani jakäwiw munasïna “taqinin qhispiyasiñap alañataki” (1 Timoteo 2:6).

10. ¿Kunjamsa Jehová Diosax qhispiyäwi churistu?

¹⁰ ¿Kunjamsa Jehová Diosaxa qhispiyäwi churistu? Alaxpachankiri jan juchani mä wawapwa aka Ukaqiru khitanïna. Janiw kawkïriksa khitankänti jan ukasti wali munat sapa Yuqaparuwa khitanïna (1 Juan 4:9, 10). Jupasti iyaw sasaw taqi chuyma alaxpachat saraqanitayna (Filipenses 2:7). Jehová Diosaxa María tawaqun purakaparuwa Wawapxa uchatayna, kunjamtï pusi jaljan yatiqaniwayktanxa ukhama. Diosaxa qullan ajayupampiwa Jesusarux jan juchan jaqjama yuriyatayna (Lucas 1:35).

11. ¿Kunjamsa mä sapa jaqikixa millón millón jaqinakaru qhispiyaspa?

¹¹ ¿Kunjamaraki mä sapa jaqikisti millón millón jaqinakaru qhispiyaspasti? ¿Kunjamatsa taqinis juchanïtanxa? Amttati, Adanaw juchachasitaynaxa, ukhamatwa jan  juchani suma jakañxa aptʼatayna. Jan juchani suma jakañxa janiwa wawanakaparu jaytawaykiti. Juchampi jiwañampikwa katuqawaytanxa. Jesusasti jan juchani chiqa jaqïnwa, janipuniw juchachaskänti, Biblianxa “qhipa Adana” satarakiwa (1 Corintios 15:45). Mä arunxa, jiwasaru qhispiyañatakixa, Jesusaw Adán lanti saytʼäna. Taqi kunanwa Awkiparux istʼäna, ukatsti jan juchani suma jakäwipwa Awkipar luqtäna. Jesusaxa ukhamwa Adanan juchapat phuqawayi, ukhamaraki jiwasanakarusa mä suytʼäwi churawayistu (Romanos 5:19; 1 Corintios 15:21, 22).

12. ¿Kunsa Jesusax wal tʼaqhisisaxa uñachtʼayäna?

¹² Jesusax janïra jiwkasaxa kunjamsa tʼaqhisïna, ukwa Bibliax sum qhanañchistu. Jan sinttʼasisaw wal jawqʼjapxatayna ukat mä lawaruw chʼakkatapxatayna, ukat khuyäñwa jiwayapxatayna (Juan 19:1, 16-18, 30; jukʼampi yatxatañatakixa, “¿Cristianonakax cruz apnaqapxañapati?” siski uk uñxatarakïta). ¿Kunatsa ukham wal tʼaqhispachänxa? Kunjamtï jutïri mä jaljan uñjkañänixa, yantʼanakansti taqi jaqinakawa Jehová Diosata saraqxapxani, sasaw Satanasaxa satayna. Jesusax ukham wali tʼaqhisiñan aguantasaxa, Satanasan kʼarïtapwa uñachtʼayäna. Ukhamasti, Supayan kunaymanita yantʼkatasa; jan juchani, chuymaparjam taqi kuns lurir mä jaqixa janipuniw Jehová Diosatxa saraqkaspati, ukwa Jesusax uñachtʼayäna. ¡Wawaparu ukham aguantatap uñjasaxa Diosax wal kusispachäna! (Proverbios 27:11.)

13. ¿Kunjamsa qhispiyäwixa phuqasïna?

¹³ ¿Kunjamsa qhispiyäwixa phuqasïna? 33 jichha pacha marana, nisán phaxsita 14 urunak saraqatarusti, Diosan Yuqaparuw jiwayapxatayna, jupasti jan juchani jaqïnwa. Ukhamatwa Jesusaxa “mä kuti wiñayatak jupa pachpa” jan juchani jakäwipa luqtasiwayi (Hebreos 10:10). Kimsüru jiwatatwa Jehová Diosaxa mä ajayjama  juparu jaktayäna. Alaxpachansti, Awkiparuwa Jesusaxa uka suma jakäwipxa churatayna, uksti mä waxtʼjamwa luqtatayna, Adanan wawanakaparu qhispiyañataki (Hebreos 9:24). Jehová Diosax Jesusan luqtäwipxa iyaw sasaw katuqäna, ukhamasti khä luqtäwixa jaqinakaru juchampita jiwañampita qhispiyañatakïnwa (Romanos 3:23, 24).

14, 15. ¿Kun lurañasasa “juchanakasat” pampachayasiñatakixa?

¹⁴ Juchararäkasinsa, uka qhispiyäwi utjipanwa bendicionanaksa katuqsna. Jichhürunakansa jutïr urunakansa kuna bendicionanaksa katuqañäni Diosan qhispiyäwipatxa, ukanakxat mä qhawqha uñxatañäni.

¹⁵ Juchanak pampachäwi. Jiwasanakatakixa kunatï askïki uka lurañaxa wali chʼamawa. Kunattix taqiniwa juchachastanxa, arumpisa, luräwinakampisa pantjasipuntanwa. Ukampisa “juchanakasat pampacha[täsnawa]”, Jesusawa jiwas layku luqtasiwayi (Colosenses 1:13, 14). Ukatakisti chuymatpachwa juchanakasata arrepentisiñasaxa. Ukat wali altʼat chuymampiwa Yuqapan luqtäwipxaru juchanak pampachayasiñataki Diosat mayisiñasa (1 Juan 1:8, 9).

16. ¿Kunjamatsa Diosaru qʼuma chuymampi yupaychsna, ukat kunanakansa qʼuma chuymanïñaxa yanapistu?

¹⁶ Diosampi iyawsatäña. Jucharar chuymanïñax janiw walïkiti, jan suytʼäwin jaytistu, janis kunatakis walïksna ukham uñjasiyistu. Ukampisa qhispiyäwi utjatapatwa Jehová Diosax juchanakasxa pampachistu, ukhamaraki uka qhispiyäwi utjatapatwa juchararäkasinsa Jehová Diosarux qʼuma chuymampi yupaycharaksna (Hebreos 9:13, 14). Ukhamatwa jan axsarasa Diosatxa mayissna (Hebreos 4:14-16). Ukampisa qʼuma chuymanïsaxa jan  llakitakiw sarnaqastanxa ukat jiwaspachasa walikiw jikxatastanxa, ukat jukʼampi kusisitarakïtanwa.

17. Jesusan jiwäwipatxa, ¿kuna bendicionanaksa katuqañäni?

¹⁷ Kusipach Uraqina wiñayatakiwa jakassna. Romanos 6:23 akham siwa: “Juchan waxtʼasiñapasti jiwañawa” sasa. Ukxarusti akham sarakiwa: “Ukampis Diosan waxtʼäwipax wiñay jakañawa Cristo Jesus[ana]” sasa. Aka libron 3 jaljapanxa kuna bendicionanakasa jakʼachasisinki ukwa uñxatawaytanxa (Apocalipsis 21:3, 4). Taqi uka bendicionanaksa ukhamaraki wiñayataki suma jakasiñsa, Jesusan jiwatapatwa katuqañäni. Ukatakixa qhispiyäwit yuspärataswa uñachtʼayañasa.

18. ¿Kunatsa qhispiyäwitxa Jehová Diosaru yuspärañasaxa?

¹⁸ ¿Kunatsa uka qhispiyäwitxa Jehová Diosaru taqi chuyma yuspärañasa? Mä churäwixa wali valoraniwa kunapachatï waxtʼasirix jiwasanak layku qullqsa, tiempsa, chʼamapsa aptʼaski ukhaxa. Chuymar purtʼkiri uka churäwimpisti munasiñapwa uñachtʼayistu. Ukhamasti, qhispiyäwixa taqi kunat sipansa, Diosan wali suma jachʼa  churäwipawa. “Diosax akapachar wal muna[si]tap laykuw mä sapa Yuqapar khitani” siwa Juan 3:16 jiskʼa tʼaqaxa. Diosax qhispiyäwimpiwa jachʼa munasiñapxa uñachtʼayistu. Jesusasti iyaw sasa jiwasanak layku jakañap aptʼasawa munasiñapxa uñachtʼayarakistu (Juan 15:13). Ukhamasti, Jehová Diosampi Jesusampisti sapa mayniruwa munasipxistu, ukwa qhispiyasiñ churäwimpix uñachayapxistu (Gálatas 2:20).

19, 20. ¿Kunjamanakatsa Diosan qhispiyasiñ churäwipat yuspäratamxa uñachtʼayasma?

¹⁹ Ukhamaxa, ¿kunanaka lurasasa Diosan churäwipat yuspäratamxa uñachtʼayäta? Ukatakixa, qhispiyäwi churiri Jehová Diosar jukʼampi nayraqat uñtʼañamawa (Juan 17:3). Aka librompi Bibliat yatiqasawa Jehová Diosaruxa sum uñtʼäta. Ukatxa jukʼampwa juparux munasïta. Ukham jupar munasïta ukhasti jukʼampirakiwa chuymapar purtʼañxa munarakïta (1 Juan 5:3).

²⁰ Qhispiyäwir iyawsäwiniñäni. “Khititix Yuqar iyawski ukaxa wiñay jakañaniwa” sasaw Jesusat qillqasïna (Juan 3:36). ¿Kunjamsa Jesusar iyawsatasxa uñachtʼaysna? Kunjamtï Santiago 2:26 siski ukhamäñapawa, ukanxa akham siwa: “Kunapachatix jan suma luräwinakampi uñachtʼayaski ukkhaxa” “iyawsañax jiwata[wa]” sasa. Ukhamasti iyawsäwisaxa janiw arukïñapäkiti. Chiqpach iyawsäwinitasxa suma luräwinakampiwa uñachtʼayañasa. Parlañansa lurañansa Jesusat yatiqasisawa jupar iyawsatasxa uñachtʼayañäni (Juan 13:15).

21, 22. 1) ¿Kunatsa Jesusan Cenapat sapa mara amtaski uka tantachäwiru sarañasa? 2) ¿Kuna tuqitsa jutir jaljanakanxa yatxatañäni?

²¹ Jesusan Cenapata sapa mara amtaski uka tantachäwiru sarañäni. 33 marana, nisán phaxsita 14 urunak saraqat arumawa, Jesusax mä cena uttʼayäna, ukasti Biblianxa “Santa Cena” satawa (1 Corintios 11:20; Mateo 26:26-28). Jesucriston jiwätapata amtaña satarakiwa.  Uksti, Jesusaxa uttʼayataynawa apostolanakaparu ukhamaraki taqi chiqa cristianonakaru ak amtayañataki: jiwasinsti, jan juchani suma jakañapwa jiwasanakaru qhispiyañataki luqtasiwayi, ukax wali wakiskiriwa. Jesusax akhamwa arsüna: “Akxa nayat amtasisin lurapxam” sasa (Lucas 22:19). Jehová Diosampi Jesusampixa wali munasiñapatwa qhispiyapxistu, ukwa amtayistu Jesucriston jiwatapat sapa mar amtañaxa. Uka tantachäwiru sarasaxa, uka qhispiyäwita yuspärataswa uñachaytanxa. a

²² Qhispiyäwixa Jehová Diosan wali valoran churäwipawa (2 Corintios 9:14, 15). Jiwat jaqinakarusa yanaptʼarakiniwa, uka tuqitxa 6 ukat 7 jaljanakanwa jukʼampi yatxatañäni.