1, 2. (a) Noarin nagkakaigwa nin dakulang halaga para sa saindo personalmente an sarong regalo? (b) Taano ta masasabi na an pantubos iyo an pinakamahalagang regalo na puede nindong maako noarin man?

ANO an nakakalabi sa gabos na regalo na inako nindo kasuarin man? Dai kaipuhan na mamahalon an sarong regalo tanganing iyan magin mahalaga. Total, an tunay na halaga nin sarong regalo dai pirmeng nasosokol paagi sa kuarta. Imbes, kun an sarong regalo nagtatao sa saindo nin kaogmahan o nagpapanigo sa sarong tunay na pangangaipo sa saindong buhay, igwa iyan nin dakulang halaga sa saindo personalmente.

² Sa dakol na regalo na malalaoman nindong akoon, igwa nin saro na nangongorog sa gabos na iba pa. Iyan regalo nin Dios sa katawohan. Si Jehova nagtao sa sato nin dakol na bagay, alagad an nakakalabi sa gabos na regalo nia sa sato iyo an atang na pantubos kan saiyang Aki, si Jesu-Cristo. (Mateo 20:28) Siring kan maheheling niato sa kapitulong ini, an pantubos iyo an pinakamahalagang regalo na posibleng maako nindo, huli ta iyan puedeng magtao sa saindo nin dai masokol na kaogmahan asin puedeng magpanigo sa pinakamahalagang mga pangangaipo nindo. An pantubos iyo talaga an nakakalabi sa gabos na kapahayagan kan pagkamoot ni Jehova para sa saindo.

3. Ano an pantubos, asin ano an kaipuhan na masabotan niato tanganing maapresyar niato an mahalagang regalong ini?

³ Sa simpleng pagtaram, an pantubos iyo an paagi ni Jehova sa pagkalda, o pagligtas, kan katawohan sa kasalan asin kagadanan. (Efeso 1:7) Tanganing masabotan an kahulogan kan katokdoan na ini sa Biblia, kaipuhan na girumdomon niato an nangyari sa hardin nin Eden. Saka sana niato masasabotan kun taano ta mahalaga nanggad na regalo para sa sato an pantubos kun enot nasasabotan niato kun ano an iwinara ni Adan kan sia magkasala.

4. Ano an kahulogan para ki Adan kan sangkap na buhay nin tawo?

⁴ Kan lalangon nia si Adan, si Jehova nagtao sa saiya nin sarong bagay na talagang mahalaga​—an sangkap na buhay nin tawo. Isipon nindo kun ano an kahulogan kaiyan para ki Adan. Huling linalang na may sangkap na hawak asin isip, dai sia noarin man magkakahelang, magurang, o magagadan. Bilang sangkap na tawo, igwa sia nin espesyal na relasyon ki Jehova. Sinasabi kan Biblia na si Adan “aki nin Dios.” (Lucas 3:38) Kaya si Adan igwa nin dayupot na relasyon ki Jehova Dios, kapareho kan relasyon nin sarong aki sa sarong mamomoton na ama. Si Jehova nakikomunikar sa saiyang daganon na aki, na tinatawan si Adan nin nakakakontentong mga trabaho asin sinasabi sa saiya kun ano an linalaoman sa saiya.​—Genesis 1:28-30; 2:16, 17.

5. Ano an boot sabihon kan Biblia kan sabihon kaiyan na si Adan ginibo “sa ladawan nin Dios”?

⁵ Si Adan ginibo “sa ladawan nin Dios.” (Genesis 1:27) Dai iyan nangangahulogan na kapareho ni Adan an Dios sa itsura. Siring kan nanodan ta sa Kapitulo 1 kan librong ini, si Jehova dai naheheling na espiritu. (Juan 4:24) Kaya si Jehova mayo nin hawak na may laman asin dugo. An pagigin ginibo sa ladawan nin Dios nangangahulogan na si Adan linalang na may mga kualidad na arog kan sa Dios, kaiba an pagkamoot, kadonongan, hustisya, asin kapangyarihan. Si Adan kapareho kan saiyang Ama sa saro pang mahalagang bagay ta sia igwa nin libreng kabotan. Huli kaini, si Adan bakong kapareho nin sarong robot na an kaya sanang gibohon an nakadisenyo o nakaprogram  na gibohon kaiyan. Imbes, puede siang gumibo nin personal na mga desisyon, na namimili sa tama asin sala. Kun pinili niang kuyogon an Dios, nabuhay kutana sia sagkod lamang sa Paraiso digdi sa daga.

6. Kan si Adan makisuway sa Dios, ano an nawara nia, asin paano naapektaran an saiyang mga gikan?

⁶ Kun siring, malinaw nanggad na kan si Adan makisuway sa Dios asin kinondenar sa kagadanan, dakulaon an ibinayad nia. Huli sa saiyang kasalan nawara nia an saiyang sangkap na buhay nin tawo kaiba an gabos na bendisyon kaiyan. (Genesis 3:17-19) Makamomondo, nawara ni Adan an mahal na marhay na buhay na ini bako sanang para sa saiyang sadiri kundi siring man para sa magigin mga gikan nia sa ngapit. An Tataramon nin Dios nagsasabi: “Paagi sa sarong tawo [si Adan] an kasalan naglaog sa kinaban asin an kagadanan huli sa kasalan, asin sa siring an kagadanan nakalakop sa gabos na tawo huli ta sinda gabos nagkasala.” (Roma 5:12) Iyo, kita gabos nagmana nin kasalan ki Adan. Huli kaini, an Biblia nagsasabi na “ipinabakal” nia an saiyang sadiri asin an saiyang mga gikan sa pagkaoripon sa kasalan asin kagadanan. (Roma 7:14) Mayo na nin paglaom para ki Adan asin Eva huli ta tuyo sindang nakisuway sa Dios. Alagad kumusta an saindang mga gikan, kaiba na kita?

7, 8. Sa pundamental anong duwang bagay an kalabot sa pantubos?

⁷ Si Jehova nagsukoro sa katawohan paagi sa pantubos. Ano an pantubos? Sa pundamental duwang bagay an kalabot sa ideya nin pantubos. Enot, an pantubos iyo an kantidad na pambayad tanganing makabutas o matubos an sarong bagay. Puedeng iagid iyan sa kantidad na ibinabayad tanganing butasan an sarong bihag sa guerra. Ikaduwa, an pantubos iyo an kantidad na ibinabayad sa halaga nin sarong bagay. Kaagid iyan kan kantidad na ibinabayad tanganing matawan nin kompensasyon an danyos na nagibo. Halimbawa, kun an sarong tawo nakaaksidente, kaipuhan niang magbayad nin kantidad na katimbang nanggad kan halaga kan bagay na naperwisyo.

⁸ Paano magigin posibleng mabayadan an dakulaon na kapierdihan na iwinalat sa sato gabos ni Adan asin mabutasan kita  sa pagkaoripon sa kasalan asin kagadanan? Estudyaran niato an pantubos na itinao ni Jehova asin kun ano an puedeng magin kahulogan kaini para sa saindo.

9. Anong klaseng pantubos an kaipuhan?

⁹ Huling sarong sangkap na buhay nin tawo an nawara, mayo nin bakong sangkap na buhay nin tawo na makakatubos kaiyan noarin man. (Salmo 49:7, 8) An kaipuhan iyo an sarong pantubos na katimbang sa halaga kan nawara. Kaoyon ini kan prinsipyo nin sangkap na hustisya na yaon sa Tataramon nin Dios, na nagsasabi: “An kalag manini para sa kalag.” (Deuteronomio 19:21) Kaya, ano an makakabayad sa halaga kan sangkap na kalag, o buhay, nin tawo na iwinara ni Adan? An kaipuhan na “katimbang na pantubos” saro pang sangkap na buhay nin tawo.​—1 Timoteo 2:6.

10. Paano itinao ni Jehova an pantubos?

¹⁰ Paano itinao ni Jehova an pantubos? Isinugo nia sa daga an saro sa saiyang sangkap na espiritung mga aki. Alagad dai isinugo ni Jehova an dawa siisay na sanang espiritung linalang. Isinugo nia an pinakamamahal nia, an saiyang bugtong na Aki. (1 Juan 4:9, 10) Gikan sa boot na binayaan kan Aki na ini an saiyang langitnon na erokan. (Filipos 2:7) Siring kan nanodan niato sa sinusundan na kapitulo kan librong ini, si Jehova naggibo nin sarong milagro kan ibalyo nia an buhay kan Aki na ini sa matris ni Maria. Paagi sa banal na espiritu nin Dios, si Jesus namundag bilang sangkap na tawo asin dai sakop kan penalidad nin kasalan.​—Lucas 1:35.

11. Paanong an sarong tawo magseserbing pantubos para sa minilyon?

¹¹ Paanong an sarong tawo magseserbing pantubos para sa dakol, an totoo, para sa minilyon na tawo? Bueno, sa kapoonpooni paano nagin parakasala an mga tawo na minilyon an kabilangan? Girumdomon na paagi sa pagkakasala, iwinara ni Adan an mahalagang marhay na rogaring na sangkap na buhay nin tawo. Huli kaini, dai nia iyan puedeng ipamana sa saiyang mga gikan. Imbes, kasalan asin kagadanan sana an puede niang ipamana. Si Jesus, na inaapod kan Biblia na “an huring Adan,” may  sangkap na buhay nin tawo kaidto, asin sia dai noarin man nagkasala. (1 Corinto 15:45) Sa sarong sentido, rinibayan ni Jesus si Adan tanganing iligtas kita. Paagi sa pag-atang, o pagtao, kan saiyang sangkap na buhay na may daing depektong pagkuyog sa Dios, binayadan ni Jesus an kasalan ni Adan. Sa siring si Jesus nagtao nin paglaom sa mga gikan ni Adan.​—Roma 5:19; 1 Corinto 15:21, 22.

12. Ano an pinatunayan kan pagdusa ni Jesus?

¹² Detalyadong ilinaladawan kan Biblia an pagdusa na tinagalan ni Jesus bago sia nagadan. Naeksperyensiahan nia an daing herak na paglatigo, maringis na pagpako, asin makologon na kagadanan sa hariging pasakitan. (Juan 19:1, 16-18, 30; Apendise na “Kun Taano ta Dai Naggagamit kan Krus sa Pagsamba an Tunay na mga Kristiano”) Taano ta kinaipuhan na si Jesus magdusa nin labi-labi? Sa mas huring kapitulo sa librong ini, manonodan niato na kinuestion ni Satanas kun baga may siisay man na tawong lingkod si Jehova na magdadanay na maimbod sa ibong nin pagbalo. Paagi sa maimbod na pagtagal sa ibong nin grabeng pagdusa, itinao ni Jesus an pinakamarahay na simbag na posible sa angat ni Satanas. Pinatunayan ni Jesus na kaya nin sarong sangkap na tawo na may libreng kabotan na papagdanayon an sangkap na integridad sa Dios ano man an gibohon kan Diablo. Siertong naggayagayang marhay si Jehova sa kaimbodan kan saiyang mahal na Aki!​—Talinhaga 27:11.

13. Paano ibinayad an pantubos?

¹³ Paano ibinayad an pantubos? Kan ika-14 aldaw kan Judiong bulan nin Nisan kan 33 C.E., itinogot nin Dios na gadanon an saiyang sangkap asin daing kasalan na Aki. Sa siring iinatang ni Jesus an saiyang sangkap na buhay nin tawo “nin sararoan sana.” (Hebreo 10:10) Kan ikatolong aldaw pagkagadan ni Jesus, sia binuhay liwat ni Jehova pasiring sa espiritung buhay. Duman sa langit, iprinesentar ni Jesus sa Dios an halaga kan saiyang sangkap na buhay nin tawo na iinatang bilang pantubos karibay kan mga gikan ni Adan. (Hebreo 9:24) Inako ni Jehova an halaga kan atang ni Jesus bilang an pantubos na kaipuhan tanganing kaldahon an katawohan sa pagkaoripon sa kasalan asin kagadanan.​—Roma 3:23, 24.

14, 15. Tanganing kamtan an “kapatawadan kan satong mga kasalan,” ano an dapat niatong gibohon?

¹⁴ Sa ibong kan satong makasalan na kamugtakan, puede niatong kamtan an mga bendisyon na daing kaagid sa halaga huli sa pantubos. Estudyaran niato an nagkapirang pakinabang kan nakakalabi sa gabos na regalong ini gikan sa Dios sa presente asin sa ngapit.

¹⁵ An kapatawadan nin mga kasalan. Huli sa minanang pagkabakong sangkap, may pakikipagtusayan nanggad kita na magibo an tama. Kita gabos nagkakasala magsalang sa pagtaram o sa gibo. Alagad paagi sa atang na pantubos ni Jesus, puede kitang umako nin “kapatawadan kan satong mga kasalan.” (Colosas 1:13, 14) Minsan siring, tanganing kamtan an kapatawadan na iyan, kita dapat na nagsosolsol talaga. Kita dapat man na mapakumbabang makimaherak ki Jehova, na hinahagad an saiyang kapatawadan basado sa satong pagtubod sa atang na pantubos kan saiyang Aki.​—1 Juan 1:8, 9.

16. Ano an nagpapangyari na masamba ta an Dios na may malinig na konsensia, asin ano an halaga kan siring na konsensia?

¹⁶ Sarong malinig na konsensia sa atubangan nin Dios. An nagkasalang konsensia pasil sanang magbunga nin kadaihan nin paglaom asin magin dahelan na kita magsaboot na kita daing halaga. Pero paagi sa kapatawadan na nagin posible huli sa pantubos, may kabootan na pinapapangyari ni Jehova na masamba ta sia na may malinig na konsensia sa ibong kan satong pagkabakong sangkap. (Hebreo 9:​13, 14) Pinapapangyari kaini na kita magkaigwa nin katalingkasan sa pagtaram ki Jehova. Kun siring, suelto kitang makakadolok sa saiya sa pamibi. (Hebreo 4:14-16) An pagpadanay nin malinig na konsensia nagtatao nin katoninongan nin isip, nagpapaoswag sa paggalang sa sadiri, asin nakakakontribwir sa kaogmahan.

17. Anong mga bendisyon an nagin posible huli ta si Jesus nagadan para sa sato?

¹⁷ An paglaom na buhay na daing katapusan sa sarong paraisong daga. “An ibinabayad nin kasalan kagadanan,” an sabi kan Roma 6:23. Idinadagdag kan iyo man sanang bersikulo: “Alagad  an regalo na itinatao nin Dios buhay na daing katapusan paagi ki Cristo Jesus na satong Kagurangnan.” Sa Kapitulo 3 kan librong ini, tinokar niato an mga bendisyon kan maabot na daganon na Paraiso. (Kapahayagan 21:3, 4) An gabos na bendisyon na iyan sa ngapit, kaiba an buhay na daing katapusan na may sangkap na salud, nagin posible huli ta si Jesus nagadan para sa sato. Tanganing kamtan niato an mga bendisyon na iyan, kaipuhan na ipaheling niato na inaapresyar niato an regalong pantubos.

18. Taano ta maninigo kitang magpasalamat ki Jehova para sa probisyon na pantubos?

¹⁸ Taano ta maninigo kitang odok na magpasalamat ki Jehova para sa pantubos? Bueno, an sarong regalo nangorognang mahalaga kun iyan may kalabot na sakripisyo sa panahon, paghihingoa, o gastos sa kabtang kan nagtao. An satong puso napapahiro kun naheheling niato na an regalo sarong kapahayagan kan tunay na pagkamoot sa sato kan nagtao. An pantubos iyo an pinakamahalaga sa gabos na regalo, huli ta ginibo nin Dios an kadarudakulaing sakripisyo kasuarin man sa pagtao kaiyan. “An Dios namoot na gayo sa kinaban na itinao nia an saiyang Aking bugtong,” an sabi kan Juan 3:16. An pantubos  iyo an pinakalataw na ebidensia kan pagkamoot sa sato ni Jehova. Iyan katunayan man kan pagkamoot ni Jesus, huli ta gikan sa boot niang itinao an saiyang buhay para sa sato. (Juan 15:13) Kun siring an regalong pantubos maninigong makakombensir sa sato na namomotan kita ni Jehova asin kan saiyang Aki bilang mga indibiduwal.​—Galacia 2:20.

19, 20. Sa anong mga paagi nindo ikakapaheling na inaapresyar nindo an regalo nin Dios na pantubos?

¹⁹ Kun siring, paano nindo ikakapaheling na inaapresyar nindo an regalo nin Dios na pantubos? Enot sa gabos, makanood nin orog pa manongod sa Dakulang Paratao, si Jehova. (Juan 17:3) An pag-adal kan Biblia sa tabang kan publikasyon na ini matabang sa saindo na gibohon iyan. Mientras na nadadagdagan an saindong kaaraman manongod ki Jehova, an saindong pagkamoot sa saiya mararom. Huli sa pagkamoot man na iyan gugustohon nindong paogmahon sia.​—1 Juan 5:3.

²⁰ Ipaheling na kamo may pagtubod sa atang na pantubos ni Jesus. Mapadapit ki Jesus, ini an sinasabi: “An nagtutubod sa Aki igwa nin buhay na daing katapusan.” (Juan 3:36) Paano niato ipapaheling na kita may pagtubod ki Jesus? An siring na pagtubod dai ikakapaheling sa tataramon sana. “An pagtubod na daing mga gibo gadan,” an sabi kan Santiago 2:26. Iyo, an tunay na pagtubod pinapatunayan paagi sa “mga gibo,” an boot sabihon, paagi sa satong mga aksion. An sarong paagi na ikapaheling na kita may pagtubod ki Jesus iyo an paggibo kan satong pinakamakakaya tanganing arogon sia bako sanang sa satong sinasabi kundi siring man sa satong ginigibo.​—Juan 13:15.

21, 22. (a) Taano ta maninigo kitang umatender sa taonan na selebrasyon kan Pamanggihan kan Kagurangnan? (b) Ano an ipapaliwanag sa Kapitulo 6 asin 7?

²¹ Umatender sa taonan na selebrasyon kan Pamanggihan kan Kagurangnan. Kan banggi nin Nisan 14, 33 C.E., pinonan ni Jesus an sarong espesyal na selebrasyon na inaapod kan Biblia na “an pamanggihan kan Kagurangnan.” (1 Corinto 11:20; Mateo 26:26-28) An selebrasyon na ini inaapod man na Memorial kan kagadanan ni Cristo. Pinonan iyan ni Jesus tanganing tabangan an saiyang mga apostol asin an gabos  na tunay na Kristiano na kasunod ninda na girumdomon na paagi sa saiyang kagadanan bilang sangkap na tawo, itinao nia an saiyang kalag, o buhay, bilang pantubos. Mapadapit sa selebrasyon na ini, nagboot si Jesus: “Padagos na gibohon nindo ini sa paggirumdom sa sako.” (Lucas 22:19) An pagselebrar kan Memorial nagpapagirumdom sa sato kan dakulang pagkamoot na ipinaheling ni Jehova sagkod ni Jesus may koneksion sa pantubos. Ikakapaheling niato an satong pag-apresyar sa pantubos paagi sa pagigin presente sa taonan na pagselebrar kan Memorial kan kagadanan ni Jesus. *

²² An probisyon ni Jehova na pantubos tunay nanggad na sarong mahalagang marhay na regalo. (2 Corinto 9:​14, 15) An regalong ini na daing kaagid sa halaga puede pa nganing pakinabangon dawa an mga nagadan na. Ipapaliwanag kan Kapitulo 6 asin 7 kun paano.