1, 2. (a) Oi dekenai edena bamona harihari gauna be mai ena namo bada? (b) Dahaka dainai ita gwau diba mauri davana be oi abia harihari gauna hereadaena?

OI ABIA harihari gauna hereadaena be dahaka? Ena be harihari gauna be dava bada lasi, to unai be gau badana lasi. Moni hida idia negea ese ia hahedinaraia lasi unai harihari gauna be mai ena namo bada. To, bema harihari gauna ta ese oi ia hamoalea, eiava emu mauri dekenai oi ia durua bada, oi dekenai ia be mai ena namo bada.

² Oi ura abia harihari gaudia momo amo, harihari gauna ta ia noho bona ia ese idia ibounai ia hereaia. Dirava ese unai harihari gauna be taunimanima dekenai ia henia. Iehova ese ita dekenai gau momo herea ia henia, to ita dekenai ia henia harihari gauna hereadaena be iena Natuna, Iesu Keriso ena mauri davalaia boubouna. (Mataio 20:28) Inai karoa lalonai do ita itaia, mauri davana be oi abia harihari gauna hereadaena, badina oi ia hamoalea bona oi ia durua bada. Iehova ese mauri davana ia henia karana amo ia hahedinaraia oi ia lalokau henia.

3. Mauri davana be dahaka? Dahaka ita lalopararalaia be namo, unai amo do ita diba ia be harihari gauna hereadaena?

³ Iehova ese taunimanima be kara dika bona mase amo ia hamauria karana be mauri davana. (Efeso 1:7) Unai Baibel ena hadibaia herevana ita lalopararalaia totona, namona be Eden umana ai ia vara gauna ita laloa. Adamu ia kara dika neganai ia haboioa gaudia ita lalopararalaia neganai, do ita diba dahaka dainai mauri davana be harihari gauna hereadaena.

4. Adamu ia goevadae ena anina be dahaka?

⁴ Iehova ese Adamu ia havaraia neganai, ia dekenai gau namo hereana ta ia henia​—mauri goevadaena. Unai ena anina Adamu dekenai mani oi laloa. Iena tauanina bona lalona be goevadae dainai, do ia gorere, buruka eiava mase lasi. Ia be goevadae tauna dainai, Iehova ia tura henia diba. Baibel ia gwau Adamu be “Dirava ena natuna.” (Luka 3:38) Unai dainai Adamu ese Iehova Dirava ena hebamo ia moalelaia, natu ta ese ena lalokau tamana ia tura henia bamona. Iehova be ena tanobada natuna Adamu ida ia herevahereva, ia dekenai gaukara badana ia henia bona do ia karaia gaudia ia gwauraia.​—Genese 1:​28-30; 2:​16, 17.

5. Baibel ia gwau Adamu be “Dirava ena toana hegeregerena ia karaia” neganai, ena anina be dahaka?

⁵ Dirava ese Adamu be “ena toana hegeregerena ia karaia.” (Genese 1:27) Unai ena anina be dahaka? Inai buka ena Karoa 1 dekenai ita dibaia bamona, Iehova be ita itaia diba lasi laumana. (Ioane 4:24) Unai dainai Iehova ena tauanina be taunimanima edia amo ia idau. Dirava ese Adamu be ena toana hegeregerena ia karaia ena anina be, Dirava ena kara idauidau ia hahedinaraia diba, hegeregere lalokau, aonega, hahemaoro goeva bona siahu. Adamu be dala ma ta ai ena Tamana hegeregerena, ia be mai ena ura kwalimu. Unai dainai, Adamu be masini ta  bamona lasi, badina masini be ena karaia tauna ia ura do ia karaia gaudia sibona do ia karaia. To, Adamu ese dahaka be namo bona dahaka be dika ia abia hidi diba. Bema Adamu ese Dirava kamonai henia karana ia abia hidi, tanobada Paradaisona ai do ia noho ela bona hanaihanai.

6. Adamu ese Dirava ia gwau-edeede henia neganai, dahaka ia haboioa, bona ena natudia dekenai dahaka ia vara?

⁶ Oibe, Adamu ese Dirava ia gwau-edeede henia bona Dirava ia gwau do ia mase neganai, davana dikana ia abia. Ia kara dika dainai, ena mauri goevadaena bona ia abia hahenamo idauidau ia haboioa. (Genese 3:​17-19) Madi, Adamu ese ena mauri goevadaena sibona lasi, to gabeai ia havaraia natudia ibounai edia mauri namona danu ia haboioa. Baibel ia gwau: “Tau tamona [Adamu] dekena amo kara dika ia vareai mai tanobada dekenai, bona iena kara dika ese mase ia mailaia. Unai dainai mase be taunimanima ibounai ese idia abia, badina ibounai be mai edia kara dika.” (Roma 5:12) Oibe, ita ibounai be Adamu amo kara dika ita abia. Unai dainai, Baibel ia gwau Adamu ese ia sibona bona ena natudia be kara dika bona mase ena ‘igui’ hesiai taudia ai ia halaoa. (Roma 7:14) Adamu bona Heva be helaro lasi badina mai edia ura ida Dirava idia gwau-edeede henia. To edia natudia, ita danu, be edena bamona?

7, 8. Mauri davalaia boubouna ena anina rua be dahaka?

⁷ Iehova ese mauri davana amo taunimanima ia hamauria. Mauri davana be dahaka? Mauri davana ena anina be rua. Ginigunana be, tau ta idia ruhaia eiava gau ta idia hoia lou totona idia henia davana. Unai be tuari lalonai idia hadiburaia tauna ruhaia totona idia henia davana ida ita hahegeregerea diba. Iharuana be, mauri davana be gau ta ena davana karaia totona oi henia monina. Ia be oi hadikaia gauna ta ena davana. Hegeregere, bema tau ta ese gau ta ia hadikaia, namona be ia henia davana be ia hadikaia gauna ena davana ida ia hegeregere.

 ⁸ Edena dala ai, Adamu ese ia haboioa gauna badana ena davana ita henia diba, bena mase bona kara dika ese ita do ia guia lou lasi? Iehova ese ia henia mauri davalaia boubouna bona ena anina ita dekenai mani ita laloa.

9. Edena bamona mauri davana ese taunimanima ibounai ia hamauria diba?

⁹ Adamu ese mauri goevadaena ia haboioa dainai, goevadae lasi tauna ta ese unai mauri ia hoia lou diba lasi. (Salamo 49:​7, 8) Namona be ena davana be Adamu ese ia haboioa maurina ida ia hegeregere. Unai be Baibel ese ia gwauraia hahemaoro goevana ena hakaua herevana hegeregerena, ia gwau: “Mauri ena davana be mauri.” (Deuteronomi 19:21) Unai dainai, Adamu ese ia haboioa mauri goevadaena be daika ese ia hoia lou diba? Namona be goevadae tauna ta ese “iena mauri ia henia, taunimanima ibounai hamauria totona.”​—1 Timoteo 2:6.

10. Edena dala ai Iehova ese mauri davana ia henia?

¹⁰ Edena dala ai Iehova ese mauri davana ia henia? Iena goevadae lauma natuna ta be tanobada dekenai ia siaia. Iehova ese lauma tauna ta ia abia hidi kava lasi. To iena lalokau Natuna tamona sibona ia siaia. (1 Ioane 4:​9, 10) Mai ena ura ida, ena Natuna ese ena noho gabuna, guba ia rakatania. (Filipi 2:7) Inai buka ena karoa gunana ese ia hahedinaraia bamona, Iehova ese ena Natuna ena mauri be Maria ena bogana lalonai ia atoa neganai, hoa karana ta ia karaia. Dirava ena lauma helaga amo, Iesu Keriso ia vara neganai, ia be goevadae tauna.​—Luka 1:35.

11. Edena dala ai tau tamona ese taunimanima milioni momo edia mauri davana ia karaia diba?

¹¹ Edena dala ai tau tamona ese taunimanima milioni momo edia mauri davana ia karaia diba? Vadaeni, edena dala ai taunimanima ese kara dika idia abia? Mani ita laloa, Adamu ia kara dika neganai, mauri goevadaena  ia haboioa. Unai dainai ena natudia dekenai unai ia henia hanai lasi. To, kara dika bona mase sibona ia henia hanai. Iesu, Baibel ese ia gwauraia “Adamu dokona” be ia goevadae, bona nega ta ia kara dika lasi. (1 Korinto 15:45) Anina be, Iesu ese Adamu ena gabu ia abia, unai amo ita ia hamauria diba. Iesu ese Dirava ia kamonai henia goevagoeva bona ena mauri goevadaena ia henia neganai, ia ese Adamu ena kara dika ena davana ia henia. Bona dala ia kehoa Adamu ena natudia ese helaro idia abia totona.​—Roma 5:19; 1 Korinto 15:​21, 22.

12. Iesu ia mamia hisihisi ese dahaka ia hamomokania?

¹² Iesu ia do mase lasi neganai ia dekenai idia vara gaudia be Baibel ese ia gwauraia. Ia idia kwadia, au dekenai idia tauadae, bona mai hisihisi bada ida ia mase. (Ioane 19:​1, 16-18, 30; Apendiks, rau 204-6) Dahaka dainai Iesu ese unai hisihisi bada herea ia davaria? Gabeai karoa ta ai, do ita itaia Satani ena hepapahuahu herevana ai ia gwau Iehova ena hesiai taudia be hahetoho lalonai idia gini goada diba lasi. Ena be Iesu ese hisihisi bada ia davaria to Dirava ia badinaia noho, unai amo Satani ena hepapahuahu herevana ia haerelaia. Iesu ese ia hamomokania, herevana Diabolo be dahaka ia karaia, to goevadae tauna mai ena ura kwalimu ese Dirava ia badinaia noho diba. Iehova be reana ena lalokau Natuna ena abidadama dainai ia moale bada!​—Aonega Herevadia 27:11.

13. Edena dala ai Iesu ese mauri davana ia henia?

¹³ Edena dala ai Iesu ese mauri davana ia henia? Iuda taudia edia hua Nisan ena dina namba 14, lagani 33 C.E. ai, Iehova ena goevadae Natuna idia hamasea neganai, Iehova ese ia koua lasi. Iesu ese ena goevadae maurina be “nega tamona” sibona ia bouboulaia. (Heberu 10:10) Iesu ia mase bena dina ihatoina ai, Iehova ese lauma maurina dekenai ia hatorea isi lou. Guba dekenai, Iesu ese ena mauri goevadaena ena davana, Adamu ena natudia hoia lou totona ia bouboulaia gauna unai, be Dirava dekenai  ia henia. (Heberu 9:24) Iehova ese Iesu ena mauri davalaia boubouna ia abia dae, unai amo taunimanima be kara dika bona mase amo ia ruhadia.​—Roma 3:​23, 24.

14, 15. Dirava ese “iseda kara dika ia gwauatao” totona, dahaka ita karaia be namo?

¹⁴ Ena be ita goevadae lasi, to mauri davana dainai hahenamo idauidau ita moalelaia diba. Dirava ia henia harihari gauna hereadaena ese hari bona gabeai do ia mailaia hahenamo haida mani ita laloa.

¹⁵ Kara dika gwauatao karana. Adamu amo kara dika ita abia hanai dainai, ita hekwarahi bada kara namo ita karaia totona. Ita ibounai be iseda hereva eiava kara dekenai ita kerere. To Iesu ena mauri davalaia boubouna amo, Dirava ese “iseda kara dika ia gwauatao.” (Kolose 1:​13, 14) To, iseda kara dika ia gwauatao totona, namona be ita helalo-kerehai momokani. Ma danu, mai manau ida Iehova ita noia iseda kara dika do ia gwauatao, badina ena Natuna ena mauri davalaia boubouna ita abidadama henia.​—1 Ioane 1:​8, 9.

16. Dahaka ese ita do ia durua mai lalomamina namona ida Iehova ita tomadiho henia totona, bona unai ena namo be dahaka?

¹⁶ Dirava vairanai lalomamina goevana. Lalomamina dikana dainai do ita lalohisihisi bona do ita laloa ita be anina lasi. To, ena be ita goevadae lasi, Iesu ena mauri davana dainai Iehova ese iseda dika ia gwauatao bona mai lalomamina namona ida Ia ita tomadiho henia diba. (Heberu 9:​13, 14) Unai dainai guriguri amo Iehova ita hereva henia diba, bona ita hemarai lasi. (Heberu 4:​14-16) Lalomamina namona ese lalomaino, sibona matauraia karana bona moale ia havaraia.

17. Iesu be ita totona ia mase dainai, dahaka hahenamo idauidau ita abia diba?

¹⁷ Tanobada paradaisona ai mauri hanaihanai do ita abia helarona. Roma 6:23 ia gwau: “Kara dika ena davana  be mase, to Dirava ena harihari gauna davana lasi be mauri hanaihanai, Iesu Keriso iseda Lohiabada lalonai ita noho dainai.” Inai buka ena Karoa 3 ai, do ia mai tanobada Paradaisona ai do ita abia hahenamo idauidau ita herevalaia vadaeni. (Apokalupo 21:​3, 4) Vaira negana ai, unai hahenamo ibounai bona gorere lasi maurina danu do ita abia badina Iesu be ita dainai ia mase. Unai hahenamo idauidau ita abia totona, namona be ita hahedinaraia ita abia harihari gauna, mauri davana unai, ita laloa bada.

18. Dahaka dainai mauri davalaia boubouna dainai Iehova ita tanikiu henia be namo?

¹⁸ Dahaka dainai mauri davalaia boubouna dainai Iehova ita tanikiu henia be namo? Bema ta ese ita dekenai harihari gauna ta ia henia totona, ena nega, goada eiava moni ia gaukaralaia, unai harihari gauna do ita moalelaia. Bona bema ita diba unai harihari gauna ia henia tauna ese ita ia lalokau henia, unai ese iseda kudouna do ia hamarerea. Mauri davana be dava bada harihari gauna hereadaena, badina ia be Dirava amo. Ioane 3:16 ia gwau, “Dirava ese inai tanobada ia lalokau henia bada dainai,  iena Natuna tamona sibona ia vara, ia henia vadaeni ita dekenai.” Mauri davana amo Iehova ese ia hahedinaraia ita ia lalokau henia bada. Bona danu unai ese ia hamomokania Iesu ese ita ia lalokau henia, badina mai ena ura ida ita dainai ena mauri ia henia. (Ioane 15:13) Unai dainai Iehova bona ena Natuna ese idia henia mauri davana amo ita diba idia ese ita idia lalokau henia bada.​—Galatia 2:20.

19, 20. Edena bamona oi hahedinaraia diba Dirava ena harihari gauna, mauri davana unai, oi laloa bada?

¹⁹ Edena bamona oi hahedinaraia diba Iehova ena harihari gauna, mauri davana unai, oi laloa bada? Gau ginigunana be, unai mauri davana ia Henia Tauna Badana, Iehova dekenai diba ma haida oi abia. (Ioane 17:3) Inai buka amo Baibel oi stadilaia karana ese oi do ia durua unai bamona diba oi abia totona. Iehova oi dibaia noho lalonai, emu lalokau ia dekenai be do ia bada ia lao. Bona unai lalokau ese emu lalona do ia veria Iehova hamoalea karadia oi karaia totona.​—1 Ioane 5:3.

²⁰ Iesu ena mauri davalaia boubouna abidadama henia. Iesu ia gwau: “Dirava ena Natuna ia abidadama henia tauna ese mauri hanaihanai do ia abia.” (Ioane 3:36) Edena dala ai do ita hahedinaraia Iesu ita abidadama henia? Unai bamona abidadama karana be iseda hereva amo ita gwauraia sibona lasi. Iamesi 2:26 ia gwau, “abidadama mai ena kara namodia lasi, be mase gauna.” Oibe, abidadama korikorina be iseda “kara namodia” amo do ita hahedinaraia. Ita hahedinaraia Iesu ita abidadama henia dalana ta be, ita hekwarahi iseda hereva bona kara amo ia ita tohotohoa.​—Ioane 13:15.

21, 22. (a) Dahaka dainai Lohiabada ena Anibou ita lao henia be namo? (b) Karoa 6 bona 7 ese dahaka do ia herevalaia?

²¹ Lohiabada ena Anibou dekenai oi lao. Nisan 14, 33 C.E. ena adorahi ai, Iesu ese hebou ta ia hamatamaia, Baibel ese unai ia gwauraia “Lohiabada ena Anibou.”  (1 Korinto 11:20; Mataio 26:​26-28) Eiava Keriso ena mase ena Memorial. Iesu ese unai hebou ia hamatamaia karana amo, ena aposetolo taudia bona idia murinai idia mai Keristani taudia momokanidia ia durua, bena do idia laloatao ena goevadae maurina ia henia karana amo mauri davana ia karaia. Iesu ia gwau: “Inai bamona do umui karaia, lau dekenai do umui laloa totona.” (Luka 22:19) Memorial hebouna karaia karana amo, Iehova bona Iesu ese idia hahedinaraia lalokau badana ita laloa lou. Lagani ta ta ai, Iesu ena mase ena Memorial dekenai ita lao neganai, do ita hahedinaraia mauri davana ita laloa bada. *

²² Iehova ese ia henia mauri davana, be harihari gauna hereadaena. (2 Korinto 9:​14, 15) Unai dava bada harihari gauna ese idia mase vadaeni taudia ia durua diba. Karoa 6 bona 7 ese unai do ia herevalaia.